من قتل كديسة حبوبه نفيسه؟؟؟

[حبيبة ودمدني]

كديسة حبوبة نفيسة , كديسة مدلعة
لاتنام إلا على سرير مفروش
تأكل افخاذ الدجاج وتشرب حليب البقر الصافى المحلى بالسكر
بيضاء ناصعة البياض كالثلج
لدنة الجسم خفيفة الحركة
لصوتها بحة حين تموء
تناديها حبوبة نفيسة باسم( نوارة)
لا تفارق حبوبة نفيسة أبداً
معها (الحجل بالرجل) أينما ذهبت
تراها في بيوت المناسبات متكورة في حضن حبوبة نفيسة , حيناً تنظر بعيون ناعسة نصف مغمضة.
وحيناً تفتح عينيها على اتساعهما وتتمطى في دلال وهي تصدر مواءا خافتاً.

فجأة تبدل حال(نوارة)
أصبحت تقضي يومها ساهمة.. لا تأكل إلا قليلا..
تموء أحياناً بصوت يبعث الشك في قلب حبوبة نفيسة
يوماً .. رأت حبوبة نفيسة قطاً ضخم الرأس مفقوء العين يسترق النظر من فوق الجدار
نهرته ورمته بشبشبها .. قفز الى الخارج وهو يموء غضباً
لحظت حبوبة نفيسة أن ( نوارة ) كانت تختلس النظر وهي تتمسح بالباب
وحين هرب القط , صدر منها مواءاً كالولولة...
صارت ( نوارة ) قليلة الخروج مع حبوبة نفيسة.. ليس كما كانت تفعل سابقاً
ذات يوم عادت حبوبة نفيسة .. فلم تجد (نوارة)...
طفقت تنادي عليها في ارجاء المنزل ولا من مجيب
(نوارة ) طفشت.. هكذا قالت حبوبة نفيسة لجارتها ( بت ادم)..
ثم أردفت:الأعور غشاها.. شكيته على الله...
اعتصر الحزن قلب حبوبة نفيسة أياما.. ثم انشغلت بأمور دنياها
ذات يوم .. بجانب الطريق وجدت حبوبة نفيسة ( نوارة ) ملقاة على الأرض.. يسيل الدم من رأسها .. تحسستها .... قلبّبتها..وحين تأكدت من موتها..
وضعت يديها على رأسها وأخذت تثكل (ووب علي ...ووب علي ...الأعور كتل نوارة.. ..).. عموماً..ليس أكيداً أن الأعور فعلها..ولكن محتمل .




منقوووووووووووووووول

[نزار حسن محمد]

ياود المطامير تعال شوف الكديس هنا ولا بلاش

[صلاح ودالطاهر]

كديسة الهناء والسرور

[هشام السماني إبراهيم]

تأكل افخاذ الدجاج وتشرب حليب البقر الصافى المحلى بالسكر
بيضاء ناصعة البياض كالثلج
لدنة الجسم خفيفة الحركة
لصوتها بحة حين تموء
تناديها حبوبة نفيسة باسم( نوارة)

كديسة السرور ايتو حاااااااال ؟؟

[عبدالمنعم الصديق(خدرا)]

والله حبوبتك الكديسه ماااااااااااااعندها
لكن ماتستبعدى الاعور بعملا مااااا حاقد

[مختار بازى]

والله حبوبتك الكديسه ماااااااااااااعندها
لكن ماتستبعدى الاعور بعملا مااااا حاقد


شـــــــــــــــــــــــنو يا منعم الاعور مسكين :D

والمتهم بريء حتي تسبت ادانتة

دي الكديسة ولا بلااااااااااااش..

