المساعد الشخصي الرقمي

مشاهدة النسخة كاملة : ابوريلان : ضيف الكرسي الساخن لهذا الاسبوع



امير عبدالباقي
16-10-2004, 03:12 AM
الاخوه الاعضاء
كل عام وانتم بخير ؛ رمضان كريم ؛ ولقد انقضي منه يوم مر كل النسمه لم نشعر به ؛ربنا يتقبل من الجميع
اخوتي بما ان اكتمل فترتي علي الكرسي لقد اخترت العضو ابوريلان ضيف هذا الاسبوع وسوف اقوم بتوجيه له اول سوال
تعريف كامل بالبطاقه الشخصيه

أبوريلان
16-10-2004, 10:57 AM
أولا أحب أن أهنىء جميع المشرفين والأعضاء بمنديات ود مدنى بمناسبة الشهر المبارك أعاده الله علينا وعليكم بالخير واليمن والبركات .

ثانيا : أشكركم لأختيارى للكرسى وأتمنى أن أكون خفيفا عليكم فى شهر الخير والبركات :

أشكرك أخى أبو ريان وأرد على سؤالك :

الأسم : ياسر عبدالرحمن محمدعلى ( أبو ريلان )
العمر : الأعمار بيد الله ( 37) من غير الجمع والإجازات
متزوج وأب للحلوة ريلان
مكان الميلاد : أحلى المدن مدنى حى العشير سابقا وحى القلعة حاليا
الدراسة : الإبتدائى كان كثير الترحال بسبب تنقلات الوالد
مدنى العشير الإبتدائية _ التجانية الفاشر - الشرقية الفاشر - ثم مدنى - العشير الإبتدائية - مدنى - جبرونا الإبتدائية
المتوسط: المؤتمر مدنى
الثانوى : مدنى السنى
الجامعة : المعهد العالى للدراسات المصرفية والمالية - الخرطوم
تخصص بنوك
العمل : بنك الشمال الإسلامى
حاليا : شركة تطوير عقارى بالمملكة العربية السعودية - الرياض

أتمنى أن أكون أوفيت وشكرا

aborawan
16-10-2004, 11:42 AM
ربنا يحفظا ويخليها ليك يا رب وتربى فى عزك باذن الله
وتمر الايام والسنين ويتقدم لخطبة ريلان شاب انتا عندك فيه راى او ما بترتاح ليه بمعنى اصح وماشايف انو مناسب لبتك الغالية وتقرر قرار حاسم بينك وبين نفسك انو الزول ده لو بقى اخر راجل فى الدنيا ما بتديه بتك لكن ريلان وقبل ما انت ترد على المتقدم تجي تقول ليك ( يا بابا انا عايزاهو وبحبو شديد ) موقفك هنا بكون شنو وما يفوت عليك قلنا انك قررت انك ما حا تديه بتك لو يلحس كوعو :)

HAMADTO
16-10-2004, 11:50 AM
والله يا ابوريلان ربنا يعينك على اجابة هذا السؤال ******
رمضـــــــــــــــــــــــــــــان كريــــــــــــــــــــــــــم

أبوريلان
16-10-2004, 11:55 AM
أولا أحييك يا أبو روان على السؤال الخطير بالجبنه هههههههههههه
وكل عام وأنت بخير ، الله يخليك يارجل يازوق وأديك العافيه ويجمعك مع أم روان قريبا بركة الشهر الكريم ، قول آآآآآآآآآآمين :D

سؤالك خطير
طيب نرجع نرد عليه
ربنا يبلغنا هذا الميعاد يارب وأشوف ريلان عروس

طبعا ريلان الغالية كلو يهون عشانها هى وحيدتى ربنا يديها الصحة والعافية وعلاقتها بى لصيقة شديد أكثر من والدتها وما بظن أنو يجى يوم وتكسر لى كلام ، وحسب كلامك لو المتقدم أنا ما برتاح ليه أو ما شايف أنو مناسب لريلان

بقول ليك يا أبوروان لو ريلان قالت أنها بتحبوا ما برفض طلبها وما ضرورى أكون أنا برتاح ليه طالما سعادة بنتى بإرتباطها بهذا الشخص فسوف أوافق عليه لأنها وحيدتى وسعادتها هى سعادتى .

