المساعد الشخصي الرقمي

مشاهدة النسخة كاملة : الكرش .. عدو الشباب .. وضريبة الراحة


معتز الريح
20-06-2007, 05:48 AM
حبايبنا ..
انا متأكد موضوعي ده بمس ناس كتيرييييييييييين ..
بدرجات متفاوتة .. كل زول وحسب كرشو ..

الكرش باااااااايخه وثقيله .. تعملها في يوم
وما بتنزل في 6 شهور .. ما قلت ليكم ثقيلة

تعالوا نشوف أسبابها وحلولها ..
انا عارف وقعت لي ناس في جرح بالموضوع ده ..

إضافه :
هوووووي أنا ما عندي كرش .. لكن عايز أساعد :d
معتز الريح
20-06-2007, 06:21 AM
انا عارف البوست ده ما حيجيب دخل
لكن عايزين نعرف الأسباب والحلول

والحلول أهم من الأسباب ..
منتظركم ما تعملوا فيها بطنكم كراس حساب
همسة شوق
20-06-2007, 10:20 AM
أأأأأأأأأأأأأأأأأأأأأأأخ يا معتز ثقيلة وبس
عليكم الله شوفوا لينا حل
طبعا ما عشانى لأنى الحمد لله شتتها . ( وعرس وعرسناه )
لكن عندى واحد عزيز على وعايز اساعدو
هشام السماني إبراهيم
20-06-2007, 11:19 AM
بعد التحية

والله طبعا يا اخونا معتز مواضيعك جميلة جدا وانشاء الله اي موضوع تكتبو تلقاني فيو اساسي قبل الكراسي .

اسبابها كتييييييييييييييييييييييييييييير وطبعا في ناس تقول ترطيبة . وناس ورثه من الخيلان . وناس موية باردة .وناس بتاكل وتشرب في نفس الوقت والاخيره اتعلمناها في الغربة

بس الحل عشان الواحد يشيلها شنووووووووووو؟

ايوه عندي بس صغيييييييييييييييييييييييييييره

وربنا مايحرمنا منك
هشام السماني إبراهيم
20-06-2007, 11:27 AM
اخوي همسة شوق مبروك على العرس بعد الزحمة


حنككككككككككككك سنيييييييييييييييييييييييييييييييين

ههههههههههههههههههههههههههههههه
معتز الريح
20-06-2007, 09:29 PM
لكن عندى واحد عزيز على وعايز اساعدو

حبيبنا مجاهد ..
والله كلنا عايزين نساعد .. خليك قريب عندي وصفات مظبطه
وصاحبك حتساعدو بإذن الله ..

سؤال :
انت عزام ده بعمل شنو ما عندو كرش؟
معتز الريح
20-06-2007, 09:33 PM
اسبابها كتييييييييييييييييييييييييييييير وطبعا في ناس تقول ترطيبة . وناس ورثه من الخيلان . وناس موية باردة .وناس بتاكل وتشرب في نفس الوقت والاخيره اتعلمناها في الغربة


مواضيعي يا هشام تتشرف بيك ..
ومن حسه حاجز ليك عدد لا محدود من المداخلات في المواضيع ..

بالنسبة للكرش عندها حسنات وسيئات ..
والغربة وشغل الغربة وعطالة الغربة وووو .. دي كلها اسباب
خليك قريب ..
تسلم يا غالي
رضا حسن محمد
20-06-2007, 09:56 PM
يا ود الريح
الزول العندو كرش معناه مقرش
مواضيعك كلها جميلة زيك
معتز الريح
20-06-2007, 10:14 PM
يا ود الريح
الزول العندو كرش معناه مقرش


رضا الحبيب ..
واحتمال يكون عندواستسقاء ..


طيب وينا القروش العندنا
قال مقرش قال
قصدك مكرش
معتز الريح
20-06-2007, 10:59 PM
يا حبايب ..
تعالوا نشوف أسبابها ..

