ديوان نضم مجنون .... ! [الأرشيف]

شبارقة

15-06-2009, 09:40 PM

1 ـ أنا منك

فرقك من الواطه النعال الدستها
وأنا فرقي من وجعك شبر
يا راضية بالعرق البخر عز الضهر
ما ضقتي راحة البال ... ولا ناموا الجهال
الواطه مدّ الطين ...... عذاب
والسحابات البصبّن
زي عرق راسك خراب
لا قوّمن تيراب شقاك
لا طوّعن قاسي التراب
وأنا منّك انتي .......
من القديمات المشقّقة ...
والهديمات الملتقّة ......
واللقيمات المجهجهه....
في الإديات الرقاق...!
أنا من ضفاف روحك ....
قناعة واغتباط
رغم العدم ....
والضيق ......
وعسر الحال عليك...
رغم الشقا ....
ما طال أساك
شديتي نصّك ....
ومن سفل قدميكِ ... لا شامخ علاك
معطونة في الطين والتراب....
ما قلتي آه من التعب ...
لا أفّ خشمك ..... لا نطق كلمة عتاب
سامع غناك .. جوّاك مرتّب بالنضال
منضومة عزّة نفسي فيك
محمومة بالعزّ والجلال
خليك مع الطين والشقا
ما دمتي في شامخ علاك

شبارقة

15-06-2009, 09:40 PM

2ـ طارد غناي.

طارد غناي أنا من زمن
لكن يعود يجبرني فيك
عشرق سطورك يا ورق
كتر الكلام الكاتبو فيك
كمّلت عمرك يا قلم
ولا عمرو غاض عمر القصيد
***
باكيك بعد زمن الفراق ..
توّهني عنِّّك وما رجع ...
فجر الصفا وألق المغيب
باكيك بعد غربة وشقا
ضاع الوفا ..
ما بين غيابك والطريق...
عسرة دروب الدنيا ليك
فتناها بالضنك الشديد
لا سامرت عيني عيونك يا مناي
لا حزّ فيك وتر القصيد
وأنا زول طفر من قلبو ريدك ..
وما نطق بالريد
سكت لمّن نطق حرف القصيد
وأنا زول مرق منّك عشان يمسح
دميعات الشقا
لكنو كان بدّل دميعات الشقا
وأداك دميعات الرحيل
انا زول خلاص...
توّه مسارب الضي عليك
اديهو خاطرك مرتين
لمّن رحل منّك عشان يمسح دموعك
ومرّة لمّن جاك حزين.....

شبارقة

15-06-2009, 09:41 PM

3ـ مراسيــــل العيون

مراسيل العيون بالشوق
بدورا تطفِّي نار الريد
ملت فاضي القليب لافوق
غريب أمر الغرام والريد
سريت بالروح ....
سِفِل همس الكلام مرّة
سَربت براي ....
أخاف يقبضني حارس الريد
سكتَّ .... ولا نضم حسّي
دخلت ..... ولا لمح ضلّي
لقيت محبوبي ما شافني
سرقت ملامحو دون يعرف
شربت برايا حالي الشوف
وقلت خلاص رويت أمرق
مرقت وجفّ حلق الجوف
أخير أوّل ...
ملاني الخوف
سحبت الروح ...
سِفِل همس الكلام والبوح
أخاف يقبضني حارس الريد
بعد ما خانّي حدّ الشوف
ولا طفّيتو جمر الجوف
ولا حارس الغرام فاتني
أريت محبوبي مرّة يطوف
يشوف نار الغرام البي ... ويواسيني

شبارقة

15-06-2009, 09:42 PM

4ـ شابيــــــــــــــــــت ..

شابيت ..
مجهجه بين قصور الايد
ورغبة خاطري فيك
ولا انتي طالك مني شيئ
ولا قادرة تفصحي بالعليك
العارفو من زمن انتظاري...
على شبابيك العشق
مجنونة بيك عيني ..
وهايمات فوق بحور عينيك
والعارفو منك....
لسه ناسج في الضمير
بعد السكات لجّم دريبات الحديث ..
وراني صمتك كل شيئ
ودخلت جواك ...
قلت ممكن تعرفي
لاقاني فيك سراً قديم ...
كان مصطفيني .... ومصطفيْ
وابحرت في عالم جديد ...
غاص في وجودك .. وغصت فيه
وأنا لسّة مانعاني الدروب
اتوسّلت كل الجوارح الفيني ...
ما باقيلي شيئ
وبكيت ... متل مطر الخريف

لا حرّكت عيني مسار دربك ..
ولا بي محتفي!
وطاردني منّك كل شيئ
وأنا لسه بتحايل عليك ..
واتشابى ليك
واقف على نَفَس الأمل
تعبان .. وصابر .. ومشتهيك
والشوق لهيب ...
شلهب ضفاير الانتظار
وأنا بُعدي عنّك ما الحصار..
ما دمتي ساكنة....
على مشارف الروح حضور
مرصوصة في جوايا انتي مرتّبة
صافيات ملامح الطيبة فيك ... ما أعذبا
وأنا برضي لسع مشتهيك
شابيت ...
مجهجه بين حضورك وغيبتك

شبارقة

15-06-2009, 09:43 PM

5ـ نضم مجنون

كلام الشوق
درب مقفول
ولا بتقال
عشان الشوق وصل للحد
وقول الريد
نضم مجنون
مرق من النصاح بالجد
قدر باب الرشاد يفتح
يشوفا عليهو (طق) ينسد

