"شكـــــــراً يـــا حمــــــادة"

[سوباوي]

"شـــــــكراً يـــا حمـــــادة"

هكذا قالها الفنان الموسيقار وردي للفنان الموسيقار محمد الأمين ...

أنه لقاء القمم .. أنا شخصياً لا زالت النشوة تملؤني ولم أفق بعد ..

لمن حضرة سهرة الأمس بتلفزيون السودان الخاصة بالبيوبيل الذهبي

للأستاذ الموسيقار "وردي" قمة المتعة

ياجماعة الحضر السهرة ونشوتو فكت يحكي لينا..

[معتز الريح]

الحبيب سوباوي
السهرة كانت أكثر من رائعه ..
اعجبني التفاعل .. الجميع تفاعل مع الجميع ..
زاد احترامي وتقديري لوردي الفنان ..
وأحترمت كل من شارك معه ..

أدمعت عيناه .. وهو يرى ما فعله بصوته
من محبة وعشق وتقدير ..

تخريمة ..
وزادت محبتي لوزيرة الصحة ..

[عثمان جلالة]

الحبيب سوباوي
السهرة كانت أكثر من رائعه ..
اعجبني التفاعل .. الجميع تفاعل مع الجميع ..
زاد احترامي وتقديري لوردي الفنان ..
وأحترمت كل من شارك معه ..

أدمعت عيناه .. وهو يرى ما فعله بصوته
من محبة وعشق وتقدير ..

تخريمة ..
وزادت محبتي لوزيرة الصحة ..

الرائع سوباوي أنا مع رأي معتز ما عدا تخريمة وزيرة الصحة دي ... لأنو وزيرة داخليتنا ... موجودة
كم هو رائع وطني ... بروعة مبدعيه ... ولكن ... سيكون القادم أجمل:p

[ود ام تريبات]

لكل الذين اعطو لهذا الوكن ما اعطو من حب لهم جميعاً ولوردي الفنان الرائع كل التقدير وعقبال مليون سنة من امتاع هذا الشعب الجميل ..

[الموسيقار]

وزادت محبتي لوزيرة الصحة

سويتها ظاااااااااهره يا معتز :D :D

[صلاح ودالطاهر]

نحن لينا الله وعشة السوق مع دوامات السجم وعمال السكه رماد
بعنا فلان بابخس الاثمان

[معتز الريح]

سويتها ظاااااااااهره يا معتز :D :D

الحبيب الموسيقار ..
والله أكبرت مشاركتها في اليوبيل الذهبي لوردي ..
لها كل الود

[zoolfrda]

حقيقة يا سوباوي سهرة ولا في الأحلام

وكنت أُمَنِّي النفس (زي ما كان بيقول الكابلي) لو طالت مدتها أكثر فهي لا تمل

وأُمَنِّي النفس (دي حقتي أنا) لو تم إعادتها أكثر من مرة

[معتز الريح]

لم يعجبي كلام الأستاذ عبدالكريم الكابلي
عندما ذكر أنه شارك في خمسين حسن عطية .. رحمه الله
وشارك في خمسين أحمد المصطفى .. رحمه الله
وفاته أن يشارك في خمسين إبراهيم عوض .. رحمه الله
فمن ذكرهم غادروا الحياة ..

وفال سيئ لصاحب اليوبيل وردي ..

الغريبة أنو كليييم (صيغة مبالغة زي كلّااااااام)

[مدنيّة]

كانت ليلة بين عملاقين وكفي

[طارق محمد الحسن]

يااخى الكريم وردى النيل الابيض ووداللمين النيل االازرق يعنى لمن يتلاقو بيكون فى سيل من الابداع اللامتناهى فالتحية لوردى ولود اللمين والتحية لكل من حضر هذا الحفل

[سوباوي]

الجميل معتز الريح ..

نعم يا معتز الجميع كان متفاعلاً .. وكان والإحساس ولأول مرة وأنا أرى الأستاذ

محمد وردي خارجاً من غروره الذي يستحقه عن جدارة ليرتفع آلاف الأميال في قلوب

محبيه وهو متربع يستمع إلى أغنياته من زملائه الرائعين .. كم أعجبني صوت الفنان

سيف الجامعة بقوته ونبرته الواثقة ..

فيما يخص التخريمة بتاعتك :

ياخي "تابيتي" دي زولة بتحب الفرح ومليانة نغم ووين ما كان الجمال تلاقيها متقرفصة

بمحاذاته .. آها موش ليها حق تكون محاذاة وردي .. لها احترامي وتقديري .. وأنا ذاتي في

روحي دي محبتي ليها ووين ما تبقى عاملة لونها الأبنوسي وثقتها السمحة دي .

عميم مودة وهميم احترام وكن بخير .. بخير أبداً ..

[سوباوي]

الأليف جلالة ..

حقاً يا صاحبي القادم حتماً سيكون أروع .. طالما أنه لا زال بداخلنا إحساس طروب

وإذن نضيفة تستمع إلى هؤلاء العمالقة بذات قدرهم .. أما فيما يخص تخريمة معتز

الريح وموضوع وزيرة داخليتكم .. ياخي قول أي حاجة عاوز تقولها وخلي الباقي

علينا وكان سألتك قول ليها سوباوي قال ..

"الموسيقى خمرٌ حلال والمنتشي في ذمة الواعي"

سامق تحياتي .. وقيل عافية ..

[سوباوي]

الندي .. ود أم تريبات ..

يا عزيزي والتحية لك أنت أيضاً .. وأنا بعتبر أي زول عاصر غنا وردي وسمعه

سمع جد .. جد .. بيكون ترك في ذائقته بصمة فنية أنيقة يرجع الشكر فيها لهذا

الموسيقار القامة .. وبعدين أم تريبات دي قرية فنانة جداً وناسها مليانين فن

ومبدعين .. يعني زي ولدكم أبو اليسر ده لو سمعته بدون ما تشوفوا بتراهن

بعمرك على أن الذي يغني هو زيدان .. وزي الطيب الزبير ده زول عالم في مجال

الزراعة وفنان جداً قصاد عمله .. وللحديث بقية إلى حين لقاء مؤجل بيننا مؤكد

أنا سننجزه .

