باقى العمر

[saleh farah]

شيلينى فى جواك حنان
دسينى فى نفس المكان
الفيهو بس خاتيك انا
خلينى اشعر بالامان
***
خلينى اعرف انى زول
بالجد حبيبك ماهو قول
احس معاك طعم الفرح
وافهم غناك قبال تقول
زيي مغرم من زمان
***
نختار سوا شكل القمر
لون الفراش عبق الزهر
انقش حروفك فى الشجر
واحسب معاك حب المطر
يانسمه هابه من الجنان
***
نغمر مرافئ الشوق حنين
تعويذه من ظلم السنين
تلمس مشاعر زول حزين
شايل الاسى وكاتم الانين
ورينى لو فات الاوان
***

[سواااح]

عزيزي صالح ..

اكيد حتشيلك جواها

واحة حنان

وفي اجمل مكان

حترسمك وتكتب عليك

انت الوفي

انت العمر

انت الامان ...

ما انت انسان

مش ممكن في يوم يهون

دمــــــــــــت ،،

[saleh farah]

كتر خيرك ياسواح الله يديم قلمك الجميل

[نور العيون]

تسلم يا صالح على القلم الجميل و الله يديك العافيه

[saleh farah]

تسلمى يانور العيون على المرور الجميل الذى احال الاحرف الى همسات واضاءات تخللتها عيونك بنورها الجميل

[أبوبكرحامد]

نختار سوا شكل القمر
لون الفراش عبق الزهر
انقش حروفك فى الشجر
واحسب معاك حب المطر
يانسمه هابه من الجنان
***

المبدع صانع الفرح .... طوال قراءتى للشعر فصيحه ودارجه لم أجد من سعى بالحب لتغيير شكل القمر ولون الفراش وعبق الزهر ، هى براءة اختراع تسجل بإسمك ، لك منا الحب والسلام والتحية

[saleh farah]

كتر خيرك ياسعادة اللواء ياحامى حما المنتدى بالاسلوب الراغي

[أبو الزيك]

***
نختار سوا شكل القمر
لون الفراش عبق الزهر
انقش حروفك فى الشجر
واحسب معاك حب المطر
يانسمه هابه من الجنان
***تصوير غاية الروعه لهذا المنظر فكأنني اشاهد هذا المنظر أمام عيني فلك التحية

[Jamal Elmahi]

شيلينى فى جواك حنان
دسينى فى نفس المكان
الفيهو بس خاتيك انا
خلينى اشعر بالامان

***


يا ود فرح
شيلنا في جواك فرح
وداوي القليب الانجرح
والقليب لو مات زمان
أصلو بيك دابو أنشرح


جمال الماحي

[saleh farah]

اسلمو عيونك يا ابو الزيك

[saleh farah]

الاصلو نخله منّو الخير ما بخلا
والاصلو حنضل كان كبولو السكر ما بحلا...(خالتي حاجه بتول)

صدقت خالتك بتول ياود الماحى وانا بزيد عليه

البعيش فى مدنى ساعه بعرف قيمة الساعه