زوجاتي الثانية والثالثة

[Madanawi]

يا شباب موضوع تعدد الزوجات مطروح للنقاش خصوصا وقد جادلني احد الاصدقاء بان الاصح ان يكون للرجل زوجة واحدة حتى لا يدخل في مسالة العدالة بين الزوجات والابناء وتعدد النسابات والحماوات واواواوا. فقلت له ان الاصل كما ذكر في القرآن التعدد وأن زوجة واحدة هو الاستثناء.

(وانكحوا ما طاب لكم من النساء مثنى وثلاث ورباع فان خفتم الا تعدلوا فواحدة) صدق الله العظيم.

ما هو رأيكم فهل انتم مع رأيي ام مع رأي صديقي القنوع بواحدة.

[نزار حسن محمد]

يامدناوى ..ازيك انا شخصيا مع راى ولا ..واحده ..ياخمسه ولا بلاش

[الفارس البنفسجي]

الرأي في مثل هذه السلوكيات الإجتماعية للدين ... وأعتقد مسألة أنت عاوز تعرس كم واحدة ؟ بتكون حقت الزول براهو. ووجهة نظري في الموضوع انو واحدة بتكفي ولو تزوج الرجل بأخرى فالإحتمال الأكبر أن يكون السبب في ذلك هو المرأة نفسها.

[Madanawi]

الرأي في مثل هذه السلوكيات الإجتماعية للدين ... وأعتقد مسألة أنت عاوز تعرس كم واحدة ؟ بتكون حقت الزول براهو. ووجهة نظري في الموضوع انو واحدة بتكفي ولو تزوج الرجل بأخرى فالإحتمال الأكبر أن يكون السبب في ذلك هو المرأة نفسها.

اخوي البنفسجي ، نحنا بدينا الموضوع بي كلام الدين وهو المرجعية ولا شك في ذلك. بعدين الانسان في قلبو في أذينين وبطينين يعني بيشيل الاربعة بارتياح شديد وكل واحدة منهن لها قلب ذو أذينين وبطينين يعني بشيل الراجل وعاهو النسوان التلاتة برضو بارتياح وكل في موقعه.

[Madanawi]

يامدناوى ..ازيك انا شخصيا مع راى ولا ..واحده ..ياخمسه ولا بلاش

أهليييييين يا ود حسن، والله لكن جبتها سمينة عديييييييييل كدا،،،،،،،،،،،،،،،،،،،،،،،،،،،،،،،،،،،،،،،،،

بلاش دي والله انا ما معاك فيها لانو بصراحة ما بقدر عليها ، لكن خمسة دي بحساب التباديل والتوافيق بتجي براحة وكمان كان دخلنا فيها المتواليات والجبر الخطي ممكن نعمل خلية براحة يا معلم ودمت على المرور الطيب يا ابو النيز.

[عماد عبدالشكور]

فان خفتم الا تعدلوا فواحدة
اخي مدناوي واحدة كفاية جدا في الزمن الصعب دا

[رضا حسن محمد]

مدناوى الجميل
انا معاك انو الدين هو الاصل ، لكن مالى عامل حالة نفسية لاولادى والحاجة الواقفة معاى الف احمر ادبل فيها فى شنو عليك الله ؟
الموضوع جدير بالنقاش يا فنان
سلام

[تسنيم خالد]

مدناوي
ليه اصلا الواحد بتزوج التانية؟ اغلب الاحيان بكون في سبب
يعني القصة ماساي من طرف ولا بكون قاصد انو يعمل الشئ
المحلل ليهو....غالبا بكون ما مرتاح في حياتو مع الاولي
يا اما في خلافات دايمة تزهجو وتطفشو يا اما الزوجة ما بتخلف
حيتزوج تاني عشان الخلفة..او ولا سبب من ديل تبقي مجرد
رغبة عندو انوعايز يتزوج تاني...
لكن لو دة كل اتوفر في واحدة ما اتخيل لي اساسا تاني بتزوج
لانو الحياة بقت ما حمل كدة..والرجال في الزمن دة لو الواحد
لقي زول يشيلوا في الحمل ما بمانع من ضيق الحياة خليهو
يجيب ليهو ماهو هلمة جرة وكم عيال...

