المساعد الشخصي الرقمي

مشاهدة النسخة كاملة : صلاح الجليط



عباس الدسيس
15-06-2009, 10:02 PM
صلاح شاب عزيز علينا لدينا قصص طفولة ممتعه وصحبة زمن كامل بالحي الذي كنا نسكن به شاب خلوق مهذب متوسط الوسامه حكاية الكرش والجلحات دي معذبه شويه لم يفتح الله له ببنت الحلال عشان تقفلا عليهوا داخل قفص الزوجيه السعيد وهو دائم الزيارة لنا بالمنزل ايام العطلات للدردشه وتناول ما يجود به المنزل من وجبات سودانيه.
دائما انا مهموم بعدم زواجه وفي محاولات دائمه ونقاش معه لاكمال نصف دينه وفي فواصل النقاش نطلب من حرمنا المصون التوسط لايجاد عروسه من معارفها بالرغم من محاولات المدام دائما النتائج كانت سلبيه ومن ضمن المحاولات تم مفاتحت احدي سعيدات الحظ بنية صلاح لخطبتها زي كلام كل البنات ما عندها مانع بس قبل الخطوبه لازم اكون في تعارف وبدأت المساعي الجاده من المدام لاكمال حلقة الوصل بعد فترة سألت المدام الحصل شنو في موضوع صلاح صاحبي ؟؟؟؟
قالت لي : البت رفضت
أنا : انتي البت دي مجنونه ترفض اليومين ديل في بت تلقي ليها عريس لقطه زي صلاح راجل خريج قانون مهذب يقدر الحياة الزوجيه كريم ده اهم شيء عند المرأ يعني اصرف بس بدون تعليق... ايوه كريم حكايه والله؟؟؟؟؟
المدام: صلاح قابل البت كم مره كده الزيارة القبل الاخيره جاب ليها كريمات هديه البت زعلت قالت لي متين اتعارفنا عشان اجيب لي كريمات بعدين الكريمات دي هديه ما جميله يعني شايفني غبشاء ولا لوني اسود قلت ليها معليش اصلوا صلاح رجل عفوي ما بقصد حاجه البت مشتا في الزيارة قاصمت الظهر جاء ليهم في البيت شايل معاهوا فواكه انت عارف صاحبك بحب التفاح اغلب كيس الفواكه تفاح.
أنا : مقاطعا زوجتنا العزيزه طيب مالوا الراجل كريم بدل امشي يدوا فاضيه شايل معاهوا فواكه دي فيها شنو البت متحايله بس خليها تلقي ليها عريس هي زاتا ما سمحه وقت لقت زي صلاح ده كانت تكنكش فيهوا......
المدام : انت دائما مستعجل تمسك المواضيع من الطرف تقعد تعوس فيها الكلام ما فواكه ولا تفاح صلاح بعد انا ما حليت ليهوا مشكلة الكريمات الهديه كان بتونس مع البت قال ليها والله الكريمات جابت نتيجه بس بعد ده فضل ليك الرجيم التفاح كويس للرجيم بعدها تخشي طوالي في تقويم سنون.......... صاحبك ده ما بعرف اتكلم ولا اتونس فكني منو بالله عليك احرجنا مع البت......
بعد فترة من خطوبة صلاح جلاطه في احدي الزيارات العائليه شفت لي بت غير متزوجه سالت منها قالوا دي شغاله في مستشفي بتاعت معامل طبيه متوسطة الجمال قلت خلاص دي بتنفع مع صاحبي صلاح نعيد الكره تاني مع المدام بعد نقاش مستفيض تم اقناع المدام بالتوسط بس قالت لي دي اخر مره انت كمان اديهوا درس في التعامل مع البنات واللباقه بعد جلسات متكرره ونقاش مع صلاح اتفقنا الكلام اكون قدر السؤال وعدم الانجراف نحو مواضيع فرعيه لحين انتهاء الخطبه والزواج.... قال لي ما تناقش حكاية الفواكه معاي اصلوا انا راجل كريم ما بمشي لي ناس ايدي فاضيه قلت ليهو كان بقت علي الفواكه هينه.... اتفقنا.......... قلت للمدام خالص احنا جاهزين شوفي شغلك.....
تم ترتيب مواعيد الامور ماشه تمام التمام سألت كم مره صلاح عن مشروع الخطوبه الجديده قال لي البت ماشأ الله عليها عال العال قلنا الحمد لله اخونا موضوعوا سلك.... يوم جمعه صلاح جاينا زيارة معاها غذاء .... قلت للمدام اليوم صلاح جايينا ماشي اجيب ليكم كسره اشتري ليكم ملاح شنو من المطعم السوداني.... قالت لي... ما قلت ليك والله نسيت صلاح خطوبتو ما طرشقت..........
أنا : فعلا زعلت شديد ... البنات ديل جنن ولا شنو صلاح ده عليك الله عيبيهوا لي كمان العجوزه دي متخرجه ليها خمسه سنين تلقيها تفتش للعرس ما لاقيه بعد لقت عايزه تتعزز في ستين صلاح ده اعرس احسن منها مليون مره.
المدام : اولا انا ما قلت ليك انت بتجوط المواضيع ساكت تتلب زي ديك العده بعدين صلاحك ده إعرس احسن منها اشنا منها بعيد مني تاني ما تجيب لي سيرة عرس مع صلاح
أنا : طيب ليه رفضت
المدام: ما رفضت هي رفضت ام البت المره دي...... قالوا امها جات من السودان كانت عيانه حجزوها في المستشفي عندها ملاريا انت عارف حاجه صفيه السكري تاعبا صلاح مشي زياره لي امها حاجه صفيه في المستشفي اكفر ليها بتونس مع امها قال ليها الملاريا مع السكري خطره شديد يا حاجه انا بعرف واحد كان عندوا ملاريا معاها سكري قتلتوا (( جابت اجلوا طوالي للمقابر)) حاجه صفيه قالوا للصباح ما نامت تبكي في المستشفي قالت الراجل ده ما عايزه تاني تشوفوا خالص..........
دق جرس الباب قلت للولد الصغير امشي شوف ده منوا ... الولد طلع في الكرسي عاين بالعين السحريه... قال لي يا بابا ده صلاح تفاح.... ضحكت من كلام الولد اتذكرت عبدالماجد زميلنا في البنك راجل من اسرة فقيره من قري الجزيره كان جاتنا زميله في البنك اسمها صفاء اخوها راجل دفعتنا وصانا عليها... زميلنا عبدالماجد بفتش ليهوا في عروس رشحت ليهو صفاء قال لي دي ما سمحه.... حسب علاقت اخو البت بينا قالت لي في رمضان كلم الزملاء افطروا معانا مشينا للفطور الما خمج ( انناس – لحوم الطيور باشكالها – الفواكه عصائر بانواعها ) البيت خلي ساكت المكيفات ضاربه في راسنا الموكيت تحت كرعينا ناس عايشه عز....... بعد الفطور تاني يوم صاحبنا حول الطربيزه جمب البت لصق مكتبوا لما تم الزواج ......... بعد الزواج سكن مع نسابتوا في بيت العز.... عندها اخواتا متزوجات كلهم في نفس البيت... لاكن البيت ما دار رياضه... اخونا عبدالماجد كل يوم انتهي دوام البنك امشي الغذاء في البيت ........ ناس الجزيره ديل الواحد فيهم قلبوا حار شاف امشي يدينوا فاضيات عيب كل يوم بعد ما اطلع امشي سوق الفواكه اشيل معاهوا كم كيلوا موز المسأله اتكررت كثير يوم هو جاي للبيت اولاد اختا بلعبوا قدام الباب في الشارع من شافوا عبدالماجد جاي عليهم شايل الكيس الاولاد الصغار معاهم البنات قعدوا اكوركوا الموز جاء ... الموز جاء ... الموز جاء ... الموز جاء ... الموز جاء ... اخونا ففننننننننننن جداع كيس الموز طلق ليهم بتهم......

