ابراهيم عثمان آدم (برهوته) في كندا مهاجرا [الأرشيف]

عزيز عيسى

25-09-2007, 05:59 AM

الأخوة الأعزة الأحباب

السلام عليكم ورحمة الله وبركاته،

أولا كل عام وأنتم بخير ورمضان كريم
ونسأل الله العلي القدير أن يعيد هذا الشهر الكريم
علينا وعليكم جميعا بالخير واليمن والبركات..
إنه جواد كريم رحيم.

بعد غيبة طويلة جئت لكي أسلم عليكم وأنقل لكم الأخبار الجميلة.

الأخ العزيز والزول الجميل جمال ناس أم المدائن ابراهيم – مشرف المنتدى الثقافي وأحد أبناء
جزيرة الفيل بمدينة ودمدني غادر قاهرة المعز يوم 12 سبتمبر الى كندا مهاجرا ليستقر به
الحال في مدينة كالغاري Calgary
إتصلت يوم أمس بالأخ إبراهيم و تحدثت معه لوقت طويل وضحكنا وهو الآن في غاية السعادة
ومبهور جدا بمكان إقامته الجديدة في كندا..
وبدأ يتأقلم تدريجيا مع الجو هناك خاصة فيما يتعلق بمسألة التحول في التوقيت مع النوم Jet Lag
الراجل بعد ما صحصح شوية على طول بدأ يعمل في مقارنة بين (الجوطة) في القاهرة
ويتحدث لي عن النظام والنظافة والهدوء وجمال المباني والسيارات وأشكال الناس الى آخره.
وقال لي والله الواحد جاتو خلعة.
ومن المعروف عن مدينة كالغاري بأنها مشهورة لأنه تجرى بها الألعاب الأولمبية للتزحلق..
وهي منطقة باردة (نخرة كلب) أو بالآصح منطقة تجمد جليدي..
طبعا مازل الفصل يعتبر صيفا هناك.. والخريف على الأبواب.. يعني مطرة وتكسر ثلج.
والزول الحران دا من قولة تيت إبتدأ (يتجرس) ويشكو من البرد..
مع إنه لابس ليه (بردلوبة) ومتلفح بشال وفوق عليهم بطانية صوف وحاجات ثانية هو ذاته ما عارفها.
ومن شدة ما متجرس الليل كله صاحي وكمان (شادي) الكفتيرة في النار ويشرب في الشاي لزوم التدفئة.
ويا ناس السودان الدنيا صيام وعارفين الحر (ظلطكم) وكتلكم عديل..
أها لو عايزين ثلج إتصلوا بإبراهيم يرسلوا ليكم إن شاء الله عبر البريد وحسب الأشكال اللي إنتو
عايزنها.. مكعبات.. مثلثات.. مربعات.. أو بالكوم.. بس كثروا من الشوالات والنشارة.
لكن ما تنسوا دعواتكم له بالتوفيق..
عالم حرانه وعالم بردانة.

امير عبدالباقي

25-09-2007, 06:08 AM

الف مبرك يابراهيم والحمدلله ربنا اداك الفي مرادك وجعل صبرك خير بس اعمل حسابك من البرد
كتر خيرهجره ابراهيم ياودعيسي الجابتك طالي علينا

عزيز عيسى

25-09-2007, 06:18 AM

كتر خيرهجره ابراهيم ياودعيسي الجابتك طالي علينا

الأخ الحبيب الغالي أمير،

الشوق بحر يا زول.. كيف مع الطائف

سألنا كثير عن الناس ولكن لم يسأل عنا أي حد رغم طول الغياب.

كثر خير إبراهيم وعماد أبورجاء وبابكر ودالصول..
الناس الوحيدين اللي بيسألوا عن الناس ويتفقدوها.

تحياتي لأسرتك الكريمة.

سواااح

25-09-2007, 07:35 AM

الخواجة عزيز ..

رمضان كريم
وسلامة الشوفة ..

الغالي هومة ..

الامنيات بالتوفيق
والتسديد والحفظ

دمــــــــــــــــــــتم ،،

فدوى الحسن

25-09-2007, 08:24 AM

الف مبروووووووك يابراهيم والحمدلله ربنا سهل ليك امورك...بالتوفيق للجميع يارب

ورمضان كريم يا عزيز من طول الغيبات جاب الغنائم....

عزيز عيسى

25-09-2007, 09:57 AM

الخواجة عزيز ..

رمضان كريم
وسلامة الشوفة ..

الزول الشفيف الأخ الحبيب سواح،

كيفك يا عريس..
سمعنا إنك تزوجت ودخلت معانا في المعمعة
ألف مبروك أو كما تقول حبوباتنا وأمهاتنا ربنا يهنيكم ويسعدكم
ونشوف جديدكم.

عايزك تمشي الحرم تعمل عمرة خاصة في هذا الشهر الكريم
وتشيل فاتحة قوية لأخونا إبراهيم إنه ربنا يوفقه
في مشوار غربته الجديدة.
والله إبراهيم دا الواحد بيتمنى ليهو كل الخير من جوه قلبه
لأنه إنسان ما ساهل.. يا خي يشعرك بالحنية في كلامه.
والمتعة في الونسة معاهو.

عزيز عيسى

25-09-2007, 10:04 AM

ورمضان كريم يا عزيز من طول الغيبات جاب الغنائم....

الأخت الغالية فدوى الحسن،

رمضان كريم وكل سنة وإنت طيبة،

إن شاء الله جيتي تجيب ناس كثار غايبين..
والبركة في الأخوان والأخوات الجدد
ما شاء الله عليهم مشاركات في القمة
وبسأل كانوا وين زمان.

يا بت الحسن بلغي سلامي على المصطفى صلى الله عليه وسلم.

مودتي وتقديري

Jamal Elmahi

25-09-2007, 08:03 PM

حباب إبراهومه حبابو..
كندا نوّرت ودفت كمان ...إن شاء الله بس ماخليت سكينه وراك ...لأنو كندا من غير كانون كالوست بدون قانون...وبيني وبينك كندا كلها كوانين فبأيها تدفيتم إكتفيتم ...إحذر البرد فإنه قتل أخاكم أباذر ...
قف...لو البرد عصر عليك تعال ناطي لينا في هيوستن حيث الدفء بدون دفايات وكلها فركة كعب...ما كعب عالي ..كعب زاحف لزوم التزحلق علي الايس كريم ...
مشاققه...
نشيد بالتواصل مجسماَ في أخونا الخواجه عزيز ويوم شكرك ما يجي ...