ويهيم من تاني في جنّو
وكان من ريدو ما منّو
عيون أخّاذة ملكنّو
وقدر ما يتوب ويقول انّو
يزح سحر العيون عنّو
يهيج الشوق
ويغرق تاني في جنّو
وفعلاً كان متيم
من صغر سنّو
ولمن طاف دروب الريد
وعرفنّو
وحسّ خلاص بدورنّو
وبالريد والحنان والإلفة
أغرنّو
ونام عشمان على حنّو
نسن احساسو نكرنّو
وفاق من النصاح للجن
وصار درب الخبال فنّو
درب لافيهو زيف لا خداع
ولا الآمال بغشّنّو
دنيا بعيدة من الناس
حبيب وحبيبة
في دنياهو بتهنّو
ويتبسّم ورا الأحداث
وبره الكون
سعيد والله بي جنّو

شبارقة

15-06-2009, 09:44 PM

6ـ بنيّة معاي.

يا بنية معاي
قنديل وشعاع
كل ما أتعب بكتب ليها
واكتب فيها
ارتاح وينزاح
هم من جواي
كلما سافر خاطري عليها
يا بنية معاي في كل خطاي
يا بت فصّلت عليها غناي
رفرف جواي
قلبي الولهان
فرحان بيها
يا بت من نور
سافرت دهور
وقطعت بحور
في عينيها
ونظمت أقول
أحلى الكلمات
جنات ورياض
ارتاح فيها
احسب ساعات
وايام وشهور
أتمنى أعود
ارجع ليها
يا بت فيها
من كل جمال
حاجات حلوات
بحلم بيها
يا بت جواي

شبارقة

15-06-2009, 09:44 PM

7ـ اترفقي.

غربلت ليك
من صفوة القول والنضم
أجمل غناي
وسرقت ليك
خفقات حروف الكون براي
لو عارفه كيف أنا بعشقك!
لو عارفه كيف بتأملك!
لو عارفه كيف بتعشّمك!
يابت خلاص ...
اترفقي
أنا والجنون شعرة ونكون
في فد مكان
اترفقي

شبارقة

15-06-2009, 09:45 PM

8ـ صد

فردت عليك
كتابات الشجن والنّوح
وسيل وهْجك
صِبح صاخب بلا توصال
وفيض رجْع الزمن
توّه مداراتي
شرَقت عليك
بلا لمعة ضياي
غنيت....
ولا طَلَع النغم مني
أتاريني .......
أكنت بغنّي في جواي
أخرس من حُجار قلبك
لسان قولي
وأطرش من صميم حسّك
سَمع هولي
أتاريني .......
على صفحة هشاشة الموج
كتبت غناي وأشعاري
***
ولا همّاك
أضيع في سكّة الحاضر
ولا همّاك
يزيد فيني الزمن باكر
ولا همّاك
أشيلك جوّه في الخاطر
ولا همّاك
أريدك وأبقى فيك شاعر
ولا همّاك

***

عليْ
أسلُك مدار الضيْ
أقول إمكن ألاقيها
وبيْ
حرقة نهار الصيْ
عشمان نظرة تطفيها
خلاص
كملت خطاي وإن حيْ
مصيرا العين تلاقيها

شبارقة

15-06-2009, 09:47 PM

9ـ تباشيرك

تباشيرك
روتني يقين
ملتني عشق
سقتني حنين
أساريرك
رهافة نسمة نديانة
حضن والدين
رضا وتحصين
و رشّة غيمة ريّانة
***
تباشيرك
مواعيد المطر والطين
مواعيد عودة الغايبيين
مواعيد الرجينا سنين
لقا العاشقين
***
تباشيرك
نفت نفَس الحزن مني
كفت تعب الفراق قلبي
نشت روحي
شفت جسدي الملاني أنين
***
تباشيرك
عطر ياسمين
براءة طفلة نشوانة
مربية بالحنان واللين
وضحكة جميلة رنّانة
محت ماضي الزمان الشين
***
تباشيرك
تطل منّك
تفوت جواي
تذوب أعماقي فيها سنين.

شبارقة

15-06-2009, 09:47 PM

10ـ ست شاي

يا صاحية من نوماً خزاز
شلهت دوامو جبل هموم
موجوعة من ريح الرصيف
محمومة من حر السموم
يا مارقة لي عصف الوجوه
يا سامعة من عفن الخشوم
يا ماسكة شرفك زي جمر
شفقانة كيف صبرك يدوم
يا خايفة شرطي البائعات
يفرض عليك جملة رسوم
يا الحارقة يدّك بالجمر
محروق فؤادك بالغموم
تنسي الوجع بين الصغار
ونفسك ولا ذاكراها يوم

يا شاربة من نبع العفاف
مجبورة في الزمن الجفاف
ملسوعة في أعوام عجاف

عطّنت ليلك بالبكا
وسقيتي أيامك نواح
حزنك من الحزن اشتكا
عينيك نسن طعم الصباح
يا مارقة في زمن الشقا
زمن الألم زمن الجراح
اتصبّري ..

ورينا كيف معنى النضال
معنى الصبر...
في حلكة الليل اللي طال
ورينا كيف ممكن تصدي الريح
وتتحدي المحال
واتصبري ...

