حكاية ريد لي فاطنة السمحة

[Bushra Elfaki]

حكاية ريد لي فاطنة السمحة

مدخل:
أحبك
كلمة وحيدة بنقولا
وما بننساها
نحن فداها يا عازة
*****
عيونك نيلك السامي
نحب نغرق في عينيكي
أياديك نخلك السامق
نحب نوصل أياديك
وخصرك أرض مروية
أحب املابو أيديه
سودانية
سودانية
ما بننساها
نحن فداها يا عازة
********
أجيك يا مهيرة أتقدل
أقول أعمل بدور أعمل
منو البعمل غيري نا
تزغردي لي
وتفرحي بي
وفاطنة السمحة تتنا
وأشيل مخلايا
وأنت معايا تتفجر ينابيع ريدنا ما بتجف
ولا بينضب معين احساسنا
أخت يديك في ايديه
ونشيل الطين ونرسم امنا الجاية
و أحبك

[Bushra Elfaki]

ونواصل في حكاية الريد
سأعود

[Bushra Elfaki]

النص:

ياحبوبة من ما قمنا نحن عشقنا فاطنة السمحة
شايلة مكارم الاخلاق لابسة الطرحة
ما بتنهان
نمت فينا
وتسند فوق خطاوينا
وتقول للغول
محمد في هواي مكتول
محمد مني نا المسئول
وهو المسئول ونحن صغار
شلنا معاه هم الدنيا
كيف يزرع وكيف يحصد
وكيف الزول يريد الزول
وكيف الزول يكون مسئول
وكيف نحفظ بلدنا وكيف
نكاتل لي حماها نقيف
ومانتهان
عرفنا الدنيا كل الدنيا
يا حبوبة من غنية
بتقولها السمحة لي خوها
وبتعرفي السمحة لما تغني لي خوها
بتسعد كل من جوها وما تتهان
****
اصيلة اصيلة يا فطومة
حقوقك كيف تكون مهضومة
وانت السمحة مافي متيلك
انت العزة موية نيلك
عيونك عازة السودان
و ثغرك لؤلؤا مرجان
و ما تتهان
لي ود النمير الكان
يشوف في فاطنة سرية
وحجتو سنة دينية
ويقول لمحمد المنصور
بشوف فاطنة بتكون ليا
وعرفت الجاهو يا حبوبة من ديا
وفهمتي الجاهو يا حبوبة من دية
وشفتي الجاهو............
أسدة .. ونمرة.. ومرفعين الجبال
ام سنونا طوال
سيدم سندو
اسدة ونمرة ومرفعين الجبال ام سنونا طوال
سيدم سندو
وفاطنة عزيز كيف تنهان
عيونا عازة السودان
تقول للغول اكان داير تشيل محصول
زرعو محمح المامول
دحين حاول
محمد مالو ابدا سيد
محمد مو البحمل القيد
ونحن نعيد
معاك قصة الاشواق من الاول

[Bushra Elfaki]

وتتواصل حكاية الريد
سأعود

[ناصر الباشا]

المرهف بشرى الفكي

حقاً هي (سمحة) و بارعة الفتنة كما صورتها هنا و البستها بديع حرفك

دعها تبحر بخواطرك الناضرة و تلبس من درر قوافيك ما شئت لها ان تتجمل

لك الروعة اخي بشرى و يسلم قلمك ايها الشفيف

[Bushra Elfaki]

ناصر الباشا الجميل
محظوظ انا في معية ودمدني وعبق الذكريات الحلوة، ومحظوظ انا ان يتداخل معي فنان وشاعر واديب مثلك
ودمدني لم تزل ولود ودود فكما انجبت العباقرة نجدها تجود علينا بالباشا
هذا بعض من فضلكم يا باشا
لك مني التحية والتجلة
بشرى

[Bushra Elfaki]

نواصل الحكاية
حكاية الريد لي فاطنة السمحة

[Bushra Elfaki]

