ودمدنى - السوق الكبير [الأرشيف]

عوض صقير

23-01-2007, 03:25 AM

السلام عليكم أحبائى أعضاء وزوار المنتدى
هذا البوست عبارة عن زيارة سريعة لسوق ودمدنى وتفقد ناس السوق

أولا يجب الذهاب إلى مطعم كشك لتناول وجبة الفطور حيث الفول الكارب وعندها تجد عدد كبير جدا من الأخوان من مختلف الهيئات , تجد شباب الأدارة المركزية بقيادة فتوح ود الشيخ وعبدالرحمن السر وأسامة كوزا والدحموا وود الماجدى والسر ميرغنى ومجموعة أخرى من شباب الرى وآخرين من إدارة المحاكم يعنى عبارة عن لمة حلوة بناس حلوين , ومن خلالها تعرف كل الأخبار مع الأستمتاع بأكل فول محترم
أرجوا من الجميع المشاركة بأى زاوية من زوايا السوق الكبير

وغلى اللقاء

nasir

23-01-2007, 08:31 AM

كيفك استاذ صقير
وكمان تاخد لفة وتغشا قهوه ود اب لبده
وتحوم وسط الصياغ وتشاغل التاج الشيخ في دكان الجلود
تكون الساعة اتناشر جاءت والدوام انتهي هههههههههههههههههه
لك الود

امير عبدالباقي

23-01-2007, 11:21 PM

الاخ عوض صقير
لك كل التحايا موضوع جميل لك الشكر
لكن اخوناnasi نهي الموضوع بالساعه اتناشر دي نمشي البيت ونشيل معانا جرائد ولا شنو

روبش

23-01-2007, 11:50 PM

والله موضوع شيق ولك التحية أخي عوض لكن اخونا nasir ما خلي لينا فرقه نمر على الاماكن المحببة عشان كده منتظرين الحافلة تجي جنب الشجرة المقابلة السينما

عوض صقير

24-01-2007, 03:37 AM

الأعزاء
ناصر
أمير عبدالباقى
روبش

لكم كل الود

الحقيقة ناصر قابل تاج الشيخ وأظن عندهم مناسبة العصر عشان كده قال أحسن نمشى بدرى ولكن شارع الجمهورية عامر بى ناس أبوضراع وعبدالجبار وناس حاتم نقه مع أولاد أبو جون وطبعا ماسكين كبابى الشاى وآخر مغالطة فى الكورة وبهناك شايف نور الدين عبدالمجيد معاهو مبارك سليمان وأحمد شحاته فى سوق الصياغ وآخر تجهيزات لسيد الأتيام
والبقية تأتى

وأرجوا من ناصر غدا عدم الأستعجال

بدر الدين محمد

24-01-2007, 03:56 AM

اما انا حابدأ مشواري الى السوق بعد الساعة 12 عشان nasir ما ينهي الموضوع
من الجامع عبر القسم الاول
نبرد المشوار من الليمون بتاع دكان الشيخ (زمااان)
او نقزقز طعمية من محمد في ركن دكان الشيخ ثم نتجه جنوبا الى صف الصياغ لنرتاح عند دكان الخال (تاج الدين) منجد العربات عليه رحمة الله..
ود العود ييمر بالشاي السخن ..
(تابي) امام عبد السلام الحلاق يأخذ حفنة شعر يضعها في رأسه ثم يلحس اصابعه
تمر من امانا عجلة عمروس ينتهي بها المطاف عند دكان الوالد (محمد ابوزيد) يرحمه الله
اما القعدة والونسة بين بشرى وكزمباكي في البوست الجايي
والتفاصيل كثيرة .. تأتيك تباعا ياعوض
تحياتنا

الفارس البنفسجي

24-01-2007, 04:19 AM

اشجيتنا يا ود صقير بهذه الزكريات التي لامست دواخلنا وبدت وكأنها السحر .... وياريت تدعم الحاجات دي بالصور لو أمكن والدعوة موجه للناس اللي في مدني

الشكر وحده لا يكفيك يا ود صقير ... لكني لا أملك إلا أن أقوله

nasir

24-01-2007, 06:29 AM

طبعا انا لسع لاف في السوق بعاين في الزمن لقيتو خلاص وده طبعا ساعة فطور لانو شغالين قطع (قطع كهرباء ) الناس زحمة في الكاونتر وفجاة يظهر ليك زراع تحت شجرة الجار الله يرحمهما برحمته و يكوريك ليك الكورة امبارح كم كم وهي تكون كرة العصر ههههههههه

magdi

25-01-2007, 12:16 AM

قلتي لي مدني الجميلة ... مدني يأجمل خبر
قبة السني وفريقنا ... عامرة حلقات الذكر
فيها قضيت الطفوله ............................................؟؟؟؟؟؟ ؟؟؟؟؟؟؟
بس طلعت ولسه مارجعت تاني .......
السلام شيليهو مني زكرياتي معاك صور...

بدر الدين محمد

27-01-2007, 12:04 AM

ياناس عوض موضوع السوق مالو وقف مافي زول قادل للسوق..

عوض صقير

27-01-2007, 03:39 AM

الأخوان الأعزاء
بدرالدين
الفارس البنفسجى
ناصر
مجدى
لكم منى خالص الود والتقدير

والله يابدرالدين ذكرتنا بذكريات أروع من رائعة

وفعلا المشوار من البيت للسوق من خلاله بتمر بالكثير

وطبعا الآن أخونا عمروز دكانه حافل بالشباب وعنده شاى كارب وقهوة خليها ساكت

بدر الدين محمد

27-01-2007, 07:57 AM

اما الخروج من السوق فهو موضوع..
الشمس مائلة الى المغيب تكسو الاشياء لون ذهبي القهاوي تستعد لاستقبال العاملين الذين قضوا جل النهار في البيع والشراء قهوة ود ابلبدة تسمعها قبل ان تراها من الراديو الكبير الموضوع على الرف وقرقعة احجار الدومينو (الضمنة) ..
البعض في طريقه الى خارج السوق والبعض الآخر يتجه الى قلب السوق ليأخذ طريقه الى السينما الوطنية والخواجة .. اما انا فكان يستهويني بعد المغرب تسلق حائط نادي الاتحاد للفرجة على تمارين العاب القوة التي كانت تتم بالناحية الجنوبية للنادي حتى اذا احسسنا بتأخر الوقت تقافزنا نحو البيوت .. وفي الخاطر العودة غدا لمكان ما في السوق الكبير

نزار حسن محمد

28-01-2007, 12:29 AM

ياعوض ..بعد الفوله الكاربه لابد من الذهاب بشارع عبد الحق عشان العمارى والجرايد ومن هناك على حديقة وقيع الله عشان الشاىوكل المحامين متلمين اخر شمارات المدينه..وبمشى وبجيك ياعوض

عوض صقير

28-01-2007, 01:16 AM

أخونا نزار
تحياتى لك
جدا نمشى حديقة وقيع الله ونقابل الشباب بهناك ونشرب لينا فنجان قهوة
وبعدها عارفك ح تقول لى نمشى لأخونا هاشم خلف الله المحامى وطبعا أختنا نجوى صلاح المحامية بتجيب معاها الشاى والقهوة من البيت عشان كده لازم نمشى ليهم

