المساعد الشخصي الرقمي

مشاهدة النسخة كاملة : نحن الموت يمين ان شافنا يرجع صــاد



abu_ola
11-06-2007, 11:36 PM
نحن العرضة و الدلوكة
نحن نحلحل المشبوكة
لي الدايرنا نسمة صيف
و لي المابينا نحن الشوكة

****

نحن الفي الدرب زلقيب
نحن الما بنعرف العيب
لي المابينا جرعة ًسم
و لي الدايرنا عنكوليب

***

نحن الما إتلحق لنا حد
نحن المابنخاف من حد
نحن بنقطف القورة
كان لحق الضراع أتمد

***

نحن الزين ونحن الفال
ونحن العرضة و الشبال
نحن الصفقة و الشاشاي
و ساعة الحارة نحن رجال

***

نحن النوبة ونحن الطار
و نحن الشفة و النقار
نحن القرمصيص و التوب
نحن الخمرة و الكركار

***

نحن الخلوة و اللبريق
نحن الما بنقع في ضيق
نحن يمين اذا دُرناها
نص النيل نسوي حريق

***

نحن بنكرم الضيفان
و نحن بندي لي العشمان
و نحن بنشفي لي المرضان
و من ما قمنا نحن أخوان

***

نحن الفردة نحن التوب
نحن السبحة و اللالوب
نحن السمنة نحن الروب
و نحن كان ابيناكا
نملصك ملصة المركوب

***

نحن الما بنقيف في شين
زينا نحن مافي أتنين
نحن ان درنا ود عينك
يمين بنشيلو حمرة عين

***

نحن الفي الهجير الضُل
نحن الفي العطور الفُل
نحن أسود و نحن رجال
كان عارفنا نحن الكُل

***

في غابتنا نحن أسود
في سودانا نحن السود
لي خالقنا نحن جنود
و لي أعدانا نحن لحود

***

نحن الأبيض الهادي
و نحن الأزرق الهدار
نحن الما بتموت لنا نار
و نحن غضبنا ما بندار

****

نحن الفزعة نص الليل
نحن الميس و نحن شليل
لي الدايرنا نحن جبل
و لي المابينا نحن السيل

***

نحن نفسنا مسك و جًلاد
نحن الفي الصبر جُلاد
و نحن الما بنخاف جًلاد
نحن الموت يمين لو شافنا يرجع صاد

ترنيمه حزن
12-06-2007, 01:14 AM
اللله عليك يا ابو علا كلامك ينقط عسل والله وديل فعلا انتو .... يديك العافيه

abu_ola
12-06-2007, 05:39 AM
اللله عليك يا ابو علا كلامك ينقط عسل والله وديل فعلا انتو .... يديك العافيه

ترنية فــرح

انتي الفرحة التي تعطر هذا البوست

مشكورة على حضورك البهي

و إحساسك المرهفة

و تذوقك لهذا الضرب من ضروب الأدب الشعبي