جماهير ود مدني تغتال الجزيره

[sami_alkaer]

طالعت بوست الليله للاخ امير عبد الباقي بعنوان الاتحاد المحلي يهزم الافيال وانا في اعتقادي انو الاتحاد المحلي ماهزم الجزيره ولا المريخ حتي ، لكن الهزيمه جاءت للاسف من اهل مدني لان الاستاد كلو كان مع المريخ .
وحقيقه انا منذ عام 2000 لم ادخل استاد ودمدني نسبة لظروف العمل خارج مدني ويوم امس اقنعني الاصدقاء ان نذهب لمشاهدة مباراة جزيرة الفيل والمريخ وفعلا مشينا الاستاد والناس حالهم كما يوم عرفه ( زحمه شديده ) وفرحت فرح شديد انو الناس ديل كلهم جايين يشجعوا تيم الجزيره ( تيم مدني )
ولكن في الشوط الثاني تحولت فرحتي لدهشه عندما احرز المريخ الهدف الاول ، ففي تلك اللحظه قام كل الجماهير في الاستاد من اماكنهم بفرح هستيري معبرين عن فرحتهم بالهدف المريخي
ومافي داعي الزول يكمل الحصل شنو ، لكني ذهبت للبيت حزين وماقدرت انوم لاني مالقيت مبرر لللا انتماء الحصل ده . لكن في النهايه تذكرت انو المريخ عنده مشجعين من خارج مدني والكبري كان فاتح يوم امس.

[مرتضى ساتى]

ده كلام عجيب ومضحك لانه شر البليه ما يضحك
ويا حليل مدنى ولما كانت مدنى الاسر الكبيره الكل يعرف الكل
ولكن نقول ده حال الدنيا

[عوض صقير]

ياشباب

مافى أى داعى للزعل
والكل يعرف بأن أى مباراة طرفها
المريخ أو الهلال

فأبناء مدنى لايجدون فرصة لدخول الأستاد

لأن الوافدين من خارج مدنى لحضور المباراة هم الأغلبية العظمى
وطبعا حضروا مخصوص لموازرة الهلال أو المريخ قبل بداية المباراة بساعات

وبالتالى حل هذه المشكلة أن يذهب أبناء مدنى للأستاد قبل حضور الجماعة ديل
يعنى الواحد يشيل معاهو الغداء للأستاد

وتأكدوا إنو مافى واحد من مدنى ممكن يشجع المريخ أو الهلال ضد أندية مدنى

[saleh farah]

طبعا الكلام ده حاصل ليه مده حاصل فى مدنى من ايام سيد الاتيام كان بدوخ القمه ، والناس البتخش المباريات بتاعت هلال مريخ كلها من خارج ودمدنى ,
لكن انا عندى حل تانى غير بتاع عمود الغدا الفى الاستاد رايكم شنو نخليهم اتفرجوا على المباريات فى مدنى واشجعوا القمه ونحن نمشى الخرطوم نشجع اندية مدنى هناك ؟

[همسة شوق]

للاسف فى ناس من مدنى وبيشجعوا هلال مريخ
حتى لما يكونوا لاعبين ضد اندية مدنى
لكن نقولا بى صراحة ياحليل ناس مدنى

[nasir]

اخي سامي اخواني ابناء مدني الاوفياء
ليس هنالك محاربة لتلك الفئة التي نطلق عليها لفظ المنافقين ( الذين يظهرون خلاف مايبطنون)
فقط هم 0( الخوارج -- الخوارج -- الخوارج) 0منذ زمن الرسول صلي الله عليه وسلم
فقط لايمكن ان نجاريهم علينا فقط نحن ان نشجع اللعيبة في التمارين ودفعهم معنويا واعلاميا
ونعرف جميعا ان ابناء مدني يحضرون للاستاد مع صافرة الحكم .
ولكن الدوري الممتاز ليس كل مبارياته هلال مريخ فهنالك فرق اخري وثمن الانتصار فيها ثلاثة نقاط
فلايضير انتصار المريخ علي الفيل ولكن نتدرس اسباب الهزيمة مستقبلا وعدم الخسارة من اي فريق اخر ان كان سلاح التشجيع هو الغالب عند هلاريخ فتلك الفرق لاتملك مشجعين بمدني
وخلاصة القول ارجو ان يقدم الاتحاد المحلي استقالة جماعية فانا احد الذين مارسو كرة القدم واعرف ماذا تعني طول فترة الراحة بعد جهد جهيد لقد ساعد انقطاع التيار في خفض درجة التركيز والحماس وحسب الدلائل والمؤشرات الجزيرة لعبت الشوط الاول بدافع معنويا كبير فكيف تنهزم بثلاثة اهداف في ثلاثة عشر دقيقة بمعدل كل اربعة دقائق هدف لايمكن لفريق ادي شوط اول انتهي بالتعادل
اللهم الهمنا الصبر وولينا خيارنا امرنا

