حنك رايقين (رسالة لمن يهتم)( 1)

[مرتضى يوسف العركي]

ود العركي .. وود الريح .. أصدقاء وحبايب ..
هموم ود العركي عند ود الريح والعكس بالعكس..
جنهم نقة في التلفونات ..
------------------------------------------
مرتضى ود العركي رفع سماعة التلفون "وقال كده" اتصل على ود الريح ..
ود العركي : الو ود الريح ازيك
ود الريح : أهلين يا حبيبنا .. ود حلال تصدق حسه كنت عايز اتصل عليك (مكنة)..
ود العركي : شفت البوست بتاع مستشفى مدني بتاع ابو زيد وعزيز عيسى
ود الريح : شفتو.. لكن يا كمندان شاكي انو ناس أبوزيد وعزيز ديل صوروا سوق الأخوان
ود العركي : والناس دي عارفة الحاصل ولا تحرك ساكنا ....
ود الريح : ساكن ومتحرك واستاتيكا وديناميكا شنو يا ودالعركي .. خليك في حالك وأمشي جمب الحيط ..

ود العركي : شوف يا سيدي كلام المنظراتية ده ما بنفع ظروف البلد كده وعلى قول المثل مد كرعينك قدر لحافك .
ود الريح : ما فهمتك .. (عامل رايح)

ود العركي : المسالة مش مسالة حرص وسمعة المسالة مسالة إمكانيات مادية قادرة على التغيير ولا اعتقد انو حنكون احرص على سلامة المواطنين من وزير الصحة الولائي او حتى الوزيرة الاتحادية شفتها في الأخبار باذلة مجهود كبير تتصور السودان ادخل ليه مصل تطعيمي للأطفال يقيهم من ثمان أمراض ويقلل كثيرا من وفيات الأطفال.

ود الريح : الله أنا من وزيرة الصحة هي اسمها منو (أقنست لوكودو) لا لا (تابيتا بطرس)(راااااااااااايقة ورزينه .. قيافة وفايته الناس مسافة) بريدها لله وما برضى فيها
--------------------------------------

ود الريح : سمعت أنو التلفونات مراقبة يا حبيب .. ما تتكلم ساي .. (نظام تخويف)
ود العركي : ظاهر عليك مزاجك ما رايق ما شربت الشاي ..
ود الريح : شاي شنو يا منقة انت شابكنا ساس يسوس فهو مسوس ..
ودالعركي : بالفهم ده معناها أنت لا تتكلم لا تسمع لا ترى وان كان البعض يقيم ذلك سياسة فهذا شانه البهم البلد انو يكون فيها اهتمام مهم ..
ود الريح : الخواف ربى عيالو ..

[مرتضى يوسف العركي]

ود الريح : حسه الصور مالها عيبها لي .. بس عايزين شوية نضافات والنظافة ما بقروش
ود العركي : اتفق معكم في أمور النظافة ما تحتاج لميزانيات كبيرة النظافة سلوك قبل أن يكون إمكانيات ومنو القال ليك الكلام ده في بيتكم بس

ود الريح : عليك الله يا مرتضى الكلام الكبار ده خليهو .. وبطل التنظير بتاعك ده ..

ود العركي : يا صديقي المسالة ليست تنظير على فكرة اعتقد انو ميزانية ولاية الجزيرة في وزارة الصحة لا تتجاوز مائة وخمسون مليون ودي غير كافية لمركز صحي ؟
ود الريح : يا رااااااااااااااااجل .. (ياولد جيب الحاسبة دي) 150 ÷ 530 .. هم هم هم .. 150 مليون جديد ولا قديم .. ياخي كل ما نتعود نحسب عمله يغيروها لينا ..

ود العركي : مسائل إهمال الأطباء دي مشاكل إدارية يمكن معالجتها من خلال كادر قوي مسؤول ويحاسب الماهية ما عندها أي علاقة في الإهمال والتغاضي عن الأمر
ودالريح : والله يا الحبيب كلامك حار وصاح وعدد الدكاترة بقى أكتر من العيانين .. وووب علينا الماقرينا .. زمنا كان الطب شطاره .. حسه بقى وجاهة .. وبالقروش .. تعرف أنا جبت النسبة البتدخلني طب لكن طلعوني من المعاينات .. عشان ريحة الفورملين .. (جنس كضب)

ود العركي: ود الريح بطل الكضب وعلى ما اذكر انو الزول ما يستغرب لمان يشوف منظر الناس نائمة في المستشفى لانو إدارات المستشفيات في بلادنا بدفع الناس قروش لزيارة مرضاهم .
ودالريح : والله يا ود العركي وما طالبني حليفة .. مره خالتي ماتت في المستشفى وكنت مفلس وجيت دموعي في عيوني وقلت ليهو خليني أخش خالتي ماتت .. قال لي البركة فيكم لكن كان ما دفعت ما بتخش .. زعلت زعل .. وحزن حزن .. واتحوقلت واتحسبنت ..

