المساعد الشخصي الرقمي

مشاهدة النسخة كاملة : الحب : التحت تحت



مثني ودالعيكوره
10-03-2007, 09:24 AM
ناس المنتدي سلام عليكن... متعسفييين للغياب
لكن مشاغل الدنيا خلتني اخالف وعدي واتلوم (علي عاملات وداللمين)
اه... خلوني ادخل في الموضوع دووووشك

قبل يومين كنت راقد علي (حميرة قفاي) وبجتّر في اغنيه شايقيه
ولاقاني فيها مقطع طرح في راسي الف سعال

المقطع الجاي ده خلاني اتذكر موضوع(احسبه مهم) ... والمقطع هو

كم من غرام في القلوب
ولع لهيبو ما برد ..
خايفين عيون الناس تشوف
والخبر يملا البلد ..
والحب هناك عيباً كبير
لا بت تبوحبو ولا ولد........

الموضوع :الحب المدسوس

لماذا يمثل الحب عندنا نوعاً من انواع الذنب والاجرام؟؟؟؟
واتحدث عن الحب بكل انواعه حتي حب الوالد والام (ولا احد يشك في حبهما) فهما لايظهران حبهما
بالقدر الكافي كما يحدث عند الشعوب الاخري (مصر مثلاً)....
ونحن السودانيين من شدّت ما نخجل من الحب حتي اسمو ما بنقولو وبقول "الريد"
فكلمة حب بنحس بيها " قلة أدب" !!!!
وعلي الرغم من اننا شعب حبيّب لكن "بدس مشاعروا"
وكم من زول بحب زول لكن "كاتمها في حنانو ساااي"..."ومقطعها في حشاهو"
ولا ما كده يا مدناوي:)

والنكران والخوف من الحب.. موروث متأصل في شعرنا السوداني:

سألوني عن حبي انكرت ما قريت لقوهو متخبي في عيون تقول ياريت
بخاف اسال عليك الناس *** اقولو علي حبيتك

فما هو السبب وراي كبتنا للمشاعرنا ؟؟؟؟؟
اهي التربيه ؟؟؟
هل لدينا انسداد في القنوات العاطفيه ؟؟؟
ام السبب سبب بئي ؟؟؟؟
ام ماذاااا ؟؟؟؟؟؟

والبريدووو ما بجيب اسمو عشان الهواء بقسمو....

مثني ود العيكوره...

شبرقية
10-03-2007, 10:08 AM
اخاف اسئل عليك الناس وسر الريدة بينا يزيع
واخاف اكتر كمان ياغالي من ايدي انت تضيع

وزي ماقال المقطع الشايقي الحب عيب (عندهم)
السودانين معروفين بانهم احن الناس
بس التعبير عندهم صعب
وللاسف بيشوفوا التعبير عن الحب بين الوالدين وابناهم ضعف

الحب عيب وعيب كبير كمان (الحب التاني)
دي فهم كبارنا ومابيدنا نغيرهم
لكن ممكن نغير الفهم دا لانفسنا وللجيل الحالي والتالي
انه الحب ماااااااااااااااااااااااااااااااعيب

الفارس البنفسجي
10-03-2007, 10:48 PM
والله يا مثنى كلامك كلو صاح
وما كنت متخيل الحقيقة بالوضوح دا
على العموم اديني فرصة
امخمخ الموضوع في راسي
وبجيك ... لأنو الموضوع
جد بستاهل وبستاهل

تسلم كتيييييييييير ولنا عودة

طلال يوسف الحاج
11-03-2007, 12:32 AM
إذا كان الحب جريمه فل يشهد التاريخ إني مجرم
طبعا الحب ما عيب بس أهلنا نسبة الخجل عندهم كبيرة وده برضو ما عيب مدام هم المسئله دي هم ما عايزين يخوضو فيها ما في داعي نحنا نجبرم على حاجة هم ما عايزنها . كل جيل ليه ثقافه وافكار تختلف عن باقي الأجيال ..... وديك العافية على الموضوع ..................