ود الماحي

ابراهيم

25-09-2007, 09:47 PM

حبيبنا الغالي جداً عزيز .. تحياتي واشواقي ..
فعلاً كانت مهاتفة اسيرية فاقت حد الروعة وتحدثنا كثيراً مع بعض الشمارات من هنا وهناك... اما بخصوص الرحلة حقيقة كانت رحلة ممتعة ولا زلت مندهشاً لما وصل اليه العالم من نظام وتطور وبساطة حياة واشياء كثيرة جميلة .. المشكلة الوحيدة هي البرد "السقط" وعزيز بقول لا زال الفصل يعتبر صيفاً .. وانا هندا شايف التلج بي عيني.
لك تقديري ومودتي اخي عزيز لهذا التواصل الجم وربنا يقدرنا نرد ليك الجميل يا عزيز.

صالح ابوشوارب

25-09-2007, 09:49 PM

اولا نبارك لابراهوته الاغتراب الجديد موديل 2007 وعجبنا ونتمنى ليك حياة سعيدة

ابراهيم

25-09-2007, 09:51 PM

امير وينك يا حبيب والله مشتاقين ..
ولينا زمان منك لا في المسنجر ولا في المنتدى
صاحبك ما لميت فيه؟
انا غايتو خليت ليهو البلد ههههههههه

ابراهيم

25-09-2007, 09:53 PM

الغالي العريس سواح ..
نسأل الله لنا جميعاً التوفيق ببركات هذا الشهر الكريم
ولك مودتي

صلاح ودالطاهر

25-09-2007, 09:54 PM

التحية لاخونا عزيز عيسي التحية لاخونا ودالماحي والحمدلله في هجرة اخونا ابراهيم الخلتكم ظهرتو واقول لاخونا ابراهيم الله يديك خيرها ويكفيك شرها والعقبه لينا

ابراهيم

25-09-2007, 09:55 PM

بت الحسن سلامات وشوق كتير
تسلمي علي الدعوات الجميلة وربنا يوفقنا جميعاً في اي زمان ومكان
ولك تقديري

صالح ابوشوارب

25-09-2007, 09:59 PM

ابراهيم

25-09-2007, 10:05 PM

ود الماحي والله بسأل منك كتيير خلاص والله ليك وحشة مستوحشة
قالوا يا ود الماحي كل بلد بي سكينتها .. وبعدين سكينة هناك ما بتقدر على برد هنا:D
بقينا جيران يا الحبيب وزي ما قلت فركة كعب وانشاءالله العيد معاكم...
والله قمة سعادتي في البوست الجمع الطيب من الناس السمحين والغايبين لينا زمن ما شفناهم وهذا تجسيد لروح المعزة والمودة نسأل الله العلي القدير ببركة هذا الشهر الكريم ان يجمعنا جميعاً بهذه الروح والحميمة ولكم دوماً تقديري

ابراهيم

25-09-2007, 10:10 PM

عمنا الحبيب صالح شخصياً ..!!
اول حاجة رمضان كريم
ووالله اجمل حاجة انو عزيز عمل البوست دة عشان نشوفكم ونتبرك بهمساتكم ..
لك تحياتي واحتراماتي عمنا حبيبنا صالح ...

ابراهيم

25-09-2007, 10:14 PM

الغالي والحبيب صلاح ..

لك تحياتي واشواقي والشكر موصول لهم جميعاً ..
وعاجز انا عن التعبير في هذا البوست الذي ملأني سعادة لابعد بوجودكم
لكم عاطر امنياتي

صالح ابوشوارب

25-09-2007, 10:28 PM

الاخ العزيز عم الله جابو (جمال ود الماحى )
والله شفقتنا انت والخواجة .. والحمد لله الشفناك طيب . وذى ما قلت للخواجة والله كنت مجهز بوست خاص للسؤال عنكم ولكن الفلم اتحرق ..ولد اخوك الله جابو تم السنة والان بيتدرب على المشي .. بس اليومين ديل مشغول بالحاجات الجديدة :p اتصلت بجوالك اكثر من مرة 0018328879746 ما بيرد .. تحياتى للاهل وتقبل تحيات الاهل

الفارس البنفسجي

25-09-2007, 10:33 PM

المفرهد الغائب عزيز عيسى

ما دام ابراهومة خلاك تظهر
بنخليه كل يوم يسافر

لك ولعزيزي ابراهومة جليل التحايا وأجملها

مدنيّة

25-09-2007, 10:53 PM

يعني ياابراهيم فضحتنا مع الخواجاااات ديل !!!

اعمل فيها ياخ انك مسخن وكدا وخلي الجرسة علي الاقل في الصيف
غايتو انت في الشتاء الشافك داخل في نار وقاعد اصلووووووو ما كضب

admin

25-09-2007, 11:01 PM

تلش في كندا .. يازول
الف الف حمدلله على سلامة الوصول وان شاءالله البلد رحبت بيك .. والحمدلله الذي حقق حلمك اخيرا .. ونتمني لك التوفيق في حياتك المقبلة.

ابراهيم

25-09-2007, 11:03 PM

المفرهد الغائب عزيز عيسى

ما دام ابراهومة خلاك تظهر
بنخليه كل يوم يسافر

لك ولعزيزي ابراهومة جليل التحايا وأجملها

الحبيب ضياء سلامات يا عزيز
انا لو كنت عارف السفر بلم الناس كدة
كنت سافرت زمان والحمدلله انشاءالله مجتمعين طوالي

ابراهيم

25-09-2007, 11:08 PM

يعني ياابراهيم فضحتنا مع الخواجاااات ديل !!!

اعمل فيها ياخ انك مسخن وكدا وخلي الجرسة علي الاقل في الصيف
غايتو انت في الشتاء الشافك داخل في نار وقاعد اصلووووووو ما كضب

هنا يا مدنية شكلو مافي شتا وصيف وحاجات زي مادام هسي صيف على قول عزيز
تلج في الصيف ومال في الشتاء بجي شنو ...
عموماً الدفايات قاعدة بتأدي الغرض
وبعدين قالو السترة والفضيحة متباريات:D

ابراهيم

25-09-2007, 11:13 PM

تلش في كندا .. يازول
الف الف حمدلله على سلامة الوصول وان شاءالله البلد رحبت بيك .. والحمدلله الذي حقق حلمك اخيرا .. ونتمني لك التوفيق في حياتك المقبلة.

