حلمنتيش - الرايحة

[ناصر الباشا]

صحيت من نومي نص الليل
ما عارف كيف اصلي حقيقة نومي تقيل
مشيت بشارع الجندول
لقيت الحلوة خاتية القول
حليوة كأنو حبة فول
قلت سلام ما ردت ده ما معقول
و شفت الحلوه صارة و ساكته واقفه صنم
اخوك بالله اتبكم
و قلت ياريتا بس تفهم
نهرتني قالت عايز ايييه ما تتكلم
و فجأة اخوك بدا يتمتم
و قلت سؤال تكون بالله ساعتك كم
و شفت الحلوه تتبسم
قلت يا ود دي فرصة عمري خش على طول
اخوك جاء قريب اتنحنح عمل مسئول
و قلت انا اصلي بدرس طب
و متخصص دراسة القلب
و بعرف وين مكان الحب
لكن يا خسارة حظي كعب
كلما ابدا قصة حب
اقوم ارجف و اتكبكب
و لو سلمت بس لواحدة اتكهرب
و لو حاولت عن الغرام اكتب
يطلع جوابي كلو شطب
و لو شركت جوه الموية يطلع ضب
عشان و الله حظي كعب
قالت لي
تعال نجلس و نتحاور الموضوع ما فيهُ هزار
بدت بالقول انا برضي و فجأة النوم خزلني و طار
صوت الحاجة قوم يا ود خلاص الدنيا ماشة نهار
و من يوما بفتش ليها داراً دار
كان الحلم اجمل حلم بفتش ليه بالدولار
و البلقاها لي فيكم يمين حاوي و اكيد سحار

[اميمه عشريه]

لقيتا ليك يا باشا شاربه مويه الفول ,,
صاحيه تهضرب جيبوا لي قوام الزول
ونقول كلامنا وكلاما يقول :
وينو طالب الطب الخلاني ادمن البندول
حارساهو منتظراهو حول ورا حول
بديت معاهو اتحاور الا الحجه مابيه القول
قوم يا باشا شوف ليلي يا مخبول ..
قبال تصحي من النوم وتلاقيها بعيد النول

[سواااح]

ناصر ..

لكن الحاجة ما قطعت ليك الحلم في الوقت الذهبي

ما تحاول ترجع تنوم من جديد امكن تكمل باقي الحلم

مشكور يا باشا علي الوقفة الحلمنتيشية

دمـــــــــــــــــت ،،

[سواااح]

لقيتا ليك يا باشا شاربه مويه الفول ,,
صاحيه تهضرب جيبوا لي قوام الزول
ونقول كلامنا وكلاما يقول :
وينو طالب الطب الخلاني ادمن البندول
حارساهو منتظراهو حول ورا حول
بديت معاهو اتحاور الا الحجه مابيه القول
قوم يا باشا شوف ليلي يا مخبول ..
قبال تصحي من النوم وتلاقيها بعيد النول

العزيزة اميمة ..

يعني مواهب ومدفونة ..

يلا طلعوا الحاجات الحلوة اللي جواكم

دمـــــــــــــت ،،

[ابراهيم]

يا ناصر سلامات:D

على قول سواح الحاجة جاتك في الزمن الذهبي

ذكرتني يوم كنت حلمان حلم جميل
جات الحاجة صحتني للشاي
انت قايل انا ما حردت الشاي والفطور

تسلم يا باشا

[ناصر الباشا]

جميلة الدواخل اميمة عشرية

مشكورة على بحثك و تعبك معاي للرايحة

لكن التي وجدتيها هذه دايخة من موية الفول

و طبعاً اكيد هي ايضاً حلمانة و بعدين لو صحت

و لقتني ما هو ؟؟؟؟؟؟؟؟؟؟؟؟؟؟؟؟؟؟

زي ما قال سواح طلعوا المدفون ده

[ناصر الباشا]

العزيز سواح

عارف يا عزيزي حتى الان بقول للحاجة اما توريني مكانها

او ارجع انوم مرة ثانية حتى تاتيني يوماً ما

[ناصر الباشا]

الرائع ابراهيم

طبعاً قد تشابهت المواقف و الحاجات ما عايزين

يتركونا نستمتع بحسم المواقف عموماً انا وراء

الحاجة حتى تخبرني اين دستها

[tahaa]