عاطر تحياتي .. وكن كما أشتهي لك من أمنيات ..

[سوباوي]

المحترم الموسيقار ...

يا زول خلي معتز ياخذ راحته واليبقى على فتوتي الأديتة للجميل جلالة عشرة

وأنتا ذاتك أبقى عليها ألف : "الموسيقى خمرٌ حلال والمنتشي في ذمة الواعي"

مرحق تحياتي .. وكن متعافي وبخير ..

[سوباوي]

الأليف . . صلاح ود الطاهر ..

أزيك يا زول يا فنان .. أنت ليك الله والسهرة المعادة قطع شك ولو أتلحت

تلفزيون السودان مؤكد أنهم سيعيدونها ألف مرة .. لأنو ما في للحصل بين

ود الأمين ووردي شبيه ..

تحياتي يازول ياراقي وأبقى متعافي وطيب ..

[سوباوي]

الوريف .. الزول الفردة ..

ويا زول نحنا ذاتنا كنا بنمني النفس أنو رياح جمال سهرة أمس دي تلفح لينا الناس

السمحين الزيك ديل ويجو عابرين هذا الجمال من هنا .. ويسجل ليهم التاريخ هذا

الحضور والمعاصرة لهؤلاء العمالقة .. وكمان أنا بسجل ليك "أمني النفس" دي

بأنها ماركة خاصة وعلامة مميزة للزول الفردة .. وكابلي ما تشيل همو بنباصروا

ليك وبنشوتو بعدد واحد نص وما يقدر يحتجة عليك أبداً ..

مشذى تحياتي يا زول يا فردة وتغشاك المحبة وتظللك ..

[سوباوي]

الجميلة .. مدنية ..

نعم أنه لقاء العمالقة .. يعني ديل أمس عذبوا الموسيقى دي في عمرها ..

وود الأمين ده نقرش العود بمزاج لما وردي راح في دنيا تاني .. أهل الفن

ديل ما لم يدروشوا بدخلوا من باب غنى وبيطلعوا من باب حضرة مموسقة ..

تخلي وردي ينتشي في رقبتو ويقول لود الأمين "شكراً يا حمادة" وشكراً ليك

برضو أنتي يا مدنية وتزين خطوتك هذا البوست أكيد ..

مؤكد تحياتي وسامق احترامي ..

[سوباوي]

الزاهي .. طارق محمد الحسن ..

أزيك يا زول يا راقي وكيفن حالك عساك طيبة .. وكما قلت ديل نيل وبحر فن

يغرق جيل باكمله ولجة موسيقى لا قبل إلا للعارفين بها .. وتساب أنغامو يغرق

بلد بحالو وكمين وطن .. شكراً لحضورك الأنيق هنا يا طارق .. وأنت يازول شفيف

وصاحب قلم طاعم لكن غيباتك طويلة وأنا متابع جيد لما تكتب ..

شامخ تحياتي وكن بخير .. بخير ما أمكن ..

[سوباوي]

صرخ المولود في ذاك المساء 19 يوليو في العام 1932 في قرية صاي و«الداية»

تخرجه من رحم امه.. استمعت الى الصرخة لكنها قطعا قد انتبهت الى ان ثمة تغييرفي

هذا الصوت الذي ليس ككل الاصوات، ولعلها بعد سنوات طوال تأكد لها ان ظنها قد تأكد،

لقد كان الطفل المولود يومها ـ محمد ـ الذي هو الآن محمد عثمان وردي.

من صاي عام 1932 في بيت عادي جدا كانت بداية رحلة «عبقري» لم تنته ولن تنتهي..

وهنا جزء من حديث الذي نشر بجريدة الصحافة بمناسبة الأحتفالية بشمعته الـ "74"

والقول لضيوفه ومعجبيه على لسانه :

طول عمري بنحني للشعب السوداني وهذه انحناءة اخرى ربما كان البعض يظن ان

المشوار سهل لكنه لم يكن كذلك انا وصلت الخرطوم وعمري «25» سنة ولا داعي

لان نكذب على الناس في العمر انا وصلت و«25» سنة هنا ودلوقت 2006 يعني

عمري بالتمام والكمال «74» سنة تخللت هذا العمر احداث كثيرة مثيرة مفرحة

ومزعجة فلنبدأ من البداية بداية انا كنت اعتقد اني غير محظوظ في هذه الدنيا لاني

فقدت والدي وانا صغير جدا لم ارَ امي وابي فاتني في عمر الثامنة ولكن ايضا اهلي

قاموا بواجبهم نحو هذا الصغير اليتيم ولم يقصروا ابدا في حقي لكن تقمصني الغناء

في عمر السادسة يعني وانا في عمر احفادي ديل كنت بغني «يعني عندي جنون بتاع غنا»

من صغري خالص اتعلمت الطمبور قبل ما اخش المدرسة الابتدائية وكنت ملقب بزول

«همبيا الغنائي» كنت بغني وكان الناظر بيقول لما يلاقيني بغني مع الاولاد «انت بتقول

ايه يا محمد» كان ما بيعرف عربي بقول ليهو انا بمدح يقول ما شاء الله صوتك حلو».

وهكذا تدرجت وتعلمت قبل ما اصل الخرطوم وكان ذلك في 19 يوليو 1957 الذي

صادف يوم عيد ميلادي كان يوم اختياري للاذاعة وكان الطريق ليس سالكا مثل الآن

هناك اساطين الغناء عبد العزيز داؤود وحسن عطية واحمد المصطفى وعثمان حسين

وابراهيم عوض يعني مش من السهل انك تاخد ليك مساحة في الوسط الفني لكن الحمد لله

وفقت بما لي من خلفية حضارية وجدت اهلي النوبيين احتضنوني في الاول خصوصا اهالي

حلفا وبعد ذلك وجدت اني يجب ان احصل زملائي الفنانين فكانت المنافسة حصرية فدخلت

المنافسة وتنافست ونوفست وفي العام 1958 قرر مدير الاذاعة آنذاك ان يجمع كبار

الفنانين منهم الاساتذة احمد المصطفى وعثمان حسين والكاشف وحسن عطية وقال ليهم

الولد دا حالة غريبة في خلال سنة انتج اكثر من «17» اغنية والحالة دي ما مرت علي..

