منو السبب ؟؟؟ والحل شنو ؟؟؟

[الملكة اسماء ( ام محمد )]

http://www.7ammil.com/data/visitors/2008/04/22/7ammil_875_samy52%20copy.jpg




اها الفكرة وصلت يا شباب ؟




ما مشكلة ح تصل بعد شوية :)


يلا يا جماعة نناقش القصة دي بفهم وااااااعي ومن جميع الجوانب ونحاول نصل لاسباب المشكلة وبالتالي الحلول السليمة




بين البنات ... العنوسة
وبين الشباب ... العزوبية


وكلاهما يتسبب في مشكلة الطرف الاخر

[الملكة اسماء ( ام محمد )]

http://up.hawaaworld.com/get-6y99jd9m.jpg


مفهوم الزواج عند البنات ....
ومفهوم الزواج لدى الرجال ....

نقيضين ..... غالبا

[الملكة اسماء ( ام محمد )]

والنتائج :




http://www.alriyadh.com/2007/05/16/img/3000000.jpg

[الملكة اسماء ( ام محمد )]

والمشكلة ان الشباب بعملوا المستحيلات مرات


والنتيجة :


http://www.alriyadh.com/2007/03/15/img/153222.jpg

[الملكة اسماء ( ام محمد )]

قال خريجي جامعات قال



http://www.mohdcartoon.net/cartoon31020072.jpg

[mustafa]

صراحة حيّرتينا ياملكة

[باسطه]

والمشكلة ان الشباب بعملوا المستحيلات مرات


والنتيجة :


http://www.alriyadh.com/2007/03/15/img/153222.jpg



الصورة دي عذااااااااااب

وبالنسبة للموضوع بجيك راجع بروقه لأنك جيتي في الوتر الحساس شكلوا الزول حيعمل خط رجعه ويعيد تفكير ونظر

:D:cool::D

[الملكة اسماء ( ام محمد )]

http://www.bishanet.net/vb/images/uploads/25878_715490b9daf610c9.jpg

[esmat]

تعرفي ياملكة
موضوع الزواج والعنوسة والعطالة
يحتاج منا لتوعية كافة الجهات وهي حملة
يجب أن يقودها الشباب لتوعية الاباء
والامهات والاجداد والكبار -
بالخطر القادم لوضع التنازلات
معظم البنات ليس لديهم مشكلة في
الشخص المتقدم اذا كان فقيراً أو غنياً
على وزن (ابني عشك ياقماري قشة قشة)
ولكن يقف الاهل عائق لهذا الزواج وتكون النتيجة
عنوس من جهة وتشتيت اهداف للشاب
يجب التوعية ونرجع لي ايام زمان مثلما كان
(تعال بالعندك ) وكان اولياء الامور يقومون بالتبشير
لهن أي (ياخ انت تعال نحنا موافقين)
بجيك راجع لما الحفلة تدور

[الملكة اسماء ( ام محمد )]

والحياة غاااااااااالية يااااعالم


http://www.yabdoo.com/users/476/gallery/3645_p152487.gif

[العاقب مصباح]

موضوعك جد مهم


ودا السبب الخلانى اكتب ازمة نسوان

وكتبت الشينات الكمية ديك

وبوستات اخرى

هنا عندك ازمة اتفاق

بمشى واجيك

نحن اصحاب الشان زاتو

ولا اقول ليك نحن الشان عديل كدا

[الملكة اسماء ( ام محمد )]

http://www.okaz.com.sa/okaz/myfiles/2007/01/12/x10-small.jpg

[الملكة اسماء ( ام محمد )]

مرحلة خطيرة :D

http://www.eshared.net/photos/funny/karek_funny9.jpg

[الملكة اسماء ( ام محمد )]

mustafa

باسطه


esmat

agibmisbah


بوجودكم نقود مركب الحياة لضفاف الامان

[faqatar007]

كارثة العالم العربي من المحيط للخليج

مشكله تسيطر على الكثيرين

ارق فكري عند الفتيات والشباب

مهورعالية ومتطلبات الزواج المبالغ فيها!

