اسعار الاراضي السكنية

[محمد عبدالرحمن]

انا مغترب وبستفسر عن اسعار الاراضي السكنية في مدينة ودمدني
من لديه معرفة ودراية بها على حسب الحي والسعر فليخبرني
<<<< وجزاكم الله خيراً >>>>

[المعلم]

والله انا ماعلى درايه واسعة لكن ممكن اديك معلومه يمكن تفيدك اتباعت قطعة ارض في حي الزمالك 700 م2 بمائة مليون جنيه قديم فبعد داك انت ممكن تقيس على كده.

[أبو مهدي371]

لكن لعلمي التام بعد ان انخفضت اسعار الاراضي السكنية بالخرطوم لاسباب اجتماعية واقتصادية ورجوع السكان الي مساقط رؤوسهم زادت اسعار الاراضي بكل المدن السودانية
وخاصة مدني .
وانا والله ببحث عن قطعة ارض بمدني يكون السعر معقول وفلوسي جاهزة لكن بشرط ان يكون المالك الاصلي موجود حتي لا تظهر لي مشاكل عند التسجيل .

[مرتضى ساتى]

باختصار
المنيره ده حى جنب الجامعه او اللقد القديم من 60 مليون وطالع
الاندلس جنب المقابر وامتداد النشيشيبه 40مليون وطالع
الزمالك من 100 مليون وطالع
الواحه امتداد سينما الزمالك 100مليون وطالع
مايو نص 30مليون وطالع
الدرجه امتداد سباق الخيل 30 مليون وطالع
حنتوب والشرق 20 مليون وطالع
عتره 10 وطالع
بواسطة جهاز المغتربيين بمدنى كريبه ود المجدوب وشرق الشرق 2 مليون وطالع
بواسطة العلاقات والواسطة بلاش واحذرك من السماسره فى شارع الجمهوريه

[مرتضى ساتى]

ابومهدى 371 والله انا ما عرف 371 دى مليون ولاشنو ؟بضحك معاك ياحبيب
المالك الاصلى دى تمام التمام لو حصلت بس السماسره مشكله كبيره ده فى البدايه بظهر ليك واحد شايل الورق وبعد البيعه تقرب تتم بظهروا ليك عشره وكل واحد يشيل الورق يديه للثانى ويقولوا ليك عايزين حقنا
المهم ربنا يوفق الجميع

[أبو مهدي371]

الاستاذ مرتضي ساتي اولا لك التحية .
ثانيا لغيت لي موضوع بالمنتدي الرياضي وماسالتك عشان انا مكتوب عضوا برصاص لكن ليك علي اول ماتدوني دبورة يعني بورنزية تشوف شوف .
اما عن الرقم 371 هو اغلاء من ان يكون بالملائين .
هذا رقمي بكلية الاقتصاد جامعة الجزيرة الدفعة 20 لذلك ماذلت احمله في عقلي وللعلم كل ارقامي السريه تحمل هذا الرقم ما عدا رقم الدخول للاميل عشان ماتمش تشوفوا .

[خالد أحمد الصول]

يا زول العمليه بقت جد و خلاص طبعا نحنا الخدمات دي ما بلوشي يعني تعدي علي العبد لله و تخت ليهو 200 الف و تقول ليهو عليك الله إتوصي لينا بي قطعة ناصية فاتحة في شارعين .. بعدين أنا بقول ليك و حرم و علي الطلاق الكلام ده المتين دي ما بتجيبوا ليك أصلوا أنا معاي ناس كتار السلامي بشيل و الريس علي الاقل عايز النص و بعدين ده شغل كتير يا زول شيل قروشك دي إفتح الله و حرم أنا لو عايز أقشك كنت شلتها منك و شفت ليك قطعة في موبي

[ابوندى]

يعنى ما نفكر نشترى اراضى ولا شنو
واتساءل ,,,,,,,,, هل لاحداث الخرطوم الاخيرة علاقة بغلاء الاراضى بمدنى ,,,, ولا شنو
افــيـــــــــــــــــــــــــــــــــــــــــــــ ــدونـــــــــــــــــــــــــــــــــــــــــــــ ــــا

[محمد فايز]

انا بنصحك اتصل بي تاجر اسمو فايز عوض دي تلفونو00249912530418

[أبو مهدي371]

اخي محمد فايز لك التحية لكن هل لك علاقة به والا الاسماء متشابهة فقط حتى يتثني لنا ضمان كلامه . وتشكر علي المعلومة .

