المساعد الشخصي الرقمي

مشاهدة النسخة كاملة : هو.........وهي


القيصر
24-09-2007, 11:37 AM
هي ........

قمت بدري صحيت في عجل
وعست كسري مليت التقل
ورحت أكابس أكوس في الحِلل
وجيت صنقر أحش في البصل
وريحتي ريحـة طير الرخم
وقمت جاري وأخم في الفحم
عيني سـايلي ونفسي إنكتم
كلـو للـدوبال آ السجـم
راجـي جيتك وربع اللحم
جيتني فاضي قفيفتك عـدم
مزرزرني انا في شنو ..؟
تشنفني أنا في شنو ..؟
(2) هو .....
هابشـاني انـا في شنو
نابشـاني انـا لى منو
الشقاوة علي جـات ردوم
وفوق كتوفي انا شايل الهموم
وديمي شـايل الليل مابنوم
والنهار في النهزي وأحوم
وبرضو منك جـاييني لوم
حمدي صرة ولوية خشوم
والنبيشي تجـيني بالكوم
هـابشاني انـا فـي شنو
نـابشاني انـا لى منـو

(3) هي ....
فـوقي تهرج ليه يـا غشيم
مـاني طيرة وبومـة حـريم
وماني عايشي هناك في الخراتيم
ياهـو أكلنـا زمان من قديم
بى ربيـع الكيـلو أب عضيم
بيهـو نفـرك وسـاد الخشيم
يا تجيبـو و يـا تاكلـو نيم
مـزرزرني انـا فـي شنو
مـشنفني انـا فـي شنو
(4)

هو ....
إن نضمتي حديسك مسيخ
وديمي حسك عالي صريخ
وإن سكتي تسوي نفيخ
طوبة وأمشير كاتلاني بالفيخ
وإن نضمت انا يبقى لبيخ
وتبقى حجي هلال ومريخ
دار أخييتو خشمي يا شيخ
دار أسدو أسمنتي بالسيخ
ماب تعرفي تسوي التبيخ
كلو صلصة ومتل الفسيخ
وإن فركتي تفركي فجيخ
التقـولي فـركتي بتيـخ
أشكي وأبكي انا عاد لى منو
مختار بازى
25-09-2007, 10:27 AM
القيصـــــــــــــــر والله العظيم كنت ناوي لي كدي لكن بي معني آخـــــــــــــــــــــر

علي العموم تسم علي الموضوع اللقطــــــــــة

باااااااااااااازي,,,
GREY MAN
25-09-2007, 10:39 AM
يا قيصر ربنا يديك طولة العمر
حبيبة ودمدني
25-09-2007, 11:43 AM
دا شنو الكلام دا يالقيصر
حيرتني كلامك عجيب ورهيب
الله يخليك لينا يالالقيصر
عاشقة الهلال
25-09-2007, 11:51 AM
حرام عليك باسيدي
متخلي الطابق مستور عايز تقنع العزابة ولا شو الحكاية
سواااح
25-09-2007, 11:56 AM
شئ من تراجيديا الواقع
نسال الله الستر
في الدنيا والاخرة ،،
امنية بكري
25-09-2007, 12:18 PM
حاله صععععععععععععبه

وحياة كععععععععععععععععععععبه

لو مشينا بالاسلوب ده مفروض نقنع من عيشتنا

الاحترام اهم شي

وتسلم يا قيصر
القيصر
25-09-2007, 11:59 PM
تسلموا علي المرور يارائعين
والله إدي الصحه والعافيه


والطابق مستور,,,,,,
ودمتم بود يا ..........