وتغوص المواضيع الى القاع [الأرشيف]

مشاهدة النسخة كاملة : وتغوص المواضيع الى القاع

كف المطر

10-01-2007, 01:36 AM

المواضيع

التى تُكتب بعد جُهداٍ جهيد بواسطة الأعضاء
مُعظمها لا يُلقى لها بالاً ويكون مصيرها قاع المنتدى بعد مرور 24
ساعة فقط وهذه ظاهرة ترجح ان من يدخلون المنتدى يعتمدون على
إنزال مواضيعهم دون النظر او مُطالعة مواضيع الآخرين وهذا من الأمور التى
تُنفر العضو/ة من المشاركة الفعالة , لهذا يُرجى ان سمحتم لى بمراعاة هذا الجانب
الهام والأساس المتين الذى تقف عليه أعتاب المنتدى
المواضيع الجديدة تكاد تسيطر على مُجمل مساحة المنتدى خاصة العام اما الردود على
مواضيع الاعضاء فهى تاكاد تكون صفر معدوماً , ان كان هذا ما تهدفون اليه فقط ان
تكتبون دون قراءة فاعلموا ان مواضيعكم ايضاً سيكون مصيرها هكذا يوماً , لقد ولجنا
هذا المنتدى العملاق لنستفيد ونُفيد , ولكن ان تبحث عن مشاركتك فتجدها
قد دُفنت فى الصفحة الثالثة
هذا الامر يعنى شيئاً واحداً "عدم قراءة المواضيع والاهتمام بها "
قد قُلت فأجزلت ونصحت وبلغت فأدركو ما بين ايدكم من ذهب ساااااائل
.!!!!

مزوني

10-01-2007, 02:22 AM

والله يا كف المطر ده شي حاصل

وبعدين ما تنسى المنتدى ماشاءالله كل يوم زايد كميه

والاعضاء كل يوم ماشين في زياده والمصيبه الاكبر انو الناس كلها مركزه في المنتدى العام

بي صوره مبالغ فيها

وانا بضم صوتي لي صوتك وأناشد أخواني وأخواتي الاعضاء لي توخي الحذر

لأنو بالجد الحته دي بتطفش ليها ناس جداد كميه ويا ليت لو نركز على الردود

أكتر من انزل المواضيع حتى تعم الفائده ,,, وتسلم يا أخوي كف المطر وما عدمناك يا غالي

Almostshar

10-01-2007, 02:53 AM

موضوع مهم لمزاولي الكتابة الثقافية والعامة والكتابة بصورة عامة
فالمنتديات ليس السبب فيها عدم الاطلاع على المشاركات بل قلة المهتمين
بالثقافة بشكل عام يعني المثقفين وأصحاب الرأي مجموعة محصورة في المنتدى
وأنا أعلق على ذلك بأصحاب القلم غير المنقول ،، ونظرا لتفلت القراءة بشكل عام وقلة التعليقات برضو من الأسباب ضعف النص أو أنه نص ( إعتباطي ) يعني ( مشي الحال ) ،، يعني الملاحظ لدينا في المنتدى كلمة ( منقول ) بشكل متكرر ،، يعني نحنا ممكن نشارك التعليق على الموضوع بس برضوا عايزين إنتاج الشخص يعني كتابته ورأيه بموضوعية وبدون مجاملة وكثرة المواضيع وزخمها بسبب عدم القدرة على القراءة ويكتفي الشخص بتعليق سريع ويطلع ،، وممكن يقرا الموضوع من برة وما يدخل ليه وعشان كده القاع مليان بالمواضيع الجيدة برضو الشخص الكاتب يقدر يخلي موضوعة على الصفحة الأولى لمدة يومين أو ثلاثة حسب قدرته الكتابية ونوعية الموضوع

رأي شخصي ودمتم

تسنيم خالد

10-01-2007, 04:48 AM

لفتة موفقة منك كف المطر ويا ريت الناس تعمل بيها ...يديك العافية

ود المطامير

10-01-2007, 04:58 AM

جودة الوضوع هى التى تثبتة فى صدر
الصفحة الأولى وضعفة يدفنة فى القاع
ويا أخوى لو عندك موضوع إندفن فى
القاع ؟ بسيطة أرجع ليهو وأكتب عليهو
أى تعليق وهوووب تلقاهو نط فى أول
الصفحة الأولى وكلما يندفن إنت أرجع
وأبحتو ولو الطريقة دى نفعت إبقى ما
تنسانى من الحلاوة .

