*** هترشـــات *** [الأرشيف] - منتديات ودمدني

HAMADTO

06-05-2006, 12:13 PM

أثناء زيارتي الاخيرة لمدني في شهر ابريل رأيت أن هناك نهضة عمرانية وعمل يبذل لاعمار المدينة وهناك تجديد و تجميل لكل الدوائر الحكومية والشوارع الرئيسية ونادي الجزيرة ومستشفيات جديده افتتحت وغيره الكثير ...

ولكن ...

الاهتمام والمتابعة للأعمال المنجزه هو ما ينقصنا
واكبر مثال شارع النيل وبالذات مكان " قدر ظروفك " كانت مضاءة وجميلة ومزروعة زرع جميل محاط بسياج
وفي زيارتي الاخيرة وجدتها مظلمة والانوار مكسرة والمقاعد مكسره والزرع نصه مات ...

HAMADTO

06-05-2006, 12:20 PM

مشروع التشجير على اطراف شارع سنكات جبرونا وعدد من شوارع مدني كانت فكرة ممتازة وتم تنفيذها بنجاح وكان الاهتمام بها في البداية ..

ولكن ...

الآن الاشجار عدد كبير منها إن لم تكن كلها قد ماتت ولم يتبقى سوى الاقفاص ...

zoolfrda

06-05-2006, 09:37 PM

عجبني الضوء الذي سلطته يا نبيل

وعجبني أكثر حرصك الجميل على مدينة الأمن والآمان

وكلي امل ان تتحول هذه الهترشات إلى إنجازات

sambaaa

06-05-2006, 09:49 PM

وانا عجبني اكتر عودتك الغالية يا حمدتو
حمداً لله سلامتك
واكيد مدني كانت منورة بوجودك

أبوبكرحامد

06-05-2006, 10:57 PM

حمداً لله على سلامتك يانبيل - المشكلة عندنا تكمن فى غياب الرقابة والمتابعة للعمل وليست الإمكانات كما يتصور البعض - والله المستعان

HAMADTO

07-05-2006, 09:41 AM

الرائعون دوماً
ذانون
سامبا
ودالمأذون
لكم مني كل الود والاحترام ... وربنا يسلمكم من كل شر انشاء الله

فعلا يا ودالمأذون الداء هو غياب المراقبة والمتابعة للعمل ونتمنى أن يجدوا الدواء الشافي حتى لا نفقد كل جميل اتعمل لمدني ...

HAMADTO

07-05-2006, 10:44 AM

فضلت أن تكون اجازتي متزامنة مع ايام المولد النبوي الشريف للاستمتاع بايام المولد مع الاهل والاصدقاء وكانت لحظات جميلة وانا اتابع زفة المولد وهي متجه لميدان بانت " ميدان المولد " واسمع الايقاعات والدفوف والطبول بقيادة فرقة سلاح الموسيقى وممثلين للطرق الصوفية وخرج اهالي مدني رجال ونساء .. عواجيز واطفال لرؤية الزفة وكانت بحق جميلة ..

ولكن

مذيع مدني الشهير قطر كان وراء الزفة خطوة بخطوة وبصوته الجهور يعلن عن الفيلم الهندي ... بسينما ....
اول عرض بالسودان لا تفوتك الفرصة
بطولة النجم الكبير ...
والنجمة الرائعة ....
اليوم بسينما .... الفيلم الهندي ....

اميمه عشريه

07-05-2006, 11:47 AM

حمد لله على السلامه وعودا حميدا ... يبقي السودان ملئ بالامآل ويبقي السوداني هو اكثر مخلوق على وجه البسيطه يضع احلامه البسيطه قوتا يقتاته كل يوم دون ان يجد هناك من يستمع اليه لا نحتاج الا الي نهضه تواكب براميل البترول المتدفق ولا نعرف اين تدفق حقيقه ,,,,

الجندي المجهول

07-05-2006, 11:56 PM

والله يا حمدتو رجعتنا لي ايام جميلة خلاص وبالجد اشتقنا لي سماع صوت مدثر القطر ويا حليل النيييييييل الاتحاد الاتحاد النيييييل الخامسة عصرا باستاد ود مدني يقود النيل المعلم حفرة قادر بيه الخواجة والخ يا مدني يا جميلة

وياريت المنشأت الجديدة تجد الاهتمام من الجميع لانها مدني وروحي ليه مشتهية ود مدني

HAMADTO

09-05-2006, 04:29 AM

اميمة عشرية

الله يسلمك من كل شر
أتمنى ان تتحقق النهضة والتنمية في ظل البترول والسلام ...
وأن يتمتع (المواطن) السوداني بخيرات بلده النفطية وأن نكون كما نرى هنا بالامارات من نهضة وتطور وحياة رفاهية ولا في الاحلام ...

جعلت (المواطن) بالاحمر لما تحمله هذه الكلمه هنا بالامارات من معنى واظنها كذلك بدول الخليج ..

ولي هنا طرفه على كلمة (مواطن)

عندما عدت من السودان وأثناء الونسة قلت أن اهلنا القاعدين هناك في السودان الواحد فيهم بكون شايل أغلى وأحدث موبايل
قام عمنا دكتور عبد الناصر ابوزيد قال :
عارفين ليه هناك شايلين اغلى وأحدث الموبايلات ...
قال: لانهم هناك مواطنين..

