المساعد الشخصي الرقمي

مشاهدة النسخة كاملة : ونسة مع عمك تنقو !



عمك تنقو
05-02-2007, 06:49 AM
جلس صديقي ومحدثي امامي وكان قد غادر الي السودان نهائي بعد خدمة 30 سنة غربة انجز فيها وبحمد الله تعليم اولاده وزواج بعضهم والمنزل الوحيد الذي بناهو للاستقرار في السودان ..
كانت زيارته لنا مفاجأة وفي عيد الأضحي المبارك وحكي لي بانه طلع عنده ( رّيالة ) والريالة للذين لا يعرفونها هي اللعاب السائل تقال للرجل العوير ، يعني صاحبنا طلع راجل عوير ...
في عزومة غداء بالسودان عرض عليهو بيع سيارته بمبلغ مضاعف بعد معرفة سعرها الاصلي فسال لعاب صاحبنا وبعد الغدا مباشرة اتجهو نحو احد التجار الكبار المعروفين في امدرمان وطلع معرفة وهاك ياسلام وياراجل انت تجي البلد نهائي وماتكلمنا وسمعنا بيك والكلام ده عيب منك !
الراجل ختها في بطنوا بطيخة بااااااااااااردة - قام التاجر قال ليهو بعد ماشاف العربية الشيك بي اسمك ولا اسم واحد من الجماعة ديل وصاحبنا ما اخده شك وقاليهو باسم الجماعة ديل وركبوا( بو بو) مشوا لي بحري وهناك دخلوا بيت من ثلاثة طوابق وبعد السلام قالو ليهو نحن جاينك في خدمة - تفك لينا الشيك ده - ودي كمان معلومة جديده انا ذاتي عمكم تنقو ده اول مرة اسمعها وفك الشيك يدوك كاش باقل من سعر الشيك وذلك لضمان السيولة وحقك وبالفعل الراجل مسك الشيك وصاح قائلا - اللـــــه -
والله لو جيتوني قبلي ساعة كان لقيتو المبلغ فكيت بيهو شيك تاني !!
المهم رجعوا لتاجر امدرمان وناولوه الشيك وهنا صاحبنا خطف الشيك وقال للتاجر اكتب الشيك ده بي اسمي ! وفعلا كتب الشيك بي اسمهو بتاريخ مقدم بعد شهر واحد بس ؟
الشهر جا والتاني والتالت والادعاء العام والشرطة وفي النهاية اداهو لي واحد لمتابعة القضية وركب الطيارة وجا السلطنة وطول هذه المدة انا مقهي في صاحبي ..
قلت ليهو وبعدين ؟
قال لي بعدين المشكلة يوم استلمت الشيك ده كنت راكب عربية آخر موديل ورجعت البيت بي كرعي والشيك في جيبي ..
قلت ليهو وبعدين ؟
قال لي كنت دارع العمة في ظهري ودخلت البيت ما بشوف قامت أم العيال سألتني :
سجمي العربية وينها ؟
قلت ليها هس ! ولا كلمة قبلي ما اخنقك بالعمة دي !ّ!!

مرتضى ساتى
05-02-2007, 08:35 AM
صراحه من الضحك فتسطت وربنا يبعدنا من الدكسات
والذ حاجه المراه والعمه ربنا يديك العافيه وطولنا من كتاباتك

عمك تنقو
06-02-2007, 05:57 AM
شكرا مرتضي الغالي وهي قصة حقيقية تحكي مدي ما وصل اليه حال السودان في كسب عيشتهم بالغش والكذب والاحتيال والمؤسف اصبحت عادة يراها الناس امام اعينهم كالرقشة والباص وست الكسرة والفرن ،،، يعني واقع معاش !

ود المطامير
06-02-2007, 01:30 PM
و ... عمى كان بصلح المواسير وكلما يسمع ببياره عملوها فى أى قريه يركب حمارو ويمشى يفتش رزقو فيها و الحال مايل معاهو شديد والدنيا زانقاهو زنقة النعيمه للرساله فى القروش الدينتها ليها ومارجعتها , وبقدرة ربنا جا الإمارت فى أوائل السبعينات وكان لما يجى السودان ونحن صغار كنا نقعد نعاين فيهو ذى التقول جايى من القمر , عشان المغترب زمان كان ليهو شنّه ورنّه وقعد فى الغربه لما قال خلاص شبعت ورجع نهائى بعد غربة 25 سنه وشال معاهو حافلتين ودفار والزمن بالحيل دوار ودارت بهو الدنيا وعمى اليوم راكب حمار والخرج مليان مفاتيح وكلما يسمع ببياره عملوها فى أى قريه يركب حمارو ويمشى يفتش رزقو !!

عمك تنقو
10-02-2007, 05:54 AM
مرتضي ساتي وود المطامير شكرا للمشاركة وعايزين تفعيل اكتر والله لو ممكن بحكاوي زمان ياحليلكم .

عمك تنقو
15-03-2007, 07:01 AM
كان هناك برنامج يهمني شديد وكنت احسب له الوقت عند بثه من تلفزيون السودان وكانت المعلومة مغروض فيها شديد دخلت علي بيت ناس عمتي وقت البرنامج وهو الأكثر هدوءا في الاسرة بعيدا من كواريك الشفع .. تابعت البرنامج وكعادة الحياة المفتوحة في السودان دخل علي صديق قديم وعانقته وخرجت معه علي الديوان موصيا عمتي بشدة ان تتابع لي الموضوع وهو قصير في وقته سهل الفهم
ان تشرح لي باقي الكلام عند عودتي ،،،
كانت منتكيه علي صفحتها الشمال وقدامها فنجان قهوة وبتتفرج في في التلفزيون وكانت ثقتي كبيرة في شرح الموضوع لي :
اها ياعمة الحاصل شنو ؟
عمتي : اسكت ساي !
شنو عليك الله كدي كب لي معاك فنجان قهوة
عمتي : بلحيل ياولدي
اها قولي لي ؟
والله ياولدي ممافت الراجل يربرب ويربربيربرب :D
وبعدين ؟
نان هو نضام جنس نضمي !
وعرفت نفسي شربت المقلب !!

سواااح
16-03-2007, 10:39 AM
عمنا تنقو ..

اراك تنثر الجمال والفكاهة
اين ما حللت ..
وانا معاك ولو من علي البعد
مع الوعد ..
ان ابقي بالقرب

دمـــــــــــــــــت ،،

ود حنتوب
21-03-2007, 01:34 AM
يا عمك تنقو

والله ده المخوفنا ذاتو من العودة
كل يوم نقول نرجع نسمع بلاوى الله لا وراك

المهم يا سيدى اخلاقنا - بالذات الجيل القديم - واخلاق الناس حاليا اختلفت تماما
اصبح الخداع يسمى شطارة والثقة تسمى دقسة وهكذا فالمغترب يروح فى شربة موية... والغريبة اقرب الناس ممكن يعملها فيك وبلا اى حرج ....

لكن يا عمك تنقو ممكن سؤال ؟؟؟؟

انت عادل تنقو ؟؟؟

يديك العافية