يوميات زول ثقيل [الأرشيف]

مازن الجمّال

07-03-2007, 07:33 AM

صحيت من النوم ولقيت نفسي عاوز أجرب ابقى زول ثقيل وسمج ودمي تقيل
وانا طالع من البيت لاقاني ود جيرانّا وقال لي :
- مازن ازيك ..
- أهلا ( من طرف النخرة ) ومعاها
- داير شنو ..
واتقدمت شوية ولاقتني فلانة جارتنا الشمشارة
- هي ازيك يا مازن امك شديدة!! ..
- امشي شوفيها براك ..
- كدي بسم الله ات مالك الليلة
- مالي في جيبي يا حجة .. اتي هسة دايرة شنو ..
- بري ما دايرة منك حاجة يا ولدي ..
- خلاس شتتي
واصلت طريقي وجيت لعمر بتاع الدكان ..
- جيب سجارة
- مافي السلام عليكم ؟؟
- ات عاوز تصاحبني ولا شنو ؟؟
- يا خوي مالك الليلة .. ( ويضحك ) بتهظر مش ..
- والمناسبة شنو عشان اهظر معاك .. وهسة عندك سجاير ولا اشوف غيرك ؟؟
- في هاك .. والله المستعان ..
شلت السجارة واثناء ما بولع فيها جاني واحد ووقف قدامي وفتح معاي موضوع بظرافة :
- يا ابو الشباب لو تكرمت ممكن ولعة ؟؟
- ولعة ..!! ليي مشاركني فيها .. هودا الدكان قدامك امشي اشتري
ويتحرك بخلعة ويطنطن ( الناس دي جنت ولا شنو )
وانا واقف بدخن جمب الدكان جات فلانة بت الحلة ( جكسويتي ) ملفحة بي توب امها القديم وشكلها كانت عن ناس فلانة وانا عامل فيها عوير وما شايف ..
- امبارح بتصل عليك وليي ما بترد
- ما حصل
تضحك ..
- بطل حركات
- حركات شنو .. شايفاني قرد بنطط ؟؟
- مازن بطل بياخة معاي .. بالجد امبارح ليي ما رديت علي
- ما عاوز ارد .. ولا رجالة الشغلة ؟؟
- مازن .. ما تهظر معاي هظار بايخ .. كنت محتاجة اتكلم معاك
- انا ما محتاج
- مازن ات مالك الليلة
- اتي المالك ودايرة شنو هسة ( مع نهرة ) أأأآآآآآآآآآآآآآ ؟؟
- انا ماشة
- قطر عجيب
عمر بتاع الدكان مرة تانية من وراي
- يا زول ات مالك الليلة
نظرة من تحت لي فوق وبدون رد ومشيت .. وفي الطريق قابلت حاتم الجزار واتزكرت انه عاوز مني قروش .. ولكن انا عند قراري وما حا اتنازل .. وانا ماش وهو جاي عكس دنقرت في الواطة وعملت فيها ما شايف ..
- مازن ات قروشي وينا ؟؟
وانا مواصل مشي .. ولما كرر اسمي كذا مرة قرر انه يلحقني ويلكزني من كتفي ..
- ات يا زول انا ما بتكلم معاك
- منو !! انا ؟؟
- لا انا
- داير شنو
- داير قروشي
- ياتو قروش
- آآيي اتوا ساهلة عندكم جيب وصعبة عندكم هاك .. مش على بالطلاق تاني لو تعوعي ما أدينك
- ات بتتكلم عن شنو
- قروشي
- انا ما شلت منك قروش
وبحكم جزوريته وعتواته وضيق اخلاقه يمسكني طوالي من لياقتي مع شد القميص
- ات قايلني زي ناس عمر عاوز تاكلني حنك .. والله انا باكلك بسنوني
تحت الضغط الكبير والتنشن الحصل اضطريت اتراجع من قراراتي
- حاتم كدي هدي .. انا بهظر معاك ياخ .. قول بسم الله
فك اللياقة ..
- عندك لحدي نهاية الشهر ده يا إمة تديني حقي ولا انا بخلصوا بطريقتي ..
- ابشر يا حتوم ياخ
ويمشي .. واتلفت اشوف مافي زول شافني وواصل في طريقي..
يتبع ..

امير عبدالباقي

07-03-2007, 07:48 AM

ودالجمال شنو الغيبه دي يازول مشتاقين والله
لكن ماقلت لي عامل فيها تقيل ( قالو نوبه ) ماكان نواصل عشان تشوف نجوم الضهر
كدي عليك الله واصل النشوف اخره شنو

مازن الجمّال

07-03-2007, 07:54 AM

ميرة يا ميرة

والله الشوق معبا في اللواري
والجري كتير لكن بحاول اتواصل في الفترة الجاية انشاالله يا امير الحسن

خليك قريب يا امير لانه ممكن تدخل فيها سكاكين وكده

ابودجانه العباس

07-03-2007, 07:55 AM

صحيت من النوم ولقيت نفسي عاوز أجرب ابقى زول ثقيل وسمج ودمي تقيل

أخوي مازن قالو التقل صنعه

كدي جرب طريقه أخونا الشال

ليه كيسين بتاعات أسمنت في راسو

لما سالو قال عاوز أبقي تقيل..