ايه رايكم نديهو الدرجة الاولى ونشوف اذا نفع نفع ما نفع نرجعه للدرجة الرابعة.

الحل دا كان تشجيع والفنانين كلهم وافقوا ووفقت في ان اكون في الدرجة الاولى منذ ذاك

التاريخ والمشوار كان طويل وليس مفروش بالورود كان فيهو اعتقالات وسجون

وتفاعل مع الجماهير.. نوفمبر واكتوبر ومايو وابريل وهكذا عشنا الـ 74 سنة، وصلنا

الى هذه المرحلة من العمل واتمنى ان اكون في باقي العمر معطاء في حكم الشعب

السوداني الذي وقف معي حينما مرضت وغبت وعدت وهو يقف معي حتى الآن هذه

هي بعض ملامح قصة الحياة الطويلة التي ارجو ان تطول مع الصحة لكي استطيع

ان اقدم للشعب السوداني الكريم الذي اتمنى له الوحدة والوئام والانسجام وان نتوحد

شرقا وغربا وشمالا وجنوبا واشكر كل الذين قاموا بهذا الاحتفال من محبي وردي

الوطن ومن اناس مجهولين لا يعرفهم احد.

[سوباوي]

بس يا جماعة شوفوا لمتهم هو ود الأمين ده كوم ولمتهم وهو كجاري ده كوم براهو

يعني لما يتلاقوى كجراي ووردي في ناصية نص ويتجابدوا فوقوا الأثنين كجراي بفمرداته

الأنيقة ووردي بصوته وألحانه الطروبة ياخ ده عالم تاني من الجمال وفي غمرة هذا

الفرح لا ننسى كل الذين كتبوا لوردي أو وردي غنى لهم وعلى رأسهم كجراي فلنقف لهم

احتراما وإجلالاً وهنا جزء من سيرة كجراي .. الرجاء من الذين يعرفون أكثر مني أن

يصوبواكل أخطاء هذا البوست وهذه هي السيرة الذاتية التي كتبها الشاعر في صدر

ديوانه الشعري الأول الصمـت و الـرمـاد ) الصادر في عام 1961م ، حيـث كـتب نشأت

في بيئة دينية صرف. وكان والدي رحمه الله من المتشددين في الدين، يأخذ اولاده بالشدة

التي تبلغ احياناً حد القسوة، فكان يأمرنا ونحن اخوة اربعة، ان نصحو في الرابعة لصلاة

الصبح جماعة، ثم نوقد المصابيح ونخرج الواحنا ونقرأ أجزاءً من القرأن الكريم مكتوبة

على الالواح. ونظل على ذلك حتى الساعة السابعة صباحاً، ثم نعرض القراءة غيباً على

والدنا. والويل لمن لم يكن يحفظ لوحه فإنه عرضه للعقاب الصارم. وبعد تناول الإفطار

نذهب إلى المدرسة، فاذا عدنا ظهراً أخذنا في كتابة أجزاء جديدة على الألواح. وهناك

درس بعد صلاة العصر. ودرس بعد صلاة العشاء يشمل الفقه والتوحيد وقراءة القرآن.

ويستمر ذلك أحياناً حتى منتصف الليل. في الرابعة عشرة كنت قد حفظت القرآن وأتممت

المدرسة الاولية، فارسلني والدي أنا واخوتي الى ام درمان للدراسة في معهدها الديني.

وقضيت في المعهد خمس سنوات. وعندما رأى والدي وكان متزوجا من اربع نساء،

ان يسرح والدتي اضطررت للانقطاع عن الدراسة. ودخلت معترك الحياة واشتغلت في

التجارة برأسمال بسيط لأعول والدتي. لكن الدكان الصغير الذي افتتحته احترق ايام الحرب،

حينما امر المستر (لي) حاكم القضارف بحرق القرية التي اتخذتها موطناً لتجارتي، إذ اتهم

اهلها بأنهم يهربون الاسلحة من الحدود الحبشية الى منطقة القضارف، فاشعل الجنود النار

في القرية ليلاً بعد أن امروا السكان بالخروج منها، دون ان يأخذوا شيئاً من امتعتهم.

ولم تكن الاسلحة تستعمل لطرد الانجليز من السودان، بل كان الناس يستعملونها للصيد.

وكان الصيد محرماً في زمن الانجليز وهو مورد مهم للرزق في تلك القرية.

عدت للقضارف خاوي الوفاض. وقدمت طلباً الى مفتش تعليم المديرية لاشغل وظيفة مساعد

مدرس عام 1947م، فقبل طلبي وتلقيت تدريباً على التعليم في معهد بخت الرضا(4).

[حسن سادة]

ليلة كانت ليلة
من أجمل ليالي العمر
تلاقت فيها القمم وأعادت إلى الأذهان
ذكريات الزمن الجميل
وعهد العمالقة
متعك الله بموفور العافية
يا من داعبت أنامله الذهبية
أوتار العود حتى كاد أن ينطق سحراً
لك الله يا ود الأمين وأنت تصاحب وردي
في لو بهمسة ونور العين
كم أعشقك يا ود الأمين
أيها الأسمر الجميل الفتان
يا ساحر المنظر
أحيي كل الذين تألقوا ليلة البارحة
عبر التلفاز وفاء بعطاء وردى الأيقونة
وكم أعشق تلك الزهرات الأنيقات اللائي
كن يرددن يا طير يا طاير

[محمد أحمد الشيخ]

مشكور يا سوباوي يا راقي علي هذا البوست الجميل
صراحة كنت حضور لهذه السهرة ونشوتي فكت يادوب
كانت قمه لهرمان شامخان من أعمدت الفن في بلادي

تخريمه ( يا معتز الريح داير تدخلنا السجن ولا شنو ........ ما تسيب الحيكومه في حالا )

[معتز الريح]

تخريمه ( يا معتز الريح داير تدخلنا السجن ولا شنو ........ ما تسيب الحيكومه في حالا )

يا محمد باسطة ..
والله الوزيرة دي نوارة الحكومة .. وكمان كلامه كلام ..
وعاجباني ثقتها في نفسها .. وماليه مركزها .. وبريدها لله ياخي ..
معليش يا سوباوي .. خرمنا ليك كتير ..

