مكتبة الاستاذ مصطفي سيد احمد

[ابوطاقية]

http://www.khleeg.com/vb/khleeg_2005/besm.gif

انا لا استطيع الكتابة عن ذلك الصرح الشامخ ولكن كل البطلبو انو يسبتو المكتبة





شهيق

عاطف عوض خيري

نكــــر صــوتك صـــداك ... غــالــطــني الـزمن فيك
شــهرت عــلى الجــفاف ... وعدك بطاقاتنا الخريفيـة
رجــع فاضـي الكــلام مليان ... معــاك إتــبـرجـت غـيـمة
وشهق جوايا صوت جدول ... مـرقت على المطر حفيان
لـقـيـتــك والــرذاذ مــدخـل ...
ونـاديـتـك …
أقـيـفـي مـعاي نشيل كتف الغنى الميل ..
ونتخيل ... ونتخيل حلم دونك بيتحقق ..
وقبلك خيل دماي واقفة علي شرياني تتشهق ..
وبرق صوتك صداك غنيتي ...
D D D D D
رشحت حلقك لي إذاعات الشجر ...
والمنتظر من عودة المدعو المطر ..
وللمسادير و الطنابير ..
واللسة في رحم القصيد ... والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة الفاتت مني هسة ..
يا واقفه بين جرح السحاب وبين شهقة الأرض البكر ..
ما كان ده ريد ..
كان إحتمال تغيير قوانين حركتك ..
ما بين حديثنا ولحظة الفعل الحقيقي ..
وإنتباهك إنت للشارع البيرجع تاني لي نقطة بدايتو ..
و إنحيازك إنت للشارع البيرشح في مسام رمل التوقع ..
وما إتعرف قانون نهايتو ...
غايتوا أمشى في الدرب البطابق ..
فيه خطوك صوت حوافرك ...
يا فرس كل القبيلة تلجموا ..
ويكسر قناعاتا ..
ويفر يسكن مع البدو في الخلا ..
ما برضى غير الريح تجادلهُ وتقنعهُ ..
D D D D D
إفترضتك لون أساسي ...
يمنح اللوحة إزدواجية القراية ..
ويفتح الضوء بين خطوط الريشة والخط الإضافي ..
الجاي من شبكية الزول البشاهد ..
وإكتشفنا الرسمك وأنا برضو التوارد في الخواطر ..
نفس أرقام التذاكر ..
البيها سافرنا وشهدنا ...
إنفجارك في الأرض ..
يا سمرة يا واضحة ..
D D D D D
ما غنيت يوم جيتك صدفة ..
قبل أبداك كان غصنك بشر ..
يوم ما كان إحساسك مسى ..
عرج غيمك فيني ومطر ..
لحظة طار عصفور من صدرك ..
رتب فينا إحساس بالإلفة ..
ودوزن عصب الزمن الأشتر ..
وإتوكلت عليك وقلت ..
المارق منك داخل جرح الوردة ..
وراسم فوقه غناوي الطل ..
المارق منك ...
رجع للغابات العرب العاربة ..
وللعتمور الزنج الهاربة ..
وأدى الكون مفتاح الحل ..
المارق منك ...
شادد عصب الورقة وحرفي وراصد ..
في اللاوعي سكون مواعيد ..
صحوة ... وحلمه... ولونه ..
وشاري يقينك في زندي ...
وسارق لحظة إني أفكر ..
المارق منك ... مارق منك ..
أو مت شهيد ...
D D D D D
ما تتضاري ورى الدعوات ... وما تتلبسي فرح الفات
يسكن فيك النغم الزايف ... ويسرق حاسة شوفنا الواقفة
على رجلين جوانا ..
ونحن الهاويه والمطامن من الأرض ..
آه من نحلك ساعة يرحل ..
ولمن يكتب فينا الحنضل ..
ويختم عمره بفعل الشهد ..
D D D D D
قال الجدول :
طلوع النخلة مرور الريح واحد
لاكين الريح بتعانق حقل ..
ونحنا بنطلع نخلة وننزل ..
ونكتب في ذاكرة الصفق الأخضر ..
سجنا الريح في الورق الأبيض ..
وجهناها ضد التمر الناعس ..
يسقط زي قبعة الحارس ..
زي الكان بيناتنا وفات ..
D D D D D
قالت غيمة (غيمة لئيمة) :
أولاد الشارع فهرس لي كل المدن ..
التهرس جوفك بالأسمنت ..
قالت ريح :
شوف الناس قنديل ..
لو ما نور يحرق كوخ ... وباقي الحلة تنور ..
أو جبة جوخ أو ينزل بوخ ... يقول للنسمة الزايفة أقيفي ..
لو تتفرد ريح ... تتشرد ريح ... ريح الخوف ... لو تتفرد ريح
تبدأ تفرتق ضفائر المدن الكاذبة ... تعيد تسريحتك ..
D D D D D
يوم سمايتك شكل قامتك ..
كيف تموتي وتحي تاني ..
ويوم قيامتك ..
هو البيدينا الثبات ..
يا مجلوبه في قافلة رق ..
ما بستحمل صدرك رصاصة ظلم ..
يا صابت رحم الفال يا قطعت حبل الحلم ..
يا كنا نبيعك يا نسرق ..
إخترنا النار الضلها بيحرق ..
طمناك إنو الدنيا بخشها ضو ..
يجرح جلد العتمة ..
لما الليل قربان فجرك ..
D D D D D
يا بت يا نيل ... يا بت يا نيل ..
لو نامت قمحة على الأبيض ... تتشرد زيه ..
وزاد الأبيض في غية ..
ومدد رجلة اليسرى ..
ما كان الكسرة جاتك من بره .... صفرا ومنكسرة
D D D D D
زوجناك الشهداء أولاد الكد ..
الماتو عشان الشعب ..
زوجناك ما عندك ضرة ..
زوجناك ما جاتك ضرة ..
ما إنشاف ماعونك ... في الحلة يساسق
ويلقى فتات ...
D D D D D
قال الأبيض للأزرق :
يبقى ضد الانتباه ..
وضد تواريخ التمازج ..
بيني بينك ..
وده البشوفك في مراهقة الخرائط ..
وفينا من وجع المسافرين ..
واطه مالاقت هوية ..
D D D D D
رد الأزرق :
مطر الحبش لو كان نبش ... جواك سقف
وهد حيلك في الدواخل ... وشد عصبك في المداخل
صوت مراكبي ويد بتسأل في القمح ..
وفينا من فرح المسافرين ..
قصة الشمس القضية ..
D D D D D
يا أعشاب النيل الأبيض ..
ماتتضاري ورى الدعوات ..
أقرا تاريخك ... أخاف ..
أقرا تاريخي … أخاف ..
أسأل جبين الفجر ...
ألقى الفجر مطعون في القفا ..
هل سافرت في دمعك المحقون جفا ..
حبة غضب ..
ما شلنا جمرك وإنطفا ..
جوانا نارك والمطر ..
جايين بالكتابة ..
وضربة الناس المهابة ..
لو هز نخلك باشبزق ..
ما فارق التمر السبيط ..
وما سارو الطورية شك ..
إنو الأرض أنثي ... وبتحمل بالحلال
مين القال إنو المسافة ..
البينا بين الشمس طاقة ..
أو مياه النيل بتدخل ..
في عروق السنبلة ..
المسقية بي عرق ..
الجعانين والمساهرين بالبطاقة ..
D D D D D
أقرى تاريخي وأقيف ..
أقرا تاريخك وأقيف ..
جواك والزمن النضيف ..
جواي من جواك غضب ..
سلم مفاتيح السؤال ..
جيل الشمس موكب حريق ..
واقف على باب الدخول ..
بيناتو بينات الوصول ...
لحظة شهيق ... لحظة شهيق

[ابوطاقية]

عجــــاج البــــحر
محمد طه القدال

يراقصني عجاج البحر .. ترعد داخلي الأمطار
يكلمني تراب الأرض .. تشدو قلبي الأوتار ..
أغنيـكـــــــــم .. أغنيكـــــــــم ..
أغني جذوة النار التي فيكم ..
وألعن ذلك البرد المدثر روحكم ..
بـــــــــــرماد موتاكــــــــــــم ..
D D D D D
وأبني في عيون الشمس مملكتي ..
تنـــــــــاديكم ..
نسوراً تعشق الترحال في الأفاق .. تبقى الكون حرية ..
فإن شئتم تعالوا الآن ..
نرقص رقصة البدء ..
ونعلم أن نمد الكف ..
نحو الشمس للدفء ..
تعالوا أيها الجوعى .. تعالوا أيها الفقراء

[ابوطاقية]

الرسالة
صلاح حاج سعيد

الرسالة الحلوة ريدك ما بريدك
الخطاب النمقت كلماتوا إيدك
قبل ساعات قبل مدة ..
جاني مرسال المودة ..
ياما شال وقلبي أدى ..
إحتفلت وعمري عدى ..
D D D D D
كل كلمة بتكتبيها ..
يا حلوة إنت تنمقيها ...
تضوي بيها فرح عيونك ...
لوحه زاهية بترسميها ..
قبل ساعات قبل مدة ..
جاني مرسال المودة ..
ياما شلت وقلبي أدى ..
إحتفلت وعمري عدى ..
D D D D D
كل كلمة ندية واحة ...
كل همسه شجية راحه ..
والحقيقة الرائعة إنت ..
شن بدورك صورة بنت ..
شلت رسمك والأناقة ..
إنبهرت وغبت ساعة ..
يا ماهل وعما عيدك ..
ما بريدك وزي ريدك ..
الخطاب النمقت كلماتوا إيدك..
قبل ساعات قبل مد ...

[ابوطاقية]

تاني تاني
الصادق اليأس

تاني .. تاني ..
تاني راجعين مـــرة تاني للقديم الإتنسى ..
مالو عـاد الشوق علينـا ..
بعـد مــا روح مشى ..
D D D D D
مالو جرح الحب ده عاود ..
بعد ما فرقنا عاد ..
قلنا داب الراحة جاتنا ...
ليه تفارق غير ميعاد يا زمـان مالك علينـا ..
القديم خليتو عــــــــاد .. نحن مـا فكـــرنا مــــرة ..
نمشي للـــــروح نعيــــده ...
إلا عــــــــاد القسمة قالت ...
مافي زول يختار بــــــيده ...
يــــــــوم رجعنا لقينا فينا ...
الفؤاد ما خلى ريـــــده ..

[ابوطاقية]

حسنك بديع
خليفة الصادق

حسنك بديع معدوم مثالك ...
حير قلوبنا وصف جمالك ..
يا بهجة يا فرح الحزين ...
آمنت زيك ما بكون ..
خطوك نغم يوحي الأغاني ..
تتهادى زي الناس مكانك ..
عليك قليل كلمة جميل ..
وصفك تحتار فيه المعاني ...
حسنك بديع معدوم مثالك ...
حير قلوبنا وصف جمالك ...
D D D D D
يا بهجة يا فرح الحزين ...
آمنت زيك ما بكون ...
أجمل عيون فيك شفتها ...
عيون المها مابتشبها ...
مني الكلام بيضيع دوام ...
قدامك ألقاهو إنتهى ...
حسنك بديع معدوم مثالك ..
حير قلوبنا وصف جمالك ..
أمرك مطاع أبداً يا زينه ..
إنتي الجمال والناس علينا ..
بسمك سنا ولفظك غنى ..
كم بيهو يا سمحة إنتشينا ..
حسنك بديع معدوم مثالك ..
حير قلوبنا وصف جمالك ..

[ابوطاقية]

يا بت يا نيل
مصطفي سيد أحمد

رسمت بوجيه بسيم الضوء ...
بتغالط في الزمن القاسـي ..
بتعاتب في الغنية الصعبة ...
ولحن حزين ..
ووتر موجوع بيحكي إحساسي ..
تسأل عن شدو الأفـراح …
يمكن لجراحنا يكون أسـي ..
ما بيشبع روحنا فرح زايف ...
لو كـان تتناسي وتتناسـي ..
D D D D D
يا بت يا نيل ...
العاشقك عاشق كل الفيك ..
غنايك في كـل ظروفك ..
في الفرح البيدق وعد وفال ..
والحزن الـودر ضي شوفك ..
في السجن القهرك في خوفك ..
في النبض الصامد في البركان ...
الساعدو يرمرم في جوفك ..
يا بت يا نيل ...
D D D D D
جرحـنا عتابك ياباكيــه ..
وعايزانا نغني غنى الأفراح ..
ما الغنوة الناشفة لبن ضرعك ..
والفرح الفيـك خلانا وراح ..
ولقينا فرحنــا وإنتي حزينة …
يكون أشتر ويزيدنا جراح ..
خلينا من الفــرح الكاذب ..
بتعود أفراحنا وتبقى براح ..
رسمت بوجيه بسيم الضوء ..

[ابوطاقية]

سافــــــر
قاسم أبو زيد

سافر مطارات الوداع ..
ضجة قدامك وراك ..... وسماك غناي
مساحات الأسى الفي عيونا ..
تتفجر مدينة وناي ..
بطاقات دعوة الرجعة ..
تساب عينين من الفرحة ..
دموع للحاضرين فجة ..
زغاريد غطت الدنيا ..
وعاد فرح الرجوع منية ..
صداك الريف ... ومن السنبل الغناي
D D D D D
كثير بنعاتب الماضي ..
ولا أسفاً على الحاضر ... صد الرية من قلبك
نغم فنان يعيش راضي ..
مداك إتعدى حد الشوق ..
دخلت على الشعر إنسان ..
هواك إتخت جوة الجوف ،، وإنتحر النهار هسه ..
نغنيك لي مدن شاخت ..
معاك أحلامي ما تنسى ..
تغنيك القرى الراحت ..
خلاص يا غربة ما ترسى ..
غنيناك وبنغني ..
ويتحدى الزمن فنان ..

