المساعد الشخصي الرقمي

مشاهدة النسخة كاملة : فوائد سفة التمباك لدى أهل الخبرة والدراية...



صديق بلال
24-10-2007, 07:48 AM
يا جماعة الخير...
بمناسبة ورود موضوع عن سفة التمباك في هذا المنتدى الطيب...
أردت أن أستغل هذا الموضوع وأسألكم ما هي فائدة السفة من أي ناحية كانت...
وأرجو الإجابة بكل صراحة وشجاعة...

مختار بازى
24-10-2007, 08:11 AM
مــــــــــــن باب رأس بلا كيف اريتو بالســــــــيف:D:D

والله انا شخصيا مابسف لكن بنتظر معاكـ ,,,,

منتهى
24-10-2007, 08:21 AM
والله ان ما عارفه اى فائده من التمباك
لكن عارفه بعض الاضرار وهى ( الرائحه النتنه_ المظهر الغير لائق_ بعض الامراض التى يسببها مثل التهاب اللثه )
وانا كمان مستنيه معاكم ولو واحد ادينا فائده له

خالد عثمان
24-10-2007, 08:52 AM
الفائدة يا جماعة حسية والداير يعرف كيف حسية يجربوووووووووووووووووووووووووووو

ود المطامير
24-10-2007, 08:54 AM
هع .. بعدما تشرب شاى تطلّع الكيس بمزاج
وتقعد تدردم وتدردم وتفتح راحة يدك وتشد طرف الكيس كدا
وترميها فى يدك .. وتكون حاكلها كدا براحة اليد وإنت بتطبّق فى الكيس
أها .. بعدما تدخل الكيس فى جيبك تعمتها بأصابعك التلاته كدا
والأصبع الصغير دا مهمته تصليح مكانها وتختها وتديها عصره لتحت
بطرف اللسان وتسرح فى الخيال أحلام

كل الطقوس دى وبرضو مافيها فائده ؟

منتهى
24-10-2007, 08:59 AM
الاخ ود المطامير كان تختصر كلامك وتقول هى نوع من انواع المخدرات زى الهرويين مثلا

ود المطامير
24-10-2007, 09:10 AM
orowa@hotmail.com
الخ ود المطامير كان تختصر كلامك وتقول هى نوع من انواع المخدرات زى الهرويين مثلا
أختنا ... منتهى
اللى عاوزانى أختصره ماهى دى الفائده زاتها

هو ما زى الهيرويين بس فى صلة قرابه بعيده شديييييييييد

أبوبكرحامد
24-10-2007, 09:59 AM
الفائدة يا جماعة حسية والداير يعرف كيف حسية يجربوووووووووووووووووووووووووووو

إنصر دينك ياخالد عثمان ، والله إختصرت لى كلام كتير كنت مفكر أكتبو ، وود المطامير تم الناقصة ، الله إتم كيفكم بى جبنة بى زنجبيلا .

ابراهيم
24-10-2007, 10:04 AM
الفائدة يا جماعة حسية والداير يعرف كيف حسية يجربوووووووووووووووووووووووووووو

قلت لي حسية هههههههههههههه

انيس التوم
24-10-2007, 03:25 PM
والله كلام اول حاجه اسمه سيد الاسم (سلطان الكيف)
انت عارف التمباك ده فوائده عظيمة جدا اول حاجه يجعل المخ قابل للتفكير والابداع وتنشيط خلايا المخ وفتح قنوات الابداع ومنشط في نفس الوقت علاة علي ذلك قمة المتعة بعد شراب الشاي او سفة الصباح الخ (ده طبعا راي شخصي)

وعلي الفكرة التمباك ده عندنا هنا في بلدنا دي SOUTH KOREA بجي بال DHL طلب خاص رايك شنو عزيز عديل كده لانوا لو ما التمباك ده مافي زول كان قعد هنا انا شخصيا بعمل في مجال اللغات والكمبيوتر لو ما ختيت سفة صدقني مابقدر اعمل اي حاجه مش كده بكون اليوم كله زي الرايح ما عارف اعمل شنو
اديك قصة ظريفه جدا معاي واحد زميلي من دولة منقوليا طوالي شايفني بدنكل السفة قداموا الزول الشمار حرقوا قام قال لي اليوم انا عايز اعمل زيك مستر انيس طوالي انا ما صدقته اديت ليك الزول سفة اقل من 3 دقائق الزول وقع في الارض وقاعد يكوريك عايز موية عايز موية طبعا انا انخلعته يازول طلعتة ليك السفة من خشموا قبل الناس ما تجي وتبقى فضيحة امكن بعد نص ساعة المنقولي استعاد الوعي بتاعه



همسه
انا بكت الكلام ده اول حاجه دنكلته لي سفة

ود المطامير
24-10-2007, 04:14 PM
بتزكر مره حبيب قلوب الملايين
ود الماحى كتلنا بالضحك
قال الخواجيات .. تلقى الواحده خاته سفّه بزاوية 45
هع هع هع هع

ود المطامير
24-10-2007, 04:38 PM
فوائد التمباك
1 _ لو سايق عربيه والراديتر إنقدّ بس كب فيهو كيس التمباك
2 _ لو إتجرحت خذ مقدار سفّه وأعصرها فى مكان الجرح وتبقى تمام
3 _ فيهو هظار لذيذ .. مثلا .. تقول لصاحبك جيب سفّه
يقول ليك والله ما أديك دى آخر سفّه وتقوليهو خلاص أقسمها
ويحصل بيناتكم شغب حلو
4 _ بتقرأ بيهو الجريده
5 _ ذى ما قال أخوى الحبيب أنيس وصدقاً لكلامه
الواحد لو داير يكتب موضوع فى المنتدى أول شئ بدنكل سفّه كاربه

عبدالرحيم سعيد
24-10-2007, 06:52 PM
الفائدة يا جماعة حسية والداير يعرف كيف حسية يجربوووووووووووووووووووووووووووو


