سفري إلى المملكة والمشكلة اللي حصلت بي سبب مدني لدرجة التعهد امام الشرطة

[الفارس البنفسجي]

ما كنت متوقع إني في يوم من الإيام أسافر السعودية ، لكن طبعاً دا رزق ، خلصت إجراءاتي ومشيت سواكن ومن سواكن على الباخرة وتاني يوم فجر كنت في ميناء جدة وسط اندهاشة واستغراب اني ماشي بره السودان الحنين وقلت أكيد حا تحصل حاجة يرجعونا تاني السودان ، لسؤ الحظ الرحلة تمت بنجاح ووصلت جدة.
اتصلت على معارفنا ووصفوا لي البيت وكيف اركب المواصلات.. ركبت ووصلتهم وقعدت معاهم خمستاشر يوم بعد ما علموني اكل الدجاج والكبسة والبروست.
سافرت على منطقتي وهي مدينة نجران بالمنطقة الجنوبية وهي جيران لصق لجمهورية اليمن ، المهم بعد 16 ساعة بالباص وصلت المحطة الرئيسية وكنت متوقع ان أجد مضيفي ولكن للأسف لم أجده ، اتصلت على اصدقائي بجدة فأخبروني أنهم اتصلوا وللأسف لا يوجد أحد (قبل ماتظهر الجوالات) واتصلت على مضيفي ولم اجده ، ووجدت احد معارفهم فسألت عنه فأخبرني ان محمد طلع لصلاة الجمعة ولحد الآن ماجاء. قلت ليهو مافي مشكلة بيتكم وين؟ ، قال ليك على شارع الملك عبد العزيز جوار محطة للبنزين ، (اداني اسمها لكن نسيتو). قلت ليه خلاص انا حا أجي هناك ، سالت ناس موقف العربيات من شارع الملك عبد العزيز ولسؤ حظي أيضاً قالوا لي ياهودا القدامنا دا ، قلت معقولة دي ، انا كدا خلاص وصلت (ولم أكن أعلم أن الشارع طوله 22 كيلو متر وهم ساكنين في نهايتو) وللأسف لا أحمل في جيبي إلا ريالين.
المهم قلت خلاص ما دام هم في نفس الشارع امش كداري لحد ما أصل ، وبالفعل مشيت ومشيت ومشيت وأسال من المحطة ، يقولوا لي ما بنعرفها ، اقول اكيد بلقاها قدام ، لمن الساعة جات 2ونص بالضهر وقفت عربية جنبي ونزلوا منها شباب مدني وهم اصحابي اللي انا ماشي ليهم ، وفوجئت بأنهم لم يكونوا يعرفون بأني قادم إليهم وهذا الذي حصل جاء بالصدفة.اتوقعت انهم بهظروا معاي ، ولحد ما ركبت العربية وماشين فاكرهم بهظروا معاي وإنهم عارفني جاي ، في الآخير اكتشفت اني كنت غلطان وهم فعلاً ما عارفني جاي ،قلت ليهم طيب يا شباب انتو هسه ماشين وين؟ قالوا لي اليوم عندنا اجتماع نحن اولاد مدني في غابة (حاجة كدا زي ام بارونة لكن محسنة) عشان نؤسس رابطة مدني بمدينة نجران. وما تنسوا لحد الآن شنطتي معاي في العربية، مشيت طبعاً معاهم وانا مستغرب ، لمن وصلت الغابة ألقى ليك امة لا إله إلا الله كلللللللها موجودة وعلى رأسهم القائد الأممي لمغتربي مدني الأستاذ العملاق حمد النيل حسين وعبد العزيز البربري وعماد ابوتمانية وياسر ود النعمة ومحمد عمر ... الخ كل ناس مدني رجال ونسوان وشفع وصغير وكبير .......... ياااااااااااااااااااااااه ، قلت دي احلى حاجة ، معقولة دي الناس بتلاقوا كدا ، والله حاجة تمام.كنا حوالي 60اسرة والشباب في الحدود دي برضو.وفجأة لقينا 16 عربية من عربيات المباحث محاوطانا من كل اتجاه زي معسكر الإرهابين.والناس داخلة وطالعة وكلام كتييير وانا مافاهم حاجة.
بعد فترة وضحت الرؤية وعرفت من الشباب ان ديل ناس شرطة المباحث قالوا لينا ما نقعد هنا وممنوع حاجة اسمها تجمع او رابطة، وهم عارفين سبب جيتنا دي.
طبعاً الناس كلها مستغربة !!!!!!!!!!!!!!!!!!!!!!!!!!! وقالوا لازم كلنا نمشي مركز المباحث الجنائية عشان نكتب إقرار على أنفسنا انو تاني ما نعمل حاجة زي كدا، الناس كلها استغربت وبعد حب وتحانيس وافق الضابط المسئول ياخد عشرة يمثلون الجميع ، قال خلاص يلا نمشي، قلنا ليه طيب خلينا نتعدى ونمشي ، وبعد معاناة وعشان خاطر النسوان والاطفال اللي معانا وافق وقال خلاص بعد الغداء الكل يذهب إلى منزله والعشرة يمشوا معانا المركز (بالمناسبة انا وجماعتي كنا من ضمن العشرة) اتغدينا ومشينا وللأسف كتبنا الإقرار انو ما نعمل تجمعات او عمل روابط أو تنظيمات حتى لو كان عمل خيري لانو الحاجات دي ممنوعة في مدينة نجران بالتحديد ،خوفاٌ على المنطقة المضطربة من ثقافة التجمعات والتكتلات الوافدة وخاصة السودانية منها.
ولحد الآن بنعاني من عدم وجود رابطة وبنعتمد على الأخبار من علاقتنا مع بعض نحن أولاد مدني داخل مدينة نجران.
وهكذا انتهت حكايتي يا شباب مع مدني.