[القيصر]

كدايس اخر زمن
الكديسه كان ما ادوها (بالشلوت)دي ما كديسه

[حبيبة ودمدني]

كدايس اخر زمن
الكديسه كان ما ادوها (بالشلوت)دي ما كديسه


الظاهر ياالقيصر انك من النوع العنيف في شي اسمو الرفق باالحيوان

[مصطفي دعوب]

ما بين كديسة ربوها بالانناس وبين كديسة دقوها بالعكاز شوفو الفرق يا ناس

الكدايس خشم بيوت
شوفو كدايس السودان وشوفو كدايس السعودية وشوفو كدايس الخواجات

كدايس السودان ليهم الله وعيشة السوق الاكل في تلتلة لازم تجيب حقها بيدها
وتقعد تسك في الفيران لحدي ما نفسها ينقطع

كدايس السعودية اكلهم جاهز بس تمشي برميل البلدية تجد ما لذ وطاب من المأكولات
وشوف عيني الفار ده يجي ينطط جنب الكديسة وهي ما تشتغل بيهو الشغلة عندها اكل جاهز ما لها ومال المساسكة والجري .

وكدايس الخواجات ذي كديسة حبيبة ودمدني وحبوبتنا نفيسة الاكل كيف كيف وكمان يمكن يتركوا ليها وصية ذي الابناء .
وعندها دكتور خاص وأكل خاص ورعاية والكلام ده كلو لو لقاهو عبدالمنعم جضيماتو بتنفخن ويرطب لي رقبتوا دي .

اها الواحد احسن ليهو يكون كديسة في يد خواجية عجوزة ومقندلة وقربت تتلحس .
اكلو مدنكل وبعدين يقبض ملايين الدولارات من الورثة .

برضو تقول لي كديسة سودانية !!!

[صلاح ودالطاهر]

برضو تقول لي كديسة سودانية !!!
اها احسن تكون سودانية ولا امريكية وربنا يكضب الشينه

[امنية بكري]

كديسة حبوبه دي زي كديست جارتنا حجه زينب


حجه زينب دي اولادا كبار

يوم انا واختي قاعدين في البلكونه نسمع ليك المره تكورك

يا سوسو ياسوسو

تعالي يا ماما

اختي قالت لي المرة دي بتكورك لي منو

رفعن راسنا بالبلكونه نشوف ليك الحجه بسك في الكديسه

وكمان شايلا الكميرا عمتك دايره تصوره

تقول نانسي عجاج

المهم قعدنا نضحك ولي الليله لما نشوف زول مرتاح ومدلع

بنقول كديسة حاجة زينب

وما تنسوا انها سودانيه

[mahagoub]

انتو متاكدين انو كديس كدى راجعوا نفسكم

[حبيبة ودمدني]

والله يا محجوب الومن دا بقى في فنادق خاصه للكدايس والكلاب

[مختار بازى]

انتو متاكدين انو كديس كدى راجعوا نفسكم

والله انا ماعااااااااااااارف دي حبيبة قالت لينا كديسة:D:D

[مختار بازى]

برضو تقول لي كديسة سودانية !!!


عليك الله بعـــدين جيب لي واحدة مــــــــــــن هناكـ

ههههههههههههههههههههههههههههههههه

[حبيبة ودمدني]

والله انا ماعااااااااااااارف دي حبيبة قالت لينا كديسة:D:D



حبيبه مابتتكلم ساي في وحده في امريكا بنت دار لرعاية القطط المشرده

وبتسافر لي فرنسا وايطاليا عشان نتجيب ليهم اكلهم وسراير للكدايس من ماليزيا

شوفتو جنس دا البشر مالقين دلع الكدايس دا:D:D:D:p:p:p

[mahagoub]

حبيبه مابتتكلم ساي في وحده في امريكا بنت دار لرعاية القطط المشرده

وبتسافر لي فرنسا وايطاليا عشان نتجيب ليهم اكلهم وسراير للكدايس من ماليزيا

شوفتو جنس دا البشر مالقين دلع الكدايس دا:D:D:D:p:p:p

اتخيل لو كنت كديسه فى السودان تاخد بالشلوت ويتنتف شعرك من زعيط الشفع وتتزاوغ من العربات وسط الزلط وفى النهايه تموت تحت كارو