شبارقة

15-06-2009, 09:48 PM

11ـ سرحت معاك

سرحت معاك
طلعت من الزمن والناس
سرقت جناح عشوق ولهان
مسافر لي حبيبتو هناك
ورا القمرا
رحلت وراك
على زمناً بلا ساعات
لمحنا البهجة في الأفلاك
نظمنا كلامنا للعشاق
شرقنا على ربا البهجة
ولبسنا قشافة النّساك
سرحت معاك

***
كأنّك وانتي قاعدة معاي
بريق نجمة
وكأنّك بي خفيف روحك
مرور نسمة
وبسمع من جمال فكرك
كلام أسمى
***
تمر الدنيا عندي تفوت
تفوت أكوان
مدن وأحداث
وناس وزمان
ويفضل من عيونك لي
صدى الذكرى
***
لمحتك في نسيم فصل الربيع
لمّا الزهور خطّت بألوانا الطريق
وشفتك في تقاسيم وشّي في
زمن الجفاف والضيق
وحسيت بيك
متل ما فتّ ليك أول
بقيتي معايا في كل حال
صديق ورفيق
هناك بالحيل
عرفت نفاسة الجوهر
عرفتك زي شعاع شمسك
لا غاب يوم ولا اتحوّل
***

شبارقة

15-06-2009, 09:49 PM

12ـ انتظار!

يا شايلة همك مرتين

ومشيّلاني الهم معاك

مترقّبة الزمن البعيد

لامن زمن يومك نساك

ونساني برضو اليوم معاك

يا خايفة من بكره البجيك

لامن ظلام الهم غشاك

وغشاني برضو الهم معاك

تعبت رؤاك مدّ البصر

ما تريّحي الشوف من (هناك)!

وهناك رؤاك لمّن تصل

تكمل عليك بهجة رؤاك

يا زولة كبّت مويتا

شافت سراب كضّاب هناك

عطّشتي روحك مرتين

سقتينا لي سكّة هلاك

يا واقفة أبعد مني وأقرب للقليب

أنا لسّه منكوب في رجاك

شبارقة

15-06-2009, 09:50 PM

13ـ صفوة ضميرك

منقولة من صفوة ضميرك
بُيضة اللبن الحليب

يا الكلّما بطراها بغرق
كلّي في احساس غريب

يا الشايلة همّنا من زمان
يا ضلّي في الزمن الصعيب

في ضلمة الليل في السفر
في وحشة الدرب الكئيب

ألقاها قدّامي ووراي
تمسح تطيَّب للقليب

عكّازي في ضعفي وعماي
ودوايا عيّان ، والطبيب

يا باقية لي ضروة وملاذ
مكتوب أكون أنا ليك حبيب

مكتوب علي أنا أعشقك
واصبح معاك شاعر أديب

شبارقة

15-06-2009, 09:51 PM

14ـ خايف عليك

خايف عليك والله من لمس النسيم

من عيون الناس ، ومنّك

ومني برضو بخاف عليك!

من رمال خطوك عليها

قاعدة تحسب في مشيك

ومن خيوط توبك وعقدك

والبراءة الساكنة فيك

خوفي من احساسي يسهى

وينسى يوم ما يحسّ بيك

خوفي من زولاً بسالمك

وزول بناضمك وزول بجيك

وزول بقول لو مرّة اسمك

برضو بِزكِي الخوف عليك

لسّه تائه ، في كلامك وفي سلامك

ولسّه روحي بتشتهيك

لسّه خايف ، من خصامك ومن ملامك

وخوفي من خوفي العليك

لوبكون
يا ريت أدسك فوق عيوني!!

لو بكون
أقفل عليك بعد العيون مُشرع جفوني!!

وبرضو خوفي بظل عليك!!

شبارقة

15-06-2009, 09:51 PM

15ـ طيف

أدهشني طيف
زاورني آخر الليل وفات
ساورني شك في طلعتو
في لمسة الحزن الغريبة وهيئتو
وادهشني لمن درت أديهو السلام
فتّشت في حلقي الزمان
مليان كلام
ما لقيت حروف
طلّعت أفكاري البنيتا على الورق
اتهدّمت كل الجمل
خانّي الكلام وبقيت براي

يا طيف أقيف
ما تفوت قبُل تديني خاطرك
وتحكي ليْ
لو تاه لساني وما قدر
يطلع عليك أطلع عليْ
وان سدّ جنح الليل دروب الضي عليك
أشكيهو ليْ
بوقد مشاعري عليك شموع
يا ها الزمان أديتا ليْ
ما تهون عليْ
لحظة ظلام تحجب عينيك
لو هان ظلام الكون عليْ

يا طيف أقيف
عارفني ما بحمل عليك
مرصوص ملان بالذكريات
مليان كمان
شوقاً كتير سايقني ليك

والطيف رحل من غير كلام!
زي التقول شايل ملام
لكنّي عارفوا كمان حنين
ما بيعرف اللوم والخصام
يا ربّي خانو القول
متل ما خانّي في لحظة الكلام!

