أب راص و مدينة الطهّارة

[vivid]

عبد الرحيم أب راص . . جيت لقيتو مصنقر فوق عتبة الباب . . قاعد و ممحن . . خاتي الخمسة فوق الاتنين . . و يشخبت في الواطة بي مسواك شايلو في يدو . . و يمسح في الشخبتة بي راحت كراعو الشمال . . و تاني يشخبت بي مسواكو . . و تاني يمسح بي كراعو الشمال . . الحقيقة منظرو حنني . . و قلت أشوفو مالو . . قبل ما يلحق أمات طه . . مشيت عليهو . . سالمتو و طايبتو . . قلت ليهو كيفنك يا أب راص . . مالك ممحن كدا و شايل الدنيا دي فوق راصك الغليد دا . . قال لي . . المرأة . . وكتين سمعت كلمة المرأة قعد معاهو و اتفنت جمبو في عتبة الباب . . و اتمحنت معاهو . . قلت ليهو مرتك مالا يا أب راص . . نعل مافي عوجة . . باقي هي شترا و كلامها ملولو و بتشوت بيهو ضفاري . . قال لي . . يا فيفيد مرتي حدست مدينة الطهّارة تجيها بكرة دغش بي عدتها بتاعة الطهارة . . قالت دايرة تطهر البنات جت . . وتضبح ليهن كبشاً أقرنا . . و تجيب ليهن موسيقة البوليص . . و أنا يا فيفيد الموضوع دا موجعني و حاشيني في قلبي حش . . قمت لي التعترني قلت ليهو نان مالو يا أب راص . . نحنا ما نسوانا و بناتن كلهن مطهرات و مقطعات و لاحقات الرقدو زمان . . انت بناتك ديل في راصن ريشة؟؟؟ خليهن يضوقنو . . عبد الرحيم أب راص زعل و اتنفخ و خفت يقوم يلطشني يجيب أجلي . . قال لي كيفن يا فيفيد بناتي يطهروهن . . انا راجل مثقف و متعلم . . و بعرف الصاح من الغلت . . و انا بي صراحة يا فيفيد مدينة الطهّارة دي بالذات ما قادر أبلعا . . من ما قمت مكجنة و مكجن خلقتا دي . . قاعدة تخوفني عديييييل كدي . . كان شفتها في طرف الشارع قاعد أخلي ليها و أشوف لي طريق تاني . . شايلة أصابعيها المكنشات ديل . . و ذي ما بقولوا يا فيفيد . . الشقي يلقى العضم في الجلي . . داك الليلة يا فيفيد . . اتصل بي واحد من أولاد الخرتوم . . ظنيتو كايس لي واحدة اسمها مدينة . . و ما يقع عيلا في رقمي أنا . . يشيل و يتصل بي . . و يقول لي . . هللللووووو مدينة؟؟؟!!! أقوم أرد أقول ليهو لالالالا دا أنا عبد الرحيم أب راص . . يقوم يقفل يعدي ليهو ساعة زمن و تاني يتصل . . هلللللللو يا مدينة انتي وين!!!!! . . أقوم أقول ما قلنا ليك دا ما تلفون مدينة ان شاء الله تمدها و تشحد بيها . . شفت جنس البشتنة الأنا واقع فوق دي يا فيفيد؟؟؟ . . البارح يا فيفيد مدينة الطهّارة دي شفتها في سماية ود المغضوب . . تتحاوم ساااكت و كارّة توبا . . و تعاين للبنوت السغار جنس معاينة . . تمسك الواحدة تحضنها و تسلم عليها في جضما و تقول ليها ازيك يا عشاي . . انتي طهروك و الا لسة . . كان في واحد قالت ليها لا . . تقول ليك كان كدي انا بكرة بجيك في بيتكم و احدس امك الغشيمة عشان تطهرك . . الحقيقة يا فيفيد . . انا منظر مدينة الطهارة في السماية و هي تقابض في الشافعات حزّ في نفسي . . و قلت مدينة الطهارة دي عيلا أمشي أقرعها و أوقفها عند حدها . . مشيت ليها و قلت ليها . . يا حاجة مدينة اختشي . . سيبي المقابضة . . فكي البنوت . . قامت زعلت و حمبكت و طرمت . . و مسكتني من جلابتي و قالت لي . . أمشي يا أبراص من هنا قبل ما أجي أوريك ليهو . .. . وحات وليداتي يا فيفيد . . مسكتني من جلابتي دي . . خلتني اطرقد و أرجف زي البهيمة الظارباها مطرة . . و خفت تقوم تسيب البنوت السغار و تفكر تطهرني أنا . . ما طالبني حليفة يا فيفيد امس القريبة دي مدينة الطهارة دي جاتني في النوم . . حلمت بيها . . مرقداني في عنقريبي و معاها مرتين غلاااااااد الواحد كان ضربت الحيطة دي تهدها . . جايباهن مساكات . . المرتين ديل يا فيفيد واحدة مسكتني من يديني و التانية من كرعيني . . و هجرني الاتنين في نص العنقريب . . و مدينة تفتش في شنطة الحديد و تطلع ليها مقص قدر الليلة و بكرة . . و تقول لي المرتين الغلاد . . أمسكنو و أهجرنو في بطن العنقريب أوع يفلت منكن . . و أنا أرفس يا فيفيد . . و هي تقول لي المرتين قلتليكن اهجرنوا . . هجرو البلا . . ربك رب العباد يا فيفيد . . ما حلاني من الموقف دا عيلا مرتي دي . . مرتي دي الداير تطهّر بناتي ديل . . و انا في رفسيني داك يا فيفيد . . رفستها في كلوتها . . صحت مخلوعة . . شافتني أرفس في نص العنقريب . . نعنعتي و تورتني و قالت لي . . دا أب كباس يا أب راص . . قوم انعل إبليس و استغفر الله . . دحين يا فيفيد اسوي كيفن . . الليلة مدينة الطهارة جاياني في بيتي دا و دايرة تطهّر وليداتي . . غلبني كلو كلو البقولو ليهو . . كضمت و اتبكمت و اتبومت . . و مرقت مسواكي من جيبي . . و قعت أكتب بيهو في الواطة مع أب راص و أمس بي راحة كراعي الشمال.





