يا رواد الرياضي ادوني رايكم

[مزوني]

بسم الله الرحمن الرحيم

الى كل حبايبي رواد القسم الرياضي

السلام عليكم ورحمة الله وبركاته

بي صراحه زعلني شديد اني وانا بتصفح القسم الرياضي لقيت بعض النزاعات

بين الاعضاء في تحديد هوية القسم انو يكون رياضة مدني فقط أو الكوره السودانيه

خلونا نعتبر انو البوست ده ديوان كبيييييييير أي زول يخش يديني رأيو

وان شاء الله حيكون في الاعتبار

انا بس عندي حبة وجهات نظر حأبدا بيها الموضوع ومنها نتفاكر مع بعض

لو زول عندوا اضافه أو اعتراض وزي ما اتفقنا كلو حيكون في عين الاعتبار ان شاء الله

نخش في الموضوع :-

منتدى ودمدني زيو زي باقي المنتديات يحتوي على العديد من الأقسام وماشاءالله

العديييييييييييييييييييييييييد من الأعضاء ,,, وطبعا أذواق الناس تختلف واحنا هنا بدورنا

نحاول نرضي جميع الأذواق ,,, يعني في البحب الكوره العالميه وفي اعضاء طالبوا بيها

وفي البحب كورة هلال مريخ والمواضيع كتيره البتخص الموضوع ده وفي الغيورين جدا

على كورة مدني ( انا عن نفسي برفع القبه احتراماً لما يبذلوه ) وبرضو لقت نصيبها...

لحد هنا تقريبا كلنا متفقين كما قال سيد الخلق أجمعين رسولنا الكريم صلى الله عليه وسلم

( لا يؤمن أحدكم حتى يحب لأخيه ما يحب لنفسه )

انا ببدا ليكم الإقتراحات وبنتظر ارائكم

نثبت لينا مواضيع تكون كالآتي:-

الدوري الانجليزي - الدوري الاسباني - البطولات العربيه

وأي موضوع يخص أي واحد من ديل ينزل فيهو

وطبعا دي كمثال عشان نحاول نخلي قسمنا الرياضي يكون شامل كامل والكمال لله عز وجل

دي كبدايه وما ننسى انو مجرد اقتراح قابل للتعديل والتغير أو حتى الإلغاء

وايد على ايد تجدع لبعيد وانا منتظر ارائكم على احر من الجمر

وليكم خالص تحياتي

[وليد عمر سعيد]

اخوي مازن


الله يديك العافييييييييييييييه



كلام عين الصاح




وانشاء الله نستفيد من جميع الاراء




دمـــــــــــــــــــــــــــت !

[محمد مصطفي]

والله يا مازن كلامك مافيه حاجه غلط والله اديك العافيه لينا تعبان معانا شديد

لكن انا داير اقول كلام انا طوالي بنزل مواضيع عن الهلال والمريخ ودي يا اخ مازن ما تخيل انها ما فيها حاجه ومنتدي ود مدني ما اتخيل لي انو احكمني اتحدث علي نطاق مدني بس ولا شنو دي حاجه الحاجه التانيه انو في بعض الزملاء في المنتدي بقولو لي لا نزل حاجات تخص مدني طيب انت لو مسكت قول الخرطوم حتلقي انو ناس مدني القاعدين فيها اكتر من القاعدين في مدني وبعدين الخرطوم لو مسكتها من اي ناحيه ثقافيه ، اجتماعيه ، رياضيه ، سياسيه بتلقي انو البمثلو الحاجات دي االاغلبيه من مدني دي حاجه انا اعتز بيها وافتخر بيها

وانشاء الله تكونو فهمتو كلامي ده


وشكرا ليكم والله اخليكم لينا


ودمتم بود يا غالين
اخوكم كبك،،،

[مزوني]

