المعاكسات

[nahla abass]

الموضوع دا ياجماعه بالجد يستاهل الرد عليو
لى الأولاد بيعاكسو البنات فى الشارع أو فى الاماكن العامه !!
ودى يعنى هواية عند الشباب ولا الحاصل شنو ..............
إنت ياخى لمن تجى تشاغل بنات الناس إتذكر إنو عندك ولايا ويمكن يتعرضوا برضوا لى المعاكسات ...وطبعاً الكلام دا مابيرضيك عشان كدة ماترضاهو لى بنات الناس ، والظاهرة والله بقت كتيرة خلاص وياريتا لو بقت على المعاكسات وبس ؟ الواحد بقى يترصد البت لحدى مايجيب ليك قرارها وتلقاهو كل يوم منتظرها فى ناصية االشارع أو جنب الجامعه عشان الموال يشتغل لحدى مايغريها والموضوع يجر ..وهى طبعاً لوبت ناس مابتنتبهة ليو لكن زى مايقول المثل(( الزن على الودان أقوى من السحر ))...
لى ياشباب الواحد فيكم مابرتاح إذا ماعاكس بنات الناس ولا شنو النظام ؟
ولو قلتو لى أنو المظهر العام العام للبت هو البدفع الشاب لى كدة وإنو مايبطل معاكسات بقول ليكم برضو البت المحجبة والمحتشمة بتتعرض للمعاكسات
وأنا فى راى إنو الشاب البعمل كدة دا شاب مريض وعندو خلل فى نفسيتو ماأكتر من كدة
ولاشنننننننننننننننننننننننو؟

[نزار حسن محمد]

الاخت نهله
فعلا موضوع محتاج للنقاش وانا معاك فى ماطرحته ويالله ياشباب دايرين نشوف ردودكم .

[mnoma]

الاخت العزيزة ... نهولة
طبعاً فعلاً موضوع محتاج للمناقشة
وأنا في رأي أنو لــو البيت متحجبة أو لا
الشاب لـــو عاوز يعاكس بيعاكس في الحالتين
بس والحق يقال يا نهلة لبس البنات الزمن ده بقى شاذ شديد ... وضيق وكده
وده بساعد الشاب على المعاكسة زيادة ... وحتى الشباب المابعاكسوا لما يشوفوا البنت
بي اللبس الشاذ بعاكسوها لانو هي بتقول ليهم شوفوني يا شباب ... لكن ما بي الضرورة عاكسوني

ولكي مني كل تقدير
:)

[madaniboy]

فعلا موضووع يحتاج لنقاش جدا ودمتم ولكممني خالص ودي
فاقد حنان

[محمد مصطفي]

والله يا نهله موضوع داير نقاش لكن داير اقول كلام انه كلام الزول القبالي

صاح البنات الزمن ده هم البجبره الشباب اعاكس وانا داير ازيد حاجه بسيطه

انه الزمن ده انا شفت وكتير انه البنات هم برضو بقوا اشاغلو

رايكم شنو.............

[ولد مدنى]

الاخت نهله
والله انا بتفق معا اخوى كبك على انو بنات الزمن دا بيجبروا الواحد انو يتكلم وما اى بت بيشاغلوها
لا لانو الليله لو البت محترمه والله مافى زول يتجرا ويفتح خشمو بكلمه واحده لكن الشاب مما يشوف البت ما محترمه نفسها بيقوم يشاغلا
وبرضو بقول لى كل شاب لو كان بيتك من زجاج فلا ترمى الناس بلحجاره

[المسافر]

الأخت الموقرة / نهله ،

أتفق معك تماماً في تحليلك ورأيك وكذلك مع الإخوة المشاركين ، ويجب أن نتكلم عن الموضوع بخصوص الجنسين فالقصة هي متكاملة ويشترك فيها الطرفين ، وأعتقد إن البُعد عن ديننا الحنيف وغياب رقابة الأهل وراء ما يحدث حالياً .