مشكور يا أبو روان

aborawan
17-10-2004, 12:33 AM
كويس برضو عشان الحبايب كلو شئ يهون :):)

تحياتي اخوي وسنعود بعد حين :D:D

مازن الجمّال
17-10-2004, 02:45 AM
ياسر عرس لي بناتك ديل :cool:

أبوريلان
17-10-2004, 10:32 AM
يا راستا سلام

بناتى ديل وين هم ، هى بنيه واحده ربنا يحفظها

بس بقول ليك أبشر يا راستا أنا موافق

بس بينى وبينك أخاف يوم تكون قويه وتنساها فى مشوار المساء :D :D :D

امير عبدالباقي
17-10-2004, 10:39 AM
ابوريلان لك التحيه
عاوزنك يابطل تحكي لينا قصه زواجك كيف كان ؟ هل كانت غراميه؟ ولاتقليديه
وين شفتها وكيف كان اول لقاء ؟ وهل في نتك تدبل يافرده؟
الصــــــــــــــــــــراحه يابطل مهمه

أبوريلان
17-10-2004, 11:27 AM
شكرا أمير

كانت غرامية وملتهبة جدا جدا بين الطرفين

كنت بعمل ببنك الشمال الإسلامى فرع أمدرمان وبجى مدنى كل خميس زى ما ناس مدنى كلهم فى الخرطوم وبكون راجع مدنى وأسابق فى الزمن ولو كان فى فرق فى الحسابات بكون قلقان أنو ما يضبط ويأخرنى من السفر لكن لو حتى الصباح بسافر وقابلتها بصيدلية بمدنى تعمل بها ومن أول نظرة طبعا أعجبت بها ، وطبعا كترت الزيارات للصيدلية وهاك يا شراب ببسى معاها فى الصيدلية كل خميس طبعا بمشى بسبب وبدون سبب وبمرض وبدون مرض وكمان كترت الجيات لمدنى وخلال 10 أيام من التعارف تقدمت لأهلها وبدون أن أخبر أى حد من أهلى وعندما أخذت الضو الأخضر من أهلها أخبرت أهلى ورحبوا بهذه الأسرة أشد ترحيب ، بس الوالدة ربنا يطراها بالخير ختت يديها فى رأسها وقالت لى البت دى أنا رشحتها لفلان الفلانى من أهلنا وجاء من أبو ظبى ليه يومين وشيلتوا جاهزة وعايز يتزوج ويسوقها معاه وعندوا مواصفات معينة منطبقة عليها وأنا حدثته بأن مواصفاتو دى فى بت ناس فلان ومشت أمو وشافت البت وعجبتها وهو جاى بعد يومين يشوفها ويخطبها وهسه أهلوا يقولوا شنو تحدثنا بالبنت وتمشى تخطبها لولدها المهم أقنعتها بأنو كل شىء قسمة ونصيب وحصل المتوقع طبعا وأتهمت بما توقعته ، ولكن كان تدبير من الله وبدون تدخل من أى شخص ويوم طلبتها كنت مدعو من صديقاتى ببنك .....فى دار الأطباء مدنى وفعلا رحت بعد أن أخذت الضوء الأخضر طبعا وتمت الخطبة وعلى طول بدأت فى التجهيز للزواج والحمدلله تم بسلام ، بس على فكرة أم ريلان بعشرة وما بفكر أدبل عليها يا أمير يا بتاع المشاكل يعنى بعد تقرأ الكلام دا هى بكون فى كرسى ساخن تانى عشان كدا أتلم ياولد ، دا بكل صراحة وبطل حركات .

aborawan
17-10-2004, 11:32 AM
:D:D[SIZE=4]ربنا يخليها ليك ويحفظكم ويخلي ليكم بتكم وحبيبتنا كلنا ريلان يا حاج متولي

امير عبدالباقي
17-10-2004, 11:55 AM
طيب لو امك قالت ليك ياولدي البت دي انساها انا اخترتها خلاص للناس ديل وشوف ليك واحده تاني ؟ والبنت شافت المغترب وغيرت رايه موقفك ح يكون شنو يابطل