فروق في المستوى الاجتماعي والوجاهة!

فروق في المستوى المعيشي!

فروق في الحسب والنسب!

فروق في المستوى التعليمي والمؤهلات!

البطالة والفقر!

ان اسباب العنوسه امور كثيره البعض منها الغلاء الفاحش في المهور

وشروط البنات وامهاتهم وايضا طلبات بعض من الشـباب ومواصفــــاته

للزوجه وكانه يريدها ملكه من كل ناحيه......

تقبلي تحياتي

[محمد حسين (المميز)]

سبحان الله

قبيــــــل عندنا واحد في الشغل قال مسافر

ماشي وين؟

ماشي الهنــد بلده ومهموووووم :rolleyes:

مالك يازول مسافر وما فرحان ليـــه؟؟

قال انا في اخت زواج انساءالله :(

طيب ايش مشكل صديق انت؟؟ :confused:

لازم انا في فلوس كتير :eek:

طيب ايش مشكل برضو ؟؟

لازم عاده حقنا في الهند بنت لازم هو يجيب كل حاجه :o

كيف يعني؟؟

انا ابويا في موت وانا في اتنين اخت لسه مافي زواج :(

اخت حقي دحين في عريس يبغى هو :mad:

طيب ياخي جننت اهلنا ايش مشكل انت

اخت حقي لازم يجيب لعريس كل حاجه

هديه يعني ؟؟

لا لازم انا اخت يجيب بيت

و لازم واحد دباب (موتر)

غرفة نوم و ملابس كله و عزومه حق زواج كله لازم عروس يسوي :eek: :eek:

طيب والعريس ايش يجيب يا صديق :mad:

هدا عريس في الهند ما يجيب شي هو يجي بس بيت

على طول :(


رأيكــــم شنو يا عزااااااااابه

رأيك شنو يا العاقب :D

العريس ما عليهو ولا التكتح :p

[الملكة اسماء ( ام محمد )]

صراحة حيّرتينا ياملكة

دا مربط الفرس

كيف ننهي قصة الحيرة دي ؟

[الملكة اسماء ( ام محمد )]

الصورة دي عذااااااااااب





:D:cool::D



اوعا تكون قربت للباب التاني دا بس ؟:confused:

:D:D:D


في انتظار عودتك :)

[الملكة اسماء ( ام محمد )]

تعرفي ياملكة
موضوع الزواج والعنوسة والعطالة
يحتاج منا لتوعية كافة الجهات

وهنا يبدا دورنا نحن الشباب ... والنقطة الاولى بحث الاسباب وايجاد الحلول اكيد

وهي حملة
يجب أن يقودها الشباب لتوعية الاباء
والامهات والاجداد والكبار -


بالخطر القادم لوضع التنازلات

تعرف التنازلات بداءت فعليا بس بشكل عكسي تماما ولا يخدم غرض بقدر ما بيسبب مشاكل اكبر

معظم البنات ليس لديهم مشكلة في
الشخص المتقدم اذا كان فقيراً أو غنياً
على وزن (ابني عشك ياقماري قشة قشة)

اعتقد انها قشرة بتتلون بيها البت وبتحاول تحافظ على رونق العلاقة بس بمجرد ما يتقفل باب البيت بتبدا الفكرة الجديدة واللاسف منتشرة في مجتمعنا ( المظاهر)

ولكن يقف الاهل عائق لهذا الزواج وتكون النتيجة
عنوس من جهة وتشتيت اهداف للشاب

يقف الاهل عادة لما يكون في وجهة نظرهم ابعاد لبعض التنازلات والموافقة على المتقدم ... واكيد ماف زول بدور الخير للبنت زي امها وابوها ودا غالبا طبعا

يجب التوعية ونرجع لي ايام زمان مثلما كان
(تعال بالعندك ) وكان اولياء الامور يقومون بالتبشير
لهن أي (ياخ انت تعال نحنا موافقين)
بجيك راجع لما الحفلة تدور