HAMADTO

09-05-2006, 04:33 AM

الجندي المجهول

لك مني كل الود والتقدير وربنا يرجعك سالم غانم انشاء الله ..
ونشوفك هناك وانت عريس انشاء الله ..
بس بدلة العرس الاختاره ليك الرشيد ما تلبسه
تحياتي

HAMADTO

09-05-2006, 04:38 AM

ارتفاع سعر الجنيه (الدينار) مقابل العملات الاجنبية كلام جميل ومؤشر جيد لانتعاش أقتصادي ولو بنسبة ضئيلة ...

ولكن ..

المواطن البسيط حتى الآن مازال يعاني من الغلاء في ابسط الاشياء

عزيز عيسى

09-05-2006, 02:59 PM

يا نبيل ألف حمدالله على السلامة..
عمليات النظافة في الشوارع كيف؟
والذباب والباعوض في الجزيرة إن شاء الله قل كثير؟
وهل الأوضاع تبشر بالخير؟
قلوبنا مع الأهل في مدني..

مهيرة

09-05-2006, 08:40 PM

ارتفاع سعر الجنيه (الدينار) مقابل العملات الاجنبية كلام جميل ومؤشر جيد لانتعاش أقتصادي ولو بنسبة ضئيلة ...

ولكن ..

المواطن البسيط حتى الآن مازال يعاني من الغلاء في ابسط الاشياء

سلام حمدتو
وحمدا علي السلامة
والبركة فيكم

نحن كل الهترشات بنستحملها
وانخاض العملات الاجنبية امام العملة السودانية
شيء يفرح القلب
وأن يكون الدولار بمبلغ 2000 جنيه اعتبارا من
يوم السبت القادم 12/5/2006 يستحق التصفيق
لوزارة المالية وبنك السودان

ولكن :
يجب ان يوازي هذا العمل الممتاز انخفاض في
السلع المعيشية والخدمات

والا يكون قرار البنك المركزي ووزارة المالية
من اجل ارضاء جهة اخري !!!

HAMADTO

10-05-2006, 06:46 AM

العزيز عزيز
الله يسلمك يا رب
البلد بقت انظف من اول ... الشوارع نظيفة نوعا ما ... لان الكوش اختفت خلاص وبقت تجي العربات - و لا مؤاخذه - تحمل الوساخة من البيوت ... والاغنام والحمير الفي الشوارع ساكت برضو اختفت ... يعني ممكن نقول النظافة حتى الآن تأخذ 60 %

الذباب ده اظنه جو مصنع البف باف بكون موجود وما بموت ...
الباعوضة والحمد لله من ما مشيت لحدي ما جيت ما سمعته زنته ... لكن الخريف جا خلاص وبتظهر برك الموية وربنا يكون في عون اهلنا إذا الجماعه ما جهزوا للخريف تمام ...

حقيقة تقال الاوضاع مبشرة جدا والبلد بتشعر بيها فيها حركة شديده وقروش كتيره ومشاريع جايه كتيره ...

لك مني كل التحايا يا خواجه

HAMADTO

10-05-2006, 07:01 AM

مهيرة
تسلمي انشاء الله من كل شر
أشاطرك الرأي تماماً ... يجب أن يوازي انخفاض الدولار انخفاض في الاسعار ...
نأمل أن يكون حقيقة وليس ارضاء لجهة أخرى ...

تعرفي حسي انخفاض الدولار ده معانا كمغتربين بالخسارة ...
لانه الواحد كان الاربعمائة دولار بتعمل ليهو مليون حسي لازم خمسمائة دولار ...
وده كله عشان الاسعار في محلها ثابته والدولار بس النازل ...
نتمنى انشاء الله انخفاض قريب يوازي انخفاض الدولار

HAMADTO

10-05-2006, 07:10 AM

المواصلات والاتصالات في مدني أصبحت اسهل حاجه وذلك لتعدد وسائل النقل من حافلات وامجادات واتوزات وركشات ..
كما انتشرت مراكز الاتصالات في الاسواق والاحياء والجامعات والاكشاك .. يعني في كل مكان بتلقاها ...
واصبح الاستثمار في هذين المجالين على اشده لانه من اكثر الاستثمارات التي تجني ارباح يومية جيدة وفي اغلب الاحوال الإيراد يأتي كما هو مرسوم له ....

ولكن ....

التقليد الاستثماري الأعمى يضعف الارباح

امير عبدالباقي

10-05-2006, 09:51 PM

الاخ العزيز حمتو
فعلا البلد نظفت واتغيرت الي الاحسن لكن كما ذكرت ان الدولار نزل لكن المعيشه مولعه لسه نتمني من الحكومه تلاحظ للاشياء دي لانو كده بكون ماعملو شي بل فيه ضرر للناس ونتمني عجله التنميه تمشي في تطور دائم حتي نرجع للبلد

zoolfrda

10-05-2006, 11:05 PM

يا ابو ريان

تحيات من بعد السلامات

كلامك حلو شديد

وخلاص هانت . . إن شاء الله البلد حتستعدل قريب كده وتنظف وعجلة التنمية حتدور وحتبقى 100% وآخر حلاوة

بس باقي لي الكلام ده إن شاء الله إن شاء الله في طهورة

جلال ولد إبراهيم حامد بن عبد الجليل محمد محمود عباس أمير عبد الباقي

الجندي المجهول

10-05-2006, 11:45 PM

HAMADTO

12-05-2006, 01:31 AM

الغالي الأمير عبد الباقي
مشتاقين والله يا ابوريان لي منك زمن طويل ....
معاك حق لسه البلد مولعه ...
رغم ما تشهده البلاد من نشاط وحركة كبيرين على المستوى السياسي والاقتصادي ...
فنتمنى الاستفاده من موارد وامكانيات البلاد وتوظيفها لخدمة المواطن وأن لا تكون لخدمة فئة معينة ...
كما نأمل ان تكون البلاد في مصاف الدول المتقدمه ...
وكلنا انشاء الله يجدونا راجعيين للبلد