[مهيرة]

خوفي منك تنساني وتنسي الليالي

وجدت نفسي أتناول ريموت التسجيل بنشوة عادت بي
الي أيام الطفولة وأنا أرنم مع الوالدة أغنيات وردي
القمر بوبا وخوفي منك وبعد إيه في راديو المطبخ ...

كانت الفرحة سبقت هذه السهرة المتفردة في لونيتها
بوجود هلال رجب في السماء ساطعا حين سطر أبناؤه في
الأرض وعلي أستاد أمدرمان حكاية زمان وروعة حضور
عادت وفجرت أنوثة أمدرمان ونخوة جميع أهل السودان لتزغرد عن بكرة أبيها بهيبة
المريخ وعنفوانه الهادر في مصر وسطوع قمر حولنا مباشرة الي تلفزيون
السودان لنتابع هذا اللقاء والألق التاريخي ....

ماتخجلي يا السمحة قومي استعجلي .. الله عليك يا كابلي !!
رددها كابلي ورقص معها كل من في المسرح وخاصة الأستاذ البروفسير
عالم الموسيقي العالمية السوداني الجنسية ( ... الماحي ) عذرا لنسيان الإسم الأول
ليلة اليوبيل الذهبي لوردي كانت قمة فعلا أخي سوباوي ..
كانت لوحة محمد الأمين في خوفي منك سبحت بنا في عوالم أخري
وهو يرددها مع وردي ...
وكانت ليلة وفاء بحق
وهي امتداد لليالي أخري حتي نهاية العام كما ذكر في الحفل ..
كانت الفرحة فرحتين من الهلال والمريخ ووفاء وردي ..

شكرا حمادة .. طرب وردي مع محمد الأمين في ترديد خوفي منك
ولمن لم يسمع هذا التريد فلقد فاته أجمل طرب ولوحة فن ظهرت في
الشاشة البلورية علي مر السنين ...

شكرا حمددة ووردي وسوباوي

[مهيرة]

خـــوفي منك تنساني وتنسي الليالي

وجدت نفسي أتناول ريموت التسجيل بنشوة عادت بي
الي أيام الطفولة وأنا أرنم مع الوالدة أغنيات وردي
القمر بوبا وخوفي منك وبعد إيه في راديو المطبخ ...

كانت الفرحة سبقت هذه السهرة المتفردة في لونيتها
بوجود هلال رجب في السماء ساطعا حين سطر أبناؤه في
الأرض وعلي أستاد أمدرمان حكاية زمان وروعة حضور
عادت وفجرت أنوثة أمدرمان ونخوة جميع أهل السودان لتزغرد عن بكرة أبيها بهيبة
المريخ وعنفوانه الهادر في مصر وسطوع قمر حوّلنا مباشرة الي تلفزيون
السودان لنتابع هذا اللقاء والألق التاريخي ....

ماتخجلي يا السمحة قومي استعجلي .. الله عليك يا كابلي !!
رددها كابلي ورقص معها كل من في المسرح وخاصة الأستاذ البروفسير
عالم الموسيقي العالمية السوداني الجنسية ( ........ ) عذرا لنسيان الإسم ..
ليلة اليوبيل الذهبي لوردي كانت قمة فعلا أخي سوباوي ..
كانت لوحة محمد الأمين في خوفي منك سبحت بنا في عوالم أخري
وهو يرددها مع وردي ...
وكانت ليلة وفاء بحق
وهي امتداد لليالي أخري حتي نهاية العام كما ذكر في الحفل ..
كانت الفرحة فرحتين من الهلال والمريخ ووفاء وردي ..

شكرا حمادة .. طرب وردي مع محمد الأمين في ترديد خوفي منك
ولمن لم يسمع هذا التريد فلقد فاته أجمل طرب ولوحة فن ظهرت في
الشاشة البلورية علي مر السنين ...

شكرا حمادة ووردي وسوباوي

[نزار حسن محمد]

الحبيب ..مجاهد (سوباوى)

استمتعت بمشاهدة الفنان هشام ثم سيف الجامعه ثم الكابلى ..مع العلم كان مواعيد حضورى للمطار لمغادرة ارض الوطن الساعه 12 حضور للمطار عندما بداء المسيقار ود الامين بالعزف كانت امام الباب للخروج ..صدقونى لم استطيع الخروج رجعت ثانى للثلفزيون والجميع ينادينى نزار مواعيد المطار جات ..قالت ليهم خلى الطائر تفوت وما بتحرك من هنا الا محمد الامين يبداء بالغناء ..تحركت الى المطار وقد تجاوزت الساعه الواحد ونصف ..وحصلت الطائره ..وانا اترنم خوفى منك ..خوفى تنسانى وتنسا الليالى ...

[سوباوي]

الموقر .. حسن سادة ..

دعني يا سيدي في البداية .. أن أنحني تأدباً ليراعك المتزن .. وأنيق ما تكتبه من

مواضيع زاكية .. هنا فقط فرصة لأشكرك ضمن كرنفال هذا الشكر تجاه كل مبدعينا ..

وأنت أحدهم .. أما عن الأساتذة "وردي .. ود الأمين .. زيدان .. عبد الكريم الكابلي ..