نرجع لارض الواقع يا عصمت ونقول انه في ظل العولمة الحاصلة بقى كل شي زايد ومن غير المعقول نرجع لزمن حبوبتي وحبوبتك زمن تعال بالعندك


هسي بقت كل بنت عايزة تظهر بصورة مبهرة ومنافسة لقريناتها
يبقى في الحالة دي لازم الشباب يفكروا في طرق لمواكبة الحياة العصرية وفي نفس الوقت ضمان الاستقرار مع الطرف المناسب

[الملكة اسماء ( ام محمد )]

موضوعك جد مهم





نحن اصحاب الشان زاتو



ولا اقول ليك نحن الشان عديل كدا


ولانكم اصحاب الشان يا العاقب اتمنى عودتك لدراسة ابعاد اخرى للازمة الحاصلة

[بت مارنجان]

موضوعك جميل وياريت الناس تناقش بجدية عشان نشوف الحل
ونصل الي اصل المشكلة ونشوفها قدر شنو ..

00 _ 00 ان شاء الله مايجي سيل يشيل دة كمان يالملكة ;)

بجيكم تاني ان شاء الله .,

[معروف الجزولي]

شكرا يا ملكه علي الموضوع الجميل

لكن حسب اعتقادي الشخصي بان المشكله متشعبه ولها ابعاد كثيره جدا
وكل شرائح المجتمع شركاء في المشكله،، لكن الشريك الاصيل هم العريس والعروس

وانا بعتبر بان الزواج هو مصله اجتماعيه لكل الطرفين وتحت هذا الفهم يمكن ادراج كل التفاصيل التي تعيق عملية الزواج؛؛ ويجب علي كل شاب وفتاة مقبلين علي الزواج ان يفهموا هذا المعني جيد وكذلك عائلة البنت وعائلة الولد.
وعليهم ان يفهمو ان الشاب محتاج لكل المساعدات من جميع الاطراف وخاصه اهل الزوجه؛ يجب عليهم ان لا يدققو في الامور الثانويه وهي مفهومه للجميع؛؛ مثل الترتيبات الممله التي تعيق الزواج وتعكر صفو العائلتين؛ وانا حسب وجهة نظري وحسب تجربتي القريبه بعتبر بان واقعية الشاب والفتاة لها دور اساسي في اتمام الزواج باقل مجهود؛؛ الواقعيه يا شباب الواقعيه يا شابات هي عصب المشكله

لكن يا ملكه موضوعك ده عبش واحد اخونا في وتر حساس جدا وخلاهو يهضرب
واخونا عارف نفسو كويس ؛؛ انا ما عايز ازكر اسمو امام المله لكن ممكن اقرب المسافه للمفتحين يعني امكن اقول الحرف الاول من الاسم الاول عين والاخير باء والثاني الف ومعاهم قاف؛ صحاب هذه الحروف المبعثر يمر في هذه الايام باذمة شاكوش انا ملم بتفاصيلها من له الرغبه عليه مراسلتي في الخاص لكي لا تتأذم المسأله وتخرج من المألوف؛ وفي الختام ارجو ان تتدعوا لهو
شكرا ملكه علي الطرح الما خمج

[الملكة اسماء ( ام محمد )]

ان اسباب العنوسه امور كثيره البعض منها الغلاء الفاحش في المهور

ومتطلبات الزواج المبالغ فيها!

فروق في المستوى الاجتماعي والوجاهة!

فروق في المستوى المعيشي!

فروق في الحسب والنسب!

فروق في المستوى التعليمي والمؤهلات!

البطالة والفقر!

وشروط البنات وامهاتهم ......

كل ما ذكرت اخي صحيح ولا شك فيه لانه الحاصل فعلا باختصار


وايضا طلبات بعض من الشـباب ومواصفــــاته

للزوجه وكانه يريدها ملكه من كل ناحيه......