اولا الدال علي الخير كفاعله (ياأخوة لو حد قعد جنب زول يسف في المواصلات وشمه الريحه الكريهه المرة الجاية لو شافو مابقعد جنبو واساطين التمباك لعب بهم الشيطان فضربوا له الامثال وقالوا فيه الحكم والعاقل من استبرأ لدينه لتحريمه من بعض العلماء ربنا يحفظكم من شره جميعا

عماد عبدالشكور
24-10-2007, 08:14 PM
اولا الدال علي الخير كفاعله (ياأخوة لو حد قعد جنب زول يسف في المواصلات وشمه الريحه الكريهه المرة الجاية لو شافو مابقعد جنبو واساطين التمباك لعب بهم الشيطان فضربوا له الامثال وقالوا فيه الحكم والعاقل من استبرأ لدينه لتحريمه من بعض العلماء ربنا يحفظكم من شره جميعا

اخونا عبدالرحيم دي برضو فائدة من فوائد التمباك انك تقعد وتتحكر برااااااااااااك في المواصلات . ههههههههههههههههههه
انا واحد من الناس لو ماسفيت بالليل ما بقدر انوم ولو ما سفيت الصباح ما بقدر اقوم . بالرغم من المحاربة القوية التي تقودها (حكومتنا الرشيدة) لمنعنا من استخدام التمباك . ربنا يتوب علينا جميعا من استخدامة . قول امين يا ود المطامير .

abomazeen
24-10-2007, 09:54 PM
معقولة يا عسـل يا ود التوم تعملها في صاحبك المنقولي ده وتخليهو فاقد الوعي كل الفترة دي ؟؟

الله يجازي محنك ..!! لكن الظاهر زولك ده راسو خفيف ؟؟


بس بيني وبينك يستاهل دي آخر الشلاقة اللي كتلت إشراقة ...؟؟؟؟ هاهاهاهاه

ود المطامير
24-10-2007, 10:47 PM
اخونا عبدالرحيم دي برضو فائدة من فوائد التمباك انك تقعد وتتحكر برااااااااااااك في المواصلات . ههههههههههههههههههه
انا واحد من الناس لو ماسفيت بالليل ما بقدر انوم ولو ما سفيت الصباح ما بقدر اقوم . بالرغم من المحاربة القوية التي تقودها (حكومتنا الرشيدة) لمنعنا من استخدام التمباك . ربنا يتوب علينا جميعا من استخدامة . قول امين يا ود المطامير .
ههههههههههههههههههههههههههه
والله شكيت محنك
كل اللى زكرته ينطبق علىّ خاصه المحاربه من الحكومه

ود المطامير
24-10-2007, 10:53 PM
واحد صاحبى .. لما يكون معانا هو وأولاده
يغمز لى بعينو يعنى جهز سفه وأطلع الكيس
وأدردم سفتين أحكّر واحده وأغمت التانيه وبعد شويه
أجى قريب منو وأكون شايل الموبايل وأقول ليهو
بتعرف لى دا رقم منو ويمسك يدى مع الموبايل وأرمى ليهو سفتو

ودى فائده من الفؤاد بعلمك الحرفنه .

صلاح ودالطاهر
24-10-2007, 10:57 PM
3 _ فيهو هظار لذيذ .. مثلا .. تقول لصاحبك جيب سفّه

وفي واحد تقول ليهو جيب سفه يقول ليك التايوته خرمانه ربنا يشفي الجميع من هذا التمباك

صابرحسين
24-10-2007, 11:15 PM
التمباكه جو التمباكه وصلوا تن تن تن
هذه الكلمات الزمني التعلمجي في الخدمة الإلزامية ان أرددها بصوت عالي عندما ضبط بحوزتي كيس تمباك وأصبح يرددها معي الجميع لدرجة جعلت التعلمجي يضحك ويخلي سبيلي من غير أي عقاب ، وقبلها سألني عن فائدة التمباك دا شنو ؟ فقلت له أنا تعلمت التمباك دا كبير لكن ندمان على كل الزمن الما سفيت فيه ، لكن الآن عندنا حكومة قوية جداً منعت السف داخل البيت مراعاةً لشعور الأطفال والأسئلة الكثير دا شنو يابابا والشحدة من البنت قبل الأولاد ، مما جعل السفة داخل المنزل بحذر وحرفنه شديدة ، لكن لو في واحد عنده وصفه تجعلنا أن نمتنع نهائياَ عن التمبالك من غير ما يقول السجائر أحسن نحن جاهزين ، مع العلم بأنني تركته أكثر من مرة ، وبمجرد ما أسمع كشكشة كيس أعاود الحنين 0

عبدالرحيم سعيد
25-10-2007, 12:17 AM
اخونا عبدالرحيم دي برضو فائدة من فوائد التمباك انك تقعد وتتحكر برااااااااااااك في المواصلات . ههههههههههههههههههه
انا واحد من الناس لو ماسفيت بالليل ما بقدر انوم ولو ما سفيت الصباح ما بقدر اقوم . بالرغم من المحاربة القوية التي تقودها (حكومتنا الرشيدة) لمنعنا من استخدام التمباك . ربنا يتوب علينا جميعا من استخدامة . قول امين يا ود المطامير .