إن الرجال الناظرين إلى النسـا *** مثل السباع تطوف باللحمان
إن لم تصن تلك اللحوم أسودها *** أكلت بلا عوض ولا أثمـان

ولك تحية وتقدير ،

[طلال يوسف الحاج]

اختي العزيزه نهله
لو اخذنا الموضوع من ناحية البنات في بنات بنبسطو لما الشباب بشاغلوهم وبتعتبر إنو هي أحسن من باقي البنات لأنها لفتت نظر الشباب ودا بساعد وبشجع الشباب علي المشاغله بس دا ما تبرير للموضوع، الشاب الأصيل يفترض يحمي كل بنت في الشارع بنزعة الاخوه والرجوله وكيدا بيكبر في عين البنات أكتر من إنو يشاغل
وبشكرك على إهتمامك بمشاكل الشباب من الجنسين

[البتري]

السلام عليكم ورحمة الله وبركاتة الاخت نهلة قبل المناقشة ارجو ان تجيبى , هل قصدك الموضوع ام معاكسة شباب المنتدى ؟
ملاحظة ليس لى قصد ولكنى اردت ان اجعل من هذا السؤال مقدمة , لأقول انعدام الجدية والسير فى الحياة بدون هدف وتلاشى الوازع الدينى هذه الاسباب الرئيسية فى تضييع انفس الاوقات فى ابخس الاشياء , حتى صار لا يعرف الصواب من الخطأ والجد من الهزل , ولو أن احدا عرف الرب حق معرفته ما عصاه .

[مدنيّة]

اذا لم تستح فافعل ماشئت
دا المقياس يانهلة

مشكورة علي الموضوع

[التيمان]

ههههههههههه

والله انا هوايتى المعاكسه


هههههههههههههه

[سواااح]

الاخت نهلة ..

هناك اسباب عديدة تدعو الي هذه الظاهرة
علما انها ليست جديدة او مستحدثة
ولكن هناك اولا عزوف الشباب عن الزواج
وهناك فائض من النساء اعلي من المعدل الطبيعي
فلمحاربة هذه الظاهرة فلنخفض تكاليف الزواج
لانه هناك الكثيرين يرغبون في العفة
لكن من اين ؟؟ العين بصيرة .. واليد ......
ثانيا البنت هي التي تجلب المعاكسة لنفسها
لان الاغلبية منهن تقوم بالرد علي من يعاكسها
فحين لو انها اكملت طريقها دون التفات اليه
فحتما ستكون ردت اليه بمعاكسته باهانة غير منطوقة
(( العرف عزو مستريح ))
كما يجب الانتباه لنوع الملابس التي يتم ارتدائها.

دمـــــــــــــــتي ،،

[عثمان إدريس]

في اثناء عملي بصحيفة الصحافه اجريت وزميل لي استفتاء طريفا حول المعاكسات ومشاغلات البنات اختيارنا عشوائي للبنات الطالبه والموظفه والعاطله:d اورد هنا جزئيه صغيره من هذا الاستفتاء واترك لكم التعليق


- سلوى حسين:
قالت والله انا بفرح لما اشاغلوني ولكن بسكت ساهي وبمشي منو بسرعة..
- زينت عمر:
وجدتها ترتدي خمارا... ولما سألتها هذا السؤال، نظرت لي بامتعاض ولم ترد..
- بتول علي..
فتاة في العشرين من عمرها ترتدي بنطلونا : اجابت والله انا اطلع من البيت وزول ما اشاغلني بشك في نفسي وياخي الواحدة مننا تلبس وتتقيف عشان شنو؟ ما عشان الكلام السمح دا..
- رقية عبداللطيف:
والله في الحقيقة ما مريت بتجربة زي دي... وبعدين اولاد الزمن دا ما بعاكسوا ...
- زهراء الفضيل:
والله المعاكسة اذا كانت في حدود المعقول مقبولة..
- نسرين احمد:
والله بيني وبينك انا ما بنتظر لحد اشاغلوني اذا عجبني واحد انا ذاتي بشاغلو!!!
- عفاف محمد:
والله دا السبب الخلاني امشي براي لأني ولو مشيت مع زميلاتي وشاغلنا زول امكن يكون ما قاصدني انا دايرة اقصدوني براي - وعليك الله البلد كان ما المشاغلة نعيش فيها كيف؟!
- نهلة عمر:
انا كان شاغلني زول وعاينت ولقيتو من الاقاليم بجوط لأنو استفزاز عديل.