سيف الجامعة .. هشام" فأنها كانت أمسية تريقت فينا كل ما خدشته ورش السمكرة

الغنائية مؤخراً .. أنهم أساتذة حقاً أعطوا ما أعطوا ورسخوا في آذاننا رهافة وحاسة

موسيقية .. لن يحظى بها غير من سمعهم حقيقةً ..

أنيق هذا البوست بوجودك أخي حسن سادة وجميل أنا بكم وبسيرة تلك السهرة التحفة

والتي ستظل أصدائها بالدواخل دوماً ..

مؤكد تحياتي .. وكن بحوزتك كل الامنيات ،،،

[سوباوي]

الأليف .. محمد أحمد الشيخ ..

أزيك وكيف حالك وعساك طيب .. شفتة يا ود الشيخ أي زول يغرق زيك كده في بحر

السهرة دي أنا بكون قاطع شكو في أنو زول فنان ورهافتو عالية .. وطالما أنت يادوب

نشوتك فكت فقطع شك رهافتك حدها السماء ..

وشكراً لك أنت أيضاً ولحضورك الزاهي هنا ونعم يا صاحبي أنها قمة لعمالقة الفن

في بلادي ..

وأما فيما يخص تخريمة صاحبنا معتز الريح ياخ بس ممكن يقيموا عليهو حد

الجمال ويرجع ينتشي تاني ..

خالص تحياتي .. وكن بخير أينما كنت ..

[سوباوي]

الجميل .. معتز الريح ..

ياخي البوست ده حقك .. وأي حاجة عايز تعملها فيهو أعملها .. وخرم

على كيفك وحب وزيرة الصحة ووردي ود الأمين والبلد بحالها ..

حبهم كلهم يا معتز لله أو لشيء في نفسك ما فرقت .. الحب دربوا واحد ..

وعبي لي معاك عبارين محبة ومحل رهيفة تنقده ..

والمنتشي في ذمة الواعي ..

مرحق تحياتي وكن بالجوار ما أمكن ..

[سوباوي]

الموقرة . . مهيـــرة ..

ولوجه الأفراح نقول أياً من نغم ينام ببطن النأي تكون خيوط إشراقه في أنامل عازفه ..

وأياً من فن ينام بروح الإبداع يكون صوت الفنان فجر حقيقته ..

"ما تخجلي يا السمحة قومي استعجلي" ودي يا مهيرة غنية لها في الخاطر وقعها

الخاص وأشكرك هنا قصادها وأشكر كابلي ووردي .. وأعتب على أجهزة إعلامنا في

عدم احتفاتهم بشعراء بلادنا فهذا النص الرائع للشاعر الراحل له الرحمة حسن

عبد الوهاب ومن هنا أقف له إجلالاً وأدعو الله أن يسكنه فسيح جناته .. يا سلام

عليك يا مهيرة .. "خوفي منك" وده عالم من الجمال لا يصمد أمامه إلا المرهفين ..

ما أجملك يا سيدتي وأنتي تدغمين أفراح البلد بمريخها وهلالها وأساتذة فنها في آن

واحد .. ما هو أنا قبيل قلت لمعتز الريح ياخي المحبة دي دربها واحد كان في الله

وكان في شيتاً تاني ياها بتطلع من القلب ..

وكان الله طلق الضراع بنزل هنا مجموعة أغاني وردي وأسماء شعرائها لأنهم

يستحقون .. وشكراً لك أنتي أيضاً يا مهيرة ولك بحوزتي فراسخ مودة وقواسيب احترام ..

مؤنق تحياتي وكوني بخير وين ما كنتي ..

[حسن سادة]

الموقر .. حسن سادة ..

دعني يا سيدي في البداية .. أن أنحني تأدباً ليراعك المتزن .. وأنيق ما تكتبه من

مواضيع زاكية .. هنا فقط فرصة لأشكرك ضمن كرنفال هذا الشكر تجاه كل مبدعينا ..

وأنت أحدهم .. أما عن الأساتذة "وردي .. ود الأمين .. زيدان .. عبد الكريم الكابلي ..

سيف الجامعة .. هشام" فأنها كانت أمسية تريقت فينا كل ما خدشته ورش السمكرة

الغنائية مؤخراً .. أنهم أساتذة حقاً أعطوا ما أعطوا ورسخوا في آذاننا رهافة وحاسة

موسيقية .. لن يحظى بها غير من سمعهم حقيقةً ..

أنيق هذا البوست بوجودك أخي حسن سادة وجميل أنا بكم وبسيرة تلك السهرة التحفة

والتي ستظل أصدائها بالدواخل دوماً ..

مؤكد تحياتي .. وكن بحوزتك كل الامنيات ،،،


في غمرة فرحتي العارمة التي إجتاحتني كالسيول الهادرة
عندما إستمعت إلى أيقونة الغناء ورمز الطرب وهرم الإبداع
ود الأمين فقد نسيت تماماً أن أحيي صاحب البوست المتفرد سوباوي
يا من أفردت شراع الريد ومنحتنا عبر هذا المنتدى مساحة
نجتر فيها ذكريات إبداعات معشوقنا ود الأمين
وجعلتنا :
" شفنا المشاعر الحلوة
فى ساحاتنا بى الآمال مشن
فيقيني أيها العزيز سوباوي إنك:
"انت ما نسمة فى الهجير
انت ما راحة ضمير
انت ما بهجة مشاعر
انت ما رحلة عبير
انت ماياكا الامير"
إلهي ما أجمل هذا الإسم سوباوي
"حروف إسمك جمال الفال
وراحة البال
وهجعة زول بعد ترحال
وتنية حلوة للشبال
وغنيتنا ومشاويرنا
وموالنا اللي منا بيتقال "

أقول ليها عيونك

فإليك الود والتحية
ذي سواد قدري
مكحِّـله عمري من بدري
بترع لولي وعقد ياقوت

وألتفت تارة لمعلم السودان البارز
الأسطورة ود الأمين وأقول هامساً له:

"قلبى حاذرك ومن زمان سائل عليــك
كلو لمسة فى خيالى عن جمالك هى فيك
قبل ماشوفك كنت فاكر الريد مستحيل
كنت هايم فى طريق خالى طوييل
لليلى دون الناس كللو ااهات ولويل
تشهد الايام ويشهد الليل والنحيب
قلبى عاشق ودربى خالى من حبيب
قلبي عاشق ودربى خالى من حبيب
لكن يا
حــــبــــيــــبــــــــى ود الأمين
من يوم ماشفتك قلبى للدنيا ابتسم
اشرقت دنياى وفارق دربى الهم
فى انتـــــظـــــــــــــارك
ياحبيى رايح ارعاك بى حنانى
القى فى قربك سعادتى وانسى
تعذيبى وهوانى يبغرو العشاق
من هوانا فرحة الريد والامانى
ياحبيبى عشت لليا وعشت ليك
هاك عهدى وهات ايديك
وحياة غرامى اهدى عمرى
وروحى ليك
انــــا روحى ليك

متعك الله بموفور الصحة والعافية يا حبيب
الملايين ود الأمين وأطال في عمرك المديد
يا سيد روحي والإحساس حـــــمــــــــــادة

[سوباوي]

الراقي .. نزار ..

خوفي .. خوفي منك .. يا سلام يا نزار ياخ .. ده كان فن وجمال يستاهل تفوت

ليه الرحلة وتحلق فيه ويحلق بيك الخاطر فوق كل الممكنات ومتى ما ينتهي

ود الأمين ووردي من سحرهم ستجد نفسك بأي أرض شئت .. فتخرج من باب

جمال إلى أي اتجاه تحب .. هكذا أنت عزيزي نزار ود حسن وكما قلت هنا أنه

جمال لا يحتمله إلا ذوي الرهافة العالية .. أنا أتخيل لي يا نزار وردي ود الأمين

ديل المفروض هم يكونوا المقاس البتفرز بيهو الإنسان البيعرف في الفن من

الما بيعرف .. يا خي ديل مدرسة مجنونة جن ..

شكراً لك يا صاحبي لوجودك المتوقع بهذا البوست .. وكن يا نزار أينما حل

الجمال وعليك وعلينا بهائه وضيائه وموسيقاه ..

معطر تحياتي .. وكن بالف خير ..

[سوباوي]

أول غرام

للشاعر / علي ميرغني

غناء/محمد وردي

**********

أول غرام

يا أجمل هدية

يا أنبل مودة

يا نور عينية


حبي ما هديتو

وغيرك ماصطفيتو

واجمل من عيونك في الكون ما رأيتو

***

لونك أبهى لون

وكفاك العيون

آه للإبتسامة

كالنغم الحنون

نظراتك لهيب

وتثير الشجون


ليه قلبي سليتو

وبالآم رميتو

قول لي يا شرود ايه ذنبي الجنيتو

***

نسيت ضو القمر

في أجمل ليالي

وشعاع النجوم

يبهر كاللآلي

كيف تنسى النسايم

وانا حبي المثالي



قول ليه نسيتو

مع إنك رويتو

جورك يا ظلوم لله اشتكيتو

انا ما زلت هايم

اذكر طيف جمالك

اواصل الليل نهار

اسبح بخصالك

وماضي الذكرى عاد

يسجد لدلالك


تعال يا من هويتو

وشوف حالي الأذيتو

رفقا بدموعي والحب البنيتو
---------------------------------------------------------------

القمر بوبا

للشاعر/ اسماعيل حسن

غناء/ محمد وردي

*****************

الصغيرة شجيرة الأراك

ياقمر عشرة الفي سماك

شاغلة روحي وقلبي المعاك

وين لقيتك لامن آباك

القمر بوبا عليك تقيل


العيون الما بدمعن

نامن أو صاحيات يبرقن

لا بصيدن لا بعشقن

سرهن في الجوف يحرقن

كشفن رموشن أو غمضن

كلو موت ماتقول برحمن

القمر بوبا عليك تقيل


الصغيرون الما كبير

الرقيبة قزازة عصير

السنون براقن يشين

العيون متل الفناجين

مابتحش قشة تناقير

مابتشيل جردل على الزير

الزراب فوقا تقول حرير

شتتي شبار يامضمير

خلي قلوب الصبيان تطير

انتي ريحتك دمور فرير

ولا بت السودان اصيل

القمر بوبا عليك تقيل


الجزير ام بحرا حما

فيك روحي وحبي النما

مابسيبا ان بقا في السما

ما بخلي الناس تظلما

روحي في دربك سالمة

يا غرق يا جيت حازمة

القمر بوبا عليك تقيل


القديما قديما الحمام

الوديزين في موجو عام

يا مرايقة قليلة كلام

وا حلاتا تقول السلام

القمر بوبا عليك تقيل


الغزال الفوق في السلم

المحبة تزيد الألم

كل يوم اصبح لي في هم

سيسبان عودك منظم

شمعدان نفسك يامختم

البرتكان نهدك مدردم

القمر بوبا عليك تقيل


الصغيرون ام الجنا

ياكريم ربي تسلما

تبعد الشر من حلتا

جنة للأم الولدتا

الفي جبل عرفات وضعتا

تسلم البطن الجابتا

دي ترباية حبوبتا

التميرة الفي سبيطتا

الصفار صابغ خضرتا

معزورة امها كان دستا

وا هلاكي النار شافتا

معزباني انا ود حلتا

القمر بوبا عليك تقيل


الدفيفيق الدابو ني

البسيمتو بتكويني كي

اهلو ضنو عليها وعلي

حبها النساني والدي

ما بخليك ان بقيت حي

يا قصيبة السكر الني

نهدك الما رضع جني

ووب على امك ووبين علي

القمر بوبا عليك تقيل

الديوان الديمة مقشوش

بالزهور والورد معروش

بالحرير الأصلي مفروش

ريحتو مايقوما بلا رتوش

كان دا وصفو ماهو مغشوش

قدروا الساكنينو في الحوش

القمر بوبا عليك تقيل

بحر الدمير العض ونزل

مرة يسقي الفل والنخل

فيهو عام وزينا وقدل

ياهنينة البيك عقلي انشغل

بعت روحي عشان ليك اصل

وانت ابعد لي من زحل

يا قمر بوبا عليك تقيل


المبارك شيخ الضهر

العليك ساسكت وفتر

قلي جنيت ولا دستر

واي أنا المرضان مكنتر

جابو لي حكيم خير وشر

قلي يا زول مرضك كتر

سببك كم شلاخا خضر

القمر بوبا عليك تقيل

[سوباوي]