عوض صقير

28-01-2007, 01:21 AM

أخونا بدرالدين
بالله المره الجاية وأنت جاى السوق جيب معاك أخونا عادل محمود ونتقابل فى دكان عمروز عشان نشوف لينا طريقة نقنع بيها عمروز عشان يفكر بالزواج ويا حبذا لو كلمت معاك أبوبكر الحبشى أيضا لأن شيخ محمد عبدالله قال لى عمروز شككتنى فى فاتحتى

Madanawi

28-01-2007, 01:50 AM

الاخوان عوض صقير و نزار انا معاكم في مشوار حديقة وقيع الله لكن بعد الشاي لازم نديها شيشة على السريع عشان خالي موصيني اجيب ليهو بتيخة من جنب سينما الوطنية وعندي غشوة لي شارع اتجاه واحد عشان داير اشتري لي حاجات من عمارة ابوظبي وبعد داك ماشي برج الجزيرة لي اخونا راشد حمور وكان الموتر حقي فيهو بنزين بمشي كمبيوتر هول اوري الجماعة وشي عشان انا الليلة ما داومت والجكس هناك بيفقدني وخالتي عشة دايرة مني حق الشاي وبتاع الكافتيريا اييييك بقيت اخش المعهد بالباب الوراني عشان الجرورة بقت كتيرة خلاص.

المهم كان لقيتكم حايمين لحدي المسا بجي اعزمكم قهوة في ركن المستشفي عند ادروب.

راجع ليكم في مشوار بكرة وسلمت يا عوض على اللفتة الظريفة دي.

عوض صقير

28-01-2007, 02:02 AM

أخى مدناوى
ماقصرت والله كانت قعدة حلوة بوجودك وماعندك مشكلة بنمشى معاك أتجاه واحد لأن أم الأولاد قالت عاوزة فليل دامور من أبو صلعة عشان تصلح الريحة

وبخصوص كمبيوتر هول أنا عملت معاهم فترة وكنت مستشارهم القانونى فى الفترة 1999م - 2000م

نتقابل بكره فى السوق

محمد حسين (المميز)

28-01-2007, 02:57 AM

اها انا جيت داخل هسسسسسسسسسسسه من السوق

حمت ليكم حوامه جد
مشيت من الصباح لاخونا احمد بركات وقابلت معاهو الكوتش حق الاهلي
واخونا كمان بدر وطبعا تجهيزات تقيله للموسم

ومنها مشيت العماره عندي شغلة موبايلات
وقابلت كل الحبايب هناك

ومنها جريت بالعربيه لسوق اللساتك واتشمشرت شويه في السوق
مع ناس كتييييييير وشريبنا الشاهي من ادروب المجيه

ومنها مشيت بجنب سودانير وشايف ناس مبارك سليمان وماو مركلسين
ومن هناك لقطت حاجات كده وركب معاي اخونا بابكر وقال اغشيهون بوووش
شال تمباكه وبقينا مارقين

بكره بجيكم تاني العنده مشوار يقول اغشاهو ليهوو

*-*-*-*-*-*-*-*-*-*-*

صلاح الدين محمد

28-01-2007, 03:13 AM

بس في البوشي تجي تلقي مدني مجتمعة في الدلالة والكل بسال عن ناس ابوالتاية ومحمد

والكل بننظر مع حبيبة ست الجبنة وموقف العربية في الدلالة وناس بانت و مربع11 وجبرونا و البيان

جاين في سنكات

nasir

28-01-2007, 10:27 PM

المهم الليلة قلنا نفطر مع حاج عصام الريح في شارع الجمهورية
لقينا عاطف ابولمبة والكوتش عجوز طبعا امس النجوم كانت لاعبة الفطور ملح
وبعد داك طوالي شارع الجمهورية كان عندي ساعة عند محمدعثمان الساعاتي ابودقن
وطبعا كلامو خلهوه ساي نبز وشغل حتي اليوم ماعارف الدقن الهوية بتاعت شنو وفي الاخر يقول ليك ادفع بكره ومن بنغشا دكان اولاد ابوجون نقة في الكورة وقراية جرايد

معتز حمدتو

29-01-2007, 12:52 AM

تحياتي عوض نقلاتك انت والشباب ذي العسل ورغم عودتي اليوم من السودان الا ان مطالعة البوستات عن السوق وناسُ الحلوين تمنيت ان اعود ادراجي .
وقد جاءت ذكراك وانا اتجاذب اطراف الحديث مع فيصل الازار وقد تجاوب مع ما تقوم به من مساعي جميله في احياء وجوه ودمدني ورحب بان يكون عضوا مميزا في موقع ودمدني ، ولك تحيات شيخ سيف صلاح .
يحلو فول كشك مع الخبز البلدي من مخبر الخلايفه مع الجلسة الرائعة في معية الملك طمبل ، وعمر المدني .
السوق وجوه الحلوه لازالت حاضرة وإن غيب الموت بعضها .
لك الود عوض وانت تسوق الذكريات العطرة

ود البطــــانة

29-01-2007, 01:14 AM

دوماً نحبها .. ونتحسس دروبـــــها
لاننا نحس فيها بالطعم اللذيذ
للتلاقي والمعني الحقيقي للحياة ..
إنها ( مــدني )
نسارع الخطي نحو معالمها الفريدة
وأسواقها التليدة .. ومنها السوق
الكبير ..
وفي هذا السوق العتيق شوفنا
العجب .. وأكلنا الفول المكرب
ونحن نتجول بداخل زقاقات السوق
مشينا أشترينا شوية جرائد
ووجدناها كلها حوادث وإضرابات
وإختلاف بين شريكي السلطة
المؤتمر الوطني .. والحركة الشعبية
والأخطر من ذلك وقوفنا علي أخبار
مزعجة وفيها تهديد بالإنفصال من
قبل الجنوبيين .. حسبما تردد مجالس
المدينة ..
المهم واصلنا حوامتنا في السوق الكبير
وقررنا أن نجلس في مقهي عمنا
أدروب ..
أصلوا شاهي الرجل بخلي الدماغ
صاااحي .. ورويداً رويداً كبرت الجلسة
وتطور النقاش وأنصب حول وضعية
البلد .. وكيفية الخروج من الخوازيق .. !!
ولازم كلو حاجة تكون ماشة تش ..
ويلا يا شباب .. نتقابل بكرة في حديقة
وقيع الله .. وفي المساء نمشي نشاهد
تمرين نادي الإتحاد ..
وأكيد حنتقابل ..
باااااااي ..