HAMADTO

12-05-2006, 01:38 AM

الزول الفرده
شنو يا فرده التشاؤم ده ....
تفائلوا خيراً تجدوه ...
وانشاء الله يتحقق في عرسك قبل طهورة الحفيد السابع لامير عبدالباقي
لك مني كل التحايا

HAMADTO

12-05-2006, 01:45 AM

الجندي المجهول
لك كل التحايا ...
ونتمنى أن يكون تخطيط القائمين على هذا الامر تخطيط جيد يصب في مصلحة الوطن والمواطن وأن لا يكون مجرد تخطيط يهدف لخدمة اهدافهم ومصالحهم ...

نزار حسن محمد

12-05-2006, 06:19 PM

الاستاذ حمدتو ... ياريت كل مواضيع المنتدى هترشات من هذا النوع ... وانا عندى مداخله بسيطه وهى تتمثل فى الساده موظفى الدوائر فىجميع الجهات الحكوميه كان ناس الكهرباء او ناس الاشغال او ... ... الخ اولا لايوجد الحس الوطنى اتجها الوطن او المواطن
كل التعامل من اجل الراتب وهنا لااقصد الموظف البسيط وانما المسؤلين اصحاب القرار . ولى عوده اخى حمدتو ..مع كل الود نزار

HAMADTO

14-05-2006, 11:23 AM

نزار حسن محمد
لك مني كل الود والتقدير اخي نزار
معاك حق وكلامك صحيح 100% ...
فكثير من المسؤولين همهم الوحيد يطلعوا بحاجة تقيلة قبل من يشيلوهم من منصبهم او يقلبوا عليهم وما عندهم شغله بالوطن ولا بالمواطن ...
ولكن من شجع المسؤولين على ذلك أكيد ضعف المراقبة والمحاسبة وضعف الوازع الديني والقوانين
فلابد من ايجاد قوانين صارمة لمحاسبة المسؤولين ...

HAMADTO

14-05-2006, 11:32 AM

" انت دافع من جيبك "
عبارة شهيره عندنا وأكثر ما تقال للمسؤول أو الموظف أو ... الذي يريد المحافظة على المال العام من الهدر والنهب وسوء الاستعمال ....

ولكن ...

من المؤسف ان المال العام ليس كالمال الخاص ...
لا بأس من هدره ونهبه ولا مانع من أساءة استخدامه

HAMADTO

18-05-2006, 12:50 PM

في ميدان بانت (ميدان المولد) توزعت خيام الطرق الصوفية (الطريقة البرهانية والمكاشفية والسمانية والقادرية العركية والاحمدية البدوية و .... هذا على سبيل المثال لا الحصر) حول الميدان وامتلأت عن آخرها بالزوار ....

ولكن ...

لاحظت عدد من الطرق لها أكثر من خيمة واحده ...
وعندما سألت كان الجواب واحد ...
الجماعة اختلفوا على مشيخة الطريق وكل طرف يرى أنه احق بالمشيخة فتفرعوا ... وانقسم المريدين ...

أبوبكرحامد

20-05-2006, 10:29 PM

HAMADTO

22-05-2006, 06:30 AM

يا ود المأذون يا أخوي ناس " فرق تسد " قدروا على الاحزاب والاخوان في البيت ...
دحين ما بقدروا على الفقراء العلي باب الله ...
كثير من الطرق الصوفية دخلت في اللعبة ....

HAMADTO

29-05-2006, 07:04 AM

" غابة أم بارونة " كانت من أجمل الأماكن التي يمكن زيارتها بودمدني وقضاء أيام الجمع والعطلات بها ...

ولكن ..أين هي الآن ؟

فقد أنضمت إلى قائمة طويلة عريضة ...
قائمة الطمس والإزالة .... إزالة كل ما هو عريق بدلاً عن تطويره واعماره
نحن في زمن الاستثمار والبلد كلها بقت أراضي استثمارية ...
بس انشاء الله قروش غابة ام بارونة ناس الولاية استفادوا منها ووجهوها الوجهة الصحيحة

elfatih61

29-05-2006, 08:40 AM

أم بارونـه قالوا ح يعملوها منتجع سياحــي بعد أن أشتراها رجل الاعمال المصري 00000 نسيت أسمو !!
إنشاء الله يكون المشروع ذي ما قالوا وسمعناعليــه ما يطلع لينـا ذي
( دريم لانــد )
- بعض شوارع مدنى مضاءة بالكامل من أولها لاخرها 00 لاحظت أنو الانوار قويـــة والاعمدة
الجديدة العملوها للانوار دى قريبة شديد من بعضها--- يعنى لو عملوها ذي المسافة بتاعت زمان كان
مدنى كلها نورت 00 !!! ولا رأيكم شنو !!

الفاتح

نزار حسن محمد

29-05-2006, 02:42 PM

... تعرف يالفاتح الواحد بقول الحمدالله اته نورت الاعمده الخوف انه بكره نلاقى اكثر من نصها اتكثر ... المهم فى المرحله القادمه لمدينة ودمدنى مشروع الصرف الصحى ... ودمت اخوانا الغالى نبيل .. ومزيدا من الهترشات..

elfatih61

29-05-2006, 09:42 PM

نزار كلامك دا أنا متوقعوا لانى لاحظت الاعمدة ( الجديـــدة ) مرصوصة على بعد نصف متر من حافة الظلط
يعنى كل حادث حركة بي عمود !! ما عارف الاعمدة القديمة كانت مالا !

