زمااااااااااااااااااااااااااااااااااااااااااااان

[ود النمير]

بسم الله الرحمن الرحيم

بسم الله الرحمن الرحيم


الرائع محمد موسي كان عندما يريد ان يعرج اثناء اتحافه الناس بظريف نكاته الي نكات "المساطيل" يقول والان "نشوف اهلنا ناس الخيال الواسع" ، ولكن صادفت اناس في حياتي لهم خيال خصب اكثر من الذين ذكرهم محمد موسي في نكاته مع انهم ليس لهم علاقه من بعيد او من قريب مع هذه السموم اللعينه "حفظنا الله وعافاهم".


المهم كان لنا ذميل دراسه قابلته في مدرسه الحوش الثانويه ، هذا الشخص كانت له هوايه طريفه في خلق مناسبات للقري من بنات افكاره لم نجد سبيلا الي أعجازه ، فكل ما نسأله عن مناسبه اسم قريه لا يتردد كثيرا في الاجابه فقط يطلق العنان لخياله كي يصيغ له انسب سيناريو يمكن ان يتناسب واسم القريه ، كان يبتدر حديثه بعباره "ذماااااااااااااااااااان" يمدها حتي تظن للوهله الاولي أنه يمتطي "كبسوله ذمن" يرجع بها الي الماضي ثم يعود مسرعا وبحوزته المفيد، والان اترككم مع "شطحاته العجيبه" .


سألناه اولا عن سبب تسميه الفريجاب فأستهل حديثه كالعاده بكلمه "ذمااااااااااااااان" كان يوجد خواجه بالمشروع وفي يوم من الايام مر هذا الخواجه بالحله قبل ان تسكن فقال "this is free gap" ، اها يازول "فري قاب فري قاب" لمن بقت الفريجاب.
قلنا له طيب دلوت سموها دلوت لشنو فرد لنا قائلا "ذماااااااااااان" كان في شيخ حله عندو بنتين ، وفي يوم من الايام جاءه ابن اخيه طالبا احدي بناته وكانت الاولي تجلس في "البرندا" والثانيه داخل " الاوضه" فذهب شيخ الحله اولا للبنت التي تجلس في البرندا واخبرها برغبه ابن عمها ولكنها رفضت فتركها وذهب لاختها "داخل الاوضه" فاخبرها بالامر فقالت " لشنو انا ماتمشي لفلانه " تقصد اختها فرد لها ابوها قائلا : دي الوت بمعني رفضت ، اها يازول "دي الوت دي الوت " لمن بقت دلوت.
اعترف بانه بدا يتسرب الياس في نفوسنا بانه لايغلب حيله ولكننا قلنا لا بأس لنجرب مره ثالثه فسالناه لماذا سميت "الرميتاب" بهذا الاسم ، فابتدر حديثه كما تعلمون جميعا بكلمه "ذماااااااااااااان" كان في خواجه في المشروع سئ الخلق يعامل المزارعين بفظاظه ويسبهم ويشتمهم حتي جاء ذلك اليوم الذي جاء فيه شخص من احدي القري ليقطن تلك القريه بالمشروع ليمتهن الزراعه ، وفي اول يوم ذهب فيه للمشروع قابله الخواجه وبدأ يمارس عليه سطوته وجبروته فما كان من هذا الشخص الا ان" شال الخواجه ده وبردلب جابو الواطه" وعلقو ليك علقه جد، ومنذ ذلك اليوم اصبح لايتعرض لاي أحد من المزارعين فسمي هذا الخواجه "بالرمو تاب" اها يازول "الرمو تاب الرمو تاب" لمن بقت الرميتاب!!


تخريمه : ام دقرسي سموها ام دقرسي لشنو ؟؟!!

[بت أم درمان]

بسم الله الرحمن الرحيم



تخريمه : ام دقرسي سموها ام دقرسي لشنو ؟؟!!