وليد أبو قرط تسلم يا غالي وربنا يديك العافيه على مداخلتك الغاليه علي

الاخ كبك هو فعلا زي ما قلت مدني يمكن تحتكر اي حاجه كان كفر او وتر وغيروا الكتير

واحنا دايما نحاول نفتح قلبنا للجميع

لكن يا جماعه معقوله من 22 زائر يردوا اتنين بس

وين البقيه ووانا محتاج لي رأي الجميع يا جماعه ما رأي واحد ولا اتنين

وينك يا هارون وينك يا بشار وين تاج الاصفياء وينك يا معتصم عيدروس

وين باقي الاسامي اللامعه انا محتاج لآراء الجميع

واليد الوحده ما بتصفق وايد على ايد ترمي لبعيد

وانا في الانتظااااااااااااااااااااار

[nasir]

عيدروس .. من قلب الجزيرة
واجبات!!

ولمدينة ودمدني ثلاثة اندية بالدرجة الممتازة يصبح الوضع مختلفاً جداً خاصة وان الاندية الثلاثة من ذات الثقل الكبير جماهيرياً الاهلي والاتحاد بجماهيرهما الغفيرة وجزيرة الفيل التي دخلت قلوب جماهير ودمدني عامة زاحمت القطبين ونالت كثيراً من جماهيرهما وهي تلعب بجد واجتهاد في الدوري الممتاز وتتحصل على المركز الرابع في الموسم قبل الماضي والمركز الثالث في الموسم المنصرم ..

هذا الوضع يحتم وجود تغييرات كثيرة في المفاهيم لان المحافظة على هذا الوضع وتطويره تتطلب المزيد من الدراسات وكثير من العمل.. ولعل اوجب الوجابات الان هي البحث عن موارد تجعل هذه الاندية تقوم بمستلزماتها تجاه فرقها ولا يعقل ان تظل اندية بهذا الثقل معتمدة على الهبات والتبرعات .

اضافة لذلك فلابد من تفعيل جماهير هذه الاندية والعمل بكل مستطاع للاستفادة منها خاصة بفتح ابواب العضوية وتحفيز الجماهير على نيلها .

وهذه الفرق مقبلة على موسم حافل بالبذل والعطاء والجهد لابد ايضاً من تجميع الصفوف والتنسيق بين روابط مشجعي هذه الاندية لدعم موقفها وهي تلاقي اندية من خارج المدينة والعمل على ارساء أدب جديد في التشجيع تكون الاولوية فيه لاندية المدينة بعيداً عن التعصب الذي لم ننل منه سوى هبوط الاهلي والاتحاد في فترات مختلفة ، ولابد لاجل ذلك من وضع الدراسات والخطط والاساليب الجديدة للتشجيع حتى يعود التشجيع كما كان في الماضي لفرق المدينة فقط من ابنائها ، ونتمني في الفترة المقبلة ان تختفي تماماً مفردات مثل رابطة مشجعي المريخ بمدني أو أهل الهلال بمدني لان جمهور مدني يجب ان يشجع فرقه فقط دون غيرها حتى تعود كما كانت في القمة.

هذا كله يتوجب على ادارات الاندية التنسيق فيما بينها والتخطيط المبكر له ، ونؤكد ان وجود ثلاثة اندية من مدني في الممتاز لهو امر مشرف يجب استغلاله جيداً من اجل ارتقائها مراكز متقدمة لتعود وتنافس الهلال والمريخ على قمة الممتازة والابتعاد عن الشعور بالدونية بيننا وبينهم .

التسجيلات في الاندية الثلاثة تبشر بخير كثير كما كررنا ان بدأت الفرق الثلاثة اعدادها مبكراً وجاداً وبحضور كل اللاعبين ، وان وضعت اللوائح الصارمة التي تمنع تسيب اللاعبين وتم اختيار ادارات للكرة تقدر المسئولية وتعرف عملها تماماً وتبتعد عن المجاملات التي يمكن ان تضر كثيراً بمستقبل فرقنا في مصاف اندية الممتاز.

في الموسم الجديد نتوقع ان تتدفق جماهير الكرة بمدني بكثافة لاجل تشجيع فرقها ، ولان هذه الجماهير قد عودتنا على تجاهل فرقها عندما تحس بانها لا تقدم شيئاً فنتمنى أن تكون الفرق الثلاثة على قدر المسئولية وان تعطي هذه الجماهير ما يحفزها للوقوف خلفها وتشجيعها وبث الحماس فيها .

