المديدة حرقتني

[عزيز عيسى]

قبل فترة وعدت الأخوان ودالمأذون وجمال الماحي وابراهيم بكتابة مذكرات عن زمن الجهل وموضوع عن (المديدة حرقتني).. وها أنا اليوم أوفي بوعدي لأعيد ذكريات الماضي الجميل.. أعلم بأن كل منا لديه ذكريات جميلة قد لا تخطر بباله .. ولكن قد يتذكرها بمجرد ذكر حالة مشابهة.. وبما أن لكل حدث قصة أو مناسبة لذلك رأيت أن أتطرق لمثل هذه الذكريات وأفتح الباب لكل من يريد أن يسرد ذكرياته..

من ذكريات الماضي وزمن الجهل.. أذكر في مره من المرات في كنت أسير في الطريق وقت العصرية برفقة إثنين من أصحابي.. كنا متجهين الى الميدان القريب من الحي لكي نلعب كرة قدم.. أحدهم كان يقود دراجه من نوع (العجلات الدبل).. والعجلة الدبل هذه - لمن لا يعرفها - لديها إطارات أكبر من حجم إطارات الدراجة العادية.. وقد كان صاحبنا معجبا بدراجته أيما إعجاب.. لدرجة أنه لايسمح أبدا لأي مخلوق يركب على دراجته أو (يعطيه سحبة) أي لا يسمح بأعارتها لأي شخص.. أو حتى لمسها.. فضل صاحبنا أن يقود دراجته ويسير معنا مشيا علي الأقدام.. من أجل الونسة و(الشمارات)..
الأشخاص المساكين في مثل حالتي كنا نحوم البلد كلها من أولها لأخرها (كداري) مشيا على الأقدام.. ونرجع البيت (كدارينا) أرجلنا غبش من الكتاحة .. وحينما نشتهي ركوب الدراجات كنا نذهب الى محلات (العجلاتي) لنأجر الدراجات علشان (نتفسح) بيها بين الأحياء من السوق الكبير نمر بالقرب من حديقة سليمان وقيع الله ومنها على مباني المديرية ثم حديقة كعكاتي عند النيل الأزرق.. ثم نتجه شرقا ونسير تحت الأشجار الظليلة ونمر بالقرب من نادي ومسرح الجزيرة لغاية دردق وجزيرة الفيل.. ونرجع تاني على السوق الكبير.. ومرات على طريق بانت وجبرونا وأم سويقو وودقيحة ومرات نصل لغاية مدرسة الهوارة ونعدي على حي الدرجة بالقرب من مدرسة السني ومدني الثانوية اولاد ثم مدني الثانوية بنات (لمعاينة الجكس) ومنها الى إشلاق البوليس.. والواحد في الطريق بيكون إلتقى بعدد كبير جدا من الناس وأخذ ليه كم ونسة وضحك مع الأصحاب والمعارف ويرجع البيت مبسوط وفي همة ونشاط..
تؤجر الدراجات بأيام ومدة زمنية محددة ويجب إعادة الدراجة في اليوم والوقت المحدد.. يعني لو تأخرت في إرجاع العجلة تكون مصيبتك كبيرة.. وفي ذلك الزمن إذا تأخر الشخص المؤجر للدراجة عن المواعيد المحددة لإرجاع الدراجة (يبخروه) بالشطة.. وبخور الشطة هذا ما بتمناهو لزول أبدا.. أسألوا عمنا تنقو أو عمر غلام الله وودأبوشوارب وودالصول وودالمأذون وخالد هاشم وودالصادق أو الرشيد أو أي شخص آخر حضر الفترة الجميلة هذه في ودمدني وذلك تأكيدا لكلامي.. والجماعة الذين ذكرتهم لابد أن يكون في واحدين فيهم مروا بهذه اللحظة الحرجة بالبخور بالشطة.. أو بيعرفوا أشخاص عوقيبوا بالبخور بالشطة.. لذلك كان المستأجر حريص دائما بأن يعيد الدراجة في الزمن المحدد وهو قبل الساعة 12 ظهرا تفاديا (لبخور الشطة).. كما أنه (العجلاتي) في ذلك الوقت لديه ثقة تامة بأن الشخص المستأجر سيعيد الدراجة، لذلك لايسأل عن أي أوراق لأثبات الشخصية وربما يكتفي بشخص ضامن لأن الناس كلها تعرف بعضها البعض..