انتو رايكم شنو



دا كلام قالوا احد أعضاء المنتديات وأحتفظ باسمه والموقع الذي نشر فيه
وبجيك راجع تاني عشان اوضح ليك ليه نقلتو ليك هنا

[ابوالنور]

تسلمي يا بت العباس علي المضوع الجميل

[Bet-alsudan]

والله الصراحة الموضوع في النهاية بعتمد على البت البت لو كانت محتشمة في لبسة وحجابة صدقووووني ولا وااحد بهوب ناحيتة ولا واحد بقدر يوقولها اي حاجة لانها بالطريقة دي بتفرض احتراما على الناس بالاضافة الى نفس الشباب اذا كانت مقوية بالوازع الديني اكييييد ما حعاكس وحكون في حالو وما تنسو كمان ان النفس امارة بالسوء .. اللهم أهدي الجميع

دمتي اخيتي نهلة ودامت مواضيعكي النيرة

[nahla abass]

والله ياجماعه أنا أشكر كل من أدلى برايو فى الموضوع دا
وثانياً بقول لى البترى أنا قاصدة المعاكسات الفى الشارع والجامعه والاماكن العامه
ثالثاً لو البت إفترضنا إنها جاهلة وعقلها صغير إنت ياشاب ياعاقلماتترفع عن الصغائر دى وتحترم نفسك وتكون أحسن منها هى الى حاولت تستفزك بى لبسها وحركاتها ..وماتنظر ليها عشان توريها إنها محتقرة ،وهى طبعاً لمن تحس بالإحتقار أكيد حتراجع روحها ويمكن تحس ولو شوية ببعض الغلط لكن إنت لمن تشاغاها كدة بتساعدها إنها تتمادى فى الغلط، ...وطبعاً فى النهاية اللوم الأكبر بيقع على البت ودا مابمنع إنو الولد برضو غلطان ،ماإنت لو غضيت بصرك ماكان حصل الحصل والحكاية فى النهايه وازع دينى وللاسف غير موجود عند الشباب نوبعدين البت المحجبه برضو بتتعرض للمعاكسات دا معناهو إنو الولد إتعود على كدة وبقى كل الناس عندو واحد المحجبة وغيرها المحترمة وغيرها ،لى ياجماعه لى ؟؟
البنات القالوا إنهم بتكيفوا لمن الواحد يشاغلهم والله بقول ليهم إنو الةلد عايز يتسلى ،طيب إنتى لى ترضى إنك تكونى أداة التسلية وهو فى النهاية ماحيخسر حاجة ،عشان كدة راجعوا روحكم كويس ولاكلام البتسوا فيو دا غـــــــــــــــــلــــــــــــــــط

[سندان]

الاخت نهله
والله لك كل التحيه على موضوعك الشيق دا لكن خلينا ننظر للموقف من جانب البنات في الوقت الحالي لانو زي ما بقولو مافي دخان من غير نار والبنات بصوره عامه ماتقدر تتكهن بي تصرفاتم في نوع من البنات بيفرض عليك احترامه من اول وهله وفي نوع يتعمد انو يثير الرغبه دي فيك وفي راي انو المشكله دي بشترك فيها الطرفين خصوصا لو عرفنا انو اكتر من معظم البنات البيقبلو الحاجه دي هم من المثقفات بمعنى آخر واعيات لكل تصرفاتم وبيعرفو تماما الصح من الخطأ عشان كده مابنقدر نرمي اللوم كلو على الشباب.
عموما لكي كل التحيه اختي الغاليه وشكرا على موضوعك
الجميل دا والبطول الكلام والنقاش عنو


سندان

[البتري]