اخيراً

في الانباء أن مجلس ادارة النادي الاهلي قد قام بحل الجهاز الفني ودائرة الكرة ، ورغم ان الجميع متكمون على من يخلف الخبير عبدالعال الذي انجز مع الاهلي حلم الصعود الا ان مصادرنا المقربة أكدت ان المدرب محمد الطيب ربما يكون هو مدرب الاهلي القادم ، اذا لم ينجح خيار التدريب الاجنبي .

اما المدرب عبدالعال فكما اسهم في عودة الاهلي ومن قبله الاتحاد فانه سيعود لنادي النيل ليواصل معه مسيرة الدوري العام المؤهل للممتاز في الموسم الجديد ونتمني أن يوفق في قيادة هذا النادي العريق الى مكانه بين الاندية الكبيرة.



هو الراي الشافي الكافي ودمدني ومادونها يذهب مع الريح

[IT_man]

والله كلامك منظم ومؤسس وأنا موافق 100000% على كل
الإقتراحات..

[مدنيّة]

مع اني ما من الاسامي اللامعة بس الكلام دا ما منطقي يامزوني لسبب بسيط وهو اسم المنتدي ، المنتدي اسمه المنتدي الرياضي ما اسمه منتدي رياضية مدينة ود مدني ، المنتدي الرياضي دا = رياضة سودانية بشتي انواعها واماكنها + العربية + الافريقية + العالمية

وبعدين ماعارفة ليه اثارة القضية دي وانه المنتدي يتناول فقط مايخص مدينة ود مدني ؟؟ ماعايزين العنصرية لمديتنا لانك لو لاحظت في اعضاء كتار جدا ما من مدني بس بحبوا مدني ومستمرين في المنتدي لانه مافيه اي شكل من اشكال العنصرية ومدني للجميع وبالجميع في الكورة او الرياضة عموما وفي اي حاجة تانية
علي كدا ح يجي يوم نشوف اختنا اميمة عشرية في الثقافي بتقول ياخوانا بس تنزلوا لينا اغاني فناني مدني فقط علي سبيل المثال وهكذا في بقية المنتديات !!!!!!!!!!!! :confused:

[ابوالنور]

والله يا مازن الله يكون في العون هو نحنا كدا ما نافعين في الرياضه فكيف تكون حصريا علي مدني بعد شويه خانجليها ثابته

[محمد السر احمد]

يا مزني والله ما عدمناك وربنا يديك العافية واقتراحك جميل بس ارجو منك عدم موافقة الاخ معصم نو اقتراحو ما جميل وما منطقي
وشكرا

[Madanawi]

الاخ مزوني لك التحية وكلامك منطقي فمدني هي هواءً يتنفس به السودان والعالم قاطبة وماءً يثلج الصدور كلما ضاقت كأنما تتصعد في السماء . و من هذا المنطلق اقول ان الناس شركاء في الماء والهواء مع تأييد الأخ معتصم بأن الأولوية لأندية مدني وأي رأي خلاف ذلك سيكون خصماً على مدينتنا وأنديتها ومنتدياتها أيضاً. لنترك الباب مفتوحاً للكل وليظل باب مدني هو الباب ذو الكعب الأعلى.

[محمد مصطفي]

السلام عليكم


والله يا مزوني انا داير اقول ليك كلام انو كلام الاخت مدنيه مافيه اي كلام ومنطقي جداجدا

ودمت يا غالي،،،

[مزوني]

السلام عليكم ورحمة الله

أشكركم جميعا يا شباب على الادلاء بآراءكم وان شاء الله كلها حتشوف النور

إرضاءً للجميع وعشان ما اتحيز لي فئه معينة انا عن نفسي أقترح التالي وليكم الأختيار

وحق الإعتراض :-

1- حتكون في مواضيع مثبته وتكون كالآتي :

