كلام ساى ((صفحة ملخبطة بدون راس وبدون قعر )) [الأرشيف]

العاقب مصباح

26-05-2009, 07:08 AM

قلت اكتب اى حاجة

المهم اكتب

الكتابة بدون هدف تفقدنا البوصلة

فتحت الكمبيوتر

قال لى ادخل الباسويرد

قلت اتغاتت عليهو شويه واعمل فيها ما عارفه

جاتنى رسالة بالانجليزى انو الباسويرد خطأ

قلت للكمبيوتر انت عوير ولا شنو انا عارف كدا

ما رد على

الصمت كانت اجابته

عاينت تحت شويه لقيت انو السماعة ما موصلة

اتراجعت

قلت الحمد لله الكمبيوتر ما سمعنى

دخلت كلمة مرور جديدة المرة دى

طبعا الكلمة الحقيقية

قلت ما عندى وقت اقضيهو مع المخرف دا

طبعا الكمبيوتر مخرف

لأنو بتمسح حاجات كتيرة منو وهو عامل فيها فالح بيوديها سلة المهملات

الغريبة سلة المهملات دى مما جبت الكمبيوتر ما حصل يوم جات عربية نفايات عشان تشيلها

شميت فيها ريحة غريبة خلاص

يا ربى دى ريحة شنو؟؟؟

عرفت الحاصل

اتزكرت انو زمااااااااااااان كتبت لى شخص

حاجة كدا

لقيت انو ما بيستاهل

قمت مسحتها

بصراحة كتلتو فى الكمبيوتر

دا اعتراف منى

حتى لو امشى المحكمة

وسجن ما بنسجن وغرامة ما بدفع زى ما قال شيخ البطانة (ما متأكد)

الغريبة ما كلفنى كتير

بس فتحت صفحة ويرد جديدة و عملت ليهو نعى

بعد ما النعى ما عجبنى قمت عملت ديليت

الظاهر كدا انو الميت بتظهر ليهو ريحة اذا ما اندفن

كلو منك يا سلة المهملات

اسمع يا العايز تقرأ :-

ارحب بيك فى صفحتى دى رغم انى ما مقتنع بالبعملو فيها

المهم اكتب وخلاص

ودى حتكون صفحة اقول فيها اى شئ ما عاجبنى

مع خالص اعتزارى لى ولك وللجميع

العاقب مصباح

26-05-2009, 07:09 AM

ما عارف تانى اقول شنو

يا ربى الصفحة اتملت ولا شنو

نتمشى بى شارع قريب من هنا

شارع فيهو ريحتك

ومقاس جزمتك

(لا مؤاخذة يعنى)

ولا يهمك عادى ياخ

وشعرة واحدة منك

ياخى انت جنيت ولا شنو عايز تصل لى شنو انت

ما عارف لكن ما عندى نية اصل

؟؟؟؟؟؟؟؟؟؟؟؟؟؟؟؟؟؟؟؟

اغرب زول اقابلو فى حياتى ..

تبقى حياتك ماشه لى خطر

لما الاقى اغرب حاجة مرت على فى اليوم بحس انى حاجة ما ليها قيمة لانو الحاجات الغريبة ما مفروض تقابلنا اول مرة

يعنى مفروض تكون دى المرة التانية

عليك الله ما تتفلسف علينا ساى

دى ما فلسفة يا اخونا

طيب دى شنو ؟؟

اناما اتحدثت عن الاطر التى تحكم الزوايا فى الاساس العام لتعامل الناس مع بعضهم فى عالم سيميائى سرمدى

يا زول دا شنو البتقول فيهو دا

انت الظاهر عليك خرفت ؟؟ما تستاهل والله

ما خرفت والله لكن لما تشوف الهلال قبل يوم من رمضان وتصوم وبكره ما تشوفو يكون ضيعت عليك اكل وشراب ساى

الجوع هلكك يا اخوى

العاقب مصباح

26-05-2009, 07:09 AM

حسيت بى تعليقاتكم فى سرى

وقلت ارد ليكم برضو فى سرى

اصلو انا سرى فى بئر

والبئر بتاع الهيئة القومية لتوفير المياه

اللى لحدى هسع ما اتوفرت

دا شنو هسع ؟؟؟؟؟؟؟؟؟

العاقب مصباح

26-05-2009, 07:10 AM

مرة كدا

كنت حاسى بيك

وما شفتك لحدى الان

اتزكرت انو انت فى الدنيا

عايشة

حية وترزقى

بتعاينى ليك فى شئ

لكن ما عرفتو ولا عرفتك

بس حسيت بيك

منمقة

عايشة فى عالم قريب منى

اتلفت يمين وشمال

قلت يمكن القاك فى نفسى

لقيت انو نفسى زاااااتا مافى

من الرجفة لقيت قلبى انزلق

وصل حلقى

وانتى زاااتك وصلتى حلقى

شكلكم متحالفين

وحالفين تجهجهونى

كنت ناوى اسلمك قلبى

طلعتو فى يدى

عاينت ليهو

لقيتك لسة قاعدة وبتفكرى فى شنو ما عارف

المهم ما فينى

مديت يدى ليك

اتراجعت

اتزكرت ((هند بنت عتبة))