[ابوطاقية]

شعاع شمس الأغاني

مدني يوسف النخلي

زي شعاع شمس الأغاني ..
جا الحنين عاودني تاني ..
كنت راجيك لو تضلي ..
وكنت ليك كل المواني ...
داير أصارحك بالبحسو ...
وبالأسى وزمن الكآبة ..
D D D D D
القصايد سألة عنك ...
في الحروف باين عتابه ..
جاني الحنين عاودني ...
تاني ليك للغنى والكتابة ..
زي شعاع شمس الأماني ..
جا الحنين عاودني تاني ..
D D D D D
لما سبت هواك رحلت ... لي دروب بالحب بخيلة ..
للضياع سلمت عمري ... وقــلت مـا بـالـيـد حـيـلة ..
وزي شعاع شمس الأماني ... ساقني لي كل المواني ..
إنتي يا الراجع صباحك ..
بي بشاشتك وبي سماحك ..
بعد ما الأيام شقتني ..
وإنتي كم نزفت جراحك ..
وزي شعاع شمس الأماني ..
كنت ليك كل المواني ..

[ابوطاقية]

صابرين
محمد طه القدال

يا حزن الغنى ... صابرين ..
من بعد الضنى ... صابرين ..
على وعد المنى ... صابرين ..
برجاك يا وعد الحبيبة ..
بلقاك في الفرحة القريبة ..
بشراك يا أم الثنى ... صابرين ..
يا حزن الغنى ... صابرين ..
من بعد الضنى ... صابرين ..
على وعد المنى ... صابرين ..
D D D D D
لا ليل ولا حزن طايل ..
لا صد ولا دمع سايل ..
لا هم جاك يا أم نفايل ..
النيل فاض وإنحنا ..
نيلين وحزنك وحلمك أنا ..
فرعين شايلين جنى ... صابرين ..
ســـــــــــــلامات ..
عشرات حبابك ... سلامات ..
يسلم شبابك ... سلامات ..
شايل سحابك ... سلامات ..
القبلي شابك ... سلامات ..
وهواك هنا ... صابـــــــــرين ..
عاشقين ترابك ... سلامـــات ..
يا حزن الغنى … صابـــــــــرين ..

[ابوطاقية]

العشق الخرافي
مصطفي سيد أحمد

في عينيك عشم باكر ..
ما إنــت العـــمر كلــــــــه ... والشـمـس الـوشـاحـة ورود
وزغـرودة بـتـزف للناس ... خـبـر زمنــاً جــديد مـولـود
لقيت غيرك بضيع إسمي ... وأكون أنا حي وزي مفقـود
وفي عينيك عشم باكر ..
D D D D D
لاقيني يا عشقي الخرافي ... لاقـيـنـي قـبــال الـزوال ..
لاقيني في كل المـرافئ …
دقات ربيع وفرح قوافي ..
وإنشرى في حزن السنابل ... غيمة يا كل المشاعر ..
وأمـشـي قـبـال الـصـبـاح ... وزعي الطل للأزاهر
D D D D D
لاقيني يا شوقي الخرافي ... لاقيني قبال الزوال
غنوة من أزمان بعيدة ... طالعة من زمن الرميدة
تلقيني راجيك بالآماسي ...
في المراسي والملمات الغفيرة ..

[ابوطاقية]

على بابك
عبد القادر الكتيابي

على بابك نهارات الصبر واقفات ..
بداية الدنيا هن واقفات .. وكم لهفان وكم طاير
بعد نتف جناح ندامتو ودار ..
نفض هم ندامتو وفات .. قطع شامة هواك من قلبو
إلا هواك نبت تاني ..
وعــــــــلى بــــــــابــــــك ..
وقف تاني الغمايم .. فاجة قطن الليل
مسافر فيها وحداني ... وبدون جنحات
يغنيك الزمن المافي .. يغنيك رهافة حسو
يغني على جليد آماله ... و يحلم بالشتاء الدافئ
وقدر ما يمشي في سور الزمن ... خطوات ..
يلاقي خطى السنين ... واقفات ..
عــــــــلى بــــــــابــــــك ..
يلاقي هواك نبت تاني ..
ومــلا الساحات

[ابوطاقية]

صفوة عاشقيك
صلاح حاج سعيد

قلت ليها ..
إيدي في إيديها ..
دمعة حزن سالت ..
جاي منك وماشي ليك ..
يا مداين غربة طالت ..
لو مدارات نجمي ضلت ..
سكة السفر إستحالت ...
كوني في دربي الحقيقة ..
الدايمة ليها مشاعري مالت ..
D D D D D
قلت ليها ..
وكنت راجع لي عينيها ..
من أسى الزمن المسافر ..
في المشاوير العصيبه ..
من متاهات الأماسي ..
من متاهات الحزن ..
مضمناها وحبيبه ..
بيني لا بينك مسار ..
لا محطات إنتظار ..
لا مواعيد قريبة ..
إنتي يا الفرح الحقيقي ..
المستحيل ...
هدهدي الصبر الجميل ...
وأمسحي الألم المخيم ..
في مدارات الرحيل ...
D D D D D
قلت ليها ..
الحقيقة الضائعة ..
بين قلبي وعيونك ..
إني لا قادر أفوتك ..
لا أجيك ..
وإني عارف بدونك ..
أبقى كلمة حب تزف ..
البشرى في ساعة مجيك ..
وإنت عارفة ..
ياني أكثر زول بريدك ..
ياني صفوة عاشقيك ..
ياني أكثر زول بحبك ..
ولسه بحبك متيم ومبتلى ..
وريدك زادني حيرة على العلي ..
لا مراكب القدرة خبت قلبي عنك ..
وإنت لا قلبك نساني ..
ولا خلاني ..
وقلت ليها ..

[ابوطاقية]

أديني إحساس بالأمل
مدني يوسف النخلي

أديني إحساس بالأمل .. في كل رحلة شوق تطول
وأدي الخطاوي الراجعة ليك .. في سكتك عشم الوصول
ما الدنيا كلها إرتحال …
والإنتظار قدر الوصول ..
الموجة تحلم بالضفاف …
والغيمة تحلم بالهطول ..
D D D D D
راحل معاي ضي الأماني ...
وذكري للأيام هناك ..
لحظات بتذخر بالمعاني ..
وكيف أنسى تذكارات هواك ..
نتحمل الغربة ونعاني ...
ونصبر عشان نكسب رضاك ...
ونغني لو زاد الحنين ...
ياريتو كان سفراً معاك ..

[ابوطاقية]

أظنك عرفتي
جمال حسن سعيد


أظنك عـرفتي عواصفك مهبـي يسارق خيالك يسوقني ويــــــودي
ونهـرك يعـدي ويجهـل مصبـــي هواجسي البتزرع وظني البيربـي
D D D D D
بديتك خواطر بتصحى وتسـاور وطيفك يـزاور وروحـك تحــــــاور
تجيني في زمانـك موشـح أساور أقـول بس نسيتك وجرحـك يتـاور
D D D D D
أظنك عـرفتي عـذاب المغـني وطبلـوا المجـدع شظايـــا التمـني
حروفوا البتجزع في لحظة تـجني خطـاه البتـهــــرع متيــن تطمئـني
D D D D D
مسـرج خيـالك حصاني القبيــل معربــد غبــــاره وخـلى الصهيــــل
مسـافر مســـافر وفـــــاقد دليــــــل أظـنـــك عـرفتي همـــوم الرحيـــل

[ابوطاقية]

الحاج ود عجبنا
الفرجوني

عمنا الحاج ود عجبنا ...
في الفريق ياهو الركيز ...
هو البشيل حمل الرباعة ...
عندو كلمة على الجماعة ...
في الفريق باقيلينا آية ...
للضعيف تلقاهو ساند ...
ويقهر الكعب المعاند ...
للضيوف ديوانو فاتح ...
ديل يقوموا وديل يدخلوا ...
يا ولد جيب الرتاين ...
جيهوا الديوان فراشو ...
وأفرشوا الفرشة الكبيرة ...
والأباريق والتباريق ...
وأضبحوا الحمل المدوعل ...
D D D D D
عمنا الحاج ود عجبنا ...
من سنين أيام جهلتو ...
ديمة في دعوة صلاتو ...
بسأل المولى السلامة ...
وسترة الحال والكرامة ...
وعمنا الحاج ود عجبنا ...
في ليلة من ذات الليالي ...
في زمن حظر التجول ...
جاهو ضيف فوق راس حداشر ...
رحب الحاج بيهو جداً ...
فرشولو ونزلوه ...
وكاسو للعشا ما تلقالو ...
ما الرغيف ممحوق مقصر ...
والبلد في حال معسر ...
وعمنا الحاج فيما بالو ...
وجبة الضيف زي فريضة ...
وهسي ضاقت بي العريضة ...
وضيفوا كيف إترك عشاهو ...
D D D D D
وجاتلو فكرة ...
يمشى للفرن المجاور ...
للجان العيش يشاور ...
بس عشا الضيف يا جماعة ...
ضيفي نازل ليهو ساعة ...
شاكلوه ... ودفروه ... ونهرهوه ...
وجاتو دورية الطوري ...
وأمسى بايت في الحراسة ...
D D D D D
وناسو جنو للصباح ما عرفوا حاجة ...
وين ده روح ؟؟؟
وجاهن الخبر المؤكد ...
ود عجبنا في الحراسة ...
ماشى دورية الطواري ...
ناسو ... أولادو ... وبناتو ...
راحوا دورين محكمة الطواري ...
فيها في نص الخلايق ...
شافو حالاً ما هو لايق ...
عمنا الحاج بي جلالو ...
فوقوا حس السوط يولول ...
فوق قفاهو ... فوق ذنودو ...
فوق رجولوا ...
ومره فوق فججاً حشايل ...
أصلو ما قيل بهوناً ...
حتى كان نزان عجايب ...
إلا لكن الليالي هي البترخص كل غالي ...
D D D D D
حاكموا الولد المنصب ...
كتفوا بالدبور مقصب ...
أنت يا حاج يا مخالف ...
زول مخرف وعقولوا تالف ...
أنت يا زول ما كا داري ...
زلة الناس في الطوارئ ...
أ جلدوه ... غرموه ...
ونفذوا الحكم البهينوا ...
شان يفتح تاني عينو ...
D D D D D
تسمع الصوت صيحتو داوية ...
تسمع السوط ليهو خاوية ...
فوق قفة الشيخ صيحتوا داوية ...
وفجأة رفع الحاج عيونو ...
شاف بنات ولدو وبناتو ...
كلهن واقفات يعاينن ...
دمعتين في العين ترقرق ...
والحزن بينن مفرق ...
ده النجوم الفي سماهن ...
ده الزمان الكان حماهن ...
كل سوط نازل عليهو ...
من شعاع الضو عماهن ...
عمك الحاج دمعوا سرف ...
سيلوا فوق اشنابو سرب ...
تمه حكموا وراح بيوتو ...
نفسوا مكسورة وذليلة ...
كيف ملاقاة الحليلة ...
وصحوة الروح العليلة ...
في البيوت الجوه غادي ...
عمك الحاج ما إعتيادي ...
فوقو متلمين جماعتو ...
والسكيلي ضرب حزايني ...
قالوا ناداهو المنادي ...
فارق الدنيا المسيئة ...
يقطع الزلة وسنينها ...
فوق فراش حاج ود عجبنا ...
بسمع الزول البوصي ...
أقفلوا الحوش يا جماعة ...
وطفوا أنوار الرتاين ...
داك حرس حظر التجول ...
من بعيد ليكم بعاين ...
يا زمن حظر التجول ...
يا زمن حظر التجول ...

[ابوطاقية]

البت الحديقة
خطاب حسن أحمد

حاتجي البت الحديقة ..
فاردة أنسام في طريقة ..
وشاتلة ألوان ..
حتجي البحدث بريقة ...
ضجة الضو في المكان ...
D D D D D
حتجي المن بدري جات ..
من ضلامات السكات ..
شايلة قمرين في عيونه ..
وفاتحة ليلين بي جنونا ..
وضاوية ساحات إنتمت ..
لي فجر فات ...
وبتنتمي لعصور جديدة ...
D D D D D
حاتجي البت البريدا ..
ضاحكة منتصرة وعنيدة ..
آملة مزدهرة و شديدة ..
وناقشة في الزول أغنيات ..
حتجي المن بدري جات ..
ناسفة أزمان الثبات ..
واصفة للناس الطريقة ..
وللعصافير الجهات ..

[ابوطاقية]

الحزن النبيل
صلاح حاج سعيد

وبقيت أغني عليك ..
غناوي الحسرة والأسف الطويل ..
وعشان أجيب ليك الفرح ..
رضيان مشيت للمستحيل
ومعاك في آخر المدى ..
فتيني ياهجعة مواعيدي القبيل ..
بعتيني لي حضن الأسى ..
وسبتيني للحزن النبيل ..
D D D D D
ومشيت معاك كل الخطاوي الممكنة ..
وبقدر عليها وبعرفها ..
أوفيت وما قصرت في حقك ولا كان..
عرفة غيرك أصادفها ..
وقدر هواك يجيبني ليك ..
جمع قلوبنا وولفها ..
وكتين بقيتي معاي في أعماقي ..
في أعماق مشاعري المرهفة ..
لا منك إبتدت الظروف ...
لا بيك إنتهت الأماني المترفه
D D D D D
ندمان أنا ..
أبداً وحاتك عمري ما شلت الندم ..
ما أصلوا حال الدنيا ..
تسرق مُنية في لحظة عشم ..
وأنا عندي ليك كان الفرح ..
رغم إحتمالي أساكي يا جرح الألم ..
كان خوفي منك جاي .. من لهفة خطاك على المواعيد الوهم
أهوه نحن في الآخر سوى ..
باعنا الهوى...
ماشين على سكة عشم !!
وبقيت أغني عليك ..
عناوي الحسرة والأسف الطويل ...