HAMADTO

30-05-2006, 04:53 AM

الفاتح
صحيح كلامك رجل الاعمال المصري أحمد بهجت صاحب مدينة دريم لاند في مصر وأرض دريم لاند في ولاية الجزيرة وصاحب قنوات دريم اشترى جزء من غابة ام بارونة والتي مساحتها 300 فدان تقريبا والباقي على ماسمعت بيعت اراضيها لأكثر من جهة استثمارية لدعم ميزانية الولاية ...

http://www.asmilies.com/smiliespic/FAWASEL/li_mo_b.gif (http://www.asmilies.com)

والله يا الفاتح والحق يقال مدني ما شاء الله تشعر انها تتقدم إلى الامام ولكن تشعر انها مجرد افكار وليس تخطيط ...
يعني اقصد واحد جاءته فكرة فقاموا نفذوها طوالي دون تخطيط اوحسابات أخرى ...
أو حتى لو كانت الفكرة ناجحة وتم تنفيذها بامتياز بكون ما في متابعة ومراقبة للعمل المنجز ...
نتمنى كل التقدم والازدهار لودمدني

HAMADTO

30-05-2006, 05:08 AM

نزار حسن
نتمنى أن تكون هناك خطة قد وضعت لمشروع الصرف الصحي ....
ونتمنى أن تكون هناك جهات استشارية وجهات اشراف ومتابعة للاعمال ...

http://www.asmilies.com/smiliespic/FAWASEL/bloem_05.gif (http://www.asmilies.com)http://www.asmilies.com/smiliespic/FAWASEL/bloem_05.gif (http://www.asmilies.com)http://www.asmilies.com/smiliespic/FAWASEL/bloem_05.gif (http://www.asmilies.com)

elfatih61

30-05-2006, 10:15 AM

حمدتـو 00 كيفـك إنشاء الله تمام
تفتكر يا حبيب في زول في ولاية الجزيرة قاعد يفكر في الصرف الصحــي
مع أنو المشروع دا واحدة من الشركات الكبيرة البنشوفها هنا في الخليج
ممكن تنجزوا في مدني في وقت قياسي 0
يمكن يفكروا فيه لمن تتأزم الامور ، أو لمن تقع المصائب ذي ما حصـل لي
ناس حي الملازميـن في أمدرمان 00 والله يستــر 0

نزار حسن محمد

30-05-2006, 12:48 PM

الاعزاء... الفاتح ..... وحمدتــــــــــــــــــــــــــو
الفاتح .... المهم فى الموضوع انه الاعمده نورت ...اما اصحاب العربات...البخليهم اعملوا حوداث شنوه ... اوع تقول لى البارات... اشتغلت كمان ...
تعرف فى موضوع الصرف الصحى + تشيد اكثر من مستشفى فى ولاية الجزيره... انا شفته الخرائط عند مستثمر ... والامر قيد الدراسه بين المستثمر وحكومة الولايه
واتمنى نشوف هذا الامر قريبا على ارض الواقع

حمدتـــــــو الفنان ... تعرف ياحبيب زمان كان فى ام بارونه بقبضه القرود بالمريسه... مع المستثمر المصرى ...اظنى حبكون براندى ساكت...
المهم نريد اعادة الحياه مره اخرى الى ام بارونه وغيرها ... والواحد متفائل خير ...و اعطيكم الصحه والعافيه .. مع خالص ودى،،

elfatih61

31-05-2006, 09:08 PM

نزار 00
الاعمدة بصدومها نتيجة الزوغان من الحفر00 تزوغ من الحفرة تلبس في العمود !!
وأشكرك لانو بشرتنا بموضوع الصرف الصحي والمستشفيات وإنشاء الله تكـون
الاستجابة سريعة من المستثمر ويبدأ العمل 00 وعايزين مدني تكون أجمـل المدن
لانو ناسا جميليـن وحبوبيــن ويستاهلوا الاجمل من كل شىء !!

تذكر زمان يا نزار لمن كان يجى رئيس دولة يزور السودان 00 يجيبوه مدنـى طوالى
عشان يفرجوه على بيوت بركـات وبيوت البحوث الزراعيــة لانها كانت فعـلا حاجة
جميلة 00 آآآه يا زمن !!

نزار حسن محمد

01-06-2006, 02:12 AM

الغالى ... الفاتح .. كلامك فى محله فعلا... الحفر هى السبب الرئيسى للحوادث ..ونتمنى الاهتمام بها فى المرحله القادمه والطروق هى شريان الحياه ..
وياحليل الزمن الجميل ... والله يالفاتح .. انا تفتحت عينى على هذه البسيطه.. فى منطقة بركات ومدنى وبتذكر التفاصيل الدقيقه للحياه زمان... وعندما كنت بالمرحله الابتدائيه
البستا الرئبس الاذهرى باقة ورد والرئيس القذافى والشاعر نزار قبانى والاخير حضرته معه الليله الشعريه بنادى الجزيره وياحليل الزمن الجميل وناس زمان
بالفعل كانت البحوث الزراعيه والحى البريطانى ورئاسة مشروع الجزيره والدرجه من اجمل الاحياه ...وكانوا ومازاله اهل الجزيره من ارقى البشر وياريت يالفاتح الجيل الحالى
يعرف كيف كانت مدينة ودمدنى والتى نتمنى ان ترجع للعصر الذهبى.. وانا مازالت متفاءل خير اما بخصوص المشروع الصحى والمستشفيات فقد اتى وفد من حكومة الولايه وقابل هذه المستثمر... والاجراءات ماشيه وعلى حسب علمى التمويل جاى من دوله اروبيه لهذا العمل الضخم وانشاء الله قريبا نشوفه على ارض الواقع
كل الحب والود لك ولعزيزنا حمدتو الذى جمعنا فى هذه الهترشات الجميله مع خالص تحياتى ،،،، اخوك نزار حسن