حزن الفراق الباقي جوّاي
يبقى يا طيف هو العليك
ولاّ المشاعر الجيتني بيها
كانت مشاعري رأيتا فيك!
هيّجت فيني الذكريات
وشغلت زول خايف عليك

شبارقة

15-06-2009, 09:52 PM

16ـ أمــــونة

أمونة زي رش الخريف
ريحة الدعاش دفق المطر
زي بسمة الأطفال وضي نور الامل
معجونة يا أمونة بي طيبة الكبار
طيبة ومعتّقة بالأصل

محفورة في جوايا كون
جنّة مناي البعشقا
حضناً ملاذ وكتين تضيق
دنيايا في زمن الشقا
قمراً طلع في ظلمتي
نوّر جوانحي وأشرقا
ياها العشقتها من زمان
جلّ البراها ونسقا

يا امي في الزمن البكون
محتاج تتاتيني وأمش
وأبويا في دقّة حنان
لحظة غلط ويرجع يهش
وشريكتي في همّي ومناي
ورفيقتي في يومي وأمس
ومعاي في مستقبلي
معاي في مستقبلي

مرتاح من الزمن الصعب
من الشقا وهم الطريق
عندي البقاسمني العنا
عندي البشاركني الضنا
عندي البيرفع راسي في
زمن الخضوع والمسكنة
يرشدني كيفن الرجوع
يسرقني من وهن الشموع
لي قوة الضو السطوع

وأمونة هي:
صدّت مرور صافي النسيم في خدّها من عفّتا
وأمونة هي:
مدّت كريم الزاد على فم الجياع من رأفتا
***
يا آمنة يا المجبولة فيني محبّتك
مولودة فيني معزتك
اطمّني واتأمّني واتأكّدي
ما عرفت في كل الدروب غير سكّتك
***

شبارقة

15-06-2009, 09:53 PM

17ـ ألقاك وين

ألقاك وين؟؟؟
مليت خلاص سكك السفر ..
قص التذاكر والحقائب...
والمحطّات ....
والتعب....

تاه الدليل واتمردت
كل الدروب والزاد نضب

ما كان عليْ فرض الرحيل
والغربة والخوف والنصَب

شارقاني بالعبرة الدموع
والحرقة والهم الصعب

ما كان على بالك ملامحي
ولا السفر همّاك يوم ..

ولا جال على خاطرك فراقي
ومن فراقك....
ما كحل عيني نوم ..

يا شاردة زي ظبي المها
طليني نسيني الهموم

شبارقة

15-06-2009, 09:53 PM

18ـ متذكرك

في كل خطاي متذكّرك ..
شايل معاي من دفترك..
صفحات صباك ...
وجميل وفاك ...

بتذكّرك ..
مهما الغيوم حجبت سماك ...
مهما الزمن ضيع دروب الرجعة ليك ...

أنا بيك بكون!
يا حاضرة فيني علي الدوام ..

أنا بيك بكون
عظمة وشموخ ..
لوحة جمال ..
صاغ الخيال ..
فيها الكمال ...
ضاعت رؤاي في روعتا

هيبة وجلال ...
شمخت جبال ..
فوق عزتا...

تتذكّرك
كل الثواني المارّة بي
كل الحروف القلتها
واتذكرك ..

شبارقة

15-06-2009, 09:54 PM

18ـ عنفوان

يا عنفوان سحر الجمال
مردود عليْ كل الجنون القلتو فيكْ
ما هزَّ في جوّاك حس جوّايْ
نذر غنَّايو ليكْ
ما رد ليْ منِّك نغم
فصَّل غنا الأوتار عليكْ

ماطر عليْ حسنك زخم
عارفاني ما بستحملو
زايد عليْ في الشوق ألم
سر من عيونك كمَّلو
قسَّم مناميْ عليْ قسَم
قلبي المحب لو تسألو
يا غافلة منّي وفيك رسم
زولاً بعيد مستقبلو

يا عنفوان سحر الجمال
مردود عليْ نظم القصيد
لو مرّة في بالك وصال
أو في الخيال لي زول بريد
تفتح جوانحو عليك درر
ويرجع يسالمك من جديد

شبارقة

15-06-2009, 09:55 PM

19ـ الزمن المفقود ...

مشيت حفيان
على حر الجفا النشفان
وزاد خشم المحنّة غباش
يباس جوفو الصبح عطشان
براي حزنان
على زمناً مرق ما جا
أفتش في الدروب شقيان
درب قمراً فقدت سنا
أفتش وفيني حس عشمان
أقول امكن يجي وألقا
وفيني من الحزن ألوان
ومن سكك الجفا العوجا
ومن جسر الوصال الكان
رباط للخير هناك وهنا
حليلن طلة الحبان
ولمة ناس فريقنا عشا
حليل لمن يجو الضيفان
وينزلو خير، بشاش ورخا
***
فقدت زمان
ما ظنيت يعود يرجع
ولا عاد في سمانا سطع
ولا ريحة الدعاش ضوّع

فقدت زمان
محيّن بالمطر غيمو
وبرقو على فريقنا شلع
وَفد لي خير نداهو الطير
وفوق خضرة رواهو رتع

ويا زمناً مشيت ما جيت
ويا زمن المحنّة قسيت
وما حسيت
وكت ما الزول يفارق الزول
وما عانيت
فراق ناساً
مقامن في الضلوع والروح
فراقن زي طلوع الروح
ولو ما جيت
أبعت لي سمح ذكراك
عشان بالحيل معلّق بيك

شبارقة

15-06-2009, 09:58 PM

20ـ صمـــــــــــــــت

أغراني من صمتك
ضجيج الهيبة فيك
وسكتَّ ..... ما بعدك كلام
فتشت لي سكة دخول
مدخل وصول
أحرف قبول
جملة سلام !
فارقت فيك روحي وغناي
وبقيت بعيد
أبعد من الزمن القديم

صمتك معاني الدهشة،
أبلغ من كلامك
اخترت أسكت وأنتظر
أحرف ملامك
وشهقت لمن جاني في
خجلك هيامك
من غير نفاق
من غير لسان
سمّعني قولك
يا غيمة ما طال
انتظارنا على هطولك
وما نكث خانك رسولك
وما طمح عندك غرورك
شفت في عينيك سرورك
بعدما أدهشني صمتك
وقول عيونك