خافت تأكلى قلبى

وتاكلينى

وتاكلى روحك

انا ما مشكلة

لكن خلى بالك من روحك

انتى ماااااااااااا جوه لكن

اااااااااى اعملى فيها ما مهتمة

غايتو جنس هضربة

يا زول قول بسم الله

الجن بيتداوى

كعبة الاندراوة

العاقب مصباح

26-05-2009, 07:11 AM

ناس قراااااااااااااب منك عرفو سر حزنى

المهم

مرات اقول اديهو كلمة تزعلو

علشان اشوف خدو الحرير والدمعة جارية تبللو

مرت الايام

كالخيال احلام

وانطوت امال كم رواها غرام

مرت ومر نعيم

كان ظنى فيهو يدوم

لكنو مر سريع

خلف وراهو هموم

الامو ما بتزول

ما بين الم وزهول

و

مرت لحظات وكمان ساعات طالت وحياتك منتظرين

لو وشوش صوت الريح فى الباب يسبقنا الشوق قبل العينين

ونعاين فى الشارع نلقاهو هايم فى دموع المغلوبين

حبة حبة

ومرة زيد الريدة حبة

ولو مرة فى عينيك اقسى ومرة انسى ومرة يغلبنى النعاس

والشروق مرت من هنا

العاقب مصباح

26-05-2009, 07:12 AM

المهم مرات اقول اقول ليك انى قائل الشوق يجيبك مرة

وزى ما انت مشيت وقدامك كم كلب لكنو ما سعران

زكرتنى الكلاب بالمناسبة

فى كلاب كدا بنت كلب خلاص

اعمل حسابك منها شديد مع انها ما بتعضى بس بتحدر ليك ساى بعيونها الجميلة دى

بالمناسبة حصل عاينت لى عيون كلب عشان تعرف مقدار الجمال الفيهن

ما تكون بتعاين للمها وعيون المها

وجننى ياخى العيون يا حلاتن هن اساس الريد والفتون

كدى حاول احلم تانى واظبط المنبه عشان تصحى كل خمسة دقائق

العاقب مصباح

26-05-2009, 07:13 AM

ارتباط عملتنا بالدولار ولا شنو ما عارف

بالمناسبة نحن عملتنا مرتبطة ولا بتقرأ ولا دى حركات منى ساى

وليه ترتبط ما دام المستقبل مجهجه

يعنى زى العرس الجماعى

تسمع اغنية جهادية وتسير لكن بعد شويه البيحصل شنو الله اعلم

جيت مارق من البيت قلت اضيع زمنى

ما لقيت اى شئ يستاهل يضيعو فيهو حرف الزين ((قصدى عرس الزين))

اخترت النون

حرف النون دا عمل فينى عمايل ولسة حيعمل

شكلو قاصدنى كيف ما عارف

اتناولت حرف الميم حسيت بيهو لا بودى لا بجيب

حرف ساكت يعنى حرف ساى

الموضوع شنو هو

ممكن اهدى اغنية ((نونية ابن زيدون))

العاقب مصباح

26-05-2009, 07:14 AM

انا عايز اعرف السبب البيخلى الناس لمن تجن تمشى الصينية شنو؟؟

ليه ما يمشو الكبارى مثلا

الاختيار نبع من وين

طبعا دى لازم تكون خطة مدروسة من اصحاب الشأن الاقتصادى التى توصلت الى ان كل من به مس من الجنون ان يتجه الى احدى صوانى الحركة ولم تدلهم على طريق غير هذا

طيب عايز اعمل لى صينية فى المنتدى دا

اختار اى قسم عشان اعملها

المهم تدخل و وفى النهاية تحس انك بتدور فى حلقة

ما شرط تكون حلقة سداسية زى البنزين فى المقرر بتاع العلميين فى المدرسة

المهم انك تكون حققت امنيتك عبر الطواف والدوران حول شئ اصلا مافى

العاقب مصباح

26-05-2009, 07:15 AM

المهم بديت اخطط لمشاريع كتييييييييييييرة

المشروع الاول قرب ينتهى

حسيت بيهو مشروع ساى

زيو وزى مشروعى التانى

لأنو اللى قبل منو ما جاب حقو

دا الرابع عشان ما تقول الخامس ولا السادس

كدى ما نمش بعيد

قلت عايز ابقى مشرف

قلت اختار اجمل قسم ما فيهو اى كلام

قسم ونيتو بيضاء تمام

عارف اخترت شنو؟؟؟

((المتواجدون الان)))

ما عارف ليه بيعجبنى

ومرات قبل ما ادخل فى اى قسم بدخل على المتواجدون الان

مرات بلقى حاجات كدا

حسيت بأنو قسم حرام

لأنو بنتجسس فيهو على زملاءنا فى المنتدى

وخصوصا لما يقول ليك هذا العضو فى قسم الرسائل الخاصة

وتعاين تحت تلقى الرفيق التانى برضو فى قسم الرسائل الخاصة

بس انا ما بكلم زول

بسكت ساى

العاقب مصباح

26-05-2009, 07:16 AM

وردية اليل بتبدأ الساعة كم ظهرا

ما تكون زى دفن الليل اب كراعا بره

انا مفكر اعمل لى قفص

الساعة كم ولسة حابسين ساعة النصر

بالمناسبة ساعة الصفر وساعة النصر وساعة المساء وساعة واقفة

اكتر شئ بيحيرنى وبيخلى عقلى يفكر القى لى ساعة مختوتة فى الواجهة ووهى واقفة

حصل جربت الشعور دا

حاول البس ليك ساعة واقفة

وعاين شوف الساعة كم

بعد دقيقتين تانى عاين ليها

فى احساس غريب مش كدا

انو فى جزء منك واقف

قد تكون منتظر بص او تاكسى او واحدة ليه ما عارف

الواقف يجاوب

ليه ما دفعتو الرسوم

انا نفسى افهم كلامى دا

لكن الظاهر انو مستحيل

العاقب مصباح

26-05-2009, 07:17 AM

المهم احساس انك منتظر كائن حى وكل امنيتك يجى وما يجى

يعنى عايزو وما عايزو

زى ما بسلاك ولا بحمل بلاك

القط والفار هل الفار هنا بمعنى الهارب ام بمعنى اخر ومن هو الفار

قد يكون كلمة احتجت ليها فى ساعة مقططة

مقططة يعنى مافى ولا ابو النوم من الحروف الما ابجدية

متين نقدر نقترع لينا حروف ما ابجدية

لكن المشكلة نسميها شنو؟؟؟

دا السبب اتخيل لى

العاقب مصباح

26-05-2009, 07:18 AM

سمك وحليب وتمر هندى

ما عارف سر التتابع فى الكلمات بيجى من وين

لما تقول دولار ريال شيك سياحى فى برضو تتابع

ولما تقول فول بيض بالطوة شيه لحمة محمرة بيض مسلوق وكفتة وكباب وفول بالجبنة وفول سادة برضو فى تطابق

ولما تقول اسمك ثلاثى فى اى مكان غصب عنك ودا كلو عشان تكتب اسمك فى سجل ((يمكن ان يتوفى))

فى احدى البصات المسافرة الى مدنى..