طريقه ساهله وبسيطه..

ودمت أخونا مازن..

مازن الجمّال

07-03-2007, 07:59 AM

ابودجانة ود العباس
ازيك وكيفنك

وكان بقدر اشيل شوالين اسمنت في راسي
كان وقفت قصاد خدوري في مركز الشباب

تخريمة :
الثقالة ساهلة يا ابو دجانة
الصعبة خفة الدم

ابوالنور

07-03-2007, 08:22 AM

قمة الثقالة يا مازن تسلم والله علي الزوق

مازن الجمّال

07-03-2007, 08:34 AM

انور حبيب الكل
شوقنا اطنان والله
وخليك قريب

عماد عبدالشكور

07-03-2007, 10:54 PM

والله بايخ لما مطلع بوووووووووووووووووووووووووخ
وشكرا على الثقالة وتقل الدم
التحية لك وما تطول الغيبة تاني

okasha

07-03-2007, 11:01 PM

تجر واطى مالك

انت قايل روحك تقيل

تقيييييييييييييييييييل شدييييييييييييييييد

ما تعمل نائم واصل

ودمت

شبرقية

07-03-2007, 11:35 PM

الثقالة فنون
ثقيييييييييييييييييل لمن غلط
في انتظار البقية واهم شي الجكسوية سامحتك ولا لااااااااااا

عماد عبدالشكور

07-03-2007, 11:40 PM

الثقالة فنون
ثقيييييييييييييييييل لمن غلط
في انتظار البقية واهم شي الجكسوية سامحتك ولا لااااااااااا

شكلها كدا ادتو خروج نهائي

مازن الجمّال

08-03-2007, 03:21 AM

عماد ود 114
ازيك وحباب كل ناس 114 الزينين

شوف الثقالة الجاية بس

مازن الجمّال

08-03-2007, 03:22 AM

الحبيب okasha
لو ما جريت واطي ديل ناس فرارير وكسير عضام

خليك قريب يا حبيب

مازن الجمّال

08-03-2007, 03:24 AM

شبرقية الحنينة بحنية ناس المحنة
وارض المحنة
والجكسوية دايما جارة واطي

خليك قريب

مازن الجمّال

08-03-2007, 03:27 AM

اليوم داك كانت الدنيا حر وصحيت من الصباح لقيت الشمس واقفة سلك .. خشيت اخدت لي دش وطلعت الشارع .. وانا ماشي على محطة المواصلات لاقاني مهيد ود وداد ..

- مازن ازيك
- أهلاً
- ياسر في البيت في !؟
- ما عارف
- يعني في ولا مافي
- امش شوفه براك
- مالك انت !!؟؟
- مالي .. وبعدين قدرك انا ..!!؟؟ عاوز تصاحبني

عمل حركة كده في وشه تدل على عدم قبول الأسلوب وانا واصلت طريقي للمحطة .. وانا واقف مستني الدفار مر على واحد عامل نفسه ظريف وفتح معاي موضوع :

- السلام عليكم
- أهلاً
- لو سمحت يا ابو الشباب الساعة كم
- نعم!!؟؟
- الساعة كم
- الساعة كم !! انت مشتريها معاي !!؟ ما تشتري ليك ساعة .. كلام عجيب
- ياخي انا بس سألتك من الساعة .. يا توريني الساعة كم ولا خلاس ياخ انسى الفكرة
- ما بوريك ليها .. مقاسمني في حقها انت !!؟؟
- ياخ طيب خلاس يا ابو الشباب انا آسف
- وانا ما آسف

وهنا دخل واحد من الشماشرة في الموضوع :

- يا شباب مالكم انشاالله خير في شنو !!؟؟
- ياخي الزول ده انا بس سألتو عن الساعة وقام همر فيني كده ما عارف الحاصل شنو
- همرت فيك كيف يعني .. انت يا زول داير معاي مشكلة مش!!؟؟
- يا جماعة خلاس معليش وحصل خير
- وانت كمان الدخلك شنو!!؟؟
- ياخي والله انت زول بتاع مشاكل

وانا ما وعيت بي نفسي وإلا يد خامشة القميص ويدين واقعة فيني زي المطر.

يتبع..

همسة شوق

08-03-2007, 03:37 AM

مازن حبيبنا والله نورت المنتدى
وعليك الله خليك قريب وماتطول الغيبة تانى
وسيبك من التقلا دى وللا عايزنا نكسر ليك تلج
الليلة منتظرنك فى جدة عندنا ليك مفااااااااااااااجعة

مازن الجمّال

08-03-2007, 03:52 AM

زيكو حبيب الكل مشتاقين والله
وجاييكم هسة
وقول لي ناس هناي ارجو الجاييكم
وخصوصا القصير بدور فيه لبع من الشارع

