نيل وآه

[مازن الجمّال]

وقفت هناك سحبت حجر
وشلتو وجيت عليك يا نيل
بدور احكيلك المصرور
قبل يطلع علينا فجر
قعدت عليو بديت أشرب
نسيم الليل سرحت أجر
واعاين للشدر في القيف
بيضحك مبتسم مُنشر
هو كان فرحان هو كان مالو !
بعاين ليو وشيشو يصُر
بديت أغرق واشوف احلام
وجمبي النيل كأنو فتر
واتاوق للأرض بعدت
هناك فاتت ولبست توب
خدار ممزوج بلون أسود
شدر صفصاف عليها طروب
لكزت النيل بدور أرقد
فترت من القعاد منصوب
وفتّح لي عيونو حُمر
وقالي الخير وشن مطلوب
وقالي كمان متين نمت
فترت عديل وقلت الروب
خجلت كمان أبيت أنضم
وشايف النوم غشاو يادوب
وقفت أشابي للقمرة
بدور ألمس وشيشا كمان
وضحكت بي خجل بعدت
وساقت للنجوم بحنان
عرفت السر وكان الغيم
بجرجر في الرجول كسلان
سرحت معاو سواده عجيب
سواد هماً غشانا زمان
وعشعش في القليب خيّم
وبدّل فرحي بالأحزان
هربت بعيد بدور أنسى
لقيت الرملة فاردة امان
فرشت عليها صنقرت
بديت أرسم حلم ممدود
مدن أفراح ابت تتلم
عجاجاً فرزعك مقصود
رسمت قلوب وفيها سهام
بتنزف والجرح مقدود
ومرة رسيم وشيش مبهم
ملان آلام حدود وسدود
رسمت سحاب وراه شمس
بتوعد فينا لينا تجود
مسحت جميع رسوم إيدي
رقدت بعيد شريط معيود
وتعبت عيني من الشوف
وحلفت باليمين بتنوم
وهبت فوقي نسمة جميلة
زادت فيني حب النوم
وفجأة صحيت لقيتو صباح
وكان الهم حداي مردوم
وشلتو لبست توب الغم
ده ما بالكيف مصير محتوم
مسكت دريبي راجع ليو
وبحلم بكرة أحسن يوم
كلام الليل بِجيه نهار
بيمسحو بي كلام مسموم

[صديق بلال]

تسلم على هذه الكلمات الجميلة الرومانسية... فكل من يقرأها لا بد أن يعيش في جو هذه الكلمات المعبرة بما تصفه من وجدانيات يعشقها كل من يحب الجمال... وتسلم مرة أخرى يا أخي الكريم... وزدنا من هذه النسمات العليلة... وأتحفنا بكل ما هو جديد.. ونحن على موعد...

[مازن الجمّال]

تسلم على هذه الكلمات الجميلة الرومانسية... فكل من يقرأها لا بد أن يعيش في جو هذه الكلمات المعبرة بما تصفه من وجدانيات يعشقها كل من يحب الجمال... وتسلم مرة أخرى يا أخي الكريم... وزدنا من هذه النسمات العليلة... وأتحفنا بكل ما هو جديد.. ونحن على موعد...

وخوف يا نيل
بنرجع ليك من تاني
ونشبع روحنا منك كم
ونوصل كل حنينا زمان
ونرتع في شواطى اللم
بس المدسوس وراك يا هم
بيطلع لينا تاني سجم
ونرجع من جديد نسبح
في خوف معتم نهايتو الغم

العزيز صديق
كلماتك شملت كل الجمال

تحياتي ومودتي

[عثمان جلالة]

حبيبنا الجمال ... كل ما تباعد .. بينا عوارض كل ما هواك ... يا نيلنا ... مكني ... لك الحب .. والنيل .. والشوق .... وشد الحيل ... وشكرا كتير بالحيل

[معتز الريح]

قعدت عليو بديت أشرب
نسيم الليل سرحت أجر
واعاين للشدر في القيف
بيضحك مبتسم مُنشر
هو كان فرحان هو كان مالو !
بعاين ليو وشيشو يصُر
بديت أغرق واشوف احلام
وجمبي النيل كأنو فتر
واتاوق للأرض بعدت
هناك فاتت ولبست توب
خدار ممزوج بلون أسود
شدر صفصاف عليها طروب
لكزت النيل بدور أرقد
فترت من القعاد منصوب


إبداع جميل .. ووصف أجمل ..
سهولة الكلمات وجمال معاني..