بالتاكيد للشاب الحق الكامل في اختيار شريكة حياته بالمواصفات التي يرغبها ودا شي بضمن استمرارية العلاقة طبعا .. واكيد زواجك باختيارك ما زي لما تتزوج ارضاء لطرف او ارضاء لعادة دارجة في العائلة من زيجات على نطاق الاسرة وغيرها

تقبلي تحياتي

تشكر كتير اخي الفاضل على هذا المرور

[مدنيّة]

تعرفي ياملكة
في مسج كانت حايمة في السودان
نوعية بناتك الفوق ديل
وشوية شوية يحصل تنازل
لغاية لما تصل
لذكر مسلم

[الملكة اسماء ( ام محمد )]

رأيكــــم شنو يا عزااااااااابه


رأيك شنو يا العاقب :d



العريس ما عليهو ولا التكتح :p



كلامك يقودنا لموضوع اخر وهو بحث الشاب السوداني عموما عن البدائل بسبب التكاليف التي فرضها مجتمعنا حديثا على المتقدم للزواج

وفعلا الشي الحاصل اننا بداءنا نلاحظ خروج مجتمعنا عن المالوف وخروج الشاب السوداني للبحث بعيدا عن دائرة مجتمع يحده احيانا للانحراف بسبب ما يفرضه من قيود تمنع الزواج المبكر

[الملكة اسماء ( ام محمد )]

موضوعك جميل وياريت الناس تناقش بجدية عشان نشوف الحل
ونصل الي اصل المشكلة ونشوفها قدر شنو ..

واكيد وجود العنصر النسائي في دائرة الحوار يثري الفكرة ويقيس الابعاد بجميع وجهات النظر.. ودي دعوة علنية للتواجد بين المتداخلين ياشابات عشان ندرس الموضوع دا :)


00 _ 00 ان شاء الله مايجي سيل يشيل دة كمان يالملكة ;)

:p:p:p
الله يستر

بجيكم تاني ان شاء الله .,

تشرفي ياراقية

[الملكة اسماء ( ام محمد )]

لكن حسب اعتقادي الشخصي بان المشكله متشعبه ولها ابعاد كثيره جدا
وكل شرائح المجتمع شركاء في المشكله،، لكن الشريك الاصيل هم العريس والعروس

قلت جملة ... كافية جدا

وبعدها ممكن كل شخص يشوف موضعه في هذا المجتمع المتهم



؛ ويجب علي كل شاب وفتاة مقبلين علي الزواج ان يفهموا هذا المعني جيد وكذلك عائلة البنت وعائلة الولد.

المشكلة ومع الاسف ان مفهوم الارتباط عند الشباب والشابات بقى سطحي جدا ومجرد قشرة ينكشف ما تحتها بعد فترة وجيزة من خوض معركة الاستمرارية

وعليهم ان يفهمو ان الشاب محتاج لكل المساعدات من جميع الاطراف وخاصه اهل الزوجه؛

تفهم حاجات الشاب النفسية والعاطفية اصبح اخر شي يفكر فيه اهل الزوجة وخصوصا الامهات تحت فهم( انتي ما اقل من بنت ناس فلانة الجابوا مهرها كذا مليار!!!)

يجب عليهم ان لا يدققو في الامور الثانويه وهي مفهومه للجميع؛؛

تصدق الحاجات الثانوية دي بقى التفكير فيها يسبق التفكير في اي شي ومرات يسبق التفكير في المتقدم اصلا !!
وعااااادي تلاقى وحدة اتقدم ليها عريس تبدا تفكر في ح تلبس شنو وح تقضي شهر العسل وين ؟!!

مثل الترتيبات الممله التي تعيق الزواج وتعكر صفو العائلتين؛

وماتفوتك الموضة ... حجز تذاكر سفر لاستقدام خالات وعمات وصاحبات وحبوبات
العروس عشان يحضروا العرس لو ح يتم برا السودان !!!!!

وانا حسب وجهة نظري وحسب تجربتي القريبه بعتبر بان واقعية الشاب والفتاة لها دور اساسي في اتمام الزواج باقل مجهود؛؛

والواقعية تجي من وين في عصر العولمة دا ... سباق التتويج على عرش افضل عرس للعام !!!

