هل تويد الزواج من جنسية اخرى

[شبرقية]

هل تويد الزواج من جنسية اخرى
هل يمكن ان تتزوج بغير سودانية
وانت هل يمكن ان تتزوجي بغير السوداني
املا تويدون . وماهي الاسباب

[مدنيّة]

تبعا انا برة الكلام دا :p بس ح ارد علي حسب فهمي

المانع شنوووو ؟؟ مش الرسول صل الله عليه وسلم قال ( اذا جاءكم من ترضون دينه وخلقه فزوجوه ) !!!

[همسة شوق]

انا الحمدلله برة الموضوع كمان لانى متزوج والحمد لله
لكن انا مابفضل لانو وعلى حسب رأيى صعب جدا تحصل على واحدة غير سودانية تكون متفهمة لى عداتنا وتقاليدنا
وعشان مااظلما واظلم نفسى :
( لالوب بلدنا ولا تمر الناس )

[شبارقة]

بالجد :
بنريد من بلدنا ما بره البلد ....

كمان أقول لهمسة شوق:
عندنا التمر الحمد لله ... وعندنا التفاح .... وعندنا الجكس الصاح ....
وبرضو عندنا اللالوب ... وشقي الحال يقع في النبق!!!
***
لك خالص الود

[ابوزيد محمد نور]

والله يا شبرقية
عاوزو لكن ماشايف لى وحده عندك لى وحده

[الفارس البنفسجي]

أنا لا أؤيد
ولكن
لا أمانع
فلكل قصة لها ظروفها التي تحكمها
فمربط الفرس في أن تكون ممن أوصانا
الرسول (ص) بالزواج منها

[جيفارا]

ممكن من ناحية
إذا لم يكون لها إرتباط قوي بوطنها الأصلي والعكس صحيح .

الزواج من غير سودانية فيه الكثير من المشاكل أحسن الواحد يقصر الطريق ويشوف أهله أو كما قيل ( بلادي وإن جارت علي ......... الخ )

[شبندر]

سودانية بس
سودانية بس

سودانية بس

سودانية بس

سودانية بس

سودانية بس

[ابودجانه العباس]

عشنا كتير وشوفنا كتير

لكن بناتنا مفتريات وبيعات

علاقه زي العسل ( من يظهر المغترب اخونا المسكين الوطني (صناعه محليه) يفكوه عكس الهواء)

قلناها كتير (لالوب بلدنا ولاتمر الناس)(ابسلمبويتي ولا كدكاي زول) وكلو ما نفع

بس الظاهر انو القال( نار مضمونه ولاجنه مجهجه)جرب مغايس بناتنا..

ودمتم..

[شبرقية]

شكرا علي مروركم
للذين رفضوا لماذا الرفض ان كانت تحمل مواصفات الزوجة الصالحة
في القران والسنة حديدت جميع مواصفات الزوجة الصالحة لكن لم يشطرت ان تكون من نفس بلدك فلماذا الرفض????????

[meshanshow]

اذا سودانيه خير و اذا عربيه خير و اذا اجنبيه صعب لكن مافي مانع فيما اختاره الله

[شبرقية]

طب سوال تاني

اذا فرضا انك اتزوجت غير سودانية سواء كانت عربية او اجنبية وين الاجابيات وين السلبيات?

[Madanawi]

يا شبرقية الزواج عموما له اركان وشروط ما ان وجدت فهو شرا زواج صحيح ،

الانسجام والتفاهم يكون اكثر اذا كان الزوجين من جنسية واحدة وبذلك تكون اسباب نجاح هذا الزواج اوفر من زواج الاجانب ،،،

حبية قلبي يا سودانية ...

يا احلى معاني في زول بيعاني......

يا ود ضكران يا بت دغرية .........

**************************************************

تلقانا عربان مو أشو و مولدين ...................................

