يا أخوانا أفيدوني

[محمد أحمد الشيخ]

يا أخوانا الدوريات في كل العالم أنتهت وأتحدد البطل والما أنتهي في أسابيعه الأخيرة بما في ذلك الدوريات العربية .

ونحن في السودان لسه ما بدينا الدوره الثانيه دي نقول عليه شنو

يا عيدروس ، هيثم ، مرتضي ، ود الأصفياء ، ناصر ،،،، وكل الرياضين

أفيدونا أفادكم الله .

لكم الود

[معتزودمدنى]

دا نقول عليهو يا حبيبنا باسطة احد اسباب تخلفنا الكروى لانو الاسباب كتيرة.
ودكتور شداد هو القاسم المشترك دائما. ونحن لانلوم شداد ولكن نلوم تلك الاتحادات الولائية التى همها الاول عودة شداد لكرسى الرئاسة فى انتخابات الاتحاد. دون الرجوع لما قدمه الرجل للكرة السودانية فى فترة رئاسته السابقة للاتحاد والتى استمرت لعقود من الزمان. يعنى السودان دا ما فيهو غير شداد؟؟؟؟
واقع الكورة فى السودان محزن للحد البعيد
عدم دعم من الدولة وسيطرة دكتور شداد على الاتحاد العام للكرة
والصحف الرياضية دى يا خوانا اهم اسباب تدهورنا الكروى وانا متاكد انو البرازيل مافيها كمية الصحف دى. صحف عبارة عن قهاوى شتائم متبادلة بين الصحفيين او ملاك الصحف. يعنى حالة من الفوضى مايعلم بيها الا الله. والدولة اكبر متفرج
وانا ما داير معتصم عيدروس يزعل منى لكن يا معتصم الكورة السودانية علاقتها شنو بى كورلا خالد عزالدين او بيت صلاح ادريس فى كافورى او شركة بيطار عشان تجى صحيفة رياضية تفرد الصفحات لسفاسف الامور دى.
غايتو يا معتصم انا لو كنت مسؤول؟ كنت حاقفل كل الصحف الرياضية فى السودان لانو البشوف كورتنا ما يشوف كمية صحافتنا الرياضية.
والله يكون فى العون

[nasir]

تعرف ياباسطة انو تعريف الدول المتخلفة كلاتي:
1/ اقتصاديات متدنية
2/ الاعتماد علي الغير
3/العجز في الميزان التجاري
4/ الدوري المقلوب 0نحن يادوب ابدتينا تاني ما تقول لي انتهينا انتهي جيل بينظر الينا هههههههههههههههه

[هيثم عبدالعال]

عزيزي باسطه الموضوع كبيييييييييييييير وداير ليهو قعده لكن حته كده من الطرف
دوري يبدأ ويقيف زي قطر الفحم وفترات تسجيلات على قفا من يشيل وسيطره كامله على كل مقاليد الأمور لناديين يقولوا لعب في لعب ، يقولوا تأجيل معناها تأجيل ، وإدارات جاهله بأبسط أسس الإداره ، ومدربين ..... ( ولا خليها عشان ما نرجع لقصة كنتاكي تاني) ولاعبين ينعتهم رئيس الإتحاد العام نفسه بأنهم (فاقد تربوي) وده على ذمة الصحافه الرياضيه ودي كمان كما قال أخونا معتز حاجه عجيبه صحفي بتاع الأرباب وصحفي بتاع البرير وآخر للحكيم وقس على ذلك ناس للوالي توالي وناس بتعارض وكلو بتمنو إلا من رحم ربي .
وعشان ما نضيع أصل الموضوع كل الدنيا بتبرمج منافساتها المحليه وهي تضع إعتبار لرزنامة الفيفا يعني البطولات الالإقليميه والقاريه والدوليه ومواعيد المباريات الوديه التي يتم الإتفاق عليها قبل شهور عديده وحسب ما تعتمده الفيفا ، لكن ناسنا معاهم حق نحن لا قاريه بنتأهل ولا دوليه بنحلم بيها وكان للوديه أهو ناس أرتريا جاهزين نكورك ليهم بالحيطه (دايرين معاكم ماتش ) تاني يوم يا جو يا مشينا ليهم غايتو الواحد بتذكر لما كنا بنلعب مع ناس حنتوب والسوريبه وبيكه نلاقي أي واحد منهم ونوصيهو الجمعه بنجيكم وخلاص المباراه قامت.
ولي عوده

[محمد أحمد الشيخ]

والله يا حبيبنا يا هيثم
يا دوبك فشيتني انا كاتب الموضوع ده من يوم 31/5 قبل ما تسافر السودان ما في زول أشتغل بي شغله الا معتز وناصر .