والكلام ده ما هنا

بوظت لي البوست
هههههههههههه

ابوزيد محمد نور

08-03-2007, 05:31 AM

لك التحية والاشواق اخى مازن الجمال

مصريه

08-03-2007, 01:19 PM

هههههههههه
والله حلوه شديد
شكرا ليك يا اخ مازن
وفي انتظار الباقيه

ود المطامير

08-03-2007, 08:32 PM

الحبيب والعزيز الأخ مازن
عليك الله لو لاقاك شبارقه ولأ أبو رجاء ولأ المسافر
ولأ مدناوى بالله عليك أتماسخ معاهم من التقيل
بأمانه منتظرين الباقى بفارق الصبر

محمد السر احمد

09-03-2007, 06:33 AM

حبيبنا مازن الجمال لكن ما كملت الثقالة
وين يا حبيبنا ما مشتاقين كميات عديل كدا

مازن الجمّال

10-03-2007, 02:51 AM

ابو زيد ود فريقنا زااااتو !!؟؟
ياخ انا عشان كده بحب موقع ودمدني ده

تحيات واشواق بطول شارع بيتنا

مازن الجمّال

10-03-2007, 02:52 AM

مصرية اختي ازيك
وخليك قريييبة

مازن الجمّال

10-03-2007, 02:54 AM

ود المطامير
مع انهم بيعزو علي
لكن ابشر تب

وخالص احترامي

مازن الجمّال

10-03-2007, 02:55 AM

لا اله الا الله
حمادة ود السر
ياخ والله ما مصدق عيوني
اشواق بطول المسافة من بيتكم القديم لحدي عيادة عمنا بشرى

مازن الجمّال

10-03-2007, 03:01 AM

وأخيراً وصل الدفار ليفض الجوطة الحاصلة .. ونحنا واقفين ومستنيين الناس تنزل عشان نركب .. واحد شايل قفة وكيس عيش وبتيخة ما اختار زول من الناس الواقفة إلا انا :

- ابو الشباب عليك الله لو سمحت بس امسك لي البتيخة دي خليني الننزل
- انا ما عتالي
- العفو ياخ بس مساعدة بس
- واساعدك ليي !!؟؟ بتديني قروش انت !!؟؟
- ياخ ده شنو الثقيل ده
- ثقيل انت .. شوف ده كمان

تدخل واحد من الشماشرة كالعادة وفض النزاع واتبرع يشيل ليه البتيخة .. ركبنا في الدفار ووقفت برة وطبعا لانه الزحمة جوة ما بتتوصف .. وهنا جا الكمساري اللكيك :

- لو سمحت يا ابو الشباب ادخل لينا جوة النقفل الباب
- اخش اقعد وين!!؟؟
- خش لي جوة لانه الوقوف برة ممنوع وبيعملوا لينا مخالفة
- ما يعملوا ليكم .. انتوا تشيلوا عدد زايد عن المطلوب ليي
- طيب خش لينا جوة
- ما بخش

شمشار من جوة يتبرع ويفضي لي خانة :

- خلاس يا بن العم خش أقيف جمبي هنا

أخش جوة مع طنطنة :

- عالم غريبة ..

وقف الدفار في محطة ونزلت مرة ومعاها بتها وقعدوا يتحاججوا مع الكمساري في الباقي كالعادة وانا استقل فرصة الجوطة وادخل أقعد في كنبة النسوان ويتحرك الدفار .. وفي المحطة التانية تركب جكسوية ظريفة وحليوة كده وتجي تقيف قدامي ( نظام قوم لي انا جكسوية وكده ) وانا عامل نايم .. حسيت بجميع ركاب الدفار بيحدروا لي .. ولكن لا حياة لمن تنادي .. ومع ميلان قوي البت تقرب تقع .. وهنا يخش واحد من الجماعة القاعدين في الموضوع :

- ياخ ما تخلي عندك دم وتقوم ليها
- اقوم ليها ليي وانت ما تقوم ليها مالك .. محنن !!؟؟
- انت قاعد في كنبة النساوين وده غلط
- ما غلط .. وما بقوم
- تقوم
- ما بقوم .. تعال قومني انت

واحد تاني :

- ياخ انت والله زول سمج وبتاع مشاكل ..

وواحد تاني :

- انت يا زول مافي زول مالي عينك
- ما بقوم .. الليلة أها النوريكم كلو كلو ما بقوم

تنط واحدة من النسوان :

- انت اساساً المقعدك في كنبة النسوان شنو
- قاعد بي حقي ما دافعة لي انتي

الكمساري :

- قوم ليها يا ابو الشباب
- ما بقوم واديني باقي قروشي زاتو

يطقطق بالحجر والدفار يقيف :

- انزل لينا زاتو
- ما بنزل
- يا زول تنزل جوة عينك

وبدا يلاوي فيني وخشت كم يد في الموضوع .. وفتحت عيوني لقيت نفسي في الواطة والدفار مشى..

يتبع ..