1. الأكل الكتير ..
2. الأكل والنوم مباشرة ..
(غداء ونوم - عشاء ونوم)
3. الرز وما أدراك ما الرز ..
4. الشغل المكتبي
5. المشروبات الغازية
6. الموية البارده (ما مقتنع بيها)
7. عدم ممارسة الرياضه ..
8. أسباب هشام الذكرها في مداخلتو

حنجي نشوف فوائدها .. ومضارها
مدنيّة
20-06-2007, 11:38 PM
الموضوع جميل يامعتز

بس شايفة البدخل كله بيقول عنده صاحبه عنده صاحبه !!:(

واصل في كيفية علاجها

همسة : الفوائد دي اول مرة اسمع بيها
معتز الريح
20-06-2007, 11:55 PM
الفوائد دي اول مرة اسمع بيها

الأخت مدنية ..
نورتي ..
الناس زايغيين .. وما معترفين ودي مشكله ..

اديك فايده واحده من الفوائد ..
بتمسك البنطلون ..
بجيك بلسته بتاعة فوائد
كوني بخير
باسطه
20-06-2007, 11:59 PM
والله ياأخوي معتز ألحقنا بالحلول سريع لأنو الشغلانة دي بدت تظهر عندنا لكن الغريبة نحن ناس كوووورة ساي ماعارف الجابة جهتنا شنو إلا يكون زي ماقلته أكل ونوم دي راقدة عندنا وشغل المكاتب وعدم الحركة الكتير برضو يمكن يكون سبب المهم حصلنا قبل ما الشغلانه دي تزيد:d :d
همسة شوق
21-06-2007, 01:47 AM
معتز الرائع يديك العافية
الاسباب القلتها دى كلها صاح
لكن كان قلت ليك بخلى الموية البااااردة بكون كضاااااااب



تخريمة
عزام صحبى دة بحرقا زلزلة ودرامات
معتز الريح
21-06-2007, 01:55 AM
لكن كان قلت ليك بخلى الموية البااااردة بكون كضاااااااب

عزام صحبى دة بحرقا زلزلة ودرامات

حبيبنا مجاهد ..
انت قلت ما عندك كرش؟ ..
المهم تخلي صاحبك يخليها ..

نصيحة :
أخير الكرش ألف مره من مباراة عزام
مدنيّة
21-06-2007, 02:36 AM
لكن كان قلت ليك بخلى الموية البااااردة بكون كضاااااااب





هي ياهمسة شوق ما قلت انت ماعندك لكن دا صاحبك وانت عايز تساعده:D
صلاح ودالطاهر
21-06-2007, 02:50 AM
اه
يود الريح لقيت الموضوع ده عن كروش ونقلتو ليك بصمت خشمو



الكروش : وقالوا علماء حلمنتيش قسمو البطن لى تلاتة أنواع الأولى تنبلة ودى قالو البتظهر مع البنطلون وبيكون مثبتها الحزام، والتانية سموها تلاجة وقالو دى بتظهر فى الجلاليب، أما النوع التالت فسموه حنانة ودى بتاعت ناس أكل السوسة والعافية المدسوسة بتظهر صغنتوتة كده ودلعوها سموها حنونة وقالو فيها: (طبعا جزء بسيط منها)


على قدر مالإيدين تحوش
تكتر قروش
تكبر كروش
من دون رتوش


حنونة ياكرش الدلع
حنونة يالحوت البلع
جواك كم فروج هجع
كل الغطس فيك ماقلع


مايهمك الحلك ينشرط
ولا الجسم يمسكو الضغط
دار تبلعى ومابتسمعى
وتتكردمى وتتجمعى ويا زولة ماتتوزعى
أمشى الفخود زيدى الخدود
إضيقى ولو بى كُسر أو أبقى سنكيت فى الضهر


==========


حنونة بتحب الغلال
كان بالحرام كان بالحلال
حتى التسالى تفسخى وتهدلى وتترخرخى
ومن الصباح دار تنحشى
وساعة الفطور تتحرشى
لو ميرى ساكت تبلعى
ولو فيو عضم بتقرمشى
لا بتصغرى وتتفشفشى
لا تقلى لا بتكرمشى
لا تطقى لا بتنفسى
يازولة ماغلبنا المشى


=============


يا (حننن) إنتى حنى
وشوفى الضعيف كيف بتنهز وكتين يقيف
والزول قصير بعد الفطور
تلقاهو مشدود زى خابور
وفوق السمين متل البقر وقتين يدر
بالغتى بس أنفاسنا ماقادرين نجر
يا حاجة ضايقتى الصدر


حنونة لاتنفك كمان لا زى ترلة بتنفصل
حنونة لو عايزين نقوم تلقانا دايرين نتفتل
حنونة ماسابت أكل
الزول جنين داخل أمو كان عايش طفل
وكت الخشيم كان منقفل
حنونة شغالة بحبل


++++++++ شاعرها أب طاقية قلووز++++++++



وفى واحدة تانية بتحكى عن واحدة سمينة دايره صاحبنا يحبها بالقوة وكتب فيها..