[شبرقية]

اولا شدني سردك للقصة
ثانيا الله يكون في عونكم والمكم علي اهلكم سالمين
ثالثا الله يكفيك شر الخوازيق !

[امير عبدالباقي]

الفارس البنفسجي
لك كل التحايا
فعلا قصه غريبه وارجو منك ان تقترح لهم اجتماع في احد المنازل حتي تكتمل الرابطه وماشرط تتلم الاسر كلها نساء واطفال بس الرجال فقط وبكده مافي زول بشعر بيكم ؛ واذا شعرو او سمعو بيكم ناس المباحث قولو ليهو عندنا مناسبه (عرس ؛ سمايه اي حاجه ) لازم تتمو الرابطه لانو جد مهمه

[الفارس البنفسجي]

اولا شدني سردك للقصة
ثانيا الله يكون في عونكم والمكم علي اهلكم سالمين
ثالثا الله يكفيك شر الخوازيق !

تسلمي لينا يا شبرقية
كلامك اداني احساسي الاخت اللي بتخاف
علي اخوها
ونحن فعلاً اخوان

تسلم لي كتييييييييييير على المشاعر دي

[خالد السوداني]

تحياتى العطرة .لابد من قيام الرابطة باى شكل من الاشكال حتى لو دعت الضرورة لقيام احد الاشخاص بطباعة مسودة توزيعها علي الناس ليقومو بالتوقيع عليها بالموافقة وبالنفس الطريقة يمكن تكوين لجنة تنفيذية تتولي شئون ابناء المنطقة لان هذا عمل خير وعمل الخير دائماً متموم وربنا يوفق الجميع ويلم الشمل في الافراح ولك مني كل الاحترام واتنمي ان ترجع سالم غانم

[magdi]

مشكور يالفارس بس كان ممكن تتعمل الرابطة وبطريقة أحس من التجمع لأنو زى ما عارفين التجمعات ولمة الناس هنا ممنوعة ( ياحليل بلدنا ) لا قعده تحت العامود لا جرت كرسي قدام الباب .. ربنا يدي العافية وبس .... أهــ
بس نحن هنا في الرياض عاملين رابطة ودار وبنمارس نشاطنا كويس
وحسب سردكم أنتم مجموعة كبيرة جداً وانا بستغرب معقول ناس مدني كتار كده في نجران ؟؟؟؟
المهم شوفو ليكم حل ... وربنا يوفقكم

[عماد عبدالشكور]