همسه : أنت جيت ولا لسه غاطس في البطاطس

[هيثم عبدالعال]

الأخ باسطه لك الود
يا خوي أنا لسه بستكشف في الوضع يعني ما غطست حتى الآن عشان كده الواحد بديها طلات سريعه على المنتدى .
بخصوص موضوع الكوره والدوري المقلوب والذي منه طبعاً زي ما قلت ليك ده موضوع كبير وأرجو أن يساهم في قتله بحثاً وتمحيصاً جل إن لم يكن كل أعضاء المنتدى من المهتمين بالرياضه حتى نخرج بمحصله عسى ولعل تفيد البلد .
حته صغيره : رغم سعادتي الكبيره بقرب تأهل المنتخب لغانا ، أرجو أن لا يظن حسني النيه أن ذلك كان نتاج تخطيط ومنهجيه ( مرات الخرمجه بتصدف، بس ما كل مره )
حته غير مرئيه : أمبده عصرت الهلال.... الإتحاد أجل ليهو مباراة الخرطوم ثلاثه ( بالمناسبه التشاور على إصدار قرار التأجيل تم بالتلفونات ) وناس ثلاثه زعلانين لكن لمن يشكو الإتحاد ... الله أعلم ، وفي أسبانيا برشلونه عانى من غيابات وإصابات للاعبين على وزن إيتو ورونالدينو وديكو مافي ولا مباراه إتأجلت ( الظاهر ناس... المعلم و....سيدا وماعارف مين ديل ممكن يأجلوا ليهم كأس العالم )

[محمد أحمد الشيخ]

لحدي أسه ما غطست ........... لكين بوين تغطس مع التكريمات دي .

[هيثم عبدالعال]

تكريم ؟ نحنا ما عاوزين تكريم ،،، تكريمنا إنو مدني ترجع لسابق عهدها في كل المجالات وتكون مناره لكل ضال .

[معتصم عيدروس]

يا محمد الشيخ عذراً على التاخير
الموضوع ذي ما قال هيثم داير ليه قعدة طويلة عشان نعرف انحنا ماشين صاح ولا غلط..
وعموماً مشكلتنا اظن في طول الموسم ، البتشاف اطول من باقي مواسم الدنيا حتى انو لو كان عندنا ربيع كان شمل الصيف وشتاء وربيع وخريف ،
وبنجي راجعين

[مرتضى ساتى]

نرجع يا جماعه الموضوع شيق وجميل ونحاول من هنا ومن هنا ان نعالج ونستكشف الاخطاء طبعا انبسطت شديد من معتز مدنى ولكن اختلف معه فى الحمله الشرسه ضد كمال شداد ذلك الهرم الكروي الكبير فكمال شداد فكر كروي وهو من اسباب تقدم الكوره السودانيه الان ولكن شداد يناطح عناترة الاموال الذين ليس لهم علاقه بكورة القدم غير الوجاهات والظهور فى الصحف من قبل صحفهم الرياضيه فكمال شداد وصل الى مراحل دكتور خبير الاتحاد الدولى ناطح الحكومه وفاز عليهم لانه يعرف ان الاتحاد الدولى لكرة القدم الفيفا لا يقف مع اتحادات معينه ولولاء ذلك لرايت الان فى قمة الهرم فى الاتحاد العام اناس لا علاقه لهم بكورة الشراب وليس كورة القدم
قبل ايام فى برنامج عالم الرياضه كان هناك لقاء مع الدكتور شداد قمة فى الروعه قمه فى الفهم رد على بعض الناس وقال هو خلاص ما عايز حاجه تانى وفعلا كما اسبقت فى القول الراجل ربنا يطول فى عمروا وصل درجة دكتور وصل الفيفا تانى عايز شنو ؟فالكبير كبير
اخى معتز لا يعنى كلامى هذا انى مختلف معك او ضدك ولكن شهادة حق فى كبير اراد لكورة القدم السودانيه ان تكون كبيره وفعلا فى عهده وصلنا الان الى غانا
نتمنى ان تنجب حواء السودانيه امثال شداد بدون فلوس ولكن بفكر راقى
ولك الود اخى باسطه

[محمد أحمد الشيخ]

مشكور أخي مرتضي علي المرور الرائع وتنشيط الموضوع