ريدى ليك يا أم شداق
يقلب اللورى فى الدقاق
ولما أغلط وأقول مشتاق
عيونك جب تكرب جوه فى عيونى
تبهدلنى وتبشتنى
وتجقمت فى مصارينى
وأتوكل وأقول آآآآآآآآى بريدك
بريدك ياسجم خشمى
يا أم إيدا قدر جسمى
يا أم ريدا بعج بطنى
=====
أريدك كيف
وكيف يا ناس أريد فيل
يحلنى الله يالبرميل
أبوياسر
21-06-2007, 04:39 AM
أخونا رئيس الجماعة
والله بالجد موضوع قمة
وكمان ود الطاهر سرق النجومية
لك وله التحية
الطويل
21-06-2007, 04:51 AM
أشربو مويه بارده كتير :D :D
معتز الريح
21-06-2007, 05:48 AM
الكروش : وقالوا علماء حلمنتيش قسمو البطن لى تلاتة أنواع الأولى تنبلة ودى قالو البتظهر مع البنطلون وبيكون مثبتها الحزام، والتانية سموها تلاجة وقالو دى بتظهر فى الجلاليب، أما النوع التالت فسموه حنانة ودى بتاعت ناس أكل السوسة والعافية المدسوسة بتظهر صغنتوتة كده ودلعوها سموها حنونة

الحبيب ود الطاهر ..
إضافتك مميزة ..
وأفادتنا وعرفنا كمان الكروش عندها أنواع ..
* الحنانه ..
* التنبله ..
* والتلاجة ..
وكمان معاها صورة توضيحية ..

ود الطاهر ما قصرت ..
معتز الريح
21-06-2007, 05:55 AM
الحبيب أبو ياسر ..
ياخي شرفت الموضوع ..
ما تكون من النوع البعاني من الكرش
تبقى عليك اتنين كرش وهرش
يا حبيب مشكور
معتز الريح
21-06-2007, 06:04 AM
أشربو مويه بارده كتير :D :D

الحبيب أبو رانيا ..
الموية البارده ممتعه وقمة المتعة ..
لكن الكرش بايخه ..

مشكور على المشاركة
أبوياسر
21-06-2007, 06:14 AM
الحبيب أبو ياسر ..
ياخي شرفت الموضوع ..
ما تكون من النوع البعاني من الكرش
تبقى عليك اتنين كرش وهرش
يا حبيب مشكور

يا ريس
رضينا بالكرش
وخلينا ليك الهرش
معتز الريح
21-06-2007, 06:18 AM
يا ريس
رضينا بالكرش
وخلينا ليك الهرش

ابوياسر اللذيذ
الهرش أخير من الكرش ..
أنا موافق ..
ابورجاء
21-06-2007, 06:53 AM
هووووووووووووووووووووووووي والله عندي
كرش ومن الصباح اقعد انكرش خلتني بس زي البرش
عشان كده بوريكم تمارين لكن للمغتربين نهي زندقي تنفع
جربتها لمن قلت بس مافي فايده صديق نوم اكل تمارين مافي فايده
اها الحل اصلو الكرش ما تمشي الا لبلادك انت تمشي دعوة للرجعة يا ابان
كروش خلو لم القروش قبل ما تكبر كروشكم ساعتها ما بتنفعكم قروشكم
نخش في الموضوع دي تمارين للبطن عسى ولعل تنجح معاكم انتو اها استلموا :ـــ

التمرين الأول:ـــ
http://www.m5zn.com/uploads/89cd705d3a.gif
التمرين الثاني :ــ
http://www.m5zn.com/uploads/74ac870156.gif
التمرين الثالت:ــــ
http://www.m5zn.com/uploads/2d4ab64a85.gif
التمرين الرابع :ـــ
http://www.m5zn.com/uploads/ea0b2b27ac.gif
التمرين الخامس:ـــ
http://www.m5zn.com/uploads/495857e68a.gif
التمرين السادس:ـــ
http://www.m5zn.com/uploads/b3751fe3c7.gif
التمرين السابع:ـــ
http://www.m5zn.com/uploads/e7fb094038.gif
التمرين الثامن:ـــ
http://www.m5zn.com/uploads/72527721bd.gif
التمرين التاسع :ــــ
http://www.m5zn.com/uploads/41ede38cf1.gif


تخريمة مع الشمشرة :ـــــ
يا معتز الريح سمع رويسي الكبير ده قالوا كرشك سابقاك:D ....


