المساعد الشخصي الرقمي

مشاهدة النسخة كاملة : سطــــــــــور الواطــــــــــــــــه


محمد ابوعاقلة
03-10-2006, 11:19 AM
كتابه بالسلوكة ... السلوكه ذلك المعول الذي يضع النقاط فوق سطور الواطه .. عشان الفكرة تفرهد والرؤيا تقوم... تقوم شاده حلة عدس وفول خارج المشروع .. مشروع الوهم الخضاري.. والقمرية الركت في طرف الجدول ورسمت دواير في وش الموية.. دواير مجداف الموجه .. ودفرت حتي الشفع ... غير مرغوب لو ما لابس باتا قديمة .. والهمباتي الشايل لالوب مربوط في خيط ... مدروع في رقبة ... بقيت في رقبتي ... وفكره طارت مع أول عصفورة انزار عند الرابعة عصرا كما العنب ... في كرتونه .. جوه كيس .. تحت شدره .. وضل راكوبه والسايق فلاتي بخاف من هبشة واحده ... خسارة .. ... ما كلمتك عن طوف اخضر أطول من حيطه ... مدرع ومطعم بالشفع قدام الموكب ... وجوه المركب سن تمساح ... وقدين من خطه ... بتتدفق في اول قيفه ... ودم للركب ... والهيكوبتر طفشت للكتف المليان ومايل يمين ... وشحدت الله .. تميل ...اكثر من ميه وتمنين مره ... وركت عصفوره طافشه من الميادين ذات مره ... علي وحم البلد ... نقدت رحم البلد ... شالت حبتين الخير وشرقت فالوب من موية طمله ... وغاغ ... سكت باقي الليل وخت يديه في وش الصباح وفتح عين ... وين موية التفل للشوف ... شقيش ما تقولو حس الصباح نعسان ... الصفارة باعت حسها ... الخشيم قرش السنينات من غيظ مغتغط بالأوامر... ضرب النعيلات للتراب .. قتل باقي الخصوبه والخدار الجاي في موسم تبع شفع لسه مولودين جديد في شكل حب ... بين جنوبية وفدائي ... كان بقتلوك في يومك النحس المبشتن الف مره .. بالمواعيد ... وقفة الكركول ومفتاح القضية ... شفناه حالفين اعدموه .. او قروشك لو بقيت زول بدل ... وسمسونايت ... وحصاد ورق .. يا بسجنوك .. يا بعتقوك ..من غير هوية... عاد ذلك المغفل لكي يشتري الحرية من شباك ناس في الفطور ... ساعتين وشاي وقرقريب ... وزمن بفوت .. شايل ملامح طله ما شايفانا كيف ... ما فارقنا صيف الا والدمعة بتودر في الحلم علي كيف وكيف .. كيف بتتدسه الملامح وانت شايل روح مواطن في ورق تحت الغلاف ... حايم في بلاد الدنيا والطقس الغريب .. او غريب ايه يعني ما الدنيا بتسيح والموت فسيح وامل كسيح .. بطرد رشاش الواطه لو كترت طوابير المشي ... لو زعلت عليك الوالده والخيات ومجبور ... شن تسو ... ما تلولح الراس لو نمت جواك كرب ... دنقر علي نفسك اذا ساحت ركب .. او تركب الموج البودي .. هناك ... هناك بعيد .. تكتب خطابات للبنيه ... تسرق الشوق الببيعك وانت ني .. ولسه ما نجضت حكاية زول مكتف في جناح
محمد ابوعاقلة
03-10-2006, 11:26 AM
نص ...لستك عجله ... بدردق اذا مليان هوا ... او نبله مطاطيه ... والحجر في البال ... علي الأرجح
وفووووووو .... طارت رهوه لابسه عمه ... والجنحين عبايه ... للحول ما بخليك
ان بقيت حي
يا حي
يا حي
يا حي
أحححححي
Jamal Elmahi
03-10-2006, 02:20 PM
أبوعاقله الحبيب وين الحي بيك....مالك أأأبوي بتطوّل الغتسه ...تغتس أتا ونشرق بي وراك نحنا....
غتسه في زير مضروب حيمور ولقّايو ماعون طلس...السوسيو يتشابا ...ويتشابا...وكت مايلحقو ياكل الطين تحت اللقاي...سواسيو تاكل تين وسواسيو تاكل طين ...دنيا فرندقس دردقي بي شيش....