همسة شوق

10-03-2007, 03:03 AM

مازن حبيبنا
نحن متشوقين جدا للبقية
عشان كدة اسرع بالتكملة وماتشحتف روحنا
يالذيـــــــــــــــــــــــــــــــــــــــــــــ ـــــذ

مازن الجمّال

10-03-2007, 03:06 AM

زيكو حبيب الكل
الجديد نزل قبل ردك
وكله جايي

شبرقية

10-03-2007, 06:34 AM

منتظريييييييييييييييييييييييييييييين
ياثقيل ابو دم تقيييييييييييييييييييييييييييييييل

مازن الجمّال

11-03-2007, 04:30 AM

شبرقية
هاك الثقالة الجد

مازن الجمّال

11-03-2007, 04:34 AM

بعد ما الدفار مشى وبقيت واقف في الشارع شوية كده جا ماشي بوكس واشرت ليه .. وقف :

- ماشي على السوق يا ابو الشباب !!؟؟
- ايوة
- طيب وصلنا معاك

ركبت البوكس ورا كعادة الملاّحة والبوكس اتحرك ولما وصلت الحتة العاوز انزل فيها كوركت ليه ( هنا يا ابو الشباب ) .. هو الظاهر ما سمعني ومواصل وابتديت اطقطق في البوكس والقزاز بي يدي لحدي ما وقف ونزلت :

- ياخ انا ما كوركت ليك لما حلقومي انشرط .. عامل فيها ما سامع ولا غتاتة منك !!؟
- ما سمعتك والله
- طيب الطقطقة الفي القزاز سمعتها كيف ولا انتوا الواحد خلاس لما تركبوه معاكم ملح بتلقوها فرصة وتقعدوا تزلوا فينا
- ياخ انا قلت ليك والله ما سمعتك .. وبعدين انت بتطنطن كتير كده دافع لي قروش !!؟ والله صحي جزات المعروف
- معروف شنو ؟ وبعدين انت لازم تحترمني لانك شايلني في ضهر البوكس بتاعك ودي فيها فضل ظهر
- ياخوي الله معاك وفضل الظهر منك زاتو ما عاوزو .. عالم غريبة صحيح

ويدور البوكس ويمشي بسرعة وانا اقطع الشارع وشوية كده واحد يلكزني من كتفي :

- يا ابو الشباب لو سمحت
- نعم
- ياخ انا والله جيت من كادوقلي وانقطعت هنا .. ادينا الساهلة الله يجزيك خير
- وانت هسة جايي من كادوقلي وقاطع الفيافي دي كلها عشان تشحدني انا ؟
- ياخ ما تعتبرها شحدة .. اعتبرها مساعدة وانا اخوك مقطوع وكده
- اول حاجة ما اعتبرها شحدة كيف وانت مقاسمني في قروشي ولة شنو ؟ وبعدين انت ما اخوي لانوا ابوي ما عندو مرة تانية في كادوقلي
- ياخ طيب خلاس معليش وفر محاضرتك دي وجزاك الله خير
- ما بوفر محاضرتي .. ما انا ماشي في الشارع وانت جيت وراي براك وشحدتني .. وبعدين انت زاتك شكلك ما شحاد انت شكلك مستنكح وحرامي زاتو
- يازول احترم نفسك حرامي كيف
- ايوة يا زول حرامي .. عندك كلام تاني !!؟؟

ونتماسك مع بعض وبنية في خشم بنية وكف في وش كف .. لحدي ما فجاءة كده ظهر عسكري في النص واخدنا الاتنين على اقرب نقطة ..

يتبع ..

همسة شوق

11-03-2007, 05:45 AM

مزونى حبيبنا
شكلو العسكرى دة جاء فى الوقت المناسب
لانو الزول دة كان طقطقك ))))))))

مازن الجمّال

11-03-2007, 05:56 AM

زيكو
هي طقطقة نصاح

ود المطامير

11-03-2007, 06:05 AM

شكيت محنك يا مازن يا أخوى , أنا السفّه
ورا السفّه والساقيه لسه مدوره , ياخوى أنا ماشى بيتنا
شكلك كدا ح توصلها القصر الجمهورى وأنا زول الله سااااى

امير عبدالباقي

11-03-2007, 06:55 AM

ودالجمال
شكيت محنك ياممسوخ عمك منو ماعبدالمنعم الجمال

مازن الجمّال

11-03-2007, 08:42 AM

ود المطامير اصبر شوية بتصل

مازن الجمّال

11-03-2007, 08:42 AM

مورة العسل
الشوق كتير

وياهو زاتو

ود المطامير

11-03-2007, 09:05 AM

ود المطامير اصبر شوية بتصل
عليك الله لمّا نصل سوبا ألكزنى وصحينى عشان أشتت منك وأعمل
فيها لا بتعرفنى ولا بعرفرك .

الفارس البنفسجي

11-03-2007, 09:05 PM

صباحك سكر يا ود الجمال
الثقالة دي حقتك ولا متسلفها؟
تشكر على هذه المساحة من الأدب الثقيل .. فالبشر من وقت لآخر في حاجة لمثل هذه الثقالات.