اللهم الا من رحم ربي




دمت

[Madanawi]

فان خفتم الا تعدلوا فواحدة
اخي مدناوي واحدة كفاية جدا في الزمن الصعب دا

يا عمدة رأيك دا على راسنا من فوق ، لكن ما ممكن أي حاجة في حياتنا طوالي نربطها بالزمن الصعب لانو المسألة نسبية وفي ناس زمنهم ما صعب بالعكس يادوووووووووووووب رطبوا لا كان ليهم حس ولا خبر واسأل سلفاكير وو الدقير وود الحكير واواواواوا......

[المسافر]

زمان وعندما فرض تعدد الزوجات كانت له دواعي كثيرة
ومنها على سبيل المثال لا الحصر الحروب الكثيرة في ذلك الوقت
التي كانت تهتك بالرجال .
أما حالياً مع بعدنا على ديينا الحنيف والضغوط المعيشية يتحسن
واحدة وأتواجد نص إمراة فكان افضل بكثير

ودمت يا الغالي

تخريمة :
وييينك مشتاقين يا ( برطمان العسل )

[ود المطامير]

واللّة يا حبيبنا فى زوجة بعشرة زوجات
وفى عشرة ما يجبوا زوجة واحدة
فالى عندة الأولى تكفية
واللى عندة من التانيات يدبل طوالى
لحد ما يلقى التمام ,
هو الواحد بعيش كم مرة .
وتسلم على الموضوع الجميل ,

[بورتبيل]

مدناوي كدي انتا عرس واحدة ... وبعدين نتقابل ......
بمعنى انو الواحدة ما بتخليك تعرس تاني لتلاتة حاجات :
1- اما تكون زولة كعبة جداً وما تخليك تفكر في اي حاجة تاني
2- او تكون زولة عسل جداً وتنسيك انك تفكر في غيرها
3- اما تكون واحدة ما فاهمة حاجة ... وتكرهك العرس ... وحاجة اسمها نسوان
اما الرابعة فيه استثناء .... ونادرة ما توجد ... ولكنها موجود في زمن ...فرضى فقط ... ليس هذا الزمن المتساقط وسط متطلبات الحياة ....( الكلام الاخير دا انا بنسحب منو ... لانو بتعارض مع الدين)
واذا شاء الله لك ان يزوجك اثنان وثلاث واربع ... مخير الله في عبادو
ولك التحية

[Madanawi]

زمان وعندما فرض تعدد الزوجات كانت له دواعي كثيرة
ومنها على سبيل المثال لا الحصر الحروب الكثيرة في ذلك الوقت
التي كانت تهتك بالرجال .
أما حالياً مع بعدنا على ديينا الحنيف والضغوط المعيشية يتحسن
واحدة وأتواجد نص إمراة فكان افضل بكثير

ودمت يا الغالي

تخريمة :
وييينك مشتاقين يا ( برطمان العسل )

يا مسافر يا ورد، مشكور على التعليق الظريف دا ، لكن بس عندي ملاحظة

الا تتفق معي ان الحروب الان تقتل من الرجال اكثر من ما كانت تفعله زمان؟

الا تتفق معي ان نسبة العوانس من النساء اصبحت مخيفة بل مقلقة؟

المرأة لا تبحث دوما عن الفكاك من الضغوط المعيشية ولكن لها احتياجات اخرى كالسكون والطمأنينة والحب والمودة والعاطفة واواواواواوا.

[Madanawi]

مدناوى الجميل
انا معاك انو الدين هو الاصل ، لكن مالى عامل حالة نفسية لاولادى والحاجة الواقفة معاى الف احمر ادبل فيها فى شنو عليك الله ؟
الموضوع جدير بالنقاش يا فنان
سلام

ازيك يا ود حسن يا عسل والله ليك وحشة ياخي ، يا خوي نفسية شنو وحالة شنو؟ ما تكبر الموضوع للدرجة دي!!