سواااح

10-01-2007, 09:49 AM

كف المطر ..

لك التحية علي الطرح
هناك الكثير من الشوائب
التي اعترت المنتدي اخيرا
وما ذكرته انت قطرة من بحر
فنرجو من الجميع الاهتمام
واعطاء المواجيع الجيدة
نصيبها من الردود والمشاهدة

دمـــــــــــــــــــــت ،،

سواااح

10-01-2007, 09:53 AM

كف المطر

10-01-2007, 06:33 PM

الاخ العزيز / مزونى
لك منى كل التحايا الطيبة وشكراً على المداخلة واتمني ان تنال كل المواضيع
حقها من الردود و مشاركات الاعضاء الذهيبة.

المستشار:
كلامك موزون وفيه الكثير ليكون منهاجاً لتسيير خط الارتقاء بالمنتدي
شكراً اخى واحترامى ..

تسنيم : شكراً على كل كلمة واتمني حقاً بهذا المنتدى الذى انتسبت اليه
لما لى من حظوة غالية لمدنى واهل مدنى .

اخى / سواح
كثيراً ما تعانى المنتديات من تراكم يُرهق الادارة فتتبع كل صغيرة وكبيرة فى مثل
المنتدى العملاق لابد لها من صبر . شكراً اخى المُقدر.

المسافر

10-01-2007, 08:18 PM

تحية طيبة عزيزي كف المطر

كلامك في محلو تماماً وبالأمس القريب تم مناقشة هذا الموضوع بواسطة بعض المشرفين مع بعض الأعضاء . . . وسوف ترى اشياء جديدة قريباً حسب وعود المشرفين .

ودمت

ود المطامير

10-01-2007, 10:09 PM

مسافـــــــــر ..

حلاوتك عايزه
مصاصة ولا حلاوة سكر ؟؟

دمــــــــــــت ،،
لا دايرها تبش

امير عبدالباقي

10-01-2007, 10:29 PM

العزيز كف المطر
لك كل الود . موضوعك تكلمنا فيه كتير والحل هو ان العضو لايكتب اكتر من موضوع في اليوم . حقيقه لاحظنا من بعض الاعضاء ينزل اكتر من موضوع في دقيقه واحده كيف عاوز من الاعضاء ابداء الرائ في المواضيع من المتوقع لما يدخل عضو في المساء يجد الموضوع انتقل الي الصفحه التانيه . لذلك اناشد جميع الاعضاء بان يكون مشاركته بموضوع او رد في موضوع كفايه في اليوم وذلك لمصله المنتدي والاعضاء
لكم جميعا كل الود والتقدير

ابورجاء

12-01-2007, 01:39 AM

الاخوة الغالين والرائعين
وصاحب البوست الجميل
الغالي كف المطر
اولا يا اخي الزعل هنا ممنوع
كدي هدي نفسك واستهدى بالله
قبلك حصل لينا نفس الشئ هنا
وفي منتديات تانية فعرفنا انو ده
حال النت انت اكتب الموضوع
وانسى الرد او حتى المرور عليه
اهم شئ تكتب انت والباقي خليه
على الله .يعني دي ما شئ جديد
ولا خاص بمنتديات ود مدني
بعدين يا اخوي انا مريت علي
مجموعه من مواضيعك وعلقت
على واحد منها ووجدت بعض الاخوة
يعلقون على بعض مواضيعك وانت لم
ترد عليهم فكيف تطالب بشئ انت تفقده
اسف اخي في الحته دي لكنها الحقيقة اخي
نحن نكتب لا لكي يتم الرد او يكون الموضع
دائما في المقدمه لاننا نكتب لمستويات مختلفه
وثقافات متباينه وبالعربي العديل يا اخوي انت
زي ما قلنا اكتب ما تهتم للايام ظروف وتعدي
بعدين انت لو عايز توثق كتاباتك عندك موقع جيران
اعمل صفحة ليك باسمك يعني مدونه واكتب فيها
ما يحلو ليك واتحكم فيها زي ما عايز لامشرفين
ولا يحزنون انت المدير العام وانت كبير المشرفين
وانت الاعضاء يعني انت كلو زي جريده شبارقة..
بعدين يا اخوانا حكاية المشرفين اجتمعوا دي انسوها
ما في زول بيقدر يحل الموضوع ده ما في داعي للتخدير
واللعب على الدقون. (بدون زعل الحقيقة ما بتزعل)
ودوما في رعاية الله وحفظه...
مع كل الود باقة ورد....

