المساعد الشخصي الرقمي

مشاهدة النسخة كاملة : كلام شبه موزون لي زول جاب اللوم


عماد السائح
25-10-2007, 03:09 AM
واحد قال ناس مدني مقطعين؟
نقول ليه ياشيخنا
قلت كلام ما ليه لزوم
:mad:
عماد حسين االان 27\10\2007
عماد السائح
25-10-2007, 11:21 AM
ردا" على تربال سب أهل مدني قال تعبانين ومدينة وسخانة ورغم أن كلامه فيه صحة لكن؟
ديل ناس مدني ياتعبان

مدني جميلة بي ناسا
مدني يكفيك إحساسا
مدني والله حساسة
ويش شن قلت يا تعبان
**
مدني الوالدة والوالد
مدني الحارة والبارد
مدني الرحمة للوارد
ويش شن قلت يا مارد
......
مدني الثورة والبركان
فدا غزة والجولان؟
فيها القبة والبيان
شيخ سعدابي وودكنان
مدني والله ناسا حنان
حنان الفقرة لمضبان
يختو اللقمة للجيعان
وخدمة وركعة للضيفان
ويش شن قلت ياضهبان
.....
ناس طيبين يحبوك
وبي كفينا يسقوك
وموية نيلا يرووك
والجيران يخدموك
وكان احتجت يدوك
ولو بردان يغطوك
وبالجرتق يزفوك
وبالكاشف يغنولك
ويش شن قلت يا تربال؟
......
مدني النوبة والحوبة
مدني الفيها حبوبة
تحزم في طرف توبا
حلاوة وتمرة للصبيان
وقهوة وكعكة للجيران
ويش شن قلت يا ضهبان
ديل ناس مدني يا تعبان

عماد حسين السائح
عوض صقير
27-10-2007, 04:00 AM
والله ياعمدة

ماخليت ليهو حاجة التعبان ده !
عماد السائح
27-10-2007, 08:54 AM
بالله يا شيخ عوض بلد فيها اولاد شيخ عبد الله وناس فتوح وفيها معتز احمد ابراهيم وفيها ابو العز والفاتح عبد الرحيم وعوض صقير ووووو اللستة تطول بتتنبذ؟ الراجل كتر الحكي لكن الله يسامحني والجميع وشكرا"على المرور
مرتضى يوسف العركي
27-10-2007, 08:27 PM
الله استاذي عماد حسين
كلام مرتب وموزون وجديربالاحترام تقشعر له الابدان سيما تلك الاسماء الحبيبة فتوح واولاد الشيخ وبقية الاسماء التي سرحت معها وبها زمنا جميلا عزيزا على النفس اولئك النفر الكريم من الاخلاق وطيب النفس والمعشر تحياتي لكم كالعهد تدافعون عن هذ المدينة
النور محمد يوسف
27-10-2007, 09:39 PM
ردا" على من سب أهل مدني قال تعبانين ومدينة وسخانة ورغم أن كلامه فيه صحة لكن؟
ديل ناس مدني ياتعبان

مدني النوبة والحوبة
مدني الفيها حبوبة
تحزم في طرف توبا
حلاوة وتمرة للصبيان
وقهوة وكعكة للجيران
ويش شن قلت يا ضهبان
ديل ناس مدني يا تعبان

عماد حسين السائح

ونحن بنقول ليهو:

تبت يداكَ ... أهلنا قالوا "أصلو البجم زائــــد بلم"
وفض فوكَ ...مدني النضال... بلد العلم...بلد الفهم

وكمان بنقول ليهو:

لما كان الناس حيــارى وكانوا في عــــــز الظـلام
لما كانت الحرية غالـية مهــــرها المــــوت الزؤام
كنت في عيشة الكنابي لا كــــرامة ولا احـــــترام
والنخوة منها ما في ذرة أمسكت مدني الـــزمــــام
وهي تهدر ثائرة تغـلي تدحــر الظلَمَــة اللئــــــام
والصروح بالعلم تضوي تعلم الناس الكـــــــــــلام
ما غمض لعيـونا جفـنٌ وضُمة ما عرفت منــــــام
ثارت اشتعلت عشانك خلتـــــــــك زي الأنـــــــــام
خلتك تعـرف أصــولك برضو تشـــتم ..يا... حرام

وتسلم أخي عماد ود السائح
عماد السائح
28-10-2007, 01:57 AM
للاخوان اصحاب العشرة السمحة تحية واحترام شكرا" للمرور ونحن فدا هذه الزهرة والتي رغم طول البعاد نعيش برائحة عطرها الجميل المميز ونرشف رحيقها حتى الثمالة ونغتسل بنداها ونشرب نخب السعادة .ثم نتكي على ظلها اذا انهكتنا الحياة .احبك واحب البحبك حبيبتي مدني.