ولد خفيف

[امير عبدالباقي]

لما شفتك قلبي كان ناصع نضيف
زي الطيور الراحلة في زمن الخريف
عشت متألم وما قادر أقيف

زي زي مشرور وحيد

مستني باصات الجريف

أنا الكيشة صًدقت إدعائك

يوم قلتي لي دمك خفيف

وخدعني بوخ نظرات عيونك

مليانة بالكحل الظريف

قمت شلت الكيس من ايدك

ووقفت في صف الرغيف

دافعت ليك وسط الخلوق

عشان تقولي ولد حريف

واديتك العيش بابتسامة

نابعة من قلبي الرهيف وبعد ما شلتي العيش

نسيتيني ومشيتي بعيد

وانا المشدوه أعاين فيك

زي إقليمي جاي جديد

تاه في زحمة الخرطوم

وشاف الناس شمال وصعيد

ما تنبسطي يا حلوة

بعد نكرانك المعروف

أصلو الحي مصيرو يلاقي

ياما بيشوف

واصلو الناس حياتها ظروف

ويوم بلقاك في ورطة

لانو بلدنا كلو صفوف

[aborawan]

ها جنا ها صفوف شنو البتقول عليها انت من زمن الصفوف اظنك يا اللخو طولت من البلد البلد يا عشاي بقت بخيرا كل شئ فيها راقد زي الرز :D:D اظنك من سنة حفروا البحر يا عشاي :)

تحياتي اخوي امير على المشاركة وفعلا رااااااائعه

[امير عبدالباقي]

والله ياودامي بس القصيده حلوه ؛وعارفين البلد بخير والي الامام
تحياتي

[ابوقيس]

والله لكن عسل

ومع انه الصفوف في بلدنا قلت زي ماقال ليك ابوروان

اظنك طولت

لك مني كل التحايا والتقدير

[خالد حمد موسى]

ايه الخفه والحلاوه دي ياامير...لكن بس البلداتطورت في توصيل للمنازل

[114]

حلمنتيش ظريف، ويبدو أنها من حلمنتيش سبيعنات القرن الماضي حيث ازدهر هذا النوع من الشعر الجميل، مثل القصيدة الشهيرة: يا سيده لا فايتانا وين مستعجلة، شرط امتحان؟ لازم علوم؟ ما انت كملتي الحلا، ومثل قصائد المستعرب الخلوي وغيره من فطاحل الشعر الحلمنتيشي

بس يا ريت يا أمير تكتب لينا اسم الشاعر

[ابراهيم]

والله لكن يا أمير لقيتك خفيف خفة

وقدييييييييييييييييييييييم قدمة


لكن الما عندو قديم ما عندو جديد

وحليمة مهما جددت لابد ترجع لي قديمة دا مثل سوداني قديم بس طورناه شوية

والى الأمام

[بابكر]

القصيده رائعه يا امير لك التحيه واتحفنا بالمزيد ياامير يا امر :p

[بابكر]

اسمع دى يا امير واحد بيهجو ليهو فى واحده قال ليها رقبتك مارقه منسله ورأسك زى غطاء الحله هى هى هى هى هى :D :D :D :D