،،،

ود البطــــــــــانة

عوض صقير

29-01-2007, 03:07 AM

الأخوان
المميز
صلاح
ناصر
معتز حمدتو
ود البطانة

لكم منى خالص التحايا وآسف جدا لتأخيرى عن السوق الكبير لأنى ذهبت المحكمة وقابلت الشباب وطبعا أخونا الشيخ أبورنات شماراتو ما بتكمل وآخر قطيعة فى الجكس

ألف حمدلله على السلامة أخونا معتز حمدتو وإن شاء الله كل الأهل والأخوان بخير
وأكيد قضيت وقت جميل مع ناس مدنى الحلوين

وتحياتى من خلالك لأخونا فيصل آزار وأبو النسب سيف صلاح

المميز بالله ماتمر فينا ساكت كدى أطلع لينا فوق فى مكاتبنا فوق قاسم الساعاتى والشاى جاهز

عوض صقير

30-01-2007, 03:24 AM

كيفكم ياشباب
الغريبة جيت بدرى وأخذت لى لفة طويلة بدأتها من عمارة عباس كنين وأخذت لى قعدة مع أخونا دكتور النور عباس كنين وشباب أوريفليم وكنت وطلعت منه مشيت على ناس هيلتون وقابلت أخونا عادل خليفة وطلعت خليفة وطلعت أصر يجيب لى شاى ولكن قلت ليه شارب الآن نسكافى مع النور ومنهم ذهبت إلى على صقير أخى الصغير وأخذت معاهو زى نصف ساعة وبعدها ذهبت بشارع الجمهورية وقابلت أخونا خالد سيد الجاك مع عصام الريح ومعهم مجموعة من الشباب وأيضا ذهبت للأخوان عبدالعظيم إبراهيم هاشم وأخيه أحمد كورى وطبعا معهم عادل خضر وعمر عباس والوجيه قرنو ( أبوقرون ) وهو آخر شياكة ومنهم عاودنى الحنين طلعت مكتبى الكائن بعمارة عمنا المرحوم أبشر عبدالرحمن والد زميلتنا الأستاذة أمل أبشر وأخذت قعده حلوة مع الشباب بقيادة أحمد نقد ومعاويه عبدالحميد وأمير بابكر ( السنجك ) وطبعا معاوية آخر مغالطة مع أحمد نقد وتحتنا أخونا الأستاذ فضل الرازق وفى الأرضى أخونا قاسم الساعاتى وقدامنا الدكتور الجليل يوسف ميرغنى ربنا يديه الصحة والعافية وبعده مكتبة هوارى حيث أخونا معاذ
البقية تأتى

معتز حمدتو

30-01-2007, 07:34 AM

والله ياعوض صغير لفتك ده البتخلي الواحد ابطل ارجع لديار الغربة لان المجموعة التي تقضي معها اوقاتك لا يفضل احدهم علي الاخر ، ولك الود ارتال ارتال

عوض صقير

03-02-2007, 02:15 AM

الأخ العزيز معتز

فعلا دى ذكرياتنا فى مدنى وناس مدنى الطيبين
وحقيقة السوق الكبير بمدنى عبارة عن لوحة جميلة وفريدة من نوعها
وأتمنى من أخونا بدرالدين رسم صورة للسوق بأنامله الفنانة

اليوم الجو جميل فى السوق وفى شارع الجمهورية لفت نظرى الموز والفواكه المعروضة بجنبات الشارع وطبعا الموز أبو نقطه منظره خلاب وريحته خليها ساكت

اليوم بدأت السوق بشارع نادى الأتحاد كما تعودت دائما
وشربت زجاجة ليمون بارد
وبعدها زرت أخونا نادر الريح فى دكانه ووجدت معه أخوانا النيلاوية طلال أحمد ستيبة وجنابو محمد إبراهيم مونى وأحمد الوشى وآخرين

وبعده دكان العم كباشى ومعه مجموعة كبيرة من أقطاب الرياضة بمدنى ومنهم النيلاوى والأتحاداوى والأهلاوى بقيادة العم إبراهيم كرار والعم التجانى أحمد الفكى وآخرين

لنا بقية

عوض صقير

06-02-2007, 01:38 AM

ناس السوق الكبير
حالكم وأحوالكم .. معليش طولنا منكم

فى لفة سريعة بالسوق وجدت مجموعة من الشباب أمام محلات الصادق الطاهر للرياضة بقيادة أخونا خوجلى أبو الجاز ورفاقه الحلوين ... جلسة ممتعة جدا مع ناس غاية فى الأحترام وأيضا بالجانب الآخر أخونا مجدى مهدى لاعب الرومان السابق لديه مجموعة أخرى وأيضا أولاد أبو جون بقيادة أخونا مبارك سليمان وحاتم نقه , فى الحقيقة السوق برامجه مليانة جدا والوقت لايسعك للمرور وكمان أخونا علاء الدين تنير فى وكالته يرحب بك بصورة حلوة ومهذبة ... دى مدنى والله وناسها الحلوين تكاد تجزم وتقول بأن كل هولاء أخوان بكل ماتحمل هذه الكلمة من معنى

لنا عودة

Madanawi

06-02-2007, 03:32 AM

يا استاذنا عوض انا مشيت من كمبيوتر هول في يناير 1999 وجيت جدة والله كانت لينا ليام وذكريات جميلة في المعهد وهسي هنا في السعودية معاي كم من الشباب بتاعين هول ودا موضوع عايز ليهو بوست براهو.

كدي هسه ما تقوم تمشي معاي لي كمبيوتر هول نقابل ناس عبد العزيز غيلان و الاخ عادل عبد العزيز و عادل عمر وقليل من الرجال وكثير من النساء والمعهد ما قفلوهو الا كمية الحروم الحايمات ديلك برغم حسنهم و الرونق الذي اضفوه على المكان.

عوض صقير

07-02-2007, 01:48 AM

عزيزى مدناوى

كانت لنا ذكريات حلوة بكمبيوتر هول
وماعندى مانع نمشى نقابل الشباب

غيلان وعادل وأمل ساتى وسارة وياسر الريح وسوسن الأمين وهيام وحسام حسان
لهم منى خالص التحايا والأشواق

كما أفيدك بأن الأخ ياسر الريح معنا بالرياض
وأيضا الأخت سارة الطيب

كانت أيام حلوة والله

للحديث بقية

nasir

07-02-2007, 04:43 AM

تعرف ياستاذ عوض الليلة قولنا نفطر في البوستة نغير شوية من فول كشك
نفطر في البوستة في فتة كاربة مع امين عمو ( فتة ابوزيد الله يرحمه ويحسن اليبه)
ومن هناك كان عندي حوالة في البنك الاسلامي شارع اتجاة واحد قلت اغشا استاذ رضوان اشرب الشاي في وزارة التربية ولقيت صابر ماقدره وطولي اتجاه واحد ماشين يمين شمال المهم جبن بان زين
اتزكرت انو الليلة الشباب جايين العشاء قلت اشيل من لحمة الضان وبطيخة ( طبعا عبدالرحمن السر تخصص بطيخ يوم اشتري بطيخة شاله بالدرداقة والله العظيم) طبعا الدنيا اول شهر وماهية وكمان في حوالة من السعودية وبعدك محل الفراشين بتاعين السكر احمر الرطل ب 13 جنية والابيض ب 15جنية
اقول بكمل ليكم بعدين في امان الله

وليد عمر سعيد

07-02-2007, 07:31 AM

كما أفيدك بأن الأخ ياسر الريح معنا بالرياض
وأيضا الأخت سارة الطيب

والله اانا اتوقعتك يا استاذ عوض من طريقة الكتابه في البوست انك حاليا في السودان

مع العلم لوبتتذكر في العقد بتاع اختا سمعتك بتتكلم مع نزار اخوي انك راجع السودان

فافتكرتك انك رجعت نهائي السودان ...

طلعت بيكم بره نطاق البوست مع الاعتذار لكم اخواني الكرام

ومشكور اخوي عوض على الموضوع انا يومين بخش بقرا بس لانو انا مشاويري السوق محدوده !!