حاجة سخيفة انك تكتب اسمك فى قائمة كل الغرض منها انهم يتعرفو عليك فى حالة الاحتراق الكامل لجسدك فى لفة فى شارع الخرطوم مدنى

العاقب مصباح

26-05-2009, 07:20 AM

فى حاجات كتيرة بتخلى الزول يتخلع وما يعرف مواصلات جبرة من مارنجان

لانهم بيتشابهوا فى حرف الجيم

انت ليه سموهو الجيم وما سموهو الجام

السر فى دى شنو

غايتو الناس دى بتالف ساى من راسها

التقول راس الرجاء الصالح

كدى راس الرجاء دا الصلحو منو؟؟؟؟

وهو كان اصلا خربان ولا شنو ؟؟؟؟

العاقب مصباح

26-05-2009, 07:21 AM

ما عارف لكن الجماعة شابكننا طبقة الاوزون طبقة الاوزون وثقب الاوزون

دا من ضمن البيئة صح

انا حالف حلفة القى طريقة لمن احصل الاوزون دا كان اثقبوا واجى

حسادة بس لى ناس امريكا والصين ودول عدم الانحياز وسيكافا

ودول الكومونويلث ((كمونية وبس))

العاقب مصباح

26-05-2009, 07:22 AM

اجمل وجبة رومانسية ممكن تاكلها على ضوء الشموع والموسيقى هاااااادية ممكن تكون شنو مثلا

انا عارف الويكة لايوقة لكن بحبها

ولمن سألتنى عن وجبتى المفضلة

احتلت الويكة المرتبة الاولى وونالت الميدالية الذهبية فى مونديال حبنا

غصبا عنها

والبطاطس رقم 2

ليه نحن سميناها البطاطس ليه ما حاولنا نبدع ونسميها اسم يكون مختلف وجزااااااااااااب

او على الاقل اختراع وجبات دون ان تحمل الاسم قبل الطبخ وبعده

بيتخيل لى نحن ما بتهمنا الاسماء ودلالاتها ما عارف ليه

يعنى هى فى المزرعة اسمها بطاطس

وهى حصدوها اسمها البطاطس

وعند فرض الضرائب برضو اسمها بطاطس

ولما نجيبها البيت اسمها بطاطس

الغريبة بعد الغداء وشراب الشاى برضو بنسميها بطاطس

شئ غريب خلاص

الاسود ((البازنجان))

برضو نفس الحكاية

لما ندلعو خاالص ونعمل بيهو شئ مختلف بنسميهو سلطة اسود

المهم

استغربت منى شديد

متوقعة اقول ليها بيتزاهت وما شابه

لكن اخوكم طلع شفت

حاولت تثقفنى

كلمتنى عن قدرتها على صنع البيتزا والمكرونة بالبشاميل والتورتات بانواعها

لقيت رسائل فى تلفونها

رسائل فاضحة لثقافتى

تتحدث عن كيفية اعداد طبق شنو كدا بيتكون من التفاح واغلب فواكه الجنة التى سمعنا بها

لكن كلامها لى زى ساقية جحا

تشيل من البحر وتدى البحر

قد سالت البحر يوما

هل انا يا بحر منك

اصحيح ما رواه بعضهم عنى وعنك

ام ترى ما زعموا زورا وبهتانا وافك

ضحكت امواج البحر منى وقالت

لست ادرى

ايليا ابو ماضى على ما ظن

العاقب مصباح

26-05-2009, 07:23 AM

بمناسبة الانوار يا عثمان جلالة فى معتقدى الشخصى والغير قابل للتعديل انو ((الان وار ))معناها الحرب الان دا حسب الترجمة الانجلوعربية ..يعنى اتخيل نفسك كل ما تجى تولع ((الان وار ))معناها بتعلن الحرب والحرب الان...

قلت لى حتجى البت الحديقة....ما تكون حديقة الحيوانات بس ...المهم حاول وصف لينا الحيقة دى عشان نمشى نلبد فيها وننتظر مع مصطفى سيد احمد الله يرحمه ...لكن لو كانت شاراهو لحدى هسع تبقى مصيبة ...

جيت قلت امرق على الشارع طلعت من الباب لقيت الشارع منتظرنى فى الباب تقول عارفنى طالع ...ولقيتو زعلان كمان قال عايز يغير اسمو ..قلت ليهو ليه؟؟ قال لى اى واحد يكون تصرفاته ما حلوه بيقولو عليهو شوارعى فى حين انو ما بعرفو اصلا ....لقيت كلامو منطقى ...اقتنعت ...بعد كدا طلب منى اغيره لبيت ناصية فى البداية طلب يكون فيلا وقصر كلمته عن الحال فى الجزيرة وقلت ليهو ابقى شارع احسن ليك وكمان فى بيوت كتيرة ما لاقية شارع تبيت فيهو وكونك تكون مرتاح وضالق ضهرك احسن ليك من الكتمة وسقف يمكن يقع فى اول مطرة شعفوفة ونقعد نهدم ونبنى وانت ما قادر تقول حاجة.... وفى بيوت احسن منها الشارع ....

ما اقتنع بى كلامى يا جلالة وقال خلاص عايز تخطيط وتنسيق واعطاءه حقه ومستحقه قلت ليهو النشوف راى الجماعة شنو ...

انا طبعا عارف رايهم شنو لكن عامل رايح.:

العاقب مصباح

26-05-2009, 07:29 AM

ميدو يس

يا من خرجت سامقا كالنخيل

جميلا كالوطن

منتظرا مرور كل العواصف دون التزحزح خطوة للوراء

الوطن فينا مقسمنا على بلدان عربية واعجمية حتى تتلاعب بنا غير انى اراك اتبعت المثل الذى يقول

اعجمى فالعب به استطعت اللعب اشواط عديدة وبنفس العزيمة والاصرار..

اختزال الدهشة يبدأ من فصول محو الكلام الغير حقيقى وكل زيف يخرج بدون ما تتلفت ليهو

وعشان ما تتلخبط عيون الزول البيشوف لونين يبقى لازم يتعلم كيفية المشى بدون ما يكون حافى الحروف ويتسلق جبالك يا وطن دون النظر للخلف فى ساعة حول وعدم شوف حقيقى لكل ابداعك

دا ما بيختشى يا وطن..

مهاجر عن كل محطاتك الجميلة ...تحمل قلم غير مبرى اطلاقا فى انتظار واحد ما يفهمك يا ميدو بس يبراك ويخلى القلم زى ما هو...

والوطن محطات قابلة لعدم الوقوف مع انو مكتوب فى ظهر الحياة ((وقوف متكرر)) ولا دى حركات بصات ساى...
شنو فائدة المرايا لما تكون تعاين وتقلى زول غيرك بيظهر مكانك فى الصورة وكل ما تعاين لى نفسك تلقى

روحك مافى ..بس علامة استفهام واحتلال غير اجنبى ...

ما حصل نظرنا لى المرايا وتاريخ صلاحيتها ((شئ غريب مش كدا)) ليه المرايا ما عندها تاريخ صلاحية..

مافى اهتمام ةخالص مع انها بتورينا نحن شنو من غير ما نقعد ونسمع كلام واحد بينبذ فينا...

تنتهى صلاحية المرايا عند شراء اول مرايا جديدة او امتلاكها بطريقة ما يمكن تكون ساى...زى كلامى

ووطنى ولا ملى بطنى..

سكاتى ولا الكلام النى...

..................................