فاصل ونواصل

[ابراهيم]

يا سلام يا عزيز والله ذكرتني ايام المتوسطة .. نحن طبعاً جيل السبعينات عشان تتضح الرؤية ما يجي زول يشوف المتوسطة دي يطلعني دفعة دفعة عمك تنقو وعزيز وود الماذون ويطفش مننا السمك اصلو المنتدي دة لازم تكون حريص في معلوماتك ..


والله مشكور جداً إنك فتحت باب جميل للذكريات ..
اها في المتوسطة انا كان عندي عجلتين واحد 26 صغيرونة كدة حاجة رقيقة ومكشبة دي للقشرات
والتانية 28 رالي دي بتاعة فاولات ومقصات وحوامة بنمرقها ليك من حي المكي وبي زقاقات جزيرة الفيل داخلين على السنيط والمايوهات مايو 40 ونص وطرف وحبيب الله واركويت وتمتد الرحلة الي ان نصل مارنجان ومن هناك راجعين بالسوق الكبير وطبعاً بنكون مجموعة تقريباً نص الفصل والكلام دة بكون يوم الخميس بعد المدرسة نجي البيت للغداء وبعد كدة بنغير ملابس المدرسة ونتمم على العجلة ونربط الطرمبة تمام والزلط جاك زول من الشباب اللي بذكرهم معانا في "الجولة" هكذا كنا نسميها
سامي بشر "اجعل" ويوسف محمد احمد "تنظير" واشرف محمد بحر واسامة محمد احمد "طبق" ومزمل "طبش" وهشام محمود "توتا" ومصطفى حميدة "دنقر" وطبعاً ديل اولاد الحلة في نطاق محطة الجالون فقط .. دة غير القوات الصديقة من المكي فريق تشاد ودردق .. هكذا كان خميسنا في المتوسطة ويا لها من ذكريات جميلة .. طبعاً جولة زي دي وبالعجلات وشي مقصات وزقاقات لا تخلو من الحوادث القفشات والمواقف الطريفة .. سنحكيها فيما بعد .. وطبعاً العجلاتية المجاورين للملجة والهنود بتاعين العجلات كانو المستفيد الاكبر من هذه الجولات عشان الواحد كان بندرش طلبة الاجازة كلها عشان يشتري عجلة...
والله يا عزيز استمتعنا بموضوعك ..والبوست جميل حد الجمال بس ما تعمل cut في حاجات صغيرة صغيرة كدة نظام شمارات دي اهم حاجة وخلى حركات سينما سينما الزمان دي.
منتظرين المواصلة انا عارف قطعت حبل افكارك لكن المديدة حرقتني اعمال شنو
اصلو في حاجتين لما يحرقو الزول ما بقدر يصبر
المديدة والشمار
ابقى عافية

[عزيز عيسى]

يا سلام يا عزيز والله ذكرتني ايام المتوسطة .. نحن طبعاً جيل السبعينات عشان تتضح الرؤية ما يجي زول يشوف المتوسطة دي يطلعني دفعة دفعة عمك تنقو وعزيز وود الماذون ويطفش مننا السمك اصلو المنتدي دة لازم تكون حريص في معلوماتك ..


هههههه.. والله يا ابراهيم بقول ليك سيك سيك مدبس فيك براك جبت الهواء لنفسك..
السمك عرف وبعدا حيجي ماري ويغطس بتحت تحت.




