صياغة واقعية جدا لقضية الزواج (قصيدة)

[ياسر السماني]

بروفة اولى لا تنتمي للنص الا قليلا :
ما تنفعني ايقونة الحظ ولا تعويذة الابتسام
تبا لذاك الطبيب حين اراد حقني بمصل الحظ ......
لم يرج الفتيل جيدا
بروفة ثانية داخل النص :
الليل معشوق الصمت
والصباح نقطة الانطلاق
عامل النظافة كان يجد في صديقا مخلصا
يحكي لي عن قصته مع الحياة والنساء
حدثني ذات ليلة كيف انه احب احداهن ...
(الله يجازي قروش المغتربين )
نافذة نائية تطل على النص اقفو عندها انا :
لم اقل اني ولجت عالمك المحظور
الا لتداعيات الحناء ومراسم العرس الثري
انا هكذا .....
مفتاح اشواقي يستخير العفل عادة حين يبتدئ الشعور
فطوبى لنار تصلي من اجل مجوسي كفور
افعلى راحلة الايام راجلا ....
اعرق اسفلتا وحصى
آالآن ادرك ان قلبي شجرة
بشرى لظل تمنع عن ايواء صاحبه
بروفة اخيرة قبل النص :
امل هتفت
العرس .. العرس .. العرس
بدر صرخ
الفلس ... الفلس ... الفلس
امل بكت ومشت
ولما لم تجف مدامع امل
كان بدرا يقتحم صف الانتظار بمبنى معمل تحاليل الايدز
توطئة لتقديم نتيجة الفحص للسفارة
وكان في سره يردد النص :
حتما حروفك ما غنى
ولا تراتيل سبحتك المسجونة في صدرك صلا
شلت مجامر دمعك المحقون عنا
عليك الشوق السكن حافة صمتك الورمان وطن
سيب الوطن
ارمي العيون الستفت قلبك وهم
يابت وطن
مصلوبة في خاطر المطر
والغيم مبلل جفون الدهشة في ترنيمة هواك
حتى الشلوخ في خد المنية طفحت فوق للدمع
مسجون في قلبك نضم
حاحاي للطيف البيركز رايتو فوق نضم سكات
اسكت ..
بلا الوهم التلوكو سنونك ما ليك شي
ارسم على خاطر وطنك لحد
واري الجتة من خوف المشاوير الضياع
انتي وانا
صبحت واطاتنا والشم غربت
حد مايفوت عشم الحقيقة وراك كل الزقاق وطن
يا شارع الفجة البتفتح ما هنا
خاميك زمان غيمة سراب
مشتولة فيك كمين هموم
والدمعة ما بتطفي السهر
الا الزمن بولع فينا شان يرتاح
انتي وانا
والشوق القديم ساكن هنا
لماهو ريح الخوف مشى
اصلو الالم جواي واصل حد مجون
ركب علي عضمي المسوس باقة رهق
مكبوتة حدود الامل يندلى من خاطر الغنا
ويتكل قصاد الهم عويل
لشنو العدم عانق تضاريس الوجعة في ساحة رقيص
صرانا زي بقجة سفر
مغبونة منو الامنيات
حاديها شكلين من خرائط وارتحال
ياسكة منك ماش عليك
امكن يكون فرح المحبة الوهم
ستفني ليك في آخر بريد طابع ممزق من اسف
لشنو الزمن عانق تضاريس الوجعة في ساحة رقيص
والشوق رسم في بالي المطر
خوفي لو ينزل هموم
يا مشلخة خد الفرحة بالسيف السكات
وريني منك كيف اجيك
ما القسوة من غدر الفقر
رصفت مواعيدي علي الرهاب
خلتني زيك مشتهيك
مغبون من الوطن الطفش لاعن سنين المترفين
لشنو الزمن عانق تضاريس الوجعة في ساحة رقيص
مدلوقة تواريخنا ببلاش
والنوم حرام
مجبول علي حب الجمال
لكنو الجمال مفتون بنوك
يا وطن .......
دقشك زمان العتمة في اخر صباح
حتى الصياح
مكتوب عليه يظل حبيس الضلعة في القيف الاسف
منك وطن
يرسم خطاوينا ويسرقن
وانا شن اقول ...
يابلد ال..................................
حقك بس علي
انا شن اقول
ياوطن الطشاشات الغموض
لما توصل حد غرورك ابقى اتذكر هوانا
وابقى اعرف
لو بتفهم جد حا تعرف
انو في نص النعاس طفل صاحي
جد بعاني
سهران مقاسم الليل سكونو
دمعو في عينيه جف
الا في خدو بنزف مجرى منو الدم بطفر
وقف محتار جد محتار
زي آخر قرش في جيب ابوي
سهيان بفكر كيف يحوق
يا وطن
افرد جناح الرحمة ضمو
نسي همو
ما الدنيا ما دايما معاك
في يوم بكون الحظ ليك
السترة ما فارقت الفضيحة
بارياها زي ما تكون انيسة
ما قص ضفر الحوجة غير ايام زمان
ووفرة الخير اللي كان
تغرف تشيل من غير حساب
ما حك ضفر الماضي جلد الليلة ابدا يا وطن
اجترار الذكرى
ما بنكتب في التاريخ نضال
ولا فكة الريق الامس باكر تفيد
لو دق باب الروح جفاف
نفق الشوق مات ما احتملت خطاي الانتظار
صعدت مدامع الاسى
واقتسمت مع الشرود الغياب
فاظفر بذات المال تربت يداك
خسئ الحب اذا صار الجيب خويا
قل ....
هل يستوي الرائعون وانصاف المواهب والمترفون
قطعا في عداد الموتى لن يكون
اجترار النفس شهيقا او زفير
للراحلين عن الوطن عمدا
حق اختيار الامكنة
وانتباذ الفقر
ثقب الجيب
اذا جاء اللوتري ركنا قصيا
هزوا بشباك السفارة تساقط عليكم
فيزا ودنانيرا سخيا
فتنبت الاشواق امتلاء الجيب
اغترابا وعرسا
هكذا يكون الحل في البلد الذي كان ..
سلة لغذاء العالمين
فتستريح في صدر امي الامنيات
وتستعيد المسبحة في يدها ورد الخلاص
اذا ما اذن المؤذن
حي على الاغتراب
حي على الاغتراب
حي على الاغتراب