ود الماحي
خالد أحمد الصول
08-10-2006, 02:05 AM
أخي أبو عاقلة:
آخر سلاله الناس المعتقين ... يا من تجري الحكايات علي فمك متسارعة و تتزاحم كل الحاجات الحلوه تطل برأسها و تنقب في فرجة حتي تجد لها مكان في هذه الدنيا أم قدود ...
متعتنا أخي بهذا السرد الحلو و الذي لا يستطيع أن يجاريه إلا من كان في سرعة الجراية التي يجري خلفها أثنين من أمهر المتيربية.
تخريمة:
عجبت أن الضفادع لم تدخل في مفرداتك

لا بد أن تواصل .... غصبا عنك فنحن إنتظارا خلف الباب
محمد ابوعاقلة
08-10-2006, 08:49 PM
أبوعاقله الحبيب وين الحي بيك....مالك أأأبوي بتطوّل الغتسه ...تغتس أتا ونشرق بي وراك نحنا....
غتسه في زير مضروب حيمور ولقّايو ماعون طلس...السوسيو يتشابا ...ويتشابا...وكت مايلحقو ياكل الطين تحت اللقاي...سواسيو تاكل تين وسواسيو تاكل طين ...دنيا فرندقس دردقي بي شيش....
ود الماحي

السواسيو اذا كانت بتاكل تين بالفلاتي يبقي ياهو الطين
دا اذا كان حسب التوقيت المحلي لمدينة سنار وما حولها ... مايرنو مثالا

الغتسه والشرقه زي العبقرية والجنون ... الفرق بياتن فتحة خشم
ههههههههههههههههههههههههههههههههههههههه

ود الماحي
سلم لي ... علي أي زير بنقط فوق واطه ... بدون لقاي ... نقيط الزير بذكرني بالدرب ... لكن هنا المويه بتنقط عشواي ... حفرة الموية زي حفرة الدخان لم المويه تقطع وريق الزير ينشف... تتذكر لم كنا بنخت البتيخه تحت الزير .... يا سلاااااااااااااااام علي داك زمن ...
حاليا بناكل البتيخ بالفريون والشمام بالسلسيون ... والونسه في الحوش ... بقت في تلفزيون
والحيشان تصوصي

ود ابوعاقلة
محمد ابوعاقلة
08-10-2006, 09:00 PM
أخي أبو عاقلة:
آخر سلاله الناس المعتقين ... يا من تجري الحكايات علي فمك متسارعة و تتزاحم كل الحاجات الحلوه تطل برأسها و تنقب في فرجة حتي تجد لها مكان في هذه الدنيا أم قدود ...
متعتنا أخي بهذا السرد الحلو و الذي لا يستطيع أن يجاريه إلا من كان في سرعة الجراية التي يجري خلفها أثنين من أمهر المتيربية.

ياخي انا بحب الناس البتحس بالكلام ... ري اكشنك مرتب
كمبلت ... بت عم سطور الواطه

أخي أبو عاقلة:
عجبت أن الضفادع لم تدخل في مفرداتك

ارجع للنص وابحث عن كلمة غاغ ... في نفس التوقيت القعونجه كانت بتنطط من النص وختيت الصوت الدال علي وجودا مجازا منصوب في آخر الليل وعلامه نصبه الشمس البتاوق فوق الحيطه عندما سكت باقي الليل ... الليل ما كان عندو فكه ... فرجع صم في جيب الصباح ... دين
محمد ابوعاقلة
08-10-2006, 09:24 PM
في كبري غرقان ... والبقبقه شرقت ماسوره البمبه ... في ناصية ترعة ... في حلق جدول ...
في مشاط حواشة .... يا الله ..... اتذكرت الحواشة الممشطة والدهن موية ري ...
وقامت الحواشة نقضت غزلها والشيب ظهر ... عم احمد كان زارع الواطه قطن ... والناس بتفلي في الشيب الابيض .. الطين خمره والطنين ... صوت باعوضه مجرتقه خشت ذا مره الحله ومرقت عاملا روج ... احمر شفاه الباعوضه عباره عن دم ناس مسروق ... لم نطت الباعوضه بالليل والناس نيام ... بتحقر بالمساكين الذين يفترشون أوجاعهم ويلتحفون السماء ... وانا كنت بقول يا ربي احمر الشفاه من النوع الردئ ليه ... عندما تنهمك الباعوضه بحك يديها دايما ... وتقش خشمها كأنها ما عملت اي حاجه ... وطلع منها المثل ... اكل وقش خشمك ... بمعني اسكت ساي .... اللقاطي النايم فوق برش ... خل حك راس شدر القطن ... وحك راسو ... واللسان طول كدا.. وننننننننننننننننننننننن ... زنة من غير سبب ... والشتيمه سكّت الباعوضه ... لغايه ما الهوا شال الريحه الطلعت بيها من توب واحده ست . وجري وراها ... اربعين ضكر (باعوضه) وسبعه يرقات ... يتتبعون الانوفلس... كي يرسمون شفاهها علي الخدود الناشفه ... والايادي الملطخة بدم أبرياء ...
أبوريلان
08-10-2006, 11:46 PM
الله عليك يا محمد أبو عاقلة