والله مشكور جداً إنك فتحت باب جميل للذكريات ..
اها في المتوسطة انا كان عندي عجلتين واحد 26 صغيرونة كدة حاجة رقيقة ومكشبة دي للقشرات
والتانية 28 رالي دي بتاعة فاولات ومقصات وحوامة

أيام الدراسة كنت ساكن مع خالنا في إشلاق البوليس والوالد إشترى لي عجلة لزوم المواصلات طبعا.. بقيت أداقش بيها البلد كلها.. إشتريت قفل وسلسيون ورقعة وطلمبة منفاخ.. ولو نفس العجل أقعد أرقع تحت أي ضل وأنفخها بالمنفاخ وأركب أداقش من جديد.. حوامة في البلد وفي المساء دخول السينما الخواجة.. كان مسموح لينا بالترفيه أيام الخميس فقط.
لما كنت طالب كان أمنيتي إشتري لي موتر ببي سي زي بتاع المرحوم حيدر قطامة وإستعرض بيه قدام الجكس.. تلقاهو دائما مقرش الموتر بره البرندات في السوق الكبير والناس كلها عارفه الموتر داك حق أبو الأبطال شمسون الجبار.. وبرضو مرات تلقى المواتر الفسبا بتاعة سنطة والحاج الأمين ومحمد عباس (التتر) وبقية لاعبي كرة القدم في أندية الإتحاد والنيل والأهلي وجزيرة الفيل..
مدني كانت صغيرة ولو عندك عجلة أو موتر أو حتى مورس من بتاعات مشروع الجزيرة تقدر تلف البلد كلها بسهولة.. أذكر لما كنت عايش في السعودية إشتريت لأخوي موتر فسبا جديد لنج من الخرطوم السوق الأفرنجي.. عارف بيكم.. ألف جنيه سوداني فقط.



والله يا عزيز استمتعنا بموضوعك ..والبوست جميل حد الجمال بس ما تعمل cut في حاجات صغيرة صغيرة كدة نظام شمارات دي اهم حاجة وخلى حركات سينما سينما الزمان دي.
منتظرين المواصلة انا عارف قطعت حبل افكارك لكن المديدة حرقتني اعمال شنو
اصلو في حاجتين لما يحرقو الزول ما بقدر يصبر
المديدة والشمار
ابقى عافية

ما حأعمل cut شمارات مافي.. بس إنت إنتظر وشوف قصة المديدة دي شنو..

[عزيز عيسى]

أها في أثناء سيرنا كنا نتجاذب أطراف الحديث عن مجريات الأحداث في الحي.. قام صديقي الآخر فجأة وبدون أي مناسبة أو مقدمات بتغيير مجرى الحديث (موضوع الونسة) للتحدث حول دراجة صاحبنا.. قالها بأسلوب زول واثق من نفسه وبطريقة ساخرة : (يا أخوي عجلتك دي مصنوعة في الصين) طبعا دون أي دليل.. أنا قلت في قريرة نفسي (الزول دا مالو الحصل ليه شنو بفتش علي المشاكل؟).. فعلا برهن لي إنه يبتغي من خلف سؤاله ذلك بعض المشاكل.. أي غاوي مشاكل.. وربما لديه ثأر أو (تار) قديم مع صديقنا صاحب الدراجة ويريد أن يخلصه منه.. وأنه وجد الزمان والمكان المناسبين للتداعي وإثارة الموضوع.. ولا يريد الأنتظار ليوم غد..

