قصة زول..

[مازن الجمّال]

قصة طويلة بديتا زمان..

في يوم إتولدت فيو أحزان

أحزان إتولدت ورا أحزان

وأحلام إنطمرت بالأزمان..



بداية القصة دي كان يا مكان..

في .. ولداً متفائل فرحان

في دنيا مزخرفة بالألوان

وأحلامه السمحة بدت تزدان

وعكست آمال لي شيئ ما كان..



بدأ المشوار بعلام لجهول..

نوّر لطريق عقله المشلول

فتّح آفاق دربه المجهول

وطوّل لمشوار علمه ملول

وقوّى عزيمته وكان مخبول

في دنيا أحلامه الفاردة سهول..



خلّص مشوار حلمه الأول ..

ودخل في دنيا جديدة من أول

ظهر مشوارها طويل ومطول

ووقف محتار بي صبره الطول

وحام حولينا وبدأ يتجوّل

يدخل من وين يبدأ الأول..



مسك الدروب من البداية..

كل الدروب واقفة في نهاية

أفكاره جاطت ماشة جاية

وآماله إتخزلت كفاية ..


وأحلامه ضاعت في الرواية ..

[اميمه عشريه]

قصه زولك يا مازن انتهت بسرعه كده ليه ؟ عموما تعودنا منك قصائد غايه في العمق والفكره حتي لو اتت احيانا علي الموسيقي الشعرية وتنكرت قليلا للشعر الحر فكانت ما بين وبين .. شكرا مازن وانت تزين المنتدي ويزدان هو بك ..

[zoolfrda]

تسلم يا Rasta Man يا رائع

[Jamal Elmahi]

وأحلامه ضاعت في الرواية ..

أوعي تكون تاني أكلتا الغنمايه
ما زمان برضو مضغت الملايه
ولحست العجين وكسّرت المرايه
وقرّضت الافراح المشتوله رايه


جمال الماحي