[همسة شوق]

للاسف فى ناس من مدنى وبيشجعوا هلال مريخ
حتى لما يكونوا لاعبين ضد اندية مدنى
لكن نقولا بى صراحة ياحليل ناس مدنى

[مرتضى يوسف العركي]

رفقا اخوتي
مع تقديري لما ذهب اليه البعض منا فليس من الحكمة معالجة هذا الخطأ بخلق قضية تفسح المجال لمن اخطأ من أهل الجزيرة ومدني السمحين الطيبين بالامعان في استمرار هذا النهج فمدني حاضرة الجزيرة ودورها لا يمكن ان يكون مجرد نظرة علياء دون تصحيح المفاهيم من خلال نموذج ودي في جو تشاوري يحترم في الاساس انسانية من لاذ عن الصواب فالجزيرة ليست كلها وافدة لهلال مريخ بل مدني دارها وفيها الكثيرون وفاءا لمدني وانديتها وانديتهم في نفس الوقت سيما وان الزمن الراهن يحتاج للتكتلات الوحدوية والتي لن تشيدها تعليقات عابرة غاضبة بقدر ما تحتاج للتسليم بان الامر جزئية من مشكل عام في الكرة بدءا من ادارتها ومنافساتها واعلامها وقوانينها وامكانيتها والجهل وابراز قيم الانا والكرامة وعدم ترويض الدونية والتبعية واقرار فلسفة للتعامل والتواصل بغية بناء الثقة والتواصل مع الجماهير والقرى والمناطق ..
اهمس لمجالس ادارات أندية الاهلي و الاتحاد و جزيرة الفيل والنيل والبقية لانتهاج روح تصالحيه مع القواعد الحقيقة في مناطق الجزيرة وأنا لا تتردد في التواصل مع فرق القرى ومناطق الجزيرة المختلفة ودعمها من خلال الزيارات والتباري لصالحها والتواصل الثقافي والاجتماعي وأحتضان منتدياتها ودعوة اطفالها وشبابها لزيارة انديتها عبر برامج ثقافية ورياضية واجتماعية وتكريم طلابها ...
ما احوجنا لبناء متين بصرف النظر عن متى يؤتي أكله ... بيد أنه افضل من اطلاق استهجان من برج عاجي
اخوتي في المنتدى ما احوجنا لرؤيتكم وتصحيحكم لهذه الرؤوية فهلا تكرمتم
واكرر اعتذاري ان اخطأت
لكم الود


مرتضى يوسف العركي
ــــــــــــــــــــــــــــــــــــــــــــــــــ ـــــــــــــــــــــــــــــــ
كلمة طيبة كغيث أصاب ارضا طيبة فأنبتت كلأ وعشبا كثيرا

[امير عبدالباقي]

الاخ الحلامابي
لك كل التحايا وانت تطرق لهذه المشكله بمنظور عقلاني اوافقك الرائ فعلا بجب ان تكون هنالك تفاعل بين الانديه الثلاثه والقاعده خارج مدني ثقافيا واجتماعيا ورياضيا ؛
و يكون في رابط بين الجماهير حتي يوعئ المشجع من ابناء الجزيره ؛ المشجع من ابناء الجزيره لما يسمع بهلال مريخ جاين مدني كانو حيشوف برشلونه وكده
عشان كده التواصل مهم جدا

[sami_alkaer]

الشكر اجزله للجميع علي المرور وبقول للجميع انو المسأله اولا واخرا انتماء لاغير،
وانا كنت حاضر المباراة ومن شاهد ليس كمن سمع

[محمد مصطفي]

مشكور سامي علي البوست


لكن يا سامي الكبري ما كان فاتح لكن ناس مدني اصلا بشجعو الهلال والمريخ

وحب الناس مذاهب


ودمت ،،،،،،،،،

[مختار بازى]

هاردلك ياكبتن زى ما تقول ديل جايين مدني لوترررررررررررررررررررررى

[بورتبيل]

انا هلالبي وبعشق الهلال بس .. وكمان بشجع اندية مدني ... الحكاية كورة يا اخوانا ..ز في ناس في البيت الواحد ... تلقاهم واحد هلالبي .. وواحد مريخابي ... واحد اهلاوي وواحد اتحادي ... وناس كتيرة بيكونو عندهم ميول كروية ... كل على هواه
الكورة شي ... وعشق مدني شي تاني