[ابوطاقية]

الغربة
عبد العال السيد

الدنيا ليل غربة ومطر ... وفرح حزين وجع تقاسيم الوتر ..
شرب الزمن فرح سنين .. والباقي هداه السفر ..
D D D D D
يا روح غناي الغربة ملت من شقاي ..
وغربتي يا روح غناي ... الغربة ملت من غناي ..
وغربتي وبقيت برأي … حاضن أساي
الوحشة ملت من أساي .. وحدتي لا غنوة لا موال ..
يبدد حسرتي غير الدموع … يا ملهمه .. الغربة مرة ومؤلمة
D D D D D
قولي للنيل ضفة ضفة .. والعشيات لما تصفي ..
والنسيمات البتــاخد من عفاف ريدتنـا عفة ..
إنو شوقي يفيض بحر ...
شوقي شوق إنسان مضيع .. ضيعوا الليل والسفر
شوقي شوق إنسان معذب .. عذبوا الليل والسفر
لا ينابيع ريدي جفت لا و لا أشواقـي خفـت ..
كل يوم في غربة زايده .. بيها كل الدنيا عرفت
الدنيا ليل غربة ومطر ...

[ابوطاقية]

صفوة محاسنك
صلاح حاج سعيد

كان نفسي أقولك من زمان …
بالكاتمو في سري ومكتم … في حشاي مدسوس سنين
كان نفسي أقولك من زمان ...
بالشايلو في عيني معزة وفي القلب … ريداً يخاف الغربة والشوق والحنين
زاملني زي خاطر الفرح … وكتين يقاسم الريد حنان
وكتين مدامعي تكون جزى … وتفتح مباهج الليل ظنون ..
D D D D D
كان نفسي أقولك من زمان ..
صفوة محاسنك عندي ما كثرة جفون …
وقت العيون تعبرني زي خاطر المساء
صفوة محاسنك ما الرخام الفي الحرير …
وقت الثغير يفجعني بي حـرفاً قسا
صفوة محاسنك عندي وقتين … كبريائك ينهزم لي طيبتي بلفظة حنان
وقتين مشاعرك تنسجم … في عمري تلفح قلبي بي رعشة أمان
صفوة محاسنك عندي وقتين شوقي …
صبح في هواك للعزة ما بتعرف هوان ..
D D D D D
كان نفسي أقولك من زمان ..
عينيك وحاتك دنيتي وأهلي … ودياري الفيها ضايع لي زمن
عينيك وحاتك شوقي لي زولاً … ولوف من بعد ساب عيني سهن
وأنا كنت داير من زمان … أشرح حكايتي معاك ألف
أحكيك وأزيد الكون ولف … وأتمنى لو قلبك عرف كان من زمان
من قبل ما في قلبي يتحكر … زمان الحرقه في جرح الأسى
من قبل ما حرف الحقيقة الحلوة يتبدل عسى ..
وأصبح أماني كثيرة في خاطر الحنان ..
كان نفسي قولك من زمان ..

[ابوطاقية]

كوني النجمة
قاسم أبو زيد

قولي الكلمة لصمت الليل ..
وكوني النجمة ..
وامشي معانا الدرب طويل ..
وكوني النجمة ..
D D D D D
وأدي الفرح إمتد مساحة ..
نادي الأمل الجوه عيونا ..
شوق الشوق أتجدد تاني ..
باقي أحلامنا جدار من كونا ..
قولي الكلمة لصمت الليل ..
وكوني النجمة ...
وامشي معانا الدرب طويل ...
وكوني النجمة ...
D D D D D
إيد مبسوطة تقابل الحنة ..
نغم الليل السال شبال ..
نخلة تغازل في عيون طفلة ..
وحفلة ورقصة فال ..
قولي الكلمة لصمت الليل ..
وكوني النجمة ...
وامشي معانا الدرب طويل ..
وكوني النجمة ...

[ابوطاقية]

مدن عينيك
عبد القادر الكتيابي

لمحتك … قلت بر آمن بديت أحلم ..
ألملم قدرتي الباقية … وأشد ساعد على المقداف ..
تلوح لي مدن عينيك … وترفع لي منارة بسمتك سارية ..
كل ما الريح تطارد الموج ..
أزيد إصرار وألحق بيك ..
أغير سكة التيار ...
وأقول يا إنت يا أغرق !!
D D D D D
وتلوح لي مدن عينيك ..
أخاف الضفة ترجع بيك قبل ألحق ..
وأخاف غيم المنى الشايل تسوقوا الريح ويتفرق ..
وأشد ساعد على المقداف ..
وأجيك بي قدرتي الباقية ..
حطام إنسان موسم … بي شقى الدنيـــا ..
مقسم قليبو في الأحزان …
أجيك فنان ..
أشد أوتـــــاري … وأحكيلك حكاية إنسان ..
وهب لي سكتك نفسو ..
ورسم صورتك علي حسو ..
وربط ساعد على المجداف ..
وقال … يا إنتي يا أغرق !!
أخاف … أخاف غيم المنى الشايل ..
تسوقو الريح ويتفرق ..
والاقيك يا أماني سراب ..
مواهبي عليه تتدفق ..

[ابوطاقية]

أيـام زمـان
التجاني حاج موسى

والله أيام يا زمان … ببكي وأتحسر عليك
ومابيقولو العشناه كان … وأرمي حبت لومي فيك
والله أيام يا زمان ..
لسه راجيك يازمان … بحبة الذكرى المعاي
عايشه في وجداني جوة … ولسة بتدغدغ حشاي
ويمكن الحبيتو مرة … ألقاه في كلمات غناي
أصلو بتصحي المشاعر … ويمكن الطول سهاي
D D D D D
تغشى ليلاتو البشاير .. ويمكن الفرح الزمان ..
لسة أصداه بترن .. غنوة حاضناها الضفاير
والله أيام يا زمان ..
D D D D D
جايز الأيام تحن … وتصحي فيك نبل المشاعر
ويمكن المجروح يئن … وتغشى ليلاتو البشاير
ويمكن الفرح الزمان ... لسة أصداه بترن ...
غنوة حاضناها الضفاير ..

[ابوطاقية]

وجيدة
قريب الله عبد الواحد

بعيد عني ..
خطاك ما لامست وجه الطريق ..
ومشيتي لا فوق غيمه لا ظني ..
كأنك من وراء صفحة زجاج مبلول ...
وراك الريح ..
وقدامك مدى السكة وندا المجهول ..
وأنادي ليك ..
وجيدة ... وجيدة
لا إلتفتي ولا لوحتي بي إيدك ..
وأنادي ليك ..
يجاوبني المدى الفاتح مدارج الهم ..
بتبقى وجيده طعنة سيف ..
موسدة في شق السماء المرسوم ..
وسادة دم ...
وتبقى إيدنا في إيديك ..
وفي شعرك ..
وفي المنديل ..

[ابوطاقية]

وضاحة
أزهري محمد علي

الصباح الباهي لونك .. وضاحة يا فجر المشارق ..
غابة الأبنوس عيونك .. يا بنية من خبز الفنادق ..
D D D D D
شيدت في جواي صوامع للفرح ..
وفتحت في دنياي مسارح للمرح ..
وبقيت لي سكة وعيون .. لا قدرت اطولك شان أجيك ..
لا قدرت من غيرك أكون .. وأنا بيك ماليني الكلام ..
حركت بيك عصب السكون ..
جلبت ليك الغيم رحط .. طرزت ليك النيل زفاف ..
حرقت ليك الشوق بخور .. و فرشت ليك الريد لحاف ..
D D D D D
لا السكة بيك بتنتهي .. ولا معاك مليت طواف ..
ياريتني لو أقدر أكون .. وضاحة يا فجر المشارق ..
الصباح الباهي لونك .. يا بنية من خبز الفنادق ..
غابة الأبنوس عيونك

[ابوطاقية]

يا مطر عز الحريق
محمد الحسن سالم حميد

من الواسوق أبت تطلع !!
من الأبرول أبت تطلع !!
من الأقلام أبت تطلع !!
من المدفع طلع خازوق .. خوازيق البلد زادت
يفيض النيل نحيض نحنَ .. يظل حال البلد واقف
تقع محنه ولا النيل القديم ياهو … ولا يانا
نعاين في الجروف تنهد … ولا يانا
رقاب تمر الجدود تنقص … ولا يانا
متين إيد الغبش تتمد لا قدام … لا قدام
تتش عين الظلام بالضو .. تفرهد شتلة لا هدام ..
ولا فيضاً يفوت الحد .. عقب يانيل تكون ياك ..
ونكون أهل البلد بالجد ...
D D D D D
يا مطر عز الحريق ..
يا مصابيح الطريق ..
يا المراكبية البتجبد ..
من فك الموج الغريق ..
جينا ليك والشوق دفرنا ..
يا نشوق روحنا ودمرنا ..
يا المحطات الحنينة ..
القصرت مشوار سفرنا ..
D D D D D
يا ما شايلك فيني حايم .. لا اليالي المخملية
لا العمارات السوامق .. لا الأسامي الأجنبية
بتمحى من عيني ملامحك ..
وإنتِ جايهِ المغربيهِ .. داقسهِ دايشهِ المغربيهِ
وشك المكبوت مكندك .. سمصونايتك زمزميهِ
كون شبر طوريه منجل ..
سبحه فانوساً مدردح ..
قلتي بيهن لي زمانك ..
يا زمان الآهه حدك ..
يا زمان الحاجة عندك ..
لا تطي الوردة الصبيه ..

[ابوطاقية]

يا سر مكتوم
سيف الدين محمد صالح

يا سر مكتوم في جوف أصداف …
فتشت عليك بقليب نزاف .. أبحرت ليك بلا مجداف
لا خبير يهدي ولا دليل وصاف .. يا سر مكتوم في جوف أصداف
D D D D D
راجياها الريح وكتين ما تطل .. على موجه تمرجح زهرة فل
تشيلها تروح والدنيا تنوح .. على قمراً مات في مطر الليل
يتم نجمات بكاها السيل ..
D D D D D
يا عمر مرسوم في كف أقدار .. ياخطايا الطال بيها المشوار ..
محسوب ليك تمشي براك خطى الأحزان ..
مكتوب ليك آه ودمعة شوق ظمأن ..
مرسوم ليك سهر العاشقين وليك سهران ..
D D D D D
ياسر مكتوم في جوف أصداف ... الريح القاسية عنيدة تمام
طفت القنديل الكان مقدوح من دمع الليل
رمت القنديل الكان نديان في جوف النيل
رسمت أحزان وسؤال حيران في عيون أيتام ..
يا سر مكتوم في جوف أصداف ..

[ابوطاقية]

مزيكة الحواري
يحي فضل الله

ماني غرقان في التمني .. ولاني سارح بالأماني
زارني خاطراً بله شوقي واحتواني ..
النخل إتلاقى غنى .. وردد النيل الأغاني
النجوم لامع بريقها .. الورود النايمة فاقت
عطرت كل الجزاير بحريقها .. الندى الراقد بفوقها
صفقت جنحاتو غنت لي هواي ..
D D D D D
دقوا مزيكة الحواري .. رقصوا البنوت أعرضوا
النخل زائد في عرضو وفي علاهو ..
يحكي للدنيا الجميلة .. سر ثباتو وسر بهاهه
ضي عيونك يا بنية .. يضوي لي بلداً بعيدة
تحملك لينا الغمامة .. ويكتمل للروح نشيدها
للدروب الليك تودي .. بنسرج الخيل العنيدة
والحزن من ضي عيونك .. يلبس الفرحة الجديدة
D D D D D
وأنا راكب يا مراكب .. لا الرياح توقف خطاي
لا الجبال تحجب رؤاي .. سر شموس الكون مناي
ليك مسافر من كتير الزاد ..
مسافر بي غناي ..
نوصل الشمس البعيدة ..
نبقى عيدها ..
نزرع الحب البيوقد للنهاية ...

[ابوطاقية]

عم عبد الرحيم
محمد الحسن سالم حميد

فتاح يا عليم .. رزاق يا كريم ..
صلى على عجل ..
همهم .. همهمات ..
حصن للعباد ... وهوزز سبحتو ..
ودنقر للتراب .. هم فوق هم همات ..
صنقع للمسا ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ؟..
لا لمسة حنان .. لا لمسة وداد ..
لا رمشة طريق من قلباً وفي ..
زي أيام زمان ..
أيام الدفي ..
D D D D D
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم ... ما رسل نغم ..
D D D D D
عم عبد الرحيم أتوكل نزل ..
في المشرع لقى .. زملان الشقى
الجأ من الجريف .. الجأ من الجبل
عله الناس بخير .. صبح هاظرم
نقنق ناقرم .. غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..
D D D D D
الطاق اليطق عشت أبو الزمل ..
بالحالة العليك بالفال بالأمل ..
عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار آبدوم ...
D D D D D
وعم عبد الرحيم ماشي على الشغل ..
في البال القديم إتعارض تُكل ..
تنشايح جراح يا ..
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القصد القديم .. وبيناتن عشم ..
في الفرج البعيد ..
D D D D D
أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن آبفيد .. طقن آبزيد ..
وإنطقن زمن ..
وإنطق الزمن لازم توب جديد ..
وبأية تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..
D D D D D
عم عبد الرحيم يا حر ..
ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما تمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..
D D D D D
والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سعلتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشه دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..
D D D D D
وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هانقدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكد في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..
D D D D D
حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السقتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط للحمار .. ونقريطة الحمار
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجأ وما وصل ..
زي الحال ده يوم لا كان لا حصل .. والبال إشتغل
D D D D D
السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت الحمار وطوّح زي حجر ..
وعم عبد الرحيم إتلافا القطر ..
D D D D D
فتاح يا عليم .. سال الدم مطر ..
جرتق بالتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة الحمار مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر ..