ود العركي : فكرك لو دخلوا أهل المريض وجابو ليه أكل مناسب حيموت؟ بحسبان الميزانية التي لا توفي
ود الريح : ولو ادارة المستشفى قدمت أكل لمرضاها أتوقع انو أهلنا الطيبين كلهم يرقدو مستشفى .

ودالعركي : الشيء الذي يحز في النفس انو قد بشرنا من قبل بان مستشفى مدني تم تأهيله وجاري استكمال مشروعاته
ود الريح : حنك بيش ..

ود العركي : رايك في الخصخصة شنو لضمان انسياب خدمات مناسبة
ود الريح : والقروش تزيد .. ورسوم الدخول تزيد .. ورسوم الرقاد تزيد .. نحنا ناقصين ؟

[مرتضى يوسف العركي]

ود العركي : انا نسيت انه بالفعل مخصص والناس وتدفع قروش ..
ود الريح : الحااااااااله ! عن اذنك يا حبيب .. ياولد ناولني حبوب الاكتئاب ..
ود العركي : لازم الزول يعرف القروش دي كلها ما بتقدر توكل الأمر لشركة نظافة .. مستشفى يليق بحاضرة ولاية تعرف يا ود الريح ..
ود الريح : اديتني فكرة جهنمية .. تعال نعمل لينا شركة نظافة .. وما تقول السودان اتملأ بنقالة .. قلت شنو .. 30 ألف ريال بس .. لو موافق كلمني عشان اتدينها ..ود العركي : اذا كان ده حال مستشفى مدني يكون كيف مستشفيات الولاية الأخرى ..
ود الريح : انت بتسمي الشفخانات دي مستشفيات ..وانت قايل تسمية " اهل العوض" جاتنا من شنو .. ما من تكسرنا في البندر للمستشفيات ..

ود العركي" بعد ما وصل الحد " : أين الإعلام والجرائد المالية البلد ..........وين التحقيقات الصحفية التي تملك الناس الحقائق من خلال الأجهزة القائمة لا كبير على النظام حتى ولو وزير الصحة أو مدير المستشفى دي فضيحة تستوجب الاستقالة ..
ود الريح " في سره ": ود العركي ده الليله حيدوينا في داهية .. ألو .. ألو .. يالحبيب ألو .. يا ود العركي ألو .. الشبكة ضعيفة ..

ود العركي مواصلاً : ليه ما معقولة لو الناس إثارتها قضية رأي عام وملكت الحقائق وظهر التقصير ..
ود الريح : ود العركي انت قايل نفسك وين ؟ .. هوي أصحى .. دي ما أروبا ..
ود العركي : الكلام ده ليس في أوربا أو غيرها الاوروبين ديل وصلوا المرحلة دي كيف؟ مش بالتجربة وإثارة القضية ليه نحن ما نجرب زيهم ونبدا بالضغط ...المنتدى ده ممكن أثير كثير من السلبيات وتملكيها للرأي العام .. ما شاء الله هناك أعضاء كثيرون متدفقي الحماس يمكن أن يقابلوا المسئولين ويعرفوا من الوزارة والموظفين وإدارة المستشفى .. الوطن ده عندو دين للجميع ..
ود الريح : في سره "ود العركي كده حيجيب لينا الهواء البارد " .. آآآي يا حبيب كلامك صاح ..