لك التحية

[مازن الجمّال]

حبيبنا الجمال ... كل ما تباعد .. بينا عوارض كل ما هواك ... يا نيلنا ... مكني ... لك الحب .. والنيل .. والشوق .... وشد الحيل ... وشكرا كتير بالحيل


وقال النيل
كلاما عن حياتنا زمان
مدن افراح نهارا طويل
وشمسا بالحقيقة امان
وحبا يروي كل الناس
بدون ألوان يفيض بحنان

الحبيب جلالة
حضورك كلو جمال
تسلم يا جميل

[مازن الجمّال]

إبداع جميل .. ووصف أجمل ..
سهولة الكلمات وجمال معاني..

لك التحية

زمان يا نيل
سمر في الليل
وضحكة مدوية وترتيل
وونسة شلة بين احباب
وغنوة حنينة شادة الحيل
وشوق لشليل


العزيز معتز
وجودك معاي هو الاجمل

تحياتي يا عزيز

[طاهر بدر]

مازن ود الجمالاب: عافي
فى معرض مدارى على ثقافة مدنى استوقفتنى كثيرا ... من وحى البوح والنيل والليل ...قفز الى الخاطر شاعرنا الراحل الدوش فكان صديق النيل عند الضيق ومحدث الليل والنجوم عندما يبلغ ضيقه الحلقوم وهو القائل :

إتخيّلي الأنهار
ماصابْها أيّ مَرَض
وإتخيلي الأكوان
في مهرجان مسْحور
هَدَتْ النجوم للأرْض
واتخيليني وحيد
و أنا فاتني يوم العَرْض
يا نيل صبي وممْشوق
من بهجَة الأمواج
في زفّهْ مُنْسابَهْ
طارت سحابات شوق
لِمْسَت حَشَا الغابَهْ
طارت طيور بِ الكوم
طافت على الاشجار
لِقَتْ النخيل محْموم
غنّت مع الساهرين
غنّت غُنا العاشقين
" يا ماشي فوق النيل
هاكْ الجمال منديل
يا جايي من النيل
هاكْ النخيل اكليل"
واتْخيّليني وحيــــد
أنا والجروف
والسيــــل
وايضا :
سحابات الهموم يا ليل
بَكَن
بين السُكات والقول
وباقات النجوم الجَّن
يعزَّن فى المطر
فاتِن عزاكْ
رَجعَن
كان دائما ما يلقى احماله وهمومه على "البحر" النيل ويتحدث الى النجوم

رقدتَ على البحر غنيتْ
مليت احزاني بالأمواج
جرحْتَ الدنيا بالدوبيت
جريت لي ساحَة الشُهداء
لقيتُم لا وطن لا بيت
دخلتَ منازِل الأُمّات
وطلّيتْ لي شقاء الاخوات
مرقتَ كأني زولاً مات
لقيتْ أطفالي في الشارع
بيجروا على أمل واقِع
رقدْتَ على البحر غنّيت
شكرا لك مازن فقد نبشت قصيدتك التى حادثت فيها النيل ليلا واصبحت وكأنك لم تلق ثقلا بل عدت بالهموم اكوام... كل هذا التداعى نبش ذكرى وطريقة الدوش فى مناغمة الحزن والهم مع الليل والنيل

[مازن الجمّال]

العزيز الجميل طاهر ود بدر
لك مني اجمل التحايا المعطرة بريحة النيل وطعم الطين الحر الاصيل
ولشاعرنا الراحل المقيم ابدا

وهاك يا نيل
كلاماً منبعو الاحساس
ومن قلبا بشوف اسود
عماه تعب سفر كنّاس
وهاك وعداً قطعتو يمين
بجيك راجع وابوس الراس
ده شوقك ديمة في ذكراي
وليك يا نيل عظيم احساس