عوض صقير

08-02-2007, 12:14 AM

أخى وليد أبوقرط

كيف حالك وأحوالك أتمنى أن تكون أنت والأهل طيبين

أخى وليد أنا ذهبت السودان فى أواخر رمضان وحضرت قبل الأضحى وطبعا قابلت نزار بمدنى وهو بخير وطبعا زياراتى للسوق الكبير دى من وحى الذاكرة والخيال ( هوم سك )

مع تحياتى للوالد الأستاذ عمر أبوقرط

عوض صقير

08-02-2007, 12:19 AM

أخى ناصر
أشكرك على هذه الفتة الظريفة والعجب بطيخة عبدالرحمن السر

طبعا فى أجازتى فى رمضان قابلت أخونا عبدالرحمن السر فى مناسبة زواج أبن شيخ محمد شقيق فتوح ود الشيخ وطبعا معه حيدر عابدين والدحمو وأسامه قوزا وكانت جلسة حلوة معاهم

تحياتى لك وبالله ماتنقطع من السوق

خالد السوداني

08-02-2007, 02:52 AM

وبعد صلاة المغرب الجبنة في جامع الصائم وبعداك تشوف شمار الحفلة وين؟ وبي منو؟ ولو في طريقة عشا في الحفلة كفي الله المؤمنين شر القتال ولو مافي نشوف فولة عند محمود ولا كوارع عند معروف

بدر الدين محمد

09-02-2007, 11:32 PM

انتظرت كديسو في الشجرة امام دكان فضل المكوجي جا فايز مصطفى قعد معاي ونحنا تحت الشجرة جات سيرة ماشة فاذا بها تخص اهلنا الرفاعية (الدباغة) سألت فايز الرفاعية ديل عندهم عرس ونحنا ما عارفين ؟؟ قال الجماعة ديل عندهم بنطلون عند الترزي خلص ماشين يجيبوه.. المهم جا كديسو وداعب فايز وسلم على فتوح الذي وصل للتو بعجلته الزرقاء .. وكداري حتى السوق لكن الزمن داك كان دكان عمروس لسع ووالده متربع على عنقريب في وسط الدكان عمروس كانت مهامه بسيطة .. جيب الفطور .. امشي للبساطي جيب جلد ..امشي لي بدوي شحاته جيب سلسيون .. ما حنقدر نقعد معاه احسن نمشي لي كزمباكي الونسة والشاي عنده والكلام مرات في السياسة ومرات في الثقافة ومرات في الرياضة ومرات في شئوون الفريق ومداخلات من بشرى وبين الحين والآخر يمر واحد يقطع الحديث ..ازيكم كيف الحال الغالب منو .. عطلنا يا عادل الجماعة ديل .. نمشي .. الليمون ثم البيت

عوض صقير

10-02-2007, 02:01 AM

أخى النخلى
أشكرك على المداخلة ووجهة نظرك فى البوست

وإن شاء الله مافى أى زعل لكن أحب أوضح ليك أنو المنتدى يحتوى على كثير جدا من المواضيع الجادة والهادفة
وأما فيما يتعلق بهذا البوست فهو عبارة عن ساعة صفاء لذكريات لنا تربطنا بالسوق وبى ناس السوق وفيها نوع من الترويح عن النفس
وإذا لم تعجبك الفكرة تجدنا آسفين جدا لأزعاجك

وبالنسبة للآخرين أتمنى أن يواصلوا فى سرد مايحلو لهم من ذكريات بالسوق الكبير

ودمتم

عوض صقير

10-02-2007, 02:05 AM

أخى بدرالدين

والله ذكرتنى بأخوانا كديسو وفتوح وعمروز والشجرة قرب الجامع الكبير

والمجموعة الظريفة التى تحدثت عنها

وأرجو منك كما ذكرت سابقا أن ترسم لنا لوحة عن السوق الكبير

مع خالص شكرى وتقديرى

عوض صقير

10-02-2007, 02:17 AM

الأخ خالد السودانى
أشكرك على المرور والمشاركة

فعلا قهوة جامع الصائم مافيها كلام ومشهورة على مستوى
ولها رواد كثر
سواء كان من المستشفى
أو من شارع الدكاترة
أو من شارع أتجاه واحد

تشكر وفى أنتظار المزيد

بدر الدين محمد

10-02-2007, 10:43 AM

الاخ الكريم عوض
الاخ الكريم mayaliyoussif
لكم جميعا الود والتحية
اما موضوع السوق الكبير في مدني عبر تاريخه اعتبره سفر كبير فتحه عوض لتتداعي ليس فقط الذكريات بل التوثيق لملامحه واعلامه والنشاط المرتبط به وذلك على نسق كتاب (سحارة الكاشف) للاستاذ ابو العزايم او مقالات عمر حسن النور في موقع ودمدني .. فكل الذي يطرح في المنتدى يمكن ان يكون نواه لمعلومات ربما يجمعها زيد من الناس او عمرو في كتاب نحتاجه جميعا
اخونا mayaliyoussif اكتب لنا عن قلب مدني النابض (السوق الكبير)وحتما سوف نسعد بمشاركتك..
تحياتنا للجميع

عوض صقير

10-02-2007, 10:04 PM

أخى العزيز بدر الدين

اليوم فى السوق الكبير عندى زيارة خاصة إلى صالون الحلاقة الخاص بأخوانا
بكرى عبدالجليل
فاروق الشامى
بدرالدين
وموقعه بالقرب من محلات لاظ ومطعم حسن جاد الله وهو صالون عامر جدا يقصده عدد كبير من أبناء مدنى وتحلو فيه الدردشة والونسة النظيفة وحكاوى أخونا بكرى عبدالجليل شيقة وطريفة تحكى عن مدنى أيام زمان ويأتى أخونا فاروق بمداخلات فيها أضافة لما ذكره بكرى وطبعا أخونا بدرالدين صغير السن مقارنة ببكرى وفاروق ولكن من خلال سمعه المتواصل لحكاوى فاروق وبكرى يعرف الكثير عن ماضى المدينة ويقوم أحيانا بتصحيحهم فى بعض النقاط ومنها تأتى المشكلة والمغالطة وفاروق يزعل شديد ويقول لى بدر الدين أنت ود متين ؟

لنا عودة أحبتى

nasir

11-02-2007, 08:15 AM

اخي استاذ عوض تذكر الدافوري بتاع الشولات جوار البوستة ده طبعا لو مذكر تحكي عنو
اليوم زواجي اخي وصديقي دحمو (1990) في نادي المصارف الناس زحمة كلو مدني موجودة ناس 114 والادارة والقسم الاول يعني لمة وطبعا انا معسكر ومسافر مع الاتحاد الصومال والله زوغت من المعسكر ده لمة لايمكن افوتها حتي لو ما سافرت
عذرا مداخلة لاخي mayaliyoussif
حكاوي السوق الكبير وزكرياته لاتعني الابتعاد عن الهم الاكبر الوطن والمواطن بل هي تصب في ذلك الطريق والفهم ( لماذا هي حكاوي السوق الجميلة اندثرت الان ؟؟ اجب انت وستعرف المعني فقد يكون النقد رمزا وقد يكون رسم وقد يكون فهما وقد يكون الوفاء كلمة (اذكرو محاسن موتاكم ونترحم عليهم من خلال كتاباتنا ومداخلاتنا ) فهذا ملتقي للاحباب من تفرقت بهم السبل كلا سار في طريق ولكن يبقي الاتصال عبر كلمة سر هي ( ودمدني) ودمت صديقي

عوض صقير

11-02-2007, 08:04 PM

أخى ناصر

دافورى الصياغ كان من أشهر السداسيات فى ذلك الوقت ولها كثير جدا من الرواد يأتون من مختلف الأحياء للمشاهدة وكان جمهوره أكبر من جمهور تدريب الأتحاد