اخونا وحبيبنا الفارس
ممكن الاجتماعات تتم في بيت من البيوت وما لازم تكون تجمعات واضحة نسبة لظروف البلد الانتو فيه
وربنا يكون فو عونكم

[الفارس البنفسجي]

الفارس البنفسجي
لك كل التحايا
فعلا قصه غريبه وارجو منك ان تقترح لهم اجتماع في احد المنازل حتي تكتمل الرابطه وماشرط تتلم الاسر كلها نساء واطفال بس الرجال فقط وبكده مافي زول بشعر بيكم ؛ واذا شعرو او سمعو بيكم ناس المباحث قولو ليهو عندنا مناسبه (عرس ؛ سمايه اي حاجه ) لازم تتمو الرابطه لانو جد مهمه


أيها الرائع دوماً ، تشكر على الإحساس والتواصل ، القصة طبعاً غريبة لكنها بقت واقع ولمن نتذكرها بنضحك مرات ...... امكن صغر المدينة ساعدنا كتير في أننا نتواصل وفكرتك جيدة جدة ربنا يساعدنا على تحقيقها

شكراً ليك كتيييييييييييييير الغالي امير عبد الباقي

[الفارس البنفسجي]

تحياتى العطرة .لابد من قيام الرابطة باى شكل من الاشكال حتى لو دعت الضرورة لقيام احد الاشخاص بطباعة مسودة توزيعها علي الناس ليقومو بالتوقيع عليها بالموافقة وبالنفس الطريقة يمكن تكوين لجنة تنفيذية تتولي شئون ابناء المنطقة لان هذا عمل خير وعمل الخير دائماً متموم وربنا يوفق الجميع ويلم الشمل في الافراح ولك مني كل الاحترام واتنمي ان ترجع سالم غانم



الغالي خالد
كلام صحي وربنا يسوي الفيه الخير ، بالمناسبة يا خالد بتشبه لي ناس معانا هنا في نجران من ناس دردق ، يا ترى شكي في محلو ولا يخلق من الشبه اربعين.


متشكرين ثم متشكرين وتسلم كتييييييييير على الإهتمام

[الفارس البنفسجي]

متشكرين جداً يا مجدي ويا عمدة على المرور
ويا مجدي كلامك لذييييذ زكرنا حاجات حلوة ،ما عارف عمدة دا بره ولو جوة عشان يحس معانا بالحاجات دي ؟
واضيف ليك يا سادة انو مدينة نجران مدينة شيعية بنسبة 90% ، ودا سبب بخليها تحت المنظار من قبل الدولة وممنوع ثقافة التجمع والتنظيم ، يعني بخافوا انو الحاجات دي تتأصل عند أهل المنطقة.

متشكر ليكم مرة تانية اخ مجدي وعمدة وتسلموا على مرور واحساسك الرائع

[okasha]

خليها السعودية البقطعو ليها البحر



والله نحنا فى جامعة الخرطوم بعد تلتلا كونا رابطة مدنى


وبعد دا الشغل كلو وقع فى راسى انا والصديق العزيز ساجد نور الدين

عشان كدا ما المهم تكوين الرابطة المهم الناس تواصل بعد التكوين



وهذه ضريبة مدنى



ودمت يا فارسنا المميز


لك

[الفارس البنفسجي]

متشكرين يا عكاشة على المرور وعلى التواصل
وزي ما قلت أنت اهم حاجة التواصل لانو هو غاية
التكوين.

وسلمت من كل شر

[مختار بازى]

اللة يكون في عونك وانتة محظوظ اول ما وصلتة لقيت ناس البلد بس انا حتي اللحظة ما لامي في زول من مدني وتسلم لينا

[الفارس البنفسجي]

اللة يكون في عونك وانتة محظوظ اول ما وصلتة لقيت ناس البلد بس انا حتي اللحظة ما لامي في زول من مدني وتسلم لينا


تسلم يا مختار على المرور وعلى الإحساس

بالمناسبة انت وين لو في السعودية هنا ادينا عنوانك امكن نعرف ناس قريبين منكم ؟

مع تحياتي وتقديري لك

[كاوندا]

بطلو اللمه سامعين الكلام ده كويس وإلتزموا بقوانين البلد الإنتو فيها.