التحية لك

مدناوية

11-03-2007, 09:18 PM

والله يامازن ياخوي,,, تقله جد,,,
بس أعمل حسابك ,,, عشان ماتجي في رقبتك,,,

وربنا يديم المعروف,,,

رضا حسن محمد

11-03-2007, 09:23 PM

الاخ مازن
والله تلقت دمك لمن عكرت دمى
ما تكتر بلم فيك واحد يدقك دق العيش
سلام يا ظريف

okasha

11-03-2007, 10:37 PM

مازن انشاءالله الكلام دا من راسك ساااااااااى

واوع يكون دا تعاملك مع الناس(خاصة الجكس)

ويلا واصل

مازن الجمّال

12-03-2007, 01:05 AM

ود المطامير
وين يا فردة
رابط كلبوش في يدك

مازن الجمّال

12-03-2007, 01:06 AM

فارسنا الهمام
تحياتي واحترامي
والثقالة سلفة والله

خليك قريب

مازن الجمّال

12-03-2007, 01:08 AM

نفحات الصباح
نفحات المنتدى
وتجي في رقبتي اكتر من كده ؟؟

okasha

12-03-2007, 02:14 AM

انت ماشى النقطة كان راجل ابقى لئيم

والله الا تكون انت الضابط ذاتك

غايتو نحنا فى الانتظار يا مازن

مازن الجمّال

12-03-2007, 03:32 AM

رضا يا لزيز
ادقيت لما قلت كفى
لكن ما بتوب

مازن الجمّال

12-03-2007, 03:33 AM

okasha
من راسي والله
انا زول مسيكين
وحتى اسأل مني ناس ود ازرق

مازن الجمّال

12-03-2007, 03:42 AM

وانا جوة الزنزانة يدخلوا واحد يشتم ويلعن في العسكري الجاريه جر من ليقاته ويقفلوا الباب :

- السلام عليكم
- اهلا
- انا عباس
- عباس من شنو يعني
- شنو !!؟؟
- شنو الشنو !! يعني انا اسوي ليك شنو
- لا انا بقصد ليك اني اسمي عباس
- طيب اها وبعدين يعني
- عاوز اعرفك انت منو وجابوك هنا لي شنو
- ات شغال معاهم !!؟؟
- انا في الحقيقة جابوني في شيك مضروب
- انا ما طلبت سيرتك الزاتية
- طيب ياخ معليش وانا آسف
- لا ما معليش
- طيب ات هسة داير شنو
- ات الداير شنو

وهنا وقف عباس وقعد يكورك للعسكري بأعلى صوته :

- يا عسكري
- مالك داير شنو يا زول
- عليك الله طلعني من الزنزانة دي بي سرعة
- يا زول انت قايل نفسك في فندق ولا شنو
- المهم طلعوني من الزول ده .. ولا بكرة بتجو تلقوني يا كاتل يا مكتول

يتبع ..

شبرقية

12-03-2007, 06:48 AM

سرعه خلينا نعرف الزول دا كاتل ولا مكتول
اعتقد حيكون كاتل صح
هههههههههههههههههه

مازن الجمّال

12-03-2007, 10:27 AM

شبرقية
لو كاتل ما كنت بتكلم معاك هسة

okasha

12-03-2007, 09:12 PM

خلين من الكتل عارفين ما بتجيك حاجة

بس كدى ابقى لئيم مع الضابط زى ما قلت ليك

شبرقية

12-03-2007, 09:59 PM

شبرقية
لو كاتل ما كنت بتكلم معاك هسة

لا ثقييييل بجد:p
يعني انا عديمة فهم للدرجة دي:mad: :confused: :eek:

خواطر

13-03-2007, 08:18 PM

حبيبنا مازن مالك يا اخوي انتا عارف الثقالة دي ما لايقا عليك بتعملا مالك ؟!!!!!!!!!!!!!!

meshanshow

20-03-2007, 01:29 AM

انته مادام بتجر واطي ما تخليك عادي احسن عامل تقيل علي لمساكين و تجر واطي علي الجزاريين

محمد عبد الله عبدالقادر

20-03-2007, 04:19 AM

الاخ مازن ود الجمال
والله بالجد مشتاقين وينك طولته علينا وطولنا عليك
انت في السعودية ولا السودان
تحياتي
محمد عبد الله

مازن الجمّال

20-03-2007, 07:30 AM

okasha
يا عسل

لو كنت رب الثقالة زاتها ما حا اتثقال ما الضابط
دي فيها كلابيش يا عسل

مازن الجمّال

20-03-2007, 07:31 AM

شبرقية
يا نوارتنا

ولو
انتي ست الفهم والذوق كلو يا قمر

مازن الجمّال

20-03-2007, 07:32 AM

خواطر يا راقي
الثقالة وتقل الدم احيانا بتكون نوع من التغيير
خليك قريب

مازن الجمّال

20-03-2007, 07:33 AM

مين شان شو

الثقالة مع الجزارين بتجيب سكاكين

مازن الجمّال

20-03-2007, 07:34 AM

محمد عبدالله شخصيا

شوقنا بحور والله
وكنت هناك لكن هسة بي جاي

مازن الجمّال

20-03-2007, 07:37 AM

بعد ما طلعت من الحراصة وانا واقف لسة برة جمب الباب
ويجي داخل عسكري وبي هظار يسألني :

- الموقفك هنا شنو يا زول
- والله ما شايف لي لوحة مكتوب فيها الوقوف ممنوع
العسكري حس بالمرارة والندم على السؤال ورسم تكشيرة في وشو ومشى في حال سبيلو
وانا اتحركت على السوق ..

واتذكرت انو ناس البيت عاوزين حاجات ..
وادخل على ملجة الخدار .. وعند اقرب بتاع خدار اقيف ..