الحاجة الواقفة الف احمر دي ما عايزه ليها مكافأة يعني واحدة تونسها في البيت اثناء غياب الرجل وتساعدها في ترتيب وتنظيم البيت وهلمجرا. يعني لا ينتقص من سمو الزوجة الاولى وقدرها شيئا.

[Madanawi]

مدناوي
ليه اصلا الواحد بتزوج التانية؟ اغلب الاحيان بكون في سبب
يعني القصة ماساي من طرف ولا بكون قاصد انو يعمل الشئ
المحلل ليهو....غالبا بكون ما مرتاح في حياتو مع الاولي
يا اما في خلافات دايمة تزهجو وتطفشو يا اما الزوجة ما بتخلف
حيتزوج تاني عشان الخلفة..او ولا سبب من ديل تبقي مجرد
رغبة عندو انوعايز يتزوج تاني...
لكن لو دة كل اتوفر في واحدة ما اتخيل لي اساسا تاني بتزوج
لانو الحياة بقت ما حمل كدة..والرجال في الزمن دة لو الواحد
لقي زول يشيلوا في الحمل ما بمانع من ضيق الحياة خليهو
يجيب ليهو ماهو هلمة جرة وكم عيال...

اللهم الا من رحم ربي




دمت

تسنيم مشكورة على المنطق الجميل والكلام البنآء دا.

انا بقول انو ما دايما اسباب الزواج التاني او التالت هي اسباب سلبية، ممكن تكون هنالك اسباب ايجابية كتيرة دون المساس بكبرياء او كرامة الزوجة الاولى ولا تعني الزوجة التانية التخلص من الاولى. فسيد ولد آدم عليه الصلاة والسلام تزوج العديد من امهات المسلمين وكان لكل زيجة هدف نبيل ورسالة محددة.

[Madanawi]

يا ود المطامير

احسن تجيب واحدة بي عشرة ولا عشرة بي واحدة؟؟؟؟

[Madanawi]

يا برتبيل المسألة ما مسألة واحدة عسل ولا واحدة كعبة ولا ولا ولا!!!

الموضوع وما فيهو انك تحظى بعدد من الزوجات تبادلهم ويبادلونك الحب والوفاء والعطاء والمسائل الشخصية ومعاملتكم فيما بينكم جيدة. اما موضوع الدين وما يتعارض معه من قول او فعل فهذا بكل تاكيد مرفوض الا ان الزواج لم ولن يكن يوما مرفوض بل هو خير وقال صلى الله عليه وسلم (تناكحوا تناسلوا فاني مفاخر بكم الامم يوم القيامة) - او كما قال عليه الصلاة والسلام.

[ود المطامير]

يا ود المطامير

احسن تجيب واحدة بي عشرة ولا عشرة بي واحدة؟؟؟؟
ودى هى حالتى هسى وللأبد .
تسلم يا غالى

[نزار حسن محمد]

مقدره ..رجل المره دا حلو حلا...

[مدنيّة]

والله الموضوع دا كبير وبجيك رجعة ليه بروقة كدا

[Madanawi]

والله يا نزار صاحبنا دا سكت الخشامة ، علا في ناساً حالها زين مرة مرتين ، كلها كمها وبارد همها

أوعدنا يا سيدي - مدد مدد مدد

[Madanawi]

يا مدنية الموضوع كبير بالجد وانا في رجاك.

ما تطولي الغيبة

[ود المطامير]

والله الموضوع دا كبير وبجيك رجعة ليه بروقة كدا
عارفك , لما تجى تتاوقى وتمشى
بترجعى ذى العصار
يا مدناوينا خلى بالك مادام قالت ليك بجى راجعة
معناها ماشة تجيب القفة مليانة قنابل .