[الفارس البنفسجي]

بطلو اللمه سامعين الكلام ده كويس وإلتزموا بقوانين البلد الإنتو فيها.

حاضر يا كاوندا
توبة يا حبوبة

[عوض صقير]

أخونا الفارس البنفسجى

موقف عصيب
ولكن كان ختامه مسك مع أبناء مدنى الحلوين


وبالمناسبة أرجوا تبليغ تحياتى الخاصة

لأخونا عبدالعزيز البربرى
وأخونا ياسر ود النعمة
وبقية الأخوان

ونقدم لكم الدعوة لزيارتنا بالرياض

[الفارس البنفسجي]

تسلم يا اخ عوض على المرور
بالنسبة لي عبد العزيز هو جاري
وسأبلغه تحياتك ان شاء الله
اما ياسر ود النعمة فقد سافر
نهائياً إلى السودان على حد
علمي .
ولك ايضاً انت التحية والتقدير

[السلامى]

ليس الفشل أنك تفشل ولكنه أن تقف فى المكان الذى فشلت فيه
أتمنى لكم التوفيق وأنشاء الله أجتماعكم لتكوين الرابطه تعملوه فى حافله ماشه فى الظلط المهم ما تيأسوا

[بورتبيل]

كان الله في عونكم يا بنفسج ... وربنا يديم عليكم .. التجمع في الخواطر .. وفي البال.. وبعدين نجران دي .. شكلها مدينة ( خارج التغطية).
مع الاعتذار لكم .. على ان تكونوا رابطة ... بس الكل يعلم ما يكنه السودانيين لبعض في الغربة

[الزبير محمد عبدالفضيل]

الحمدالله علي سلامتكم وخلو الاجتماعات تكون في البيوت حتي لاتكون هناك مشاكل وانتم في الغربه

[الفارس البنفسجي]

تسلم يا سفير على التواصل

لا عدمناك

ومعاً لنزيد من أشراق المدينة في الدواخل
وحتى على جنبات الأرصفة

[مرتضى يوسف العركي]

عزيزي الراقي ضياء :
على فكرة انت غلطان في المعالجة ..؟؟؟
كان قلت ليهم انا الفارس البنفسجي ومن مدني كان كتبوا ليك تعهد هم انو ما مايقربوا عليكم اطلاقا كدي جرب هذه الوصية ومعزورين الما بعرفوك بجهلوك لانك زائد في سموك وباهي في علوك لو كنت في السعودية
ولا في السماء التي استعصمت بالبعد عن بيت ادريس جماع في حلفاية الملوك ...

ــــــــــــــــــــــــــــــــــــــــــــــــــ ـــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا

[الشوربجي]

الاخ الفارس البنفسجي //تحية طيبة
اذا علي مااعتقد نحن جيران اذا انا في نجران اذا انا لي الحق في ان اكون واحدا من هذه الرابطه المجهجه والله بيني بينك كدي البلد دي الا كان تربط راسك لاكين حكاية روابط دي السماء قريب وذاتو ربط الراس الا تسوليك قتره او عقال ممكن في الحاله دي تسمي رابطه ؟
مع خالص احترامي وتقديري
الشوربجي

[الفارس البنفسجي]

ليس الفشل أنك تفشل ولكنه أن تقف فى المكان الذى فشلت فيه
أتمنى لكم التوفيق وأنشاء الله أجتماعكم لتكوين الرابطه تعملوه فى حافله ماشه فى الظلط المهم ما تيأسوا



تسلم يا سلامي
ووصيتك في العين والخاطر
وكلامك في محلو ، فالجميع
يسقطون ولكن العبرة في الذين
ينهضون ثانية.