شعبك اقوى واكبر

للشاعر/ محجوب شريف

غناء/ محمد وردي
****************
ظلم عمرو اتحدد

أيام اكتوبر تشهد

الفترة الحالكة الماضية

في تاريخك مابتجدد

عهد فسادو

واستبدادو

الله لا عادو

يهدم صرح الوادي الأخضر يابلادي

شعبك أقوى واكبر

مما كان العدو يتصور


أرواحنا دماهم هانت

لإرادة شعب وكانت

وهبوها بطيبة خاطر

ومعالم الزين ازدانت

تشفي جراحنا

رمز كفاحنا

ضد الغصب المستهتر يابلادي

شعبك أقوى واكبر

مما كان العدو يتصور


من أقصى شمال بلادي

لأقصى جنوب الوادي

نعمل للوطن الواحد

ايادي اخلاص ومبادي

اشتراكية

سودانية

من واقعتا بل من اكثر يابلادي

شعبك أقوى واكبر

مما كان العدو يتصور


تعاهدك يابلادي حاتي

بلإخلاصي للحرية

واحارب من اجلك ذاتي

أعدائك والرجعية

تصبحي دار

للأحرار

ينعم فيكي شعبي الأسمر يابلادي

شعبك أقوى واكبر

مما كان العدو يتصور
------------------------------------------------------------------------


سليم الذوق

الشاعر /ابراهيم الرشيد

غناء/ محمد وردي
*****************

يا سليم الذوق لو تعرف الشوق

ابقى انزل يوم من علاك الفوق

شوف عمايل الحب في الحشا المحروق


انا كالأنسام لم تهدا تروق

وان كالأضواء بعد كل شروق

لو بتذكرنا كنا نحنا ندوق

للسعادة طعم في رضا المعشوق


انحنا حلفناك بالغرام والريد

بي صفا الأحلام في عيون الغيد

وبالقليب الضاق لذة التسهيد

ابقى زاورنا حتى يوم العيد


ياأمل بسام دابو هال جديد

تخلي شوقنا الضال في ثواني يزيد

بعتاب صامت يشبه التغريد

نبقى نار في نارو لي لهيبا نزيد
---------------------------------------------------------------