ود العركي : الحس الوطني ده بطلعنا من دائرة وزارة الصحة لوزارة التربية والتعليم وده موضوع طويل بكمل ليك بعدين .. يعني الحل شنو .. يحلها الحل بله .. ومنو الحل بله وبلة دة ذاتو أتحلى كيف .. انا والله بله ده منو ما عارفو ومشكلتوا شنو ما عارفو ..
ود الريح : ألو .. ألو .. ما سامعك قلت شنو؟ الصوت بقطع .. ما سمعت .. " الله يحلني منك انت الليله ياود العركي" ..
ود العركي : هنا مشكلتنا أخي نكتفي فقط بعدم المعرفة تتصور يا معتز كثير من المرات بقول كلام أخوانا العرب ده صحيح فينا نحن كسلانين بجد كسلانين لدرجة نقول يحلنا الحل بله مع جهل الكثيرون ببله ومشكلته في الأساس او ما هكذا نحن فتك بعافية الشكية لابيدن قوية ..
ود الريح : "آآآآي دقيقة جاي أصبري .." .. مرتضى اعذرني الولية دي منتظراني بالعده ..
يلا يا زول شكيتك على الله .. أقصد في أمان الله ..

[النور محمد يوسف]

ود العركي .... أبصم بالعشرة أن هذا هو الاسلوب الذي سينجح في تكوين الرأي العام ..... وبسيط جدا مكالمة هاتفية ...... وياما هنالك من مكالمات مهمة ومفيدة والناس لا تلقي لها بالا وفيها يكون الحل ...... يا جماعة اكتبوا أي شيء وبأي طريقة .... المهم نناقش قضايانا ..... وهذا اسلوب جميل وحلو وشيق وممتع وفيه كذلك من الطرافة ما يجعل الواحد يتمنى لو لم يعتذر أخينا ود الريح بالولية .... ودا ما بحلو ..... والحكاية خلاص اتسجلت .... بس الظاهر تاني ودالريح ما برفع ليك سماعة أبدا ......مش كان شكَّر الوزيرة .....لو ناسبها ما بيحلو ...... وبعدين الكلام دا صحيح؟؟؟؟ ميزانية وزارة الصحة الولائية فقط 150 مليون جنيه قديم ؟؟؟؟ .... وبعدين فكرة شركة النظافة دي والله دخلت نافوخي تب ..... كان تكلموني ...أنا أمس كنت في التشليح ..... ما ليكم حق .... والله لقيت ليكم جنس خردة ..... يمين بالله 30 ألف تخم الحراج كلو.... مع شوية بنقالة من هنا وهناك .... ما تقول كمان عاوزين السودان عشان يكبو الزوغة لاوربا...

فتك بعافية مرتضى ومزيدا من الابداعات... وتحياتي لبو ليان وألف مبروك .... فتشت البوست أهنيهو .... كلو كلو ما فتح معاي ... وكل سنة وأنت طيب ود الريح

[معتز الريح]

الحبيب النور محمد يوسف ..
تهانيك وصلت .. وعارفك أخو أخوان ..

فكرة الموضوع هي باختصار نقد هادف لأحوال لا تسر ..
ونتمنى أن يصل صوتنا لمن يهتم ..

لك المحبة ..

[صابرحسين]

كلام رايقيين ومسئوليين وهو ومواصلة لما لمسه الأخوة أبو زيد وعزيز عيسى ، وأي عكسه إذا ما كانت متقنه مثل هذا الحوار سوف تكون هجمه مرتدة ، نتمنى أن يكون هذا المنتدى يعكس أماكن الخلل في كل المرافق الهامة وأن يجد من يسمع هذه الصرخات المؤلمة ، وبنفس القدر أن يعكس كل ما هو جميل 0
ودمتم في خدمة إنسان هذه المدينة الأم الحنون

[zukibush]

ياريت لو الناس كلها تكون مهتمة ومسؤله زيكم
يديكم العافيه

[admin]

اهااا دا الكلام البجيب الهواء .. والا البودينا الهواء

[abomazeen]

عزيزي الهميم مرتضى العركي

لك التحية ... ووقفات تقدير بما يكتب هذا القلم الأدبي ليسطر لنا وللتاريخ عمق معاناة أبناء
شعبي مع المرض والإهمال الذي يلاقوه في كل بادية وناحية من مرض مستحكم حلقاته
فيهم إلى فقر محدق مشمر عن أنيابه لهدم كاهل قوى المواطن والشعب العزيــز
ولكن هيهات لهذا الزمان أن يمضى فينا ويعبث في قدرنا ما دام أمثالكم فينا

تلكم هي اطروحات السهل الممتنع ... ما اروعها تدعب الحياة فينا

[مرتضى يوسف العركي]