- لو سمحت يا عمك كوم الطماطم ده بي كم
- الصفيحة بي حداشر
- صفيحة شنو
- الطماطم
- والسألك هسة من الصفيحة منو .. انا قلت ليك الكوم ده تقول لي صفيحة!!؟؟
- ما بس عاوز اوريك انو الطماطم اليومين دي غالية
- وانا ما وزير الزراعة .. ياخ اقول ليك حاجة طماطمك زاتا ما عاوزة
واتقدم منو للزول البعدو وداك لسة بلاحق فيني ( يا ابو الشباب .. طيب تعال دقيقة )
وانا طبعا ما شغال بيه .. واجي للزول البعدو
- كيلو الطمام بي كم
- بي ألفين جنيه
- لي
- الطماطم غالية اليومين دي
- طيب اديني كومين وبي تلاتة آلاف بس
- ما بتخارج معانا والله .. شيلا بي تلاتة وخمسمية
- قلت ليك تلاتة بس
- واديني معاها بصل وليمون
واشيلها واتحرك على الجزارين .. واقيف عند اقرب جزار ..
- يا عمك كيلو الضان بي كم
- بي تمانية
وانا بقلب في اللحمة والأقى الختم مافي ..
- بي تمنية ليي واللحمة زاتا شكلها قديمة وكيري
- عليك امان الله اللحمة دي ضبيحة الليلة الصباح
- قلت ليك يا زول قديمة وختم السلخانة مافيها يعني مضبوحة برة
وما معروفة زاتا لحمة شنو امكن تكون حمير ولا خروف ميت
- يا زول انا حلفت ليك وبعدين انت مفتش صحة ولا شنو !!؟؟
داير تشتري اشتري .. ما داير امشي شوف ليك زول تاني
- يا زول انا مواطن .. وانت مفروض تخدمني مش تديني لحمة ما عارفك جايبا من وين
وبعدين انتو الجزارين حليفتكم دي كلها كضب ونسوانكم مطلقات بالتلاتة من حلفان الطلاق
الفي الفارغة ..
ينط جزار من جمبو ويدخل في الموضوع ..
- يا زول كضابين كيف ..
ويكورك لي جزار تاني ..
- تعال يا سعيد شوف الزول ده بيقول في شنو
ويجي سعيد ويتلمو كم جزار فيني .. وانا اواصل كلامي
- ايي انتو قروشكم دي كلها حرام .. تضبحو برة السلخانة وتلعبو في الميزان
انا حركاتكم دي كلها بعرفها ..
- ياخ انت والله زول مشاكل وانا الليلة بوريك ليها
وبنية .. وبنية .. وضربة في راسي بي حاجة ما عرفتها شنو لحدي هسة .. وادخل في غيبوبة
وافتح عيوني .. والقى روحي راقد في سرير في المستشفى وراسي ملفوف بي شاش ..

يتبع ..

مازن الجمّال

07-04-2007, 05:08 AM

اليوم داك قررت اني ازيد من نطاق الثقالة وتقل الدم زيادة ..
وكانت في مسرحية ما سمحة شغالة في المسرح ..

جيت المسرح وقبل ما أقيف في شباك التذاكر كنت قريت ورقة فئات التذاكر وعرفت انو الكراسي القدام بي 5 الاف ..
وجهزت الخمسة الاف ووقفت قدام الزول البقطع التذاكر :

- لو سمحت جيب تذكرة ..
- عاوز تقعد قدام ولا ورا
- انت مش شايفني مادي ليك خمسة الاف !!؟؟
- ما انا قلت امكن تكون عاوز تقعد ورا
- وانت تقول ليي اساسا !!؟؟ ولا انا ما شبه الكراسي القدام
- لا ياخ العفو .. انا ما قاصد
- لا أنت قاصد
- يا ابو الشباب معليش وما قاصد
- يازول ادينا تذكرتنا وخلينا نتخارج
وتاني مرة ما تتعامل مع الناس بالطريقة العنصرية دي .
- يا ابو الشباب عنصرية في شنو !!؟؟
- ايوة عنصرية .. وانت زاتك شكلك كده تابع لي جماعة متطرفة .
- متطرفة .!!؟؟
يازول خلاص شيل تذكرتك واتخارج .

واحد من الناس الفي الصف ورا ..

- يا ابو الشباب ياخ ما تمشي خلاص ياخ .

واحد تاني ..

- ياخ ما تشيل تذكرتك دي وتتخارج
- ما بتخارج .. انا واقف في ريسينكم !!؟؟

ويجي واحد يقرب مني ويحاول يفض الجوطة بطريقة ودية ..

- ياخ الزول ده قال ليك ما قاصد وخلاص ياخ معليش .
- لا ما معليش .. الزول ده جرحني في كرامتي وانا الليلة ما بخليه .

البقطع التذاكر من جوة الكشك يكورك وهو جايي طالع ..

- جرحت ليك كرامة شنو يا زول .. انت مالك ياخ .

زول قبيل ..

- ياخ الزول ده سألك عادي وانت براك شكلك معقد .
- معقد كيف يا زول .. احترم نفسك
وبعدين انت حاشر نفسك في الموضوع ليي !!؟؟
- حاشر نفسي !؟
ايوة معقد يا زول .