سيد البلد
15-06-2009, 11:16 PM
أول حاجه حبابك الاف والله يا دسيس ياخي
وينك من زمان يا راجل ؟
تعرف زكرتني حكاية الشافع المولود في السعوديه
وطبعاً الشفع هنا مساجين الا ربع , السنة كولها في البيت , وما بطلعوا الا في المناسبات الرسميه شديد , وكان مرقوا بمشوا حتة مقفوله تانيه بس اكبر من الأولى شويه .

فتعرف واحد من الشفع ديل كاره ليك المسأله دي كراهيه شديده اهااااااااا " اهل الولد " قاموا مشوا السودان في الإجازه . هناك حبوبة الولد قالت ليهم :
الولد ده خلوا معاي هنا , يقرا ويقعد يونسني
الجماعه قالوا طالما إنو امهم دي كبيره يقوموا يخلوا ليك الولد

اها اول ايامو كان كاشي من اولاد الفريق , فشويه شويه الود امورو سلكت مع الشفع
بقا يمرق ليك اول واحد الشارع , ماسك الكفر , ولامي البلي , وبقا اوسخ شافع في الفريق

اها في الإجازه طبعاً اهلو بجو من السفر
فيوم الود بلعب مع الشفع العصريه شاف ليك عربية ابوهو الما بتغباهو جايه عليهم
مسك ليك في الكفر وكورك ليك للشفع :
هي اجرو اجرو الناس البسوقوا السعوديه جوووووووووكم ..