الواقعيه يا شباب الواقعيه يا شابات هي عصب المشكله

الواقعية = مجموعة تنازلات
التفكير في ابعادها للاسف بكون محبط غالبا


لكن يا ملكه موضوعك ده هبش واحد اخونا في وتر حساس جدا وخلاهو يهضرب

مابراه صدقني
كتاااار ناس الاوتار الحساسة هنا :d


شكرا ملكه علي الطرح الما خمج



تشكر اخي للمداخلة المفيدة والقيمة باذن الله
جزاك الله الف خير
ودمت بخير

[الملكة اسماء ( ام محمد )]

تعرفي ياملكة
في مسج كانت حايمة في السودان
نوعية بناتك الفوق ديل
وشوية شوية يحصل تنازل
لغاية لما تصل
لذكر مسلم

ودا الحاصل يا مدون

وشفنا بعينا ماف زول قال لينا
بنات من اجمل ما خلق الله
تلاقي الوحدة طموحها اقل شي وزير والوزير!! قدر ابوها ومعرس وبوليداته !!

شوية تفكر في ولد الوزير !!
لو محظوظه يكون ولد الوزيربفكر فيها وماتكون امه مرشحة ليه بنت القنصل الفي البلد الفلاني

ومع الزمن تلاقيها قدمت تنازلات وزارية لحد ما توافق بواحد دق الباب مليون مرة واترفض لانه ماعنده حق الزفة بس !!!وفي الاخر توافق عليه باقل تكلفة بس بعد شنو ؟ بعد ما يكون هو بعد ما كان عايز يتزوجها لانه بحبها هسي عايز يتزوجها بعد كدا لانه خلاص عايز يشوف عياله قبل ما يتخارج من الدنيا .... زواج بهدف الاستقرار يعني وبكون غالبا ( متبلد عاطفيا)

[العاقب مصباح]

سبحان الله
قبيــــــل عندنا واحد في الشغل قال مسافر
ماشي وين؟
ماشي الهنــد بلده ومهموووووم :rolleyes:
مالك يازول مسافر وما فرحان ليـــه؟؟
قال انا في اخت زواج انساءالله :(
طيب ايش مشكل صديق انت؟؟ :confused:
لازم انا في فلوس كتير :eek:
طيب ايش مشكل برضو ؟؟
لازم عاده حقنا في الهند بنت لازم هو يجيب كل حاجه :o
كيف يعني؟؟
انا ابويا في موت وانا في اتنين اخت لسه مافي زواج :(
اخت حقي دحين في عريس يبغى هو :mad:
طيب ياخي جننت اهلنا ايش مشكل انت
اخت حقي لازم يجيب لعريس كل حاجه
هديه يعني ؟؟
لا لازم انا اخت يجيب بيت
و لازم واحد دباب (موتر)
غرفة نوم و ملابس كله و عزومه حق زواج كله لازم عروس يسوي :eek: :eek:
طيب والعريس ايش يجيب يا صديق :mad:
هدا عريس في الهند ما يجيب شي هو يجي بس بيت
على طول :(
رأيكــــم شنو يا عزااااااااابه
رأيك شنو يا العاقب :d
العريس ما عليهو ولا التكتح :p




ياخى الهند دى انا بريدها عديييييييييل كدا

ايوا دا الكلام

لا شبكة لا شنطة لا شيلة لا شقة

والله دا العرس ولا بلاش

يا مميز اخوى صاحبك دا ما عنده جواز مضروب

نمشى نفك البوره ونجى

وبعد داك راجل المرة دا حلو حلا

والتكاليف فى الزواج التانى بسيييييييييييييطة

الهند نفررررررررررر

يا مميز حسستنى بالندم لانه زمان فى واحد هندى كنا شغالين سوا قال لى امشى معاى الهند بعرس ليك اختى

انا ابيت قلت ناس كيوتو ديل ما بنبدلهم بأى شئ

الظاهر على بعمل مراجعة عامة للوضع

والبوره ماااااااااااااااا حبابها

[العاقب مصباح]