مع انو غايب عننا الا انو حاضر فى كل حرف ...فى كل كلمة ....فى كل همس...

ونردد معاك يا ميدو....

مدنى نعلى شانا

مدنى نموت عشانا

عبدالمنعم الصديق(خدرا)

26-05-2009, 09:28 AM

صلاح ودالطاهر

26-05-2009, 09:34 PM

شئ من الماضى

قلنا نعيده هنا

يمكن يشفي ما بنا

سودانية وافتخر

27-05-2009, 04:59 AM

الله يرحم ايام زمان

بت أم درمان

27-05-2009, 05:18 AM

محمد النويري-الفقراء

02-06-2009, 04:13 AM

رضا حسن محمد

02-06-2009, 04:23 AM

ياخ ادينا فرصة نعقب يا العاقب
يا خ انت لذيذ لذة

عبدالرحمن مدثر

02-06-2009, 10:53 AM

اندفقت

والله جابو ليك

ميادة

02-06-2009, 11:13 AM

انت اجمل شخص

واروع شخص

والله يالعاقب لكن لقيتك خطير عديل

دي مش صفحة ملخبطه دي اللخبطة زااااااتا

ياخ انت عثــــــــــــــــــــــــــــــل وبث

وكدي نسالك هو العثل ليه سمو عثل عشان شنو بلاي :rolleyes:

العاقب مصباح

02-06-2009, 11:43 AM

لابتوب.... كباية شاى ......استشوار
يتخيل ليكم مافى اى علاقة بيناتهم
لكن اخوكم اكتشف علاقة حديثة جدا
وعدوانية جدا جدا

لابتوب
ليس عالى القيمة كما قد يخيل الى البعض منكم
الشئ الجيد الوحيد فيه انه يشجعنى على التواصل معكم
ويحافظ على اخوتى بكم
ابدأ قصتى معاهو

اها يا جماعة الخير
زى ما بقول ليكم كدا
اللابتوب بتاعى خرمان شاى
وخرمة مبااااااااااااالغة كمان

كدى فى الاول عندى كباية شاى اجغم منها واواصل معاكم

اها نواصل ليكم

فى يوم كدا بعد ما اتغديت فى امان الله
وكالعادة معاى كباية شاى احمر من الحمرة التقول مساهرة فى المنتدى,,....
ما عايز اقول بتشبه المريخ السبعة بتاعة الوحدات لسه مضوقاهم المرة

تانى بجغم لى جغمة مش على كيف ؟؟؟؟
ولو قلت ليكم اتفضلوا حتكون عزومة مراكبية ومافى داعى

اها نرجع للموضوع يا جماعة الخير
كنت فاتح الماسنجر والامور ماشيه تمام التمام
اضحك واقهقه مع الجانب الاخر والامور مظبطة تب ...
فجأة كدا كباية الشاى تتدفق فى نص اللابتوب .......
اها خفت تغرق الزول المعاى ولا يقوم يعمل ماس ويتفرطق فى وشى ....ويكون ما عندى وش اتكلم بيهو ....

المهم عشان ما اطول عليكم
فجاة اخوكم وقف من الكتابة
الجانب الاخر استغرب وقال لى مالك وقفت
طبعا فى اللحظة ديك اللابتوب انا رافه فوووووق وهو فى اتجاه الارض
زى ما بيقولو راسو لى تحت وكرعيهو لى فوق
كتبت ليهو بعد معاناة انو كمبيوترى شرقان بى كباية شاى
وهو ولا يهمو يضحك ويرسل فى حروف الهاء
وكمان متابع فى موضوعه الاصلى
وتانى قلت ليهو يا سيدى كمبيوترى نائم على بطنه وبرضو لا حياة لمن تنادى
يا جماعة دا يسوو ليهو شنو
قلت ليهو اعمل حسابك يمكن تجيك حروف مبللة وشغااااااااااال يضحك...
وبرضو مواصل فى الضحك
اخيرا بعد تعب بقى معاى فى موضوع ويرسل لى الحكات البتغيظ
يعنى بيرسل لى فى واحد مادى لسانو لى بره ويغيظ اكتر...
اخيرا بعد ما اقتنع قال لى جيب ليك استشوار ونشف اللابتوب بتاعك..
وطبعا ما صدقت ناديت على البنية وقلت ليها جيبى استشوار
وهى سريييييييييييييييييع وما قصرت جابتو ووصلت فيهو الكهرباء كمان..
اها اخوكم شغل الاستشوار
وسرحت شويه كدا
اريتنى لو ما سرحت
بعد دقيقة القى الحروف كلها ساحت
يا ساتر؟؟؟؟؟؟؟
دا كلام شنو دا
اى والله زى ما بقول ليكم
لقيت كمية من الحروف بقت صغييييييييييييييرة واساحت
ويمكن فى كلام كمان ساح معاها
وبقيت ارد عليهو ومن غير حروف
والغريبة صاحبى لسه بيضحك
اعمل ليهو شنو يا جماعة صاحبى دا.؟؟؟؟؟؟؟
وبقيت اكتب على الذاكرة القديمة للحروف..
كتابة بى حروف سائحة.....
حصل جربتو الشعور دا؟؟؟
شعور انك تكتب بى حروف مافى
حروف مختفية
يعنى النتيجة كانت انو فى اشياء وصلت بمعناها الحقيقى....
بتأيدنى فى كلامى ولا بتقرأ وتقول الزول دا جن ولحق طه نفسه...
مع خالص محبتى ليكم

اكيد حتكونو عرفتو سر العلاقة بين كباية شاى واستشوار ولابتوب

ميادة

02-06-2009, 11:50 AM

لابتوب.... كباية شاى ......استشوار
يتخيل ليكم مافى اى علاقة بيناتهم
لكن اخوكم اكتشف علاقة حديثة جدا
وعدوانية جدا جدا

اكيد حتكونو عرفتو سر العلاقة بين كباية شاى واستشوار ولابتوب

ايوة فهمنا

لكن والله علاقة غريبة جدا :rolleyes:

ههههههههههههههههههههههههه

هههههههههههههههههههههههههههههههههههههههههههههههههه ه

هههههههههههههههههههههههههههههههههههههههه

ما عندي شي اقولو غير الضحك بث

العاقب مصباح

02-06-2009, 12:02 PM

ما عارف ليه حرف الشين دا واقف لينا بالمرصاد

دائما بتلقاهو فى اماكن عجيبة جدا

كان داير تعرس مثلا :-

اول شئ اهل العروس يقولو ليك جيب الشبكة

وتانى شئ يقولوا ليك جيب الشنطة

وتالت شئ يقولوا ليك جيب الشيلة

ياخى دا حرف عجيب خلاص

والبت العايزها تقول ليك برضو :-

اول شئ عايزاك رشيق زى مهند

وتانى شئ عايزاك مقرش

وتالت شئ تقول ليك عايزاك شهم تقع فى النار

ورابع شئ عايزة منك شيك على بياض

وخامس شئ عايزة شقة مفروشة

يعنى لو نطيت تنط ليك فى حلقك....