ودوما في رعاية الله وحفظه....
مع كل الود باقة ورد...
معتز الريح
21-06-2007, 07:04 AM
تخريمة مع الشمشرة :ـ
يا معتز الريح سمع رويسي الكبير ده قالوا كرشك سابقاك:d ....


الحبيب أبورجاء ..
ياخي بالجد البوست نور..
والكروش خشم بيوت ..
وشكراً على التمرينات المفيدة ..

وياخي الجاب ليك الشمار ده اظنو غيران ساي ..
همسة شوق
21-06-2007, 07:09 AM
أخير الكرش ألف مره من مباراة عزام



والله يامعتز عزام أحلى زول
لكن مباراتو مبااااااااااااااالغة
همسة شوق
21-06-2007, 07:21 AM
هي ياهمسة شوق ما قلت انت ماعندك لكن دا صاحبك وانت عايز تساعده:D



مدنية العزيزة إزيك
شنو يعنى مامصدقانى وللا شنو ؟
قالوا الموية الباردة بتعمل كرش
وانا مابخليها مابخليها مابخليها
ابورجاء
21-06-2007, 07:24 AM
الحبيب أبورجاء ..
ياخي بالجد البوست نور..
والكروش خشم بيوت ..
وشكراً على التمرينات المفيدة ..

وياخي الجاب ليك الشمار ده اظنو غيران ساي ..

تسلم يا الحبيب والله منور بيك والشباب
الحلوين ديل لكن تصدقني حاسي بيهم كلهم
كروشهم سابقاهم احساس ساي يا شباب
ما تجو تفلقونا :D .....

برضو تاني تخريمة لزوم زيادة الشمشرة :ـــ
طيب لو ما عندك كرش داسيها تحت المكتب ليييييييييييييييييييييييييه;) :p .....
http://www.m5zn.com/uploads/e611b912d4.jpg
ودوما في رعاية الله وحفظه....
مع كل الود باقة ورد...
معتز الريح
21-06-2007, 07:44 AM
تصدقني حاسي بيهم كلهم
كروشهم سابقاهم احساس ساي يا شباب
ما تجو تفلقونا :D .....


أبورجاء الحبيب ..
تعرف عندي بوست بكره بتكلم عن ضعف النظر ..
أظنو بهمك .. قال تحت المكتب قال ..

تعرف الكرش بقت مشكله كبيرة لي كتير من الناس
وبعدين تمارين البطن ثقيلة ولو ما داومت عليها
كرشك بتزيد اكتر من الأول ..

عندي ليك وصفه مجربة وخطيره
لكن بعد ما تعترف بيها
nasir
21-06-2007, 08:11 AM
اخي ودالسناهير كيف الاحوال
حتي انا ما عارف عندي كرش ولا
مره جئت المكتب لابس اليونفوم طبعا الانجليزي مديرنا كوري قال لي اش هذا ( وطبعا كنت متشنط ) خت ايدو في كرشي من اليوم داك حسيت اني بقيت من المقرشين (سوري من المكرشين)
موضوعك لذيذ وسمين
معتز الريح
21-06-2007, 08:22 AM
ناصر الغالي ..
غايتو انت لو جاتك كرش تكون الكرش بالغت
يا ناصر انت زول رياضي .. والرياضه دي ما معاها كرش
اها لو انت عندك كرش نحنا يكون عندنا شنو

وبعدين مديرك الكوري ده كويس الخت يدو في كرشك
ما ختاها في جيبك ..

كان تسألو عن علاج الكرش ..
الناس ديل لا بعرفوا الكرش ولا حاجه ..
ابورجاء
21-06-2007, 09:01 AM
أبورجاء الحبيب ..
تعرف عندي بوست بكره بتكلم عن ضعف النظر ..
أظنو بهمك .. قال تحت المكتب قال ..