شبارقة

15-06-2009, 09:59 PM

21ـ مسكين يا زول

اسكن شبح الغربة الغادر
الظلم هضيم ملعون فاتر
والليل غربال الضو... شاطر
والسر البينك وبين الضل
مكبوب في أعلى مكان ظاهر
والوجع الاتعب طاقيتك
قادر .. قادر
و كتفك ملموم
لا خط لا نجوم
مطموس معدوم
حقك مهضوم
جلدك محموم
قلبك فاتر
مجبور تنهد
لا حق لا عد
ولا حد شايفك
ولا عارفك حد
ولا عندك طين
لا حق لا حد
حايم صايم
دايماً نايم
والناس بتخم
ولا عارفنّك ..
ولا حاسبنّك ..
ولا حاسنّك ..
ولا شايفنّك ..
انّك نايم ...
غايب ...
تترمرم في البلدان
الما هيلك ..
وهيلك يا زول ..
أكلوا الدودو ..
اكلوا التمساح ..
الأهلوا نصاح ...
وانت النايم ..
لا طين لا حد
ولا عادك حد ..
غايب نايم ..
مسكين يا زول ..

شبارقة

15-06-2009, 10:01 PM

22ـ عــــــــــــــودة

جاييكِ لما الليل فرد
من لونو في لحظة عبور
شمعة طريق ما سبتها

جاييكِ لما النيل حسر
مد موجو في ساعة كمون
ضفة زمن
اجتزتها

جاييكِ من رحم الخطر
راجع من اللا عودة ليك

مليان كلام
من مدة كنت بقولو فيك

وسمر قديم راسمو القمر
بي نورو في طرف الفريق

مليان مستّف
بالهواجس
والخواطر والظنون

مليان وغالبني الكلام
خايف أكون

ضيّعت مفتاح العبور
لي زول بيعيش جوايا كون

ضاعت حروف سرّو المعاي
في سكة الخوف والشجون

جاييكي لما خطايا في دربك
سهت واتلعثمت

خارت مداركي على الطريق
واتحيّرت
ما بين تماس الرجعة
واحساس الخضوع
اتململت

لامن رسم طيفك عليْ
طلّة أمل ظنيتو خاب

واستنى من قلبي الملوّع
من زمن لحظة عتاب

طبطب عليْ في رقة
لامن خاطري طاب

وهناك عرفت أجيكِ كيف

جاييكِ لكن
برضو خايف من جديد
يكسرني احساس الخضوع

شبارقة

15-06-2009, 10:02 PM

23ـ شــــــــــــوق

مشتاق ليكي شوق الفات
وخاطرو معاك
ودر من غربتو وسفرو
طمح في قلبو ريدك وكان
سبب في وحشتو وسهرو
يزيد جوّاهو سحر الريد
مع الأيام
قلب حبّاك من جهلو
يخاف كتر البعاد ينسيك
ويزيد من لوعتو ووجلو
***
رصف لي سكتك أبعاد
ورتّب ليك خطاويهو
وبعثر كل حروف الكون
وطوَّع ليك غناويهو

يصارع موجك الريّاد
قدر ما يفيض يزيد فيهو
ولا ليل البعاد ينداح
ولا فجر الوداد جاهو
متين غايب السنين يرتاح
يعاود تاني مرساهو!!

شبارقة

15-06-2009, 10:03 PM

24ـ ضي المدائن

أستميحك فيكي أكتب
مرّة من كلمات غناي
يا دليل خاطري المسافر
نجمة ضوَّت في سماي

من زمن أنا ليكْ بفتِّش
لي دروب بتودي ليكْ
لا المراسي تحن عليَّ
ولا السفن جابتني فيكْ
يا شبارقتنا الحنينة الغالية
مشتاق يوم أجيكْ
أحكي آلام بعدي عنِّك
وكيف دموعي بكت عليكْ

يا وهج ضي المداين
ياحنينة
لو بعدنا أنحن منّك جمعينا
فاض وزاد الشوق علينا
مدّي يدّك واحضنينا

يا ترانيم الأغاني الحانية زي
أصوات جروفك
البعيد الحنَّ ليكي
لي متين يرجع ويشوفك؟؟

شبارقة

15-06-2009, 10:05 PM

25ـ بكاء بصمت

اتململت
من شدة الوجع الدفين
واتوجَّعت
بي كل سكون الكون بكت
واتألّمت
واتحيَّرت ...
شفقانة كان قلب الصغار ما ينفطر
واسترجعت ...
ظنّت بحقها في الحياة

واتذكّرت
زمناً جميل في خاطرا
واتبعثرت كل الحروف
الفي الفؤاد متناثرة
واترددت
في كل سطر من دفترا
واتلعثمت
كل المقاطع والجمل
واتحسّرت ..
لمن نضب حبر القصيد
مات الكلام قبّال يكون
واتشجّعت تكتب حرف
واتوجّلت ...
لما الحروف اتمرّدت

كيفن تكون!!
في سكّة الخوف والشجون!
كيفن تكون والكون يجابد حقّها!
كيفن تكون ما بين بكا الأطفال
ومابين سعدها
كيفن تكون والناس صفوف
من قبلها ومن بعدها
ما اتكلّمت!!

اتسهّدت ..... واتنهّدت
بي كل سكون الكون بكت!
من غير يحس بيها الصغار

ظنّت بأنها ماها روح
وانو التعب ما راح يروح..
واتمدّدت من غير كلام !!!