يا آدمن والله ليك شوق منبهل ...
والحمدلله البلد مرحبة بس لسا اخوك ما دخل في المود
في بقايا مصرنة لكن شكلها حتسيح مع التلج
على فكرة انا حمضت فلم السفير وطلع خطير
مع تقديري

نزار حسن محمد

26-09-2007, 01:00 AM

والله ياخوانا ..انا ما مصدق عيونى ..ابراهيم ؛ عزيز الخواجه ؛ ود الماحى ؛ كلهم موجدين هنا
ازيكم ياغالين والله طال علينا فراقكم والله ياغالين
وقدر ما ننسى العلينا برضو مشتاقين ..
اول فى التبادى مشكور ياعزيز على البوست الذى يعج بى رائحة الاحباب ..
ابراهوته ..فى كندا ..خبر الموسم ..ناس جزيرة الفيل ..واقفين طابور فى اللفه جنب النادى باساله
عن عنوان ابراهيم فى كندا ..دايرين فيزاء. وبالعدم دولار كندى.. ابراهوته ..عجبنى وسر بالى يايابا ..والحمدالله السافرته من القاهر ..لى بلاد الله .. ويالله وتعال يالله نها جر فى بلاد الله
بس ما تنسى الناس يا ابرهوته..
وياد الماحى ..الشكيه لبيدان قويه ذى ما قال لك ابوشوارب اكثر من عشرين مره بحاول اتصل عليك لكن الرقم ما بجى معاى ..بالله ما تطول الغيبه.. وعقبال ما نشوف فى هذا البوست الحبيب عمك تنقو والغالى ود الماذون ...
لكم حبى ،،، ودحسن

ابوالنور

26-09-2007, 02:08 AM

برهوته حبيبي ياخي والله عجبنا وعجب عجبنا زاتو ياخي الف مبروك وانشاءالله ربنا يفقك ويدفيك قول امين

عماد عبدالشكور

26-09-2007, 02:44 AM

اخونا ابراهيم ربنا يوفقك ويدفيك قول امين

Jamal Elmahi

26-09-2007, 03:23 AM

الاخ العزيز عم الله جابو (جمال ود الماحى )
والله شفقتنا انت والخواجة .. اتصلت بجوالك اكثر من مرة 0018328879746 ما بيرد .. تحياتى للاهل وتقبل تحيات الاهل

الأخ الحبيب أبو الله جابو
شكراَ لسؤالك عنا وما سعلت منك شينه وياها المحريّه فيك والنيّه واصله ...
الله جابو الله يديهو العافيه براهو منتدي وتلفزيون وتراويح ...وحالتو لسه بتعلم في المشي يعني لما يتعلم ليك الجري إلا تجري تخليهو هو وأمو وباقي الشباب وتمرق بي جلدك قبّال ما الركب تحلج والبلابيط تقع والشرشوف ينقطع ونبقي في حاو وتر...والبسويهو الله جابو يغّلب أجاويدك ...
تحياتي للاسره الكريمه ونجمة إنجاز للشبل الله جابو بأول الخطوات ...

عم الله جابو

Jamal Elmahi

26-09-2007, 03:43 AM

وياد الماحى ..الشكيه لبيدان قويه ذى ما قال لك ابوشوارب اكثر من عشرين مره بحاول اتصل عليك لكن الرقم ما بجى معاى ..بالله ما تطول الغيبه.. وعقبال ما نشوف فى هذا البوست الحبيب عمك تنقو والغالى ود الماذون ...
لكم حبى ،،، ودحسن

أبو النسب الحبيب ود حسن
ليكم وحشه وشكراَ لسؤالكم عنا والنيّه واصله آآآآعشاي ...
رمضان دخل اللحم الحي ووصل العضم وبرضو ربنا يتقبلو ما يطلع صيام الضب النعمنو الجكس عندنا لابس من غير هدوم ومع شوية السخانه دي مرقن المعدوم في سوق الخرتوم وقدر ما تغض الطرف تلقاهو حولك يحوم ولو دا بجرّح الصيام فصيامنا لم يبقي به مكان إلا وفيه طعنة رمح أو ضربه سيف...اللهم إني صائم ...
رغم المشغوليات أيها الحبيب سيكون التواصل...

ود الماحي

عزيز عيسى

26-09-2007, 04:12 AM

.لو البرد عصر عليك تعال ناطي لينا في هيوستن حيث الدفء بدون دفايات وكلها فركة كعب.
ود الماحي

حباب ود الماحي،

هو من هسع الجرسة حصلت مع البرد
إيه رأيك الزول دا نخليه يأخذ نفس شوية وبعد داك نجيبو هيوستن
ونكون فريق كرة قدم إن شاء الله فريق جزيرة الفيل :D

عزيز عيسى

26-09-2007, 04:38 AM

فعلاً كانت مهاتفة اسيرية فاقت حد الروعة وتحدثنا كثيراً مع بعض الشمارات من هنا وهناك....

يازول الشمارات إنت جيت شايلها في شنطتك
المرة الجاية بجيك بي مخلايتي.. :D

والله يا برهوته ما عارف كيف أوصف ليك مدى
سعادتي بوجودك بالقرب منا في كندا..

اما بخصوص الرحلة حقيقة كانت رحلة ممتعة ولا زلت مندهشاً لما وصل اليه العالم من نظام وتطور وبساطة حياة واشياء كثيرة جميلة ..
أها الخلعة راحت ولا لسه موجودة ؟
غايتو لما تزور تورنتو وتجي عندنا هنا في هيوستن
وتشوف جمال الشوارع والخضرة في كل مكان
ستصل الى حد الإندهاش.

قارن بين المترو في القاهرة والمترو عندنا في هيوستن:

http://www2.0zz0.com/2007/09/26/13/41127786.jpg

المشكلة الوحيدة هي البرد "السقط" وعزيز بقول لا زال الفصل يعتبر صيفاً .. وانا هندا شايف التلج بي عيني.
كدي النخوفك من هسع..
هو إنت شفت حاجة.. لما يجي الشتاء
ونتصل بيك بالتلفون غايتو إلا يكسروا منك
التلج حتى نقدر نسمع صوتك.
يازول ما تخاف دا أنا بهظر معاك ساي.