اها العمى ده خليهو ساااااااااااااااي معترفين بيهو
من زماااااااااااااااااااااااااان النضارات قعر كباية :D



عندي ليك وصفه مجربة وخطيره
لكن بعد ما تعترف بيها

اها اعترفته ورينا بسرعة قبل الجماعة ما يهجموا علينا :D
بيني وبينك انت المحتاج تغير نضاراتك:D ان من اول مشاركة
اعترفته بكرشي من شدة ما كبيرة لحدي ما مرات بخليها بره الشقه :p ...

ودوما في رعاية الله وحفظه....
مع كل الود باقة ورد....
جيفارا
21-06-2007, 09:10 AM
حبايبنا ..
انا متأكد موضوعي ده بمس ناس كتيرييييييييييين ..
بدرجات متفاوتة .. كل زول وحسب كرشو ..

الكرش باااااااايخه وثقيله .. تعملها في يوم
وما بتنزل في 6 شهور .. ما قلت ليكم ثقيلة

تعالوا نشوف أسبابها وحلولها ..
انا عارف وقعت لي ناس في جرح بالموضوع ده ..

إضافه :
هوووووي أنا ما عندي كرش .. لكن عايز أساعد :d






المعندوش كرش معندوش قرش
جيفارا
21-06-2007, 09:15 AM
يا معتز الحمد لله ما عندي كرش ولا صلعة بس اذا الواحد اتلمت عليهو الكرش والصلعة تبقى نصيبة
معتز الريح
22-06-2007, 01:53 AM
المعندوش كرش معندوش قرش

الحبيب جيفارا ..
طيب العندو كرش وما عندو قرش ده يكون علاجو شنو..
بجيك تاني
أبوياسر
22-06-2007, 09:33 PM
ابوياسر اللذيذ
الهرش أخير من الكرش ..
أنا موافق ..

سجل يا حسين
صاحبك وقع
ولا أقول ليك من زمان واقع
معتز الريح
22-06-2007, 09:46 PM
سجل يا حسين
صاحبك وقع
ولا أقول ليك من زمان واقع

حمدلله على السلامة
بركة الطلع ليك صوت ..

تاني بتجو؟
رضا حسن محمد
22-06-2007, 09:50 PM
ابو رجوية ازيك
الوصفة القاصدة ليك معتز الزبادى عشان ما يعمل ليك مجنون
امبارح معتز اللذيذ كان عازمنا عشاء وهو فى الدنيا اوجه بكتير واصغر من الصورة الخاتيها هنا
وانا هنا يا معتز اشكرك عبر الاثير على الدعو الجميلة واشكر المدام
وساطع اللذيذ ما شاءالله عيهو وربنا يحفظو
سلامين
معتز الريح
22-06-2007, 09:52 PM
يا معتز الحمد لله ما عندي كرش ولا صلعة بس اذا الواحد اتلمت عليهو الكرش والصلعة تبقى نصيبة


والله يا جيفارا كلامك حقيقة ..
تعرف امبارح لاقيت لي واحد عندو الاتنين
لكن معوضهم بالظرافه ..

وعارف نفسو ..
أبوياسر
23-06-2007, 04:38 AM
حمدلله على السلامة
بركة الطلع ليك صوت ..

تاني بتجو؟

إنت الفريق داك حاربتو؟
شايف لي صيوان مكجوج وما شايفنك
مع إنو ولدك أبا مجدع بي قادك
عوافي يا ريس
معتز الريح
23-06-2007, 08:12 AM
إنت الفريق داك حاربتو؟
شايف لي صيوان مكجوج وما شايفنك
مع إنو ولدك أبا مجدع بي قادك
عوافي يا ريس

الحبيب أبو ياسر ..
صلاح أبا قال لي زولك ده انا انتهيت ليك منو ..
ما بحتاج تخش ..
صحي الكلام ده ؟

يا أبو ياسر ..
بيني وبينك .. عندك كرش ؟
أبوياسر
23-06-2007, 08:36 AM
الحبيب أبو ياسر ..
صلاح أبا قال لي زولك ده انا انتهيت ليك منو ..
ما بحتاج تخش ..
صحي الكلام ده ؟

يا أبو ياسر ..
بيني وبينك .. عندك كرش ؟

لا عندي هرش وغسيل عدة
وشايفكم موضوع الحنة دا ذي الزايقين منو
لامس فيكم حاجة يا ربي؟؟؟؟
صلاح الدين محمد
23-06-2007, 09:19 PM
والله يا ابوياسر