شبارقة

15-06-2009, 10:05 PM

26ـ تسامحيني بلا أعذار

أهازيج فرحة الدنيا
مسطَّرة في عيون جيلك
وبشر الكون يطل منّك
ويشرق ضي أساريرك
ترانيم الزمن صلوات
ممالك صاغا إكليلك

أفوت منّك تسامحيني
أجيلك منكسر خاطري
تسالميني وتواسيني
وأخت راسي الموجّع من زمن ملتاع
على حضنك
وافرَّغ كل همومي عليك
أشجان غربتي وسفري
أحزان بعدي من عينيك
تعب زولاً مودَّر من زمن مهموم

وتمسحي من عيوني دموع
وتجبري خاطري بي نغماً حنين هدّاي
وتنزعي خوفي من جوّاي
وتنفضي من رجولي تراب سفر طوّل
وافتح خشمي
شان أحكيلك الضنك اللقيتو وراك
ولا أقدر
ويخنقني الحديث والقول
وأغيب عن سكة المعقول
ويتوه عنَّي الكلام يرحل

وافتش عن عذر مقبول
وما أحتاج
تسامحيني بلا أعذار

شبارقة

15-06-2009, 10:06 PM

27ـ انت حبيبي

انت حبيبي إنت
نور عينيَّا كنت
فت بعيد رحلت
وعن دنيايا غبت
ضاع مني البنيتو
وضاع صبراً صبرتَ

انت حبيبي كنت
في أعماقي حتة
وعالم من خيال
بحلم بي عيونك
جنة ريد وفال
يا ما كتير حزنت
وختَّ الشوق وشال
فاض من عيني دمعاً
بلل خدي سال
كلَّ حياتي ليكَ
آمال وابتهال

ذكراك يا حبيبي
ما غابت محال
ويوم ألقاك انت
يكون غاية المنال

شبارقة

15-06-2009, 10:07 PM

28ـ زيــــــــــــــف

صمتك صرخ
بدّد سكونك ورقَّتك

ملفوف عليك شهد الزمن
مصبوبة بالزيف والخداع

صمتك صرخ
قشع الغلاف..

كل اللي كان جواكِ بان
ما كان عشم..
القاكِ في آخر المطاف
موية رهاب

حرمان عليْ
أزرف عليك قطرة دموع
حرمان عليْ أتذكرك

يا فاتحة قلبك مهرجان
منشورة للزيف والخداع
في كل مكان

غايب عليك
انو الأصيل حيظل أصيل
رغم الزمان
وانو النفيس
ما يطولو من لهب الزمان
الا الجمال

شبارقة

15-06-2009, 10:08 PM

29ـ سر غنــــاي

حسيت بأنك جوه في أعماقي كون
يا سر غناي
قبال أشوفك مشتهيك
أتخيلك سر الجمال
سحر البريق
أتأملك فوق القمر
فايقة القمر في رونقك
يا منية ..
مستنيك زمن مترقبك ..

بنت النيل

24-06-2009, 08:01 AM

كلام الشوق
درب مقفول
ولا بتقال
عشان الشوق وصل للحد
وقول الريد
نضم مجنون
مرق من النصاح بالجد
قدر باب الرشاد يفتح
يشوفا عليهو (طق) ينسد

شكرا ليك على الديوان الممتع وياريت تواصل دايما
ونشوفك في التليفزيون

ابوخالد

28-06-2009, 09:52 PM

أروع من الروعة ذاتا ....

أخى / شبارقة مشكور على هاذى اللآلى .....

http://www.w6w.net/album/35/w6w200504131338456874b8b4b.gif

شبارقة

03-10-2009, 04:21 AM

بنت النيل
أبوخالد
أزكى وأندى شكر لأناقة المرور ..

شبارقة

03-10-2009, 04:22 AM

http://www.youtube.com/watch?v=Xj3Hpd_n27w

أشرف صلاح السعيد

05-10-2009, 01:56 AM

شبارقة لك التحية..
يااخى واحدة واحدة عشان نهضم بمزاج ..سكيتنا بالابداع جهجهتنا..
متابعة اولية وتسجيل حضور ولى عودة..

شبارقة

06-10-2009, 09:59 PM

شبارقة لك التحية..
يااخى واحدة واحدة عشان نهضم بمزاج ..سكيتنا بالابداع جهجهتنا..
متابعة اولية وتسجيل حضور ولى عودة..

شكراً كثيراً على هذه الكلمات ...
انتظر نقدك ...

ودتابر

07-10-2009, 11:04 PM

الراااااااائع .. المنداح عشقا .. وموسقة لا تطال .. شبارقة

احتاج لأيام حتى أستفيق من الدهشة التي تملكتني وأنا أسمع احرفك تطن في اذني .. ويتملكني الوجوم فهل أنا أقرأ أم أسمع .. ولكن للأسف لم اكمل القراءة ولي عودة وعودة حتى أكمل إلتقاط هذه الدرر التي نثرتها لنا هنا يا جميل .

وإلي أن تحين لحظة معانقتي لحروفك مرة أخري أتمنى أن أعود وأجد الجديد أيضا مضافا .. فلك التحية والود والتقدير .