أبوريلان
17-10-2004, 12:00 PM
أمير
البت أنا حنكتها وبتموت فى ياسر وبس

وأنا الوقت الخطبتها فيه ما كنت مغترب وهى فضلت ياسر على المغترب الجاهز ، وأمى بتؤمن بالقسمة والنصيب عشان كدا ما مكن تقول لى أنساها ، يا شمرتجى .:D :D :D

امير عبدالباقي
17-10-2004, 12:07 PM
يعني اكلت بعقلها حلاوه وعملت ليها غسيل مخ الله يسامحك
وسلبت حقها في الاختيار

أبوريلان
17-10-2004, 12:10 PM
النقه دى ما حقتنا يا أمير بس الريده ياحنين شقاوه .

امير عبدالباقي
17-10-2004, 12:13 PM
[QUOTE]كاتب الرسالة الأصلية myrelan
[B]أمير
البت أنا حنكتها
ده كلامك]

روميساء 2004
17-10-2004, 03:41 PM
تحية للجميع هنا ...

ورمضان كريم ...

أبو ريلان ... لك تحية أخري ...

بين الآم والقلق والترقب ...

كنت أنت يوما ً في انتظارطفلتك ...

صرخة ميلاد ... مبروك جابوا ليك بت ...

تتربي في عزك ...

وصف أحساس الأب ؟

فرقت لو كان ولد ؟؟

تحياتي ...

أبوريلان
18-10-2004, 12:56 AM
أريج كل سنة وأنتى طيبه والقابلة يتحقق حلمك ويقرب ليك البعيد

أديك ألف عافيه وبركه بالشوفه والطله البهية

ومشكوره للمشاركة والسؤال الظريف

لحظات جميلة لاتوصف شعور لا يقاوم أمتزج بين الخوف والفرح ، يوم لاينسـى بمستشفى مدنى التعليمى كل الأهل مجتمعين ومترغبين ، الوقت ظهرا ورياح بارده تداعب أغصان الأشجار وسكون يخيم على الجميع ، الكل يدعو الله ، لحظات عصيبة مرت بى وأنا ذهابا وإيابا على ممرات ( الجناح ) كرجل الخط ، أستقرق هذا وقتا وأنا فى هذه الحالة ، وأنا أتقرب من بعيد وعندما شاهدت تعانق الأهل والبكاء فيما بينهم تملكنى شىء من الخوف ولكن أسرعت نحوهم وعندها سمعت زغروده فبكيت وكانت لحظات سعيده حين سمعت كلمة مبروك من الجميع ( مبروك جابو ليك بنت ) .

أريج أنا كنت متوقع بنت حتى أسمها كان منتظرها قبل ثلاثة شهور من ولادتها وأمنيتى ثلاثة بنات وقولى يارب فى هذا الشهر المبارك أن يتحقق حلمى . ربنا يحقق أمنيتى ويرزقنى بأخوات ريلان .

شكرا كتير روميساء

أبوريلان
18-10-2004, 09:54 AM
كاتب الرسالة الأصلية امير عبدالباقي
[QUOTE]كاتب الرسالة الأصلية myrelan
[B]أمير
البت أنا حنكتها
ده كلامك]

يا أمير أم ريلان ربنا خلقها لأبو ريلان ، يعنى الحنك سبب فقط

كدى مبسوط

روميساء 2004
18-10-2004, 05:07 PM
ابو ريلان ...

وانت طيب ...

الله يسعدك كمان وكمان ...

وبركات الشهر الكريم ياااااااارب تيمان ( بنات )...

ويتحقق الحلم ...

ابو البنات ...

فى عمر الانسان لحظات قصيرة...

تترك بصامتها الواضحة على مدى عمره...