حياتنا البنمر بيها

اول شئ من انت صغير يقولوا عليك شافع

وبعد تكبر شويه يقول عليك شاب

وبعد تكبر زيادة كمان يقول عليك يا شائب

ويا شييييييييييييييييخ

حرف الشين دى ملازمنا كتير جدا

ولو عزمت ليك واحد يقول ليك داير شيه

ولو شفت ليك عراك بين شخصين لازم يودوك المحكمة كشاهد...

ولو طالع من السودان يقولو ليك عايزين شهادة خلو طرف من ناس مدنية

ولو المدام مرسلاك فى اى وقت تقول ليك جيب معاك شاى حب

ولو اتصل عليك صاحبك يقول ليك وينك ليك زمن ما شايفك

وفى ناس بتشيل الحال

والشال منام عينى وفؤادى جارحه...يا الله يصافينى وبى هواى اصارحه

وتانى

شيلة

شبكة

شنطة

شيك بدون رصيد

والسلام عليكم

العاقب مصباح

02-06-2009, 08:50 PM

يااحلى عاقب
ازيك
انا ماعارف الناس ماعقبوا على كلامك الحلو دا ليه؟؟؟؟؟
امكن تكون منعتهم؟؟؟
ولا خوفتهم بحكايه الصينيه بتاعت المنتدى دى ؟؟؟
واتخيلوك فعلا لافى فيها وامكن تكون بتلقط ورق (حسب خيالهم طبعا)
حكاية انو الواحد يدخل المتواجدين الان دى ما ساى وأسأل المجربين
لانو الواحد بكون رايحه منو حاجه وعايز يشوفا جات ولا لسه نايمه
على العموم موضوعك الكاتبو بعصير المنقه دا أنا عجبنى شديد
بس ياريت تزود السكر حبه وانقص التلج واديها حبة حليب
فتك بعافيه
وصدقينى اقصد صدقنى يالعاقب انا اول واحد لفه معاك فى الصينيه وحاافضل لافى
وختو لينا صينيتنا جنب صينية السوق المركزى عشان يكون فى قاسم مشترك بين شارعنا وشارعكم

الراقى عبد المنعم
سواق الهانم قصدى الهايس
سلامات والله والشوق بحر
مرات يجيك احساس تكتب ساى بدون فكرة...
تخت ايديك الاتنين فى الكيبورد التقول داير تعزف
بتقوم ايدك تاكلك
تكتب ليك كم كلمة كدا تكون غلط
تحاول ترتبها زى لعبة بازل
بس اهنا ما زول ترتيب
زى ما تجى تجى
برصها وبقعد اعاين ليها
مرات بستغرب
بقرب اعمل اقتباس لى كلامى
وارد عليهو
بلقى كلامى زى درويش
والدرويش لما يلاقى مداح بتعرف البيحصل شنو
الفى راسك بتكمل كلها
وما تلقى منه حاجه تحكها
مرات بتظهر مكان الحكه شيبه راس
ياخى لما راسك يشيب وانت ما عرست لسه بتقد تفتش فى الصبغة والحنة عشان تنستر
ومااااااااا اظنك تنستر
والسترة والفضيحة متباريات
زى تبارى كرة القدم
بين فريقين
وبيقولوا الببارى الجداد بيوديهو الكوش
وكوش مملكة سودانية قديمة مسيحية
ما عارف يوديهو كيف
مع انه فى رغبة للمشى كدارى لى كوش وعلوه
بس نعمل شنو
كدى انا هسع طالع
تانى بجيك للنضمى

العاقب مصباح

03-06-2009, 05:25 AM

انا ماعارف الناس ماعقبوا على كلامك الحلو دا ليه؟؟؟؟؟
امكن تكون منعتهم؟؟؟
ولا خوفتهم بحكايه الصينيه بتاعت المنتدى دى ؟؟؟
واتخيلوك فعلا لافى فيها وامكن تكون بتلقط ورق (حسب خيالهم طبعا)

الرائع عبد المنعم
شباب النفاج ما قصروا فى الردود
ويمكن اكتر من عشرة صفحات
وسأوردها هنا ان شاء الله
فهى من ضحايا الغزو الاخير
لك محبتى دوما

العاقب مصباح

03-06-2009, 05:27 AM

يمكن يشفي ما بنا

يمكن ألقى الزيي فيكم
ضاق جراح الحب ومتعذب سنين
ويمكن ألقى وصفة تنفع
ولا يمكن القى حاجة تخفف الجرح القديم
حاجة تشفع ..

العاقب مصباح

03-06-2009, 05:31 AM

الله يرحم ايام زمان

والله أيام يا زمان ببكى واتحسر عليك

ومابقول العشنا كان

لسه راجيك يازمان بحبه الفكر المعاى

عايشة فى وجدانى جوه ولسه بتدغدغ حشاى

يمكن الحبيته مرة .. يلقى فى كلمات غناى

خاطرة بتمحى المشاعر .. ويمكن الطول سهادى

تغشى ليلاته البشائر .. ويمكن الفرح الزمان ..

لسه أصداه بترن .. غنوة حاضناها الضفاير

جايز الأيام.. الأيام تحن

تصحى فيم نبل المشاعر .. ويمكن المجروح .. المجروح يئن

وتشفى ليلاته البشائر

ويمكن الفرح الزمان لسه أصداه بترن غنوة حاضنلها الضفاير

والله أيام زمان ببكى واتحسر عليك

العاقب مصباح

03-06-2009, 05:44 AM

العاقب اوعى كباية الشاي دي تنكش في اللاب توب حقك
بعدين تقوم تقلبو عل وشو وصاحبك الفي الماسنجر اقعد اضحك عليك بالقلبة
تقوم تفتش ليك استشوار عشان تنشف اللاب توب
تلقى السششوار تقوم تشغله يقوم يسيح ليك حروف الكيبوورد
اهااا تعال تم الباقي انت

الباقى تميناهو فى الصفحة التانية يا بت امدر
يمكن رديت ليك قبل الناس
لأنو موضوع اللابتوب والاستشوار مستفز
زى مكنة الشاورمة