حيرتني ياعماد يعني اقول شنو اذا انعدم النوم والقوم هههههههههههههههههههه

بورتبيل
25-10-2007, 12:20 AM
التمباكه جو التمباكه وصلوا تن تن تن
هذه الكلمات الزمني التعلمجي في الخدمة الإلزامية ان أرددها بصوت عالي عندما ضبط بحوزتي كيس تمباك وأصبح يرددها معي الجميع لدرجة جعلت التعلمجي يضحك ويخلي سبيلي من غير أي عقاب ، وقبلها سألني عن فائدة التمباك دا شنو ؟ فقلت له أنا تعلمت التمباك دا كبير لكن ندمان على كل الزمن الما سفيت فيه ، لكن الآن عندنا حكومة قوية جداً منعت السف داخل البيت مراعاةً لشعور الأطفال والأسئلة الكثير دا شنو يابابا والشحدة من البنت قبل الأولاد ، مما جعل السفة داخل المنزل بحذر وحرفنه شديدة ، لكن لو في واحد عنده وصفه تجعلنا أن نمتنع نهائياَ عن التمبالك من غير ما يقول السجائر أحسن نحن جاهزين ، مع العلم بأنني تركته أكثر من مرة ، وبمجرد ما أسمع كشكشة كيس أعاود الحنين 0

:D:D:D تعرف يا استاذ صابر حسين انو التعلمجي دا طلع ود حلال - انا لمن كنتــا في المعسكـر شفتا واحد صاطو ليــه كيس التمباك في كوز مويــة وسقوه ليـــه. الا التعلمجي بتاعكم دا شكلو بحب يضحك ساااي
الشي التــاني اعتقد ان مسالــة ترك التمباك محتاجة عزيمة قويــة وفي المقام الاول الاقتناع بان التمباك ليس لديه اي فوائــد وانما هو حالات مزاجيــة اختلقها البعض وصدقها الكثيرون واصبحت مقرونة بالتمباك وسف التمباك - الا ان العقل يتحرك حسب التعويدات والعادات التي درج عليه الانسان فلو كنت عادة تشرب الماء اثناء الاكل منذ مدة طويلة صدقني لا تستطيع ان تاكل في مرة واحدة بدون وجود الماء - مع انك يمكن ان تاكل الا ان نفسياتك تقول لك انك لم تاكل ابداً - وكذلك الصلاة لو انك كنت تصلى في مكان معين ولفترة طويلة فلو حاولت تغير هذا المكان يكون لديك شعور بانك لم تصلى مع انك صليت ولكن العقل يجعل التوازن بين العادة والحالة الجديدة امر صعب شوية. وكذلك السفة بعد شراب الشاي ولو كنت تاخذ سفة بعد شراب الشاي عادة - فان امر شراب الشاي بدون سفة بعده امر يكون صعب جداً.
هذا من منظور شخصي.
اما اخيــراً هناك اشخاص تركوا السجائر وتركوا التمباك ومع هذا ما زالو ينعمون بالحياة ولم يتغير فيهم شي الا العزيمة والاصـــرار.
ولكم جميعـــاً خالص الــود.

صابرحسين
25-10-2007, 01:13 AM
الأخ برتبيل كل عام وأنت بخير وربنا يحقق الأماني
أتفق معك في كل ما طرحت وربنا يدينا العزيمة والإصرار لأن النية وحدها لا تكفي ، ومرة تركت التمباك لمدة عام وكان ذلك في 11/سبتمبر 2004م تخيل سنة كاملة خرمان ؟ وفي 11/سبتمبر 2005م إحتفلت بهذه المناسبة واشتريت كيسين تمباك واحد للمكتب وواحد للبيت ، وسفة الشاي دي خطيرة جداً وأنا لما حضرت السفة ما بشرب الشاي 0
وربنا يوفقنا في ترك جميع العادات الضارة التي لا معنى لها 0
وللجميع الشكر والتقدير

abomazeen
25-10-2007, 04:49 AM
يا جماعة الخير...
بمناسبة ورود موضوع عن سفة التمباك في هذا المنتدى الطيب...
أردت أن أستغل هذا الموضوع وأسألكم ما هي فائدة السفة من أي ناحية كانت...
وأرجو الإجابة بكل صراحة وشجاعة...




السفة أو التمباك أو هو تبغ داكن اللون كريه الرائحة ، مخمر و مطحون يوضع بين الشفا و اللثة ... وده ما فيه خلاف من حيث المعنى والاسم الصحيح أو الدارج المتعارف عليه ( متفقين على كده ) ... تمام يا شباب ... عظيم و ممتاز جداً

طيب عاوزين نناقش النقطة أو الحاجة دي بمنتهى العقلانية والفكر السليم وفق أسس علمية سليمة تخضع لنظريات سليمة ومجربة ... بس ما عاوزين أي نوع من الزعل أو الغضب أو أي واحد منكم يتخذ مني أي موقف جراء الكلام الذي سوف أكتبه لك هنا والله العظيم يا شباب كلام خطير وفيه دراسات ودراسات ودرسات علميه مية في اليمة ( 100% ) ولا تقبل لي تحريف أو تبرير غير ما جاء فيه من تأكيدات دامغــة وحقائق راســخة لا تقبل إلاّ إضافة المزيد من التأكيدات و التأميم عليها ...

و طالما فُـتـح النقاش في هذا المجال وعارف روحكم المعدنية ( أقصد المعنوية ) عالية شديد ... !! وطالما تكرمت وقرأت بقية الكلام أدناه أعتبر نفسك متفق معاي أو ممكن نتفق على مواصلة الكلام بدون أي منحنى آخر يرسم في هذه المساحة وتعتبرها ( سيرة وأنفتحت ) على فكرة بعض المساهمات في هذا الموضوع منقولة ومقتبسة من مصادر علمية موثوق في مرجعيتها بدون أي شك ... طيب حـــلــو الكــــلام يا شباب ... نصلي على سيدنا محمد صلي الله عليه وسلم ...



اللهم صلي وسلم وبارك على سيدنا محمد صلي الله عليه وسلم... ...

abomazeen
25-10-2007, 04:51 AM
أولاً : الأضرار الصحية لتعاطي التمباك ( السفــة ) :


1- إستخدام التمباك يضاعف من مخاطر الأصابة بسرطان الفم. شاهد الصوره .
2- إرتفاع نسبة الإصابة بسرطان الفم في السودان هو راجع إلى إستخدام التمباك.
(دراسة لكلية طب الأسنان بالخرطوم ، نشرت في سنة 1995 في المطبوعة ( العلمية الدولية للسرطان ) .

