كلام شبه موزون في استقبال الوالدة الحنون

[عماد السائح]

في استقبال الحنونة بثينة بت الجز ولي ود سنهوري

في موجة الحزن البيردح
ما بين ضلوع الليل جواي
والتواريخ القديمة
في منصات الخيال
في بسمة الوجه الصبوح
في الخدود البرتقال
في الفصود الدافقة
وجع الغربة فينا
وانكسارات الزمان
شفتك أنتي وياكي أنتي
أمي يا مهد الحنان
*********.
بعد السلام والدهشة فينا
وضمت الصدر
السقا ني الود زمان
ما بين دموعي والحنين
والخواطر وانحباسات الأنين
قلت أمك ثم من
قال أمك ثم من.
********.
جلست قبالي.
تحكي كل الكان بنفسج
تحكي كل الكان في بالي
تحكي كل الكان زمان.....
جلسة في الحوش النرشو
وريحة الشوق البيعطر
كل نفحات المكان
والبنات الزاهيات
وكل أشكال الحسان.
والمديح والاغنيات
وفاطمة سمحة ولونا قمحة
وأم احمد دقي محلب
وغول بياكل كل أطفال المدينة
والزيارات القديمة
والنساء الساحرات...
وبعد صمت
ودردشات
*******
قلت يما باسم الدهشة ألفينا!
ليش ربيتي القيم ألفينا؟
الود والولفة وحب الغير
العالم غير.
يما العالم يسرق بعضو .
عمرك شفتي الزول البينشل من جزلانو
وعمرك شفتي الزول البيسرق من دكانو
عمرك شفتي الزول البيقتل كل اخوانو.
بطانة خيانة والكل من بعضو
بياكل بعضو باسم الدين
والله سنيين!
******.
كيف ناس عشة وبت مومنيين
وناس بت زوفة وبت جبريين
وناس حر دلو وناس حورية وشيخ عابدين
والناس القالو علي مجنون لسعه قاعدين؟
والحاجة سرورة وشلكاوية وبت ملين
وناس شيخ ادم وناس حاج حمزة
وناس الشايقي والهوارة وود الزين
وناس سلطان وشيخ النيل وشيخ قنديل
لسعه عايشين؟؟
وناس عطا جعفر وناس الصافي وناس الحجزي
والخواض وناس العمدة وحي الطملة ود ابو جون
و ناس جنقول
وناس عشرية والمدنية والحناوي والدرنية
وود الصول.
وناس الكورة ناس دورية واولاد سانتو
وود الشول
والجرارة وناس شيخ يونس وود مريودة
ود العركي والجعلية
وناس كلتوم
ناس الكومي ورمضانية وناس سناري
وود سنهوري واولاد سنجر
وعمي التوم
وكل ناس مدني عموم وعشقي يدوم
لسعه عايشين؟؟؟
******.
وردت امي
بصوت القهر الكامن
بين جدران الزمن الآني سنييين
وبين صوت النفس الهابط صاعد
ذي سكين .
وبين العرق الساكب لون الطين
وبين دمعات في فصود ناعمين
لسعه عايشين!!!!
وبي منديل

جففت الدمعة الساخنة الحارة بين خدين
والغصة العبرة بتاكل فيني سنسن وسنين
وحياة البيني وبينك يمة وذي عاشقين
يمة ارتاحي
وانسي الوجع الفيك وفيني
وفاطمة السمحة بترجع سمحة
ومهما عملو بترجع سمحة
ونرجع نمدح بالسراي
والوالد يعزف العود والناي
والسراي يا السراي
الجافو النوم وعقدو الرأي
اللمتين يا مولايعماد السائح 7\11\2007

[محمد الشايقي]

تحيه اجلال واكبار للحاجه الوالده بثينه
نتمنى لها وافر الصحه والعافيه

[هيثم عبدالعال]

تحية وتقدير للوالدة الحنونة الحاجة بثينة تلك التي تفيض حنية ومشاعر أمومه تغمر كل من يعرفها
همسة يا باشمهندس : عصام وينو من الكلام الموزون ده .