زميلك دا ظريف لكين

غايتو الناس البكون خيالهم واسع ديل
بكون الحديث معاعهم ممتع جدا
لانهم بكون حكايين جنس حكي
مشكور على الموضوع

رد التخريمة : اها هسي ناديهو لينا يورينا ام دقرسي لي سموها كدا ليه

[عباس الدسيس]

ود النمير يا الحبيب يا ظريف موضوعك في السلك يعني حلو ام دقرسي خليها بس ما تفهمني غلط لانو اسمي داخل في الموضوع قرية الحشرو عباس ليه سموها كده

[ود النمير]

زميلك دا ظريف لكين

غايتو الناس البكون خيالهم واسع ديل
بكون الحديث معاعهم ممتع جدا
لانهم بكون حكايين جنس حكي
مشكور على الموضوع

رد التخريمة : اها هسي ناديهو لينا يورينا ام دقرسي لي سموها كدا ليه


بسم الله الرحمن الرحيم

بت ام درمان فعلاً الناس الزي ديل بكونوا ممتعين وظريفين
ياريت لو في طريقه الاقيهو عشان ادعيه يسجل بمنتدي ود مدني ويفسر ليك ولي
اسم القريه دي !! ما اظنو يغلب حيله!
لكن كدي خليني احاول ليك يمكن اقدر احبك لي سيناريو

[ود النمير]

ود النمير يا الحبيب يا ظريف موضوعك في السلك يعني حلو ام دقرسي خليها بس ما تفهمني غلط لانو اسمي داخل في الموضوع قرية الحشرو عباس ليه سموها كده


بسم الله الرحمن الرحيم

دي بتحتاج نجيب ليها صاحبنا داك بلقا ليها حل!!
الله لا جاب الفهم الغلط لكن ناس الحله ديل مالقو ليهم اسم غير دا ياكافي البلا!!
لكن مامشكله نوقفك في الصف مع بت ام درمان لحدت مانلقي لينا سيناريو
تشرفت بمرورك الكريم

[أبوريلان]

ود النمير يا الحبيب يا ظريف موضوعك في السلك يعني حلو ام دقرسي خليها بس ما تفهمني غلط لانو اسمي داخل في الموضوع قرية الحشرو عباس ليه سموها كده




دي ياعباس الرئيس نميري الله يرحموا حلف عليهم طلاق وغيروا أسمها


وأصبحت ( حلة عباس )

[ود النمير]

دي ياعباس الرئيس نميري الله يرحموا حلف عليهم طلاق وغيروا أسمها


وأصبحت ( حلة عباس )

بسم الله الرحمن الرحيم
بمناسبه النميري دي ياياسر قالو النميري الله يرحمو مشي مايرنو عندو لقاء جماهيري وشبكم ليك بنعمل ليكم مركز صحي ولا في زول هببو ليهو قال ليهم حنعمل ليكم شارع زلط ها ولا قالو ليهو انت بتقول في شنو في واحد من حراسو قال ليهو الناس ديل بحبو السمك شوف ليك اي حاجه عندها علاقه مع السمك !! ، قام قال ليهم بنعمل ليكم بير تنبع سمكاً بلطي !!الجماعه كلهم كوركوا "يعيش نميري يعيش نميري"!!

[عمرسنهوري]

بسم الله الرحمن الرحيم



تخريمه : ام دقرسي سموها ام دقرسي لشنو ؟؟!!

زولك رهيب شديد وفعلا خيالو واسع
اما موضوع ام درقرسي دا برجع ليك لي صاحبي من ام دقرسي

[عمرسنهوري]

بعض التسميات
الكريبه
سميت بذلك الاسم لانها (زمااااااااااان) كانت تنمو فيها حشائش تسمى الكوريب
بيكه قالوا (زمااااااااااااااان) كان في زول نايم تحت شجره
ولحدي الزمن داك بيكه ما كان عندها اسم
جا عربي ثقيل نزل من الحمار وبدا يلكز في الزول
يا زول يا زول ( طيير ليهو النومه من عينو )
الزول قام من نومتو زهجان قال ليهو مالك يا زول في شنو ؟؟؟
داير مني شنو ؟؟؟
العربي قال ليهو القريه دي سموها شنو ؟؟؟؟
قال لي بي زهج واستياء سموها بيكه ( يقصد سموها على اسمك )
اها من اليوم داك بقى اسمها بيكه

[عمرسنهوري]

ود الدسيس
الدسيس سموها كدا ليه
بعدين في اتنين دسيس واحده في المناقل والتانيه مدني
ورينا سبب تسمية كل واحده

[عباس الدسيس]