ومعاها دفرة ..

- يا زول ما تدفر انا بعوقك والله

ويدخل الزول البقطع التذاكر في المدافرة

- ياخ انت زول ثقيل وانا الليلة بوريك ليها

ويدفرني هو زاتو ..

ويدخل واسطة خير في الموضوع .. عاوز يحجزني من الناس..

- خلاص يا جماعة معليش .. وانت امشي خلاص .
- ما بمشي وبعدين شيل ايدك .

الزول الأول ..

- انت عشان نحنا سكتنا ليك مش ..

ونخش كلنا في برنامج معافرة ودفس .. ومن دفرة لي دفرة
لحدي ما لقيت نفسي واقع في الواطة هناك ..

واقوم على حيلي وانا بتنفض من التراب وبتمتم ..

- هو في شنو لكن !؟

يتبع ..

مرتضى يوسف العركي

07-04-2007, 05:54 AM

ود الجمال ازيك :
ياخي والله ثقالة روعة ما اظن يقدر عليها اكبر سينارست واصل والله مستمتع بهذه الثقالة المستمرة بس انشاء الله تتمها قبل يلم واحد فيك يوديك المقابر تحياتي للاخ خالد الجمال وياريت تتديهو كم كيلو ثقالة لانو مرضني مرض في الثانوي وفي الفريق ود ازرق تحياتي للاسرة الكريمة .
اخوكم / مرتضي يوسقف العركي
الرياض ــــــــــــــــــــــــــــــــــــــــــــــــــ ـ
كلمة طيبة كغيث أصاب أ{ضا طيبة فأنبتت كلأ وعشبا كثيرا

مازن الجمّال

07-04-2007, 09:10 AM

مرتضي
ازيك يا حبيب
وبي طلتك لفحتني ريحة مدني الحلوة ونسايم ودأزرق

ويوصل انشاالله

عميق مودتي واشواقي يا مرتضى

همسة شوق

07-04-2007, 12:20 PM

مازن حبيبنا واحشنا كتير
شكلك كدة نويت تبقى ثقيل بالجد

samah

08-04-2007, 12:27 AM

شنو لكن يامان هو في شنو
لكن عندك الثقاله عندي اخوي الله خلقو ثقيل بجيب الكثافه اها انت طلعت اشدـ منو
لك عميق الكلام لانو سردك جميل ودمو شربات مع انك تقيل والله التقاله عندك واقعدعافيه

مازن الجمّال

08-04-2007, 05:28 AM

همسة شوق ( زيكو )
والله الشوق فات الحد

لكن اليومين دي مزنوق زنقة كلب في فريق فلاتة

مازن الجمّال

08-04-2007, 05:29 AM

السُكّرة سماح
الثقالة في خيالي بس والله

كوني بخير

مازن الجمّال

08-04-2007, 05:31 AM

بعد ما دخلت المسرح واخيرا قعدت في الكراسي القدام زي ما داير
وبحكم طولي اتعمدت اني اقعد في الوسط عشان اضاري اكبر كمية ممكنة من الناس
واتلفت حولي ولقيت قاعدين جمبي اسرة ..
وابتديت الثقالة بي وليع سجارة ..

الزول الجمبي :

- لو سمحت بس السجارة
- مالا !!؟؟
- بس لانو عندي بتي دي بتتضايق من السجار
- اها وطيب يعني في شنو هسة
- يعني بس فضلا لا أمراً ممكن تطفي السجارة
- واطفيها لي يعني ..

والراجل ابتدا يغلي من جوة وابتدت تظهر علامات الغليان على وشه ..

- ما عشان البت قلت ليك عندها ازمة وبتتضايق من السجاير
- طيب انا اسوي ليها شنو !!؟؟
- ياخ انت مالك زول ثقيل كده
- انا ما ثقيل .. انت الثقيل وده مسرح عام
- انت ياخ مفروض تراعي لحقوق الناس القاعدة جمبك
- يا زول لو متضايقين من الحتة دي امشو اقعدو في مكان تاني

وهنا الراجل المكسين بقى ما عارف يسوي شنو ومع لكيز مرتو ليه وتمتمة ..

- خلاص خليه

اضطر انو يقطعها في حنانو وانا استقليت الفرصة وبقيت بولع السجارة في خشم السجارة.

واخيرا طفو الانوار وفتحو الستارة وجا طالع ممثل من الممثلين يتهابل كالعادة

انا استعدلت في القعدة وحاولت بقدر الامكان اني اكون طالع برة الكرسي عشان اضاري
الناس الوراي وفعلا الخطة نجحت ..

وسمعت كم صوت من ورا ..

- ياخ انزل لي تحت شوية

واحد تاني ..

- ما مضارينا يا ثقيل

صوت نسائي ..

- عاد لاكين ما ما ممكن معاك .

وطبعا لا حياة لمن تنادي ..

وفكرت اني ازود في العيار شوية ..
واثناء ما الممثل مواصل في الهبالة بقيت مرة اصفق واكورك ..

- يا استااااااذ ... يا استاذ

ومرة مرة اصفر ..