العاقب مصباح

03-06-2009, 05:49 AM

العاقب اخوي والله قدر ما احاول اكتب ليك هنا ما لاقي لي فرصة انت ما اديتنا فرصة لحدي هسه انا راسي لافي ماعارف اقول شنو ؟؟؟ انت راكب ليك عجلة مستعجل كدا؟؟ هو انا راسي لافي ما عارف قاعد اقول في شنو يالعاقب.. لما تفضى اشرحي لي انا كنت بقول في شنو؟؟ تسلم يا رائع

انا ما قلت شئ
ساكت
وواجعنى فى البحر السكات
وسكتنى فى الوجع البحر زى ما قال عاطف خيرى
دحين يا اخوى تعال بى جنبة وورينى شنو الما فاهمة
وشنو اللف راسك
عشان نغير اللفة الجاية
وما تنزل بعد اللفة الجاية
خليك مواصل فى الرحلة
عشان تصل عنوان حبيبتك
وهى خلتك بدون اى عنوان ليك
هايم فى بلاد الله
تترجى فى المطرة
يا مطيرة صبى لينا فى ايدينا
اغانى المطر ما كتيرة
ما عارف ليه
مع انه جو مستفز للكتابة
ومطر الحزن عاود هطل
جدد عذاب الارصفة
مطر الحزن عاود هطل
جدد عذاب الأرصفة
ضـئ المصابيح البعيده
اتعب عيونك وانطفأ
لمتين مواعيدك سراب
والريد شقى حرقة وجفا
بعد المشاوير البقت
ممدودة في نبض التعب
تعود وتلقى رجاك زول
حفظ الوداد زمنا صعب
والباقي من ليل الهوى
عطر الصبابة الما انسكب
والباقي من كل الغناء
سيل الكتابة الما نضب
واقف براك

العاقب مصباح

03-06-2009, 05:55 AM

ياخ ادينا فرصة نعقب يا العاقب
يا خ انت لذيذ لذة

شنو الشرف والنور الجانا دا

رضا بذات نفسه

يا زول والله منور عديل كدا

يا ود يا جميل

لك محبتى

تغريد

03-06-2009, 11:47 AM

كر علي يا العاقب صغييييييييييييييير وجاهل يا ود أمي غايتو عين وجاتك...
عن نفسي ما فهمت أي حاجة غير انو سماعة الكمبيوتر ما موصلة
كدي النقوم أشرب لي قهوة وأجي امكن افهم حاجة

محمد النويري-الفقراء

03-06-2009, 10:20 PM

دوما انيق دوما أصيل كأصالة اهلي وبلدي يا رائع جد استمتعت جدا بكتاباتك الجميلة دوما تبحر سفينتي في بحرك الذي لا استطيع ان افارقه ..

العاقب مصباح

13-06-2009, 10:53 AM

اندفقت

والله جابو ليك

الناس بقت ما بتجيب يا اخوى

بتشيل بس

وخصوصا الحال

ما حصل شلت حال يا ود مدثر؟؟؟

الحال تقيلة ولا خفيفة

وحوالى كم كيلو كدا

او كم طن كمان

والحمولة عليها جمارك ولا لا

وضريبتها كم

دا كله على شيل الحال

وهد الحيل

بنسمع كتير واحد يقول ليك والله حيلى انهد

هو حيله دا حيطه

مع انه تلقاهو شديد

وما ناقص الا رؤياكم الغالية

يا ضابط السجن

صبرك لحظة واحدة

اتزود بنظرة وارجع انسجن

بسمع فى الاغنية دى هسع

مع انى مشيت السجن مرة واحدة بس

زائر فقط لا غير

بدون سوابق

وبدون لواحق

يا لحاق فيكم بتأمل

وبدون ملاحق

سواء كانت هذه الملاحق فى امتحانات

او بجانب عمارة تطمع فى السكن فيها

ياخى دا دخول على طمع عديل

ما قلنا شئ

بس طمعى فى الجمال اكبر من اى شئ تانى

حتى الطيف رحل خلانى ما طيب لى خااااااااااااااطر

تغريد

14-06-2009, 02:06 AM

هيثم ادروب

14-06-2009, 05:01 AM

ماعارف اقول ليك شنو ياود امي
ربنا يديك الصحة والعافية

esmat

05-07-2009, 10:27 PM

عندي فاااارغة جاااي اكتبها بعد شوية كدا

جبت الموضوع دا من الصفحة الرابعة مخصوص

اهو الواحد بقى احجز الفارغة بي طوبا دقائق وجيكم

crash

06-07-2009, 01:26 AM

مليونير ومابديكم معاي
قهوة منتهى
وماعارفه شنو كدة في الزقاق

كانت لنا ايام

أبو جودي

06-07-2009, 02:00 AM

اليوم يعني لي الكثير ،،، وما سرني هو اهتمام مسئولي المنتدي بالتهنئة ،،، أشكر لهم كريم أصلهم ،،،، لأنهم ناس مدني.

esmat

02-08-2009, 10:12 PM

الضجر الضجر الضجر
الضج جر
الساعة الثانية صباحاً عادة لا اكون صاحياً في
هذا الوقت لدي روتيني اليومي اتعشى عند
الساعة الحادية عشر إلى النصف وذلك ابعد
وقت اقلب بعض القنوات من اخبار وما شابه
من افلام عادةتكون في نهايتها فأقضي بعض
الوقت بها عند الساعة الثانية عشر استسلم
للنوم فغداً مشوار طويل ويوم عمل طويل فعملي
من الدوامات الطويلة لا تتخلله فترة لراحة او لنوم
إلا ساعة وتقضيها في الافطار او المشاوير الجانبية
السريعة المهمة، اول من امس لم استطع النوم
لا أدرى لماذا عن صدق ليس هناك ما يقلقني نظرت
لساعة الهاتف تعدت الساعة الواحدة وانا مازلت في
كامل وعي تقلبت يميناً وشمالاً خلفاً واماماً يالهذا النوم
الذي حاربني اليوم نظرت للسقف لم اجده اصبح النظر
يسبح خارج الغرفة ، تحسست علبة الدخان علي اتكأ
عليها واطرد هذا الضجر لم اجدها فقمت ضغت على مفتاح
النور بحثت لم اجدها ياااه ليس هذا بزمن البحث اني في
اشد حالات الضجر ولكن لابد لي من سجارة بعد ان
ادخلتها في رأسي قررت الخروج لشراء علبة الدخان
ومن حسن وسيء الحظ ان بجوارنا بقالة تفتح اربعة
وعشرين ساعة ذهبت إليها لم اجد بها احد غير العاملين
ونواصل