أ) بطولات أوروبيه :- ويشمل الدوري الانجليزي والاسباني وجميع النشاطات الاوروبيه
ب) بطولات عربيه و أفريقيه و أسيويه :- ويشمل كل ما تخص هذه المناطق بشتا نشاطاتها
د) بطولات محليه :- ويشمل جميع نشاطاتنا الداخليه والخارجيه

دي الأربعه المواضيع ترفع للتثبيت

2 - باقي القسم نخليه لرياضة مدني

وطبعا ده كا اقتراح اولي قابل للنقاش والتعديل

فأنا منتظر ارائكم ودمتم
-------------------------------------------------------------------------

الاخوه معتصم عيدروس وناصر ليكم مني مليون سلام وتحيه

منتدى مدني مما قام ما حصل اتحصر على مدني لوحدها ,, طول عمروا كان بنك للمعلوماتيه

لكل اهل السودان سواء في مجال الرياضه او الثقافه العامه او ايا كان !!! حتى لو ما كنا وصلنا

للمرحله دي نتمنى اننا نوصلها انا وانت وبقيت الاخوه الاعضاء والمشرفين والاداره

عشان نرفع اسم منتدانا فوق صح ؟؟ احنا يهمنا نعرف انباء مدينتنا وبرضو يهمنا نعرف الانباء

اللي بره يعني زي لما تقول زي ما قالت اختنا عشريه نخلي قسم الغناء يكون بي فنانيين مدني

والقسم العام يكون حصري بي اخبار مدني !!! كده شكل المنتدى ما جميل ..

أتمنى انكم ترضو بي الموضوع و شوفوا الحل لأنو الاخبار تكون عامه و تتقسم كيف..

وربنا يديكم الصحه والعافيه

[مدنيّة]

السلام عليكم ورحمة الله

أشكركم جميعا يا شباب على الادلاء بآراءكم وان شاء الله كلها حتشوف النور

إرضاءً للجميع وعشان ما اتحيز لي فئه معينة انا عن نفسي أقترح التالي وليكم الأختيار

وحق الإعتراض :-

1- حتكون في مواضيع مثبته وتكون كالآتي :

أ) بطولات أوروبيه :- ويشمل الدوري الانجليزي والاسباني وجميع النشاطات الاوروبيه
ب) بطولات عربيه و أفريقيه و أسيويه :- ويشمل كل ما تخص هذه المناطق بشتا نشاطاتها
د) بطولات محليه :- ويشمل جميع نشاطاتنا الداخليه والخارجيه

دي الأربعه المواضيع ترفع للتثبيت

2 - باقي القسم نخليه لرياضة مدني

وطبعا ده كا اقتراح اولي قابل للنقاش والتعديل

فأنا منتظر ارائكم ودمتم




وعليكم السلام ورحمة الله
طب يامزوني بقية القسم لرياضة مدني وين باقي الرياضة في السودان عموما وين الهلال والمريخ وبقية الاندية في العاصمة اللي مصدرها الرئيسي مدني ولاعبي مدني ومدني ماحصل بخلت علي السودان كله باي حاجة نجي احنا في المنتدي نبخل علي وطنا الكبير !! ويااخونا زي ما مدني وطنا الصغير السودان وطنا الكبيييييير اللي بيحتوينا كلنا والله التقسيمات دي في السياسة احنا كرهناها هسي كمان بقت في المنتدي تقسيمات في الكورة وبكرة ياما ح نشوف

[مزوني]

الاخت الغاليه مدنيه

أول حاجه انا ذكرت رياضتنا المحليه في النقطه ( د )

وبعدين ده كإقتراح أولي وما اعتمدت حاجه لسه

على كل حال انا منتظر رأيك مره تانيه و رأي بقية أخوتي الأعضاء

[مدنيّة]

الاخت الغاليه مدنيه

أول حاجه انا ذكرت رياضتنا المحليه في النقطه ( د )