المهم.. (الكلام دا حرق صاحب العجلة لآنه ما عجبه).... وبعد قليل حصل بينهم الأثنين سوء تفاهم شديد (وتغالطوا) في اسم البلد المصنع للدراجة.. ووصل النقاش حده.. صاحب الدراجة يقول (عجلته) مصنوعة في بلد الإنجليز والأخر أصر علي رأيه وكان يقول بأن الدراجة ليست صناعة انجليزية.. بل أنها مصنوعة في الصين.. وكمان تقليد.. طبعا الصناعات الإنجليزية كانت تمتاز بالجودة والناس تفتخر بإمتلاكها.. (أنا قلت يا ربي الناس ديل ليه عايزين يحرجوني ويجرجروني ويدخلوني في مشكلة معاهم.. ما عندي فيها لا أيد لا كراع؟).. قلت أحسن أصبر شوية والنشوف أخرتها..
كل واحد فيهم ركب راسو.. وما عايزين يدوني فرصة أتدخل علشان أحل المشكلة الدايرة بيناتهم.. استمر الحال علي هذا المنوال.. ووصل بهم الأمر الى طريق مسدود وعدم التوصل الى إقناع أي من الطرفين برأي الطرف الآخر.. (بيني وبينكم كدا أنا ذاتي ما كنت عايز أتدخل لأنو أصلي الشكل ما بريدو.. وبكجنو عديل.. ثم ثانيا ما عندي أي فكرة عن اسم البلد المصنعة للعجلة بتاعة الزول دا.. والوقت داك ولا واحد فينا بيعرف يقرأ أو يرطن تنقليزي كلام الخواجات.. وحتى الكلمات الأنجليزية اللي كنا بنعرفها كانت محدودة جدا).. يس.. نو.. ثانكيو.. هو ديو دو.. وت إز يور نيم.. أي لف يو.. أوكي.. يعني لقطناها من السينما في أفلام الكاوبويات.. وكثر خير السينما العلمتنا الكلمات دي..

أخد لي نفس وأجيكم راجع تاني

[نزار حسن محمد]

ياعزيز اجازى محنك ... يازول دى ماايامنا ... اه انا كنت باجر من اولاد ود ابو رمضان... لكن مابقدر اكمل لك الان اصلوا اخوك شغال غفير ترع فى المنتدى العام وبنخاف المويه تكسر وخاصة ناس جيل الثمانيات الله ادينا خيروم .. كدى بمشى وبجيك برواقه ... يحياتى ياابرهووووته

[okasha]

يا[جدو]!!!!!!!!!!!!!!! يا[عزيز] موضوع العجلات دا مية مية معاى


@@@@@@@@@@@@@@@@@@@@@@@@@@@@@@@
بالمناسبة عندنا عجلة 28 دبل فى البيت كل يوم انا وابوى عاملين شكلة لحدى ما عملنا ليها جدول

ابوى بالنهار وانا بالليل




الله استر شكلنا ماشين لشكلة كبيرة
******************************
وانا مع بتاع العجلة من هسع

[عزيز عيسى]

ياعزيز اجازى محنك ... يازول دى ماايامنا ... اه انا كنت باجر من اولاد ود ابو رمضان... لكن مابقدر اكمل لك الان اصلوا اخوك شغال غفير ترع فى المنتدى العام وبنخاف المويه تكسر وخاصة ناس جيل الثمانيات الله ادينا خيروم .. كدى بمشى وبجيك برواقه ... يحياتى ياابرهووووته

ود حسن أنا عارفك دفعة وبتجينا داخل بالذكريات..
ود أبورمضان دا كان أشهر عجلاتي في مدني..
ومعظم الناس كان بتحب تأجر منه لكثرة العجلات وجودتها..
يا ريت يجي ودالمأذون أو واحد يوثق لينا عن الراجل دا
في بوست وجوه من مدني.. وبرضو عايزين توثيق
لبقية المشاهير في المدينة مثل الترزية وخلافهم..
الله يخدر ضراعكم وتحموا لينا للترعة من كسر الموية..
برضو بوصيكم تجهزوا المنجل والملود
علشان تقطعوا (البودة) من الحواشات في حال ظهروها.
وفي إنتظار عودتك لتتحفنا بالذكريات الجميلة.