دمت نبضاً للتفاؤل

[الفارس البنفسجي]

كان الله في عونكم يا بنفسج ... وربنا يديم عليكم .. التجمع في الخواطر .. وفي البال.. وبعدين نجران دي .. شكلها مدينة ( خارج التغطية).
مع الاعتذار لكم .. على ان تكونوا رابطة ... بس الكل يعلم ما يكنه السودانيين لبعض في الغربة



الأخ بورتبيل

ربنا يتقبل منك، فنحن في حاجة
لمثل هذا الدعاء .
أما نجران دي ...فلم أسمع بها
إلا عندما وصلتها، فوجدتها مدينة
ثرية بالتاريخ.فيوجد بها الأخدود العظيم
والطرق التي عبر بها أبرهة بجيوشه
إلى مكة وبها آل كليب المشهورين
في قصة الزير سالم.

سلمت على المرور

[الفارس البنفسجي]

الاخ الفارس البنفسجي //تحية طيبة
اذا علي مااعتقد نحن جيران اذا انا في نجران اذا انا لي الحق في ان اكون واحدا من هذه الرابطه المجهجه والله بيني بينك كدي البلد دي الا كان تربط راسك لاكين حكاية روابط دي السماء قريب وذاتو ربط الراس الا تسوليك قتره او عقال ممكن في الحاله دي تسمي رابطه ؟
مع خالص احترامي وتقديري
الشوربجي


تسلم يا غالي على المرور

وكلام في سرك
أنت عارف وانا عارف
والما عارف الله معاهو.

[الفارس البنفسجي]

عزيزي الراقي ضياء :
على فكرة انت غلطان في المعالجة ..؟؟؟
كان قلت ليهم انا الفارس البنفسجي ومن مدني كان كتبوا ليك تعهد هم انو ما مايقربوا عليكم اطلاقا كدي جرب هذه الوصية ومعزورين الما بعرفوك بجهلوك لانك زائد في سموك وباهي في علوك لو كنت في السعودية
ولا في السماء التي استعصمت بالبعد عن بيت ادريس جماع في حلفاية الملوك ...

ــــــــــــــــــــــــــــــــــــــــــــــــــ ـــــــــــــــــــــــــ
كلمة طيبة كغيث أصاب أرضا طيبة فأنبتت كلأ وعشبا كثيرا


بقولوا البعيد من العين بعيد من القلب

لكن يبدو ان هذه المقولة يجانبها الخطأ
فالقريب من الخاطر قريب من القلب
والإذن تعشق قبل الإذن أحياناً

مدني فرضت علينا شخوصاً
وشخوصها فرضوا علينا حبهم
فأكتوينا بهذا الحب.

وانت عارف ، الزرة دي لو كانت هسه
كان موضوع الفارس البنفسجي دا خارجنا
لكن الزرة دي جات قبل ما اخش المنتدى.

بس نسيت أقول ليهم أني بعرفك قبل ما أشوفك

[خالد أحمد الصول]

ما أحلي أخي البنفسج اللحظه الاولي و ما أحلي الانطباع الاول و الاحلي ذلك التسجيل الرائع له منك ... أذكر ما أذكر زميلي أبراهيم كان في كورس قصير في هولندا في أوائل التسعينيات فكتب لي مبسوطا .. أنو في المرقص رقص ليك بريك دانس علي أصولوا خلي ليك الهولنديين ديل القاعد يشرب بطل الشراب و القاعد وقف و الواقف مدة رقبتوا زي الجمل و كل الناس القاعدة ترقص وقفت تتفرج علي العبد لله .. و بعد شهر أرسل لي رساله قال لي أنا لسه خجلان ... تراهو يوم داك في المرقص كل الهولنديين كانوا مندهشين من القرد الافريقي المتخلف القاعد يرقص في موضة البريك دانس الانتهت ليها سنين

[نزار الكاشف]

الفارس البنفسجي
نحن بس الطيبين والداير يتلما يتلما والداير اقعد اقعد
عليك الله البخوفهم من شوية شفع ونسوان شنو
الحكاية ذكرتني بمشهد امراة عجوز في احد الافلام ومعه طفل عمرة 8 سنوات وفي احد نقاط الدخول الي سويسرا طلبمنها العسكري اوراق الهوية للدخول فاعطته اياها
ثم طلباوراق الطفل ففلم تكن معه واصر علي عدم ادخالهم
فقالت له العجوز دعه يدخل فهو فقط يريد ان يغير نظام الحكم ويحكم البلد
فضحك العسكري وسمح لهم بالدخول وهو يقول لا تنسي ان تزود رواتبنا
فهذا الذي حدث معكم بالظبط
ودمت لنا فراسا