elfatih61

01-06-2006, 05:31 AM

أخوى العزيز 00 نـــــــــــزار

الشهر الماضي دا وانا في الاجازة عملت جولة داخل الحي البريطاني.... وأنا ماشي كنت بذكر جداول المويه
بتاعت زمان وكنت بذكر صوت الطيور بالمغارب والشجر والورد الاحمر والابيض ... وطفت على بيت ( بوكاســا )
ووجدتــه خرابة ....... ومكان البنطون القديم .. وجنب المسرح القومي (دا ضبطوه وعملوا فيه مجمع ثقافي رائع
شديد ) .. لكن الحي البريطاني وبيت بوكاسا يعملوا حسره لمن تذكر وضعهم الزمان .

الفاتح

HAMADTO

01-06-2006, 01:32 PM

عزيزي الفاتح
معاك حق نحن لا نعترف بأن الوقاية خير من العلاج متعودين دوماً على معالجة المشكلة بعد وقوعها ولا نؤمن بوضع الحلول قبل وقوع المشكلة .... وانشاء الله الجماعة يدفنوا الحفر قبل ما السواقين يلبسوا في العمود ...
مسؤول من الخير كنت خليتهم شغالين توسعة في الشارع المؤدي للسوق الشعبي بداية من مدارس فريني انتهوا منه ؟

المجمع الثقافي بقى ماشاء الله حاجة جميلة وفيهو صالة انترنت روعة ....

HAMADTO

01-06-2006, 01:45 PM

الغالي ود حسن
الله يبشرك بالخير ياراجل يا بركة ... وانشاء الله ناسنا ينستروا مع المستثمر ويتم التنفيذ في اسرع فرصة ...

احنا متفائلين خير غايتو وانشاء الله صاحبك ده من غير براندي يعمل لينا ربع العامله هو في مصر ...

HAMADTO

01-06-2006, 01:48 PM

لا اريد ان اقول ان ود مدني هي مدينة الثقافه وهي التي انجبت فلان وعلان
وهي مدينه المبدعين اتت بالكاشف وود اللمين ............. الخ لأن كل هذه الاشياء من المسلمات بأمرها ولكن ما الفائدة في كل هذا الزخم الذي إمتلأت به وهي تفتقد لأشياء مهمه كان من الضروري تواجدها حتى يكتمل العقد الفريد ويتسق في منظومه محكمه وكثيرا ما استغرب لماذا لا تكون في مدينتي مكتبه عامه يرتادها مواطنها في كل وقت يشاء مكتبه مجانيه تحتوي علي مختلف الكتب والصحف اليوميه ‘ لماذا لاتوجد مقاهي ثقافيه يلتقي فيها ادباء ومثقفي المدينه وكل محبي الادب مثلما توجد في حواري القاهره او الخرطوم.
والشئ الاهم توجد لدينا جامعة الجزيره وثلاثة جامعات خاصه لماذا لا يكون فيها قسم لدراسة الموسيقي والغناء مثله مثل المعهد العالي للموسيقي الم يكن من النشاذ الا توجد هذه الاشياء في مدينة بقامة ودمدني وتذهب لمدن مصنوعة ثقافيا . الا يوجد رجل رشيد في حكومة الولايه يعنيه الامر ولو بالتفكير
ام يعجبهم امر تسولنا الادب والفن من الخرطوم ومعيننا يمكنه ان يستوعب كل السودان لماذا لتوجد صحيفه قوميه تصدر من المدينه فالكتاب كثر في مجال السياسه والاقتصاد والمجتمع والفن والرياضه.
حقيقة انا لست بالشخص الحالم ولكن كل هذه الاشياء التي ذكرتها لا اري مايمنع تنفيذها على ارض الواقع ولكننا مازلنا في انتظار الرجل الرشيد
فهل يوجد فيهم رجل رشيد ؟؟؟؟؟؟؟؟

عليكم الله رأيكم في هترشة ضياء الدين دي شنو
هل يوجد رجل رشيد؟

elfatih61

02-06-2006, 01:19 AM

حمدتو 000 تحياتي

بالنسبة لشارع السوق الشعبى لحدى 19/5/ كانوا وصلوا اللفة البتودى على التلفزيون
والباقي مقلوع منوا الظلط بالكامل لحدى الاشارة الجنب مدرسة فرينى التجاريــة
00 يعنى شغل سلحفائي !!!