مثني ودالعيكوره
11-03-2007, 01:10 AM
اخاف اسئل عليك الناس وسر الريدة بينا يزيع
واخاف اكتر كمان ياغالي من ايدي انت تضيع

وزي ماقال المقطع الشايقي الحب عيب (عندهم)
السودانين معروفين بانهم احن الناس
بس التعبير عندهم صعب
وللاسف بيشوفوا التعبير عن الحب بين الوالدين وابناهم ضعف

الحب عيب وعيب كبير كمان (الحب التاني)
دي فهم كبارنا ومابيدنا نغيرهم
لكن ممكن نغير الفهم دا لانفسنا وللجيل الحالي والتالي
انه الحب ماااااااااااااااااااااااااااااااعيب

مشكوره شبرقيه علي المرور والمشاركه

في رايك كيف نحل مشكلة عدم التعبير (ترجمة الاحساس)؟؟؟؟
وتاني كيف نغيير الفهم لجيلنا الحالي ومن ياتي بعدنا ؟؟؟

وما قلت لينا السبب الخلي السودانيين يكون بهذه الدرجه من (عدم الشفافيه)

مره تانيه مشكوره يا أموره

مع عاكر مودتي .....

مثني ودالعيكوره
11-03-2007, 01:23 AM
والله يا مثنى كلامك كلو صاح
وما كنت متخيل الحقيقة بالوضوح دا
على العموم اديني فرصة
امخمخ الموضوع في راسي
وبجيك ... لأنو الموضوع
جد بستاهل وبستاهل

تسلم كتيييييييييير ولنا عودة

ايها الفارس النفسجي....
لانك كنت تطوي الفلا (والفرنقاقه) من خلفك قد اثارت النقع
فلم تري الحقيقه....
ولكن ... اخد ليك انجمامعه (من وعثاء السفر)
ونحن منتظرنك...

لك الكبرياء يا فارس

مع عاكر مودتي....

عمار هبّار
11-03-2007, 01:47 AM
السلام عليكم يا شباب ..
والله يا شباب للأسف الشديد الموضوع دا كتير جداً من الناس ما لاقيين ليه إجابة .. فمنهم من يقول أن السودانيين يعبرون عن مشاعرهم بالأفعال أكثر من الكلام .. ومنهم من يقول أن التربية القاسية هي السبب .. ومنهم من يقول أنه لا يجب على الرجل إظهار حبه والبوح به كي لا يستخدم ضده .. هل فهمتم قصدي ؟؟!!
المهم ياشباب .. الحكاية دي ما عندها قاعدة ثابته ولكن السائد عندنا هو كتم هذه المشاعر ولا أعرف هل هو حفظ لقدسية هذه المشاعر ؟ أم أنها بخل على من نحب ؟ أم أنها من عيوب التربية ؟!!
ماتنسو يا شباب لمن تلقو إجابة تبلقوني ..
والسلام ليكم وللقدام ..

مثني ودالعيكوره
11-03-2007, 01:54 AM
إذا كان الحب جريمه فل يشهد التاريخ إني مجرم
طبعا الحب ما عيب بس أهلنا نسبة الخجل عندهم كبيرة وده برضو ما عيب مدام هم المسئله دي هم ما عايزين يخوضو فيها ما في داعي نحنا نجبرم على حاجة هم ما عايزنها . كل جيل ليه ثقافه وافكار تختلف عن باقي الأجيال ..... وديك العافية على الموضوع ..................

طلال.... الطله منك لينا عيد

المساله ما مسالة جبر ...
لكن بتكلم عن ثقافة مجتمع ... فيهو انا وانت وناس بيتكم وناس المنتدي
والفراشه الفي السوق والكماسره و....و.....و
الحكايه حكاية مجتمع بكاملو بكتم مشاعرو واحاسيسو اتجاه الآخر
وزمان الحبوبات الواحد ما تقول اسم زوجها نهائياً (ابوكم, ابونا، الحاج)
عليكم الله في دس اكتر من كده ؟؟؟؟