العاقب مصباح

02-08-2009, 10:20 PM

يا زول دا شنو البتعمل فيهو دا

تعليقى دا قبل ما اقراك يا عصمت

ما عارف الحصل شنو

بس يشهد ربى كنت جاى افتح البوست دا واوديهو فوق

وتجى انت تقوم بالواجب

شئ يحير

ويرفع حاجب الدهشة

ورموشها

خلينى اقراك يا عصمت

عندى نقة زاتى

العاقب مصباح

02-08-2009, 10:51 PM

يا بت صباح الطير

وين البلد ركت

عاطف خيرى

يأخذنى دوما إلى مغاره المرصوصة بعناية

والملفوفة كورق التبغ

يحدثنى كثيرا عن الحبيبة والوطن

لا ادرى ماذا اقول ولكن فى خاطرى كلمات تبحث عن مخاض

ربما احتفظ بأكثرها جنونا فى ورقة

وما يقبله الآخرون سوف أدعه هنا

مساحة

لقلم يستعد للنزيف

قلم لا يحمل الحبر ممتلئ بالحب والحب المضاد

ببعض قبس

والظلمة آتية بكؤوس يحملها ذاك النادل

تذكرت فجأة ذلك الشعر

الذى احفظه منذ عهد بعيد

وقد خططته فى ذاكرتى الورقية

ولكنى تركتها فى وطنى

اشعر بها مغبرة كثيرا

وقد هدها غيابى

وضنى عليها

يقول ذلك الشاعر :-

رجل يتبختر فى مقهى

يطلب قهوة

تأتى إمرأة بلباس بُنى وشفاه سكره

تطلب قهوة

يختلط الامر على النادل

فيأتى بالفنجان على السكر

تحرك المرأة سُكرها

فتُحرك فى الرجل الشهوة

ينسى السكر

يتذكر أنه ذاب فى إمرأة حلوه

دائما ما يحفظ قلبى وعقلى وذاكرتى المُهترئة ما يكون نشاذا

وحين سُئل شاعر عن من هو قال :-

أنا رجل من غمار الموالى

فقير الأرومة والمنبتِ

فلا حسبى ينتمى للسماء

ولا رفعتنى لها ثروتى

وُلدتُ كآلاف من يولدون

بآلاف أيام هذا الوجود

لأن فقيرا بذات مساء

سعى نحو حُضن فقيرة

وأطفأ فيها مرارة أيامه القاسية

محفوظ أيضا فى دفترى الخاص

أتذكره رغم طول السنوات

أعشق التمرد فى الكتابة

أحاول مرات عُدة أن أتمرد

فأدخل غابة الكلمات

وأحتطب بعض الحروف

لتُعيننى على زمهرير الظروف

وحالك أزماننا .... وقد عمها بعض الخوف

وأحتواها الصديد

وانتشر على سطحها بعض النزيف

وحين تنزف حروفى

أشعر ببعض الراحة

ربما يكون هذا مخالفا لقوانين الطبيعة

لأن النزيف عادة يؤدى إلى الموت لعدم وجود أدوية صالحة للعلاج

ولكن نزيف الحروف هو دواء من نوع خاص

اعشقه

ويملأ رغبتى

فأفارق به مستشفى الاحزان

واقضى فترة نقاهتى فيها

نزار حسن محمد

02-08-2009, 11:15 PM

من الحلو ما بحول بمدح سيدى الفحول يا ابوعلامه
سيدىالقصب الفحول يا ابوعلامه

محمد موسي الصديق

03-08-2009, 12:46 AM

الرائع عبد المنعم
شباب النفاج ما قصروا فى الردود
ويمكن اكتر من عشرة صفحات
وسأوردها هنا ان شاء الله
فهى من ضحايا الغزو الاخير
لك محبتى دوما

يا اخي عبد االمنعم هو صاحبك عقبة دا بدي فرصة لزول ارد ليهوا ....

العاقب مصباح

03-08-2009, 01:51 AM

يا اخي عبد االمنعم هو صاحبك عقبة دا بدي فرصة لزول ارد ليهوا ....

قبل ما ارد على الشباب داير اخش عليك

واقول ليك حأجيب قصتك الاشتركت بيها هنا معاى فاكرها

والجمل كائن صحراوى:d:d

محمد موسي الصديق

03-08-2009, 01:55 AM

ياخي الجن بداوي كعب الاندراوة زي ماقلت ...

ان جنيت انت مابراي جننك الزول المعاك ....

الزول الاخضر كان شفتو بخدر ان قالو لي راح

سرح مع المراح براجاهو للصباح ...

وصباحكم هو الصباح البقومو ليهو بدري وتقوم الحاجه ماشة علي الغنيمات

شايلة كورتا للبن ....

شال هم فرقتك قلبي اريتوا كان يرحل ...

يرحل يفوت وين هو عندو مكان يرحل ليهو ...

وبيقدر الملم عفشوا ....

عفشوا داخل قلبوا علي مسؤلية حبيبوا ...

حبيبو دا جنني وفقد عقلي ...

التلخبطك لخبطة يا العاقب ...لخبطة عقلنا ...

تقبل مروري .....

العاقب مصباح

04-08-2009, 05:42 AM

حلم

يا اروع حلم ودع

هذه اغنية يغنيها محمد النصرى

اسرح معها كثيرا

التف بطمبوره ليل نهار

واسافر معه الكلمات

الحن تارة

وتارة اكتب له

فيطربنى

الاحلام الدونك فاتت لو واصلنا صباحها بيطلع

... لا اظنك صادقا يا مصطفى ... بعض الاحلام تظل ملازمة لنا من دون صباح ... ليت الصبح يأتى فيشعرنى بأن ما كان عمرا اصبحت فى نظره نكراً

بحلم معاك انو الحزن غيمة وخلاص رحلت بعيد

انه اللى باقى من الحزن فى عمرى كله بعيشه عيد

ان شاء الله طول ما حبى ليك لا يطل زمن قاسى وعنيد

عندما يغنى السقيد ...يتوقف القلب عن النبض ...فنحتاج لمن يجيد قراءة النبض ليُطمئننا أن نبضنا ما زال مستمرا حتى اشعار آخر ...

وبحلم إنى فى اكوان بترحل من مراسيها ....

ولما تغيب عن الميعاد

بسأل عنها الأعياد

وبسأل عنها التاريخ

وبسأل عنها المستقبل اللسع سنينه بعاد

بناديها ....

عندما يكون الغياب للأبد يعنى ذلك أن المناداة ولو بصوت صارخ لا تُفيد فى شئ ... فقط اكتك صرختك داخلك ... تحتاج للهمس فى هذه الاوقات من عمرك ... وتحتاج لعمر جديد يُنبئك أنك لم تعد فى هذه الفترة ((........))...