(كتبت هذه القصيدة ابان كنت طالبا بجامعة الجزيرة في سنة 2003)

[ياسر السماني]

شنو يا شباب الزواج دة ما شايف في زول قال فيهو اي راي انتو كلكم عزابة واللا شنو واللا خايفين نسوانكم يفهموكم غلط ويقولو عليكم مفكرين تدبلوا بعدين المفاريك تدور واللا شنو يا ود المطامير

[ابودجانه العباس]

شنو يا شباب الزواج دة ما شايف في زول قال فيهو اي راي انتو كلكم عزابة واللا شنو واللا خايفين نسوانكم يفهموكم غلط ويقولو عليكم مفكرين تدبلوا بعدين المفاريك تدور واللا شنو يا ود المطامير

والله الليله وقعت وما سمو عليك الليله كان ما إتسديت فيك أصبر لي
اها بسم الله الرحمن الرحيم
أولا أخوي ياسر إن انطلاسيات الوهم المموج في اساطير البعد البلوري تعطي دوزنه مموسقه في منتهي الشعور الممتد من دهاليز العدم الازلي الي سراديب الفراغ السرمدي فتتقوقع لتنصهر في بوتقه اللحظه المعبرة عن نفسها في إطار واحد وهو: القصيدة حلوة
ودمت.

[Moeiz Elagib]

المشكلة تغترب وبردوا يعرسوها اخي ياسر
والله القصيدة..................................

[ياسر السماني]

العزيز جدا ابو دجانة ربنا ما يحرمنا منك ابدا
(إحنا السياسة بتاعتنا في تطفيش الست دية ها تنطلق من مستوى القاعدة بتاعتنا ما حدش يسألني لاني مش فاهم ولا كلمة من اللانا بقول فيه , وانت بالذات يا ابو دجانة مش حا تفهم كويس لأنك مش قاعد كويس) .