علشان اقرب ليك الفهم... نأخد مثال

آخر مره قالت ليك امك (تعال يا حبيبي او يانور عيني ) متين؟؟؟
آخر مره انت قلت لي اختك (كلام فيه نوع من المحبه والحنان )؟؟؟
قطع شك ما قريييب.... دا اذا حصل قبل كده

فإذا كان دا الحال مع الناس الحبهم بالفطره (اهلك)
فكيف الحال مع الناس التانيييييين ؟؟؟؟
طلال... هل تفتكر ان هذا الجيل جيل صريح ؟؟؟؟؟

ورضينا ام ابينا فهذه هي حيقتنا (بنطاري احساسنا)

لك كل الوفاء طلال...

مع عاكر مودتي......

ود حنتوب
12-03-2007, 04:02 AM
ماهو كلام الناس ده البخرب اى حاجة ياخى

ود المطامير
12-03-2007, 12:42 PM
والله يا ود عمى يا حبيبنا
أنا غايتو غمّضت عويناتى كدى وإتخيلت ليك نفسى فى المطامير
وإتخيلت ليك نفسى مشربك أصابع يدى مع أصابع يد عبير وهاك
يا قدله فى شوارع المطامير , ويد عبير فى يدى وكتفها مع كتفى
وآخر ضحك والناس حولينا يرمونا بالورود ويقولوا علينا حلاتهم
ولايقين على بعض .
يا ود العيكوره والله يسمعك أبو العمده إلا يعكر مزاجك

المسافر
12-03-2007, 08:48 PM
تسلم يا جنى العيكورة على :
أولاً : إنك بديت الموضوع بغنا الشايقية !!!!
وثانياً : على طرحك الراقي والذي راودك وإنت على حميرة قفاك
وكما قال الأخوان نحن من الشعوب الحنينة ولدينا إرتباط أسرية
وخلافة قد تكاد تكون مبالغ فيها ولو كنت في بلد الغربة سوف
تحس ذلك عن كسب . . . ولكنا نستحى كثيراً أكثر من اللازم
وحتى في المطالبة بحقوقنا ناهيك عن نبوح بريد وحب . . .
ولكن مع الإنفتاح الموجود حالياً مثل هذه الأشياء أصبحت
تتلاشى . . . وكلمة بحبك وبريدك أصبحت كلمات عادية وقريباً
سوف تصبح بلا معنى .

ودمت يا حبيب قساي

مثني ودالعيكوره
13-03-2007, 08:47 AM
ماهو كلام الناس ده البخرب اى حاجة ياخى

ودحنتوب الجميله... سلام

بقول ليك :

"كلام الناس لا بهم لا بصلح لا بتم"

وهو البقولوا الناس شويه ؟؟؟

مشكور علي المرور...

مع عاكر مودتي....

مثني ودالعيكوره
13-03-2007, 09:02 AM
والله يا ود عمى يا حبيبنا
أنا غايتو غمّضت عويناتى كدى وإتخيلت ليك نفسى فى المطامير
وإتخيلت ليك نفسى مشربك أصابع يدى مع أصابع يد عبير وهاك
يا قدله فى شوارع المطامير , ويد عبير فى يدى وكتفها مع كتفى
وآخر ضحك والناس حولينا يرمونا بالورود ويقولوا علينا حلاتهم
ولايقين على بعض .
يا ود العيكوره والله يسمعك أبو العمده إلا يعكر مزاجك

سلام ... وعوافي علي ودالمطامير

اقدل بي مهل اصلو القدله فيك خايله....
واوعك تفتح عيوناتك... علشان ما تنصدم بالواقع

لو الحركه دي"يديكم مع بعض" عملتها في غير المطامير كان الناس قالوا
العمده "خرب" وبقي اي كلام...
طيب ليه ما يبقي مجتمعنا ذي مجتمع المطامير
ويرمي المتحابين بالورود بدل ما يرميهم بالكلام المعهود"الكلنا عارفنو".

يا الله اغمض وافتح القي نفسي في المطامير....

ابو العمده الله بيني وبينو ابو العمده بالتركك عينو...

مع عاكر مودتي......