تاجوج

للشاعر/ محمد عثمان كجراى

غناء/ الفنان محمد وردي
****************

قليبي المنو اصلو شقاي ريدي

يزيد الهم علي يسفح وريدي

يعشق بالألم نبرة قصيدي

دي تاجوج متلقت يا خملة زيدي


تمر المحنة زي ضل السحابة

حروف اسمك نغم يسقي الغلابة

حروف اسمك بشارة خير حبابة

حروف اسمك حليفة وغنا الصبابة


مع الأيام يزيد حسنك نضارة

عشان عينيك تخضر الصحارى

بوصف ليكي ألحان العذارى

نعيش باقي العمر في الريد سكارى


نخوض بحر الهموم نبحر نعدي

نقابل بالثبات موج التحدي

سنين العمر تاخد وما بتدي

ودربك لشاطي النور يودي
-------------------------------------------------------


ياسلام منك انا اه

للشاعر/اسماعيل حسن

غناء/ الفنان محمد وردي
***************

يا سلام منك أنا آه

يا سلام ..ياسلام

العيون فيها سهام

والكلام فيهو كلام

في حديثك

في ابتسامتك

زينة يا أحلى غرام


لديارك جيت يا روحي ليك أزور

ومن كلام الناس والله قد ضاع السرور

في إيدية

ليك هدية

سامحيني

واعذريني

واقبليها يا بدور


العواذل قالو ليك

قالو إيه

قالو بحب

والله إنتي وبس

إنتي في قلب المحب

هددوني

ألموني

عذبوني

بدلوني الفرحة نار وهيام يوم الغرام


إنتي لونك

وإنتي طبعك

هادي ما فيهو البشين

تشبهي الفل في الجناين

حتى عطرك ياسمين

ربي يعلم

كم قلبي مغرم

إنت ترحم

بين ضلوعي النار تقيد

دا حرام والله حرام
------------------------------------------------------------


يلا وتعال يلا

للشاعر/ اسحق الحلنقى

غناء/ الفنان محمد وردي
*************************

يلا وتعال يلا

نهاجر في بلاد الله

ننسى الناس ينسونا

والله ننسى الناس ينسونا

وفوقنا الطيبة تتدلا


نعيش زي الطيور ماتعيش

وتفرد لجناها الريش

تضمنا عشة الريدة

ويفوت فوقنا الغمام تعريش


نفوت من سكة رواحة

ونتوه من واحة لواحة

شتيلة ريدنا يا حنين

يضون بهجة في الساحة

حلاوة الدنيا تلقاها

تجينا سحابة شايلاها

دروبنا تلم وريدنا يتم

وانت تقولي يا آهة


ونرتاح من كلام قالو

ومن عينو دمعتين سالو

آثار الهم نطويهو

نخلي الفرح بدالو


يلا وتعال يلا

نهاجر في بلاد الله

ننسى الناس ينسونا

والله ننسى الناس ينسونا

وفوقنا الطيبة تتدلا
-----------------------------------------------------------

ياناسينا

للشاعر الراحل/ حسن عبد الوهاب

غناء/ الفنان محمد وردي
*****************

حبيبي الدنيا دي الفراقة

والله الدنيا دي الفراقة

المشتاق مع المشتاقة

يا الله تاني وين نتلاقى

يا ناسينا يا مجافينا حن علينا


حبيب مشتاق اشوف عينيك

وشعرك موج على خديك

هناي في بسمتك ..في وقفتك.. في مشيك

بالغالي العزيز أفديك

يا ناسينا يا مجافينا حن علينا


عارف قلبو ما بنساني

عزاي في الدنيا بس يطراني

تجي للعذول الجاني

فرق بينا ليه يا زماني

يا ناسينا يا مجافينا حن علينا


كل ما أميل أجد ذكراه

بين الروض عرفت شذاه

في دنيا الغرام أهواه

كن نسايني ما بنساه

يا ناسينا يا مجافينا حن علينا


الجو قلبي احتلاه

صبحي مساي دوام اطراه

فارق دربي ما هماه

يا الله تاني وين القاه

يا ناسينا يا مجافينا حن علينا



بفرش ليك قلبي وسادة

وازقيك من غرامي سعادة

لو عاد الحنين يالسادة

أقضي عمري فيك عبادة

يا ناسينا يا مجافينا حن علينا
----------------------------------------------------------------------------

حرمت الحب والريده

للشاعر/ الطاهر ابراهيم

غناء/ الفنان محمد وردي
********************

قست الدنيا علية

وجافى النوم عينية

مع هجرانك لية

حالفة تغدري بية


ليه صديتي يا ظالمة

واتناسيتي يا حالمة

يا زهر حياتي ربيعي

روحي في هواكم هايمة

حرمت الحب والريدة

برضي ما أرضيت

صعبان علي وحياتك

ياريت لو ماحبيت


فكري الحيرتيهو

وعقلي الودرتيهو

صوني وعدك ليهو

أوعك تخلفي بيهو

حرمت الحب والريدة

برضي ما أرضيت

صعبان علي وحياتك

ياريت لو ماحبيت


خليتيني في حيرة

وما راعيتي الجيرة

والله أنا جارك وانتي

يا جارة بهواكي رغم الغيرة

حرمت الحب والريدة

برضي ما أرضيت

صعبان علي وحياتك

ياريت لو ماحبيت


ليه صديتي يا ظالمة

واتناسيتي يا حالمة

يا زهر حياتي ربيعي

روحي في هواكم هايمة

حرمت الحب والريدة

برضي ما أرضيت

صعبان علي وحياتك

ياريت لو ماحبيت


الحب والريدة

رمز الحب والريدة

أنا برضي ما أرضيت

صعبان علي وحياتك

ياريت لو ماحبيت
------------------------------------------------------------------


سلم مفاتيح البلد

للشاعر/ محمد المكي ابراهيم

غناء/ الفنان محمد وردي
********************

عليك الزحف متقدم

وليك الشعب متحزم ومتلملم

يقول سلم

سلم ومابتسلم

رحمت متين عشان ترحم؟

سلم مفاتيح البلد

سلم عباياتنا وملافحنا

مصاحفنا ومسابحنا

جوامعنا وكنايسنا

سلم مفاتيح البلد



تراث أجدادنا سلمنا

عقول أولادنا سلمنا

بنادقنا البتضربنا

الموجهة لي صدورنا

وبرضو حقتنا

سلمنا

سلم مفاتيح البلد



سلمنا الزمان الضاع

ليل الغربة والأوجاع

أحزانا العشناها

مع الوطن العزيز الجاع

سلم مفاتيح البلد



حتهرب وين من الألم الكبير والجوع

من تعليمك المدفوع

ومن شعبا سقاك لبنو سقيتو من الهوان والجوع

يا ساقي سمك المنبوع

سلم مفاتيح البلد



حتهرب وين من الذكرى وعذاباتها

ومن لبن الأمومة ومن حساب الرب

حتهرب وين وانت ايدينك الإتنين ملوثة دم

فصيح الدم ينضم وبتكلم يقول سلم

سلم مفاتيح البلد

[ود ام تريبات]

الندي .. ود أم تريبات ..

يا عزيزي والتحية لك أنت أيضاً .. وأنا بعتبر أي زول عاصر غنا وردي وسمعه

سمع جد .. جد .. بيكون ترك في ذائقته بصمة فنية أنيقة يرجع الشكر فيها لهذا

الموسيقار القامة .. وبعدين أم تريبات دي قرية فنانة جداً وناسها مليانين فن

ومبدعين .. يعني زي ولدكم أبو اليسر ده لو سمعته بدون ما تشوفوا بتراهن

بعمرك على أن الذي يغني هو زيدان .. وزي الطيب الزبير ده زول عالم في مجال

الزراعة وفنان جداً قصاد عمله .. وللحديث بقية إلى حين لقاء مؤجل بيننا مؤكد

أنا سننجزه .

عاطر تحياتي .. وكن كما أشتهي لك من أمنيات ..

سوباوي
ايها الرائع روعة هذه الارض البكر

خالص التحايا لك من ام تريبات عموماً واتحايا خاصة امتزجت بعبق ارض الرهد الطيبة لك من استاذي / الطيب الزبير والرائع ابو اليسر يوسف ..

وتشتاقك عيوننا فلنلتقي لتتقد فينا كل الزكريات وترانيم الماضي يرددها همس المستقبل وضجيج الحاضر يرتب سلم موسيقى الحياة ... فلتختلط جميها لتفوح منها روعة اللقاء في المدى القريب باذن الله ...

لك الحب كجدارية مروية راسخة على في قلب التاريخ

[فراس]

الغالي سوباوي
كل عام وانت بخير وربنا احقق امانيك
وجدت البوست قبل ايام واستحضرته اليوم وانا اشاهد
في سهرة جميلة جمعت العملاقين بالاضافة للعملاق
استاذ شمو اتمني ان تكون تابعتها لان تلفزيون السودان
ابدع في هذه السهرة الرائعة التي قدمها المذيع اللامع
الطيب عبد الماجد واضاف لها بعدا جماليا اخر
ودمت بكل الخير

[محمد هاشم]

والله سهرة جميلة جد والله ومفعمة بالابداع

[ابوالنور]

وفضلنا وحاتك منتظرين