عزيز عيسى

26-09-2007, 04:47 AM

التحية لاخونا عزيز عيسي التحية لاخونا ودالماحي والحمدلله في هجرة اخونا ابراهيم الخلتكم ظهرتو واقول لاخونا ابراهيم الله يديك خيرها ويكفيك شرها والعقبه لينا

الأخ العزيز الأستاذ صلاح ودالطاهر،

تحياتي يا راجل يا جميل،

شكرا على الكلمات الطيبة.. وابراهيم يستحق كل خير..
والله كلنا عجبنا ليه.. أها الزول دا الباقي ليهو العرس.
أسعدني مرورك كثيرا

عمر البشير

26-09-2007, 04:52 AM

ربنا يجعله سفر بر وتقوي ان تنال فيه من العمل والعلم ما يرضي الله ورسوله.
ونسأل الله ان يردك الينا سالما غانما. هو ولي ذلك والقادر عليه.

آمين.

بابكر

26-09-2007, 05:09 AM

[QUOTE=امير عبدالباقي;240439]الف مبرك يابراهيم والحمدلله ربنا اداك الفي مرادك وجعل صبرك خير بس اعمل حسابك من البرد
كتر خيرهجره ابراهيم ياودعيسي الجابتك طالي علينا[/QUOTE

الغالى الفرده الرائع عزيز والله نورت وشرفت وبقدومك حلت البركه وينك يأخى والله واحشنا

وخلونا من غربتكم دى الطولت تقوموا تشيلوا برهوته معاكم كمان !!!!

عزيز عيسى

26-09-2007, 05:23 AM

الاخ العزيز والوفي عزيز ابوعيسي
والله والله انا لي كم يوم بجهز بوست خاص للسؤال عنكم وفعلا بديت اجمع الصور ولكن الله غالب . شالين اللوم والله ولكن غرفكم انت وود الماحى لازالت مسجلة ليكم . لكن المعذرة . مشاكل ناس الله جابو عاملة لينا زحمة . آخر اخبار الله جابو تم السنة في اول رمضان . يا ريت لو تشوفو في اغنية لي نانسي عجرم . تحياتنا للاولاد .

معالي رئيس مجلس الإدارة
السادة الأعضاء والزوار الكرام،

شايفك بقيت رئيس مجلس إدارة
أها تاني نخاطبك بمعاليكم وسعادتكم.. :D
وعقبال رئاسة مجلس إدارة مشروع الجزيرة علشان
تشوف لي أنا وودالمأذون وأختنا مهيرة كل واحد لاندروبل
نفسح بيهن عماد الصادق وأبوالمهتدي وعمك تنقو.

طيب المرة دي نخاطبك بلغة أهل البيت:

الأخ الغالي والحبيب صالح،

رمضان كريم،

الشوق بحر.. والسؤال عنكم بإستمرار..
دائما جايب سيرتك مع ودالماحي إنت وودهاشم
ومعليش سامحونا قصرنا في حقكم.

شايفك بقيت تبحت في القديم وتلملم في صورنا.. إنت فاكر نفسك براك المحتفظ بالصور..
كدي شوف الصورة التحت دي.. مش كان غيرت البروفايل بتاعك.. برضو صورتك
الجميلة بنشيلها دائما في قلوبنا.

http://www2.0zz0.com/2007/09/26/14/49325842.jpg

قادر الله.. لكن ما تقول لي يا ودأبوشوارب.. العمة والشال والوجاهة عندك.

عيد ميلاد سعيد للإبن الله جابو نتمنى ليه عمر مديد ومستقبل زاهر بإذن الله..

وين الإغنية؟ ووين صورة الله جابو؟
لو في طريقة ممكن ترسلها لي على الخاص.
مع تحياتي للأسرة الكريمة

عزيز عيسى

26-09-2007, 05:36 AM

[SIZE=4][COLOR=blue]والله قمة سعادتي في البوست الجمع الطيب من الناس السمحين والغايبين لينا زمن ما شفناهم وهذا تجسيد لروح المعزة والمودة نسأل الله العلي القدير ببركة هذا الشهر الكريم ان يجمعنا جميعاً بهذه الروح والحميمة ولكم دوماً تقديري

إنت يا إبراهيم فرحان براك
كدي شوف أنا وودالماحي حالنا كيف
نرقص اليوم كله وننطط فرحانين بقدومك الى كندا
وظهور الناس الجميلين..
وفي إنتظار البقية.

http://www4.0zz0.com/2007/09/26/14/67656525.gif

عزيز عيسى

26-09-2007, 05:41 AM

المفرهد الغائب عزيز عيسى

ما دام ابراهومة خلاك تظهر
بنخليه كل يوم يسافر

لك ولعزيزي ابراهومة جليل التحايا وأجملها

الرجل الأنيق دائما ضياء..
أضاء الله طريقك دنيا وآخره.

تحياتي،

أبراهيم دا تاني مافي ليه حته يسافر عليها..
غايتو إلا يجينا هنا في هيوستن.

عزيز عيسى

26-09-2007, 05:46 AM

يعني ياابراهيم فضحتنا مع الخواجاااات ديل !!!

اعمل فيها ياخ انك مسخن وكدا وخلي الجرسة علي الاقل في الصيف
غايتو انت في الشتاء الشافك داخل في نار وقاعد اصلووووووو ما كضب

يا مدنية الخواجات اللي زي حالاتي ولا الخواجات بتاعين البلد؟
غايتو أنا خواجة لكن ودالماحي مشكوك في خواجته.

إبراهيم دا من هسع حجز ليه محل جمب الفرن..
واليوم كله (يتبرك) من النار ويمسح في يدينو.

عزيز عيسى

26-09-2007, 06:14 AM

والله ياخوانا ..انا ما مصدق عيونى ..ابراهيم ؛ عزيز الخواجه ؛ ود الماحى ؛ كلهم موجدين هنا
ازيكم ياغالين والله طال علينا فراقكم والله ياغالين
وقدر ما ننسى العلينا برضو مشتاقين ..
اول فى التبادى مشكور ياعزيز على البوست الذى يعج بى رائحة الاحباب ..

الزول اللذيذ والبقطر عسل أبو النيز
أو كما قالوا (أبوسفروق)

تحياتي،

يا نزار الشوق كاتلنا عديل..

صدقني الأحباب ديل زي الحمام..
لو صبيت ليهم موية فيها السكر
يأتوك جماعاتا وأفرادا من كل صوب.