كف المطر

12-01-2007, 07:42 PM

ابورجاء

الاخوة الغالين والرائعين
وصاحب البوست الجميل
الغالي كف المطر
اولا يا اخي الزعل هنا ممنوع
......................................
اعمل صفحة ليك باسمك يعني مدونه واكتب فيها
ما يحلو ليك واتحكم فيها زي ما عايز لامشرفين
ولا يحزنون انت المدير العام وانت كبير المشرفين
وانت الاعضاء يعني انت كلو .
....................................

اخي الكريم ابوالغالية

تعقيبك اعجبني فى الاصرار على متابعة المشاركة وعدم الياس

الا انه تقوقع داخل وحدانية المشاركة :
المنتدي اخي العزيز , ساحة نتجمع فيها بكل رموزنا وقبلياتنا
وثقافاتنا لنتبادل الافكار والخبرات ونتشارك المشاعر الحزينة
قبل الطيبة فاحساسى بوحدنية وسط اهل اشعر بهم وارى حروفهم
براقة امام عيني لهو قمة الاحساس بالوحدة , اخى انا اتحدث معك
الان عبر هذا الجهاز الاعجمي الذى اوصلني بك وبكل الاحباب فى هذا
الصرح العملاق والملاذ الرطيب لنا جميعاً فلما نبخل على بعضنا بكلمة
قد ترسم البسمة على ثغر عابس فى مكان بعيد عن الاهل , كلمة تجعلنى
اراك برغم بُعد المسافات قريباً مني , كلمة مجرد كلمة قد تصنع المستحيل.

شكراً اخى ...

Madanawi

12-01-2007, 10:56 PM

الاخ الحبيب كف المطر

لك التحية على الرشة اللطيفة دي

انا بعتقد انو نحن في حاجة لدراسة الموضوع دا مع كل الاعضاء والمشرفين عشان نحلق بالمنتدى كمان وكمان. ودمت يا كف المطر

ابورجاء

13-01-2007, 04:03 AM

الغالي كف المطر
عذراإن كان كلامي فيه شئ من الحده او سؤ الفهم
لكن يا اخي كما ذكرت انت نحن ملل وجماعات
وقبائل وسحنات متنافرة في الواقع وثقافات
متناحرة ومتنافرة هذا هو الواقع ولن استطيع
انا ولا انت ان نغير شئ من هذا الواقع .
الحل هو أكتب أكتب أكتب أكتب ولا تنظر للخلف
هذا هو الطريق وحتما ستصل عاجلا ام اجلا...
ودوما في رعاية الله وحفظه...
مع كل الود باقة ورد....

راسكال

13-01-2007, 04:21 AM

كف المطر

موضوعك حساس جدا

لكن انا راى نفس راى المستشار يعنى لازم الواحد يعرض الفكر ورايو الشخصى وما نعتمد كل الاعتماد

على نقل المواضيع

وبرضو بكون فى مواضيع جميله والواحد بحب باقى الاعضاء يشاركوه فيها

وتسلم كف المطر لطرح الموضوع دا لى النقاش

سواااح

13-01-2007, 07:20 AM

لا دايرها تبش

ود المطامير ..

التبش ده نرسلوا ليك بي ياتوا عنوان
وما تنسي البريد المستعجل ما بيقبل
اي حاجة فيها سوائل وانت عارف الباقي

دمــــــــــــــــت ،،