كلام جميل ونسج غاية فى الروعة وياريت يكون معانا فى المنتدى فنان حتى يصنع لنا لوحة فنية بريشته من هذا الإبداع .
محمد ابوعاقلة
08-10-2006, 11:56 PM
الله عليك يا محمد أبو عاقلة

كلام جميل ونسج غاية فى الروعة وياريت يكون معانا فى المنتدى فنان حتى يصنع لنا لوحة فنية بريشته من هذا الإبداع .


myrelan

يا خوي انا عندي (فرشتين)
واحده بتتعطن في لون
والتانيه للسنون
شن قولك
أبوريلان
09-10-2006, 12:20 AM
قولى أنت مبدع كامل والكمال لله

أروينا من حديثك المنساب
Jamal Elmahi
09-10-2006, 11:47 AM
ود الماحي
سلم لي ... علي أي زير بنقط فوق واطه ... بدون لقاي ... نقيط الزير بذكرني بالدرب ... لكن هنا المويه بتنقط عشواي ... حفرة الموية زي حفرة الدخان لم المويه تقطع وريق الزير ينشف... تتذكر لم كنا بنخت البتيخه تحت الزير .... يا سلاااااااااااااااام علي داك زمن ...
حاليا بناكل البتيخ بالفريون والشمام بالسلسيون ... والونسه في الحوش ... بقت في تلفزيون
والحيشان تصوصي

ود ابوعاقلة


ود أبعاقله الاصيل سمح النضم والقول
البتيخه تحت الزير وأم بقبق بلا كاتول
وقلوة البن في الشوك تراااح بترمي الزول
والقعده معاك بالحيل بدورا كان سنه للحول

مشاققه...
البتيخه تحت الزير...بتيخة صعيد علي السكين حلاه وحمار...نقدا السوسيو وضاقا قبّال ناس البيت...والحديّه تحلّق نفيستا في السوسيو الشبعان بتيخ...تقول ياربي يكون طعمو كيف...مكدونالد...بيرقر كنج...ولاّ سوسيو بالبطيخ...؟؟!! الشافع نهر السوسيو طارت الجداده ...ركت فوق طربيزة العدّه ...وقع البرّاد أنكسر ومعاهو فنجانين...الجداده من الخلعه عملت كاكا في السكريّه ...الشكيه لابيداَ قويه...

ود الماحي
saleh farah
10-10-2006, 11:15 AM
ود ابوعاقله يا اخوى فى رمضان ده غير توبك ده عليك الله البس ابيض وشيل طوريه وداعب واطه مرويه عشان بكره الخضره تملا عيونا قش عينيك من الاحزان وافتح قلبك للافراح خلينا نزغرد فى طرف الجدول ونلم التبن الطول راقد ملان ديدان ونشرك فى طرف الترعه عشان مانغدى الزول الكادح والضيفان ، اتبسم عندك سبب البسمه وفيك الفرح باكر بكبر لما سنونك تضحك لما عيونك تضحك نحن معاك بنحاول نفرح ماتحرمنا سبب الفرحه .
دايما انت رايع كما عهدناك
محمد ابوعاقلة
10-10-2006, 09:09 PM
البتيخه تحت الزير...بتيخة صعيد علي السكين حلاه وحمار...نقدا السوسيو وضاقا قبّال ناس البيت...والحديّه تحلّق نفيستا في السوسيو الشبعان بتيخ...تقول ياربي يكون طعمو كيف...مكدونالد...بيرقر كنج...ولاّ سوسيو بالبطيخ...؟؟!! الشافع نهر السوسيو طارت الجداده ...ركت فوق طربيزة العدّه ...وقع البرّاد أنكسر ومعاهو فنجانين...الجداده من الخلعه عملت كاكا في السكريّه ...الشكيه لابيداَ قويه...
ود الماحي


فيرست ... شكل الحديه ما عندها اقامة في السودان ... البتفكر في مكدونالد وبيرقر كنج
بيرقر كنج بالسواسيو ... هذا هو صير بيرقر كنج ... او ميكروجيب