[ابوطاقية]

جواز سفر
حافظ عباس

والله نحن مع الطيور .. الما بنعرف ليها خرطة
ولا في إيدها جواز سفر .. نمشي في كل المدائن
نبني عشنا بالغناوي ..وننثر الأفراح دُرر
الربيع يسكن جوارنا .. والسنابل تملا دارنا
والرياحين والمطر ..
D D D D D
والحبيبة تغني لينا .. لا هموم تسكن دروبنا
ولا يلاقينا الخطر .. وين يلاقينا الخطر
لو بقينا مع الطيور الما بتعرف ليها خرطة ..
ولا باكر يا حليوه .. لما أولادنا السمُر
يبقوا أفراحنا البنمسح بيها أحزان الزمن ..
نمشي في كل الدروب الواسعة ديك ..
والرواكيب الصغيرة .. تبقى أكبر من مُدن
إيدي في إيدك نغني ..
والله نحن مع الطيور .. الما بنعرف ليها خرطة ..
ولا في إيدها جواز سفر ..

[ابوطاقية]

زمناً متمنية
محمد المهدي عبد الوهاب

ما بين زمناً متمنية ..
وزمناً منك زادني أسية ..
طفت الدنيا عشان أنساكي ..
وأنسى الحزن الطارد لي ..
D D D D D
كان البحر الما خلاني ..
وكان أخوان في الإنسانية ..
قعدن معاهم وإتفاكرنا ..
كم لفينا وكم ساهرنا ..
وكم مازحنا ليالي الصيف ..
وكم غنينا للحرية ..
وكم دارينا الحزن الأكبر ..
بين الصيف وجمال المنظر ...
D D D D D
كنتي بتطلعي من عينيهم ..
وكتين يفرحوا أو يندهشوا ..
أو يفترشوا سواعد بعض ..
أو يتكلموا عن الأرض وسلام العالم ..
D D D D D
ما أحلاهم ..
شالوا معاي الهم بالجملة ..
هتفو ..
البحر .. البحر .. البحر ..
وجوه المركب فضلوا يغنوا ..
شوية .. شوية ..
سكت المركب ..
كل الناس إثنين .. إثنين ..
فرح يتكلم بي لغتين ..
D D D D D
وكنت براي وجاني حنين الكون إتكوم ..
غور جوه صدري ..
وأتمنيت لو معاي ..
ما بين زمناً متمنية ..
وزمناً زادني أسية ...

[ابوطاقية]

المسافة
صلاح حاج سعيد

لسة بيناتنا المسافة والعيون ..
واللهفة والخوف والسكون ..
رنة الحزن البخافها ..
تعدي بالفرحة وتفوت ...
وأبكي بالحسرة وأموت ..
D D D D D
الأماني الفي السفر ..
قبل الزمن كايس المواني ..
يوم تجيبني عليك بصدق ..
إنو مرة الحظ طراني ..
واحتواني معاك شجن ..
عذبني قبلك ولسه منك جاي تاني ..
تمشي وين الخطوة منك ..
ما الزمن بالحب بلاك وابتلاني ..
D D D D D
يا عيونك يا مدائن ..
الفرحة والحب والجسارة ..
عندي ليك مليون بشارة ..
ألف طيف .. والكلمة شارة ..
وأنت لما الحب يهون في عيوني ..
وفي عيونك يبقي حائر بالأمارة ..
الفرح منك يجيني ..
ويعتريني الخوف عليك ..
خطوة منك .. خطوة ليك ..
راجي منك بس إشارة ...
كلمة تديني البشارة ...

[ابوطاقية]

عينيك
صلاح حاج سعيد

عينيك مدن منسية ..
في كتب التواريخ والزمن ..
عينيك وطن مشدود ..
على وتر التباريح والشجن ..
ممدود على حروف الكتابة ..
مكدود عنا ومكتول صبابة ..
فيه حطّ النيل سكن ...
D D D D D
عينيك سفر مكتوب أعيش في غربته ..
واعشق عذابه وحرقته .. وليله الطويل ..
أتخيلك يا حلوة زي نسمة سحر ..
جيتي ومعاك حلمي المطول منتظر ..
وعدو الجميل ...
عشقك زمان جواي رحل ..
يتناها في الأعماق أمل ..
ضمخ رؤاي إحساس نبيل ..
أذهل طيوف خاطري القبيل ..
جاشت ملامح روعته ..
وضج السكون في وحشته ..
والكان أمل في عيوني لاح ..
زورق مدرات فرح الوهج النضير المزدهر ..
فجأة إنحصد قبضة رياح ..
وسكت الكلام يا حلوة في القول المباح ..
وقام الصباح بعدك رحل ...
والكان أمل في غيم سماك ..
أيقنت أنه عدم بلاك ..
وأنه البيحلم بي علاك ..
بختار ظروف أحلاها مُر ..
D D D D D
عينيكي لو تصدق معاي الأمنية ..
عينيك لو أعرف ختام الأغنية ..
بدأ الكلام والمنتهى والمستطاب والمشتهى ..
كل المباهج في المواويل والغناء ..
والعاشقين قلبي وأنا ..
هزتنا في عينيك تصاوير المنى ..
يا أمنيات من كم سنة ..
ويا أغنيات كل الأماسي المستحيلة وممكنة ..
المستحيل عينيك تهون ..
والمستحيل قلبك يخون ..
ما القدر ما طبع الوفاء والصدق ما شرط إنتفا ...
وأنا حالي في بعدك كفي ..
وأنا حالي من بعدك كفاهو ..
المغنى والحب والشجن ..
والوحشة والشوق للوطن ..
العمر قبلك ضاع سُداً ..
والعمر بعدك أية يكون ..
لو يبقى بي إحساس الزمن ...

[ابوطاقية]

عـــز المــــزار
عبد العال السيد

من بعد ما عز المزار ..
والليل سها وملت نجومو الإنتظار ..
والشوق شرب حزن المواويل ..
وإنجرح خاطر النهار ..
وبقيت أعاين في الوجوه ..
وأسال عليك وسط الزحام ..
قبال أتوه ..
يمكن ألاقى البشبهك ..
ما الليل براح ..
والشوق تعالي بيندهك ..
D D D D D
شايلاهو وين النيل معاك ..
عصفورة جناحتها النجوم ..
وأنا بي وراك ..
بسأل عليك مُدن .. مُدن ..
وأعصر سلافة الليل حزن ..
بسأل عليك في المنفي ..
في مرفأ السفن ..
إمكن طيوفك أخريات الليل تمر ..
تملأ البراحات للحزين طول العُمر ..
D D D D D
ما نحن بين الأمنيات والتضحية ..
بين المعزات والعذابات في الحياة ..
بينا الهوى إخلاص على قلبي إنكوى ..
وكلام كثير قلناهو آخر الليل سو ى ..
إنو راح نتلاقى لو طال النوى ..
لكن كلامنا الكان وكان ..
خايف يكون شالو الهوى ...

[ابوطاقية]

واقف بـراك
مدني يوسف النخلي

وافق براك والهم عصف .. ريحاً كسح زهرة صباك
ليلاً فتح شرفة وجع .. قمراً رحل فارقك سماك
مطر الحُزن عاود هطل .. جدد عذاب الأرصفة
ضئ المصابيح البعيد .. أتعب عيونك وإنطفأ
لمتين مواعيدك سراب .. والريد شقا وحرقه وجفا
وافـــق بـــــــــراك ...
D D D D D
بعد المشاوير البقت .. ممدودة في نبض التعب
بتعود وتلقى رجاك زول .. حفظ الوداد زمناً صعب
والباقي من ليل الهوى ..
عطر الصبابة الما إنسكب
والباقي من كل الغنى ..
سيل الكتابة الما نضب ..
واقـــــــف بـــــــــــــــراك ...
واقـــــــف بـــــــــــــــراك ...

[ابوطاقية]

سفر العمر
مدني يوسف النخلي

ما بان عليك سفر العمر ..
لسة الربيع يا دابو زار ..
لسة الضفاف المترعة بتفيض ندى ..
وتدفق ثمار ...
الناس عليك ناداها فال ..
في عيون تناغم الإنتظار ..
وأنا جوه قلبي المشتهيك ..
نزفت جراحات الودار ...
D D D D D
جوه العيون أطفال فرح لمة زفاف ...
جوه العيون تشرق شموس يرحل جفاف ..
أزمان بتغرق في النعيم ..
وحنان غمر عاشقين رهاف ...
وأنا جوه قلبي المشتهيك ..
نزفت جراحات الودار ...
D D D D D
يا زهرة طلت بالفرح ..
بتراقص أنوار المسا ...
ما بان عليك أثر القطاف ..
ولا جاتك أيام القسا ..
ما أروعك وإنتي الشباب ...
بي حمرة الريد إكتسى ...

[ابوطاقية]

الممشى العريض
عبد العزيز العميري

مكتوبة في الممشى العريض ...
شيلة خطوتك للبنية .. مرسومة بالخط العنيد
في ذمة الحاضر وصية ... شاهدة التواريخ والسير والإنتظار
أدوني من قبلك مناديل الوصول .. وفردت أجنحة العشم
في ساحة الوطن البتول ..
وضحكت ما هماني شئ .. وبكيت ولا هماني شئ
عندك وقفت من المشي .. وغرقت في ضوء النهار
D D D D D
كانوا بتمنوك لو ترتاحي لحظة على الدرب ..
حبوك حب قدر الحروف الحائمة في بطن الكتب ..
قدر الخيال ما مد يدو على السحب .. كل خاطر قال بريدك
إلا ريدك كان رسول الدهشة في كل الديار .. وأنا زي عوائد الشعر فارس شد خيل الكلمة ليك .. مصلوب على ظهر البداية القالوا آخره بين يديك قلت يا مهون تهون شان أجيك كنت بريدك وبتشتيهك
أنكسر فيني الترجي ونلت من سفري الخسار .. بس دائر أقولك يا أصلية لو تعب فيني التمني وإنهتك وتر المغني ..
لو تسدي علينا طاقات البشائر وأنهزم يوم التجني

[ابوطاقية]

صرخة
مدني يوسف النخلي

مردودة من صرخة وصدى ..
مولودة في الزمن العقيم ..
رغم المسافة .. الدهشة ...
والشوق والندم ...
أدمنت تحديق السراب ..
هدمت في ليل الحزن ..
أوغلت في الزمن الغياب ..
أدمنت فيك عشق الحروف ...
رغم إنهزامي مع الظروف ..
D D D D D
لا المدرات المسافر فيها لعيونك مداي ..
لا هواك كان مبتداي .. لا مداك كان منتهاي ..
كنت فارد للحلم في ليل رحيل مليون جناح
كنت فاتح صدري ديمة ..
وما بخاف في الزمن الخرافي ..
ودمي كان باقي المداد ...
نبضي في حزن القوافي ..
وصبري في الليل الودار ..
وديمة أنسج في الغناوي ..
والتواشيح القديمة ..
أعشق الأمل البعاين ..
في المسافات الأليمة ..
تسخر أقداري العنيدة ...
وتبكي أحزانها القصيدة ...
لا زفافك كان مطاف .. للأماني وللعفاف ..
وخاصمت عيني الغمامة ..
وداس فرح عمري الجفاف ...

[ابوطاقية]

الأمل المفقود
مدني يوسف النخلي

أملنا الباقي يسرح بي ...
وأهاجر لي زمن تاني ..
وتبقى الدنيا في عيني ..
هداة موجة ..
في بحر الأسى المدود ..
هجعة خطوة ..
في سكة فرح مفقود ..
رجعة غنوة ..
من درب الضنى المهدود ..
D D D D D
وأفتش ليك حناني معاي ..
أماني تصارع المكتوب ..
عشانك لا مسافة تطول ..
ولا تصعب معاك دروب ..
وقلبي عليك ...
وعلى الوعد الحزين مصلوب ..
وراجع ليك ..
أجيك فارساً يشق صمت المتاهة الطال ..
مواعدك بي حكاوي الشوق ..
وبي شمساً وراها منال ..
وبي فرحاً يغرد في سماك ألحان ..
ويجيب الفرحة للأطفال ...

[ابوطاقية]

نشوة ريد
قاسم أبو زيد

نشوة ريد ..
إحساس إكليل ..
وردة وصلك .. جنة أصلك
نجم الليل .. الوصل جميل
D D D D D
نحن مشينا الخطوة الأولى ..
أنت معاي مشوارنا بيقصر ..
بكرة بنحكي الشوق للذكرى ...
نار الريد الغابت تظهر ...
D D D D D
الأطفال يا بنية بغنوا ..
الأفراح لا بد من ترجع ..
الأحلام الدونك فاتت ..
لو واصلنا صباحها بيطلع ..

[ابوطاقية]

الشوق والهواجس
أبو ذر الغفاري

في عيونك ضجة الشوق والهواجس ..
ريحة الموج البنحلم فوقو بي جية النوارس ..
ياما شان زفة خريفك ..
كل عاشق أدى فرضو ..
ما في شمساً طالعة طلت ..
إلا تضحك ليها برضو ..
والغمام الفيك راحل ..
في الصنوبر يلقى أرضو ..
والصباح إمتد ياما ..
كل ما جاوبتي نبضو ..
D D D D D
نشتهيك ...
ياما نحلم نحكي ليك ..
عن المسافة ونشتهيك ..
عن سفن بالشوق بترسم ..
في بحيراتك ضفاف ونشتهيك ..
عن ملامح غنوة طلت ..
في عيويناتك هتافها وبنشتهيك ...
عن حقيقة نهاتي بيها ..
وفي أساطير الخرافة ..
D D D D D
يا صباحات المواني ..
حتى لو دربك ترنح ...
في مشاوير الأغاني ..
والجرح إرتد بينا ..
لي زمان الآهة تاني ..
D D D D D
يانا لا بنتحاشي صدك ..
لا بتموت فينا الأغاني ..
يا غنانا المشتهنو ..
ياني موعود بي زمانك ..
بي إرتعاش صرخة وجودك ..
يوم يطل ميلادي منو ..
لما إتوسد صباحك ..
ياتوا ليل يفصلني عنو ..