3- يحتوي التمباك على 28 مادة مسرطنة ، أكثرها ضراراً هي نيترسامينات التبغ التي تشكل أثناء تحضير و تخمير التمباك (إذا ما أحتوت أي من اللحوم أو المأكولات جزء مما يحتويه التمباك من النيتروسامينات فهي تمنع فوراً و بإعتبارها مسرطنة).
من المواد المسرطنة الأخرى في التمباك:

1- البينزوبيرين ، الكورتونلديهيد ، الفورمالديهيد (عنصر مستخدم في تحنيط الموتى) ، الأسيتلديهيد (مادة مهيجة) ، هيدرازين (مادة كيميائية سامة) ، الزرنيخ (مادة سامة) ، النيكل ، الكادميوم (عنصر يدخل في صناعة بطاريات السيارات) ، البولونيوم (عنصر مشع ذرياً) .

2- يحتوي التمباك على النيكوتين و هو مادة تؤدي إلى الإدمان و إضطرابات في القلب و ضغط الدم و الأوعية الدموية ، النيكوتين الذي يمتصه الجسم من التمباك هو أكثر بمرتين إلى ثلاثة من الممتص عند تدخين سيجارة ، كما يبقى النيكوتين في الدم لفترات أطول .

3- يسبب التمباك العديد من أنواع السرطانات و منها سرطان الفم و الحلق و البلعوم ، وتنتشر هذه السرطانات بإستمرار إلى الأعضاء المجاورة ما لم تتم معالجتها سواء كيميائياً أو بالإشعاع أو جراحياً (إزالة الأورام و الأنسجة المحيطة ،ويؤدي ذلك في أغلب الأحيان إلى تشوهات) .

abomazeen
25-10-2007, 05:11 AM
فضلاً عن إصابة مستخدميه بالسرطان فإن التمباك يسبب :

1- أنواع عديدة من البقع الحمراء و البيضاء و التقرحات الحميدة في بطانة الفم ، و التي تحمل خطر التحول إلى خبيثة.
2- إنحسار اللثة عن الأسنان.
3- إصفرار الأسنان.
4- بخر الفم.
5- أمراض اللثة المؤدية إلى تخلخل الأسنان.
6- مشاكل إجتماعية بسبب تقزز من حولك من هذه العادة.
7- التمباك لا يعتبر أقل خطراً من السجائر و يشاركها في تعريض مستخدمه إلى أمراض السرطان و أمراض القلب.




يدمن الكثيرين التمباك و هم يحاولون إستخدامه للتخلص من إدمانهم على السجائر ( كالمستجير بالنار من الرمضـــاء ) ...

abomazeen
25-10-2007, 05:25 AM
حكمــة من الناحية الشرعية :


لا يجوز تناوله ولا الاتجار فيه ولا الترويج له ولا الإعانة على شيء من ذلك ؛ لأدلة متضافرة من القرآن والسنة والنظر الصحيح، ومنها :
1ـ قول الله تعالى في وصف نبيه محمد صلى الله عليه وسلم (يأمرهم بالمعروف وينهاهم عن المنكر ويحلُّ لهم الطيبات ويحرِّم عليهم الخبائث) والعقلاء متفقون على كون التمباك خبيثاً في شكله وريحه وأثره .

2ـ قوله تعالى (ولا تقتلوا أنفسكم) وقد ثبت ـ طباً ـ أن تناول الصعوط سبب لأمراض مستعصية تؤول بصاحبها إلى الموت مثل السرطان .

3ـ قوله تعالى (ولا تلقوا بأيديكم إلى التهلكة) قال صاحب المنار رحمه الله تعالى: قال بعضهم: يدخل فيه الإسراف الذي يوقع صاحبه في الفقر المدقع، فهو من قبيل (وكلوا واشربوا ولا تسرفوا) المنار2/213 .

4ـ قوله تعالى (وكلوا واشربوا ولا تسرفوا إنه لا يحب المسرفين) ووجه الدلالة من الآية أن الله تعالى نهى عن الإسراف في المباحات بمجاوزة الحد في تعاطيها، فمن باب أولى يكون النهي عن صرف المال فيما لا نفع فيه.

قال الإمام أبو محمد بن حزم في المحلى: مسألة 1027: السرف حرام وهو:

• النفقة فيما حرم الله تعالى قَلَّت أو كثرت ولو أنها قدر جزء من جناح بعوضة
• أو التبذير فيما لا يحتاج إليه ضرورة،مما لا يبقى للمنفق بعده غنى
• أو إضاعة المال وإن قلَّ برميه عبثاً
ومتعاطي التمباك قد تناوله كلام الإمام ابن حزم رحمه الله لكونه ينفق فيما حرَّم الله تعالى ويضيع المال بإنفاقه عبثاً في غير فائدة.

5ـ قوله تعالى (ولا تبذر تبذيراً إن المبذرين كانوا إخوان الشياطين) وإنفاق المال في التمباك تبذير من حيث كونه إفساداً .

abomazeen
25-10-2007, 05:35 AM
ومن السنة المطهرة:


1ـ قوله صلى الله عليه وسلم (وأنهاكم عن ثلاث:قيل وقال، وكثرة السؤال، وإضاعة المال) رواه البخاري. وإنفاق المال في التمباك إضاعة له لأنه صرف له فيما لا فائدة فيه .

2ـ قوله صلى الله عليه وسلم (لا ضرر ولا ضرار) أخرجه الإمام أحمد وغيره وهو في صحيح الجامع (7517) فثبت أن كل ما غلب ضرره على نفعه فتناولُه حرام، وتناول التمباك موجب للضرر بمتناوله ومن يحيطون به من زوج وعيال وزملاء.

3ـ روى الإمام أحمد وأبو داود عن أم سلمة رضي الله عنها أن النبي صلى الله عليه وسلم (نهى عن كل مسكر ومفتِّر) قال العلماء: المفتِّر: ما يورث الفتور والخدر في الأطراف، وهذا الأثر يحدث لمتعاطي التمباك خاصة في أول أمره ومن النظر الصحيح:
1. تناول التمباك يهدم بعض الكليات التي جاءت الشريعة بالمحافظة عليها وهي النفس والمال .