[Madanawi]

يا ود المطامير كان كلامك دا صح عاد الله يستر ساااااااااااااااااااااااكت

[Madanawi]

الشباب الحلوين كلكم مشكورين على المرور والمشاركة بالردود الجميلة ، بس وروني التومة مدنية دي مشت وين؟؟؟ لابسة طاقية الاخفاء ليها اسبوع وما فاهمين الحاصل شنو؟؟؟؟؟؟؟؟

[مزوني]

العزيز الغالي مدناوي

والله انت عارف انا واحد من الناس بي صراحه حتة تعدد الزوجات لي حسه
ما دايره تقع لي في راسي خير شر ,, ليه !؟.؟.؟! أنا زاتي ما عارف
لأنو بالجد صعب جداً العدل بين الزوجات وغير كده دي جهجها لي الأولاد..
يمكن الحته دي بتختلف من منطقه لي أخرى
يعني مثلا أخوانا العايشين في القرى وناس الحواشات و و و بكونوا محتاجين
لاكبر عدد من الاولاد عشان يساعدوا الاب في شغل المزرعه أو ما شابه,,
والدين أي نعم صرح بي الحته دي ولكن ما قال انو نتشدد بيها
وظروف الناس ما واحد يمكن يكون العيب في المرأه أو أي من الأسباب
لكن طالما انو المرأه قايمه بي حقها على أكمل وجه بي صراحه وجهة نظري المتواضعه
انو ظلم ليها انك تعرس فيها ,, وانت أكيد بتعرف شعور المرأه لما يتزوجوا فيها
والمره دي البين يدك ما أي امراه ,, هي أم عيالك وكاتمة أسرارك وحرمك المصون
وانا بشوف انو الزول أحسن يكرث باقي عمرو في رد الجميل ليها وحدها
عشان هي تغنيك عن التلاته نسوان
وزي ما قال حبيبي ود المطامير في وحده بتكون بي عشره
ولو لقيت زي دي !! احسن تبوس يدك ورا وقدام وتقول الحمدلله :d
ولا رايك شنوووووووووووووووو !؟.؟.؟!

وربنا يديم عليك الصحه والعافيه ويوفقك لما يحب ويرضى
وما فيه من الخير والصواب

معليش للبري الكتير لكن تاني بجيك راجع ههههههههههههه:)
وتقبل فائق احترامي

[Madanawi]

مشكور يا مزوني على المرور.

انا بقول انه الفكرة ليست " ان تتزوج على زوجتك " وانما ان تعدد الزوجات فالفرق كبير وواضح لان فكرة الزواج على المرأة تكون انتقاما اذا كانت هي الدافع للزواج من أخرى ، أما إذا كانت فكرة الزيجة الثانية ايجابية بمعنى انك قد تعطف على ارملة صغيرة في السن مات عنها زوجها في أول سنين شبابها أو انك تتزوج من مطلقة تعلم جيدا انها طلقت نتيجة لظلم وقع عليها من زوجها لانها لا تنجب مثلا وقد يكون انت لك الاولاد من الزوجة الاولى فلست في حوجة لمزيد منهم ، واواواوا والامثلة كثيرة. اذاً مثل هذه الامثلة من سيتزوج منهن ان عزف كل الرجال خصوصا الذين لم يسبق لهم الزواج فهم بالتاكيد يرغبون في الزواج من فتيات لم يسبق وان تزوجن من قبل. ولا ايه رايك؟؟؟؟؟؟؟؟؟؟؟؟؟؟؟

[Madanawi]

والله يا جماعة الخير تومتي مدنية دي قالت لي مشيوير سغير وبجي صادة ولي الليلة ما لاحت في الافق ، كدي ما تشوفوا لينا الحاصل عليها شنو؟

[مدنيّة]

والله يا جماعة الخير تومتي مدنية دي قالت لي مشيوير سغير وبجي صادة ولي الليلة ما لاحت في الافق ، كدي ما تشوفوا لينا الحاصل عليها شنو؟


اسفة جدا والله يامدناوووي علي التاخير بس المشكلة انه موضوعك كبييييييييييير وعايز ليه بال راااااااااايق عشان الواحد يقدر يكتب فيه بصورة كويسة بس انتظري بالكتير بكرة انشاء الله بجيك راجعة
تقبل اسفي مرة اخري

[Madanawi]

اسفة جدا والله يامدناوووي علي التاخير بس المشكلة انه موضوعك كبييييييييييير وعايز ليه بال راااااااااايق عشان الواحد يقدر يكتب فيه بصورة كويسة بس انتظري بالكتير بكرة انشاء الله بجيك راجعة
تقبل اسفي مرة اخري



راجيك يا بت أمي. بس كان قلتي انشاء الله كان ريحتيني واتأكدت انك ماجاية بكرة عشان ما استنى كتير.