العلي راسو بطححا بحسس عليها

وربنا يكون في عون اللامس فيو حاجة
معتز الريح
23-06-2007, 11:22 PM
فوائد الكرش ..
بتصلح التشنيطه ..
ممكن تلبس البنطلون من غير حزام ..
مع السكروته .. كأنك وزير دوله ..
في الكورة زول بخش عليك مافي ..
عشان ما تقع والكرش تنفجر..
مافي زول حيقول ليك تعال نتسابق
وبجيكم بفوائد تاني
عندكم اعتراض
هشام السماني إبراهيم
24-06-2007, 02:26 AM
اخونا العزيز واستاذنا الفاضل
والله يامعتز مافي اي اعتراض

وكمان العمه شايفك نستها بتكمل المنظر مع الجلابيه وكامري لون ابيض عشان اقولو التمساح حق السوق جا :cool:

وطبعا جربنا تمارين أستاذنا الكابتن ابورجاء لي واحد زميلنا زي ما قال همسة شوق واحد عزيز عليو :D :D :D

والراجل اتبهدل وحالتو بقت صعبه وجاتو فلايت والنتيجه اتسكيت بي عكاز ( خشبة مكنسة عشان احنا في الغربة ) شوف لينا حل ابرد شوية:D


ولك اجمل التحيات وفي انتظار الجديد
مدنيّة
24-06-2007, 03:10 AM
فوائد الكرش ..
بتصلح التشنيطه ..
ممكن تلبس البنطلون من غير حزام ..
مع السكروته .. كأنك وزير دوله ..
في الكورة زول بخش عليك مافي ..
عشان ما تقع والكرش تنفجر..
مافي زول حيقول ليك تعال نتسابق
وبجيكم بفوائد تاني
عندكم اعتراض

غايتو يامعتز الله يديك العافية

بس حتة الكورة دي الا يكون واحد عنده اخلاق رياضية مي شان يخاف علي زميله واعتقد انها ما متوفرة كتير:D
معتز الريح
24-06-2007, 05:29 AM
اتسكيت بي عكاز :D



يا هشام ..
في ذمتك سكاك أبو كرش ذاتو ولا وكل واحد يسكك ؟..
معتز الريح
24-06-2007, 08:12 AM
بس حتة الكورة دي الا يكون واحد عنده اخلاق رياضية مي شان يخاف علي زميله واعتقد انها ما متوفرة كتير:D

والله مع الزول العندو كرش الأخلاق الرياضية متوفره لسببين
الأول اساساً انت ما بتكون شايف كوره (الكرش مغطياها) ..
التاني لو ابو كرش وقع في لاعب فعلى اللاعب السلام..

تسلمي على المرور
هشام السماني إبراهيم
24-06-2007, 10:31 AM
هو طبعا حاول بس لو عصرني بي كرشو علي السلاااااااااااااااااااااااام

ومن ناحية انها بتصلح التشنيطة نظريتك صح بس تكون كروووش على خفيييييييييييييييف لانو الكبيرة لازم جلابية بيضه مكوية :d

ولك تحياتي
معتز الريح
24-06-2007, 09:36 PM
الأخ هشام ..
حمد لله على السلامة ..
اسمع يا حبيب كدي قول لينا السلبيات ..
منتظرك
هشام السماني إبراهيم
25-06-2007, 02:39 AM
بسم الله

تفتش بناطلين كبييييرة عشان ترتاح الكروش
وفي العادة الكرش بتكون معها شوية سمنة حتجيب دغط +سكري +والنفس يضيق عشان الاستهلاك زيادة وفي القعدة تتعب وفي القومة بي تلتله وزراير القميص تتطاير ولو عاوز تربط الجزمة دا فلم هندي والوقعه لازم اسعاف مافي زول اقربو عشان ماتحصل مضاعقات وحزام العربية انسه تاخد مخالفات الى .................................................. ..
لو ماعرسته دقسته عشان بنات الزمن دا بقن بعزلن زي الطماطم وطبعا لو معرس ( خادم الفكي مجبور على الصلاه)

انشاء الله اكون ماشي صح كدي وريني

لك تحياتي
مثني ودالعيكوره
25-06-2007, 03:11 AM
والله يا ودالريح موضوع الكرشه دا مجهجهنا عدييييل كده

والواحد بقي يمشي في الشارع ويعاين لي كرشو ...