[مرتضى ساتى]

اوعى من السماسره انا بحذركم للمره المائه واشتري من صاحب الحق عديل

[علياء]

افيدونا باسعار اىراضى فى مدنى قطعة ناصية 500 متر فى موقع راقى

[مرتضى يوسف العركي]

الاخ محمد عبد الرحمن
استاذنا ود الصول
الاخ ود ساتي ابو الرضاويض
بقية الاخوة المتداخلون
اولا باركوا لي اخيرا عندي قطعة في ود مدني اشتريتها في حي الواحة الراقي الما بشبهني اطلاقا طبعا دي فقط مرحلة عشان اخمرها سنتين ثلاثة وابيعها واشوف لي بيت جاهز يشبهني في انحاء المدينة الاخرى الاقل بعيدا عن غابات الاسمنت والمهم يكون فيها حوش هبابي والباب متاكى بعود ...
وحقيقي اسعار الاراضي نار في مدني وما عايز اقول انها ما بتستحق كل هذا الغلاء فهي بالفعل غالية في كل شيء
ما تفضل به الاخوة من تقديرات هي صحيحة ومع اني جيت قبل فترة بسيطة فالامر فالامر اعلى شوية من هذه التقديرات ربما يكون موسم الاجازات بيرفع الامر حبتين .
الاخت علياء ربما القطعة الناصية وعلى شارع رئيس اغلى كثيرا من القطعة داخل الحي ...
التحية لكم مجددا وانشاء الله يدينا خير هذه القطعة ويكفينا شرها .

[اسامة]

ما يلفظ من قول إلا لديه رقيب عتيد
الراجل مافية اى كلام

[خالد أحمد الصول]

خربانة أم بنايا قش ... زي ما قال أبونا الشيخ فرح و دتكتوك
عليك الله أسع الحتة دي ما كانت لقد ساكت و كنت يا حلمابي لو عاوز فيها فدان تشاور كدة و يدوك ليها ... كل زيرا وليهو كيزانو

[admin]

يا زول العمليه بقت جد و خلاص طبعا نحنا الخدمات دي ما بلوشي يعني تعدي علي العبد لله و تخت ليهو 200 الف و تقول ليهو عليك الله إتوصي لينا بي قطعة ناصية فاتحة في شارعين .. بعدين أنا بقول ليك و حرم و علي الطلاق الكلام ده المتين دي ما بتجيبوا ليك أصلوا أنا معاي ناس كتار السلامي بشيل و الريس علي الاقل عايز النص و بعدين ده شغل كتير يا زول شيل قروشك دي إفتح الله و حرم أنا لو عايز أقشك كنت شلتها منك و شفت ليك قطعة في موبي

الريس القديم ولا الجديد العندو نص السمسرة

[مدنيّة]

يا زول العمليه بقت جد و خلاص طبعا نحنا الخدمات دي ما بلوشي يعني تعدي علي العبد لله و تخت ليهو 200 الف و تقول ليهو عليك الله إتوصي لينا بي قطعة ناصية فاتحة في شارعين

صول سودان شوف لي مافي زول عايز ليه اراضي في الخرتوووووم :D

[((أبــوعاذر))]

انا برشح ليك واحد اسمه عبدالله عبدالمحمود شغال في الغابات
بس الا تقول عاوز الشريف ده الاسم معروف بيه ورقمه مامتاكد الا ادورة وابعثوا ليك
الغابات لصق الموقف العام

[الزبير محمد عبدالفضيل]

الاخ ابو مهدي لك التحيه

مدينة ودمدني الان كل الاراضي فيها غاليه خاصه في موسم الاجازات تكون الاسعار مرتفعه

مثل الاحياء درجه اولي الزمالك # المنيره او حي الجامعه # الاندلس # المطار #حنتوب

وطبعا الان لايوجد توزيع اراضي الا الشراء من المالك وحذري من السماسره والمستندات

المضروبه ونقول ربنا يوفقك بقطعه ارض تكون مناسبه وعلي المزاج



ولك التحيه

[mahagoub]

يا زول لم قروشك وانزل براك بتلاقى المعصور بس ما تستقله شديد

[اسامة]