وكت كنا صغاااار من حولك
نشيل في قيمنا بالجملة
وندفي جسومنا بي حضنك
ونبكي كتير وتبكي كتير
ود النمير
ختف فاطنة
محمد هاج ونحن بكينا
كنا سغار
وما عارفين ننط اسوار بناها الغول
وشال محصول
سقوهو من شعاع النار
وعز احرار
و ما بننهار
****
محمد كان كلامو جميل
قشقش دمعة الاطفال وقال
يا شتلة مروية بدمعة ريد
لي فاطنة السمحة داااك طريق اعرفوهو
وقال
حبوبة ما تبكي
بتقولي بكانا نحن نضال
وبرضو بكانا نحن نضال
كبرنا سريع بقينا السيل
وكان ابريل
ضريبة ريد وكان تهليل
وكان فرحا كبير بالحيل
نضالاتو بتشد الحيل
****
بقول يا فاطنة يا السمحة
انت الغنوة والمدحة
وانت الدقة في الطنبور
وانت نصرة المقهور
وانت صدور
مشبعة بي عبير ريدك
وانت الدوكة
انت البامية مفروكة
وانت شتم بيخلف عزف دلوكة
وانت هوانا
انت دوانا
وما بنطيق فراقك مرة يالسمحة

[Bushra Elfaki]

وتتواصل حكاية الريد
سأعود

[سوباوي]

الوريف .. بشرى الفكي ..

لا زلت أقول أن ما خفي بيراعك أعظم ...

لك ولفاطمة أمنيات بحجم الشمس ..

هل هي ذات الفاطمة الشايلة الفزعة وذات المحمد الشاطر الذي تحور إلى محمد أحمد حينما يغنون ...

فاطمة السمحة .. جايبة الفزعة

شايلة حطب ...

ودأحمد .. شقيان .. بتعب ..

عرقوا مصبب ... حالتو بتصعب ...

تعال نتلم ...

حبل الود البينا نمدو

سور الخوف الفينا نهدو ..

فاصل الشك الطول فايت حدو ...

باب النار الفاتح فينا نقوى نسدو ..

معذرة عزيزي بشرى لهذا التحليق المطلق والخروج غير الحر من النص ..

ولكن لفاطمة تفاصيلها الخاصة في الذات وهي سادلة ضفائرها في عناق في سكون ....

تحياتي أقصى ما تراه عيون ..

[مهيرة]

وكت كنا صغاااار من حولك
****
بقول يا فاطنة يا السمحة
انت الغنوة والمدحة
وانت الدقة في الطنبور
وانت نصرة المقهور
وانت صدور
مشبعة بي عبير ريدك
وانت الدوكة
انت البامية مفروكة
وانت شتم بيخلف عزف دلوكة
وانت هوانا
انت دوانا
وما بنطيق فراقك مرة يالسمحة

انت ياود الفكي وحاتك داير ليك فكي :D
وانت هوانا
وانت دوانا
ده كلام سمح في خشم سيده
لكن ماجنس ريده !!!؟؟؟

[Bushra Elfaki]

الباهي سوباوي سعيد انا بمرورك
اولا: هي بعض خواطر او هترشات لاترقى لأن تكون قصيدة وهي ارفع من المباشرة
على العموم لك وللقراء يسمونها بما يريدون
ثانيا: ما أحلى ما يجود به قلمك المبدع لا أظنني استطيع مجاراته فالفرق بائن
ثالثا: اسعد انسان انا بتواصلي معك
بشرى

[Bushra Elfaki]

مهيرة
شكرا للمرور والتعليق
والريدة علينا شديدة يا عزيزتي
والبزيدها كمان الغربة والعيش مع الرطانة
تخيلي ان تعيشي في بلد ما فيها اذان
حتموتي في ريد فاطنة السمحة انا عارف
بشرى

[Bushra Elfaki]

لسة حكاية الريد
نواصل

[Bushra Elfaki]

وما بنطيق فراقك مرة يا السمحة
لما يجينا همباتي
ود النمير المات يقولو جانا بعاتي
ويختف فاطنة في تلتين
وهو المسكين
أكان بعرف حلاوة الطين
أكان بعرف غلاوة الطيت
أكان عندو حبيبة دين
ما كان قام لينا من قبرو
وكان خاتي
وهو العارف
بي ريد فاطنة نحن ديمة بنهاتي
ونحلم بي زمن اتي
ونعيش للاتي من زمنا بعيد بالحيل
وهو الضليل
*****
محمد قالا كلمة زمان
محمد ماهو زول بتهان
ونحن معاه ما بنتهان
بنحرق دفتر الأحزان ونعيش للريد
أصلو الريدة قصة طويلة ما بتكمل
مما قمنا عشناها
وشلنا الهم مع محمد
كيف يزرع كيف يحصد
وكيف الزول يريد الزول
وكيف الزول يكون مسئول
وكيف نحفظ بلدنا وكيف
نكاتل لي حماها نقيف وما نتهان