كلام رايقيين ومسئوليين وهو ومواصلة لما لمسه الأخوة أبو زيد وعزيز عيسى ، وأي عكسه إذا ما كانت متقنه مثل هذا الحوار سوف تكون هجمه مرتدة ، نتمنى أن يكون هذا المنتدى يعكس أماكن الخلل في كل المرافق الهامة وأن يجد من يسمع هذه الصرخات المؤلمة ، وبنفس القدر أن يعكس كل ما هو جميل 0
ودمتم في خدمة إنسان هذه المدينة الأم الحنون

اهلا بالصابر كما اهلنا الصابرين بنبل التسامح ....والترفع عن الهنات ....حامدين شاكرين فضل الله ونعمو والبلاءات لديهم احتساب لله عز وجل .... وقفة اخي علها تستنهض مكامن الخلل بادب الطرح فالامر شورى ليمكث ما ينفع الناس ............

[مرتضى يوسف العركي]

ياريت لو الناس كلها تكون مهتمة ومسؤله زيكم
يديكم العافيه

الحبيب zukibush
اشكر دعمكم فجميعنا مسؤول لابراز مواطن الخلل بنقد بناء يستهدف تصحيح الاداء وهي واجب المواطن كطرف اساس ومن واجب الدولة للتفاعل والتعامل مع الامر بكل صدق وشفافية ندعو الله ان يوفق الجميع لما يحب ويرضى

[مرتضى يوسف العركي]

اهااا دا الكلام البجيب الهواء .. والا البودينا الهواء

يار ريس
كان جاك الهواء ولا الهواء وداك وودانا نحن فثق اخي الكريم انه في الحالتين افضل من يوم نسأل فيه جميعنا فيما افنيتم منتداكم .....
واطمئنك انك ستكون في اول القائمة ....
زكرتني باحد ضباط دفعتي ابان عملنا سويا بمنطقة عمليات جنوب كردفان ... حيث انفجر لستك الكراكة التي تقطره وجنوده في انفجار ضخم فحسب الجميع ان لغم اصاب متحركهم فسقطوا جميعا على الارض ولم يتحرك احد تحسبا من ان يكون هناك كمين مزدوج مع اللغم وعندما تحسس دفعتي نفسه بحذر ولم يجد به اي اصابة التفت فوجد كل جنوده طريحي الارض بلا حراك فظن انه الوحيد الذي نجى من الامر فعندما نهض على رجليه اذ بكل جنوده ينهضون بعده فلما سالهم ومن قبيل ما قمتو مالكم قالوا يا جنابو دي ساي فانت اول من يجب ان يقوم
واعتقد انك هنا اول من تواجه الهواء فسر مطمئنا يا ر يس ههههههههه .

[moh_alnour]

الأخ العزيز : صاحب القلم الأنيق
مرتضى يوسف العركي ( الحلامابي )

كل يوم تُدهشنا بما لم نعرفه عنك
فالتحية لك وأنت تتلمس هموم الغبش وتسعى لتوصيلها إلى الرأي العام بهذا الأسلوب الذي أقل ما يقال عنه أنه مُمعن في الروعة والإبهار
وحقاً من لم تحدثه نفسه بهموم الناس فهو ليس منهم
هي دعوات وأمنيات بأن يحفظ الله عباده من الأمراض والأوبئة ومن تقصير الأنسان في أخيه الأنسان
كما أنها دعوات وتمنيات بأن تجد مشاركتكم هذه أُذن صاغية وواعية .

همسات :
* يا ود العركي حبيبنا ود الريح دا ساكن جمب القنصلية الامريكية ( يعني ما ناقص إرهاب وخوف ) فبالله خف عنو شوية .
* ذكرتني بنكتة الشايقي العايز يورط القاضي ، فبالله عليك ود الريح دا ماتورطو لينا في أعمال تخريبية ، الود متغرب عشان ناس ( ليان ) ديل وماشي بجمب الحيط .
* شكلك كدا عايز تجيبا لود الريح دا ضقلا يكركب ، أنت بعيد من الأدمن في الرياض لكن ( بلة ) أقصد ود الريح دا البحلو من الأدمن منو .
* أول شيء أها يا الأدمن قلنا ماشاء الله تبارك الله - والله يا ود العركي الأدمن دا لا بجيهو هوا ولا في هوا بشيلو ماشاء الله صحة وعافية ( تلقاها عند الغافل )
وتقبل مروري