ود حارتنا عماد أبورجاء سمعت
بأنه في السودان.
والله الزول دا مشتاقين ليه شديد.

.

عزيز عيسى

26-09-2007, 06:24 AM

[QUOTE=امير عبدالباقي;240439]
[SIZE="6"]الغالى الفرده الرائع عزيز والله نورت وشرفت وبقدومك حلت البركه وينك يأخى والله واحشنا وخلونا من غربتكم دى الطولت !!!!

الفردة والغالي علينا جميعا الأخ بابكر ودالصول،

أولا كثر خيرك وسؤالك عني.. ياخي دا إنتو البركة.

يا ودالصول قالوا الفرح بحرروه أهله..
أها قلنا هجرة إبراهيم دي نعمل منها موضوع ساخن
وندخل نشوف أخبار الناس دي كيف؟
عشان كلنا نبطل غربة.

عزيز عيسى

26-09-2007, 06:36 AM

يا أخوانا
الزول الجميل دا وين؟
أخباره إنقطعت عننا،
وندعو معاه وببركة هذا الشهر الكريم إنه يكون بخير
ونسمع عنه كل أخبار طيبة.

http://www3.0zz0.com/2007/09/26/15/64570212.jpg

وأيضا الأحباب عمك تنقو.. ودالمأذون.. وعماد الصادق.. والزمن المريح (ياسر)..
خالد حمد موسى.. و(محمد) أبوروان..وأختنا (عشوشة)..أمينو..الرشيد..
والله لو قعدت أحسب فيهم القائمة حتطول..
لكن يشهد الله مكانكم كلكم محفوظ في القلب
والذاكرة.. لكن دعونا نسمع عنكم.

صالح ابوشوارب

26-09-2007, 11:07 AM

الاحباب عزيز وودالماحي
نهديكم صورة ( ود الابريق والتبروقه )

الله جابــــو

عزيز عيسى

26-09-2007, 11:58 AM

الأخ صالح،

بسم الله ما شاء الله ربنا يحفظ الله جابو
ويجعله من الأبناء الصالحين.

طبعا أبوه لما كان في عمره دا بسنيناته.. وتلقاه لابد
اليوم كله في خور أم سويقو.. وعامل قصة حب في ودقيحة..
أو جاري بالترتار ورابط النبلة في يده يفلق الناس في الشارع
وكمان يشرك للطير بالقلابة
وفي المساء يرجع البيت أغبش. :D

بابكر

26-09-2007, 12:14 PM

الله يحفظه لكم ويطول فى عمركم يارب !!

صلاح ودالطاهر

26-09-2007, 11:16 PM

ياروعة البوست ويا جماله رجع الحبايب كان من زمان تهاجر ياابراهيم وعقبال مختار بازي

مدنيّة

26-09-2007, 11:32 PM

غايتو أنا خواجة لكن ودالماحي مشكوك في خواجته.

اها عاد ياعمو عزيز

ود الماحي شوف عيوني
ابو الخواجات لحدهم :D

GREY MAN

27-09-2007, 12:36 AM

الاحباب عزيز وودالماحي
نهديكم صورة ( ود الابريق والتبروقه )

الله جابــــو

ما شاء الله تبارك الله
ربنا يحفظ

خالد أحمد الصول

27-09-2007, 04:53 AM

عزيز عيسى

27-09-2007, 06:34 AM

ياروعة البوست ويا جماله رجع الحبايب كان من زمان تهاجر ياابراهيم وعقبال مختار بازي

الأستاذ ودالطاهر،

الروعة تتمثل في كلماتكم الطيبة ووجودكم معنا في هذا البوست.

إنت لو عندك نية الهجرة قدم للوتري وأصبر وصابر
لغاية ما ربك يفرجها..
ومن كلامك دا نفهم إنه أخونا مختار بازي
بيجهز في حاله على الهجرة..
هو فين كدي خليه يجي يأكد لينا هذا الحلم..
بندعوا ليكم كلكم إنه ربنا يوفقكم ويقع ليكم اللوتري.
وترتاحوا من مسألة كفيلي وكفيلك.
عندنا هنا الكافل ربنا.

عزيز عيسى

27-09-2007, 06:37 AM

اها عاد ياعمو عزيز
ود الماحي شوف عيوني
ابو الخواجات لحدهم :D

يا مدنية حرام عليك شابكاني عمو عزيز
وتقولي للراجل العجوز أبوصلعة ودالماحي أبوالخواجات؟.
يا زولة إتلومتي معاي تب..

عزيز عيسى

27-09-2007, 07:27 AM

أخي العزير عزيز عيسي
أخي الجميل جمال الماحي
أخي النضير أبراهيم
إن أبناء هذه المدينة المدثرة بالازرق الرقراق كالنجوم ... متي ما أقتدينا بإحدهم إهتدينا
أبناء هذه المدينة في توادهم و تراحمهم كالجسد الواحد يتألم لوجع الجسم جميعه
أحبكم دائما الفه و حنان ... تسألون عن الغايب و تطيبون خاطر الزعلان و تواسون المريض
حمدا لله في تجمعكم و جعلك الله غربتكم خيرا و بركة تعودون منها غانمين سالمين في اتم صحة و عافية ... جمعكم اللع في رحاب المصطفي (ص) ..
أخي العزيز خالد الصول،

تحياتي،

نورت البوست يا راجل يا ملك،

حقيقة أن السودانيين كلهم بصفة عامة يمتازون بمثل هذه الصفات أينما وجدوا..
في الغربة ينثرون الحب والحنان والمودة لتعزيز الصلات والتواصل فيما بينهم..
وتجدهم دائما مع بعض عند الباردة والحارة..
ديل أهلي..
نسأل الله أن يديم المحبة والألفة بين الجميع..
وشكرا على الدعوات الطيبات.

أسفي انني لم أقابل اخي جمال الماحي ...
و لكن حنينا و شوقا لكم احبتي و نتلاقا لو العمر فيهو مدد

إذا ربنا طول في العمر سنلتقي قريبا بإذنه تعالي.