[ابوطاقية]

مريم الأخرى والمجدلية
أبو ذر الغفاري

هاهي الأرض تغطت بالتعب ..
والبحار اتخذت شكل الفراغ ..
وأنا مقياس رسماً ..
للتواصل والرحيل ..
وأنا الآن الترقب و انتظار المستحيل ..
أنجبتني مريم الأخرى ..
قطاراً وحقيبة ..
أرضعتني مريم الأخرى ..
قوافي .. ثم أهدتني المنافي ..
هكذا قد خبروني ..
ثم قالوا لي ترجل ..
D D D D D
وأنا لست أدري ..
ما الذي يدفعني دفعاً إليك ؟
ما الذي يجعلني أبدو حزيناً ..
حين أرتاد التسكع في مرايا وجنتيك ..؟
لا عليك ..
فعلى هذه السفوح المطمئنة ..
نحن قاتلنا سنيناً وإقتتلنا ..
نحن سجلنا التآلف في إنفعالات الأجنة ..
وإحتوانا البحر والمد اليقاوم والشراع ..
يا هذه البنت التي تمتد في ديناي ..
سهلاً وربوعاً وبقاع ..
ما الذي قد صب في عينيك شيئاً ..
من تراجيديا الصراع ..
D D D D D
والمدى يمتد وجداً عابراً هذى المدينة ..
خبريني هل أنا أبدو حزيناً .. ؟
هل أنا القاتل والمقتول حيناً والرهينة ..؟
هل أنا البحر الذي لا يأمن الآن السفينة ..؟
خبئني بين جدران المسام ..
قبليني مرة في كل عام ..
وأنا أشتاق أن أولد ..
في عينيك طفلاً من جديد ..
أرتدي اللون البنفسج ..
أعتلي شكل الهوية ..
ضيعتي مريم الأخرى سنيناً ..
في إنتظار المجدلية ..
آه لو تأتين ..
من عميق الموج من صلب المياه ..
كالرحيل كالترقب وإنتظار المستحيل ..
هاهي الأرض تغطت بالتعب ..
والبحار إتخذت شكل الفراغ ...

[ابوطاقية]

سحابات الهموم
عمر الطيب الدوش

سحابات الهموم يا ليل ...
بكن بين السكات والقول ...
وباقات النجوم ...
الجن يعزن في المطر ...
فاتن عزاك رجعن ...
وشوق رؤياك زمان مشدود ...
وصوت ذكراك ...
مكان يجرى يلاقي السيل ...
وسر مدفون بصدر النيل ...
ولولا الذكرى ما في أسف ...
ولا كان التجني وقف ...
وصوت ذكراك رزاز صفق ...
على خطوات بنات سجعن ...
وشوق رؤياك حنين لي رحلة في المجهول ...
لولا الذكرى ما في وصول ...
ولولا الذكرى ما في شجن ...

[ابوطاقية]

طوريتـــــك
قاسم أبو زيد

حتى الفصول صابه الجفاف ...
لا غيمة لا زفة هرع ...
والسنمبر البفرح صغيرة ...
غشانا وإتقاطر رجع ...
وشجرنا من لفح السموم ...
عطشان وقع ...
لاشابا لريحة دعاش لا هش لى برقاً لمع ...
D D D D D
طوريتك في الطين مرمية ...
وكوريتك يابسة ومجدوعة ...
لاغيبتك كانت مرضية ...
ولا فوتك كانت مبلوعة ...
D D D D D
اللهب الضوى الليل قناديل ...
في عيون النجمة القطبية ...
والتعب المد ضراع النيل ...
سجادة فقراء مزاورية ...
سائلين عنك ويوماتي رحيل ...
لمواني المدن النفحاية ...
وشقيش ما تقبل يا أبو الحيل ...
في قلوبنا مواجعك متكية ...
تايهين في بحرو مراكبية ...
أطفال عمال ومزارعية ...
D D D D D
كيف حال يا أبوي ...
كيف حال يا خال ...
بتمسي بيوتنا الكاكية ...
حزنانة بتبكي مال الحال ...
والزمن الساقكم عيدية ...
طوريتك في الطين مرمية ...
وكوريتك يابسة ومجدوعة ...

[ابوطاقية]

حاجة فيك
هاشم صديق

حاجة فيك ...
تقطع نفس خيل القصائد ...
تشده أجراس المعابد ...
توهتني ... عذبتني ... جننتني ...
جننت حرف الكلام ...
وبرضو أدتني السلام ...
D D D D D
حاجة في شرف المدائن ...
في غرف كل السفائن ...
جوه في عمق المناجم والعيون ...
حاجة زي ما تكون محلق في العواصف ...
فجأة تهبط للسكون ...
حاجة زي نقر الأصابع لما ترتاح للموسيقى ...
حاجة زي أخبار تناغم في جريدة ...
حاجة زي وتر المواني لما يصدح لي سفينة ...
D D D D D
لابتبدي ... لا بتنتهي
خلتني أرجع للقلم وأتحدى بالحرف الألم ...
وأضحك مع الزمن العريض ...
وأنسف متاريس الطريق ...
وأعرف متين أبقى المطر ...
وافهم متين أصبح حريق ...
حاجة فيك ...

[ابوطاقية]

الشجن الأليم
صلاح حاج سعيد

يبقى بعدك في الأسى ...
وتبقى أنت الظالم القاسي النسى ...
وغصب عني أزيح ظنوني ...
وأقول عليك أنت المسامح ...
وفوق شجوني أعيش زمان بالفرقة جارح ...
عارفني منك ...
D D D D D
لا الزمن بقدر يحول قلبي عنك ...
لا المسافة ولا الخيال يشغلني منك ...
تحرمني منك ...
لا الزمن بقدر يحول قلبي عنك ...
لا المسافة ولا الخيال يشغلني منك ...
تحرمني منك ...
D D D D D
المواعيد لا بتجيب منك تودي ...
لا رسالة تجبني منك ...
لا خبر طمني عنك ...
وأنت سايق فيني ظنك ...
رغم إنك أنت عارف إنو منك ...
لا الزمن بقدر يحول قلبي عنك ...
D D D D D
يا هوى الشجن الأليم ...
خليتني في الألم النعيم ...
وأبقي في كل المدائن ...
سكتي وسفري الجحيم ...
وأنت سايق فيني ظنك ...
رغم إنك إنت عارف إنو منك ...
لا الزمن بقدر يحول قلبي عنك ...
لا المسافة ولا الخيال يبعدني عنك ...

[ابوطاقية]

غـــذار دموعــك
مصطفى سيد أحمد

لا تنبش الماضي البعيد ...
ألم تكن يوماً لقلبي واقعاً مجهولا ...
لا تنكا الجرح القديم ...
فأنني ودعت ليلا مظلماً وثقيلا ...
وحملت روحي في فؤاد نازف ...
ما زال يحمل نصفه مشلولا ...
وخلعت أثواب الحداد ...
أما كفي إذ صار قلبك في الهوى ظليلا ...
D D D D D
غزار دموعك ما بتفيد ...
في زوال حواسه إتحجرت ...
جرب معك كل السبل ...
وإيديه ليك ما قصرت ...
حطمت في قلبو الأمل ...
كل الأماني الخضرت ...
كلماته ليك ضاعت عبس ... لا قدمت لا أخرت
D D D D D
ما كنا وكت الليل يضيع ...
تشرق نجومه وتنكتم ...
ويضئ شعاع يكشف قناع ...
والظلمة ترحل وتنهزم ...
وجفونه من طول السهر ...
تلبس وشاح فرقه وألم ...
نستبشر اليوم الجديد ...
ونقول تعود إنت العشم ...
كيف العشم وكتين يموت ...
والغصه تطعن في الحلق ...
كيف الحنين وكتين يهز ...
لي زول بعيد ما بتلحق ...
كيف الرجوع لزول قنع ...
شايل رفات قلبو الحرق ...
سيب الندم وانسى الدموع ...
ما فات زمان ما بستحق ...
D D D D D
غذار دموعك ما بتفيد ...
في ظلمة ما بتعرف شعاع ...
أشباحها زي موج العدم ...
كسر المقاديف والقلاع ...
ونزلنا في طوف الفشل ..
وأبحرنا في بحر الضياع ...
ونسينا دنياك الزمان ...
عشناها في زيف القناع ...

[ابوطاقية]

يــــا ضُلنـــا
يحي فضل الله

يا ضُلنا المرسوم على رمل المسافة ...
وشاكي من طول الطريق ...
قول للبنية الخايفة من نار الحروف ...
تحرق بيوتات الفريق ... قول ليها ما تتخوفي
دي النسمة بتجيب الأمل ... والأمل بصبح رفيق
والأصلو في الجوف أندفن ... لا بتنسي لا بنمحي
لا بنتهي منو الحريق ...
يا ضلنا ...
D D D D D
والفينا من أهات أليمة ... في حكاوينا القديمة
لا بيرحل من عيونا ... لا بتنعشاه الهزيمة
والقبيل راجينو نحن ... يوم تبشر بيهو غيمة
لما تمطر يوم علينا ... والفرح يملا المدينة
والبيوتات الحزينة ...
يا ضلنا ...

[ابوطاقية]

تعالي نشوف
يحي فضل الله

حبالنا الجوة ما تخنت ...
حبال السما المدود ...
حبال الصوت وكت يرجع ...
يجيب الخاطر المردود ...
تعالى نشوف ...
غنيواتنا البقت الدنيا ما بتشوف ...
تعالى نشوف ...
حروف البكا الجواها ما في حروف ...
تعالى نشوف ... تعالى نطوف ...
على المدن البقت أشباح ...
علي الجوع القعيد مرتاح ...
على الكلمة البقت في الجوف ...
تفتش سكة الأفراح ...
D D D D D
منو البقدر ...
يخاصم طفلة صبحت هازلة ...
فوق مد الأسى الحراق ...
يا غنوتنا ما تفوتي ...
يا كلمتنا ما تموتي ...
ونتمشي فوق ضمير الكلمة ...
عن وترا رحل فراق ...
وعن بلدا رحل فراق ...
وعن ولدا رحل فراق ...

[ابوطاقية]

الزمن الفلاني
نجاة عثمان

لمن يجي الزمن الفلاني ...
سمانا بتقطر مطر ...
درى وتمازج برتاكني ...
نسطر إسمك يا حبيبنا ...
في رموش غيم أرجواني ...
ندمن الضحك المعافي ...
نحيا في الفرح المورد ...
ياسميني واقحواني ...
يا حبينا ...
D D D D D
جوه عينيك عايشة ناس ...
بتسجل الأيام أغاني ...
والطريق ما يبقى ساهل ...
ليك بالمعنى المكاني ...
لما يتحقق زماني ...
بمسح الحزن العشعش في عيونك أسمراني ...
يا حبيبنا ...
D D D D D
بتحيا في حلم الترابلة وفي العلاقات المعاني ...
وفي البقاسي شقى المسافة ...
وعياشة في داخله وبعاني ...
لما يتحقق زماني ...
والصباح الأبيضاني ...
وعن علماً رحل فراق ...
غنانا الفينا ما يشفع ...
حديثنا الجوه ما بنفع ...
تعالي نشوف ... تعالي نطوف ...
تعالي نعلم الشفع ...

[ابوطاقية]

السمحة قالوا مرحلة
المقبول سيد احمد المقبول

بعدك الفريق أصبح خلا ...
والسمحة قالوا مرحلة ...
جاني الخبر جاني البلا ...
والسمحة قالوا مرحلة ...
قول يا لسان في الراحلة ...
صوغ المعاني وجملا ...
نافر وما عارف العلي ...
حال العلي حال الخلا ...
D D D D D
يا عيني جافيني المنام ...
وخدودي دمعك بللا ...
وين بعدك ألقي عطوف ...
يلم أفكاري بعد البهدلا ...
روح يا نسيم روح قابلا ...
تلقاها نايمة وغافلة ...
داعب بخصلات شعرها ...
وألثم ضفايرا مسدله ...
وأرفع كتيفها الهادلا ...
وكال خدودها وقبلا ...
وقول ليها من بعدك ...
خلاص شفت الرفيق أصبح خلا ...
D D D D D
يا ربي لحظات الوداع ...
أمثالي كيف يتحملا ...
الليلة بوصيك بالحبيب ...
عندك أمانة تحملا ...
وتديم على الخير والهناء ...
وكل يوم تضاعفلوا الحلا ...
قلبي الحنين من قام صغير ...
طول عمره لا جفا لا سلا ...
والسمحة قالوا مرحلة ...

[ابوطاقية]

قمر الزمان


كتبت ليك


لا بينى بينك ريدة .. لا قصة غرام

إخترت ليك

أجمل حروف .. وأصدق فواصل نادرة

فى لغة الكلام

لا قصدى ألهو معاكى بى كلمات غنا

لا شعرى ليك مرجيحة من شعر الغمام

كتبت ليك والله يا قمر الزمان

شان جيتى بى زمن المحنة

وشفت فى عينيكى .. حس أهلى القُدام

......................

كتبت ليك وأنا جايى من زمن الشقا

الممدود على وش الثوانى .. مظللا

تتمدد الساعات سنين

تتفتح الأحزان غريبة .. ومذهلة

وأشتاق أفتش نسمة .. فى الزمن العذاب

وأيامى من كتر الأسى

وكتر العزوف .. والإغتراب

صارت حروف مترهلة

لحظات أسيفة .. ومهملة

........................