تسلم

[ياسر السماني]

الاخ معز الله يكضب الشينة

















تسلم

[زهرة الشمس]

ما شاء الله تبارك الله
حينما قرأت الصياغة الرائعة للقضية الهامة والفعالة افتقدت الرائع مصطفى سيد احمد لأني واثقة انه كان سيقوم بتلحين الكلمات الاكثر من رائعة ويغنيها .. فهذه الكلمات تنقص توقيعه بالاداء
ولا اعرف ولكن احساسي يقول لي انها تليق به
وكلماتك اخي ياسر فيها اكثر من بعد الزواج واكبر من مدى الواقع الذي نعيشه
كلمات اكثر من رائعة لك الشكر وجزيل التقدير

[زهرة الشمس]

أتمنى في يوم احضن ملامحك على الضفاف
وألمك على الوطن الزفاف
اغرس دروبك الشموس عودة نهائية المطاف
بوادر ريدك العفاف تتمو هناك
بعيد عن حكاوي سنين الغربة الجفاف
نشوف في عيونك هلال العيد
وننتشي بشوق اللقيا لما الأيادي تسالم والضلوع تبكي وتعيِّـد بارتجاف
في صوتك معاني ربيع
زهور الفل تزور الكل من الصباح
يعم البلد عطر الياسمين ، مياسم السوسن والبنفسج والصفصاف
ويرق قلبي ليك وبين أناملك يصبح خاوي وشغاف
تلقاني تايه في الحنين
ومن ظروفك وتضاد عوارضك ارفع للجبن راية
وعليك ما في زيّ أنا خواف
اصلي ساكن بين حروفك نقطة
وبين طيات تجاربك صمت دموع نبضة
أجابد في ابتساماتك الظراف
وأترنح من آلامك كأنو اكتسحني سُـلاف
معاك بحلم بالبهجة
بعرف للألوان منابع
بحس بمعالم الدنيا واعرف للريد مكامن وأسرار
حتى دموع القل والعدم علي تكون مآثر خُـفاف
وأشيلك في خاطري حكايا للأطفال .. للنسايم .. للأحلام .. للنوار
انت أول كلمة قلتها وانت آخر ما في القلم من أحبار
وعندي سكة طويلة ولسه...
دايراك تكون في الأعماق مناجم ولخطاوي الطريق أنوار
فينا الهوى
فينا العشق .. آيات
ضحكة للزمان تبدر
بيها يحلى ليل المشوار،،،،،

[ياسر السماني]

الرايعة دوما زهرة الشمس اولا انا لا اعلم كيف ارد على هذه الكلمات لكني اوضح شيئا
اين انا من قامة ذلك الفنان الرائع مصطفى سيد احمد انا الى الان احاول جاهدا ان اكتب شيئا يعجبني اولا ويعجب الناس هذه محاولات ارى من وجهة نظري انها ضعيفة الى حد ما ...
واحب ان ازجي لك جميع الوان الشكر لهذه المداخلات كما احب ان اهديك دوما كتاباتي علها تجد منك قليل من الرضاء والتجاوب .. اعزاءي ان تعليقاتكم على ما اكتب اعتبره دافعا للكتابة ولكم شكري واخصك بالشكر الجزيل يا زهرة الشمس











تسلمي

[تسنيم خالد]

اخي ياسر السماني

لك كل ااحترام والود وانت رمز الحرف القوي العملاق
تجيد رسم وترتيب الحروف وتضعها بحركة بهلوانية اية
في الجمال...
الموضوع حيوي في غاية الاهمية...
الزواج وما ادراك ما الزواج!!
مشكلة العصر التي لا تنخمد
واخير الواحد يقعد في بلدو دي ويصارع في زولتو
بدل يغترب وبعد دة يجي مغترب يلطشها كانك يا ابو زيد
ما غزيت




دمت



دمت

[Madanawi]

يا ود السماني لك التحية وانت تضع الملح والليمون على العسل في موضوع هام وواقعي.

يا تسنيم انتي من زمن المغترب ، ظنيتك قديمة ودقة من زمن سنة زح. التطور التكنلوجي وعملية الحياة خلت البنات مفتحات وقمة الاولوية الان لديهن هو أخو المغترب وليس المغترب لا نه يا سافر وخلاه بي وراهو سنين ولا ساقة وما شافت اهلها تاني سنين.

[ياسر السماني]

تسنيم خالد
لكي التحية لكن هذا ما يفكر به الشباب هذه الايام










تسلمي يا رايعة

[ياسر السماني]

اخو المغترب واللا المغترب الفكرة هنا ما الاختيار








تسلم