Jamal Elmahi

27-09-2007, 05:06 PM

الاحباب عزيز وودالماحي
نهديكم صورة ( ود الابريق والتبروقه )

الله جابــــو

حباب الله جابو وربنا لينا جابو
مأصل مفصّل مسلسل من عقابو
ليك المحبّه وسلام تعظيم جنابو
بي ظهورك الشمس والقمرا غابو
وابشوارب كان هرشك تب ما حبابو

عم الله جابو

Jamal Elmahi

27-09-2007, 05:12 PM

اها عاد ياعمو عزيز

ود الماحي شوف عيوني
ابو الخواجات لحدهم :D

أها الماعندو أخت زي مدنيّه دي يشتري ليهو أخت والمفلّس يجازفا بالتقسيط ..وأقطع ضراعي كان تلقوا زيها ...وين وين وين تلقوا زي دا ...

ود الماحي

Jamal Elmahi

27-09-2007, 05:22 PM

أخي العزير عزيز عيسي
أخي الجميل جمال الماحي
أخي النضير أبراهيم

يا أيها الزمن الجميل ... يا حسنا و بهاءا و الق
إن أبناء هذه المدينة المدثرة بالازرق الرقراق كالنجوم ... متي ما أقتدينا بإحدهم إهتدينا

حمدا لله في تجمعكم و جعلك الله غربتكم خيرا و بركة تعودون منها غانمين سالمين في اتم صحة و عافية ... جمعكم اللع في رحاب المصطفي (ص) ....
أسفي انني لم أقابل اخي جمال الماحي ...
و لكن حنينا و شوقا لكم احبتي و نتلاقا لو العمر فيهو مدد

الوجيه الارباب خالد الصول
دنيا دبنقا دردقي بي شيش ...قلنا مادام البنطون أبي يكطعكم نسيلكم كبري وشارع زلط...
وكان رضيتو بالردميّه بنرشها صندليّه ...

ود الماحي

ابراهيم

27-09-2007, 06:25 PM

ابراهيم

27-09-2007, 06:28 PM

برهوته حبيبي ياخي والله عجبنا وعجب عجبنا زاتو ياخي الف مبروك وانشاءالله ربنا يفقك ويدفيك قول امين

ابو النور يا غالي والله دعوتك سمحة تب التدفية اهم حاجة
وربنا يوفق الجميع ...
وابقى عافية

ابراهيم

27-09-2007, 06:30 PM

اخونا ابراهيم ربنا يوفقك ويدفيك قول امين

آمييييييييييييييين:D
والله يا عزيز ما قصرت ... شايف الدعوات بالتدفية:D

ابراهيم

27-09-2007, 06:41 PM

رمضان دخل اللحم الحي ووصل العضم وبرضو ربنا يتقبلو ما يطلع صيام الضب النعمنو الجكس عندنا لابس من غير هدوم ومع شوية السخانه دي مرقن المعدوم في سوق الخرتوم وقدر ما تغض الطرف تلقاهو حولك يحوم ولو دا بجرّح الصيام فصيامنا لم يبقي به مكان إلا وفيه طعنة رمح أو ضربه سيف...اللهم إني صائم ...
رغم المشغوليات أيها الحبيب سيكون التواصل...

ود الماحي

المشكلة يا ود الماحي قدر ما تقول تغض الطرف تلقاه ابا ينغض
خسوساً البرالمة يبقى عليهم سقط وجريح صيام وحاجات تانية حامياني

ابراهيم

27-09-2007, 06:55 PM

يازول الشمارات إنت جيت شايلها في شنطتك
المرة الجاية بجيك بي مخلايتي.. :D

يا زول انت شفت شمارات .. انا لسا ما لحقت حكيت ليك ودي مخلاية ما بتشيلها.

والله يا برهوته ما عارف كيف أوصف ليك مدى
سعادتي بوجودك بالقرب منا في كندا..
وانا والله في قمة السعادة يا عزيز وانشاءالله عيد الاضحى معاكم هناك لتكتمل اللوحة بلقيتكم.

أها الخلعة راحت ولا لسه موجودة ؟
غايتو لما تزور تورنتو وتجي عندنا هنا في هيوستن
وتشوف جمال الشوارع والخضرة في كل مكان
ستصل الى حد الإندهاش.

الخلعة بتروح تدريجياً يوم بعد يوم لكن لسا اخوك فارق زمن

قارن بين المترو في القاهرة والمترو عندنا في هيوستن:

http://www2.0zz0.com/2007/09/26/13/41127786.jpg

والله متروكم عين وزلطكم بلمع الواحد ما ليه حق يندهش ويتخلع يا عزيز؟

كدي النخوفك من هسع..
هو إنت شفت حاجة.. لما يجي الشتاء
ونتصل بيك بالتلفون غايتو إلا يكسروا منك
التلج حتى نقدر نسمع صوتك.
يازول ما تخاف دا أنا بهظر معاك ساي.

تعرف يا عزيز انا عقدتي في الدنيا السقط:D
درجة الحرارة هنا بتصل -40 دة ما فريز عديييل
الله يسترنا

ابراهيم

27-09-2007, 07:02 PM

ربنا يجعله سفر بر وتقوي ان تنال فيه من العمل والعلم ما يرضي الله ورسوله.
ونسأل الله ان يردك الينا سالما غانما. هو ولي ذلك والقادر عليه.

آمين.

الاخ الحبيب عمر البشير تحياتي يا رجل يا جميل
آمين يا رب والف شكر على هذه الدعوات الطيبات
ونسأل الله ان يرد غربتنا جميعاً سالمين غانمين
لك تقديري

ابراهيم

27-09-2007, 07:07 PM

[quote=امير عبدالباقي;240439]الف مبرك يابراهيم والحمدلله ربنا اداك الفي مرادك وجعل صبرك خير بس اعمل حسابك من البرد
كتر خيرهجره ابراهيم ياودعيسي الجابتك طالي علينا[/QUOTE

الغالى الفرده الرائع عزيز والله نورت وشرفت وبقدومك حلت البركه وينك يأخى والله واحشنا

وخلونا من غربتكم دى الطولت تقوموا تشيلوا برهوته معاكم كمان !!!!