هل مرت عليك هذة اللحضات؟

أم وافــــــــــــي ...

aborawan
19-10-2004, 02:02 AM
يلا يا سر نخفف عليك القعده في الكرسي شويه وعايز منك بعد تجاوب على سؤال اختنا اريج ام وافي ربنا يخليه ليها انك تلقب لينا اعضاء المنتدى على حسب تقييمك انتا كل واحد تديه لقب

مثلا فلان الكنق وفلانة الرومانسيه وكده يعني انا بديك اسامي بعض الاعضاء وانت عليك باللقب عشان ما اتقل عليك

ابو بكر ( الادمن )
عمر ( 114 )
حمدتو ( نبيل )
محمد ( البعد لله :D:D)
امير ( امير عبدالباقي )
اسماعيل ( ابو قيس )
خالد ( خالد حمد موسى )
هشام ( رهيب )
ابراهيم ( ابراهيم )
ما عارف اسمو :) ( المشتاق )
الجنينه ( راستا مان )
سوسو ( light^rose
شيراز ( تشيزو )
منونة ( نونا )
نورا ( نورا )
وجود ( وجود السعوديه )
روبي ( روبي )
الحلوة ( الحلوة وامورة )
والباقين لو اتذكرت من عندك واهو واحد ما تنساهو لينا اللي هو
ياسر ( انت ) :):)

أبوريلان
19-10-2004, 11:55 AM
أريج

أم وافى عوافى

وبركة الشهر الكريم أقرب إجازة المدارس ( الصيفية بينى وبينك ) :D :D :D

أديك ألف عافية وأسكنك الصافيه قولى آآآآآآآآآآآآآآآآآآآآآآآآآآآمين

أشكرك كتير على السؤال القصير الكبير يافرده كبير فى مضمونه يا أهل العلم

طبعا مرت على لحظات قصيرة فعلا بس تركت ذكرى لاتنسى وهى عمرة بصحبة الشيخ محمد ود الشيخ البرعى ربنا يطراهم بالخير ، كنت ومعى الأخ مرتضى يوسف ضابط شرطة سابقا بمدنى فى طريقنا لجده والصدفه تجمعنا بالصديق الشيخ محمد البرعى فى غرفة واحدة فى الباخرة المتجه لجده ومكثنا مع بعض أسبوع فى مكة وأكملناه بالمدينة فكانت أيام لها إيقاع خاص محفورة بذاكرتى ولن أنساها طول حياتى ومعاملة الناس لنا من الباخرة وحتى أداة العمرة .

شكرا أم وافى وربنا يسمع منك وأرزق بتوأم بنات

:D :D :D

أبوريلان
19-10-2004, 12:38 PM
أبو روان سلام

أنت رمضان مسخن فى الدمام ولا شنو ؟

عايز الشباب يزعلوا منى ؟

ياشباب أنا مجبر أرد على أبو روان بس ما حد يزعل فى هذه الألقاب إتفقنا :D :D :D أوكى :

ابو بكر ( الادمن ) ( أبوبكر جنابو )
عمر ( 114 ) ( عمر إحساس )
حمدتو ( نبيل ) ( نبيل ســـوفت )
محمد ( البعد لله ) ( محمد المطوفش)
امير ( امير عبدالباقي ) ( أميــر نقـــه )
اسماعيل ( ابو قيس ) ( إسماعيل الوحش)
خالد ( خالد حمد موسى ) ( راعى المكسيما )
هشام ( رهيب ) ( هشـــــــام حنـك)
ابراهيم ( ابراهيم ) ( أبراهيم أبنوس )
ما عارف اسمو ( المشتاق ) ( المكســـر )
الجنينه ( راستا مان ) ( فالكاو )
سوسو ( light^rose ( البرلومـــه )
شيراز ( تشيزو ) ( الدهباية )
منونة ( نونا ) ( البرتقالــة )
نورا ( نورا ) ( الركشـــة )
وجود ( وجود السعوديه ) ( الحنينه السكره )
روبي ( روبي ) ( كليب )
الحلوة ( الحلوة وامورة ) ( الدلوعه )
والباقين لو اتذكرت من عندك واهو واحد ما تنساهو لينا اللي هو
ياسر ( انت ) ( دافيس )
مزونى ( مازن شلاقه )

خلاص يا المطوفش تمام

aborawan
19-10-2004, 11:05 PM
انا مطوفش

كده امسك واحد زعل ولسه الجايين كتاررر :mad: :mad:

بعدين خالد ده راعي الحوت (BMW) الجابا للماكسيما شنو يا مطوفش انتا

امير نقه كان تخليها امير نقه تربيع ( هع هع هع )