[زهرة الشمس]

حقيقة الموضوع جميل جداً
في رأيي ان المسألة نسبية
ولو أن الحقيقة اختلفت من رجل الى امرأة
فنرى الكثير من السودانيين كرجال تزوجوا اجنبيات واحضروهم الى السودان واصبحت تلك العربية او الاجنبية اياً كانت جنسيتها قد تأقلمت مع الوضع الجديد كما لو انها كانت في بلادها وفي نفس الوقت نجد ان السودانية ان تزوجها عربي آخر لا تستطيع العيش والتأقلم وقد تحضره هي الى السودان وتأقلمه هو على الوضع وعلى مجتمعها
اذا شخصية الرجل تحتلف عن شخصية المرأة اضافة الى ان السودان دون الدول له وضع خاص جداً من ناحية العادات والتقاليد والتباين الثقافي والتراث والاصول التي يسير عليها ..
هذا لا يعني ان الدول الاخرى لا تمتلك شيئاً مميزاً ولكن يبقى السودان يختلف من كل النواحي
بصفة خاصة جداً جداً وكرأي شخصي لا أؤيد الزواج بجنسية مختلفة مهما كانت هذه الجنسية لأن أغلب التجارب أثبتت أن هناك طرف خاسر جزء من الناحية النفسية


لكي شكري وامتناني

[عماد عبدالشكور]

بنحب من بلدنا ما بره البلد

[جيفارا]

في الحقيقة أنا غيرت رأي في الأول قلت ( سودانية ) لكن لقيت بنات حواء كلهم بعض بعض مافي فرق غير الشكل ويلا بعد ما تتعلم التقاليد السودانية تغلب السودانيات كلهم وقريباً حا أثبت ليكم

[ودالحصاحيصا]

عشان الزواج يكون ناجح فى شروط لأزم الناس تعمل بيها اولأ قبل كل شى التكافؤ فى اى حاجة وفى كل شى 1)الدين 2)الجنس 3)الوضع الأجتماعى4) التعليم ، لأكن لو فى تقارب فى العادات والتقاليد مافى مشكلة

[بت الشبارقه]

والله الكلام ده غلبني وفي الحقيقه الا زول يكون خاض التجربه رغم اني ما ضده الا اني ما بقدر اقول معاه يعني الجمره بتحرق الواطيها لو من البلد او بره البلد لكن بيني وبينك (رجالنا ارجل منهم مااااااااااااااااااااااااافي لا تقولي اجنبي ولا غيرو ونحن كمان سيدات نساء العالم وبلا فخر وبي ده عيشي وكوني "سودانيه حره اصيله زي مهرة ."
دمتي لنا يا ملكة جمال جيلك

[نيازى كشك]

--------------------------------------------------------------------------------

من حيث المبدآ لاآعارض الزواج من آجنبيات , وآفضل آن يتزوج الشاب بنت بلده آفضل , لكن من خلال معاشرتي لكثير من الشباب وخصوصا المتزوجين من آجنبيات رآيت آن الزيجات من الاجنبيات
عن قناعة مستمرين فى حياتهم وسعيدين.....................
والدين الاسلام اباح فى حدود شرائعة ورسم الطريق للرجال
بما يرضى اللة ورسولة وان اللة خلق الناس شعوب وقبائل ليتعارفو ويسعو فى ارض اللة
بما يرضى اللة

[محب]

والله الكلام دا على حسب المعيشه او المجتمع الانت عايش فيهو فاذا انت عايش بره السودان فى بلد اجنبيه والله الكثير بتزوج منهم لكن فى الاخر بحصل (( الطلاق )) فى اكثرهم بس الاقليه بعيشو على المنوال دا ؟؟ ومن اسباب الطلاق بنسبه لهم
1/ عدم التوافق فى العادات والتقاليد ؟؟ ودا من اهم الاسباب ويا للخساره لمن اكون الواحد انجب منها كم ولد وبنت ؟ وهنا سوال بفرض نفسو من الضحيه هنا
الاطفال ام الزواج
والله انا فى راي انو الواحد اتزوج من بلدو كما قال (( لالوب بلدنا ولا تمر غيرنا))
ولا رايكم شنو فى كلامى دا