[مدنيّة]

اها جيتك يامدناااوي ياخوي
لو ربطنا البوست دا مع البوست بتاع العنوسة وتاثيرها في المجتمع عشان نصل لحقائق معاشة نقول اولا وبعيدن عن الدين وحتة انه الاصل في الزواج التعدد لانه الحتة دي مختلف فيها المالكية بقولوا انه الاصل التعدد لكن الشافعية بيقولوا انه الاصل واحدة عشان كدا نبعد عن حتة الدين ونجي لحتة الواقع المعاش الان
يقال ان نسبة الاناث للذكور في العالم 1-8 يعني دي ماعندها طريقة تتحلا خاااالص الا لو الواحد اتزوج اربعة وفك التسجيلات واتزوج اربعة تاني بس ح تواجهنا مشكلة ارتفاع نسبة الطلاق
لية الفكرة السيئة عن التعدد من عمايل الازواج وعلي فكرة انا وحدة من الناس ابدا مابلوم المراة علي أي حاجة تعملها لانها خلقت من ضلع اعوج والمفروض لو هي كانت زي الضلع اللي اتخلقت منه يقومها الرجل مش يمشي وراءها زي الاعمي والضحية بتكون الزوجة الاولي المسكينة هي واولادها لانها التانية بتكون ملكت الرجل وتربعت علي العرش لا يوجد عدل في ابسط الواجبات واللوم كله علي المراة هي اللي قصرت تجاه زوجها وانها فعلت وعملت عشان كدا هو اتزوج عليها ياخد ليه فترة ويمشي يتزوج واحدة تالتة وتبقي متوالية
انا بعرف امثلة تلقي ليك واحد متزوج اربعة في الزمن الصعب دا لا لشئ الا عشان يقولوا فلان متزوج اربعة لا بيسال عن اولاده لا عن زوجته عائشين ما عائشين ماعنده ادني فكرة كيف ويجوا يغنوا راجل المراة حلو حلا عليكم الله حلاته شنو ؟؟؟ انسان لا يراعي الله سبحانه وتعالي في نفسه ولا في زوجاته ولا في اولاده طب الحلا دي جاية من وين ؟؟
طبعا البنات بيقولوا عايزين واحد كبير عاقل وجاهز ماعايزين يتعبوا مع واحد من البداية والغريبة انه زوجته الاولي بتكون ضاقت معاه الويل لحدي لما بقي واحد ملو هدومه واول كلمة شكر يقدمها ليها زوجة تانية او ضرة تجي تتربع علي تعبها وشقاها
اكيد التعدد كنظرية مافيه عيوب لانه دا كلام من رب العالمين لا نستيطع ان نقول فيه أي كلام ولكن التطبيق هو المشكلة لو الناس عرفت كيف تطبق النظرية دي المشكلة بتكون اتحلت
لو متذكرين مسلسل الحاج متولي اهو دا طبق النظرية صح انا شخصيا ماعندي أي مانع اكون احدي زوجات الحاج متولي الذي عرف كيف يطبق النظرية لكن باي تطبيق اخر للنظرية دي بيناتنا ورقة والسلام
اظن كفاية كدا عشان الكلام بقي كتيييييير وكان لي حق لما قلت ليك موضوعك كبييييييييير وعايز ليه جية بمزاج

[عوض صقير]