فالنبدأ جديا فى تحليل المعضلة , فأقول وبالله التوفيق :
1/ ان المسألة لها جانب غريزى له التاثير الاكبر , ويتم كبحة بالدين والاخلاق والمروء ة .
2/ جانب نفسى وهو مشابه للاول ولكن هناك بعض الاختلاف يظهر بالتامل , ونمثل له بان بعض البنات يشعرن بالنقص اذا لم يتعرضن للمعاكسة .
3/ بعض الناس لايتقيد بمبادئه فتراه يرفض الشىء من ناحية المبدا ولكن يفعله احيانا اتباعا للهوى وادل دليل على هذا الكلام الصورة التى تضعها صاحبة الموضوع .
هذه بداية ولنرى النقاشات , والتحليلات , والتشخيصات والعلاجات .

[elfatih61]

الشاب لو عايز يعاكس ما مكن يعاكس كل من تقع عليها عينو
ولو فعلا ما وجد ما يشير الى أنو ح يكون هناك تجاوب من الطرف
الاخر لما تجرأ أبداً بالمشاغلة 00 إذن هناك رابط مشترك
من البداية بين الأثنين 00 وتباعاً نقدر نقول إنو موش كل واحدة
ماشه في الشارع بيشاغلوها ولا كمان كل شاب ماشى في الشارع
يعايز يغازل ويشاغل 00 والإيحاء أو الموافقة بقبول المشاغلة دا
شىء أو (كونتاك) معين بشعر بيـه أو بلاحظوه شخصين فقط
( المعاكس والشخص الذى أبدى تأشيرة بالموافقة على المعاكسة)
واخيراً في كلام خير الأنام تكمن الحقيقة
( أظفر بذات الدين تربت يـــداك )

[شاكسس]

الشاب لو عايز يعاكس ما مكن يعاكس كل من تقع عليها عينو
ولو فعلا ما وجد ما يشير الى أنو ح يكون هناك تجاوب من الطرف
الاخر لما تجرأ أبداً بالمشاغلة 00


وتسلمى على الموضوع الجيد والى الامام


تحياتى،،

[التيمان]

هههههههههههههههههه


والله بنشاغل


هههههههههههههههههههههه

[بات مان]

ههههههههههههههههههههههههههههههه

ده كلام عجيب والحمد لله ماعندى اخت


عشان كده انا بموت فى المعاكسه

وبعتبرها برنامجى الرئيسى فى الاجازه


:d :d :d :d

[عثمان إدريس]

دا كلام قالوا احد أعضاء المنتديات وأحتفظ باسمه والموقع الذي نشر فيه
وبجيك راجع تاني عشان اوضح ليك ليه نقلتو ليك هنا


زي ما قلت بجيك راجع ;)

أري إنو ليس الموضوع إنو الولد بعاكس البت أو البت بتعاكس الولد وإنما المعاكسة في حد ذاتها

ما هو الداعي لذلك هل هو الفراغ أم هو عدم الحياء ؟؟ إذا كان الفراغ فأقول لهولاء (اقض وقت

فراغك في طاعة الله لكي لا تندم علي ذلك يوم لا ينفع مال ولا بنون إلا من أتي الله بقلب سليم) أما

إذا كان السبب هو عدم الحياء فعلي الأرض السلام .. ولنبحث عن سبب ذلك إجتماعياً وتربوياً وهل

المدرسة والبيت قاما بدورهما كما ينبغي !!؟؟


ونسأل الله ان يهدي الجميع لما فيه الخير

وكوني بخير نهلة عباس

[السعيد]

اذا لم تستح فافعل ماشئت
دا المقياس يانهله


لا فض فووووك يا مدنية

احسنتي

اذا لم يكن الحياء موجود فلاامر اذن واقع لا محالة ...

ثم ان الامر يحتاج الي وازع ديني

والمجتمع يلعب دور كبير في ذلك ... والله المستعان

الامر عم وطم


نسأل الله السلامة





دمتي اختي


مشكوووووووووووووورة علي الموضوع

[السعيد]

ليه كده !!!!!!!!!!!!!!!!!!!!!

لا تجاهر بها .. وانها ليست رجولة !!!!