شفت الزمن ساقنا بعيد خلاس ... لم ديك العده يغيب ... زكرتني .. بلدا ما فيها تمساح يقدل فيها الورل ... و السوسيو ريموت الجداده ... تنهر السوسيو .. تنط الجدادة .. والعجب كان رفعت يديك دعوة مظلوم ... تنخلع الجدادة وفررررررر تطير زي كأنو دقشتا الدعوة ... ودردلوب .. واطه ... انت الجابك تكاكي شنو ... امشي ...
شوفي ليك مكان ولاده تاني ... والجدادة كانت نفسا وحامل بي تيمان بيض ... النفس قايم وتتلفت ... ككاك كاااك ... كاك ... جبغ ... هذه الجبغ عباره عن كاكا في شكل بزقه بالباب الوراني الاوتوماتيكي ... عارف .. مرات بستفذ الجداد عندما يمشي علي غير هدي ... يلف يمين بلا شغله ويسار بلا شغله ... ولو سألتو لفيت ليه ... انا متأكد ما عندو اي اجابه مقنعه ... مرات يلقط في حاجات فارغه ... نقده أسرع من تأكدا ... وبرجع اقول انا مالي ومالو .... المهم يكب البيض ويكب الزوغه ... وبزعلني لم تجي وتلقي جبغ في طرف الملايه ... لكن مرات كدا عندو شخبته في الواطه ظريفه خلاس... زي بسطر في واطه ... يبحّت ... كم سطر ويرجع خلف ... لكي يري نتيجة الشخبته ... تماما كما يفعل الكمبيوتر للبحث عن لقمة عيش ...
عموما ما تشتغل بموضوع الجداد كتير .... عشان انت عاااارفو بودي وين

فيا سوسيو المستقبل ... لا تجهض احلامنا بالكوشه
مداخله .... السواسيو ... من ذكر وانثي
سوري ... السوسيو ما من فصيلة الذكريات ... اعتقد من فصيلة الفسايات
والسوسيوه ... !!!!!!



والشكيه لغير الله مذله
Jamal Elmahi
11-10-2006, 11:40 AM
فيرست ... شكل الحديه ما عندها اقامة في السودان ... البتفكر في مكدونالد وبيرقر كنج
بيرقر كنج بالسواسيو ... هذا هو صير بيرقر كنج ... او ميكروجيب


والشكيه لغير الله مذله

السوسيو بعد ما دردم سفتو سرح ...من حرفنتو قال يقرأ أفكار الحديّه...صنقع لي فوق...مكدونالد...بيرقر كنج...قال أكيد الحديّه دي تبع قوات الامم المتحده...
وأكيد راقدا ليها فوق رأي...بس معقول تكون محلقه ساي ...يعني عاجباها عيون دارفور...ياربي جايه تختف البتيخه البارده تحت الزير ...ولاّ جايه تجغم شوية الجاز الفي اللمبه الهبوبيه...ولاّ تختف ديك العدّه...ولاّ ناويه علي دهيبات الحاجه الصارّاهن وداساهن في السحّاره ...دهيبات عيار 75 بني شنقولي...الحديّه كف ختفت ...السوسيو جبغ عملا...الحمدلله جات سليمه ختفت ليها كوز...الله يستر من الختفه الجايه ...ما كل مرّه بسلم السوسيو....

ود الماحي
محمد ابوعاقلة
12-10-2006, 11:52 AM
ود ابوعاقله يا اخوى فى رمضان ده غير توبك ده عليك الله البس ابيض وشيل طوريه وداعب واطه مرويه عشان بكره الخضره تملا عيونا قش عينيك من الاحزان وافتح قلبك للافراح خلينا نزغرد فى طرف الجدول ونلم التبن الطول راقد ملان ديدان ونشرك فى طرف الترعه عشان مانغدى الزول الكادح والضيفان ، اتبسم عندك سبب البسمه وفيك الفرح باكر بكبر لما سنونك تضحك لما عيونك تضحك نحن معاك بنحاول نفرح ماتحرمنا سبب الفرحه .
دايما انت رايع كما عهدناك


الجلابيه المرقعه ... والفول الرقاعة ... مراجعة لسطور الواطه الفطوها ... الشفقه بتفطفط ... والجرايه بتنطط ... لم السحاب شايل موية للواطه
والله بشرك عز الحر ... الجباده والخيط العصب ... طوالي مشدود ... مافي اي فرق بين عصبي وعصب السمك ... كنا بنغش السمك ... عشان يموت ... ساديه
صالح ... قريتك ما زي الجرايه البتفطفط

دمت بخير
محمد ابوعاقلة
12-10-2006, 11:54 AM
ود الماحي .... بجيك راجع
نشوف حكاية السوسيو البسف
محمد ابوعاقلة
24-04-2007, 12:14 AM
ود الماحي .... بجيك راجع
نشوف حكاية السوسيو البسف

الظاهر كانت في ازمة صعوط ...
الصعود للهاوية ...
من الخرمة لم يقع ..


انا كنت وين ؟