والله يا أخوى مدناوى تعدد الزوجات سمح بالحيل لكن إذا توفرت الأسباب لذلك

يعنى مايكون بدون سبب مقنع

وأخونا صول سودان خبير فى شرح الأسباب المذكورة أعلاه

[Madanawi]

يعني يا مدنية راجيك شهر وشرحبيل تقيل ، وغيب وتعال واواواواواواواواوا وفي الاخر تجي تمسكي لي العكاز من النص؟ مرة مع متولي وتطبيقو للنظرية ومرة مع العدالة ودي سيد المرسلين سال الله عز وجل ان يعفيهو منها. انا بشوف انه رايك اجمالا مع رايي طالما ان التطبيق صحيح والهدف ايجابي فلا مانع من التعددية. مشكورة كتير على التحليل الجميل والمداخلات التي تمزج الدين والعقل والمدنية.

[عماد عبدالشكور]

يا عمدة رأيك دا على راسنا من فوق ، لكن ما ممكن أي حاجة في حياتنا طوالي نربطها بالزمن الصعب لانو المسألة نسبية وفي ناس زمنهم ما صعب بالعكس يادوووووووووووووب رطبوا لا كان ليهم حس ولا خبر واسأل سلفاكير وو الدقير وود الحكير واواواواوا......
انشاء الله نرطب نحن كمان ونسويها قول امين

[مدنيّة]

يعني يا مدنية راجيك شهر وشرحبيل تقيل ، وغيب وتعال واواواواواواواواوا وفي الاخر تجي تمسكي لي العكاز من النص؟ مرة مع متولي وتطبيقو للنظرية ومرة مع العدالة ودي سيد المرسلين سال الله عز وجل ان يعفيهو منها. انا بشوف انه رايك اجمالا مع رايي طالما ان التطبيق صحيح والهدف ايجابي فلا مانع من التعددية. مشكورة كتير على التحليل الجميل والمداخلات التي تمزج الدين والعقل والمدنية.


ماهو عشان كدا قلت ليك موضوع كبيييييييييير وماساهل لانه لازم العصاية فيه تتمسك من النص لانه النظرية ما بنقد نقول فيها كلام بس الكلام في كيفية التطبيق عشان كدا جبت ليك مثال الحاج متولي

[Madanawi]

والله يا أخوى مدناوى تعدد الزوجات سمح بالحيل لكن إذا توفرت الأسباب لذلك

يعنى مايكون بدون سبب مقنع

وأخونا صول سودان خبير فى شرح الأسباب المذكورة أعلاه

مشكور يا عوض على رايك الواضح والصريح ونحن في انتظار الصول صاحب الخبرة حتى نسمع منه المفيد. يلا يا خبيرنا الزراعي.

[Madanawi]

انشاء الله نرطب نحن كمان ونسويها قول امين

ولا الضالين يا عمدة.

[Madanawi]

ماهو عشان كدا قلت ليك موضوع كبيييييييييير وماساهل لانه لازم العصاية فيه تتمسك من النص لانه النظرية ما بنقد نقول فيها كلام بس الكلام في كيفية التطبيق عشان كدا جبت ليك مثال الحاج متولي




مثال الحاج متولي دا ما ياهو الوتر الحساس زاتو ، شفتي صاحبنا رطب كيف مع كل عروس جديدة ينفتح باب رزق جديد ودي واحدة من الميزات الاساسية للتعددية التي يبحث عنها اخونا عمدة وآخرون ، وانا بفتكر ان تعدد الزوجات خير مثال لمن اراد ان يجرب الديمقراطية في البيت والواحد ويقارن مع البيت الكبير الا وهو الوطن.

[ابودجانه العباس]

في البدايه الواحد بتستهويه فكرة التعدد لكن بعد ما يخش الميس بيندم علي الوآحدة دي وبيتمني يرجع لحياة العزوبية وبالاخص اذا كانت الواحدة دي (نقناقه تنقنقي)لكن عموما اتنين كويسات.

[Madanawi]

مشكور يا ابو دجانة للرد الذي لا يشوبه نقص من التوازن بمعنى اخر ما عندك مانع كان تنيت العرسة.