بعدين انت دافيس شنو عليك انت ( البكاي وسيد جرسه ) يا بتاع الخروج النهائي :D :D

حماده 2004
19-10-2004, 11:29 PM
الاخ العزيز ياسر عبدالرحمن
انت تقريبا شقيق عمار عبدالرحمن او استاذ عمار عبدالرحمن معليش دا سوال خارج الموضوع وين عمار الان وكفاح عثمان صاحبو
احكي لنا عن نشاطك الرياضي والفرق بين حي العشير وحي القلعة

أبوريلان
19-10-2004, 11:44 PM
المطوفش

أنتا قلت أنا أسمى الناس بألقاب يعنى الأسماء القديمه ما عجبتنى وأنا رديت على سؤالك ولو ما عاجبك المطوفش برضو مطوفش :D وراعى الحوت أنا غيرتو لراعى المكسيما رأيك شنو . وبعدين أمير نقه حلوه كده ، ودافيس دا أسم رياضى معروف فى مدنى . وشكرا

أبوريلان
20-10-2004, 12:10 AM
الأخ حماده
رمضان كريم وكل عام وأنت بخير
شكلك كدا عرفتنى ، وأمكن تكون من العشير
نعم أنا أخو الأستاذ عمار عبدالرحمن ، موجود بالسودان وفى أحسن حال ويعمل الآن بمدرسة مدنى الشرقية بنين ، ومتزوج وأب لطفلين .
الأخ العزيز كفاح كمشاك بألف خير وموجود معانا بالمملكة - الرياض وفى أحسن حال ومتزوج ومترقب المولود الجديد إنشاء الله .

حماده نشاطى الرياضى دا موضوع طويل جدا جدا ما أقدر أحكيه فى هذه المساحة وأنت أدرى ، بس أختصر ليك بعض النقاط .
بدأت نشاطى الرياضى بالناشئين وأسم الفريق ( القلعة ) وكنا وقتها يدربنا المخضرم ولاعب الفريق القومى السابق أحمد حامد ( دبويه ) وكان الفريق من أبرز فرق مدنى وكنا وقتها حاملى كل الكؤوس الرياضية التى تتبارى عليها فرق مدنى شرق وغرب وكان الفريق يجمع كوكبة مبدعة بحق وحقيقة وبتوجيها كابتن أحمد حامد أصبح الفريق من الفرق المهابة حتى من الأندية الكبيرة وبالفعل أدينا مباراة مع النادى الأهلى وقتها والنتيجة كانت تعادل وتمت الإشادة بالفرقه جميعها . وعندما أصبحنا قوة ضاربة لجميع فرق مدنى وبما أنو بعض مدربى الفرق المنافسة لنا كانوا ضمن إتحاد الناشئين أصدروا قرار وقتها بحل فريق القلعة وهو فى أوج تألقه بسبب تخطىء أعمار لعيبته سن الناشئين .
وبعد حل الفريق قامت الأندية الرياضية بمدنى بضم جميع لعيبته لصفوفهم ، أنا وكفاح كمشاك ومدثر ليمون وعادل ركس وحمدان روما وعباس الدسيس وياسر الطويسه كنا من نصيب نادى المورده مدنى ولعبت لهم ثلاثة مواسم ، ثم فى حالة غضب تركت اللعب بالنادى وبجميع الأندية وأعتزلت اللعب وتدخل أناس كثر لإرجاعى لصفوف الفريق وكل محاولاتهم باءت بالفشل .
ثم بعدها لعبت فى دورى البنوك بالخرطوم وقتها كنت أعمل ببنك الشمال الإسلامى أمدرمان وكانت الدورى يقام بميدان جامعة الخرطوم الميدان الشرقى وميدان جامعة السودان للعلوم والتكنولجيا ، أما الآن بالرياض فنادرا ونلعب فى رمضان فقط طبعا بظروف العمل .
أما الفرق بين حى العشير وحى القلعة فحى العشير طبعا الأصل والقلعة الفرع لأنى نشأت بحى العشير وأعتبر جميع أهله أهلى لأنه حى عريق وأعتز بأننى ولدت بهذا الحى وترعرت به وله ذكريات حلوه . أما القلعة فكانت النضوج والنشاط الرياضى والإستقرار ولى بها أعز الأصدقاء .
أرجو أن أكون عند حسن ضنك وشكرا .