الحقونا بي وصفه سحريه ... تذوب الكرش وتزيد القرش

والغربيه حتي الجكس بقي "مكرش"

مع عاكر مودتي...
معتز الريح
25-06-2007, 06:15 AM
الحبيب ود السماني ..
والله ظبطت سلبيات الكرش وما قصرت ..
لكن أنا شاكي فيك تكون تبع نقابة المكرشين
لانو ده كلام زول بعاني منها ..
مشكور وتسلم يا حبيب
معتز الريح
25-06-2007, 06:18 AM
والله يا ودالريح موضوع الكرشه دا مجهجهنا عدييييل كده
والواحد بقي يمشي في الشارع ويعاين لي كرشو ...
الحقونا بي وصفه سحريه ... تذوب الكرش وتزيد القرش
والغربيه حتي الجكس بقي "مكرش"
مع عاكر مودتي...

الحبيب مثنى ..
الكرش بتجهجه أي شاب .. وبتعمل نفسيات ..
بعرف ناس بتعالجوا من الأثر النفسي بتاعها ..
الوصفة السحرية الوحيدة هي الرياضة
وتقلل شويه من اللهط
وتعشى تمشى ..

أما كروش الجكس دي .. تعال براك احكي لينا عنها
دي منطقة محظورة ..
تسلم
الباش
25-06-2007, 06:38 AM
والله يااخ عزو موضوعك جد حساس والشباب جابو التمارين لكن انا جربتها وبصراحة الكرش مشكلة
مع انو الكرش للناس العندهم قرش وانا ماعندي قرش لكن عندي كرش بصراحة
عاوزيين حلول ميه ياباشا
معتز الريح
25-06-2007, 06:43 AM
والله يااخ عزو موضوعك جد حساس والشباب جابو التمارين لكن انا جربتها وبصراحة الكرش مشكلة مع انو الكرش للناس العندهم قرش وانا ماعندي قرش لكن عندي كرش بصراحة
عاوزيين حلول ميه ياباشا

حبيبنا الباش ..
الحلول المية المية .. تلعب سباحة ..
والنص نص .. قلل الأكل ..
وقالو الزبادي والروب ليهم فعل السحر ..
مشكلة الكرش دي بااااااااااااااااايخه
تسلم على المشاركة
هشام السماني إبراهيم
25-06-2007, 07:49 AM
ياعمنا

خلي الطابق مستور وروق المنقا :d
معتز الريح
25-06-2007, 08:13 AM
ياعمنا:d

هووووووووي يا هشام ..
عمنا دي رندوق ولا قاصدها .. :D
Jamal Elmahi
25-06-2007, 06:54 PM
ود الريح حبابك

الكرش - قرش = إستسقاء
الضعيفوني + كرش = دابي بالع ليهو ليمونه
كرش + هرش = ميته وخراب ديار ...والله يكضّب الشينه
قرش + كرش = هيبة ملوك النيل ويخوجل فوق عديلو....والماعاجبو يشرب لويزو ...

مشاققه ...
الكرش تتناسب طردياَ مع ميتت القلب ...مع إفتراض أنو في قلب

ود الماحي
هشام السماني إبراهيم
25-06-2007, 08:56 PM
الاخ جمال مبااااااااااااااااااالغة

:D
ويامعتز لو ماعجبتك عمنا نخليها يافردة اهم شي ماتتحسس:d

:D :D :D
معتز الريح
25-06-2007, 10:15 PM
الكرش - قرش = إستسقاء
الضعيفوني + كرش = دابي بالع ليهو ليمونه
كرش + هرش = ميته وخراب ديار ...والله يكضّب الشينه
قرش + كرش = هيبة ملوك النيل ويخوجل فوق عديلو....والماعاجبو يشرب لويزو ...
مشاققه ...
الكرش تتناسب طردياَ مع ميتت القلب ...مع إفتراض أنو في قلب


ود الماحي حبابك ألف ..
ياخي فعلاً كلامك ده إضافة للموضوع ..
وينك من زمان ..

لكن ما وريتنا ..
انت ياتو عينه من الفوق ديل ..