وبعدين ده كإقتراح أولي وما اعتمدت حاجه لسه

على كل حال انا منتظر رأيك مره تانيه و رأي بقية أخوتي الأعضاء


لطفاً والله ماشفت النقطة دي لانه رياضتنا بستاهل اكتر من كدا
المهم في الامر يامزوني حتة التثبيت دي بتعني انه اي زول عنده كلام عن الموضوع اللي مثبت دا يجي ويقوله فيه يعني ح تبقي كل المواضيع في موضوع واحد مثلا لو انا عايزة اكتب حاجة عن المريخ اكتبها في الموضوع المثبت بتاع الرياضة المحلية دا ولو كبك عنده حاجة عن الهلال برضو ح تكون في نفس الحوضوع المثبت مش كدا وبس كمان حتي لو في مريخابي عنده موضوع عايز يكتب من وجهه نظره الشخصية واخر عنده وجهه مغايرة برضو بتبقي في نفس الموضوع لو في زول عنده كلام عن الدوري الممتاز او كاس السودان برضو في نفس المكان !!!!!!!!
ما ملاحظ معاي انه الكلام بالشكل دا ماجاي ؟؟ ماعارفة بس الكلام ح يكون كتير جدا وفي حتة واحدة وهي مثبتة
الافضل انه يكون المنتدي كمان هو لا لتكميم الافواه في مدني كل عضو يكتب اللي عايزه مادام لم يجرح او يتعدي حدوده علي عضو اخر اللي عايز يكتب عن الرياضة في مدني المنتدي مفتوح له واللي عايز يكتب عن الرياضة في اي مكان المنتدي مفتح له المنتدي مفتوح للجميع وبالجميع الرياضة هي الدوبلوماسية الشعبية
انا عملت احصائية للصحفة الاولي في المنتدي الرياضي وجدت ان عدد المواضيع (30) موضوع منها (3) مثبتات وفيهم موضوعين عن مدني ، يبقي الباقي (27) موضوع اللي بيتحدثوا عن مدني من ال (27) موضوع ديل هم (4) مواضيع وفيهم واحد عنده (4) اجزاء والباقي (23) موضوع مختلفة ومتنوعة واعتقد انه المعادلة كدا لا تستقيم 4 لا يمكن ان تساوي 23
دعوا الباب مفتوح للكل لان مدني ام الكل ولا تقبل باي قيد علي اي كائن مادام لم يتجاوز حدوده علي الاخرين ، اسفة للاطالة مزوني بس لاني منفعلة جدا بالامر دا ليس لانه رياضي في المقام الاول ولكن اعتراضي علي المبدا لا يمكن لنا ان نستن سنة بهذا الشكل ونقتل الرياضة في المنتدي والا غيروا اسم المنتدي من الرياضي الي منتدي رياضة مدينة ود مدني
لك تقديري مزوني

[وليد عمر سعيد]

دعوا الباب مفتوح للكل لان مدني ام الكل ولا تقبل باي قيد علي اي كائن مادام لم يتجاوز حدوده علي الاخرين

يديك العافيه يا مدنيه

كلام صاح الصاح

خلو كدا بس والعندو حاجه ينزلا عادي والناس تكون فهمت من خلال المحاوله لارضاء الاخوان معتصم وناصر انو ماممكن يكون المنتدى الرياضي يخص الرياضه في مدني بس وماممكن يتعدل

ولو هم عندهم طريقه شايفنها انها ممكن تخدم الجميع يطرحوها ويشوفو اراء الناس عنها كيف ؟

ولا شنو ؟؟؟؟؟؟

[التيمان]

ياخى هى وين الكوره

انتو قايل دى البرازيل ولاشنو

صهينو من القصه دى

[مدنيّة]

ياخى هى وين الكوره

انتو قايل دى البرازيل ولاشنو

صهينو من القصه دى


قدر العندنا دي يالتيمان ماعايزين نتحرم منها

[nasir]