زواج أخونا الدحمو أتذكره كأنه أمس لأننا كنا واقفين مع العريس منذ بداية الفكرة وحجز أغراض الزواج وكتابة الكروت وتجهيز القيدومات وأتذكر فى ذلك الوقت كنا نلعب كرة القدم بميدان حى المطار جوار منزل عبدالعزيز البرعى وكان مجموعة منهم محامين وضباط إداريين بقيادة أخونا عاصم وداد وعبدالعزيز البرعى وأخوانه الخمينى وآخر لا أذكر أسمه وشباب من الأدارة المركزية منهم على الماجدى ومعتز بله وفتوح والدحمو وأسامه قوزا وآخرين .... كانت أيام وما أحلاها أخى ناصر

عوض صقير

11-02-2007, 08:25 PM

أخى العزيز النخلى

أشكرك على المداخلة الكريمة

ونتمنى منك طرح ماتراه من قضايا ومن هموم للوطن والناس بالسوق الكبير وستجدنا إن شاء الله من المشاركين والممنونين لك

مع خالص شكرى وتقديرى

صلاح ودالطاهر

12-02-2007, 04:12 AM

بسم الله الرحمن الرحيم
الأخ عوض صقير تحية طيبة موضوعك بالجد ممتاز ويرجع الشخص إلي أيام مدني الجميلة مدني الحنينة المهم وأنا متحرك إلي السوق امر بنجا يل القسم الأول حيث يجلس محمد ابوداقوس واتحرك حتى فرن علي عبد الغني اشتري عش ابوسمسم واجلس بعد مكتبة الفجر في البر ندات عند عمك التوم النمر واسمع منه الحكم حيث قال
الدنيا مدرسة ...... وأستاذها الظروف
وفصولها المجتمع ....... وقلمها الأمل
وحبرها الدموع ....وكتابها حياة الإنسان
ثم امشي المكتبة الوطنية للجرائد حتى اصل دكان الوالد رحمه الله في سوق الخضار القديم وبجواره دكان حمد ابوزيد وأولاد أبوريد آه ياعوض قلبته علينا المواجع ولنا عوده في حديقة وقيع الله وميدان الملك وذكريات ودزرق والقسم الأول ونادي النيل والاهلي ولاانسى السوق الصغير ولنا عوده

صلاح ودالطاهر

12-02-2007, 04:16 AM

بسم الله الرحمن الرحيم
الأخ عوض صقير تحية طيبة موضوعك بالجد ممتاز ويرجع الشخص إلي أيام مدني الجميلة مدني الحنينة المهم وأنا متحرك إلي السوق امر بنجا يل القسم الأول حيث يجلس محمد ابوداقوس واتحرك حتى فرن علي عبد الغني اشتري العيش ابوسمسم واجلس بعد مكتبة الفجر في البر ندات عند عمك التوم النمر واسمع منه الحكم حيث قال
الدنيا مدرسة ...... وأستاذها الظروف
وفصولها المجتمع ....... وقلمها الأمل
وحبرها الدموع ....وكتابها حياة الإنسان
ثم امشي المكتبة الوطنية للجرائد حتى اصل دكان الوالد رحمه الله في سوق الخضار القديم وبجواره دكان حامد ود ابوزيد وأولاد أبوريد آه ياعوض قلبته علينا المواجع ولنا عوده في حديقة وقيع الله وميدان الملك وذكريات ودزرق والقسم الأول ونادي النيل والاهلي ولاانسى السوق الصغير ولنا عوده

عوض صقير

12-02-2007, 08:17 PM

أخى العزيز صلاح
أشكرك على المرور والمداخلة الظريفة
التى ذكرتنا بأجمل الفترات
التوم نمر الرمز الذى يحكى عن ثقافة جيل بقصيدته البليغة
والتى شبه فيها الدنيا بالمدرسة
وإنه تشبيه بليغ
وأيضا مكتبة الوطنية وجمهرة الناس عند وصول الجرايد اليومية
وأتذكر كنت من المداومين على قرأت مجلة صباح الخير المصرية وكان عبدالمنعم حريص على حجز نسختى من المجلة وأيضا أخونا حفوية

وماتنسى تيم القادسية بالقرب من منزلكم بقيادة الأخ الوقور الشيخ مدثر وآخرين

ليت الشباب يعود يوما ......

صلاح ودالطاهر

12-02-2007, 10:10 PM

والله ياعوض ايام لها ايقاع وايام المشاكسات والفرح في ربوع مدينتنا الجميله مدني الحبيبة لك التحية والود ارجو التواصل

صلاح الدين محمد

14-02-2007, 08:43 PM

يا عوض الحاصل شنو في السوق بقيتو ما قاعدين تلفو مالكم

عوض صقير

14-02-2007, 08:47 PM

أعزائى زوار وأعضاء المنتدى

لعلكم طيبين

اليوم الخميس وأكيد سوقنا الكبير له طعم ورونق خاص
وقلت أنتهز هذه الفرصة لزيارة شاب رقيق وفنان أحب مدنى ودمدنى أحبته

وهو الشاعر الفنان
جمال عبدالرحيم

يقابلك بوجه مشرق وبسمة رائعة
آتى إلى مدنى صغيرا يافعا
ومدنى كما عودتنا دائما تفتح زراعيها وتحتضن كل عاشق لها
هكذا جمال عبدالرحيم أحب مدنى ومدنى بادلته نفس الشعور
ومن هنا ظهر أبداع هذا الفنان المرهف
وأصبحت له بصمات واضحة فى خارطة الغناء بمدنى
وله مساهمات فعالة فى تقديم كثير من المطربين

من هنا نحيى هذا الشاب الفنان المرهف

عوض صقير

14-02-2007, 11:40 PM

صلاح ودالطاهر

15-02-2007, 12:08 AM

شوف ياشيخنا في المنتدي دا الناس ما عندها موضوع شوف انتقدت موضوعك قاموا عملوا شن ورنا ووصل 50 رد بدل ردين والمواضيع الهامة لم ينظر فيها الناس بتحب المفارقات فقط والعناد

تحياتي اخوي صقير

.............. عماد الدين النخلي :o

الاخ عماد لك التحية والاجلال اخي انني اريد ان اعرف ماهو الذي تريده موضوع السوق الكبير جزء من حياة انسان مدني وهو موضوع جميل جدا وحب الناس مذاهب واتمني ان تكتب عن ماتريده انت ونتمني ان تكتب المواضيع التي في نظرك مهمه حتي نتشاور معاك فيها لك الشكر والتقدير اخوك صلاح

عوض صقير

17-02-2007, 03:29 AM

أعزائى رواد السوق الكبير

اليوم بالسوق الكبير
جنوب ميدان الحرية (الملك)
جوار مخابز على عبدالغنى
تقف مطبعة النيل الأزرق رمز وقامة ومنارة عالية
تحكى عن تاريخ ملىء بالبذل والعطاء
قدمت ومازالت تقدم الكثير

على رأس إدارتها الآن
الأخ الأستاذ / معتز أحمد إبراهيم حمد خلفا لوالده المرحوم الأستاذ / أحمد إبراهيم حمد

لم نعاصر والده المرحوم أحمد إبراهيم حمد ولكن الذين عاصروا الأب قالوا بأن الأبن صورة مصغرة لوالده فى كثير من الخصال