زمنى زمن الأحلام الوردية

هكذا يقول سيف الدين الدسوقى .... فى رائعته أمدرمان ... رائعة تلك الاحلام لو استمرت لكن شروق الشمس يحرمنا منها بقساوة منقطعة الإزعاج وصوت المنبه يعلن بداية يوم جديد خالى الدسم ....

كان حلما عابرا طاف بذهنى

عثمان حسين عندما يغنى ارتبك من كلماته ... يرتب فينا الحضور والدهشة معا لعالم ما بعد النوم العمرى .... نومة تساوى العمر ... ثم تصحو باحثا عن عمر جديد ....

جعفر السقيد هذه المرة :- وداعا يا حلم عابر حده ومكمنه الشفتين .... لماذا لم يذهب حلمه إلى ابعد من ذلك ... هل كان فى غفوة أم ماذا ...أنتظر رده رغم تأكدى من عدم إجابته على ....

مع ود سيد احمد آخيرا :-

لمحتك قلت بر آمن بديت احلم

الملم قدرتى الباقية وأشد ساعد على المجداف ...

واحلم بيك اغير سكة التيار ........

وأقول يا انتى يا اغرق...

شكرا مصطفى ...

وشكرا للحلم ...فقد أصبح فى الذاكرة ...كما يُقال لى أو كما لمحت عيناى ...

شكراً

wad alballal

05-08-2009, 01:38 PM

قمة المتعة انو الزول يقرا ليك يا العاقب ... بالجد امتعتنا بالاوراق الملخبطة دي ... فاصل وواصل ما تقيف ...
تقبل مروري يا رائع .......
......

محمد موسي الصديق

05-08-2009, 01:43 PM

قمة المتعة انو الزول يقرا ليك يا العاقب ... بالجد امتعتنا بالاوراق الملخبطة دي ... فاصل وواصل ما تقيف ...
تقبل مروري يا رائع .......
......

يا ودالبلال الزول دا بلحق ليك الصفحة دي النيمة ماتقولو كدا ....

wad alballal

05-08-2009, 01:47 PM

يا ودالبلال الزول دا بلحق ليك الصفحة دي النيمة ماتقولو كدا ....

والله ياريت يا ود موسي ... دا كلام موزون بي شنو ما عارف ...

العاقب مصباح

06-08-2009, 05:26 AM

بالأمس كان حلما

والآن عاد ملحا

هى نفس الحروف

تختلف فى الطعم

طعم الحلم تشعر به فى عيونك وفى تعاملك مع من هم حولك

وطعم الملح يرفع الضغط بنسبة تؤدى الى ما يقارب حتفك

الحلم نتمناه لأنه يأتى لنا بمن نحبه أو طيفه

والملح كثرته تؤدى الى تأففنا عن التذوق

لكم اشتهى تذوقك يا حُلمى

ح :- حاول أكتر انو تعرف .. انى حبيتك جنون ... ولما اسودت عيونى قلت بيك الشوف يكون

ل :- لكن الأقدار بتحكم ... وهى البتمشى وهى البترسم للطريق كيفن يكون

م :- ما غريبة الدنيا تقسى ... علمتنا ... إنو دائما ... فى حياتنا ... يبقى لازمانا الظنون

م :- مرة طعم الدنيا بعدك اصبحت حاشاها لون

ل :- لا بنشوف بعدك حقيقة والضجيج صابه السكون

ح :- حسرة الايام بتصبح هى الرفيقة ومافى شئ دونك بيكون

العاقب مصباح

07-08-2009, 09:58 PM

رحلة العمر

تبدأ باهتة وتقترب رويدا رويدا من القوة وتصبح اضخم من حجم الكرة الارضية

الطفل يولد صغيرا فى حجمه وعقله وقدرته على المشى

رويداً رويداً يبدأ فى الحبو

ومن ثم الطفولة

والشباب

والشيخوخة

والكهولة

يشبه الحب تماما فى تفاصيله

يختلف الإنسان فى أنه يموت فى آخر مطافه

ولكن الحب يظل مشتعلاً كنيران المجوس

الطاقة لا تفنى ولا تستحدث ولكنها تتحول من شئ إلى آخر

الحب لا يفنى ولا يستحدث ولكنه يتحول من قلب إلى آخر

كل منا يحمل راية

بعضهم يُسلمها لغيره

والبعض الاخر يظل محتفظا بها لآخر عمره

ليست انانية

ولكن عندما يتمكن منا الحب يجعلنا فى قبضته اليمنى

يجعلنا حبيسى أضابيره وبين دهاليزه نقاوم المد والجزر

وفى كل موسم للمد يأتى جزر جديد

يتصارع فينا احساس الحب كما المد والجزر

إبتعاد

وإقتراب

فى كل مرة يقترب يوشك أن يفتك بمن يسير بمحاذاة الشاطئ

هل نبتعد عن الشاطئ

أم نقترب أكثر فأكثر

وهل ركوب الأمواج سيصبح أحد هواياتنا

كيف يقتلنا ذاك المُسمى حباً

هل بالسير فى طريقه

بالتزود منه

أم الهروب منه

يظل الحب ملازماً لنا

لأنه سُقى بدماء

وبسهر

وبعيون هدها الأرق

وبتفاصيل صغيرة

عن يوم الحبيبة وكيف تقضيه

وماذا تلبس حين تخرج برفقتك فى طيفكما

وماذا تأكل حبن تُريد التزود منك

وماذا تشرب حين تشتاقك

وكيف تتحدث إلى والديها عند الصباح

وكيف تُسرح شعرها ضفائر لك

وتجلس فى المقابل لك

لترى وجهها يُضئ

وأنوثتها تتفجر

ورائحتها المحببة إليك

بعطر إحساسها

بنقاءها

بعاطفتها المكتنزة شوقاً

بحديثها الفاخر

إمرأة فاخرة الإحساس

وغضة الشعور نحوك

تهرب منها إليها

وتعود منها إليها

تعشقها

وتعشق التفاصيل المُبهمة

تحترمها

بتدينها

بطاعتها

بقوتها

بضعفها

بعيونها التى تُغيبك فيهما

فتدخل إلى عينها من ابواب متفرقة فيها

باب الفرح

باب الحلم

باب السعادة

باب الضحكة

باب المستقبل

باب الحاضر

باب الدهشة

باب أن تسكر

باب أن ترى الصفاء

ترى البهاء

ترى النقاء

ترى الإكتفاء

تلك أُنثى

كاملة التطور

بها كل شئ

وفيها كل شئ

خاتمة النساء

وآخر العهد النبيل

هى أُنثى

تملا العين

وبـــــــس