أمي

[طلال يوسف الحاج]

اسألو دمي وسعادتي وهمي
وسألو التوفيق والكدر والضيق
وسألو الطيــب في صــفاتي
والســـجود الفي صـــــــــلاتي

وسألوهم عن غلى أمي

الليله إي واحد يمشي يبوس راس أمه والماعندوا أم يترحم علي روحها
ماضروري عيد الأم لأنوا كل الأيام عيد ليها *
يا شباب مدني نخلي بالنا من أماتنا ونحاول نخفف عنهم عناء شغل البيت وعناء الإنشغال بينا ونحنا خارج البيت ونحاول نساعده في أي حاجه متعبه ونسئلها عن همومه وعن إحتياجاته البسيطه أكيد شايله هموم ماحد جايب ليها خبروأكيد بتتألم من جواها بس كاتماهو عشان ماتشغلكم ليها حق علينا زي ما بتحب تفضفض همومك مع أعز الناس ليك تأكد إنك أعز إنسان ليها (الجنة تحت أقدام الأمهات)
تحت أقدامن يعني نبوس التراب البتمشي عليهوا
توعدون تحكولي التغير البحصل أو الشعور البتحسوهو بعد ما كل واحد يبوس راس أمه ويتودد ليها
إتفقنا ****

[عماد عبدالشكور]

الى من
علمتني العطف
علمتني التسامح
علمتني الصدق
علمتني الامل
علمتني الحب
علمتني الحياة

اليك
يابحر الحنان
يا منبع الحب
ياوهج العواطف
ياصدق الاحاسيس
يا مصنع الافراح

اليك يامن
تكافحين وتعملين وتصبرين وتصمدين
ولما جار به الزمان علينا تهونيين
والى الباري عزل وجل تبتهلين
والى كل ما نطلبه منك تستجيبين

امي
يالــحن الخلود
يااجمل الورود
ياأغلى العهود

اشتقت
الى صدرك ولمساتك
الى حضنك وكلماتك
الى صوتك ودعواتك

الى كل ما يمدني منك بالقوة

الى التي
تحترق لتنير الطريق
وتعلمنا معنى الصديق
وتنتشلنا من كل ضيق
وتكون لنا خير رفيق

اراك
مع شعاع الشمس
مع كل ضياء قمر
مع كل زقزقة طير
مع كل تفتح زهرة
مع كل مرور نسمة
مع كل صعود نفس

لتعيشين في قلبي
وتغفين على حبي

الى صاحبة
الــروح النقية
النفس الزكية
الطلعة البهية

يااجمل نساء العالم بعيني

أقول
اعذريني ان قصرت يوما
اعذريني ان حملتك هما
اعذريني ان زدتك غما

حالليني
واهبيني

يامخزن الحب والحنان
يا من تحت قدميها الجنان

سأقول لك ما لا يقولون
واتوقف عندما يتحدثون
واقرأ ماذا عنك سيكتبون
وأيه هدية اليك سيقدمون

سيقولون
كل سنة وانت بخير
لا
اريد ان اكتب شيئا
يفوق الوصف
لا يعرفه العرف

احلى من الجمال
اسمى من الخيال

يعجز عن ان يخطه القلم

عنده
تتوقف الكلمات
وتزداد الاهات
وتختنق العبرات

فاليك ياصاحبة
القلب الكبير
والعقل المنير

لا استطيع سوى ان اقول

كل لحظة وانت بالف خير
كل نفس وانت بالف خير
تنامين وتصبحين بكل خير
يامنبع كل الحب والخير

ياأم الخير
امد الله لنا بعمرك
لنبقى نتظلل بظلك

[عماد عبدالشكور]

ضل الضحي الرامي ..... وشمس شتوية دفاية
وريحة البن ... لما يفوح في قلاية
وفروة جدي .. صورة جدي .. لمن جيت أمد يدي
وجدي ... أديني تعريفة .. (( بتقراء الحمدو يالمبروك ))
بقراها
وشأن تعريفة ألقاها ... بجود في القراية كمان
وإيه يا يمة والله زمان ...
مشتاق يا يمة لي ملاح النعيمية ...
وريحة صاجك المحروق ... لما تسوي طعمية
وغباشة روب ... وعنزة حلوب
بدور أرحل أجيكي هناك
ضاقت بيا يمة هنا
بدور أتمسي بعيونك ... وأ صابحك يا حبيبتي أنا
صباح الخير علي عيونك ... أتاري الدنيا من دونك
شينة ومرة ما بتندار
دي مرة مرارة يايمة ... دي مرة وحارة ذي النار
ولو بدوري أحكيلك عن أحوالي في البندر
من وين عايزة أحكيلك
من وين أبداء بس من وين
دة شيتا كلو شين في شين
هنا الزول العديل ونصيح ... وحاتك إنت يا الغالية
بعيش حياتو يوماتي بي وشين
وزولتي الحتة حبيتها ... لقيتها براي تحب زولين
وإيه يا يمة ... والله زمان ... وأنا والحزن متواعدين
شرابنا المر .. طعامنا المر ... ونفرش من رصيف الذل ... فراش وغطي
وقرايتي الجيت أنا عشانها ..... مرات بمشي للجامعة ... تمامة عد
مخنوق يمة داير أموت ... ناس تاكل في بعضيها ... ناس أشباها ذي الحوت
أخيرا أرجع أجيكي هناك ... ضاقت بي يا يمة هنا
بدور أتمسي بعيونك ... وأصابحك يا حبيبتي أنا
صباح الخير علي عيونك .... أتاري الدنيا من دونك شينة ومرة ما بتندار
دي مرة مرارة يا يمة ... دي مرة وحارة زي النار
وقشة عيني من النوم .... بشيلها معاي هموم باكر ... قبل ما أبداء هم اليوم
أختها خطوتي الأولي أعدي الباب ... تبداء تدق طبول الهم
خواطر تذهل الألباب ... وأقابلك يا شوارع الجن ... أشد وتر الحزن وأعزف
تموت غنواتي يا يمة ويخنقني الغنا وأنزف .... خيال بيتنا الحنين يرجف
خيال بيتنا القديم يهتف .... صور تنزاح وتتلم
وأشوفك بي خيال حالم .... تشاوري و ترقص السبحة ... ملامح العابد الصايم
تشع فوق جبهتك سمحة .... وشيبك يحاكي ضي النور ... مزدان يمة في الطرحة
وتبسم لي ... أمد إيدي ... أقول أتلافاكي يا السمحة
يتلاشي الحلم وأصحي ... ويتقطر عرق مالح ... وزي عصفورة منجرحة
فارقت الفضا البارح وإيه يا يمة .... والله زمان
وهم .... كل المدن وهم .... وهم غرقانة في زخم الحضارة الغم
حضارة بتحصد الإنسان وتزرع في مكانو الغم
وقصر القول
شايل اللوم ............ ويوما جابني للبندر وحاتك إنتي يا الغالية ... دة يوما شوم
ولابسني الخجل ... من راسي لي كرعيا ... شايلو و أحوم
وهادي الحالة في الخرطوم ... بس عايش ... شقي ومهموم
وإنت .............
الله يسلمك

أمي الله يسلمك

ويديكي لي طول العمر في الدنيا يوم ما يألمك
أمي ( دار السلام )
يا حصني لو جار الزمان
ختيتي في قلبي اليقين ... يا مطمناني بطمنك
خيرك علي بالحيل كتير ..... يا مرضعاني الطيبة بالصبر الجميل
يا سعد أيامي لو درتي قلبي أسلمك
أنا مهما أفصح عن مشاعري ... برضو بيخوني الكلام
وقولة ( بحبك ) ما بتكفي .... وكل كلمات الغرام
يا منتهي الريد و مبتدا .... إنشأ الله ليا يسلمك
ويديكي ... لي طول العمر .... في الدنيا يوم ما يألمك


مهداة لكل أمهات أعضاء هذا المنتدي .......

[bakry kassala]

تسلموا وتسلم أمهاتنا
تسلم يا طلال
دائماً ياطلال انت السباق لمثل هذه المشاركات

[بت الشبارقه]

اعجبتني كثيرا قصيدةعماد والله كاني بتكلم مع امي وبالنيابه عنها بقول ليك شكرا عليها وربنا يديها لي طولة العمر ويجعل يومي قبال يوما

[مدنيّة]

ماعارفة لية ما بنظهر مشاعرنا الجميلة لوالدين ( ام ، اب ) احنا كسودانيين
يعني عادي جدا في الدول الاخري بتلقي الاولاد فعلا بيبوسوا ايدي امهاتهم وابهاتهم بس عندنا الا من رحم ربي !!!

ربنا يحفظهم ويخليهم لينا ويرحم الاموات منهم

مشكور علي اللفتة البارعة دي

[zaher]

حروف اسمِك
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
حروف اسمِك
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
حروف إسمِك
عقد منضوم بخيط النور
وطلة وردة من السور
ونغمة تنادى من طمبور
وشُعلة فرحة فى الوادى
تَشِع جَذلانه ليها شهور

حروف إسمِك
وَكِت أشتاق وأرحل ليك

وأسرح فى عسل عينيك

بِتَحضِنّىِ......

قَبُل ألمسَ حرير إيديك

تأرجِحنى..وتَفَرحنى..وتخلينى

أدُق سدرى

وأقيف وسط البلد واهتف

بريدك يا صَباح عمرى

[zaher]

وحاتك ما بخت عنوان
وما بكتب اسم إنسان
ما برمي الجواب في بريد
ومابديهو .. لي زولا كمان في الأيد
كفاية أقيف
وأنقش في جناح الريح
كلامي الدايرو يوصل ليك
يخلي الريح تترتر
في المسافة عروس
تحيل كل الصحارى بروش
مضفرة بي سعف بلدي
مرسلة ليك .. يا أمي

[yassir elamin]

نبع الحنان ومنبع العطاء ربنا يديهم العافيه ويرحمهم فى الدنيا والاخره

[Madanawi]

من احق الناس بحسن صحابتي قال امك، قال ثم من قال امك قال ثم من قال امك قال ثم من قال ابوك،،

بالجد يا شباب لوالدينا علينا حقوق كبيرة والتهاون فيها له تبعات خطيرة لذلك يجب ان نراعي حقوقهم في الصحة والسقم وفي الحياة او بعد الممات وربنا يخليهم احياء ويرحمهم اموات ،،،

مشكور يا طلال على الموضوع

[طلال يوسف الحاج]

مشكورين على المشاركه والمرور الزي النسمه يا
emad mohammed*
bakry kassala*
Zaher*
Yassir elamin*
madanawi*
مدنية*
يا شباب مدني

[ودالحصاحيصا]

داير اكتب ليكم عن امى والتضحيات والحب البينى وبينها ماقدرته

[الفارس البنفسجي]

إنها

بوابة

العشق

الحنين

هي

رسالة

المولى

بأن

الحب

أصل

أصيل

لك مني حبي واعتزازي يا أماه

[zoolfrda]

حكايتي ايها

السادة

والسيدات


قديمة قدم مشاعر الانسان

قديمة قدم تفتح اول زهرة على الارض


حكايتي ايها

السادة

و السيدات


يوم بدأت امشي خطواتي الاولى

وكدت اسقط

ولكن

يالله

ما ارق تلك اللمسة

ما اجمل تلك الابتسامة

وما احن تلك النظرة


يومها

امتدت يد امي

تحاول ان تسندني

حتى لا اسقط


سادتي

سيداتي

من يومها

وانا واقف

صخرة

بل جلمودا من الصخر

لم

ولن

اعرف للسقوط معنى


و كيف اعرف للسقوط معنى

ولي امٌ

مثل امي

[الشريف الهندي]

يااجمل نساء العالم بعيني

أقول
اعذريني ان قصرت يوما
اعذريني ان حملتك هما
اعذريني ان زدتك غما

[طلال يوسف الحاج]

ما عارف أشكركم كيف على المداخله الجميله دي والمرور الرائع
فارسنا البنفسجي
ود الحصاحيصا
zoolfarda
والشريف الهندي
الله يطول أعماركم وديكم الصحه وخليكم لي أمهتكم وخلي أمهاتكم ليكم وتسلموا يا شباب مدني....