[عماد السائح]

يا مرتضي تابع لي ود الريح وود الريح ضهرو قوي بيطلع بي تلفون. لكن نحن ما بنقصر العمود بنجيبو ليك .في الاوسط واللا في الضلمة الله يستر عليك .وقصة الحل بلة دي معروفة وبالمناسبة الناس كضابة بلة ليسة ما اتحل وبالة في( الحلة) بفتح الحاء يا شقي .ولك ان تختار هو بلة شدو او بلة بتاع الموردة ايام الكورة حليل زمان والا بلة شوقي .
والله يا مرتضي سألت أحد الاخوان في مدني عن الحالة اهلنا المرض التعليم السوق الفرحة ال ال ال مليون ال وببرود شديد قال لي والله لو تشيل طار زول بيهبب ليك مافي لانو كل البتقول فيه يا عماد ما من الاولويات .قلت ليه تطير عيشتنا الاولويات شنو وطبعا" قعد يضحك وفي الحلقة القادمة اوريك الاولويات وذلك عندما تكبر العصافير.
الغالي دعنا نكثر من هذا النوع من الاتصالات والاخوان ما قصرو واستاذي النور الله يديه الافية قولو ما عليه تعقيب .
عندما يحل القيم ويعرق النيل وتلفحنا النسمات تكون الطلة هنك حيث دفنت قلبي واتيت سنلتقي....

[nehroo]

الرقيق ودالعركي
كلامك الجميل بإسلوبك الراقي ذكرني لحن قديم ...
.. لى نية في قمر السماء...
نحن يا عزيزي حملنا اكفاننا يأساً لما وصل إليه مستوي الصحة في مدني
علاجاً أو وقاية أو إن كان إصحاحاً للبيئة

[عثمان جلالة]

أبو يوسف .... العوافي .. أبو ليان ... تحياتي ... وعفوا ان دخلت إليكم من باب الخروج ... هذا ما يسمى بالحوار الهادف .. الجريء ... ولا خير فينا إن لم نقلها ... والنتيجه ... المنشودة الصلاح والتطور ... والتحية للخدمات الهاتفية التي تهتم بالوطن وإنسانه .... لا نريد لهذه المكالمات ... أن تنتهي بإنتهاء الرصيد .. ولا أن يكون الهاتف مغلق

[مرتضى يوسف العركي]

عزيزي الهميم مرتضى العركي

لك التحية ... ووقفات تقدير بما يكتب هذا القلم الأدبي ليسطر لنا وللتاريخ عمق معاناة أبناء
شعبي مع المرض والإهمال الذي يلاقوه في كل بادية وناحية من مرض مستحكم حلقاته
فيهم إلى فقر محدق مشمر عن أنيابه لهدم كاهل قوى المواطن والشعب العزيــز
ولكن هيهات لهذا الزمان أن يمضى فينا ويعبث في قدرنا ما دام أمثالكم فينا

تلكم هي اطروحات السهل الممتنع ... ما اروعها تدعب الحياة فينا


الفاضل المميز ابومازن
وما اجمل ان نتعاطاها ...سويا بكم نبدو اجمل بما تحملون بصدق الدواخل وبهاء المحيا وصفاء النية وعطاء المؤمن .

[مرتضى يوسف العركي]

الأخ العزيز : صاحب القلم الأنيق
مرتضى يوسف العركي ( الحلامابي )

كل يوم تُدهشنا بما لم نعرفه عنك
فالتحية لك وأنت تتلمس هموم الغبش وتسعى لتوصيلها إلى الرأي العام بهذا الأسلوب الذي أقل ما يقال عنه أنه مُمعن في الروعة والإبهار
وحقاً من لم تحدثه نفسه بهموم الناس فهو ليس منهم
هي دعوات وأمنيات بأن يحفظ الله عباده من الأمراض والأوبئة ومن تقصير الأنسان في أخيه الأنسان
كما أنها دعوات وتمنيات بأن تجد مشاركتكم هذه أُذن صاغية وواعية .