عباس الدسيس
15-06-2009, 11:25 PM
ههههههههه والله يا سيد البلد الله اجازي محنك دي جبتها من وين خطيره جد .... شكرا علي المرور والاضافة الحلوه يا رائع واهو جيناكم بعد غربة وشوق وسعدنا بلقياكم يا ناس مدني الحلوين

esmat
15-06-2009, 11:52 PM
العزيز عباس
والله حقيقة اسعتدتنا ومتعتنا بي حكاياتك
الجميلة دي وكل يوم الواحد بقى اقول
يا الله ( عباس ) الليلة عندو شنو

جميل ورائع وسرد قصصي مثير
واصل

خالد أحمد الصول
16-06-2009, 12:13 AM
طولت شديد ما إتكيفت جنس الكيفة دي
وخصوصا الدكاترة قالوا القهوة مضرة مع القرحة
و الله من شدت الكيف قريتها 4 مرات
لك الشكر و الشوق
و نحمد الله أن جعلك بيننا
فلا تبخل علينا
و إنداح
فنحن كلنا آذان صاقيه

عباس الدسيس
16-06-2009, 12:19 AM
esmat- ود الصول .... متشكرين يا الحبان علي المرور مع تقديري وفائق احترامي لطلتكم الحلوه

هيثم عبدالعال
16-06-2009, 12:23 AM
الأخ عباس

شكراً كثيراً طلعتني من حالة قرفة شديدة فضحكت كما لم أضحك من قبل

صلاح ده مبالغة وبتاع الموز عجيييب ياخي
ذكرني أخ يحكى إنو بخيل (جلده) بتردد على أسرة طوالي مدلدل يدينو وكل مره يقول للأب كنت ناوي أغشى السوق أجيب معاي شوية موز وفواكه للأولاد لكن ربنا ما سهل ، الراجل يرد ليهو على سبيل المجاملة ( ما في داعي تكلف نفسك) أخونا وكأنو جاب الفواكه فعلاً ، يقول للراجل بإنفعال ( تكليف شنو ياخي حرام عليك كلها شوية موز وفواكه خلي الأولاد ياكلوا ويستمتعوا ) وكل مره نفس الأسطوانه .

نزار حسن محمد
16-06-2009, 12:39 AM
حباب ود الدسيس حبابك الف
يازول والله طلتك علينا بالدنيا
وحباب صلاح جلاطه ..ودعم الخاج مذكر
يازول تعال كل يوم نحن قاعدين فى انتظارك
ومرحبتين حبابك

عباس الدسيس
16-06-2009, 01:38 AM
حبيبنا هيثم سلامات ومتشكرين للاضافه الحلوه ومروركم الكريم.
حبيبنا نزار سلام وتحيه وحبابك انت الف مع تحياتنا لعزيزنا الحاج مذكر بالاذاعه ومنتدياتها وانشاءالله كل يوم معاكم لما تكرهونا.

محمد عبد الله عبدالقادر
16-06-2009, 04:38 AM
اخونا عبس - سلامات
ربي ما تحرم المنتدى من قلمك
اضحكتنا اضحك الله سنك
واصل طوااااالي

أبوريلان
16-06-2009, 05:17 AM
والله ياعباس قصصك لذيذة شديد ومشوقة إستمتعنا بيها وبي وجودك ، غايتوا عودتنا كل يوم قصة شد حيلك ياعباس حكومة أقصد ياعباس قصة ، وكعب الفطامه ،

أها ما سألتك صلاح صاحبك ده حقو بعد كده تخطب ليهو أنت وتحنك ليهو وتخليهو زول عقد طوالي .

عباس الدسيس
16-06-2009, 08:32 PM
حبيبنا محمد عبدالله الف شكر للمرور مع تحياتي..... ياسر دافيس سلامات يا الحبيب انت بعد تتعود علي حاجه ما بتخليها الله اقدرنا علي فطامتك دي .... ما عندك واحده لي حبيبنا صلاح جاهز مويه ونور انت بس قول لينا احنا بنتم الباقي الف شكر علي المرور