2. متناول التمباك يستثقل الصوم جداً؛ لأن فيه حرماناً له من تناوله بعد طلوع الفجر إلى غروب الشمس، فيكون الصوم مكروهاً لديه .

3. ما يصحب هذا الشيء الخبيث من نتن الرائحة المؤذية لمن يحيطون بمن يتناوله ثم إن مستقذر يستقبحه الذوق السليم، ويأنف منه الطبع السوي، وأسأل الله أن يتوب على الجميع.

abomazeen
25-10-2007, 05:51 AM
مواصفات أهل التمباك والسفــة :




(1) شلاليــفهم كبيرة ( البعض منهم ) بدون زعل .
(2) ريحته صعوط صعوط و تمباك وريحه فمه كذلك .
(3) أسنانه و ضرووسه لونها اصفر مايل إلي البرتقالي .
(4) يحمل في جيبه كيس مليان صعوط وزنه قريب نص كيلو .
(5) تشم ريحه الصعوط من بعيد وبعضهم تعرفه بريحه صعوطه .
(6) طوالي رابط رأسه من قوه الخرمه اللي في راسه . ( لو ما حصل سفــة ) .
(7) إذا كان لابس ملابس بيضاء تحصل أثر الصعوط في هدومه وخاصة في جيوبه .

abomazeen
25-10-2007, 05:57 AM
وأخيراً مداعبة :




قال ليك اتنين عرسان راكبين الطيارة ما شين يقضوا شهر العسل برة ( في الخارج ) ...

قام العريس فتح الكيس وداير يسف ... :rolleyes: :rolleyes:

قامت العروس إتهجمت وقالت ليهو سجمي أنت بتسف ؟؟؟ :eek: :eek:

قال ليها آآآي بسف وبطلق كمان عندك مانع ... :p :p؟؟؟؟؟

ود المطامير
25-10-2007, 12:06 PM
وأخيراً مداعبة :



قال ليك اتنين عرسان راكبين الطيارة ما شين يقضوا شهر العسل برة ( في الخارج ) ...

قام العريس فتح الكيس وداير يسف ... :rolleyes: :rolleyes:

قامت العروس إتهجمت وقالت ليهو سجمي أنت بتسف ؟؟؟ :eek: :eek:

قال ليها آآآي بسف وبطلق كمان عندك مانع ... :p :p؟؟؟؟؟

هع هع هع هع هع
أخونا الحبيب جدا جدا .. أبو مازن
والله ضحكتنى من الأعماق
بس داير أقول حاجه
عنوان بوست حبيبناهو ذكر فوائد التمباك
فلو لقينا بوست يطلب أضرار التمباك
عيييييك المخلايه مليانه
هع هع هع هع

moh_alnour
25-10-2007, 03:23 PM
والله كفيت ووفيت يا أبو مازن ولا عزاء لود المطامير ورفاقه بعد اليوم

حبيبة ودمدني
25-10-2007, 10:14 PM
اضرار السفه من درسات طبيه
1/ تفير لون الاسنان
2/ تسبب مستقبلا تكسر الاسنان
3/ سرطان اللثه او التهاب اللثه حمانا الله واياكم
4/ تغير راءحة الفم بصوره مستمره
5/ هروب الناس من حوليه بسبب رائحة فمه الكريهه
اقتنعتو يا البتسفو ولا نزيدكم





ودمتم بصحه وعافيه.........

((أبــوعاذر))
25-10-2007, 11:25 PM
اخوتي الاعزاء
اولاً التمباك مااجتماعي
مثلاً لو انت جالس في اجتماع مهم او ضيف في مكان راقي هل ممكن تسف طبعا لا
هلا ممكن تسف قدام خطيبتك طبعا لا
هنا اجابتي اليكم
طبعا اي واحد مابيقدر يسف في هذه الاماكن
مامقتنع بي التمباك
ومع ذلك بتسفوه
التنمباك من اخطر انواع الكيف مثلنا في رمضان
تلقي بتاع السجائر صابر اكتر من بتاع التنمباك
علما بان البسف مع تقدم الوقت بتجيه رجفة واعصابه بتكون تالفه واي واحد بيسف يجرب ان يدخل ليه خيط في ابره ويشوف مدي سباته
ولكم الشكر

abomazeen
26-10-2007, 11:07 PM
والله كفيت ووفيت يا أبو مازن ولا عزاء لود المطامير ورفاقه بعد اليوم




أبوحميد الغالي :

وبعد ده جماعتك ديل يقولوا لك ( الما بعرف يقول عدس ) :)....!!

عماد عبدالشكور
26-10-2007, 11:25 PM
والله يا ابو مازن كلااااااامك سمح بالحيل
بس الفيك اتعرفت
هع هع هع هع

عماد عبدالشكور
26-10-2007, 11:28 PM
5/ هروب الناس من حوليه بسبب رائحة فمه الكريهه
__________________________
يا حبيبة مدني
اصلو سافي تمباك ولا سافي الحكومة ؟؟؟؟؟

عماد عبدالشكور
26-10-2007, 11:31 PM
التنمباك من اخطر انواع الكيف مثلنا في رمضان
تلقي بتاع السجائر صابر اكتر من بتاع التنمباك
ــــــــــــــــــــــــــــــــــــــــــــــــــ ـــــــــــــــــــــــــــــ
احلى سفة في رمضان بعد الفطور

abomazeen
26-10-2007, 11:32 PM
والله يا ابو مازن كلااااااامك سمح بالحيل
بس الفيك اتعرفت
هع هع هع هع





حبــيــبـنا يا عمــدة :


أهههها ده الكنت خايف منــو ؟؟؟ ما قلنا من البداية ( بدون زعل )
ومع الاعتذار يا السفافين :D :D :D ( سفافين التمباك ) بس :p :p :p...!!!!؟؟!!

