مشاهدة النسخة كاملة : مراحل الاغتراب نقل عن سي جي مان د. عادل الصادق المكي
طلال الصول
27-04-2007, 10:25 PM
الاغتراب .... المغتربون عالم تاني .. المغترب
يشيل شنطتو وينطلق قاصد ديار الزيت
يمشي عشان يقعد ليو سنتين تلاتة ويعرس ويشتري بيت وعربية
ويجي راجع يقعد عند اهلو لكن يلقى نفسو ورط في الغربة
والزمن يجري بيو بهنا وبهناك العجب مغتربين الخليج ناس الغترة والعقال يلقى نفسو لاهو مواطن عشان يقعد ويتوهط ولا قادر يرجع يعني مواطن مع وقف التنفيذ ضايع بين الاتنين ...
مغتربين السعودية حاجة تجنن شعور بالدونية وشعور بالفوقية في وقت واحد .. شعور بالدونية للبلاقيو في الغربة وبالفوقية لانو لمن يرجع بيتعامل معاملة تانية زول فريد من نوعو الناس يتلمو حواليو من كل جانب واول ما يفلس ويعلم الله يقعدو يسألو اها راجع متين عشان يمشي يخم ويلم ويرجع تاني
هذا المخلوق المغترب يمر في حياته الاغترابية بأربع مراحل رئيسية هي 1
1 - المرحلة القردية
2- المرحلة الحمارية
3- المرحلة القرادية
4 المرحلة الكلبة الاستثنائية
وحانفصل المراحل دي مرحلة مرحلة
مدنيّة
27-04-2007, 11:12 PM
والله يا طلال بالغت مع روحكم :cool:
اها منتظرين تفاصيل المراحل دي
طلال الصول
27-04-2007, 11:23 PM
نبدا بالمرحلة الاولى وهي القردية
تبدأ هذه المرحلة اول ما يبدا المغترب في اجراءات سفرو ... ويبدا يحس انو اصبح جزء من فصيلة المغتربين .. ويتصرف على هذا الاساس .. واول ما يقول بسم الله ويخت كراعو في السجن هي الاغتراب يبدا يحاكي في السبقوه في الاغتراب يفكر يشتري عربية ثم ستلايت في اوضتو براو والمعرس يفكر يجيب مرتو واولادو بهناك ويقعد يجهز في البيت من العفش زي الجماعة القبالو بالظبط غرف نوم وموكيت وملايات اشي امريكي واشي ايطالي ثم بعد ذلك يبدأ في التوالد والتوالد في الغربة للناس الماعارفين يتم في موسم معلوم ومحدد في الشتاء فترة الصيف مخصصة للاجازات والعمرة لمن لم يستطيع للاجازة سبيلا حكمة الله في منطقة في موسم واحد كان فيها اكتر من خمسة ولادات ضكور وكلهم اي واحد فيهم ابو سماو محمد ودا من تأثير المرحلة القردية وفي احد المغتربين عندو تلاتة اسمهم محمد محمد سادة ومحمد الامين ومحمد المامون واقترحت عليو مساعدة مني ان يسمي الولد الجاي محمد وردي والبعد محمد فرفور والغريبة انو الراجل نفسو اسمو محمد عثمان
المرحلة القردية مرحلة قصيرة الامد الغربة والشغل وجهاز المغتربين والضرايب والكفيل ما بخلو اي مغترب يستمتع بالمرحلة دي لهذا نجد انو المخلوق المغترب يدخل في المرحلة الحمارية بسرعة جداًً.................
meshanshow
27-04-2007, 11:52 PM
انت في ياتو مرحله حسه؟
طلال الصول
28-04-2007, 12:00 AM
خلي المراحل تكمل بتعرفني في ياتو واحدة براك
خالد أحمد الصول
28-04-2007, 01:51 AM
إبني طلال
عندما يظهر الكاوبويات تطلع المسدسات ... و عندما تتصفح البوستات تطلع الصولات
لله درك زدنا
سموءل
28-04-2007, 02:24 AM
اهم حاجة المرحلة الحمارية ياودالصول
طلال الصول
28-04-2007, 04:35 AM
صولنا ليك التحايا والود والترحاب وتسم على الكلام الجميل
وحاضرين
طلال الصول
28-04-2007, 04:42 AM
حاضر يا حاج سموءل
طلال الصول
28-04-2007, 05:05 AM
المرحلة الحمارية .... وهي اطول مرحلة في حياة تطور المغترب وتتميز هذه المرحلة بتقل الدم وعدم المبالاة والنكات البايخة الى لوسمعتا ليك واحدة الله يحفظك بتكون داير تنط من الشباك وتخنق روحك
ومن سمات المرحلة الحمارية انو المغترب بكون سستم نفسو على نظام معين الشغل البيت وبالعكس بالاضافة الى الكتشينة والميز وكدا يعني .