[الفارس البنفسجي]

الرائع دوماً وأبداً صول سودان
المرهف نزار الكاشف

شكراً على مروركم ولاعدمناك
ودام التواصل نهجاً للمارسة اليومية

[m_aminhasan]

{اما ياسر ود النعمة فقد سافر
نهائياً إلى السودان على حد
علمي }
لقد تم جمع مبالغ من أبناء مدينة ودمدني والقري المجاورة لها كذلك للرابطة الوليدة ولكن بعد الحادثة المشئومة اختفت المبالغ التي تم جمعها واختفي كذكل ياسر ودالنعمة فهل يرد علينا في هذا الصرح الشامخ ما علاقته بتلك الأحداث الدرامية مع العلم بأن هناك روابط كبيرة في نجران لم يحدث لها ما حدث لرابطة مدني كالجالية السودانية في نجران وغيرها ........

[احمدمحمدعلي]

الفراس سلام علييك
انا طبعا مش مستغرب الموضوع لاني عايش
في السعوديه وشايف كل شي بي
عييني
ولكن الظاهر انتو اشتقتوا لي ضل الضحويه
وقعدة الجبنه ولمت ميدان الكوره العصريه
والنادي ورحلات ام بارونه ........................
عندما تخرجون من مدني والجزيره وكل السودان
انسوا انكم مدنيين واعتبروا انفسكم مع اخونا سامي الحاج
ربنا يفك اسره@@@@@@@@@@@@@@@

[الفارس البنفسجي]

الأخـــــــــــــــــــــوة

m_aminhasan

احمدمحمدعلي

شكراً على مروركم الكريم

[114]

استقبال (حاشد) يا الفارس البنفسجي!!

طبعاً أداك (الإنطباع الأولي First impression) سلبي جداً.. وتلقاك لسه بينقبض صدرك كلما اتذكرت اليوم الأول في بلاد الغربة..

واتذكر طرفة حصلت لمجموعة من السودانيين اتلموا في فطور رمضان قدام بيت واحد منهم وقعدوا يفطروا جماعة مع بعض (قايلين نفسهم في 114 واللا دردق)، وفجأة تقيف الدوريه فوقهم،
- قاعدين هنا مالكم؟
اول شئ ردوا عليهم قالوا ليهم انزلو افطرو بالأول، حتى بعدين شرحوا ليهم عادات السودانيين في الفطور بره، وتبرير ذلك وما الى ذلك..
الجماعة ديل عندهم حساسية ضد اي اتنين او ثلاثة يقيفوا مع بعض، لكن في جدة مستوعبين عادات السودانيين، عشان كده ما قاعدين يدققوا معاهم كتير..

[الفارس البنفسجي]

استقبال (حاشد) يا الفارس البنفسجي!!

طبعاً أداك (الإنطباع الأولي First impression) سلبي جداً.. وتلقاك لسه بينقبض صدرك كلما اتذكرت اليوم الأول في بلاد الغربة..

واتذكر طرفة حصلت لمجموعة من السودانيين اتلموا في فطور رمضان قدام بيت واحد منهم وقعدوا يفطروا جماعة مع بعض (قايلين نفسهم في 114 واللا دردق)، وفجأة تقيف الدوريه فوقهم،
- قاعدين هنا مالكم؟
اول شئ ردوا عليهم قالوا ليهم انزلو افطرو بالأول، حتى بعدين شرحوا ليهم عادات السودانيين في الفطور بره، وتبرير ذلك وما الى ذلك..
الجماعة ديل عندهم حساسية ضد اي اتنين او ثلاثة يقيفوا مع بعض، لكن في جدة مستوعبين عادات السودانيين، عشان كده ما قاعدين يدققوا معاهم كتير..

[="


والله كلامك صح يا أستاذ عمر ، وهسه ومرات كتيرة لمن تكون طالعين طلعات أسرية باخد لي سرحة شوية وبقول مرات أمكن الجماعة ديل يجي هسه .
ههههههههههههههههههه
هههههههههههههههههه

تسلم على هذا المرور الرائع