همسات :
* يا ود العركي حبيبنا ود الريح دا ساكن جمب القنصلية الامريكية ( يعني ما ناقص إرهاب وخوف ) فبالله خف عنو شوية .
* ذكرتني بنكتة الشايقي العايز يورط القاضي ، فبالله عليك ود الريح دا ماتورطو لينا في أعمال تخريبية ، الود متغرب عشان ناس ( ليان ) ديل وماشي بجمب الحيط .
* شكلك كدا عايز تجيبا لود الريح دا ضقلا يكركب ، أنت بعيد من الأدمن في الرياض لكن ( بلة ) أقصد ود الريح دا البحلو من الأدمن منو .
* أول شيء أها يا الأدمن قلنا ماشاء الله تبارك الله - والله يا ود العركي الأدمن دا لا بجيهو هوا ولا في هوا بشيلو ماشاء الله صحة وعافية ( تلقاها عند الغافل )
وتقبل مروري

لست انيقا بما يكفي تطاولا بما تحمل من قلم شجاع واعي ممعن كالذي تحملون اخي محمد النور .......ساحمله دعما محفزا .

دعوة لكم بشجاعتكم المعهودة لبث ابداعاتكم من اجل الانسان بحروف الحق ...حينها اعتقد ان لاضير في يقطن ود الريح بداخل السفارة الامريكية ....حتما ستفخر ليان لو مار اح في ستين داهية ....اما الادمن فمن المؤسف حقا ان تخسر محلات الباسطة زبونا دبل جنط ....وسيكون مع العدس والفول والنجم والمساء .

[مرتضى يوسف العركي]

يا مرتضي تابع لي ود الريح وود الريح ضهرو قوي بيطلع بي تلفون. لكن نحن ما بنقصر العمود بنجيبو ليك .في الاوسط واللا في الضلمة الله يستر عليك .وقصة الحل بلة دي معروفة وبالمناسبة الناس كضابة بلة ليسة ما اتحل وبالة في( الحلة) بفتح الحاء يا شقي .ولك ان تختار هو بلة شدو او بلة بتاع الموردة ايام الكورة حليل زمان والا بلة شوقي .
والله يا مرتضي سألت أحد الاخوان في مدني عن الحالة اهلنا المرض التعليم السوق الفرحة ال ال ال مليون ال وببرود شديد قال لي والله لو تشيل طار زول بيهبب ليك مافي لانو كل البتقول فيه يا عماد ما من الاولويات .قلت ليه تطير عيشتنا الاولويات شنو وطبعا" قعد يضحك وفي الحلقة القادمة اوريك الاولويات وذلك عندما تكبر العصافير.
الغالي دعنا نكثر من هذا النوع من الاتصالات والاخوان ما قصرو واستاذي النور الله يديه الافية قولو ما عليه تعقيب .
عندما يحل القيم ويعرق النيل وتلفحنا النسمات تكون الطلة هنك حيث دفنت قلبي واتيت سنلتقي....[/QUOTE]
اخوي عماد حسين :
كان تكلمني من الاول ......وود الريح يشيل ويؤدي فيني ....كم احن للاوسط لدورية او طوف او نبطشي ولك حتى ولو الحراسة ....فقط اتامل شجيرات الجميز ووجوه الكالحين المنتظرين ...والشماسة .........لا اعتقد ان جرمهم اكبر من الحائمون نهارا بزهو وخيلاء ..ولو علي لاتخذت قرارا بعدم عمل البوليس ليلا ليدخر جهده صباحا لكثيرون معروفي الاسماء والعنواين ...
حلليلك بتسرق سفنجة وملاية
وواحد يسرق خروف السماية
تصدق انو واحد يسرق ........
مع الاعتذار لمحجوب شريف

[مرتضى يوسف العركي]

الرقيق ودالعركي
كلامك الجميل بإسلوبك الراقي ذكرني لحن قديم ...
.. لى نية في قمر السماء...
نحن يا عزيزي حملنا اكفاننا يأساً لما وصل إليه مستوي الصحة في مدني
علاجاً أو وقاية أو إن كان إصحاحاً للبيئة

جميل انت سيدي نهرو ..
هناك ثمة ما يمكن عمله فالنوايا كثر تجاه هذه المدينة وانسانها النبيل كم نحتاج لرؤيتكم دوما نحو التصحيح لكم الود

[مرتضى يوسف العركي]

أبو يوسف .... العوافي .. أبو ليان ... تحياتي ... وعفوا ان دخلت إليكم من باب الخروج ... هذا ما يسمى بالحوار الهادف .. الجريء ... ولا خير فينا إن لم نقلها ... والنتيجه ... المنشودة الصلاح والتطور ... والتحية للخدمات الهاتفية التي تهتم بالوطن وإنسانه .... لا نريد لهذه المكالمات ... أن تنتهي بإنتهاء الرصيد .. ولا أن يكون الهاتف مغلق