حيث يقابلك معتز بأبتسامة وترحيب وتواضع وتهذيب
يجتهد لتقديم خدمات المطبعة لكل من يطرق باب المطبعة
ولايتردد فى خدمة كل من يلجأ إليه

معتز من الشباب المميزين بالمدينة

وهو الأخ الأكبر لعدد من الأخوة هم
الشفيع , معتصم , إبراهيم , منتصر

ولديهم أخ لأب يكبرهم سنا وهو النعمان

لهم التحية بقدر ماقدموا من خلال هذا الصرح العملاق

بدر الدين محمد

22-02-2007, 03:38 AM

للخميس بقية بالسوق الكبير
نختمها بمكتبة الفجر حيث يقف فى إدارتها الأخ مأمون محمد سيد أحمد الأبن الأكبر للمرحوم محمد سيد أحمد حضر من أرض المهجر ليواصل مسيرة والده وتقديم المفيد لأبناء مدنى من خلال هذه المكتبة الأنيقة التى كانت تأتيها الكتب مباشرة من بيروت ومصر
الشكر أجزله لأخونا مأمون محمد سيد أحمد
ونسأل الله ان يوفقك فى مسعاك

مامون يكبره في السن شاكر محمد سيد احمد وقد زاملتهم الاثنين في مدرسة النهر الاولية والاميرية الوسطى ثم انقطعت عني اخبارهم وقد التقيت بالاخ شاكر في الخرطوم اوائل التسعينات
اسأل الله ان يكونوا جميعا بخير والتحية لهم

عوض صقير

24-02-2007, 03:46 AM

أشكرك أخى بدرالدين على تصحيح المعلومة
كنت مفتكر مأمون أكبر وذلك لأن شاكر حجمه أصغر من مأمون

وطبعا الآن مكتبة الفجر فى موقعها الجديد خلف حديقة وقيع الله

عوض صقير

26-02-2007, 01:49 AM

أعزائى وأحبابى
زوار وأعضاء المنتدى

بعمارة الدمياطى الكائنة بالسوق الكبير شارع الجمهورية
حيث توجد مكتبة سودان بوكشب تحت إدارة وأشراف
صاحبها هشام الكارب
ومجموعة من الموظفين على رأسهم أخونا
نزار ميرغنى الأخ الأصغر لأخونا السر ميرغنى
مكتبة تميزت بتقديم الجديد المفيد من كتب ومؤلفات وكل إحتياجات المكاتب
وهى نقطة إلتقاء للكثيرين
آل الكارب وآل مكى مدنى ومعظم رواد نادى الجزيرة
حيث تسمع آخر أخبار مواضيع الساعة
جديدة لنج

وفى أيام حرب الخليج حضر السيد بله قسم السيد ( والد أخونا جمال بله ) للمكتبة وسمع آخر الأخبار عن حرب الخليج وعندما ذهب أخبر أصحابه بالسوق بأن ناس مكتبة سودان بوكشب يعرفون الصاروخ قبل إقلاعه

ومن رواد مكتبة سودان بوكشب الأساسيين أخونا محمد يوسف الكارب ( سيخ ) المثقف المطلع

عوض صقير

27-02-2007, 02:03 AM

أعزائى
قبل مغادرة عمارة الدمياطى

تأثرت كثيرا لعدم وجود المكتبة الوطنية ومكانها أصبح كافتريا لبيع البرقر والكبدة

منظر مؤسف ومحزن
المكتبة الوطنية
رمز وتاريخ لهذه المدينة
وأنا أقف بجوار هذه الكافتريا تذكرت أيام المكتبة الوطنية والحركة النشطة لرواد المكتبة وهم يتنظرون قدوم الصحف اليومية
المكتبة الوطنية معلم كان لابد من المحافظة عليه

كما نتمنى أن نسمع بعودة هذا الأسم فى عالم المكتبات فى أى موقع بالمدينة

بدر الدين محمد

01-03-2007, 04:59 AM

الاخ عوض اظنك ماشي على مكتبة مضوي الحاج جوار سوق الدجاج (موقعها الاصلي) .. سوف انتظرك هناك حتى تحدثنا عنها

عوض صقير

03-03-2007, 01:40 AM

عوض صقير

05-03-2007, 10:36 AM

اليوم بالسوق الكبير
نمشى بشارع الجمهورية حتى نصل شارع الدكاترة

طبعا شارع الدكاترة أصبح من الشوارع الأكثر حركة فى مدنى
وهذا أن دل على شىء انما يدل على أن الملاريا مازالت موجودة عندنا بكثرة
وطبعا الدكاترة سوقهم حار جدا
والكشف أصبح أرقام زى ماقال طه سليمان

بالرغم من الزحمة فى هذا الشارع
وبالرغم من دخل عيادات الدكاترة العالى
الا أنك تجد عيادات الدكاترة من الداخل شكلها مذرى جدا
لاتصلح أن تكون عيادات بيطرية

فى شارع الدكاترة
العيادة ونظافتها وتهيئتها لأستقبال المرضى آخر أهتمامات الأطباء

لماذا لا تقيد وزارة الصحة رخصة العيادة بمدى صلاحية المبنى ومافيه من آثاث
حتى يجبر الطبيب لكى يحصل على رخصة فتح عيادة بتهيئة عيادته لتصبح مقبولة

للحديث بقية

ود حنتوب

07-03-2007, 02:25 AM

يا سلام عليك

طالما نحن على عجل دعنا نأخذ سندوتش من ابوشمس على السريع ونمشى نلحق باقى اغراضنا ...

ترى هل ما زال ابوشمس موجوداً ( مش البار بقصد المطعم )