اخي مزوني
اولا تشكر وانت تحاول التنظيم وجمع الشمل علي كلمة سواء
اخواني اختلاف الراي لايفسد للود قضية
قد نختلف ونتفق ولكن يبقي الود والامتنان بيننا
اولا توضيح من البداية هو موقع لودمدني عبر النت ناطق بلسان حالها
ثانيا لكل منا ميول لفرق القمة (هلاريخ) ولكن لمدني الولاء المطلق ولايعلو فوقها الا الحق
ثالثا هذا المنتدي الرياضي ليس لنقل الاخبار (هلاريخ) انما لطرح الاراء البناءة والنقد الصريح
لاصلاح حال الرياضة في ودمدني الذي بدوره يؤدي لصلاح الرياضة السودانية
ألم تسمعو من يقول ان كانت مدني بخير في كل السودان بخير وصدق القائل
فلنكن مهمومين اولا بودمدني ( انصر اخاك ظالما او مظلوم.....) فلننصر ودمدني اخوتي بكلمة وهذا اضعف الايمان
ورابعا نعم نتفق علي الرياضة العالمية والرياضة العربية وجميع ضروب الرياضة ولكن !!!!!
لم اري بوست يحمل طوال عهدي بالمنتدي الا اخيرا !!!!! اسم هلال مريخ والمعز وداريوكان وايفوسا والمقصورة وحوض السباحة وكل وصحف تتكلم وتحكي عنها وهو ما دعاني للمداخلة ولفت الانظار والابتعاد عن الصغائر وفي ذلك ليس تقليل ولا استعباط انما استنكار ولكي يؤدي المنتدي رسالته النبيلة والتي من خلالها تعرفنا علي ناس عزز ونعتز دوما بهم
ولكم الود والامتنان في رحاب منتدانا العامر بكم ابناء ودمدني

[محمد مصطفي]

اخي مزوني

معليش انا داير اقول ليك كلام لكن ما تزعل مني والله كلامك ده ما منطقي

ودايما الاخت مدنية بتسبقنا في الكلام السمح وده راي انا برضو يا مزوني


يعني بي العربي كده راجع كلامك



ودمت يا غالي تعبان معانا


ودمت بود ،،،،،،

[مدنيّة]

والله لا اري ما الضير في ان يظل المنتدي الرياضي مفتوحا للجميع كما هي مدني مفتوحة للجميع
من يود الكتابة عن مدني وانديتها فليكتب فلن يجد من يعارضه في هذا ومن يود الكتابة عن اي نادي اخر خارج مدني او اي نشاط اخر فلم المعارضة ؟؟؟؟
غايتو انا خايفة العدوي تنتقل من المنتدي الرياضي لبقة المنتديات وتجي بعدها دعوة لحصر عضوية المنتدي علي المدنين فقط !!!!!!!!

[وليد عمر سعيد]

والله اقول ليكم شي دا وصل كورتنا لي مستوها دا

التعصب والتحيز والعنصريه


بعدين نحن من ماقمنا بنسمع بي هلال مريخ كفرق بتنافس خارجيا ومن حقنا انو نشجع واحد فيهم

ومن حقهم انو طالما بنشجعهم نكتب عنهم


اما داخليا نحن مع مدني قلبا وقالبا






خليكم ناس موضوعيين شويه كدا !

[nasir]

سبحان الله

[امير عبدالباقي]

الاخوه الاعضاء الاعزاء
لكم اجمل تحيه
اولا منتدي مدني ليس لابناء مدني وليس حصريا لاخبار مدني فقط
المنتدي والحمدلله به اعضاء من جميع انحاء السودان والجميع ابداء الرائ فيه ونرحب بجميع الاراء والمواضيع المختلفه وجميع اخبار الرياضه كانت محليه او عالميه من خارج السودان للجميع ميولهم المختلفه في حب من يشاء هلال كان ام مريخ حتي برشلونه
ابناء مدني خاصه والسودان عامه يحبون فنون الكره بمدارسها المختلفه لماذا نحرمهم من ابداء رائهم في من حبون ويكتبون عنهم
وهنالك مثال ليه مانمنع لاعبين الكره من خارج مدني بالعب في الاهلي او جميع انديه مدني ونحصر اللاعبين ان يكونو من مدني الان الاهلي جلب لاعبين من خارج السودان واحتمال جلب مدرب نجيري لماذ لم نهتف ضد ذلك ياجماعه الكوره اصبحت هي السفير بين الول المتخاصمه انتو عاوزين تتخاصمو بالكوره لازم نتفتح مع العالم حتي نستفيد
لكم كل الحب والود وانتم منتعصبون للمحبوبه مدني