حبيبنا الغالي بكور تحايا من الاعماق وشوق كتير والله
بقينا شغالين من غربة لي غربة
ربنا يجمعنا كلنا في البلد الحبيبة والاهل الحنان

ابراهيم

27-09-2007, 07:14 PM

إنت يا إبراهيم فرحان براك
كدي شوف أنا وودالماحي حالنا كيف
نرقص اليوم كله وننطط فرحانين بقدومك الى كندا
وظهور الناس الجميلين..
وفي إنتظار البقية.

http://www4.0zz0.com/2007/09/26/14/67656525.gif

يا سلام يا عزيز والله صورة معبرة :D
لكن الرقصة دي كان طولت يا عزيز ما بتجيب لينا مشاكل:D

ابراهيم

28-09-2007, 05:13 PM

ابراهيم

28-09-2007, 05:20 PM

الاحباب عزيز وودالماحي

نهديكم صورة ( ود الابريق والتبروقه )

الله جابــــو

ماشاء الله تبارك الله
عيني بادرة يا عمنا صالح ربنا يحفظه ويحميه
ويجعله ابناً صالح زي اسم ابوه

أبوبكرحامد

29-09-2007, 12:35 AM

نزار حسن محمد

29-09-2007, 11:23 AM

جيناكم ياحبايبنا
بعد غربة وشوق
نغالب فيهو ويغالبنا
...................
مبروك لبرهوتة انضمامه لمجموعة شعراء المهجر ، تشكر ياخواجة على البوست الذى جمع كل الأحبة ، وياحليل زمان وأيام زمان ، تعالوا نشوفكم فى الدكان.

هيا ..شيخى ..بوقنايا ..تجيب ..عمك تنقو ..وبت ملوك النيل ..وابوالمهتدى ...
ياود الصول ..رسل السلامى افرش البروش واملاء الازيار جنب لدكان .. ده لو البلديه ما قفلته ،،،

ابراهيم

29-09-2007, 05:33 PM

أخي العزير عزيز عيسي
أخي الجميل جمال الماحي
أخي النضير أبراهيم

يا أيها الزمن الجميل ... يا حسنا و بهاءا و الق
إن أبناء هذه المدينة المدثرة بالازرق الرقراق كالنجوم ... متي ما أقتدينا بإحدهم إهتدينا
أبناء هذه المدينة في توادهم و تراحمهم كالجسد الواحد يتألم لوجع الجسم جميعه
أحبكم دائما الفه و حنان ... تسألون عن الغايب و تطيبون خاطر الزعلان و تواسون المريض
حمدا لله في تجمعكم و جعلك الله غربتكم خيرا و بركة تعودون منها غانمين سالمين في اتم صحة و عافية ... جمعكم اللع في رحاب المصطفي (ص) ....
أسفي انني لم أقابل اخي جمال الماحي ...
و لكن حنينا و شوقا لكم احبتي و نتلاقا لو العمر فيهو مدد

استاذنا الجميل خالد احمد الصول ..
تحيات نبعثها لكم متبركة بنسمات هذا الشهر الكريم
شكراً لهذه الكلمات المعطونة بإلفتها تلك الحنينة ..
كيف لا وانتم من رحمها لطالما ارضعت كل بنوها المودة من الوجدان للوجدان ...
كل المني ان نلتقي فيها بكل الود ...
وكل حروف الود لا تكفي لكتابة قصيدة الفرحة بوجودكم هنا وانقاقة الحضور ..
مع كل التقدير.

ابراهيم

29-09-2007, 05:44 PM

جيناكم ياحبايبنا
بعد غربة وشوق
نغالب فيهو ويغالبنا
...................
مبروك لبرهوتة انضمامه لمجموعة شعراء المهجر ، تشكر ياخواجة على البوست الذى جمع كل الأحبة ، وياحليل زمان وأيام زمان ، تعالوا نشوفكم فى الدكان.

العزيز الغالي ود الماذون
فرحانة بيك كل النجوم
لا نام بريقها ولا انطفى ....

يا سلام عليك يا عزيز والله ما حاجة ساهلة تجيب كل الناس السمحين في حلة زاهية زي دي .. بالمعزة وبالمودة البينا بي كل الصلات.
وابقى قريب يا ود الماذون ومحلك قاعد بالوحشة والشوق.

أبوبكرحامد

01-10-2007, 01:28 AM

العزيز الغالي ود الماذون
فرحانة بيك كل النجوم
لا نام بريقها ولا انطفى ....

يا سلام عليك يا عزيز والله ما حاجة ساهلة تجيب كل الناس السمحين في حلة زاهية زي دي .. بالمعزة وبالمودة البينا بي كل الصلات.
وابقى قريب يا ود الماذون ومحلك قاعد بالوحشة والشوق.
.............................................
حبيبنا الر ائع برهوتا ..... سلاماً وتحية
أهديك بعض خرمجات جاد بها خاطراً عطشان وخرمان فى نهار رمضان ، أعجبت المبدع عمر غلام الله ، يللا نعدل عليها عشان تشبه كلام الناس السمحين متلكم :
القضية المركزية ملتنا جراح وأسية
حليل زمن العيون تشتاق لى طلة صباحية
حليل مدنى وحليل ناسا .....
ياعم قسم حركة بهلوانية
عليك الله قرصة ياسواق قدام سيف طعمية
ياسيد البنية وابشبكة ونوبة عبد السيد فى العصرية
أريت نرجع متل أول
نشيل كوريق وطورية
نبنى عشيش تقوقى فوقو قمرية
سلام يامدنى
أظنك من جنان الخلد
عينة مجانية

عزيز عيسى

01-10-2007, 06:24 AM

آمييييييييييييييين:D
والله يا عزيز ما قصرت ... شايف الدعوات بالتدفية:D

قول ليهم رسلوا البطاطين.

عزيز عيسى

01-10-2007, 06:34 AM

جيناكم ياحبايبنا
بعد غربة وشوق
نغالب فيهو ويغالبنا
...................
مبروك لبرهوتة انضمامه لمجموعة شعراء المهجر ، تشكر ياخواجة على البوست الذى جمع كل الأحبة ، وياحليل زمان وأيام زمان ، تعالوا نشوفكم فى الدكان.

ودالمأذون وصل؟.
وين الشربات والنسوان ديل ما بزغردن ليه يا نزار؟
ودالماحي يقول في الدوبيت وأنا أنطط معاه.
والله أيام يا ودالمأذون وليك وحشة يا راجل.
وجيدا جيت..
برهوته من تاني يوم بقي يألف شعر وكمان بالكندي؟
الزول دا كلمناهو أمبارح أنا وودالماحي في محادثة مشتركة
وجبنا سيرتكم كلكم وآخر ضحك وحلاوة لقاء.
تصدق قال لحدي الآن ماسكاه خلعة.. ومندهش.
والدكان جاينك عليه بس إنت أنفخ الطرمبيت
والعساكر كلهم حيتلموا.

