|
تهنئة ودعوات
شوف ما أجمل التومات
شايلات الفرح …جايات
تخطن كافة العقبات
يوم الوزعوا الدرحات
كانن …أول الفائزات
ودخلن أعرق الجامعات
إسمكن نور الشاشات
شوف ما أروع التومات
فتحن لي الفرح موجات
كان من بدري منسيات
أحْين في مشاعري سُبات
بيوت أشعاري مقفولات
وزمناً بدري مهجورات
خفت يكونوا مسكونات
دخلن فيها بي الطاقات
قوافي الشعر معذورات
قدركن مافي ليه وزنات
بحور الشعر كان ساكنات
ليكن حركن موجات
بيوت أشعاري يا أبيات
قليلتكن ولا السكتات
شوف ما أعجب التومات
تغيب عن أعينن لحظات
يلاقوك تاني مشتاقات
وكل ما اشوفن التومات
زايدات بهجة وإشراقات
في الذوق والخلق آيات
مابيجرن وراء الموضات
ولاسهرن برن حفلات
وما بيمشن مع الماشات
بنات الشيخ يمين شيخات
يا أكبادنا يافلزات
يا أُماتنا يا أخوات
في صحراء الزمن واحات
بريدكن من زماناً فات
إنتن بيه ما داريات
كنتن جوه حضانات
تضاريكن من النسمات
وزنكن كيلو وجرامات
شوف ما أسرع السنوات
مرن ونحن في غفلات
عبير…..ياربيع …عبيرك
فاح……. ملأ الساحات
مناي يا أجمل الحلوات
نفرح بيك… كمان مرات
ونوقد أجمل الشمعات
أحييك ياسحر… بالذات
سِحرك… أعجز الكلمات
وفي عين الحسود قشات
وفي أفراحك القادمات
ليك نوزع الشربات
يارب …تصدق …الدعوات
دعوة ……تبلغ …الغايات
نشوف توماتنا …دِكتورات
نالن …..أرفع ….الدرجات
في المستشفى جن مارات
ينشرن الفرح في الناس
يشفن… يداون العِلات
صل يا فاطر السموات
أزكى وأطيب الصلوات
عدد أحياء وجماد ونبات
تراب الأرض بي الذرات
مياه البحر بي القطرات
مساحات الفضاء الواسعات
تكون محسوبة بي البوصات
لي النبي العظيم واصلات
صلاةً تنزل الرحمات
على اباءنا والأمات
تكون في قبورهم ضاويات
تزيل عن دربنا العوجات
وبيهن تحفظ التومات
في كل الدروب سالكات
ما يمشن يجن راجعات
وبي ستر الله محفوفات
من عين أي مخلوقات
ومن شر كل نفاثات.
|