كتبت ليك

ووقفت ليك .. لامن لقيتك جايه من قلب الطريق

ولمحت فيك راحة المشاوير البعيدة

ونفحة النسمة الحنينة

الجاية من جوف المضيق

حسيت عجايب الدنيا .. إتلمـّت .. بقت

جايـّانى من عصراً سحيق

عينيكى حس أطفال بنادوا القمرة لى الغايب .. يعود

وجبينك الضوّاى

حجا الحبـّوبة فى الزمن السعيد

..........................

وأنا فى قساوة الموحش

الزمن المكهرب .. بى الحريق

أنا حيلتى أيه

قوليلى يا قمر الزمان

غير أتـّكى .. وأحلم معاك

وأحضن أماسى الصحو ..

والأمل البريق

[ابوطاقية]

سحابات الهموم
عمر الطيب الدوش
*************
سحابات الهموم .. ياليل
بكن بين السكات والقول
وباقات النجوم الجن
يعزن فى المطر..
فاتن عزاك .. رجعن
وشوق رؤياك زمان مشدود
على أكتاف خيول... هجعن
وصوت ذكراك .. مكان يجرى
يلاقى السيل ...
وسر مدفون بصدر النيل
**********
ولولا الذكرى مافى أسف
ولا كان التجنى ... وقف
وصوت ذكراك رزاز صفق
على خطوات بنات .. سجعن
وشوق رؤياك ..
حنين لى رحلة فى المجهول
ولولا الذكرى مافى ..وصول
ولولا الذكرى مافى ..
إصول..
ولولا الذكرى مافى شجن

[ابوطاقية]

ضليت
قاسم ابوزيد
*****
ضليت ..
هرب منى الأمل .. جنيت
جافانى الشروق .. حنيت
كنتى معايا .. فى لمـّة
دليب .. شاشاى
فى إيقاع حشا المردوم
فى جيد الزمن .. سوميت
************
مرقت .. على محطات
السفر .. غربة
وما لقيتك .. أمل شارد
مع إنك معاى
فى زحمة المشوار
وحتى يقينى عاد من تانى
صحـّاك من حنين ذاتى ..
نجم الفرحة يا عايد
*********
تعالى معاى....
من زفة نفس مسدار
وما جرتق فرح .. كانت
ولا طعم الشقا الروّح
خطاى هانت
وإنتى معانى شايلاها القوافى
معزة فى عمق الفرح .. دوبيت
وكت ضليت ...
قعدتّ براى .. وحسيتك
بتطلعى من نفس طورية
ضامـّة الطين
ومن دمعة وجع طوّل
ندا العرق البنادى .. حنين

******
واناديك وانت في ذاتي ..
مخاوف سكة آهاتي
مداين قرية لابسة القمرة شامة ضو
يحن يغشاها مرة شروق
يخدر من عرق تربال ..
يرتاح في ضليل واسوق ..
ينادي تراب
يغازل خدرة السيال
تطلُ شروق ..
تكون قمر السعد ضويت ...

[ابوطاقية]

الجالوص
عاطف خيرى
*********
معتوقة ومعتقة ومنعتقة
نوافير إنتشاء وحشمة
وحَـمار العين ..
تضحك كلما وقعت مصيبة
تمشى على العجين وتلخبطو
وترطن إذا جاها الحنين
************
يا بت بيوت الهجعة كيف ؟
غبار شوارعك ماشى وين
زقاق يفتش فى زقاق
كتمة وضلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
***************
صوتك وكت قطع البحر
قبال مراكب العمدة
ضهر النيل عرق ..
والشمس فوق حبل الغيوم
شرت جلاليب النعاس
ناشف غرب مبلول شرق
والمطرة زى شفع العيد
تدخل غرف كل البيوت
حكمة الجوع الشرح للأرضة
كيف تقرأ المرق قبال يقع
فوقـك سقف
إتنحنح الجالوص
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
**********
مبنية مدن الخوف
من طينة آخر الليل
وانا فى سقالة الشوق
قدح البصيرة تقيل
فاتح زريبة الجوف
تمرق تخش الخيل
على كيفة كيف معلوف
ضهر المظنة يشيل
وانا ظنى ظنيـتـو ..
فى النيل غريق فى النيل
و الليل ولافى بالو ليل
ساكت يغنوا على القمر
واجعنى فى البحر السكات
سكتنى فى الوجع البحر
يا بت صباح الطير
وين البلد ركت ؟
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الحريف
داسينى فيكى نضر
والأنبياء فاتوا
والأنبياء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ما ذنب جلد الطار
لو غنو بيهو شتر
ما تخافى الله معاك
وكل الملائكة سمر

[ابوطاقية]

النص الكامل
شوك الشوق
محمد الحسن حميد
*********
شوك الشوق لى الشوف آ خَىْ
ضارب قطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
*************
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو

[ابوطاقية]

حلوة عينيك
د.بشرى الفاضل

نفسى فى داخلك أعاين
وأروى روحى وأشوف منابعك
يا سلام
الصحرا فى عينيا تتواثب جناين
ماخدة صوتك من جداول
وما خدة صورتك من كهارب
مولداً ميدانو حافل
كلما يصبـِّح ...
تجيهو الناس جحافلْ
يا سلام .... يا سلام
**********
لمـّا تعبرى فى الشوارع
شوفى كيف الناس تصارع
ناس تطفـِّر .. وناس تدفـِّر
فى البشابى على نجومك
وفى البخبْ .. كايس تخومِك
وكل زول من عِنْ سُلافك ..
لا لا .. قال دايرلُو كاسْ
********
مرّة طربان .. شلت صوتك
شان أغنى..
قلت آه ياليل .. وآه
إنتى أول .. وإنتى تانى ..
وإنتى تالت .. وإنتى رابع
نافرة زى صيد الخلا
وصافية زى نبع المنابع
وقلتى لى غناى .. خلاص
*******
حلوة عينيك زى صحابى
عنيدة كيف ... تشبه شريحتين
من شبابى
حلوة عينيك زى صحابى
وزى عِنب .. طوّل معتـّق
فى الخوابى
وسمحة زى ما تقول ضيوفاً ..
دقـّوا بابى
.. فرحى بيهم سال .. ملا ..
حتى الكبابى

[ابوطاقية]

مد إيدك شيل سلاحك
*****************
من كلمات مصطفى سيد احمد والحانه
*****************
مد ايدك وشيل سلاحك
لاك إضينة ولاكا خايب
لاكا زول تركة مزلة
لا بفوتوك فى الضكارة
انت شايف ...
غطّت الأحزان ربوعنا
وشتّت الطغيان جموعنا
مافى غير تحمل سلاحك
تحمى ساحك..
وتشفى بى ضراعك جراحك
****************
هم أرازل .. ديل أرازل
خانو كل أعراف بلادك
جهزو سلاحهم فى غفلة
إستباحوك فى كرامتك فى أصولك...
قم تقدم .. أصحى من وهدة زهولك
شق طريقك...
لى رفاق الوجعة منتظرين وصولك
فى صفوفهم خانة فاضية
إنت سيدة وطولة طولك
بندقيتك راجية جيتك تحمى قولك ..
شيل سلاحك قبل ما سلاحهم يطولك

[ابوطاقية]

بين سجن وبيت اشباح

كلمات مصطفى سيداحمد
****************

بين سجن وبيت اشباح
وعطالة ودم مباح
ومزلة تودى الغربة
والغربة جراحة جراح
والحل فى بلدك زاتة
تتحدى سلاح بسلاح
تهزم خفاش العتمة
ويغسل سودانا صباح
************
الخمج الماحق سوقنا
من بعض وفا المحتاج
والعبرة الرابطة حلوقنا
من فيض كاس الدجال
الوهم الداير يسوقنا
اصبح مفضوح الحال
ما فضل الا مروقنا
وبسلاحنا نعدل الحال
بسلاحنا نعدل المال
*********
يا غضبة نيلنا الطامح
وكتين يكسح طوفان
يا سيل الشعب الجامح
فى الثورة بعد عصيان
يا ضراع الولد الجارح
بسلاحك فى المليان
الكى للالم الناتح
والعبرة لكل غبيان

[ابوطاقية]

سمحة وسمرية
محمد طه القدال
************
سمحة وسمرية
محبوبتى ولفتاتة غزالة
خضرة ومسقية
وجنب النيل مشتولة النالة
بهواك يا بنيـّة كتبتو قصيد
وبقولو مقالة
بتفتحى فيـّـا معانى غناى
تديلة مجالا
************
زهرة وبرية
بشوق الأرض عيونا كُحالة
تريانة ندية
بعرق الناس والناس فى بالة
يا خوفة علىّ عقل وثبات
ماهـا الولوالة
************
من فرحى البيـّا
قلعت الخوف وكستنى بسالة
قت ليها النية متين نتلم
والحال بطالة
قالت لى غنية وإنت معاى
مستورة حالة
بت سودانية محبوبتى
ولفتاتة غزالة

[ابوطاقية]

طوريتك فى الطين مرمية –مصطفى سيد احمد – كتبها ثلاث شعراء


طوريك فى الطين مرمية
وكوريتك يابسة ومجدوعة
لا غيبتك كانت مرضية
ولا فوتك كانت مبلوعة
***********
اللهب الضوى الليل قناديل
فى عيون النجمة القطبية
والتعب المد ضراع النيل
سجادة فقرا مزاورية
سائلين عنك ويوماتى رحيل
لموانى المدن النفطية
شقيش ما تقبل يا ابو الحيل
فى قلوبنا مواجعك متكية
****************
وابعتلك شال الحب مرسال
تايهين فى بحرو مراكبية
بكتب على صدر الموج امال
اطفال عمال ومزارعية
كيف حال يا ابوى
كيف حال يا خال
بتمسى بيوتنا الكاكية
حزنانة بتبكى مال الحال
والزمن السابكم ايدية

[ابوطاقية]

بين الموجة والخزان حلم انسان
محمد الحسن حميد
***************
هَرَدْتَ لهاتي بالغنوات
وقُتْ يبُردْ حَشَاك يا امِّي
ومن التّعب البلا صَالِحْ
تفيقي
تروقي
تنجمِّي
تسوِّي مكانسِكْ المطرة
تضوِّي البيت وتنحَمِّي
تمرقي صبوحة للجيران
قدح فوق ايد وفي ايد أَلمْي
يلاقوك شُفّع الكُتّاب
نُضاف وظُراف بلا النّسْمي
ويغنولِك
يغنّولِك غناوي السّابْ
وفي بيّوضة مافي سرابْ
جُبال كَجَبي وفيافي الكاب
تميد بالخُضرة منقسمي
ولا غابار ولا هو سحاب
وتنهجمي من الدّهشة
وتحاحيهُن
غناكُن نيي
غناكنُ نيي
غُنا الوهْمي
ويهتفوا زي كلاب الحي
على الأغراب
حوافي الصّي وبيوضة
البراسيم فيها مفروضة
خدارا يراري شوف عيني
على الأبوابْ
قماريها
وحواريها
وطواريها
بقت روضة بقت تشرب من الحامدابْ
تشربي عافيي من إيديّ
تدوِّي اليوية بي حِشْمي
تسوّي السّي وتبتسمي
تشوفي رهاب بُعُد نجمي
واشوفو قريب قُرُب نَضْمِي
اشوف العالم التِّحْتَاني
هيلا هوب وقف ناهِضْ
ودكّ عمايد الفوقاني
جوه الُّجب رَمى العارضْ
وفي السّابو الدّمَار أفراق
عريق الحب نَبَضْ قابِضْ
مِتِل قَبْض الحروف في اسمي
غناوينا القبيل رَقْرَاقْ
علينا تَصُب بَرِدْ قَارِضْ
أَلُكْ طيناتا من دمّي
وارْمُلا من عصب عشّاق
أنُطْ تُلُّبْ واجيك عارِضْ
واجُرْ نمَيِّ
أدودي لهاتي بالغنوات
عُقُب يبرد حَشاَك يا امِّي
تسوِّي السّيْ وتبتسمي
تسمِّي الشّعب وتعتّصْمِي
بحبل القُدرة تتفرّقْ
ظُلُمةً فيها تتحرّقْ
صُرُمةً قالوا ليك قِسْمي
أدودي لهاتي بالغنوات
عُقُبْ يبُردْ حَشَاك يا امِّي
تقلبي الكلمة بي الكلمي
ضُراعِكْ يرْمِي ما يَدْمِي
تقيفي بعيد عن الشُّمات
تكوني اقرب لي من إسمي
واضُمِّكْ بارتياح يا امِّي
أحبِّكْ صَاحْ
وصَاحْ حلمي
ولاكي سعية للضَبّاحْ
ولا شمش الصّباح حِزْمِي
ولا كَتْف السِّلاح سوّاحْ
ولا نزف الجراح ألمي
هيا انحزْمي
هيا انخلْقي
هيا انعتْقي
متين مو دايرة ري تسْقِي
ولا في إيد النّزيف نبقَى
ولا في إيد الخريف تبقِي
ولا الفيضان يبدِّع بِكْ .
ولا في القيفة تنهدْمِي
ولا انْ جَاتْ حارّه تنهزْمِي
ولا يغشى الغُلُب قلبِكْ
ولا تشقِي
ولا انتِ تخافي لا تَدْمِي
ضُراعِكْ يرْمِي ما يَدْمِي
فيا حزن البلد عوك كَرْ
ويا سعد الولد
ضَرْ ضَرْ
مع النّسْمِي
و ألِوْ قيمة العَمَل عِمِّي
وافتحي ظلمَتِكْ للضّي
سِنِّي على النضال إيدي
سوِّكي بالهُتَاف فَمِّي
شوارعِكْ لَيْ
دَويها عَلَيْ
اذا ما اخر العلاج الكَيْ
مراويدِكْ حُمُر صَمِّي
مراويدِكْ حُمُر يا امِّي
بليلتي ولا ضبايح طَيْ
قليلتي ولا كُتُر سِمِّي
وطني ولا مِلي بطني
سُكَاتي ولا الكلام النيّ