[عزيز عيسى]

يا[جدو]!!!!!!!!!!!!!!! يا[عزيز] موضوع العجلات دا مية مية معاى

بالمناسبة عندنا عجلة 28 دبل فى البيت كل يوم انا وابوى عاملين شكلة لحدى ما عملنا ليها جدول

ابوى بالنهار وانا بالليل

الله استر شكلنا ماشين لشكلة كبيرة
******************************
وانا مع بتاع العجلة من هسع

يا عكاشة هو دا إنت اللي بتجي راكب عجلتك وتداقش في الضلمة..
وكل يوم واقع جوه الخور وهدومك مليانة طين..
يا خي ما تشتري ليك (دينمو) وتركب ليك نور علشان ما تقع
في الخيران..
أخير إنت وأبوك عملتوا جدول.. لكن أنا قبل ما يشتروا لي العجلة
كنت بسرق عجلة أخوي الكبير.. والله بتذكرها عجلة جميلة من نوع رالي
ولونها (ظهري).. والميزان من النوع (المكنجل) داك البشبه
عجلات السبق.. والواحد لما يكون سايق عجلة من النوع داك
ذي الكأنه سائق سيارة (لكسس) Lexus
يازول شكرا كثير على المرور

[عزيز عيسى]

الواحد بقى مخرف ينطط من موضوع لموضوع زي الرايحة ليهو صرة.. نرجع لي موضوعنا.. عندما احتد النقاش بين أصحابي الأثنين .. (قلت يا أبوي خسرانة خسرانة) وقررت التدخل لفك النزاع بين الطرفين.. (أقوم إتكلم مع الاول يقوم التاني يتحشر يقاطعنا ويغالطنا.. أصلو ما أدوني فرصة خالص أحل ليهم الموضوع).. في النهاية باتت محاولاتي كلها بالفشل التام لعدم معرفتنا كلنا باللغة الانجليزية في ذلك الوقت.. أخيرا أخذ موضوع الشجار اتجاها آخر وبعدا عمقيا.. وإزدادت التحرشات والمشاددة الكلامية.. ووصل الموضوع الى طريق مسدود.. المهم (ختوا قرض) وفي النهاية إتفق الطرفان المتنازعان علي حل واحد لإنهاء النزاع بينهما وقررا أن يتعاركا.. أو عمل (شكلة).. يعني عايزين يورطوني معاهم.. الله لا كسبهم..
صديقي صاحب الدراجة قال لصديقنا الخصم (يلا نطلع الخلاء).. وطلبوا مني أن أذهب معهم لأكون شاهدا علي المعركة ولأحكم بينهم من الغالب.. ولو قلت ليهم ما عايز أمشي يقوموا يطلعوني خواف ويشيلوا حالي في البلد.. يازول (ختوني في حتة ضيقة وما لقيت لي وسيلة غير إني أوافق على الحل بتاعم دا وأمشي معاهم .. بس ما تقولوا علي زول بتاع شبك.. الناس ديل أصروا على الشكلة وكمان عايزيني إني أمشي معاهم وما تنسوا برضو موقف فيه شكلة زي دا كان يعجب الصبيان كثير).. على كل حال تقاضيت عن مسألة الصداقة التي جمعتنا و غيرت رأيي من أن أضع نفسي موضع رسول سلام بين الطرفين لتفادي العراك.. تظاهرت عليهم بأنني مبسوط من الفكرة وإتوكلت ومشيت معاهم.. صاحب الدراجة ركب دراجته وإتجه ناحية الخلاء وراح منتظرنا هناك لغاية وصولنا لمكان (الدواس).. أنا وخصمه تبعناه ولحقناه مشيا علي الأقدام.. ذهبنا بعيدا الى الخلاء أو ساحة المعركة.. طبعا قبل العراك بدأنا نلتفت يمينا وشمالا للتأكد بأن المكان خال من المارة وبعيد عن الأنظار.. وقبل أن تبدأ المعركة، إقترحت عليهم طريقة كانت تسمى في ذلك الزمان بـ (المديدة حرقتني) كعملية تسخين لبدء العراك.. (المديدة حرقتني) .. هي عبارة عن ملء كف اليد بكوم من التراب وعرضه بين الخصمين المتشاجرين.. والخصم الأسرع يقوم بضرب كف يدي التي عليها التراب في إتجاه الخصم الآخر لتتساقط ذرات الغبار علي ووجهه أو ملابسه.. هذه العملية كفيلة بإشعال نار الحرب بين أي طرفين متخاصمين.