نزار حسن محمد

02-06-2006, 06:59 PM

العزيز حمــــدتو والله كلام ضياء صاح 100% وذى ماقلت هل هناك رجل رشيد اتمنى ان يوجد مثل هذا الرجل ليحقق اراء ضياء الى ضياء يعم الجزيره،،،،

عـــزيزى الفاتح .. تعرف فى الفتره السابقه سافرت لمدنى اربع مرات فى فترات متقاربه وكان معى ضيوف من اهل الامارات ذهبوا معى لفعل عمل خير كبير بودمدنى جزاءهم الله خير وكنت قد حجزت لهم بفندق امبرايال وطبعا شارع الدباغه شارعنا اليومى فى اخر الشارع توجد اشاره ضوئيه تعرف الاشاره شغاله بمزاجه والعسكرى بمزجه وسائقى الباصات بمزاجم والله يالفاتح مره اضحك ومره ابكى .. واسع بعد ثلاثه اسابيع مسافرين انشاء الله اكون الحال انعدل ...طمئنى ... لك الود ،،،،نزار حسن

HAMADTO

03-06-2006, 10:20 AM

الاعزاء الفاتح و ود حسن
يعني الكلام المطلعنوا فينا اخوانا العرب صاح والا شنو وهو اننا اكسل ناس في الدنيا ...
نتمنى اننا نغير المفهوم ده وننشط شوية كده ..
انا خايف يا الفاتح ارجع شهر 11 والقاهم لسه ما انتهوا يبقى موش عمل سلحفائي دي السلحفاء تاني تقول ما تشبيهوني بالناس ديل ....

دي اشارة تقاطع ود الجبل موش كده يا نزار ... ما اظن تلقاها اتغيرت اطمئن ...

elfatih61

03-06-2006, 11:32 AM

نــزار 00 حمدتــو
والله أنا بتمنى الشارع دا يكتمل اليوم قبل بكــرة 00 لكن دا الحاصل فعـلا نعمل شنو
إنشاء الله الجماعة ينشطوا شويــه ويقدروا يعملوا المطلوب وإنشاء يا ( نـــزار ) تنستر
مع ضيوفــك 00 غايتـو المقابـر عملوا فيها ( ســور ) وشارع ظلط بحيطها تقريبـا كلها

لكن يا حمدتو شهر 11 بتكون الامور ضبطت ما تنسى تزور ( الكاســح ) و ( سنتر البرعي)
ولو أكلت سمك عند ( حسن جاد الله ) ولا أكلت فول عند ( كشــك ) ما تنسى تذكرنـا معاك
ولك التحايــا 00

الفاتح

نزار حسن محمد

13-06-2006, 05:58 PM

حمد تـــــو شنوه الحاصل الهترشات كملت ولا الحاصل شنو يالله هترش لينا خلينا نفتو... وكمان بالالون

HAMADTO

15-06-2006, 02:17 AM

الفاتح
نتمنى ان يكتمل الشارع ويكون هناك سرعة وجودة ومراعاة الله في أداء العمل ... سمعت أن سور المقابر وقع في طفل جاب أجله على جهة الاندلس ...

http://www.asmilies.com/smiliespic/FAWASEL/li_mo_r.gif (http://www.asmilies.com) http://www.asmilies.com/smiliespic/FAWASEL/li_mo_v.gif (http://www.asmilies.com) http://www.asmilies.com/smiliespic/FAWASEL/li_mo_b.gif (http://www.asmilies.com)

نزار
لك كل الود والتقدير بس الايام دي متابع هترشات المونديال عشان كده صعب الكتابه ... والهترشات حانتظرك بعد ما تمشي السودان وتجي تورينا الجديد شنو ....

معتز حمدتو

06-07-2006, 01:03 AM

سمعتوا ولا ما سمعتوا ؟

محمد حسين (المميز)

12-07-2006, 03:26 AM

الســـــــــ عليكم ـــــــــــلام

لكم التحيه جميعا وبقول يــارب كـــده نشـــــوف مدنـــي وفي اقــرب فرصه
اجمل واحلى من جـــده ودبــــي,,
قولـــو آآآآآآآآآآآآآآآآميـــــــن,,

وشكــــــــــــــرا,,,,,,

HAMADTO

12-07-2006, 04:15 AM

اهلا وسهلا بابن عمي معتز ... تعرف الجماعة سامعين
ولكن ........
عاملين اضان الحامل طرشة ..

HAMADTO

12-07-2006, 04:18 AM

اهلا وسهلا بالمميز ... آآآآآآمين وان شاء الله بتكون احسن من جدة ..
ولكن .....
احسن من دبي دي صعبه شديد ...
نتمنى كل التقدم والازدهار لمدني والراحة والرفاهية لناسها الطيبين ....
ولك كل الود والتقدير

HAMADTO

12-07-2006, 04:33 AM

http://www.y1y1.com/u/upload/wh_319387054.gif http://www.y1y1.com/u/upload/wh_319387054.gif http://www.y1y1.com/u/upload/wh_319387054.gif http://www.y1y1.com/u/upload/wh_319387054.gif

الطفرة الحضارية التي يشهدها السودان في مجال الاتصالات والتوسع في نشر الوعي التقني وتوسيع القاعدة العريضة لمستخدمي الهاتف النقال شئ جميل جدا ويجعل السودان في مصاف الدول المتقدمة والمتطورة في مجال الاتصالات ....
ومما لا شك فيه فإن وجود شركات اتصالات متعددة يدفع إلى التطوير والابتكار في نوعية الخدمات او تقليص التكلفة وهي في النهاية تصب في مصلحة المستخدمين ...
ونأمل أن تستطيع الشركات الجديدة المنافسة وأن تقدم خدمات رخيصة وجيدة
ولكن ...
اعملوا حساب للشبكة ثم الشبكة ثم الشبكة

http://www.y1y1.com/u/upload/wh_319387054.gif http://www.y1y1.com/u/upload/wh_319387054.gif http://www.y1y1.com/u/upload/wh_319387054.gif http://www.y1y1.com/u/upload/wh_319387054.gif