عماد عبدالشكور
26-10-2007, 11:33 PM
والله كفيت ووفيت يا أبو مازن ولا عزاء لود المطامير ورفاقه بعد اليوم
ــــــــــــــــــــــــــــــــــــــــــــــــــ ـــــــــــــــــــــــــــــ
ولا حياة لمن تنادي !!!!

عماد عبدالشكور
26-10-2007, 11:37 PM
مواصفات أهل التمباك والسفــة :




(1) شلاليــفهم كبيرة ( البعض منهم ) بدون زعل .
(2) ريحته صعوط صعوط و تمباك وريحه فمه كذلك .
(3) أسنانه و ضرووسه لونها اصفر مايل إلي البرتقالي .
(4) يحمل في جيبه كيس مليان صعوط وزنه قريب نص كيلو .
(5) تشم ريحه الصعوط من بعيد وبعضهم تعرفه بريحه صعوطه .
(6) طوالي رابط رأسه من قوه الخرمه اللي في راسه . ( لو ما حصل سفــة ) .
(7) إذا كان لابس ملابس بيضاء تحصل أثر الصعوط في هدومه وخاصة في جيوبه .
اها يا ود المطامير الصفات الحلوة دي فيك ولا لا ؟
انا شخصيا ما فيني

عماد عبدالشكور
26-10-2007, 11:39 PM
علما بان البسف مع تقدم الوقت بتجيه رجفة واعصابه بتكون تالفه واي واحد بيسف يجرب ان يدخل ليه خيط في ابره ويشوف مدي سباته
ولكم الشكر
ــــــــــــــــــــــــــــــــــــــــــــــــــ ــــــــــــــــــــــــــــــ
ابو عاذر رجفي شنو كمان انت قايلنا قاعدين نسف تلج ولا شنو ؟ ههههه

صابرحسين
27-10-2007, 01:23 AM
الأخ أبو مازن كل سنة وأنت طيب
المشاركة الأصلية كتبت بواسطة abomazeen
مواصفات أهل التمباك والسفــة :
(1) شلاليــفهم كبيرة ( البعض منهم ) بدون زعل .
(2) ريحته صعوط صعوط و تمباك وريحه فمه كذلك .
(3) أسنانه و ضرووسه لونها اصفر مايل إلي البرتقالي .
(4) يحمل في جيبه كيس مليان صعوط وزنه قريب نص كيلو .
(5) تشم ريحه الصعوط من بعيد وبعضهم تعرفه بريحه صعوطه .
(6) طوالي رابط رأسه من قوه الخرمه اللي في راسه . ( لو ما حصل سفــة ) .
(7) إذا كان لابس ملابس بيضاء تحصل أثر الصعوط في هدومه وخاصة في جيوبه .

تشكر على النصائح والإهتمام بموضوع السفة ، وهذا يدل على أنك تريد المصلحة للجميع ، نرجو سعة صدر الجميع 0
و إليك الرد على مواصفات أهل التمباك والسفة المذكورة أعلاه :ـ
1/ الشلاليف الكبيرة تساعد على إخفاء السفة داخل وخارج المنزل 0
2/ التمباك أبو ريحة نفاذة ومزعجة غير متوفر بالأسواق ولذلك رائحة الفم لا تتأثر به 0
3/ لون الأسنان والضروس يعتمد على حرفنة ونظافة المتعاطي للتمباك بل التمباك يجعلك تهتم بتنظف أسنانك أكثر 0
4/ يمكن أن تأخذ عدد من السفات بدلاً من كيس كبير ، وإذا نفذ تستعين بصديق ، لأن أحجام السفات تختلف من شخص لأخر 0
5/ يا حليل التمباك الذي تشم رائحته من بعيد ، وأنت داخل محل التمباك بتسأل عن مكانه
6/ وجع الراس من عدم التمباك حاصل ولا مجال للمغالطة 0
7/ إذا وجدت أحدهم وملابسه متسخة من التمباك أنصحه بمسحه بقليل من الماء وسوف لا يكون له أثر 0
أرجو ان أكون قد اوضحت بعض الأخطاء الشائعة عن أهل التمباك والسفه 0

مع خالص تحياتي

abomazeen
27-10-2007, 02:13 AM
الأخ الفضيل صابر حسين

تحية حب و احترام ...

والله العظيم باقي لي الشغلانة دي عاجباكم ساكــت ؟؟

دفاع مستميت على الكرة ( أقصد على السفة ) تقول بتعلب مدافع لفريق الحلــة ؟؟

لك العتبى حتى ترضى ...

okasha
27-10-2007, 02:34 AM
اخوتي الاعزاء
اولاً التمباك مااجتماعي
مثلاً لو انت جالس في اجتماع مهم او ضيف في مكان راقي هل ممكن تسف طبعا لا
هلا ممكن تسف قدام خطيبتك طبعا لا
هنا اجابتي اليكم
طبعا اي واحد مابيقدر يسف في هذه الاماكن
مامقتنع بي التمباك
ومع ذلك بتسفوه
التنمباك من اخطر انواع الكيف مثلنا في رمضان
تلقي بتاع السجائر صابر اكتر من بتاع التنمباك
علما بان البسف مع تقدم الوقت بتجيه رجفة واعصابه بتكون تالفه واي واحد بيسف يجرب ان يدخل ليه خيط في ابره ويشوف مدي سباته
ولكم الشكر


ذكرتنى نكتة خطيرة

قال ليك واحد قاعد مع الخطيبة فجأة طلع كيس الصعوط

قامت اتخلعت وقالت: ليهو اسبك ولا تسيب الصعوط


قام رد وقال ليها:انتى ممكن تسيبنى لكن دا ما ممكن اسيبنى الا اسيبو انا

ود المطامير
27-10-2007, 03:25 AM
الأخ أبو مازن كل سنة وأنت طيب
المشاركة الأصلية كتبت بواسطة abomazeen
مواصفات أهل التمباك والسفــة :
(1) شلاليــفهم كبيرة ( البعض منهم ) بدون زعل .
(2) ريحته صعوط صعوط و تمباك وريحه فمه كذلك .
(3) أسنانه و ضرووسه لونها اصفر مايل إلي البرتقالي .
(4) يحمل في جيبه كيس مليان صعوط وزنه قريب نص كيلو .
(5) تشم ريحه الصعوط من بعيد وبعضهم تعرفه بريحه صعوطه .
(6) طوالي رابط رأسه من قوه الخرمه اللي في راسه . ( لو ما حصل سفــة ) .
(7) إذا كان لابس ملابس بيضاء تحصل أثر الصعوط في هدومه وخاصة في جيوبه .