يديك العافية

عوض صقير

07-03-2007, 03:06 AM

أخونا
ودحنتوب

تشكر على المرور والمداخلة

طبعا أبو شمس كان عبارة عن مجمع كبير جدا به سوبر ماركت بمستوى راقى جدا ومطعم وبار

والآن أبوشمس غير موجود
وتوجد فى مكانه محل توكيلات ثلاجات ليبهر
وشركة أدوية

ودحنتوب الظاهر عليك طولت شديد من مدنى

نسأل الله أن يرد غربة الجميع

للحديث بقية

rasheed

10-03-2007, 04:11 AM

يا أستاذ عوض لك التحية من على القرب والله الغربة ومواضيع الفارغة أخدتنا ،، وأنت ما عاوز تلبي دعوتنا للزيارة ،، كدي نفضحك على النت ،، معقول يا أستاذ سنتين معاك بالرياض وما تجي تزورنا ، فضيحتك بجلاجل والنشوف 0أما عن سوق مدني ،، أذكر لما كنا صغار كان الوالد رحمة الله عليه عامل لينا برنامج بالنسبة للحلاقة فنقوم نمشي عصراً بدري نحلق عند عمك عبد الوهاب له الرحمة حياً أو ميتاً ودكانه في الزقاق المقابل دكان فخري الجبلابي الآن ، وكان يختو لينا الخشبة في يد الكرسي بتاع الحلاقة عشان كنا صغار ونبقى في مستوى طول الحلاق ،، وبعدها يودونا لأبي شمس وطبعاً كان نلقى المحلة نظيفة ومرشوشة بالموية ومروقة ترويقة أبعاااااااااااد والترابيز مرصوصة بصورة جميلة حولها كراسي الخشب المجلدة بالخيزران ،، وبعدين يجو الجماعة البقصو الأضافر أو الأظافر ويخلو ليك أصابع يديك ورجليك زي اللبن ،، وبعدها تبدأ الحفلة حفلة الحلاقة فيطلب لينا الوالد الزبادي العجيب في كاس الألمونيوم ومعاه الباسطة وبعد داك الأيسكريم - كانت تدهشني التلاجة الكبيرة بالخشب البني اللون والقزاز ويدها - مقبض الفتح - دهبية او فضية مميزة ، وبعدها ياخد لينا الوالد - عليه الرحمة - السرندبل لشاي صباح اليوم التالي ،، كل هذه الزكريات وانا دون السادسة من عمري ،، وبعدها يكون المغرب قد حان فنذهب مع الوالد إلى سينما الخواجة التي كانت تربطنا علاقة أسرية مع أصحابها من جهة الوالد رحمه الله - عمك عبد الوهاب والد حسن عبد الوهاب " المقاول الآن " وجعفر الباشمهندس ونخش الدور الأول والذي لا أتعدى فيه المناظر وهاك يا نومة لا أصحى منها إلا صباح اليوم التالي وقد تغول شقيقي محمد علي الثعلب الماكر دائماً على السرندبل بتاعتي 0 وأذكر انه عند حضورنا للبيت وفي صباح اليوم التالي لهذا البرنامج 00 كانت لدينا شقيقتنا عشوشة او رباب جاءت أصغر من شقيقي محمد علي وأكبر مني يعني سندوتش بيناتنا ،، فأول ما نصل البيت هاك يا مكاواة وحكي ووصف لكل ما سبق ذكره والمسكينة تصبح حالتها يرثى لها ،، وتقعد تبكي حتى عودة الوالد رحمه الله من الشغل وكان صوتها - جرس بس - لتبدأ بعدها الشكية وينالنا التوبيخ والوعيد 0 من الوالد الذي يضحك ويخفف عليها بأنه سوف ياخذها معنا المرة الجاية 0 وفي مرة أصرت على الوالد ان يأخذها معنا فما كان منه إلا أن أخذها وحلقت صلعة نمرة أتنين والحلاق مستغرب جداً لذلك فقد كانت مبسوطة لذلك عكس ما توقعه والجواب طبعاً هي في إنتظار ما بعد الحلاقة وفعلاً أخدت نصيبها من ذلك 0 إلا أن اليوم التالي كان لها جحيم ،، فكانت بداية اليوم بأم صلعة يا أم صلعة أم صلعة قديتي القرعة ،، فكانت كالمستجير من الرمضاء بالنار وجلست تندب حظها العاثر الذي أصرت عليه 00 رباب أو عشة أو عاشه - كما كان يحلو لوالدنا الذي سماها على والدته وهي حفيدة الشيخ حامد أبا عصاة سيف - الآن لها أربعة من البنين والبنات أكبرهم محمد وهو يجلس لإمتحان الشهادة الثانوية ، نسأل الله له التوفيق وأن يطيل لنا في عمرها فهي رغم كل ذلك أحن الأخوات لنا وبمثابة والدتنا رحمها الله فقد أخذت الكثير الكثير من والدتنا بحكم معايشتها لها وهي أصغر أخواتنا الخمسة 00 يا له من زمن جميل يسرح بنا ،، وعذراً للأخوان ولكنها هكذا الزكريات تنداح غير مستأذنة منا ،، ولك الشكر أستاذ عوض على هذه التذكرة 00 ولنا عودة في السوق الكبير 0

عوض صقير

10-03-2007, 09:00 PM

حبيبنا الرشيد عمر

أول حاجة دخلتك لينا فى السوق عاوزة ليها خروف عديل كده

والله ذكرتنى ببرنامج الحلاقة
والحلوانى
وأبوشمس
ونظافة الشوارع وطيبة الناس آنذاك
وشايفك فى كلامك متحيز لى عشوشة وطبعا الشمار ده لازم أوصلوا
لأختنا شادية عمر وفوزية عمر ولبنى عمر لأتخاذ مايرونه مناسب فى حقك

بخصوص الزيارة والله لوم شديد

أرجو شاكرا ومقدرا تكرار الزيارة لنا بالسوق الكبير
لمزيد من الذكريات

بدر الدين محمد

16-03-2007, 08:45 AM

العزيز بدرالدين

أشكرك على المرور والمداخلة

مكتبة مضوى .. مكتبة عريقة وكبيرة مكتظة بالكتب بمختلف ألوانها وأعرفها فى موقعها الحالى بشارع الجمهورية وكان قائم على أمر إدارتها عمك مضوى وأبنه الأكبر

وبالنسبة لموقعها الأول أرجوا منك أن تضيف لنا تفاصيل ذلك

ونحن فى نتظارك

اولا .. التهنئة الخالصة الاخ عوض .. بمناسبة الاشراف على المنتدى الاسلامي .. الاختيار صادف اهله..
اما عن موقع مكتبة مضوي الحاج الاصلي فقد كانت في نهاية الصف المقابل لحديقة سليمان وقيع الله ربما الدكان قبل الاخير شرقها سوق الخضار والذي يبدأ بسوق الطيور الممتلئ بالدجاج والبيض والحمام وفوقها في الطابق الاول (سنجر) وهو معهد لتدريب الفتيات على الخياطة والتفصيل والذي كانت تديره خواجية تسمى فيكتوريا .. موقع مكتبة مضوي ربما كان السبب في ان سياج حديقة سليمان وقيع الله صار سوق لفرّاشة الكتب فقد كان طلاب القراءة والثقافة يجدون ما يريدون من المكتبة او من الفراشة الذين في مقابلها .. كنا نأتي الى المكتبة لنشتري مجلة الصبيان (بقرش) لنقرأ عمك تنقو ونتفرج على رسومات شرحبيل احمد ثم تطورنا وصرنا نشتري من مكتبة مضوي مجلة سمير ومجلة ميكي كان رفيقي في مشوار مكتبة مضوي الفاتح محمد السيد -اسأل الله له العافية - بعد الخروج من مكتبة مضوي نعرّج على باعة الكتب لنستبدل الالغاز نسلم ما قرأناه ونستلم آخر مع دفع الفرق (قرش واحد) واحيانا اخرى نستبدل روايات الجيب او نشتري بثمن بخس كتاب قيّم مثل تحت ظلال الزيزفون للمنفلوطي او المواكب لجبران او روايات جورجي زيدان واخير اللص الشريف ارسين لوبين..
بالمناسبة الكلام دا ما تفتكروا انو قبل الاستقلال .. ده قريب جدا سنة 69-70
لك التحية يا عوض

عوض صقير

23-03-2007, 08:18 PM

أخونا وحبيبنا بدرالدين

ألف شكر لك وعقبالك إن شاء الله

ماشاء الله بدرالدين حكيت لنا عن مكتبة مضوى وتخيلت نفسى أتجول بهذا الشارع وأقلب الكتب والمجلات
تشكر أخونا بدرالدين على هذه المعلومات والحقائق المهمة

كما نسأل الله أن بعافى أخونا الفاتح محمد السيد

وللحديث بقية

الزبير محمد عبدالفضيل

24-03-2007, 02:19 AM

طبعا الذهاب الي السوق الساعه 11 صباحا اولا الذهاب الي بنك الخرطوم شارع اتجاه وأحد ثم

بعدها الي مكتب المحامي ابراهيم بشير الجاك الفطور في احدي كفتريات شارع النيل ثم تعرج الي دكان