[ابوطاقية]

ميلاد حـب
*************
عشقت ابتسامك حين ابتسمت
فقلت لقلبى تمهل ..
فان الطريق اليها ..
ملئ بأقصى الحجارة
وفى الورد شوك
يشق ثياب الاغانى
تمهل ....
..............
اضعت مع العشق
دفئ الشباب
وفى سنوات الضياع
تلمست وجهاً لك
يستقر لديها المسافر
لكننى لم ازل
فى طريقى الطويل مع العشق
يخنقنى ان كتمت ..
ويجبرنى ان اظل اعانى ..
.................
وبعد تعلق روحى
بروح الاسى..
واحتياجات الهوى ..
فى جميع الموانى ..
واحتجاز الهوى
فى جميع الموانى
تنفست صوتك حين
اطلّ الصباح دفيئــاً
وردد اغنية الشمس
حين تحاصر صمت
هذا النعاس الصديق
تنفست صوتك كأنى ..
ارى اصدقائى بعينيك
يحيون حيناً ...
وحيناً اراهم يبكون
بحثاً عن المستحيل
الذى لا يجئ..
........
تنفست صوتك ..
احسست انك فى
البعد والقرب .. سيان
يشتاق قلبى الى ..
وجهك الشاعرى البديع
وأٌفشى اليك بفرحة
طفل برئ ..
تحرر من كل المخاوف
وحين استقر لديك
ليعلن فى النور
ميلاد حب بروح الرقاب
ميلاد حب طموح الملامح
يبقى يهيب بنا أن نغنى
وان نتحدى الزمان الردئ

[ابوطاقية]

مثاورة


يا جمة حشا المغبون .. في الزمن الهلاك منجا
تكون حانت مواعيدك .. يكون وقت المطر قد جا
وشرق ضو البلد عيدك .. وطابت نسمتو العرجا
نكون يا طيبة تمينا .. وبدينا ولفنا .. غنينا الغنا الراجا
بدت كاس المودة تدور .. عشق من حلفا لي راجا
حبابك ألف .. إيه يا عنزنا القرجا
يا لـبّانة في الزمن المراحو نشف ..
يا جـبّانة للخوانة .. للعوج البدور ويلف
دميرتنا البتروي جرف
ضفيرتنا وعرش بيتنا .. تميراتنا اللي كانو وقف
أصابعين الرجال رصاص .. صمغ راس البنية سقف
أصابعين الرجال رصاص .. عضم ضهر القضية سقف
تكون دارة الزمن عمرت ..
نكون لمينا في الفاتو
وتكون فاقت ملامحنا وتضاريسنا القبيل غمرت
دغش ساقت بوابيرنا وندت شتلات بعد ضمرت
ضراعيك يا الولد كبرت .. مراعيك يا البلد كترت
خدار .. خدرت
غزار .. غزرت
نضاراً زين
برغم الصيف وصناتو ..
وسموم البين وأناتو
عصافير الجلد قدرت تباصر غيمة منتحرة
تباصر نسمة مندحرة
وتضاير الغابة والصحرا
من الغمة وضلاماً شين ..
ومنك يا دقين ننفك .. تكون فكت عقدة الدين ..
عقب سيرة البلد سارت على الدرب العديل والزين
بعد ها الحال بلا مرسال .. يجو العمال .. يجوز الزراع .. يجو الكداح
يجو الناس البخبرو شليل .. وشقيش راح
وقمريتين جناحن دلّ فوق الصاح
من الغفلة وعساكر الليل .. ولي الدنيا الجديدة جناح
صباح نندلّ شدة حيل ... بلدنا وما بنقيف بين بين
فيا خيالة عدو الخيل .. ولي الطيبة البتملى العين
مدى ونياه .. في حز القلب غنوة وآه
حنان بلدو .. وحنين منفاه
يا بت العز .. يا ست الجاه
يا هسع دية .. يا بكرانا .. يا ماضينا .. يا بعدين
نكون كنا .. وبقينا متين
متين تكدح مواعيدك مواعيدنا ونثاورك وين

[ابوطاقية]

عدّى فـات
صلاح حاج سعيد
***********


عدّى فـات ..
زمن العيون الإلفـة
والحضن الملاذ
ورهـافة الحس البلوّن .
ضحكة الناس العـزاز
بعد الحنان .. الكان زمان
إستوطن المطر .. الحراز
*********************
روّح زمانى .. وفى رجاك
عانيت قساوة الإنـتـظار ..
فى ضل شبابيك السفر
صادقت ليلات الموانى ..
الـساكنة فى بحر
الأمانى بتنتظـر
لو يوم طيوف لحظك تفوت
تعبر خيالات تمر
قلق المواعيد الضّجر
سهر العيون ... الإحتراز
إتعزز النوم ..فىالخـدار ...
وإتمدد الشقا فى العمر
*********************
ملّيت تباريح الجراحات البقت
بعدك أسى وزمناً قسا
وحالاً أسيف
ومشيت أفتش عن
خطاويك القبيل .
واضّارى من زمناً ..
وراك ملانى خـوف
أشتقـت ليك ..
اشتقت أرتاح فى عيون
فيهن ملامحك ذاتا
من غير أىّ .. زيف
وإشتقت لى حكة صباحك .
والدعاش عطر رزاز مطر الخريف
أنا وإنت والدنيا الزمان
الناس وفـا وغنـوّة صفـا
ودفء المشاعر الشاتية صيف
أنا وإنت والدنيا الزمان
زمن الغناوى الطالعة من قلباً ..
رضى وحسّاً ندى و زوقاً رهيف
أنا وإنت والـدنيـا الأمـان
ما العمر شتّان بين
أوان زمناً حييتو
وعمر ما بتقدر بتعرف ..
بكرة يصبح حالو .. كيف

[ابوطاقية]

الدنيا ليل غربة ومطر
عبد العال السيد
...........
الدنيا ليل غربة ومطر ..
وطرب حزين..
وجع تقاسيم الوتر
شرب الزمن فرح السنين ..
والباقى هداهو السهر
يا روح غناى ..
الغربة ملت من شقاى وغربتى
وبقيت براى .. حاضن أساى
الوحشة ملت من أساى .. ووحدتى
لاغنوة لا موال يبدد حسرتى ..
غير الدموع يا ملهمة..
الغربة مرة و مؤلمة
الغربة مرة ومظلمة
*******
قولى للنيل ضفة .. ضفة
و العشيات لما تصفى..
والنسيمات البتاخد
من عفاف ريدتنا عفة
إنو شوقى يفيض بحر
شوقى شوق إنسان معذب
ضيعو الليلو السفر
لا ينابيع ريدى جفت
لا ولا أشواقى خفت
كل يوم فى غربة زايدة
وبيها كل الدنيا عرفت

[ابوطاقية]

متخبية والناس شايفنك
د.بشرى الفاضل
..................
متخبية والناس شايفنك
باباى ونخيل
متخفية والناس عارفنك
قرآن وإنجيل
وشقانا معاكى هو إنـّك
طاويك الليل
لكن واردنك .. ورويانة
لا عيون تحزن ..
لا دموع بتسيل
*********
يوم بكرة جميل
ضوّاى .. ووسيم
يوم بكرة جميل
باكر .. دافـِر
يوم بكرة جميل
ابيض نورو
يوم بكرة جميل
باكر داكر
أبداً لا أتغرّب .. لا مسافر
باكر ضوّاى
وجميلتو الليل الما سوّاى
كان حاول يطمس أقمارو
ابيض ريحو يوم بكرة جميل
من فالو النيل يطمح طوفان
وتخاف من موجو تماسيحو
باكر ضوّاى
كلمات وأناشيد .. وقيامة
باكر ضوّاى
وغناهو الحادى .. الهدّاى
يوم بكرة جميل

[ابوطاقية]

سفر السكوت
فيصل محمد صالح
************

طوبى للرجال العصافير
كلما حطّ طائرهم فوق غصن
غنوا بشجيى الكلام .. بديع الصور
وبؤساً لنا نحن الرجال .. الشجر
كلما جرفتنا شجون المنافى
تهاوت جذور الكلام
جفت ينابيعنا
وأرهقتنا ليالى السفر
تؤرقنا الذكرى
توقِد نار المواجد فينا
فيوجعنا الشوق فى صرة القلب
يتأبى حتى السكون الذليل
نخرج الآن من جلدنا
ونخدش صمت السؤالات
نركض عبر الطريق الطويل
من أى ثقبٍ فى الحكايات جئنا
ومن أى بابٍ فى السماواتِ ..
كان إلتماس السكينة؟
ومن أى ذنبٍ عصىٍ
تعلم القلب سفر الرحيل
الطيور قطعت رحلتها ثم عادت
والأمانى إستكانت
والليالى ما عاد صمتها مستحيل
والنساء اللائى علمننا
العشق فى زمانات النداء الجميل
نسجن كعادتهن من
كذوب الروايات
ما يخلع الدفء عن جسد الحب
ثم تذوقن للحبيب البديل
يا صديق المسافات أركض
ما عاد فى الحزن متسع
لصفير الجراحات - قلبى وقلبك-
ولا صبر فى الأفق لإنتظار الخيول
كل المراكب تاهت
أنكرتنا الشموس
والحبيبات خانت
لفظتنا البحار
فهل يستطيع البنفسج
أن يكون الكفيل ؟
أيوجعك الوصف ؟
آه .. من زمنٍ كنا
ننتقى فيه العبارات
من فصوص المحار
نتمشى فى مفاصل الشعر
تأخذنا كل ساعةٍ فى مدار
آه .. من آه .. ثم آه
من كل ذاك الزمان النبيل
أصرخ الآن .. أو
أخرج الآن .. أو
إنزف الآن .. أو
أكتم الشدو فى الفؤاد العليل

[ابوطاقية]

لوحة وطن فى عيون طفلة
قاسم ابوزيد
**********
طفلة حلوة وشايلة لونة ..
ترسم الوطن الشباب
كل خط فى اللوحة باين ..
من دموع الطفلة يحكى
النفوس تبقى السحاب
القلوب تبقى الأراضى ..
نزرع الوطن اليباب
...........
راسمة فى اللوحة القمارى ..
فيها وش النيل حزين
الضفاف كان لونا أحمر .
الشجر كان لونو أخضر
الجباه عرقها بيضارى
حمرة النيل واصفرارو
.........
راسمة جوه اللوحة طفلة ..
الفرح فى رموشة صفق
ادت الامواج بسيمة
غير النيل إنحدارو
العيون وهجة بيضوى
غابة التك والصحارى
لابسة من السعدة قرقاب .
شايلة فى الأيد الطوارى
مارقة قمحة من اليباب
**********
شلة من أطفال مدارس ..
فى نظام ماشين سوا
رددوا الخير بالوتر
الزمن فى اللوحة بشر
الجروف فتحت مداها
الغيوم شايلة المطر
الترابلة هناك كبار
شتتوا العيش للمواسم
العيون شايلات بطر
من بعيد فى اللوحة عامل
الآيادى على السنابل
ودع الليل والفتر ..
خدرالوطن اليباب

[ابوطاقية]

تراتيل
*********
كلمات حسن ساتى
الحـان ناجـى القدسى
******************************************
ليه بتسأل .. ديمة بتامل عيونك
ياعيونى فى عيونك
باقة من ذكراى بتعطر فنونى
باقة من اشراق صباى فيها حبانى النسونى
فيها ليلات الفرح والاماسى الفى السنين
شن اسوى غير اعاين
غير اطيل النظره واتونس و اونس فى العيون
فى العيون الديمة بتفتح عيونى
ده البجنن شوقنا فينا
انو فى عينيك زمان بى حالو ساجد
والفرح الكان بعانق فينا ايام الفرح تلقاهو ساجد
والبراءة الكان بتتوشح طفولتنا وتناهد
والسهر آنسنا فيه الليلة فيها الليلة اتهجد
ساوى فى عينيك معابد ياعيون
مشتاق نعاند فيها تتلون تلونا وتعاند ياعيون
وبرضو تسال وديمة بتامل عيونك ياعيونى
وفى عيونك باقه من ذكراى بتقطر فنونى
حلوة عينيك بى زمانه والزمان الفينا شايلنا ومسافر
مرة ماضى .. ماضى غابر مرة حاضر .. حاضر ومرة باكر
***********
فى عيون طفله .. صباح العيد بتملا البيت بشائر ياعيون
المسافر لسة ماحط الرحال قال يشوفكن يلقى نفسو
فى بحوركن .. بحوركن خلى رحلو وقال مهاجر
ساب ديارو وقال مهاجر ذكرياتو وقال مهاجر
وبرضو اسال وديمة بتامل عيونك ياعيونى فى عيونك
باقة من ذكراى بتعطر فنونى باقة من اشراق صباى
فيها حيانى النسونى فيها ليلات الفرح والاماسى بالسنين
غابن وضاعن فى السنين وبرضو بسال وديمة بتامل عيونك

[ابوطاقية]

يا خطوتــك
..............
يحى فضل الله
............
لا زمن حبك حقيقة
لا تعب زمنك فرح
لا دغش وترك صدح
لا بعد ليلك صبح
......
يا خطوتك ... يا خطوتك
يا خطوة الوجع الجرح
لا الفيها منك ابتدى
لا البيها منك انتهى
.......
يا خطوتك يا خطوتك
يا خطوة ضاعت
بين صراخك والصدى
بين المسافات والنوى
بينك وبين كل المشاعر
الفينا غرقت فى الغنا
........
يا خطوتك يا خطوتك
يا خطوتك داست على
الحرف اليبس فوق الشفاه
داست على البوح والكلام
داست عليك
على انتظارك والملام
داست عليك
على الدروب الماشة منك
وجاية ليك
لا فتر فيها الولف
لا سكت فيها الحرف
......
يا خطوتك .. يا خطوتك
بين ابتعادك وانتظارى
بين مشاوير طفلة ضاعت
بين عيونك وافتكارى
يا عيونك وافتكارى
يا عيونك وافتكارى