بسم الله الرحمن الرحيم
اها يا الملكة جيناك وبى رواقة
مشكلة الطموحات والاحلام الفوق وفوق شديد
البت هى السبب
وامها كمان السبب
واخواتها كمان سبب
وصاحباتها
وكل من تنتمى الى تاء التأنيث
وتاء التأثيث
صاحبتها عرست فلان مليان قروش
وهى ما اقل منها
لازم تجيبه
وتجيب سيد سيدهُ كمان
وتجى امها ولازم تفتخر بيها
شيلة دفارها يهز ويرز
وقولة خير بى شيك معتمد
وفتحة خشم بى صينية بتاعة قروش
وتوريد مال بالدين كمان
ولو لاحظتى الراجل بينتهى دوره فى قولة مبروك وربنا يسعدكم
والسترة احسن للبت
من اعال ثلاث بنات فأدبهن وزوجهن فله الجنة
النسوان ما عايزات كلام من دا
او ما على بالهن
الشوفينية كاتلاهن
والبوبار والفشخرة بتقصر اجل عرسهن
ومواصفات الزوج
والشئ مال
والعرس مال
والعيشة مال
الى ان تميل عن الحق
وعن الواقع
ولا تجد من يصلحها
تحولت الفتاة الى سلعة
من يدفع فيها اكثر
دهب
وغيره وغيره
قبل سنوات وانا جاى من الخرطوم
ركبت فى البص
جن مجموعة نسوان
فشخارات شديد
جن شايلات ليهن صينية
قطرها نص متر
وفى نصها كمية دهب
وعلى الاطراف عملات سودانية واجنبية
ودا كله عشان شنو
دا السبب فى البورة
والعنوسة
الرجال ما عندهم مشكلة
سبعين سنة وبنعرس
اها البنات كم سنة
عندهن تاريخ معين
وبعده تصاب بالكساد
وفى الوقت داك تنزوى الفتاة
وتصاب بعوامل نفسية
ربما لا نراها
ولكنها موجودة
اسأل ربنا يهدى نسوان السودان
لما فيه خير اولادنا وبناتنا
لأنه البتبالغ فى زواج بتها حتجى واحدة غيرها تبالغ فى زواج ولدها
ربنا يهدى ويعين

[العاقب مصباح]

ملكة القلوب

انتي ما اقل من بنت ناس فلانة الجابوا مهرها كذا مليار!!



دا عايز يتزوج ولاية ولا شنو

[tigani18]

ازيك ياملكة وتحياتي لموضوعك الجميل والمهم للنقاش...
بس عاوز اسالك سؤال جاوبيني عليهو لحدي ما اجيك راجع
http://www.bishanet.net/vb/images/uploads/25878_715490b9daf610c9.jpg
إنتي من ياتو مجموعة من الفوق ديل

[الملكة اسماء ( ام محمد )]

البت هى السبب
وامها كمان السبب
واخواتها كمان سبب
وصاحباتها
وكل من تنتمى الى تاء التأنيث






تحولت الفتاة الى سلعة
من يدفع فيها اكثر



الرجال ما عندهم مشكلة
سبعين سنة وبنعرس
اها البنات كم سنة
عندهن تاريخ معين
وبعده تصاب بالكساد
وفى الوقت داك تنزوى الفتاة
وتصاب بعوامل نفسية
ربما لا نراها
ولكنها موجودة
اسأل ربنا يهدى نسوان السودان
لما فيه خير اولادنا وبناتنا
لأنه البتبالغ فى زواج بتها حتجى واحدة غيرها تبالغ فى زواج ولدها

ربنا يهدى ويعين



اخي العاقب
بروية مستقبلية ثاقبة لخصت عدة اشياء واسبابها والنتائج المتوقعة

لو كل الناس بتشوف بمنظورك الواعي للامور بلا شك ح ننهي مشكلتين اساسيات .. عنوسة وعزوبية

