ان شاء الله القيامة تقوم للاستاذ حسن الزبير + شادول

[مصعب الريح]

إنشاء الله القيامة تقوم

القيامة (1حسن الزبير
إنشاء الله القيامة تقوم 000 عشان ريدك معاي ما يدوم
ناس سهرانه طوالي 000وناس طوال الليالي تنوم
أشوف أنا كيف حسابك يطول 000 علي الوعد الدوام ممطول
وأنا الشايف كثير أحباب 000 بعيشوا الريدة عرض وطول
أنا الشايل دوام همك 000 وأريدك ريدة ذي أمك
وأغير من غيرتي ذاتا عليك 000 أخاف أنا يا الخفيف دمك
إنشاء الله القيامة تقوم 000 وكل زول يمشي في حالو
عشان ما قلبي يرجع أقول 000 حبيب الدنيا في بالوا
الحسادة تطير (2
*****************
د/ احمد فرح شادول
إنشاء الله الحسادة تطير 000 وأيام السعادة تدوم
والضاق الحزن في الريد 000 بكرة يعيش ويشبع نوم
بتدور القيامة تقوم 000 عشان حظك شقي ومشئوم
وفتحن ليك بنات حواء 000 وجافاك مرة واحدة النوم
بس دائر القيامة تقوم
نحن ولا عرفنا جديد 000 ولا زيك عشقنا الغيد
وحبينا القريب وبعيد 000 ولا ضمانا حضن الليل
مع الوجه البهي وغريد
ولا لليل شكينا حبيب 000 إذا حتي العشقنا عنيد
ولا لينا ابن عوف غني 000 لا الصابر ولا الباكي
خيالك عندي يوماتي 000 صباح خيري ومساء أفراحي
اعد ميعادو بالحظات 000 وسهري معاهو صباحي
عيونك فوق عيوني تنوم 000 وفوق آلامي ترتاحي
وريدك من عواتي الريح 000 المو واضم علي جناحي
وتقول القيامة تقوم
نحن مع السعادة نسير 000 مواكب فرحة هادرة هدير
نأكل حب ونشرب حب ونلبس حب 000 نسو جنحين محبة طير
نعيش الدنيا عرض وطول 000 كبيرنا ملك صغيرنا أمير
وتسمع صوت 000 هتافنا يجيك
إنشاء الله الحسادة تطير 000 وتكبر وتنسي يا زغبير
*****************
القيامة (2)حسن الزبير
إنشاء الله القيامة تقوم 000 وعشمي في الله ما شوية
ادخل جنة الماوي 000 وهناك يدوني حورية
اتكي في الأرائك أنوم 000 بكل حبور وحرية
وارتاح من دا في وقوم 000 وامش جيب لي وجيب لي
أفارقك دنيا المعدوم 000 والقي مطالبي بالنية
ولو حنيت للحم الطير 000 تجيني الطيرة مشوية
عشانك كية يا دكتور000 تكون حوريتي خمرية
يجرجر ديسا دا المردوم 000 ولهجتا خالصة عربية
اخلي ليك بنات حواء 000 تحاحي صباح وعصرية
وتبقي عواطلي يا دكتور 000 هناك لا مرض ولا شكية
هناك لا أذن سمعت 000 ولا بعيونا مرئية
جداول من عسل مشنون 000 هناك كل حاجة أصلية
ولا عشوائي في خرطوم 000 ولا لفحات سمومية
هناك حتي الرحيق مختوم 000 هناك لا قروش وماهية
صفي النية يا مهجوم 000 بلاش هجمات هبوبية
وان شاء الله القيامة تقوم 000 وتنج مئة في المائة
*****************

ما مقبولة أعذارك (2
د/ احمد فرح شادول
ما مقبولة أعذارك 000 وما معروف مصيرك وين
وما هي صالح أعمالك 000 عشان يدوك حوراً عين
وأنت علي الصراط ماشي 000 وشركو ليك بي بنية
حتختل كل حساباتك 000 وتحتل حتلة ابدية
أما لو ضرب حظك 000 وجابوا ليك بنات الحور
تموت واقف علي طولك 000 ويشيلك حيلك المشلول
وتفوت القيامة عليك 000 واقف تتلفت طرب وذهول
ديك قواما سمهر وطول 000 وديك دعج العيون مكحول
وديك من فيها حسن القول000 وديك خليها لي شادول
وديك شعراً كمان خلي 000 قدر ما يذيد نعومة وطول
عذابنا وليلنا فيه يطول
حال الدنيا ما بتدوم 000 مرة تلام ومرة تلوم
ويوم تتعب
مرة تحب وتشبع حب 000 ومرة تحب وما تنحب
في اسعد من تحب وتنحب
***
حسن دنياك لي زى ديل 000 وديل يا صاحبي هن دنياك
يكابرنك ويكبرنك 000 ويشيلنك ويختنك
ويودنك ويجيبنك 000 ويغسلنك ويشربنك
ويبرن عودك 000 المسلوب يحرقنك
تطيب انت 000 ويفوح دنك
تغني الدنيا 000 بي فنك
حسن خليهم السمعوك 000 وارجع لي حلو كلامك
معقول القيامة تقوم 000 قبل ما تلاقي أحلامك