تحياتي الرائع جلالة
فيها شنو لو شاركتنا ...فالعهد بكم بناءون سباقون الدعوة لكم اخي جلالة فلديك من الرصيد ما يكفي لكثير معالجات ........تقبل تحيات ابو ليان وتحياتي

[tigani18]

ود الريح : "آآآآي دقيقة جاي أصبري .." .. مرتضى اعذرني الولية دي منتظراني بالعده ..
يلا يا زول شكيتك على الله .. أقصد في أمان الله [/color]

أخي الحبيب الحلامابي ,,,
لك أكوام من الوجد الشفيف,,,
تسرقني عنوة كتاباتك المدهشة
والتي إشتقنا لها كثيراً,,,
فضلا أخي مرتضى
يدمينا غيابك وحقٌ عليك
أن لاتوقف عنا هذا الدفق من البوح
في إنتظار رسالتك(2) بلهفة مستعرة,,

[أبو جودي]

أخونا ود العركي وأخونا ود الريح لكم كل التحية والود ،،،
معليش لو تسنطنا على المكالمة والونسة الدقاق دقاق ،،، بس طبعاً ما براي البتسنط ،،،
لو تسموحوا لي مداخلة ،،، أختنا وزيرة الصحة تابيتا بطرس ،،، نفتخر بها وبما تقوم به من جهود جبارة في أدائها كبنت بلد أصيلة ،،،، لها منا التحية ،،، على قدر ما تستطيع من مساحة الميزانية المتاحة لها ،،، وميزانية الولاية حقوا الناقص ،،، نحاول نتمه ولو بالقليل وحبه حبه تبني قبة ،،،، ما قبة " ودمدني السني"
أهه المكالمة الجاية متين عشان نحضر للتسنط ونرخي أضانا ،،،،
،،،لكم مني كل التحية والتجلة ،،،

[مرتضى يوسف العركي]

أخي الحبيب الحلامابي ,,,
لك أكوام من الوجد الشفيف,,,
تسرقني عنوة كتاباتك المدهشة
والتي إشتقنا لها كثيراً,,,
فضلا أخي مرتضى
يدمينا غيابك وحقٌ عليك
أن لاتوقف عنا هذا الدفق من البوح
في إنتظار رسالتك(2) بلهفة مستعرة,,

المرهف tigani 18
لن استطرد ... طالما يكفيني فخرا ... تظل سيدي الكريم احد الاقلام التي يقودها الحق بجمال المفردة المفرهدة وشجاعة السجال الذي يسطر قيم مضافة تاثرنا حتى النخاع في زمن غيب الكثير عنا شكرا يا سيدي وعذرا ان تأخرت تحياتي لاسرتكم الكريمة ولشخصكم العزيز جدا علينا 0

[مرتضى يوسف العركي]

أخونا ود العركي وأخونا ود الريح لكم كل التحية والود ،،،
معليش لو تسنطنا على المكالمة والونسة الدقاق دقاق ،،، بس طبعاً ما براي البتسنط ،،،
لو تسموحوا لي مداخلة ،،، أختنا وزيرة الصحة تابيتا بطرس ،،، نفتخر بها وبما تقوم به من جهود جبارة في أدائها كبنت بلد أصيلة ،،،، لها منا التحية ،،، على قدر ما تستطيع من مساحة الميزانية المتاحة لها ،،، وميزانية الولاية حقوا الناقص ،،، نحاول نتمه ولو بالقليل وحبه حبه تبني قبة ،،،، ما قبة " ودمدني السني"
أهه المكالمة الجاية متين عشان نحضر للتسنط ونرخي أضانا ،،،،
،،،لكم مني كل التحية والتجلة ،،،

من قال يا سيدي الكريم انكم تتصنتون وبيتكم بيتي واهلكم اهلي ودم هذه المدينة الام تؤكد جيناته الجوار والعشيرة وآخر لا يستوعبها المقام
اسف ان تاخرت عنكم اخي الرائع ابو جودي الذي توانسني عن كثب سيرته وتاريخ اسرته الممتد فينا امدا وقدرا جميلا لكم ولاسرتكم الكريمة كثير ود وامتنان