مثني ودالعيكوره
13-03-2007, 10:14 AM
تسلم يا جنى العيكورة على :
أولاً : إنك بديت الموضوع بغنا الشايقية !!!!
وثانياً : على طرحك الراقي والذي راودك وإنت على حميرة قفاك
وكما قال الأخوان نحن من الشعوب الحنينة ولدينا إرتباط أسرية
وخلافة قد تكاد تكون مبالغ فيها ولو كنت في بلد الغربة سوف
تحس ذلك عن كسب . . . ولكنا نستحى كثيراً أكثر من اللازم
وحتى في المطالبة بحقوقنا ناهيك عن نبوح بريد وحب . . .
ولكن مع الإنفتاح الموجود حالياً مثل هذه الأشياء أصبحت
تتلاشى . . . وكلمة بحبك وبريدك أصبحت كلمات عادية وقريباً
سوف تصبح بلا معنى .

ودمت يا حبيب قساي

انه لمن دواعي سروري ان تحط رحالك وتنيخ راحلتك علي بابنا ايها "المسافر"

ومشرف كتيييييير

ويمكن اثرت بمداخلتك عداد من القضايا التي
كل منها ان يكون بورد قائم بزاته ...
الارتباطات الاسريه... الاجابيات والسلبيات
لماذا لا تظهر وطنيتنا الا في الغربه ؟؟؟؟
لماذا نجهل حقوقنا "جميع الحقوق" و لا نستطيع المطالبه بها ؟؟؟

وخلينا نجيها في مرات تانيه ... بالتفصيل
وهسي خلينا في موضوع "دس المشاعر"

ودعوني امسك الحب والمشاعر بين الجنسيين ...
هل يمكن ان تبوح لمن تحب عن مشاعرك بمجرد الاحساس بها؟؟؟

مع عاكر مودتي....

meshanshow
20-03-2007, 01:37 AM
انا غايتو بستغرب من الزول البكون حابي ليهو واحده و داسيها من اصحابو و باقي الناس زي الخجلان منها و لا خايف الناس تدورو او اكون متزوج و ماشي مع مرتو تلقاهو ماشي قدامها وهي ماشه وراهو ماعارف غايتو ديل عندهم مرض شنو...

nahla abass
20-03-2007, 10:17 PM
أولاً أرحب جداً جداَ بود العيكوره
وود دفعتى ،،،،،،
الزول الحنين ،أخو الأخوان وود (الح.........).............
وبنقول ليك منووووووووووووووور

طبعاً يالمثنى الموضوع دا متشعب وله أبعاد كثيرة والحب عموماً ماعيب ولا حرام ولاشنو ؟؟؟
فاهم قصدى ،،،،
لكن ماخطر عديييل فى غنا الشايقيه

Madanawi
21-03-2007, 11:34 PM
والله يا مثني انا بقول احسن الواحد ما يتضارى ورا الدعوات عشان كان حصل المحظور واخدت شاكوش تلقى اليواسيك وما تبكي براك وتبقى عليك زي ما قال ود الامين ،

ورا البسمات كتمت دموع بكيت من غير تحس بيّ ، ومصيرك بكرة تتعلم !!!

جيفارا
22-03-2007, 03:21 AM
والله أنت يا مدنـاوي كدا

البنات ديل الذمن دا بقن بيـاعات بتاعت مصالح وأسمع يا أخوي ود العيكورة كلام عمك مدنـــاوي وشيل من عمك ود المطامير أنت كان ترضى أنــــو الخ ...... ذي ما انت عارف باقي الكلام .


الحب والمودة أو المودة والحب يجي بعد الزواج صح الصح

رايـــك يافردة؟؟؟؟؟ فكيت ليك الكورنة دي بالله عليك ما تخذلني إيهاب بيضحك وعندو أمور الظاهر

مثني ودالعيكوره
05-07-2007, 05:22 AM
هل يمكن يمكن ان تكون البنت هي البادئه بالبوح ؟؟

هل اذا اتسم الانسان بالشفافيه في مشاعره يعني ذلك انه "زول خفيف"؟؟

هل شعور الحب اجباري ام اختياري ؟؟؟

هل يمكن صناعة الحب ام انه شعور يداهم بدون استإذان؟؟؟

هل من مجيب ؟؟؟ ومنتظر ردكم

مع عاكر مودتي...

صديق بلال
05-07-2007, 05:36 AM
ناس كم من غرام في القلوب
ولع لهيبو ما برد ..
خايفين عيون الناس تشوف
والخبر يملا البلد ..
والحب هناك عيباً كبير
لا بت تبوحبو ولا ولد........

الموضوع :الحب المدسوس

لماذا يمثل الحب عندنا نوعاً من انواع الذنب والاجرام؟؟؟؟

مثني ود العيكوره...

يا أخي الكريم:-
أحب أن أذكرك ليطمئن قلبك أن الحب بإمكانك أن تظهره للمحبوب بعدة طرق وأساليب معروفة لدى الكثيرين... فعلى سبيل المثال لا الحصر كتقديم الهدايا والتحدث بطريقة ما تدل على حبك للمستمع... إلخ..
وأحب أن أختم هذه المداخلة بهذا البيت الذي أقول فيه:-
الحب ذو حرفين لكنهم غاليين
بيسعدوا قلبين بيعيشوا متهنين

مختار بازى
05-07-2007, 05:41 AM
هل يمكن يمكن ان تكون البنت هي البادئه بالبوح ؟؟

هل اذا اتسم الانسان بالشفافيه في مشاعره يعني ذلك انه "زول خفيف"؟؟

هل شعور الحب اجباري ام اختياري ؟؟؟

هل يمكن صناعة الحب ام انه شعور يداهم بدون استإذان؟؟؟

هل من مجيب ؟؟؟ ومنتظر ردكم

مع عاكر مودتي...

1.في اي مجتمع هذا آ في مجتمعنا هذا الكلام؟؟؟؟
2.لا .
3.لا هذا ولا ذاك فهو لا يستاذن
4.لا.. نعم شعور يداهم بدون استإذان

الطويل
05-07-2007, 06:16 AM
يامثنى على بالطلاق موضوعك سمح بالحيل

واعتقد الشئ راجع للشخصيه فى بعض الناس خجوله ما بتحب تظهر عواطفها

الريانه
05-07-2007, 06:45 AM
ييييييييييييييييييييييييييييييييييييييييييوه ياناس كفايه تنكتو فى مواضيع الحب ده مرض فقد كان عزيز ولا عابر ولاغالى ده اااااااااااااااااااااااااااااااااااااااااااااااااا اااخ ماعندو علاج نحنا شعب سودانى بتحكمنا العادات والتقاليد مابقول متخلفه عشان انحنا الكبرنا واتربينا بالعادات وكل واحد فيناشايف تربيته مافيها كلام ولاشنو؟البقول نحن الجيل الجاى نغير يبقى بهد الصرح العظيم(العادات والتقاليد)ونتحول من اسره محافظه الى اسره مفككه************** ولى بقيه******************************

الريانه
05-07-2007, 07:14 AM
انت تحب صحبت اختك واختك تحب صحبك منو الراجل السودانى البيقبل بى كده منو البيقدر يستحمل كلمه ده ماراجل (مع الاعتزار) ما ده الكلام الخرب الناس ودى الحاجات الجاتنا من بره ودى تبع ناس الشهاده العربيه هم اول ناس اخترعوا قصه زيارة زميل الدراسه للبيت والترحيل ياناس هوى اى شى يتعمل بالدس معناه فيه غغغغغغغغغغغغغغغغغغغغغغغلط وغلط وغلط

معتز الريح
05-07-2007, 07:43 AM
الحبيب مثنى ..
عنوانك مثير ..
وانا بصراحة جابني سوء الظن ..

السباعي
05-07-2007, 02:00 PM
والله يا اخوي موضوعك دة سمح بالحيل لكن دي مواضيع عايزة سنين وسنين عشان نقدر نلقى ليها حل...

على العموم تشكر وراجع ليك....

هشام السماني إبراهيم
06-07-2007, 07:02 AM
انا غايتو بستغرب من الزول البكون حابي ليهو واحده و داسيها من اصحابو و باقي الناس زي الخجلان منها و لا خايف الناس تدورو او اكون متزوج و ماشي مع مرتو تلقاهو ماشي قدامها وهي ماشه وراهو ماعارف غايتو ديل عندهم مرض شنو...

البحب المفرض يفتخر بلبحبو واقول اهو او اهي للناس ومافي انسان كامل :)

وكلمة الريد دي انا مافهمتها ومحتاجة لي اجابه لماذا نغير من بحبك الى بريدك ولا ايميلك:D

وتغير طريقة تعبيرنا عاوزة وقت مع الجيل الجديد لى قدام ح اتغير المفهوم وانشاء الله نكون اكثر انفتاح ونبقى زي ود الطاهر :::::::::::: ربنا اسهل


شكرا على الموضوع الجميل


لك تحياتي

مثني ودالعيكوره
07-07-2007, 07:07 AM
يا أخي الكريم:-
أحب أن أذكرك ليطمئن قلبك أن الحب بإمكانك أن تظهره للمحبوب بعدة طرق وأساليب معروفة لدى الكثيرين... فعلى سبيل المثال لا الحصر كتقديم الهدايا والتحدث بطريقة ما تدل على حبك للمستمع... إلخ..
وأحب أن أختم هذه المداخلة بهذا البيت الذي أقول فيه:-
الحب ذو حرفين لكنهم غاليين
بيسعدوا قلبين بيعيشوا متهنين

مشكور يا ود بلال علي المرور الانيق...

قدمت في مداخلتك اساليب وطرق للتعبير عن الحب لكن لم

يكن من بينها "البوح" وهذا هو لب موضوعنا

مرات يهدوليك هديه ويقولو ليك كلام سمح لكن الدافع ما يكون هو الحب

وانت تكون "فهمت غلط" ....

ثم ...
مشكور علي البيتين ونتمني ان تكون لهما اخوات "اعني بيوت الشعر"

مع عاطر مودتي....

مثني ودالعيكوره
07-07-2007, 07:23 AM
هل يمكن ان تبداء البنت البوح بالحب"كان هذا هو السؤال"؟؟

1. في اي مجتمع هذا آ في مجتمعنا هذا الكلام؟؟؟؟
2.لا .
3.لا هذا ولا ذاك فهو لا يستاذن
4.لا.. نعم شعور يداهم بدون استإذان

عزيزي بازي .... لك الكبرياء والسؤدد

نعم ... لماذا لا يكون في مجتمعنا؟؟ ما المانع من ان تكون "حواء" هي التي تبوح
بحبها "لآدم" ؟؟
في اعتقادي ان الحب شعور انساني في المقام الاول وليس شعور
"رجالي" اي انه ليس حكراً علي الرجل ... فهو شعور ينتاب المرء "الانسان" رجلاً
كان او امرأه فيملئ جوانحه حتي يفيض .. وعند مرحلة الفيضان يكون البوح ... فأذا
كان الحب لا يستأذن "كما وافقتني الراي" فكيف نحبس (من لا يستأذن عند الدخول)
ونمنعه من الخروج ؟؟
واجزم انك توافقني الراي ان المرأه اكثر عاطفيه وشفافيه من الرجل..

ويرن في أذني تعريف صديقي للحب حيث قال:

" الحب آكوله في القلب يغلبك تحكها"

وله رايك شنو يا مخو؟؟؟

مع عاكر مودتي ...

مثني ودالعيكوره
07-07-2007, 08:35 AM
يامثنى على بالطلاق موضوعك سمح بالحيل

واعتقد الشئ راجع للشخصيه فى بعض الناس خجوله ما بتحب تظهر عواطفها

ابو رانيا... سمح انت وسمح زوقك

خجوله وله متعقديين؟؟؟

وهل السواد الاعظم مننا نحن السودانين خجول؟؟

مشكور علي المرور

مع عاكر مودتي...