[العابر الوفي]

احـــــــــــــــم احــــــــــــــــم

الأخ الرائع مزوني .... ما قلت ليك لي عوده وبرجع ليك ههههههه
طبعا مشتاقين شديد وبالجد تسلم ما زلت ذاك الأخ اللذي اتشوق لرؤيت اقلامه تتحرك في عدد من المجالات بالجد احيك وتسلم يا رب

تحياتي الوفيه

[محمد حسين (المميز)]

الســـــــاده الأجــلاء
أسرة أعضـــاء منتديــات ودمدني

كل التحيه والشكر للجميع
أعتقد اننا بنتناقش في حاجه أخدت حيّز كبير للغايه

الأخ العزيز والجميل مزونــي
ماقصّرت نهائي في اخذ رأي الجميع في الموضوع
لكن بصراحه الكلام نهائي مامنطقي وليس هناك فائده
في حصر المواضيع ولا في جعل خانات مثبته تخص بعض النشاطات
ارجو جعل الحريه الكامله لكل من يريد ان يكتب سواء للهلال او المريخ
او فرق مدني الثلاثه او للفرق الانجليزيه او الاسبانيه او العالميه
حتى لو كان يريد ان يكتب عن الكره الصوماليه او الهنديه

نحن لو حصرنا الحكايه اعتقد اننا عملنا زي صالح كامل وشفرنا الحكايه
الartحرمت الناس المشاهده الاّ بالقروش
ونحن هنا حرمناهم من الكتابه بحريه


ارجو جعل المنتدى كما كان
ليس من رواد الهلال ولا من رواد المريخ

كل الشكر للغاليه مدنيــّــه في الآراء الجميله والردود الموزونه
فيما ذكرت

*-*-*-*-*-*-*-*-*-*-*-*-*

[ابودجانه العباس]

الغريبه يا أخ مزونى إنو لحد قبل فترة قريبة كانت علاقتك بالكورة والرياضة عامه زى علاقتى أنا باللغة الصينيه
لكن وكما قلت لله في خلقه شؤون أصبحت تتحدث عن الكورة والرياضة بشكل احترافى غريب
في النهاية ربنا يديك العافيه ويخليك لينا وما يحرمنا من اسهاماتك الفعاله دى.

[مزوني]

الأعزاء مدنيه كبك أبو قرط ناصر أمير عبدالباقي المميز العابر الوفي أبو دجانه

شاكر ليكم اراءكم الغاليه يا أعزاء وأحب أقول ليكم الآتي

كلٌ يعبر عن الشي الدايروا وياخد راحتوا في التعبير طالما انو ده رأي الأغلبيه

وراحتكم هي عنواننا في منتدانا الحبيب ودمتم ليهو أبد الدهر وبوجودكم ان شاء الله

حتكون مدني وحيكون منتدى ودمدني وربنا يديكم الصحه والعافيه

-------------------------------------------------------------------------

العابر الوفي شخصياً !!! وين انت يا راج والله والله والله مشتاقين موووووووووووت يا عسل

وبركه الشفناك طيب ونورتنا وشرفتنا كتيييير والله يا غالي

وأوعى من تعيد القطعه دي تاني يا جميل ,,, ومنتظرين كتاباتك المرهفه والحلوه يا رائع

وحبابك من تاني الاااااااااااااااااااف
---------------------------------------------------------------------------


شنو يا أبو دجانه ؟!؟!؟ دايرينا نطلع الفضايح ولا شنو ؟؟؟ :mad:

ما طوالي كنت بغلبك في البلاي ستيشن في بيتكم :o

ما تتذكر النص دسته ديك لما الخال صلاح وقع فيك من الضحك :D

وبعد ده كلو تقول لي علاقتي ضعيفه ههههههههههههههههههههههههه

طبعا يا جماعه أبو دجانه ما شاء الله عندو صيني " الصينيين احتاروا فيهو;) "