[عمر البشير]

لك التحية اخي عماد السائح وان تسطر بقم معني البر بالوالدين.
رحم الله والدينا والمسلمين جميعا وادخلهما الله فسيح جناته مع النبيين والصديقين والشهداء واحسن اؤلئك رفيقا.

ولك ودي.

[نزار حسن محمد]

ياسلام عليك ياعماد ..ربنا يحفظ الحجه بثينه ويحفظك لنا

[Isam Hussien H]

الحبيب عمده ،، أدهشتني قدرتك على التعبير السلس وأنت تتناول الوالدة الحاجة بثينة بهذا العمق ،، عل كثير من امهات ذلك الزمن الجميل قد أخذن الحياة على نموذج حاجة بثينة ، إلا أن عقيدتنا فيها أنها أم تحملت من المصائب ما يكفي وحان لها أن تجني ثمار ما عمقته فينا ، فالمثل التي ترى بأنها قد أتت في زمن غير زمنها هي التي نجني ثمارها نحن الآن ونحن نتجول في دواخل كل الجميلين بأريحية ، وهي أول من يستحق هذه الثمار ،
حبيتك كأخ أكبر وكصديق وأنت نتاج هذه المثل ،،
لن تلين عزيمتنا في المحافظة على نموذجنا وليسقط كل قبيح ...

الأخ الجميل هيثم عبدالعال ،، الكبير أول .. مع تقديري لكل من يدلو بدلوه في تعميق فكرة قدسية الأم عندما تعطي بدون إنتظار ردٍ ...

[عوض صقير]

عمدة
كلامك أكثر من موزون
لأن الوالدة بثينة هى من يستحق ذلك
لأن الوالدة بثينة أم حنونة
لأن الوالدة بثينة والدة عطوفة
لأن الوالدة بثينة أعطت وقدمت

وأنجبت

عادل

عماد

عصام

وأحسنت التربية

جزاها الله عنا ألف خير

[ابو صفاء]

ان من البيان لسحرا
يشعر كل من يقرأ هذا الكلام الموزون ان القادمة والدته الحنون
اطال الله عمرها ومتعها بالصحة والعافية ونتمنى لها اقامة طيبة
مع تحياتي لك اخي عماد

[عماد السائح]

ما اجمل هذا المنتدى الذي قرب البعيد واحيا روح التواصل فلكل من غرس شتلة في هذا المنتدى من زول وزوله الحب والتقدير والتحية للجنرالات واشكركم على النجمة الثانية (عضو مجتهد)يعني بقيت ملازم اول يعني سنتين واغلبا .والتحية للذين مرو وبثينة هي ام الكل وامهاتكم هم اماتنا ومدني امنا كلنا .

[مثني ودالعيكوره]

في استقبال الحنونة بثينة بت الجز ولي ود سنهوري


*******
قلت يما باسم الدهشة ألفينا!
ليش ربيتي القيم ألفينا؟
الود والولفة وحب الغير
العالم غير.
يما العالم يسرق بعضو .
عمرك شفتي الزول البينشل من جزلانو
وعمرك شفتي الزول البيسرق من دكانو
عمرك شفتي الزول البيقتل كل اخوانو.
بطانة خيانة والكل من بعضو
بياكل بعضو باسم الدين
والله سنيين!
******

عماد السائح 7\11\2007

ان شاء الله العالم يتعدل حالو
ويمه تكون هي نقطة التماس....
كل الزمن الرائع يجيك صاد
ويتملّكنا من تاني حب الغير وصدق الاحساس...
ليه ما يتحقق؟؟ مادام (يمه بثينه) هي الواضعه الساس...

ربنا يحفظ الامهات...

مع عاكر مودتي....