كدي النمشي أخد لي جغمة مديدة وأجيكم صاد

[okasha]

يا زول القاليك منو قاعد اقع فى الخور!!!!!!!!!!!!!!!!!!!!!!!!!!!!!!!!!!!!!

************************************************** ***************
على الطلاق انا احرف واحد فى مدنى يسوق عجلة




طبعا فى الجيل دا

************************************************** ***********
وشنو كل مرة ماشى تشرب!!!!!!!! انت الشكلة دى ح تبدأ متين

[nasir]

والله ياعزيز ربنا يخليك ونحن متابعين واصل
اما عكاشة والله ضحكتني حتي استغرب من معي بالمكتب
وطبعا انا موضوع العجلات والعجلاتي والبخور حكاوي .....
بس نحن في البيت كان الحافز بتاعنا تمشي تجيب القش من السوق الصغير بالعجلة والعقوبة تمشي كداري
نكتة وهي حقيقية للكوتش جلودي ( لاعب و مدرب النيل ولاعب الهلال العاصمي)
مرة كان سائق عجلتو نزل وتكل العجلة لمدة اقل من خمسة دقائق قادم البيت خرج ولم يجدها قال والله الحرامي ده الا اكون رادفو معاي
تسلمو وواصلو

[rasheed]

عزيزنا العزيز عزيزعيسى ،،
والله لا أوصف لك مدى سعادتي بالمخابرة التي وصلتني والتي طافت بي على زكريات الأصدقاء الأوفياء جداً فلم أجد في هذا الجدول غيركم والقليل القليل في هذا الزمن ،، لك الشكر أجزله ولك المحبة والود والشوق للقياك 0 وإن شاء الله ربنا يجمعنا دائماً في المحبة والود الصادق 0
أما عن ذكرياتك وأصحابك - صاحب العجلة الدبل وخصمه - والله صحي الواحد ضحك زي ما قال ناصر من أعماقو وسلييييييييت روحنا على قول أوكاشا - وطبعاً عرفت العلاقة بين الحلفاويين والمحس وناس غرب أفريقيا 00 لأنو أسم أوكاشا لاعب نيجيريا هو نفس الأسم بتاع عكاشة لأهلنا الحلفاويين او المحس ((( تخريمة ))) سلييييييييييت روحنا وبعدين تقول العامل الشكلة إنت كل مرة تاخد نفس ومرة تشرب ليك جقمة مديدة ،، تعرف أصحابك ديل بالنفس الأخدتو ده ومعاه جقمة المديدة كان كسرتهم الأتنين ،، أها غايتو منتظرين نهاية الشكلة دي ،، لكن ذكرتني تعرف أول مرة طلعت الخلاء مع واحد أدواسو مسكني ليك مسكة من محلة كده لمن قعدت أضحك وفرتقت الشكلة على كده - رحمه الله - توفى في حادث حركة أليم 0 والحمد لله كنت خواف وما بحب المشاكل ورغم كده كان عندني بونية خطرية جداً عشان كده كنت بخاف أضرب لي واحد 0 وعشان كده بعد ما الزول ده توفى رحمه الله حمدت الله أنو ما طلعت مع واحد الخلاء ولا كان أولاد الفريق كلهم ماتوا هسع 0 لك الشكر عزيزنا العزيزعزيزعيسى ولازم أرد ليك التلفون ده ،، لكن ما قلت لي أنت ضارب التلفون ده من وين لأنو المفتاح عندي (289+) دي ياتو بلد يا عزيز أنت قاعد في الواق الواق وتقول لينا أمريكا 0 تحياتي للأسرة الكريمة وجميع السودانيين اللي بتلاقيهم 0 وسلام 00 الرشيد عمر