تشكر على النصائح والإهتمام بموضوع السفة ، وهذا يدل على أنك تريد المصلحة للجميع ، نرجو سعة صدر الجميع 0
و إليك الرد على مواصفات أهل التمباك والسفة المذكورة أعلاه :ـ
1/ الشلاليف الكبيرة تساعد على إخفاء السفة داخل وخارج المنزل 0
2/ التمباك أبو ريحة نفاذة ومزعجة غير متوفر بالأسواق ولذلك رائحة الفم لا تتأثر به 0
3/ لون الأسنان والضروس يعتمد على حرفنة ونظافة المتعاطي للتمباك بل التمباك يجعلك تهتم بتنظف أسنانك أكثر 0
4/ يمكن أن تأخذ عدد من السفات بدلاً من كيس كبير ، وإذا نفذ تستعين بصديق ، لأن أحجام السفات تختلف من شخص لأخر 0
5/ يا حليل التمباك الذي تشم رائحته من بعيد ، وأنت داخل محل التمباك بتسأل عن مكانه
6/ وجع الراس من عدم التمباك حاصل ولا مجال للمغالطة 0
7/ إذا وجدت أحدهم وملابسه متسخة من التمباك أنصحه بمسحه بقليل من الماء وسوف لا يكون له أثر 0
أرجو ان أكون قد اوضحت بعض الأخطاء الشائعة عن أهل التمباك والسفه 0

مع خالص تحياتي
أخونا الحبيب العزيز والغالى .. صابر ..
ياخى وين إنت من زمان ؟
دا الكلام , دا الكلام .. دا الكلام
يا أبو مازن يا حبيبنا سؤال
حصل جربت السفّه ؟
رد على السؤل عشان عندى سؤل تانى
هع هع هع هع

ود المطامير
27-10-2007, 03:27 AM
اها يا ود المطامير الصفات الحلوة دي فيك ولا لا ؟
انا شخصيا ما فيني
( أنظر الصوره )
ماشايفها دايره تصل الدقن ؟
هع هع هع هع هع .

صديق بلال
27-10-2007, 08:51 AM
حقيقة إنني تفاجأت حينما فتحت الجهاز وتحديدا المنتدى ووجدت التفاعل الكبير من الجميع... وهذا يدل على المشاركة الطيبة منكم والذي أثرى الموضوع من كل النواحي... ولكم مني خالص الشكر والتقدير لتفاعلكم وحواركم البناء الذي يتخلله روح الإخوة... وأسأل الله للجميع التوفيق...
وبهذه المناسبة إليكم هذه النكتة الحقيقية التي حصلت أمامي في مقر العمل في جدة...
حيث كان أحد الزملاء من الجنسية الفلسطينية من عشاق سفة التمباك... فكان يقوم بسفة التمباك في أثناء الدوام الرسمي في الشركة ولكن بالخفاء... وبحكم إنني من المقربين إليه فكان يسفه أمامي بشكل عادي.. وفي أحد الأيام أثناء ماكان يسف التمباك شاهده أحد الزملاء من الجنسية الهندية... فسأله ما هذا الذي تضعه في فمك... وبسرعة بديهة الأخ الفلسطيني قال بالحرف الواحد(( توركيش كفي)) أي قهوة تركية باللغة الإنجليزية.... فالهندي إقتنع بهذه الكذبة... وخرج الفلسطيني من هذا الموقف الحرج.. ذي الشعرة من العجين

abomazeen
27-10-2007, 09:00 AM
أخونا الحبيب العزيز والغالى .. صابر ..
ياخى وين إنت من زمان ؟
دا الكلام , دا الكلام .. دا الكلام
يا أبو مازن يا حبيبنا سؤال
حصل جربت السفّه ؟
رد على السؤل عشان عندى سؤل تانى
هع هع هع هع




شنو شنــو :eek: ؟؟ علـيي صوتــك :mad:؟؟؟؟ قول تاني ما سمعتك :rolleyes: :rolleyes: ؟؟

abomazeen
27-10-2007, 09:02 AM
معقولة بــس يا ناس ؟؟؟ في عمارة ( ..... ) ؟؟؟

ود المطامير
27-10-2007, 10:58 AM
شنو شنــو :eek: ؟؟ علـيي صوتــك :mad:؟؟؟؟ قول تاني ما سمعتك :rolleyes: :rolleyes: ؟؟

هع هع هع هع
وحات الله يا حبيب قلبى .. أبومازن
لى فتره طويله ما ضحكت ذى ما انت ضحكتنى هسى

الله يديك العافيه .. وبرافو عليك عرفتنى داير أقول ليك شنو ؟ صاح ؟

((أبــوعاذر))
27-10-2007, 11:34 AM
وااله ياجماعه ومع احترامي لي ناس الكيف عامه وناس الصعوت خاصه
وذي ماورد انو بي صراحه نرد في الموضوع ده الصعوت مااجتماعي ايوة وبخلي رائحه الفم عفنه نعم
وحتي رائحة العرق بدون مؤاخذه بتكون رائحة صعوت
لذلك انصح اخوتي البيسفوه من ترك هذه العاده
واسال الله ان يهديهم

abomazeen
29-10-2007, 12:46 AM
هع هع هع هع
وحات الله يا حبيب قلبى .. أبومازن
لى فتره طويله ما ضحكت ذى ما انت ضحكتنى هسى