فيفيد في
26/08/2006م

[vivid]

[FONT=Arial]


آخيراً تم الإفراج عن الموضوع

بعد ولادة متعسرة[


:D :D :D
/FONT]

[سواااح]

عزيزي فيفيد

لي عودة معك مرة اخري
لانه كما يبدو ايضا
ان للموضوع تتمه

دمــــــــــــت ،،

[خالد عبدالماجد]

الأخ فيفيد :
تحية على التغليف الجميل لقضية وجدت من النقاش والندوات الإرشادية مانالت وهي قضية ختان البنات وقد أجمع المتخصصون على مضار هذه العادة الزميمة ومايمكن أن تسببه من مشكلات للفتاة .
أعتقد أن السودان والسودانيون قد خطو خطوات كبيرة ومثمرة في طريق القضاء على مايسمى بختان الإناث .
لك تحياتي .

[أبوريلان]

والله يافيفد سردك شيق وموضوعك لذيذ وجبت لى كباية جبنة عشان أعدل رأسى ، وبركة الجاك أب كباس وإلا كان مدينة فعلتها .

[aborawan]

بصراحة وبدون مجاملة انت يا فيفيد لا تمل امطرنا بالمزيد

[الزبير محمد عبدالفضيل]

عزيزي فيفيد سردك جميل للموضوع ونرجو المزيد من مسلسللاتك الجميله والي الاماااااااااااااااااااااام

[معتز حمدتو]

فيفيد موضوعك مع عبدالرحيم ابو راص محاوره ولا اروع لمناقشة قضية اصبحت هاجس اقلب المجتمعات وعلينا في السودان اتخاذ هذا الموضوع بشكل هام جدا .
بعدين فجاءه كده اندمجت مع عبدالرحيم ومدينة الطهاره ومسكة النسوان والهجره القوية والحمد لله ان كان ابو كباس لكن صاحبك ده كان حاضر زمن ابو شله ولا مدينة الطهاره بس ؟ :D

[نزار حسن محمد]

الاخ فيفيد... صدقنى فى السابق قراة لك كم موضوع وقد اعجبت بها للغايه بعد ذلك سمعت انا مواضعيك تحت المراقبه ولم اكن فى ذلك الوقت مشرف على المنتدى العام
اخى فيفيد .. صدقنى انا من اشد المعجبين بما تكتب وتصنفى لك كالاتى.. كل كاتب له درجه وانت بدرجة.. روئ متفرد اتمنى ان لاتحجب كتاباتك مستقبلا وكن دوما بيننا اخى فيفيد... اخوك نزار حسن