خالد علونى

11-10-2009, 12:05 AM

شبارقة
لك كل التحايا وانت ترسم اجمل اللوحات بكلماتك المعبرة
لتدخل في انفسنا تلج عهمق الدواخل بلا إذن تتسرب مثل نسمة الصباح القا وودا وصفاء

شبارقة

11-10-2009, 09:20 PM

الراااااااائع .. المنداح عشقا .. وموسقة لا تطال .. شبارقة
احتاج لأيام حتى أستفيق من الدهشة التي تملكتني وأنا أسمع احرفك تطن في اذني .. ويتملكني الوجوم فهل أنا أقرأ أم أسمع .. ولكن للأسف لم اكمل القراءة ولي عودة وعودة حتى أكمل إلتقاط هذه الدرر التي نثرتها لنا هنا يا جميل .
وإلي أن تحين لحظة معانقتي لحروفك مرة أخري أتمنى أن أعود وأجد الجديد أيضا مضافا .. فلك التحية والود والتقدير .

ود تابر ...
أيها الاديب الرائع ....
دائماً أجدك سباقاً لالتهام الحروف ...
متفرد العبارة ...
بلا شك أنتظر عودتك بشغف ...
كل الود

شبارقة

11-10-2009, 09:23 PM

شبارقة
لك كل التحايا وانت ترسم اجمل اللوحات بكلماتك المعبرة
لتدخل في انفسنا تلج عهمق الدواخل بلا إذن تتسرب مثل نسمة الصباح القا وودا وصفاء

خالد .. خالد ... خالد ...
كالعادة ...
تزورني ... تقرأني .... تفاعلاً و وصلاً كحواف قوس قزح ...
لك مني تحية و صل وود ...

بورتبيل

12-10-2009, 12:12 AM

الفاتق شبارقة

حقيقة وقف الكلام بالجد
وصعب علينا الاشتهاء

ولكن كلماتك دائما تعود بنا الى حيث الفتق الجديد لما جف في اغصاننا

abomazeen

12-10-2009, 01:46 AM

المرهف شبارقة أيها النهر الدافق المنهمر فينا جمال ورقة حرف

هلا جاد علينا هذا القلم مراراً وتكراراً حتى الأرتواء بأخريات من درره

شبارقة

13-10-2009, 01:49 AM

الفاتق شبارقة

حقيقة وقف الكلام بالجد
وصعب علينا الاشتهاء

ولكن كلماتك دائما تعود بنا الى حيث الفتق الجديد لما جف في اغصاننا

ها أنت تطل على اخضراراً كلون الخريف ...
مترع أنت بالانبات والازهار ...
بورتبيل ...
كل الود والتقدير

شبارقة

13-10-2009, 01:50 AM

المرهف شبارقة أيها النهر الدافق المنهمر فينا جمال ورقة حرف

هلا جاد علينا هذا القلم مراراً وتكراراً حتى الأرتواء بأخريات من درره

أبومازن ...
نضاح الحرف متوهج الكلمة ...
اعدك بدوام الوصال ان شاء الله ، كل الود والتقدير والاحنرام ..

شبارقة

08-12-2009, 09:52 PM

ودتابر

09-12-2009, 06:33 AM

ملانة متل حواصل الطير ...
وكت تتراوح الجنحات على طيرا ...
ندية ... رخية ... طيبانة ..
وديعة ... رفيعة ... ست الخير
و قدر يا ستي ما أقدر ... ولا بقدر
اقول حلو الكلام فيكي ...
ولا بي كلْ حروف الكون حأوفيكي ..
حبيبة .. حنينة يا أمي ..

أستاذي .. شبارقة

يا أيها المسكون بالروعة والابداع

كلما تئن ضلوعي .. وتحملني هموم الأيام للكدر والسأم . أجد نفسي هنا . .. أنيخ راحلتي بين سطورك الحنون .. .. أخبؤ عيوني كطفل يبحث عن ملجا امين .. فأنا في لجة الابداع لا أجيد الابحار لبر الأمان .. لأني اتوه بين الحروف .. .. اتوه .. أتوه .. أصاب بإغماءة من فرط التأثر .. .. والغوص في الدسم .

عزيزي .. شبارقة

لقد اصبت في كبد .. فما اعظمها .. وما أروعها .. ست الكل .. أمبراطورة الدنيا .. إنها الأم وكفي ... أسأل الله تعالى أن يجعل الخير كل الخير والبركة في كل أم على قيد الحياة .. وأن يغفر ويرحم لكل أمٍ إنتقلت للرفيق الأعلى .

تقبل مروري .. .. ولكنه ليس الأخير .. فحتما سأعود .. عندما أحس بأنني لجرعة من الدفء الحنون .

شبارقة

11-12-2009, 11:07 PM

أستاذي .. شبارقة

يا أيها المسكون بالروعة والابداع

كلما تئن ضلوعي .. وتحملني هموم الأيام للكدر والسأم . أجد نفسي هنا . .. أنيخ راحلتي بين سطورك الحنون .. .. أخبؤ عيوني كطفل يبحث عن ملجا امين .. فأنا في لجة الابداع لا أجيد الابحار لبر الأمان .. لأني اتوه بين الحروف .. .. اتوه .. أتوه .. أصاب بإغماءة من فرط التأثر .. .. والغوص في الدسم .

عزيزي .. شبارقة

لقد اصبت في كبد .. فما اعظمها .. وما أروعها .. ست الكل .. أمبراطورة الدنيا .. إنها الأم وكفي ... أسأل الله تعالى أن يجعل الخير كل الخير والبركة في كل أم على قيد الحياة .. وأن يغفر ويرحم لكل أمٍ إنتقلت للرفيق الأعلى .

تقبل مروري .. .. ولكنه ليس الأخير .. فحتما سأعود .. عندما أحس بأنني لجرعة من الدفء الحنون .

