سهام

التاريخ يعيد نفسه
ويسجل مهزله
ويعيد إلى الأذهان
زمان (يا سيده لا)

رفدت سهام
ما حاجه ساهله الإتحاد يتجاهلها
لا المؤتمر جايب خبر
لا الجبهة بتطلع بيان مُسْتنكره

وركن النقاش الكان بيحلل كل شيء
ليه رفدتك ما فسرها

وين التجمع والروابط؟
يلا قومو مظاهره
إضراب عدييييييل
أو اعتصام
ومحاضرات ما بنحضرها

وإدارة الأعمال وراك.. الجامعة حقو تقفلها
ما إنتي نوره وجوهره
ليمونها ما طاعم بلاك
ما كنتي نكهتها.. سُكره

يا الضي عليك طلت سهام
بي مسكها وكل عنبره
ما شفت لون الشامة ديك
زي الفريع في المنضره

الاقتصاد من غير سهام
كليه جدعت جوكره

يمكن تكون القصة عين.. سحروها ناس البيطرة
كان ليها ناس شمبات تحِج.. والتربية وناس صيدله

دكتور منو البديني صاح ويديك غلط
ما يمكن الورق اختلط
أو يمكن المرجع غلط

دكتور بليد دكتوراه في إيه حضرها
دكتوراه كيف في الاقتصاد
وقيمة الجمال ما يقدرها

قيمة الجمال مافي عملة تعادلها
ما قالو ما شرط امتحان
والقصة ماها مذاكرة

كم ناس كتير الجامعة بالحظ تدخلها
أو بخرة لو ضربت معاك.. دكتوراه ذاتها تحضرها

ما ليها حق كان البلد في الاقتصاد متدهوره
وكل الموارد مهدرة

وين زيها نلقى تاني نقابلها
كانت رقيقة وساحره كيف .. زي نسمة حلوة معطرة
السمحة ست المقدره
عند الجميع هي مقدره
كانت أنيقة كما الفراش.. كل البنات ما بتقدرها
كانت لطيفة مع الجميع.. بي بسمة روحنا بتسحرها
ومن أي مدخل تدخلها.. تلقاهو زايد سُكْرها






 

(مع تحياتي للأخت صاحبة القصيدة وأسرتها والتحية لذكرى الأخ/أزهري الذي كانت أيامنا مزدهرة بوجوده وكان دائماً ما يقول لي متى ستفرج دار الوثائق البريطانية عن هذه القصيدة، التحية للأخوة/ ودالصعيل، رحمة الله، عبدالخالق،الزبير، عبود،عثمان ،عبدالعزيز والنور بخيت)
 

الطيب الشيخ