نزار حسن محمد

24-07-2006, 02:00 AM

الغالى نبيل والله جبت التايهه ذى مابقوله تعريف يانبيل الان فى ثلاثه شركات وهم مباتيل والسودانى واريبا .. وممكن تشترى الشريحه للمبايل بى عشره الف فقط لكن تعال شوف الشبكه وماادراك ما الشبكه تكون بتتكلم مع الامارات يدخل عليك وحد من الحاج عبدالله وانت فى وادى وبتاع الحاج عبدالله فى وادى وناس الشبكه فى وادى
كدى خلينى افضه ليك عشان احكى ليك على رواقه ... انتظرنى فى هترشات عندى الكثير المثير مع تحياتى اخوك نزار حسن

hamad2

06-08-2006, 07:21 AM

سلام يا ابن عمي
حمداللة علي السلامة
الشوارع كيف...يعني قصدي شوارع مايو اتظبطت ولا لسة
وبالمناسبة انخفاض سعر الدولار معاكم بالخسارة لاكن معانا 100%100

hamad2

06-08-2006, 07:42 AM

لو التمني بأيدي
كنت اهديتك عيوني
وسقيتك من وريدي
والله ما اظن في زول ببخل با لتمني
وانشاءاللة نسمع كل خير عن مدني

hamad2

06-08-2006, 08:34 AM

مدني الحنينة كتبت ليك
قدست لي ريدك هواك
وعشقت للازرق عشانك
وحبينا نجم في سماك
حبينا للزول البريدك
حباك فطرة واحتواك

هدية لي احلي ناس ناس مدني
اهل المنتدي

HAMADTO

06-08-2006, 10:10 AM

اهلا يا ابن عمي كيف اموركم وكيف الدراسة والهنود معاكم ...
شوارع مدني عامة احسن من اول كتير وكل مرة بحاولوا يظبطوا عدد من الشوارع ....
والله الدولار معانا بالخسارة شديد حسي الواحد بقى الواحد افضل يحتفظ بالجنيهات السودانية من الدولارات الامريكية
حسي الجماعه هنا بقوا يشيلوها موبايلات او اي حاجة تانية غير دولارات لانها ما بتغطي معاهم..
ان شاء الله بس بعد ده كلوا اقتصاد البلد يتحسن والناس تقدر تعيش تمام ...

معتز حمدتو

06-08-2006, 11:45 AM

ياكبيرنا الدولار فوت ونحن من وراهُ .
الف الدرهم ما بجيب التموين .
الف الدرهم حق الترحيل للمدارس .
الف الدرهم مصاريف للبنات .
الف الدرهم مصاريف السيد محمد وصافي + ود عمك الجقر في الهند .
الف الدرهم للبنك .يوم واحد في الشهر تقعد تتلفت .
يعني الخيل تجقلب والشكر لحماد .
في هترشه اكتر منك كده ، عشان كده لالوب بلدنا ولا بترول الامارات .
وغيث يا مغيث لبنان والعراق والامه العربية .

mohammed ahmed

06-08-2006, 01:33 PM

أخونا نزار والإخوه
ما قلنا ليكم شغنا ما مؤسس لسنوات عديده لأنو القائمين علي أمر الإتصالات ما بهم إلا الربح والعائد السريع ( يعني مثلا خدمة الإتصالات يفترض بالجد تؤسس كبنية تحتيه لخمسين عام ويتم تطويرها بإستمرار ) بس مطره والله شوية هبوب تجهجه الإتصال ده معقول ياعالم نلطم ..............

HAMADTO

08-08-2006, 06:02 AM

والله يا ابن عمي ربنا يكون في العون والدولار فرق لينا الحسابات والاسعار في السودان هي هي ...
حسي المرتب كلوا بقى تحويله عشان في السودان متعودين يقبضوا بالسوداني لوكان من البداية بقبضوا بالدولار ما كانت فارقه والا شنو ....

اهلا محمد احمد فعلا معاك حق ولكن يا اخوي الشركات دي بتاعت منفعه وقتيه واصحابها معروفين ما بعروفوا غير الربح الفوري وديل ما ناس الخطط طويلة الامد ....

السلامى

13-08-2006, 04:33 AM

أنت ياأخوى حمدتو راحت منك دولارات ولابتشحتف فينا اسع نحن الدينارات بقت لينا مشكله تقوم تطرى لينا الدولار وبعدين قول لاخونا نزار ياأخوى القحه ولاصمة الخشم ( نضرب خشم القربه تجينا أم الطيور أخير من العدم هاهاها

HAMADTO

31-12-2006, 08:22 AM

السلام عليكم ورحمة الله تعالى وبركاته
كل عام وانتم بخير وعيد سعيد وعمر مديد ان شاء الله
اها يا السلامي يا اخوي بعد اسبوع الدولار حيبقى بأثنين جنيه بس ... :eek: :eek: :eek:
اها رأيكم شنو في الكلام ده ...:confused: :confused: :confused:
وكل شيء في مكانه ده لو ما في زيادة ...:rolleyes: :rolleyes: :rolleyes:

الزمن المريح

07-01-2007, 04:33 AM

سلام و سلامات ،، و ماتت معه احلى ايام مدنى ،،
الاوطان تبنى بسواعد بنيها ،، و اغلب اهل مدنى طافشين منها ،،
و القيادة السودانية هية هية لا اتغيرت و اتبدلت ،،
مرحبا بالجنيه السودانى ،،
و الاسعار ثابته و الدولار نازل ،،
خروف الاضحية فى مدنى اغلى من الخرطوم ،،
و ناس مدنى خلوا اكل الكسرة ،،
طربقه

nasa

07-01-2007, 09:30 AM

الأخ حمدتو وكل الأخوان الذين كتبوا في هترشات كلامكم منطقي وعقلاني وحتى الموجودين في الداخل مقتنعين بكل هذه الأشياء التي يجب تصحيحها أسأل نفسي وأسألكم انتم أيضاُ كيف؟ متى؟ من؟ ...يضع النقاط فوق الحروف وتوصيل كلمة الحق ونبدأ بأنفسنا؟

HAMADTO

26-03-2007, 12:56 AM

شكرا اخوي جمال (الزمن المريح ) لهذه المداخلة ومعاك حق الدولار نازل والسلع سعرها ثابت ....
والنسوان بطلوا عواسة الكسرة وبقوا يشتروها من البرعي سنتر ......

:eek: :eek: :eek: :eek: :eek: :eek: :eek: :eek: :eek:

كيف؟ متى؟ من؟
تسلم يا ناسا ومعاك حق ان الله لا يغير ما بقوم حتى يغيروا ما بانفسهم ....

HAMADTO

05-07-2007, 06:50 AM

الايام دي الجو جميل والنسيم عليل والمطر يبشر بخريف ناجح .....

ولكن ....

هل سيكون الخريف نعمه وسنستفيد منه ........
ام نقمة و..... و..... و.......
وانشاء الله الجماعة يكونوا جاهزين للخريف؟؟؟؟

وربنا يجعله خريف خير انشاء الله

محمد أحمد الشيخ

31-07-2007, 06:45 PM

حبيبنا يا نبله
خليت لينا البلد هنا خلا ومشيت خليتنا

أنشاء الله الخريف أكون خريف خير وبركة واللواري ما تقيف
تصدق نحن مشتاقين لينا لي نقطة مطرة وما لاقين

محمد باسطة

HAMADTO

22-11-2007, 02:23 AM

اهلا وسهلا بالاخ والصديق باسطة مشتاقين والله

HAMADTO

22-11-2007, 02:31 AM

مازال ناس مدني مقاطعين اللحوم والالبان ... رغم ظهور ناس الحكومة في التلفزيون وهم يأكلون اللحمة ........

اها الضحية على الابواب ....

فهل تستمر المقاطعة ام جاذبية الشية تغلب في النهاية ؟؟؟

اللهم الطف بالبلاد والعباد من جميع الامراض ...

mamdoh

23-11-2007, 04:44 AM

انا في راي ده مش مهم اولا صيانة نفس اناس مدني المغلوب علي امره يمكن لو استمر الحال علي حاله ماتجد شاب او رجل في الحي بس حريم وعجائز الكل يركض وراء طلب الرزق خارج مدني ,ياحليل ايام كان البشتغل في البيت واحد بس والحالة تمام ومتكفي , طبعا ده سنة الحياة الشغل كويس بس مابالطريقة الحالية أصبح اي واي واحد يقول يانفسي و لايتحري الحلال في رزقه
ده الشي المحتاجين صيانته ومتابعته .

HAMADTO

26-11-2007, 01:26 AM

اهلا ابو فاطمة
معاك حق والله يا حليل الواحد البشيل البيت ...
ولكن الان اصبح الكل يجري وراء الرزق حتى النساء ...
وبعد ده كله الماهية ما مكفية ...
والله حسي من النادر ان يتحرى الواحد الحلال من الحرام في الرزق ... إلا من رحم ربي

ذكرتني نكته سمعتها ...
قالوا : الامام كان يدعوا عقب الصلاة اللهم اغننا بحلالك عن حرامك
فقال : له احدهم يا مولانا خليهو يغنينا كان حلال كان حرام

ناصر عمر دبيب

26-11-2007, 01:38 PM

هههههههههههههههه لكن نكته مبالغه

mamdoh

03-12-2007, 01:26 AM

وفي نكته في واحد من الزمن الحالي ماحافظ ولاسورة من القران زنقو شيطان في زقاق قره طلع البدر علينا

Isam Hussien H

03-12-2007, 08:32 PM

الإبن نبيل عصام ،،

مشيت مدني في عيد رمضان ،، تعرف بيتكم من غير حاجة ست البنات لا طعم له ،،

كيف أخبار عصام وعلاء بالإمارات وياريت أعرف تلفون علاء لو سمحت ..

وآسف جداً لعدم التواصل معاك ،، لجهل بالعولمة .

HAMADTO

08-12-2007, 03:20 AM

اهلا وسهلا بعمنا العزيز الاستاذ عصام حسين
معاك حق والله ربنا يرحمها ويغفر لها ان شاء الله تعالى
مرسل لك رقم عم علاء الدين على بريدك الخاص
لك كل التحية والتقدير

HAMADTO

18-12-2007, 12:20 AM

بكرة العيد والناس ما بين مضحي وممتنع .....
وحتى المضحي تشعر بيهو من غير شهية مفتوحة في اكل اللحم والشية والمرارة ...
اول عيد يمر على الناس بمرارة لانه لا توجد نفس لأكل المرارة ....
اللهم الطف بالعباد والبلاد
و كل عام وانتم بخير وعيد سعيد

zoolfrda

18-12-2007, 01:15 AM