تسلم
هشام السماني إبراهيم
26-06-2007, 03:46 AM
استاذنا

وينو موضوعك حق ضعف النظر
عاوزين نتفسح في العمووووووووووووووش
معتز الريح
26-06-2007, 06:34 AM
استاذنا
وينو موضوعك حق ضعف النظر
عاوزين نتفسح في العمووووووووووووووش

بجيك بيهو بعد أعمل عملية الليزك ..
جيفارا
01-08-2007, 07:51 AM
ما فيش فايدة

مرة تكبر ومرة تصغر
جيفارا
01-08-2007, 07:52 AM
لكن يا معتز أخبارك شنو مع الصلعة ؟؟؟؟؟

الجديد
معتز الريح
01-08-2007, 08:05 AM
يا جيفارا ..
والله دي قوية الخلتك تمشي تنكت الموضوع ده ..
انا الكرش عالجتها .. وصلعة ما عندي ..
الكلام انت وحسكو صاحبك ..
عمر البشير
01-08-2007, 09:19 AM
يا اخوانا خوفتونا عديل كرش وصلعه وحاجات تانية حامياني. الفينا مكفينا غربة وعذاب وعزوبية وكمان جبتو ليها كرش وصلع اها العلاج كيف. وما في وقاية يا دكتور معتز.
ودكمبال
01-08-2007, 09:31 AM
العملاق/ معتز
طرحك دا خارج اختصاصاتنا لكن عندى ملاحظات
اولا- الكرش دلااله على الترطيبة
ثانيا- المكرش بالو واسع وطبعو هادى ولما يحكى معك دائما يمسح بيدو اليسرى كرشو عكس امثالى شارد الزهن ومستعجل واليد على الراس نظام الحكه الخفيفه وبى اصبع واحد .
انا مره سالت واحد دكتور ليش الانسان الضعيف لما بتكلم بحك راسو فقالى لانو هزالة جسمو وقلة دمو وضعف رشاشات قلبو ما بيصل الدم بعض مناطق المخيخ ومن هنا لا شعوريا بحك المنطقة المتصحره حتى يمر منه القليل من الدم وبعدها المومورى بتاعتو بتشتغل . على العموم طرحك جميل وشوف اخوانا المغتربين اهل الكروش والقروش والمابعمل حسابو منهم بدو شاكوش.
ود
ك
م
ب
ا
ل
معتز الريح
01-08-2007, 10:41 PM
يا اخوانا خوفتونا عديل كرش وصلعه وحاجات تانية حامياني. الفينا مكفينا غربة وعذاب وعزوبية وكمان جبتو ليها كرش وصلع اها العلاج كيف. وما في وقاية يا دكتور معتز.

ود الطاهر قال جنك موز .. بطل أكل الموز الكتير ..
والباقي مقدور عليهو ..
عماد عبدالشكور
01-08-2007, 10:45 PM
يا معتز الريح كان عندنا حل كان نزلنا كروشنا اول
كان عرفت الحل ما تبخل علينا
معتز الريح
01-08-2007, 10:45 PM
ثانيا- المكرش بالو واسع وطبعو هادى ..

المكرش بالو واسع وكمان هدومو واسعة ..
معتز الريح
08-08-2007, 09:36 PM
يا معتز الريح كان عندنا حل كان نزلنا كروشنا اول
كان عرفت الحل ما تبخل علينا

الحبيب عماد ..
والله عارف السُنة المحمدية دي ما خلت حاجة ..
عليك بصيام الاتنين والخميس .. وافطر خفيف ..

شهرين بس وتكون اتخلصت منها ..
طبعاً شهرين في حالة كرشك تكون حجمها معقول ..
أبو مهدي371
09-08-2007, 12:50 AM
اخي معتز والله صحي مواضيعك كلها في الصميم .
انا عندي قريبا لي ماجل عرسوا عشان ينزل كرشوا كلما خطيبتوا تقول ليه خلاص انزل نزوج يقل ليها شويه معرجه .
ومن دربي دا بخليه يطبق تمارينك دي وربنا يفرجها عليه وعلي الباقين .
معتز الريح
09-08-2007, 01:18 AM
ماجل عرسوا عشان ينزل كرشوا .

والله قريبك مشكلتو مشكلة ..
مكرش كمان قبل العرس ..
أها بعد العرس تبقى شنو ..

الكرش باقية عليهو.. اللحق نفسو ويعرس ..