حسيت انو الناس الحولي كلهم بدو يغلو
وده الخلاني استمتع وازود زيادة ..
وبقيت مرة مرة مع الصفيق والكواريك بقوم على حيلي واقعد ..

حتى الممثل نفسه ابتدا يضايق ..
واحيانا كان بياخد ليه صنة خفيفة تدل على نسيان النص .. ويواصل مرة تانية

وفجاءة..

الممثل قطع الهبالة واتلفت على بشكل مباشر وقال ..

- ياخ انت مالك !!؟؟
ما كرهتني العيشة زاتو !
ده شنو الثقيل ده

واتخيل لي زي السمعت سب دين منو .. وطلع خل المسرح ..

وهنا حصلت الجوطة ..
واتلمو فيني الناس من كل الاتجاهات ..

وفجاءة حسيت اني مهوي من الواطة
او امكن طاير ..

وفتحت ولقيت نفسي مرمي في الواطة وملمومين فيني عساكر وناس .

يتبع ..

حسن سادة

08-04-2007, 06:05 AM

غايتو يا أستاذنا مازن بيه حأقول ليك حاجة ما كنت داير أقولو ليك
لكين لسان الحال غلب بوستك ده ما تقول لي كامل الدسم وحقو العنده
كوليسترول ما يجي بي جاي
بوست جمع الفكاهة والمرح في قالب قصصي وأدبي رفيع الطراز
ولديك ما شاء الله ملكة فريدة في السرد
فأبشروا يا أهل هذا المنتدى الأغر
فنحن على موعد مع مبدع سامي المكانة
يجب أن نقف أمام حضرة جلال إبداعاتك
مهذبين ونستمتع محراب جمال الكلمات

فلا فض فوك أيها العزيز

واصل وأتحفنا بالمزيد ونحن وراك نشيل
نغني غناوي ونحكي حكاوي لما نذوب في النيل
وأوعى تهدى

مازن الجمّال

09-04-2007, 04:10 AM

استاذي حسن
حقيقة قلت لي كلام ما عرفت ارد اعبر ليك بي شنو
ويا سدي عاجز عن شكرك

ويا ريت لو تكون قريب دايما

خالص مودتي واحترامي وتقديري

شبرقية

09-04-2007, 11:21 PM

لا حول الله
ماخليت ليك ثقالة في الدنيا
كملتها كلها

مازن الجمّال

17-04-2007, 12:46 AM

شبرقية تحياتي يا غالية
والثقالة ما بتكمل

محمد عبد الله عبدالقادر

17-04-2007, 03:25 AM

والله يا ود الجمال ثقالتك لذيذة وكل مرة افتحها واقراها من الاول واستمتع بالثقالة دي ومنتظرين باقي القصه وما تطول في انزالها.
سلامي الى الاهل كلهم بالسودان والاخوان بالسعودية
محمد عبد الله

مازن الجمّال

22-04-2007, 09:33 AM

محمد ود عبد الله
ياخ والله مشتاق الاقيك
واليومين دي مزنوق شوية في الشغل
لكن خليك قريب

مازن الجمّال

28-06-2007, 03:51 PM

اليوم داك مرقت من البيت وكانت في حالة بتاعت زهج وعدم موضوع ..
وما عارف نفسي حتى ماشي وين المهم ماشي ..
وكالعادة اتعمدت اني ما أسلم علي أي زول في الشارع ابتداء بموسى المكوجي
وقرفة بتاع الفول وبابكر سيد الخدار وعبدالله بتاع الدكان ..
لحظة !!
ما عدا عبدالله بتاع الدكان ولقيتو عامل شمطة مع واحد شكلو موزع وبتشاكلو في البضاعة
وهنا ادخلت في النص :

- مالك يا عبدالله
- ياخ الزول ده مصر انو امس نزل لي صندوق كوكاكولا زايد
- طيب هو ما نزلوا ليك ؟
- مانزلوا
- يا زول نزلت ليك صندوق زايد .. انا بعد ما مشيت منك وحسبتها لقيتا فارقة صندوق
- طيب يا عبدالله الراجل مصر ياخ
- يا زول ما نزل
- طيب انت يا زول امكن اساسا جيت بيم ناقصين
- عاد ناقصين كيف وانا مستلمم بورقة استلام

وهنا حسيت اني من المفترض احمش النيران شوية ..

- عموما عبدالله ده نحنا بنعرفو من بدري في الفريق ده انو زول صادق وما بكضب
- يعني انا الكضاب
- انت امكن تكون ضيعتو ولا حاجة وعاوز تشبكا في الراجل الطيب ده ساي
- قصدك شنو !!؟؟
- يعني امكن يكون استكردو منك زول تاني
- يا زول الكلام ده كيف
- عبد الله خلاص ادي الزول ده قروش الصندوق واعتبرها صدقة
- ما بديو
- صدقة كيف يعني يا زول
- عموما انا ما عارف لكن انت شكلك كده والله اعلم مستنكح
- انا مستنكح !!؟؟

وهنا دفرني ..
وعبدالله بقى في صف الحجز

- دقيقة ياخ

وانا انفعلت ودفرتو برضو ..
وهو بحكم عتاوتو وقع فيني لفخ ..

يتبع ..