ود الشيخ للونسه ومعرفة اخبار مدني عامه وعند ود الشيخ تتجمع اكبر ممجموعه من السماسره

لبيع البيوت والاراضي والعربات ومع هذه المجموعه تكون عرفت كل اخبار مدني وتاخذ الجرائد

والذهاب الي البيت

mohd.dafalla

28-03-2007, 07:23 AM

والله ياود صقير موضوعك جميل جدا بس نستو سمك حسن جادالله تخدوهو معاكم لناس البيت وخاصه ست الحبياب

عصام الدين عموش

30-03-2007, 09:38 PM

ونحن ياعوض العصرية يسوقنا الخال ويطلع بينا لسوق أم سويقو وحيث الترزية البلدية في البرندات والحلاقين أصحابة المرايات المدورة والفوطة البيضاء والتي كانت تفضح ما يعتري الشعر من مصائب الأوساخ وإنت عارف قصدي ثم نمر بقبة ودكنان يوم السبت عشان نشتري ما تشتهيهه النفس الطفولية لكن اهلنا بيعتبروها تبركات الشيخ ودكنان وسر يوم السبت ده للأن أنا ما عرفتو

صلاح ودالطاهر

30-03-2007, 11:32 PM

الاخ / عوض طبعا اخونا عصام من زمن الحلاقه بالفوطه تحت الشجر وهذا يدل علي ............. انت عارف ياخ عوض القصد ياخوي وصلنا حديقة وقيع الله وجلسنا تحت الشجر عند الكتب المفروشه في الارض حيث يجلس تحت هذه الشجرة مجموعة من الشعراء والادباء علي راسهم المخضرم الاستاذ والاديب مجذوب عيدروس وكاتب الكبيرالاستاذ أحمد الفضل صاحب مجموع من الكتب والكتاباتوالاستذ الشعر محمد محي الدين والكاتب والناقد المسرحي الاستاذ عمر السنوسي وغيرهم من ادباء مدني تحت شجرة المعرفة الت اطلق عليها هذا الاسم الاستاذ المسرحي عبدالله البكر ومن اشهر المسرحين الذين يجلسون تحت هذه الشجرة الاستاذ المسرحي محمد ودالشيخ /والاستاذ عزالدين كوجاك وعثمان كبوش وغيرهم ولنا عوده اخي عوض

عوض صقير

31-03-2007, 09:37 AM

الأخوان
السفير
محمد دفع الله

أشكركم على المرور والوقت الممتع بهذا السوق الكبير

وفى أنتظار عودتكم لنا

عوض صقير

31-03-2007, 09:42 AM

أخونا العزيز
عصام الدين عموش
شرف كبير بأن تكون أول مشاركاتك معنا بالسوق الكبير
وفى الحقيقة سوقنا الكبير فرح بأستقبال مبدع وفنان بقامة أخونا عصام الدين عموش

يللا فى أنتظار أبداعاتك ياعصام

عوض صقير

31-03-2007, 11:08 AM

الأخ صلاح

طبعا أخونا عصام عموش بدردق فينا بى كلامو ده
وطبعا نحن ماحاضرين الزمن ده لكن حجونا بيهو !!!!!!!!!

بدر الدين محمد

09-04-2007, 11:59 PM

ونحن ياعوض العصرية يسوقنا الخال ويطلع بينا لسوق أم سويقو وحيث الترزية البلدية في البرندات والحلاقين أصحابة المرايات المدورة والفوطة البيضاء

سوق امسويقو دا موضوع
عموش
عوض
بعدا ما ننتهي من السوق الكبير عايزنكم تعرجو على امسويقو من طابونة سعد حتى محمد على الاستوبر الحلاق وانا متأكد امسويقو بقعة مهمة في خريطة ودمدني

خالد أحمد الصول

10-04-2007, 02:03 AM

كنت قد فقدت كتاب من أعذ الكتب لدي إستلفه صديقي د. عبد المنعم عبد القادر و غادر بيهو لي الخرطوم فتقادم عليه الزمن و إختشيت أن أسأله منه ... كنت أحتاج أن أضلع عليه مرة أخري و أخري و كل مرة أكتشف فيه شي جديد .. أما الكتاب فإسمه (الزيني بركات) و أما مؤلفه فالاستاذ المصري جمال القيطاني ... مررت بالجماعة الذين يفترشون الكتب في مشارف حديقة سليمان وقيع الله ... و قادتي الصدفة لاحدهم ... فبثثت له همي و قلت له .. عندي عنوان كتاب بحثت عنه كثيرا و أرسلت من يحضره لي من معرض القاهرة للكتاب و لم يتحصل عليه و أرسلت له في سوريا و لم أجده .. قال لي إسموا شنو؟؟؟ الزيني بركات!!! قال لي كتاب الاستاذ جمال القيطاني و الله فإنني معجب به جدا و قرات له كتاب التجليات ... و كتاب كذا و كذا و كذا و هذا الكتاب جميل جدا و أجمل ما عجبني فيه كذا و كذا ... و أنني يد قابلت الاستاذ جمال القيطاني في مصر و تحدثت معه كثيرا في كذا و كذا ... فألقمني حجرا و جعلني أتحثث في ثقافتي وتيقنت أنها لا تشربني مريسة تام زينو ..... هكذا هذه المدينة الحبلي

عوض صقير

10-04-2007, 10:42 AM

الحبيب الغالى صول سودان

السوق الكبير يفتخر بى طلتك وكنا متوقعنا من زمن لكن الظاهر
ناس الجامعة ديل ما بدوك فرصة

وأبشرك بأن لى نسخة من كتاب الزينى بركات ( بالغلاف الأصفر ) للكاتب جمال الغيطانى
وأيضا كتاب التجليات ( بالغلاف الأخضر ) لنفس الكاتب

وسوف أقدمهم لك هدية قريبا ان شاء الله

حضر فول كشك المصلح وعصير الكركدى
مع القهوة والفول المدمس

أبوبكرحامد

15-05-2007, 01:12 AM

إهداء لمدنى : عيناك لى الدنيا .......... وحلاوة اللقيا
ولقيا أهل مدنى لاتخرج عن : المقابر حيث يتنادى اهل المدينة بمجرد سماع خبر وفاة أحد الناس ، وبدار الرياضة حيث تلتقى الحشود لممارسة العديد من الطقوس تأتى مشاهدة المباراة فى آخرها .
أما الملتقى الأكثر إحتشاداً فهو بالسوق الكيبر حيث يمكنك الإلتقاء بأغلب سكان المدينة ، ولأنه يضم بجانب المحلات التجارية مجمع المحاكم والمستشفى وأغلب الوزارات والدواوين الحكومية فى ظاهرة نادرة الحدوث ومتفردة كتفرد مدنى وأهلها الكرام.
كان الوالد عليه رحمة الله يحرص على أداء صلاة الظهر بجامع البوشى ، وخارج المسجد يحرص الوالد على السلام على شاب فى مقتبل العمر يرتدى ثوب أخضر وتكسو محياه العديد من علامات البركة والصلاح " لعل إسمه عوض على ما أذكر " .
كان السوق منظماً وغاية فى النظافة والبهاء ، ولعلنا نذكر محلات سلوى بوتيك لصاحبها العم / طه عوض الكريم الخواض ، تقابلها من الناحية الأخرى للشارع محلات باتا ودكان العم/ صلاح الدين إبراهيم رمضان وإخوانه الأمين وفؤاد وعثمان .
سأعود مجدداً