ود تابر ...
شفافيتك ... وحساسية وترك ....
تدفعني دفعاً لأن أكتب وأكتب ...
كأني ـ وأنت تتابعني ـ على مسرح يحضره ملء أناس الأرض ...
سأكتب ما دمت تنيخ راحلتك عندي ...
كل الود ..

تغريد

16-02-2010, 02:26 AM

شبارقة

عادة امر دوما بهذا البوست كل يوم

يسكرني همسك الدافئ وذلك الصخب الحنون في هذا الرحاب

عد لنا حرفا ينبض بالألفة

ليكون الجنون في هذا النضم الجميل مرتعا لكل الاحبة

تحياتي دوما

شبارقة

16-02-2010, 10:29 PM

شبارقة

عادة امر دوما بهذا البوست كل يوم

يسكرني همسك الدافئ وذلك الصخب الحنون في هذا الرحاب

عد لنا حرفا ينبض بالألفة

ليكون الجنون في هذا النضم الجميل مرتعا لكل الاحبة

تحياتي دوما

تغريد ...
أشكرك على هذا النشاط الجم والمتابعة المستمرة ...
وبصراحة تستحقي وسام الاجتهاد والنشاط بجدارة ...
كل الود ...

تغريد

20-02-2010, 02:05 AM

تغريد ...
أشكرك على هذا النشاط الجم والمتابعة المستمرة ...
وبصراحة تستحقي وسام الاجتهاد والنشاط بجدارة ...
كل الود ...

الثقافي مان عزيز علي القلب وقريب من الروح وكل الكتابات الجميلة ستبقي منقوشة دوما في قلوبنا مهما طال الزمن

يحتاج منا القلب الدافئ والمشاركات الفاعلة الجميلة ولكم عندي متابعة كتاباتكم فه واجب علي كثيرا ما احس بالتقصير فيه

مع ودي شبارقة

ود سعدابى

26-02-2010, 12:33 PM

شبارقة يا باحة نضم مدهش
ويا غنية جد حلوة ويا غمية خريفية

بالجد ابداع حد الامتاع

ولك كل ما يعترينى من فرح

شبارقة

02-04-2010, 11:07 PM

شبارقة يا باحة نضم مدهش
ويا غنية جد حلوة ويا غمية خريفية

بالجد ابداع حد الامتاع

ولك كل ما يعترينى من فرح

الأخ ود سعدابي ...
كل الشكر على راقي عباراتك وأنيقها ....
كل هذا النضم المتواضع أهديه اليك ،،، مع كل الود

فيض التشبع

30-04-2010, 08:01 PM

[/color]]اجد في هذا الميدان الرائع مهرجان جميل من القصائد الجميلة لك التحية والاشادة والتقدير فمن الممتع حقا مشاركة الخواطر والتجارب الانسانية 0000000000كل الامنيات الطيبة

شبارقة

12-05-2010, 09:36 PM

[/color]]اجد في هذا الميدان الرائع مهرجان جميل من القصائد الجميلة لك التحية والاشادة والتقدير فمن الممتع حقا مشاركة الخواطر والتجارب الانسانية 0000000000كل الامنيات الطيبة

و في ما تفضلت به من مداخلة، حشد من الأناقة و زفة من منمقات الحروف ....
لك التحية والتجلة والتقدير ، وأنتظر نقدك ...

كل الود

شبارقة

08-10-2010, 11:28 AM

مرقت تسابق القمرا في الريد والحلا ..
طولا الشمخ ...
سمقت علا ...
و انا قلبي في الريد مبتلى ...
ويا وجعتي الرافقت صيك يا الخلا ...

همسات

08-10-2010, 12:43 PM

اخي شبارقه
لااملك الا ان انحني
احتراما لقلمك
الشفاف الذي يعبر عن مابالدواخل صادقا
دون رياء
فلك التحيه

محمد الجزولى

09-10-2010, 09:21 AM

مرقت تسابق القمرا في الريد والحلا ..
طولا الشمخ ...
سمقت علا ...
و انا قلبي في الريد مبتلى ...
ويا وجعتي الرافقت صيك يا الخلا ...
طال غيابك اخي شبارقة
اشتقنا لنضمك السمح
وحديثك العذب

تغريدا

09-10-2010, 09:04 PM

[quote=شبارقة;311433]1 ـ أنا منك

فرقك من الواطه النعال الدستها
وأنا فرقي من وجعك شبر
يا راضية بالعرق البخر عز الضهر
ما ضقتي راحة البال ... ولا ناموا الجهال
الواطه مدّ الطين ...... عذاب
والسحابات البصبّن
زي عرق راسك خراب
لا قوّمن تيراب شقاك
لا طوّعن قاسي التراب
وأنا منّك انتي .......
من القديمات المشقّقة ...
والهديمات الملتقّة ......
واللقيمات المجهجهه....
في الإديات الرقاق...!
أنا من ضفاف روحك ....
قناعة واغتباط
رغم العدم ....
والضيق ......
وعسر الحال عليك...
رغم الشقا ....
ما طال أساك
شديتي نصّك ....
ومن سفل قدميكِ ... لا شامخ علاك
معطونة في الطين والتراب....
ما قلتي آه من التعب ...
لا أفّ خشمك ..... لا نطق كلمة عتاب
سامع غناك .. جوّاك مرتّب بالنضال
منضومة عزّة نفسي فيك
محمومة بالعزّ والجلال
خليك مع الطين والشقا
ما دمتي في شامخ علاك

أخى شبارقة صباح الخير ونضمك سمح بالحيل والسماحة فى جنون النضمى دا يعطيك العافية