ممكن توضح لى اكثر الموضوع
ولك الشكر
وهذا هو عنوان المنتدى الخاص بى ارجوا مشاركتك واثراء المنتدى

www.alkaseer1.2araby.com (http://www.alkaseer1.2araby.com)

[مكي محمد صالح]

أنا بأكد على كلام أبوعازر أنو العايز أرض أو عقار يتعامل مع عبد الله عبد المحمود الملقب بالشريف وهو شغال في الغابات وده لي تجربه خاصة معاهو وأصدق شخص يمكن التعامل معه وحقيقة إنسان يحب يساعد قبل التفكير في حقه وأنصح اي شخص بمعرفة هذا الرجل الكنز وأتمنى أن أقابله وأتعامل معه وأي شخص تعامل معه بقول ليك هذا الحديث وبحاول ببحث ليكم عن تلفونه

[اسامة]

اخوانى الاعزاء تفضلوا بدخول منتداى والمشاركة فى المنتدىويكون عامر بيكم

www.alkaseer1.2araby.com (http://www.alkaseer1.2araby.com)

[ناصر عمر دبيب]

اي شي الي السماسرة الزمن دي .............

[بابكر]

السماسره قالوا {{ الكاش بيقلل النقاش }}

[الزمن المريح]

سلامات غايتو ان بقيت عليها تب ما تفوتنا و نحن اهل الجلد و الراس


اعمل حسابك من السماسرة ،،، اقول ليك شىَ كل شىَ قسمة و نصيب و نصيبك بصيبك
لكن ان حبيت المساعدة نحن فى الخدمة طوالى ،، خصوصا مايو نص ،،،،،، ناصة و ميدان \\\

[طارق بانقا]

والله موضوع البيوت والاراضي بعمل نفسيات انا واحد من الناس زاتي مكتوي بيه المهم شوفو لينا تلفون الشريف

[معتصم عيدروس]

نتمنى لو تم دمج هذا البوست مع العقارية .. وتثبيت العقارية ليستفيد منها الجميع

[كمال احمد]

والله نصيحه لجميع الاخوان بالمنتدى وعن تجربه حزارى ثم حزارى تشترى ورق على انه ارض بالشرق وحزارى من ثلاثه او اربعه سماسره شايلين الورق وماشين مع بعض وحزارى من السماسره الموجودين فى دكان فائز عوض للاقشه الهم هل بلغت

[صلاح الدين حسن عمر]

عندي منزل غير مكتمل (ثلاثة غرف وهول وصالون كله مسقوف عقد / ناقص السور والحمامات) في بركات النموذجية..
أتمنى ألقى مبادل في مدني، أو كم يساوي إذا عرضته للبيع؟

[أبوربا]

الاخوة الافاضل ربما كانت مشاركتي متأخرة قليلا ولكن أسعار الأراضي حسب أسعار عيد الاضحى المبارك 2014:
1/وسط المدينة(ودمدني القديمة) الارض الفاضية تعرض مابين 230إلى 300مليون) الطلب قليل على الأرض
2/الاحياء الجديدة غرب مدني الأندلس الكريبة درجة أولى مابين 500مليون إلى مليار...
3/سباق الخيل سابقا مابين 90مليون ألى 200مليون في المربعات الممتازة
4/شرق مدني ...أرخص القطع في مدني....بين 20 الى 500 مليون حسب موقع القطعة ومربعها
5/الحي الشرقي وهو اغلى سعرا في مدني ...الزمالك والواحة والمطار والمنيرة مابين 700 ألى مليار ونصف المليار
6/مايومربعات 241و242 بيوت جاهزة مابين 700الى 900مليون//////مايو وسط وجنوب وطرف واركويت مابين 300 الي 600
7/دردق وتعتبر اكثر طلبا في السوق لكبر شوارعها ومساحة بيوتها كذلك من السهل وجود نص بين مساحته 277متر....البيت النص بنيان قديم مابين230 الى 250مليون...بيت كامل قديم 540متر مابين 400 الى 500 حسب الموقع...بيت نص بنيان عقد وسايفون مابين 350الى 500 بيت كامل 540متر عقد وسايفون بين 800الى مليار....هذه اسعار اكتوبر 2014
السواد الاعظم من السمسارة مشكلة مهما كانت سمعتهم في السوق ...الا من رحم ربي....مع التوفيق