عزيز عيسى

01-10-2007, 06:38 AM

هيا ..شيخى ..بوقنايا ..تجيب ..عمك تنقو ..وبت ملوك النيل ..وابوالمهتدى ...
ياود الصول ..رسل السلامى افرش البروش واملاء الازيار جنب لدكان .. ده لو البلديه ما قفلته ،،،

ود حسن إزيك،

أنت عارف شيخك أبوقناية دا ما حينفع..
أحسن تجيب السفروك بتاعك وتنيش على العرقوب
بس أعمل حسابك أوعك تفلق واحد في الرأس
وتقول الخواجة حرشك.

عزيز عيسى

01-10-2007, 06:46 AM

العزيز الغالي ود الماذون
فرحانة بيك كل النجوم
لا نام بريقها ولا انطفى ....

يا سلام عليك يا عزيز والله ما حاجة ساهلة تجيب كل الناس السمحين في حلة زاهية زي دي .. بالمعزة وبالمودة البينا بي كل الصلات.
وابقى قريب يا ود الماذون ومحلك قاعد بالوحشة والشوق.

العافية درجات يا أبو خليل..
وأخوك متأكد الجماعة السمحين ديل بيجوا يتاوقوا ويزوغوا..
ويعملوا فيها تقيلين :D
هم عايزين يدخلوا لكن ما عارف ليه مترددين..
حأشرك ليهم وأجيبهم ليك جارين حفيانين.
وأمشيهم علي العجين من غير ما يلخبطوه.
بس أصبر لي شوية أحلل صيامي وأجيكم
راجع بقرجتي.
أخخخخ الجماعة فطروا خلوني.

عزيز عيسى

01-10-2007, 06:51 AM

.............................................
حبيبنا الر ائع برهوتا ..... سلاماً وتحية
أهديك بعض خرمجات جاد بها خاطراً عطشان وخرمان فى نهار رمضان ، أعجبت المبدع عمر غلام الله ، يللا نعدل عليها عشان تشبه كلام الناس السمحين متلكم :
القضية المركزية ملتنا جراح وأسية
حليل زمن العيون تشتاق لى طلة صباحية
حليل مدنى وحليل ناسا .....
ياعم قسم حركة بهلوانية
عليك الله قرصة ياسواق قدام سيف طعمية
ياسيد البنية وابشبكة ونوبة عبد السيد فى العصرية
أريت نرجع متل أول
نشيل كوريق وطورية
نبنى عشيش تقوقى فوقو قمرية
سلام يامدنى
أظنك من جنان الخلد
عينة مجانية

إنت عارف يا ود المأذون..
القصيدة دي بروزها وجيبا لينا بهناك
في الدكان علشان نفتي فيها.. ونزيد في أبيات الشعر..
لكن ما تقول لي جميلة شديد وعجبتني.
بس الله يستر ودالماحي ما يقوم يقلبها دوبيت..
وحلمنتيش.

ود المطامير

01-10-2007, 01:37 PM

عمّى .. الحبيب ... ابراهيم
أتمنى لك إقامه طيبه أينما حللت

أكان كدى ح أصرف شيكات القضيه :d

Jamal Elmahi

01-10-2007, 05:40 PM

عمّى .. الحبيب ... ابراهيم
أتمنى لك إقامه طيبه أينما حللت

أكان كدى ح أصرف شيكات القضيه :d

ود المطامير ينبش القضيه...وطيري ياقمريه وركي فوق الزنكي وأنقدي القضيّه ..وشوفي فطور العيد فيهو شعيريه ...ولاّ بس فول وطعميّه ...وماتنسي تكتّري المحلبيه وتشوفي حنّة محاسن شالت ميّه ميّه ...ولاّ عايزه نشادر ودخان أبو نطع وشمله مخمليّه ...
ياربي يكون رمضان وصل اللحم الحي وداخل علي العضم ....

ود الماحي

ابراهيم

01-10-2007, 06:00 PM

عمّى .. الحبيب ... ابراهيم
أتمنى لك إقامه طيبه أينما حللت

أكان كدى ح أصرف شيكات القضيه :d

ود المطامير القضية مش حليناها ودية
وقلنا خلاص نبطل الجودية
تاني ركبتك الهاشمية
وبقيت تبحت في القضية
ياخ دي ما المحرية
نحن اكلنا الملح والتقلية
والشيكات بناتنا ما مطرية

ابراهيم

01-10-2007, 06:13 PM

.............................................
حبيبنا الر ائع برهوتا ..... سلاماً وتحية
أهديك بعض خرمجات جاد بها خاطراً عطشان وخرمان فى نهار رمضان ، أعجبت المبدع عمر غلام الله ، يللا نعدل عليها عشان تشبه كلام الناس السمحين متلكم :
القضية المركزية ملتنا جراح وأسية
حليل زمن العيون تشتاق لى طلة صباحية
حليل مدنى وحليل ناسا .....
ياعم قسم حركة بهلوانية
عليك الله قرصة ياسواق قدام سيف طعمية
ياسيد البنية وابشبكة ونوبة عبد السيد فى العصرية
أريت نرجع متل أول
نشيل كوريق وطورية
نبنى عشيش تقوقى فوقو قمرية
سلام يامدنى
أظنك من جنان الخلد
عينة مجانية

علا يا ود الماذون الخرمجة ما عندك
خرمجة فايضة حنية
وبي ريحة دعاش مدني
معتقة بالاريحية
مؤكد يوم بنمشي هناك
وزادنا شجون فرايحية
ونلقاكم حبايبنا
نفيض بهجة وحميمية

ابراهيم

01-10-2007, 06:27 PM

ود المطامير ينبش القضيه...وطيري ياقمريه وركي فوق الزنكي وأنقدي القضيّه ..وشوفي فطور العيد فيهو شعيريه ...ولاّ بس فول وطعميّه ...وماتنسي تكتّري المحلبيه وتشوفي حنّة محاسن شالت ميّه ميّه ...ولاّ عايزه نشادر ودخان أبو نطع وشمله مخمليّه ...
ياربي يكون رمضان وصل اللحم الحي وداخل علي العضم ....

ود الماحي

ود الماحي ...

شكلو رمضان دخل العضم مرق بهناك
ولا تكون خرمان ليك سجارة او تمباك
ولا يكون ود المطامير لخبط ليك مسواك
وحنة محاسن لو شالت دة كلو ما كان حصل:D