[Bushra Elfaki]

الحكاية تحتاج الى تكملة
كما في الروايات قصة الحب لابد أن تنتهي اما بالزواج أو الانتحار
ليقل الجميع كلمتهم
لأن كلام الناس هو النهاية السعيدة لنعيش جميعا في تبات ونبات ونخلف صبيان وبنات

تعريجة بزاوية منفرجة:

ولدي طبعا استرالي مع اني ابوه وامو سودانية، حاولت احجيهو لأنو محروم على حسب اعتقادي
فصب علي كمية من الاسئلة المحيرة والتي لا أستطيع الاجابة عليها زي مثلا فاطنة السمحة ما اتصلت بالتلاتة اصفار عشان البوليس والاسعاف يجو ليه؟
والغول ده شنو؟ الزرزور......؟ لغاية ما حسيت اني مزرزر فقلت ليهو انا اسف بس بالله خلي لي حجوتي زي ما هي ما تخربها لي بالتلاتة اصفار بتاعتكم دي

تعريجة بزاوية مية و تمنين درجة:

انتو شفع السودان لي هسي حبوباتم بحجوهم

[سواااح]

اخي البشري ..

هل اقول انت عائد من الزمن الجميل ..

ام ....

شئ من عطر الماضي السعيد ؟؟

اعذرني ان اتيت متاخرا علي حكايتك

فاطنة ام محمد ام ود النمير

لا ادري هذا منا ام نحن منه ..

الان كل الحكايات صارت من خيال دخيل علينا

زمن كانت الحكاية هي النبض هي البسمة هي النسمة

كن دوما بخير ..

دمــــــــــــــت ،،

[Bushra Elfaki]

sawa7
تسلم يا غالي وشكرا للطلة
اخي البشري ..

هل اقول انت عائد من الزمن الجميل ..

ام ....

شئ من عطر الماضي السعيد ؟؟
انا يا عزيزي
شتلة مروية بدمعة ريد لي فاطنة السمحة

اعذرني ان اتيت متاخرا علي حكايتك

واعذرني لو حكيت قبل الزمن


ايها الباهي
لك السعادة قدام ولينا التحسر علي امبارح
قول قولك في الريدة لا فض فوك
وتسلم

[اميمه عشريه]

مثل هذه الحكايات لا نريد لها ان تنتهي فينا تظل تتشكل في دواخلنا كلما شارفنا على ان نضع نقطه نهايه السطر ..

اخي بشري .... فاطنه سمحه جدا سماحتا دي هي البتخلي الكلام ما يكمل وكل مره يبقي اجمل .. واجمل ... واجمل

[Bushra Elfaki]

اميمة عشرية
كلامك ما كلام خمج
وكرمك كان اروش لما تجودتي علينا بالطلة
وفاطنة........
والريدة..........
من يستطيع كتابة الحلقة الاخيرة
لك الود من هنا لي هناك
ودمت

[Bushra Elfaki]

الكلمة ومعناها[b]
البعاتي
الذي يأكل الناس وذلك لحسده لهم لأنهم ما زالو يعيشون وهو مات وشبع موت
وطبعا البعاتي بشر زينا لكنو مات ومتمرد علي حالة الموت
الموت:
أشكال وأنواع أخطره موت الضمير

تعريجة تانية لكن بزاوية حادة
انا قابلت الكتير منهم يا ربي قابلتو في مدني بس كم بعاتي
تعريجة بزاوية تلتماية وستين درجة:

فاطنة ومحمد ديل اخوان ولا حبايب لي هسي ما عارف زمان مرة يحجونا يقولو هم اخوان وتاني اقولو حبايب
انا زاتي محتار افتوني يا ناس يا هووووووووووو

[Bushra Elfaki]

المسروقة
لحين استردادها