يا مبدع يا فنان

والله إبداع


والحقيقـــة

لمّـا ذاتـو الحـب يكــون في نــوعــو أعمـى

مِــن تــفوح ريــحة عُـطـــورو تـدّيهـــا شــــمّـه

تلقــى واحـــد نفســـو خـــمَّ

ولــمَّ فيهــــو صـــداع وحمَّــــى

وزنَّـــــه في الإضـــنين وصـــمَّـه

ولــمَّـــا لــمّـــــا

تقـــول خـــلاص تـب يـــومو تــــمَّ

وبالله ما تنقطـــع وواصل المشـــوار

[ناصر الباشا]

الجميل طه

لك الشكر يا زول يا رائع على ردك الذي لون الرايحة بتلك اللوحة

و بتمني و الله ان ارى لك مشاركة من هذا اللون من الشعر

الذي يجمع بين الجد و الهزل و حتى نرتاح قليلاً بشي من الفكاهة

و يبدو انك من البارعين جداً في ذلك الضرب من فنون الشعر الصعب

لك الروعة و عايزين نشوفك

[فاتنة]

عزيزي ناصـــــــــــــــــــــــــــــر
لقيتا و له لسه ؟؟؟؟؟؟؟؟؟؟؟

[sambaaa]

هههههههههههههههههههههههههههه
ابداااااااااااااااااااااااااااااع يا مان

زكرتنا حاجات حلوة شديد كانت زمان .. أيام الدراسة وبدايات الصبا
تسلم

[ناصر الباشا]

سامبا الساحر

عارفك و فاهمك و الحياة الطلابية ما اروعها حياة

و ما اجملها ذكريات امنياتي ان ترجع السنوات بنا

و دعنا نقول

حينما كنت صبيا

كان همي كل همي واجباتي المدرسية

[bakri]

والله حتى احلامك جميله ياناصر
دمت لنا يارائع

[سمل الحلفاوى]

http://shwati.tripod.com/aboshadi.wmv
إلى حفـيدة الملوك

سليـل رماة الأحداق هيا ** تعملق ولا تك يوما (كدود)

فأمك كنداكة فى الزمان ** شادت قلاعا وجازت حدود

وقادت جيوشا وهزت عروشا** ودكت حصونا وفكت قيود

ألا يا حفيدة كوش تعالى ** لنعلى أساسا بناه الجدود

نعيد الى كوش مجد تهارقا ** ونزحم آفاقنا بالبنود

ونحمى حمى أرضنا بالدماء ** ونرفع هاماتنا كالسدود

نصد عن الأرض كيد الأعادى ** ونبطل شر الحسود الحقود

لتسجع فوق النخيل الحمام ** وتشدوالقمارى وتزهو الورود

ويعزف طنبور وردى ومكى ** أنين السواقى ولحن الخلود

ويهتف (إيسب) عشقا ل(هيلة) ** بصوت ملىء كقصف الرعود

هنا الحب كالنخل ينمو طويلا** ويبقى جميلا جمال الوجود

وتبقين أنت كما أنت (أشرى) * * ونبقى على الدهر رمز الصمود

ونهتف جمعا: (نلسى نلسى) ** (إيلسى أيلسى) إلى أن نعود
الخال البروف نورالدين منان اول مؤسس الحلمنتيش فى جامعة الخرطوم ( من ابناء جزيرة كولب
وحلياً مقيم فى امريكا ( سابقاً سفير (جيبوتى وهند )

[كندشة]

ود الباشا يديك العافية
والنوم بجيب اللوم

[ابراهيم]

يا مبدع يا فنان

والله إبداع


والحقيقـــة

لمّـا ذاتـو الحـب يكــون في نــوعــو أعمـى

مِــن تــفوح ريــحة عُـطـــورو تـدّيهـــا شــــمّـه

تلقــى واحـــد نفســـو خـــمَّ

ولــمَّ فيهــــو صـــداع وحمَّــــى

وزنَّـــــه في الإضـــنين وصـــمَّـه

ولــمَّـــا لــمّـــــا

تقـــول خـــلاص تـب يـــومو تــــمَّ

وبالله ما تنقطـــع وواصل المشـــوار

سلامات يا رائعين .. بس عندي تعليق على كلام اخونا طه ..

يا زول دة حب ولا انفلونزا الطيور:confused: