ذكرى

[ود النيل]

بكتب ليك
عن عينيك..
عن كل المدائن فيك..
عن الدهشة فيني إليك
وعن إنسان فقد في غربتوا
الإنسان..
فقد في لهفتو التحنان
وبين ايديك..
صبح تايه يفتش ليك
يتاتي عليك
يناغم ليك
تعالي حِداي
***
بكتب ليك بي وحشة
عن الريح..
عن الموج ..
عن الليل..
عن إحساس فيني إليك
وعن تيار حزن منساب
شايل فوقو ضحكاتنا الطفولية
واقف بينا والمرسى
صبح هسى..
عشم لسه..
عشم تتبدل الفكرة
ونتحاور مع الذكرى
ونوصل ليقين إنك
إنتي خلاصة الفكرة
وإنك أكبر من الذكرى
وإنك روعة الحاضر
وأوسع من خيال بكرة
وإنك إنتي جوانا..
سماحة الفطرة
***
تعالي نعيشك الليلة
ويوم بكرة
ونتأمل في دواخلك شوف
ونكتب للعيون قصة
ونرسم في الشفاه رقصة
ونبقى حقيقة ما فكرة
نعيش يوماتي ما ذكرى
***

[ياسرالشيخ]

العزيز ود النيل ..كنت متاكدا جدا انك مبدع ..وان الحروف ياسيدى لا تعصى لك امرا,
شكرا على هذه الرائعة .. وننتظر المزيد.

[زهرة الشمس]

علمني الاختباء .. في عيونك .. في ضلوعك.. في حواسك .. في جوارحك .. في المسام
فجر أكاليل الأمل في شبابنا
وخلينا نندهش على الدوام
شتت زغاريد الفرح بوعد الأيام
وأنا ما بين مظنة واحتمال تكتمل عندي الدموع في لحظة تجني على الوئام
يصبح عزا القصائد أفكار خيال
كلما تهرب من بر تلقى في المد زحام
ينضب الدم المؤقت وتندفع الأنفاس تكتم الكلام

[ود النيل]

شكراً لكي أيتها الزهرة الرائعة على تلك الإطلالة والمرور الجميل
لك الود وما تبقى من الأزهار داخلنا