الله يديك العافيه .. وبرافو عليك عرفتنى داير أقول ليك شنو ؟ صاح ؟




هاهاهاههاهاهاهاه هعهعهعهعهعهعهعه

وحات الله ... يا ود المطامير

انا من ضحكت دي ... ضحكت لحدي ما دموعي جرت ... وما نفع المنديل يوقف الدموع

لأنني حسيت إنو ضحكت نابعة من أعماقك يا طيب القلب !!!!
الجماعة معاي في المكتب لحدي ما استغربوا شديد الزول ده ما لو بضحك بالصورة دي ؟؟ اتخيل حجم الضحكة ( هاهاهاهاهاهه ) آآآي أكبر من كده ؟

وصاح جداً .. عرفتك عاوز تقول شنو ؟؟؟ تسلم يا عشاي ..!!!

عبدالمنعم الصديق(خدرا)
29-10-2007, 11:24 AM
( أنظر الصوره )
ماشايفها دايره تصل الدقن ؟
هع هع هع هع هع .
ودالمطامير
عامر دايما
ورحم الله القايل
سفه بى عطرونا
اخير من بقره بى قرونا
كدى باصى لى كيسك دا

آلاء عبد الرحمن
29-10-2011, 10:12 AM
.



.

ودالعمدة
29-10-2011, 11:20 AM
.



.

انتى ياآلاء بتبحتى مالك

ياعمك أبومازن كان تضيف :
من أضراره انه عبدالحق عمل ليه عمارتين

من الطرائف قصة سمعناها: فى مدرسة مدنى الثانوية
أيام مديرها المرحوم هاشم ضيف الله استدعى طالبا
لمكتبه وكان شايفه سافى ، وطلب منه أن يخرجها من فمه!
وطبعا الطالب طلع من المكتب ليخرج سفته وعاد
وقال له المدير : لماذا خرجت؟
أجاب : لا يمكن أن أخرجها فى بلاط المكتب .
فقال له المدير : عليك أن تحافظ على نظافة فمك
كما تحافظ على نظافة البلاط ؟؟؟
فترك الطالب التمباك دون رجعة
دون حتى جلدة واحدة ولكنهادرس تربوى عالى

محمود (أبو وضاح)
29-10-2011, 07:51 PM
عاف الله الجميع من هذه العادة السيئة ومتعهم بكامل الصحة والعافية

ضياء الدين احمد
29-10-2011, 09:10 PM
كثيرا ماكتبتها ليس دعوة للتمباك ولكنها كانت مشاركة للاخوان في احتفالهم لليوبيل الفضي لحقة عبد الحق في البركس جامعة الخرطوم العام1994
السفة ياسبب الهنا
يالفي الخشيم ليك كم سنة
اصبحت مدمن ختتك
وشلوفتي صبحت مدمنة
يا احلى من كل البرنجي
وكل سيجارة مدخنة
عطرونك الاصفر لذيذ
ولما اللسان فيك انتنى
حسيت بإنو الدنيا جنة
وانت حور في وسطنا
.... دي هدية ليك ياود المطامير وبعدين ماتنسى استخدامها في الحمام
ربنا اعفانا منها

بدر الدين محمد
30-10-2011, 01:45 AM
هع .. بعدما تشرب شاى تطلّع الكيس بمزاج
وتقعد تدردم وتدردم وتفتح راحة يدك وتشد طرف الكيس كدا
وترميها فى يدك .. وتكون حاكلها كدا براحة اليد وإنت بتطبّق فى الكيس
أها .. بعدما تدخل الكيس فى جيبك تعمتها بأصابعك التلاته كدا
والأصبع الصغير دا مهمته تصليح مكانها وتختها وتديها عصره لتحت
بطرف اللسان وتسرح فى الخيال أحلام

كل الطقوس دى وبرضو مافيها فائده ؟

شايف ناس مدني حظرو الاكياس واستثنوا اكياس الصعوط

صابرحسين
30-10-2011, 07:35 AM
شايف ناس مدني حظرو الاكياس واستثنوا اكياس الصعوط

أكيد يا استاذ بدر الدين الرجل الذي أصدر القرار حريف ويدرك تماماً أن هذه الفئة الجميلة إذى تم تغيير مزاجها وإجبارها على الرجوع للحقة أو بدائل أخرى سوف تتعطل المدينة ويزداد الزهج والملل وإحتمال كبير مظاهرات ، وإحتمال كبير أصدر هذا القرار ويده داخل كيس تمباك هههههههههـه

نزار احمد كوارتي
31-10-2011, 03:52 AM
واحد صاحبي شديدمن النوع الإذا عاوز يسلم عليك بقول ليك

حيث سوف أن السلااااااامو عليكوم, جِنو فلسفه وعامِل فيهاقصر الثقافه

انا بقوم بحِب أشاغلو وأحرِكو ليك بي لكزه لكزتين كِده عشان أطلِع منو حاجه حلوة

يوم قاعدين قُمت قُلت ليه تعرِف يا محمد

إنت والله أسوأ ما فيك حاجه واااااااااحده بس لو ما هي بتكون مليون في الميه

قال لي وتطلع شِنو إنشاء الله الحاجه دي ؟؟؟

قُلت ليهُ إنك بِتسِف تُمباك

قال لي تعرِف يا ابو النيز, انا أجمل حاجه فيني إني بسِف تُمباك

قُلت ليه ياخي التُمباك ده الجِداده ما بتاكلو

قال لي تعرِف الجِداده ما بتاكلو ليه؟؟؟ قُلت أها لييييه

قال لي لأنها ما عندها مُخ زيك كِده

كان عِندها مُخ كانت سفتو هه هه هه هه هه هه هه هه هه هه

ابوالنور
17-05-2014, 11:06 PM
سفه ي مطاميرو ياخ بمناسبة انك جيت البلد دي ورجعة وم لاقيناك ياخ