يعني لازم تفضحنا !؟!؟!؟!؟!؟ الفتره ديك يا حبيبنا كنت في اجازه ترفيهيه مع الجامعه وكده بس

مرحب بيك حبيبنا أبودجانه في منتدى مدني ونورت المنتدى والله بي طلتك البهيه

وان شاءالله تنبسط معانا في بيتك يا غالي

[ابودجانه العباس]

أححححححييييييييييي أنا منك يا مزوني حرم غظتني غيظة
نص دستة يا الظالم اسح كان لعبت براك بتغلب نفسك نص دسته.
ما مشكلة المهم عندي ليك وللاخوان إقتراح بسييييييييييييييط.
نحن السودانين ما شا الله ما في مكان في الكرة الارضية ما متواجدين فيه وفي كتير من الدول الجالية
السودانية بتكون عندها نشاطات رياضيه وبطولات كتيره ومشاءالله ناس مدني(معليش للعنصريه)بمثلوا
نسبه ما هينة من الجاليات دى فنحن ليه ما نحاول برضوا نغطي الدورات دي علي الاقل نديهم الحفز
والدعم الاعلامى أو بالاصح (نكبر ليهم كومن)

وفي النهايه دي مجرد خاطره والنبي فوقكم كان تقولو علي منظراتي.

[وليد عمر سعيد]

ابودجانه منظراتي كبيييييييييييييييييييييييييييييييييييير

ههههههههههههه


فكره حلوه والله والناس تشد حيلا وانشاء الله المنتدى الرياضي حيكون عندو مراسلين عديييييييييل

[مزوني]

أبو دجانه المنظراتي حبابك

مالي يا ود أمي ما بغلب روحي سته ؟!؟!؟!؟!؟!؟ قالوا ليك غشيم ولا غشيم !!

ورأيك أحلى منو مافي يا سكر وأي حاجه تخص مدني المنتدى ده أولى بيها

من غيرها ولا شنو ؟؟

رأي ميه ميه يا حبيبنا وربنا يوفق أهل مدني جميعا في كل النشاطات

الرياضيه والعمليه والعلميه

[ود المطامير]

يا أخوى ما تخليك من الغلبة دى وأبو دجانة دا
لو جاك هِنى أرفع ليهو العكاز , الزول دا زول
خراب سااااكت .
أها قلت ليك , أنا ببقى ليك مراسل فى الهوج
وبرسل ليك تقارير مباريات مصارعة التيران
وتور ود الفكى شاف نفسو فى باب ليلى علوى حقت
التوم باللّة رجع خلف وبحت برجلو وجا كاسح
فرِد طقة لباب العربية , الباب إنقلع وهو رقد فطيسة
أها أكان بنفع مراسل أدينى خبر .

[مرتضى ساتى]

ياخى هى وين الكوره

انتو قايل دى البرازيل ولاشنو

صهينو من القصه دى

من فتره طويله ما ضحكت زى اليوم لانه الرد بتاع التيمان
ساخر وفى محله وربنا يديكم العافيه يا التيمان

[مزوني]

ود المطامير حبابك والله ,, بالله ليك في الرياضه قدر ده !؟!؟!؟!؟!؟!؟!

يامان ده بكنصل لينا الرياضات عدييييييييييييييييل مراسل مين يا حاج

هههههههههههههههه الله يديك العافيه أخوي ومرحب بيك في قسمك الرياضي يا حبوب

الأخ مرتضى ساتي حبابك الآف حبيبي ونورت الموضوع

مع اني كنت منتظر طلتك دي من بدري وحسه تاني بقولها ليك حبااااااااااااااااااااابك

100 و 200 ومليون

لكن بس حبة تعليق بسيط

رد التيمان أي ناعم وساخر وفي محلو

لكن الناس برضو زي ما قالت الاخت مدنيه


قدر العندنا دي يالتيمان ماعايزين نتحرم منها

وليك خالص تحياتي أخوي مرتضى