[ابوطاقية]

آه يا غُبُشْ
ما عندي ليكم غير نغيم ..برجوه ينفُض
لي غبار زمن القسا ..الكتّاح
يهِزْ عرجون نخل صبر الغلابة الطالْ ..
يحِتْ يخرِتْ ..تباريح الأسى الممدودة فوق نور الدُّغُشْ
يا نورا آه ..
يحرَد كنائسنا المسيح ..يعرش مدارسنا الصّدى

ييبس .. يباس حلق العصافير الوديعة من البُكَا
يندَرْدَرْ الصّوت البعيدْ .. أسيان يصُد من دون صدى
ينكَفْرَنْ الفجر الصّبوح .. يحمي الزهيرات الندى
تختا الدراويش الضّريحْ .. يسكن خلاوينا الجنون
يهجر جوامعنا الإله يا نورا آه ...
تطرح غيوم الشوق تئِنْ .. تشرَقْ تموت
خيل .. كلمة الحق التّناهِدْ في الشِّفاه
تعقِر بسيمة الصِّحْ مع لوبي الجّروفْ
تغرِزْ ضريعات الحروفْ ينشف مُرَاح الأمسيات ..
تتمطّق الأرضة المروق والأغنياتْ
اللّي الشّروق .. والأرضوالحب والمطر تضْهَب تتوه ..
وكتين يضيع عرق الجِّباه الشُّم ..
شمار في مرقة آه يا نورا آه ...
من دّرْبِكْ التّور نَفَس خيل الصّبُر ..
فَتّر خطاوي الشّوق وراه يا نورا آه ...
ساعة الشّموس الغُرْ .. تهضلمْ
تلحق الصِّح في المغاربْ تدفر الضو الكهاربْ
في وشيّكْ تذفر المدن الضّبابية
السّرابية ... الكآبة
وحائط التيِّه والطّشَاشَات
فوق قِفيِّكْ يا أم عوارض .. مو دعاشة ..
ماها شبّورة وتقيفْ
جايي ليك يا نورا غيمة .. تملا ماعونك خريفْ
يملأ عينيك ويفضِّلْ .. يروي جوّاك ... العطاشة ..مو دعاشة

يا مطر عِزْ الحريقْ يا مصابيح الطّريقْ
يا المراكبية البتجبِدْ من فَكْ الموج الغريق
يا الجزاير النتحويبا .. لما إنشعوز بحرنا
جينا ليك والشوق دفرنا
يا المراسي النتحويبا .. لما إنشعوز بحرنا
يا نشوغ روحنا ودمرنا
يا المحطات الحنينة ... القصّرَت مشوار سفرنا
يا ما شايلك بيني حايمْ أيوة شايلك .. بيني حايمْ
في الأرِضْ تكوين قضيّة .. !!! في السّمَا الأحمر .. غمايمْ
بي برِدْ نغما السّلامِي . ..رَطّبَتْ حلق الحمائمْ
طنبر النّخل التبلدي .. راقص الأبنوس وصَفّقْ
سَوّتْ الصقرية موجة خَلّت النِّيل هاجلو هوجة
بشّرت بالخير بلدنا .. شالت الشّبَال نسائمْ
جدّدَتْ زلفي القديم ..أمشي بي الماشيبو أقاوم
لا بتكَبِّر راسي فورة .. لا بتصغِّرني الهزائمْ
جِنْس يا نورا ابن آدم ..حلمو في عالم مسالِمْ

لا اللّيالي الماها ليّا .. لا الشّمَاتات العليّ
لا البنوك المخملية لا تفاهات الحضارة ..
لا عفاريت المدينة .. لا العمارات السّوامِق ..
فوق ضَهَر ناساً فقارى لا الهتاف الفاوة ضارى
غطى بالي من الفوارق .. لا الألوهة الطوطمية
لا البرندات الوسيمة .. ولا الأسامي الأجنبية
بتمحى من عيني ملامحِكْ .. وإنتي جاية المغربية
جايي دايخي المغربية .. وشِّك المقبول مكَنْدَكْ ..
سامسونايتك زمزمية
كونشبر ..مرزبة..مقطع ريشة فانوساً مدَرْدَحْ
قلت بيهن لي زمانك .. يا زمان الحاجة عندكْ
يا زمان الآفة حدّكْ .. لا تطا الوردة الصبية

يا نفس فجر القصائد .. يا بلادي
القَطَع قلب الرّوادي باللُّواج الجاي وغادي
ده ما هو صوتِكْ .. لاها صورتِكْ
دي البترقش ناديي فوق صدر الجرائد ..
ماها صورتك !!!! لا هو صوتك ..لاها صورتك !!!

إنتي يا الفي إطْن الصّحَارَى شُفّع العرب الفتارى
البَفِنّو الشايلا إيدُنْ .. ويجرو كابسين القطارة
يجرو باريين القطارة
لا سراب الصّحراء موية ..لا حُجار سلّوم موائدْ
إنتي في الغابة اليصارِعْ .. جوفو للآهات تلكِّي
ياما دفّقْ غيم رجاهو ..لكن الأيام كركِّي

في خلا حالنا اليمحِّن .. ويملأ بالسُّهد الوسائدْ
إنتي غيمة ..شديرة ..خيمة ..
إنتي جاهنا .. والتّقَا الطّلَقَت وشينا ..
فرّقَت غُمّة جباهنا فرّجت في الحارّة ضيقنا
فرّحَت شُفّع فريقنا والمواعين الحزينة ..وإتجاهنا
يا النغيم البقّ فينا .. وشدّ لي وتر إنتباهنا

يا تباشير يا بشارة إنتي يا ضرعاً تَكَرْمَشْ ..
شان يرضِّعني الجسارة
إنتي في منفاي رفيقة .. وفي حشا الأشواق حرارة
يا هُدَى النّاس الحيارى يا ندى الفجر اليبلِّلْ
صور عوينات الفقارى
جاي ليك .. آه جاي ليك .. جاى ليك يا نورا آفة
آفة للسوس الجا ينقُرْ ..عود عشيماً داخرو فيكْ
وأصلي لمن أدور أجيك .. بجيك
لا بتعجِّزْني المسافة لا بقيف بيناتنا عارِضْ ..
لا الظُّروف تمسك في إيدي ولا من الأيام مخافة
يا نفس فجر القصائد .. ما ضِهِبْ في بُعدي عنِّكْ
واصلي متغرِّب عشانك .. راضي بالبيجيني منِّكْ
ما بكيت شُحْ اللّيالي لا شكيت نُحْ .. شلتو حالي
رغم إنو الحال بيفسَخْ .. إلا كُت في الحارة بصرخ
يا وطن عِز الشّدائدْ ... يا وطن عِز الشّدائدْ

[ابوطاقية]

واقف براك
مدنى يوسف النخلى
*********
واقف براك والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك
*******************
مطر الحزن عاود هطل
جدد عذاب الأرصفـة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا وحرقة وجفا
*******************
بعد المشاوير البقت ..
ممدودة فى نبض التعب
بتعود وتلقى رِجاك زول
حفظ الوداد زمناً صعب
والباقى من ليل الهوى
وعطر الصبابة الما أنسكب
والباقى من كل الغنا
وسيل الكتابة الما نضب

[ابوطاقية]

حليوة ليلة لمولد
بقول غنوات وأقول غنوات
فى البلد ا لبسير جنياتها لى قدام
ولى الولد البتل ضرعاتو فى العرضة
ويطير فى الدارة صقرية
ولو السمحة تلت إيد ومدت جيد
يقوم شايلاهو هاشمية
ويشيل شبال ختفة ريد وفرحة عيد
وريدة روح وحمرة عين وايدية
* * *
ويالولد البشيل مدقاقو
قولة خير على القمره
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
* * *
وقبال حول تغّيم غيمة قِبلية
ترش الدارة والحدبه الصعيد الحلة
ويا فرحة بتطارد الصفقة فى النسمة الصعيدية
ويا جهرة نهار الليلة بدرية
رحيح جنياتنا فى الحدبة الصعيد الحلة
* * *
يا سمحاتنا هو لبلب
ويا قمحاتنا هو لبلب
وياللوز الفتق فى الوادى هو لبلب
ويا سمحاتنا هو لبلب
ويالبحر الطمح مدّادى هو لبلب
سألتك بالذى ركز الارض معبد
وسوى الفاس عليها مقام
سألتك بى حشا الأُمات ودمعاتنا
* * *
سألتك بى كبيداتن ودعواتنا
شليل وين راح؟؟
يكون ضل الخريف فاتنا
شليل وين راح؟؟
وزى برق السماك الجابها دغشية
وزى زغرودة البطن الكبارية
مرق من شامة القمره
ومقدم بالعديل يبرا
تعالوا أبشروا آجنيات
شليل ماراح شليل ما فات
شليل عند المسورو حرق
بقالو حصاد
شليل فوق التقانت قام خدار وبلاد
شليل مسدار شليل مشوار
شليل أرضنا يا جنيات
شليل قايم نصاصى الليل
يتمتم ليلو وردية
حرازنا شليل شليلنا دليب
شليلنا دليل على البلدات
بعد درب التبلدية
شليل ما راح شليل ما فات
شليلنا ونحنا همباتة ومهاجرية
مزارع بات على عشقين
تراب بلدو وسماح فوق بت مزارعية

[ابوطاقية]

لحظاتنا الندية


فى خاطرى لحظاتنا الندية

وإنتى ساعة المغربية

قعدتك جنبى وعيونك .. سارحة فى الدنيا البهية

وخوفنا من سفراً بودى

للمسافات القصية

وسكة الزول البسافر

وقلبو عشرة .. على البنية

*******

كنت جد .. ناوى الرحيل

إلاّ شايل ذكرى منِّك

خفت فى الغربة البعيدة

المسافات يبعدنك

العيون الشايلة سيرتك

بكرة يبكن .. ويفقدنك

والأماسى الحالمة .. ترحل

والمشاوير يتعبنك

********

شفتى كيف

لما الشمس لمت نوافير الشعاع

والضفاف بعدت كتير

والريح ملت .. جوف الشراع

كيف هناك بدت الضفاف

تتلاشى فى زمن الضياع

وإنتى ساعة المغربية ..

وخايفة من كلمة وداع

[ابوطاقية]

شيخ تلب
محمد طه القدال
************

حزينة وجوفك دمدم حزين
حزنت وقلب الحازنك خلى
تعدى الحلم الشفتيهو قديم
وتملا حسارك قلبك ملى
وكل ما هبهب قاصدك نسيم
يلهب جلدك كضباً طلى
فطمت جناك وحضنك رحيم
وحنـّك تب ما صابو البلى
سمعت غناك وصوتك رخيم
شديد اوتارك زايد حلى
عرفت الغم الصارلك نديم
وشفت الكون بى شوفاً جلى
لقيت الكاتلك كافر زنيم
وانت وحيدك قلبك ولى
***********
يا شيخ تلـّب انزل كبكب
وارمى الحترب فى الميضنة
فى الباردة تعب لى الحارة تسب
عجمان وعرب فى الميضنة
البس خضرب وادخل قصرب
والحس واشرب فى الميضنة
دى الدنيا تهب شقيش ما تصب
القبلى حرب ..
لى سيدك حب لا تخش ضرب
لى يوسف جب فى الميضنة
دقنا وشنب درويسنا يسوق
تايوتا تكب فى الميضنة
يا شيخ تلب وين الزغلب
الكان تلب
ديل صبحو غرب
ام اضحو جنب
فى الميضنة
انزل كبكب وارمى الحترب
فى الميضنة
********
كبس الحال على
والحال قبض يا سيد
غبناً فيا كج
اوتادو جنبى معيد
مو جنا تجيب
سلسل جنازرو تقيد
بلا غيبوبة البلد
النصيح ونصيد
***********
كنا تلاتة ...
ود النوق وديك وعتيد
قلنا نكمل الفرض
العلينا نشيـد
جينا عليكى يا المحبوبة
شوقنا يأيـد
بقينا ضهابة متل زولاً
ضرير وقليد
*****
-.. ود النوق دا بكور
العليهو يشفق
بقى يتباطى
فى خبة مشيهو يلفق
ان جاهو العلوق
صيحة نفاقو تنفق
اصبح جدوا كل
ما شافلو سلقة يصفق
- وديك الجن
رفيق همى وغنايا وفنى
سوا طريقو فى نخبة
وصبح متهنى
ما هماهو باسط مية
سكرة ينى
كل ما شافلو زفة
جديدة فوقة يغنى
-.. يا عتيد الرماد
نط الحيط بالزانة
تفضى الخانة
تلقى جنابو سيد الخانة
فارش دارو لى اسيادو
بيت كرخانة
غافل ضبحة الفجرى
وجرى السلخانة
يا حميد اقيف
شوف الخلوق محنانة
كفكف دمعتك
والعبرة فوت خنقانة
عسلك سال بحر
فوقو النحل ونانة
ياد ان طاق غرف
جازاك دباير دانة

[ابوطاقية]

مشرع الحلم الفسيح
ازهرى محمد على
***********

يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح
***************
يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّة هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح
*************
يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا
*******************
يا مشرع الحلم الفسيح
أنا وإنت .. والمطر الفصيح
حانطوِّع الزمن القبيح
نأخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف الأصابع
حدثني دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا ..
على الدروب المبهمة
أو ربما..
تهدم آلات الشوارع ..
وترجمْ العُزّى الصواقِع
حدثنى لو مطرك همى ..
حدثنى لو صادف الكى المواجع
وضلك على الساحل رمى
حدثنى لو مطرك همى
علمنا دايماً كلما
نبذر على أرضك شهيد
يطلع شمس ..
يبهر بأنوارو السما

يا مشرع الحلم الفسيح