بس المشكلة منو البعاين بنفس الفهم في ذات الوقت ؟


لا احد
وربك يعين الجميع

[الملكة اسماء ( ام محمد )]

دا عايز يتزوج ولاية ولا شنو



ولسة

انت ما شفت حاجة


اعمل حسابك تضيف (للشينات ) ( س )


س= سيارة .... واخر موديل كمان :o

[الملكة اسماء ( ام محمد )]

ازيك ياملكة وتحياتي لموضوعك الجميل والمهم للنقاش...
بس عاوز اسالك سؤال جاوبيني عليهو لحدي ما اجيك راجع
<img style="width: 400px; ; width: Expression(this.width > 450 ? 400 : True)" border=0 alt="اضغط على الصورة لرؤيتها بالحجم الطبيعي" src="http://www.bishanet.net/vb/images/uploads/25878_715490b9daf610c9.jpg"> (http://www.bishanet.net/vb/images/uploads/25878_715490b9daf610c9.jpg)
إنتي من ياتو مجموعة من الفوق ديل


انا ؟!!!!!!!

ولا وحدة منهم

لاني ببساطة عارفة ومتاكدة ان اخر مطاف ناس المجموعة الاولى ... المجموعة الرابعة والاخيرة

[محمد حسين (المميز)]

ياخى الهند دى انا بريدها عديييييييييل كدا

ايوا دا الكلام

لا شبكة لا شنطة لا شيلة لا شقة

والله دا العرس ولا بلاش

يا مميز اخوى صاحبك دا ما عنده جواز مضروب

نمشى نفك البوره ونجى

وبعد داك راجل المرة دا حلو حلا

والتكاليف فى الزواج التانى بسيييييييييييييطة

الهند نفررررررررررر

يا مميز حسستنى بالندم لانه زمان فى واحد هندى كنا شغالين سوا قال لى امشى معاى الهند بعرس ليك اختى

انا ابيت قلت ناس كيوتو ديل ما بنبدلهم بأى شئ

الظاهر على بعمل مراجعة عامة للوضع

والبوره ماااااااااااااااا حبابها

هي لكن من غاااااااااانا

للهنــــــد

ارسالك على بر يا العاقــب أخوي :p

[حاتم مرزوق]

العرس زاتو ضايقوكم فيهو - عفيت منهم - مثني وثلاث ورباع متجدعين - عرسو البنات كلهن.

من الآخر


اسهل طريق للعرس طريق الأنقاذ.

[ابو لوزة]

والله يا الشباب العزابة
وياالبنات العوانس ربنا يكون
في عونكم وربنا يسهل ليكم

[مدنيّة]

ودا الحاصل يا مدون

وشفنا بعينا ماف زول قال لينا
بنات من اجمل ما خلق الله
تلاقي الوحدة طموحها اقل شي وزير والوزير!! قدر ابوها ومعرس وبوليداته !!

شوية تفكر في ولد الوزير !!
لو محظوظه يكون ولد الوزيربفكر فيها وماتكون امه مرشحة ليه بنت القنصل الفي البلد الفلاني

ومع الزمن تلاقيها قدمت تنازلات وزارية لحد ما توافق بواحد دق الباب مليون مرة واترفض لانه ماعنده حق الزفة بس !!!وفي الاخر توافق عليه باقل تكلفة بس بعد شنو ؟ بعد ما يكون هو بعد ما كان عايز يتزوجها لانه بحبها هسي عايز يتزوجها بعد كدا لانه خلاص عايز يشوف عياله قبل ما يتخارج من الدنيا .... زواج بهدف الاستقرار يعني وبكون غالبا ( متبلد عاطفيا)

ذكرتيني بصاحبة صاحبتي ياملكة

اتقدم ليها واحد قبل اربعة سنوات
وهو "مافي زول يسمعني" شييييييييييييييييييييييين

اها عاين ليه باستهتار وقالت ليه
تعال بعد اربعة سنوات لو مااتزوجت بوافق بيك

تصدقي ياملكة انه بعد الاربعة سنوات جاها تاني واتزوجها !!!!