المرحلة دي الكفلاء استغلوها على اكمل وجه تطلب من الواحد اي حاجة في اي وقت يعملا بنفس راضية ومن غير زهج ولا اي حاجة وبعض نسوان المغتربين عرفن يستغنها برضو .....
عايزة التوب الفلاني حاضر السلسل الفلاني حاضر ودا طبعاً من غير زعل ومن غير نرفزة وبكل طيبة خاطر وهنا المغترب بكون ربى لي كرش ومرات بعضهم بكون لابس ليو غترة وعقال يعني الاحساس بأنو مواطن وكدا وكمان دي فترة المفاخرة بالشغل والكفيل ............. تلقى الجميع الله يعينك يتكلمو في الاسعار وفي الانترنت وانو الديجيتال خرب الاولاد ينط ليك في النص ويقول ليك والله الراجل كفيلي دا راجل كويس خلاص هو الكفيل والابلاش بحترمني ليك ومقدرني ..... الله يعلم مطلع عينو
يمتاز مغترب المرحلة دي بسرعة تحويل العملة الريال وخلافة الى جنيه سوداني مروراً بالدولار واليورو . وتتم هذه العملية الحسابية في راسو بسرعة رهبية ومايخلي حتى الكسور .
تمتد المرحلة الحمارية لفترة طويلة في الغالب وتقدر فترتها على حسب دورة حياة المغترب .
ودا بينقلنا الىة المرحلة التالية المرحلة القرادية .............................ز
الطويل
28-04-2007, 05:39 AM
ياود طلال دق الخروج النهائى سريع وانا بدق خروج وعوده وبنتظرك فى جده تعال ساىنسافر;)
طلال الصول
28-04-2007, 05:48 AM
طب ياابو رانيا ما نعمل خروج نهائي احنا الاتنين والا اوعى تكون انت في المرحلة الجاية
طلال الصول
28-04-2007, 08:28 AM
المرحلة التالتة المرحلة القرادية ودي تعتبر من اخطر مراحل تطور فصيلة المغتربين وفيها المغترب بكون خلاص بقى في عالم تاني الاولاد كبرو وخلو الجامعة والمرة طلباتا كترت وفجأة يقولو ليو استغنينا عن خدماتك
يا ابو الشباب يسافر عمك ومعاهو عقد عمل جديد يخرجو ليو تاني يرجع عمرة يكشو يجي حج وينطط من شغل لي شغل وينقل كفالة ويعمل بهلوان وما يخلي ليو حاجة واشي سير ذاتية وواسطات والبدع
يعني المغترب في المرحلة دي بكون رافض للواقع وما رضيان بانو يسافر وطبعا مخلوع
والمرحلة القرادية تتميز بانها مرحلة انتقالية للمرحلة الاخيرة وعادة فترتا ما بتطول الا عند الناس البيجمعو
مابين المرحلة القرادية والمرحلة الاخيرة المرحلة الكلبية......................
طلال الصول
29-04-2007, 05:35 AM
المرحلة الاخيرة وهي زي ما قلنا يعني مرحلة استثنائية تعسفية تكون غالباً في السودان الا في بعض الحالات النادرة اوفي المرحلة دي بكون المغترب حايص او لايص او مشلهت لاقادر يتابع الناس في السودان والتطور ووتيرة الحياة ولا قادر يعيش زي ما كان برا البلد العملة متغيرة الناس ما زي زمان
ياود امي حكاية زمبريطة والناس كانو ملمومين معاو اول ما جا بعد ما فلس وعرفو ما راجع سابو ليك عكس الهوا في المرحلة دي تكتر الامراض مكن بنكرياس وضغط الدم والروماتيزم الله يعافيكم
يكون فيها الاحساس بالعجز كتير جدا لأن الواحد كان معود اسرتو واولادو على مستوى معين من المعيشة وهدوم جديدة كل كم يوم وما بعرف شنو بعدين الحكاية تبقى لي حارة .
ودي تعتبر خاتمة دورة حياة الطفيلي اقصد المغترب وتنتهي بالوفاة كسائر خلق الله .
طلال الصول
30-04-2007, 07:16 AM
وكدا نختتم سلسة حياة المغترب خارج السودان ونبدأ سلسلة جديدة
وبتتكلم عن المغترب داخل السودان
meshanshow
04-05-2007, 08:38 PM
الواحد لازم اغترب علشان اعيش
طلال الصول
05-05-2007, 01:06 AM
قصدك علشان ينسى انو عايش
وانت الصادق
Powered by vBulletin® Version 4.2.5 Copyright © 2025 vBulletin Solutions, Inc. All rights reserved, TranZ by Almuhajir