حبيبنا ود سنهوري اولا الدسيس ثلاثه اضيف ليك واحد ثانيه بعد الشريف الدسيس بتاعت الجزيره والمناقل في واحده في الفاو اصلا الدسيس كان اسموا يوسف مشاكل الخليفه عبدالله التعايشي مع الاشراف في المهديه طلعوا سواء اولاد الاعم الشريف يوسف الهندي والشريف يوسف ود العبيد كانو الاثنين اسمائهم يوسف يوسف الهندي قعد في منطقة البرياب ويوسف ود العبيد قعد في منطقة الدسيس وتم تغيير اسموا من يوسف للدسيس وهي تعني الشيء النفيس الغالي الثمن كما تم معادلة اسم يوسف باسم الجلاله باحرف ابجد حتي يتم تغيير الاسم طلع ليهم الدسيس عشان ما يكون في لخبطة اسماء اما الاماكن الاخري والتي سميت علي اسم الشريف الدسيس كانت لبعض طلاب القران مع الشريف الدسيس من تلك المناطق وهي المناقل والفاو بعد ختم القران ورجوعهم لاهلهم قاموا بانشاء خلاوي قران في مناطق جديده لا تبعد كثيرا من مناطقهم وسميت علي الشريف الدسيس ويلاحظ ان الاشراف عند هجرتهم من امدرمان كانت مناطق سكنهم قريبه من بعض علي حدود النيل الغربيه ومشروع الجزيره حتي مدينة كركوج الشريف محمد الامين والذين سكنوا شرق النيل مناطقهم لاتبعد كثيرا مثل ود الابيض وغيرها بشرق النيل اما الشريف الدسيس فتبعد عن مدني 27 كيلوا علي طريق مدني سنار .... هذا باختصار يا ود سنهوري

[moh_alnour]

صاحبك دا يا ود النمير فات الطيب محمد الطيب و إبراهيم البُزعي و عبد المطلب الفحل
و بي شوية ممكن يعمل ليهو طبقات زي طبقات محمد النور ضيف الله
و بمناسبة الأسماء دي من أكثر الأسماء التي تجد هوا ً و إعجاب في نفسي أسم
( كِتير العوامرة ) و ( تريعة البجا ) و ( اليعقوباب ) و ( طابت الشيخ عبد المحمود )
مشاققة : ياخي زمااااااان دي شكت و بكت من كتابتا ( بالذال ) بدلا ً عن ( الزين ) ;)

[مدنيّة]

بوست متعة ياود النمير
لكن سؤال
زماااااااااااااااااان دي وسيناريو الاسامي
حقيقي ولا خيال
عشان الاختساس وكدا :cool:

[بت أم درمان]

مشاققة : ياخي زمااااااان دي شكت و بكت من كتابتا ( بالذال ) بدلا ً عن ( الزين ) ;)


ياخ مشاققتك دي كتلتني بالضحك:p


كدي صلحها ليهو النبي

[طائر النورس]

مشكور ياااولدنا على البوست الجميل ده

طيب ماتسالوا لي عن (دردق و مارنجان و عووضة وبانت وحي الصقور ) السوق وبالعكس

[خالد أحمد الصول]

حليمة من قبيلة الشايقية ... كان لها ولد واحد و يسمونه في ذاك الزمان و بلغة الودع الويحيد .. تركها زوجها ليطفش في جهه غرب السودان و يمكث هناك طويلا فتنقطع أخباره إلا من خبر غير مؤكد يقول أنه قد تزوج غرباوية بعد أن قامت بكتابتة في برمة روب شربها عن أخرها فتخلف من زميلة و إنقطعت أخباره .. كان إبن حليمه هو آخر ما بقي لها في دنياها و خصوصا أنها تزوجت بزوجها في دار الشايقية دون رضا أهلها فقاطعوها و طردوها فأتي بها زوجها الي بلده و التي كانو لا يعرفون لها إسما ... في بلد و السلام ... كانت حليمة تخاف علي ولدها الوحيد خوفا شديدا لدرجة الجرسه الشديدة إذا تأخر مع أقرانة في لعب الكرة أو الذهاب الي الحواشات ... فكانت حينها تبدي جرسة وأضحة لانها تعتبر نفسها غريبة عن تلك الديار و لا ملجاء لها إلا إبنها ... فكان كل الناس تشير لابنها و تقول (أم دة جرسه) و تناقل الناس الخبر و تنادوا ليروا أم الجرسة فصار علي كل لسان أم دة جرسة ... أم دة جرسة حتي حرفها الناس بعد موتها الي أم ده قرسي فصارت أم دقرسي أسما يطلق علي تلك البقعة التي تسكنها حليمة

[moh_alnour]

كدي صلحها ليهو النبي

النبي عزيز عليه أفضل الصلاة و التسليم
صلحتا العنوان لكن البوست كان صلحتو ود النمير دا بصلتو محروقة ;)
http://www.wadmadani.com/vb/showthread.php?p=313517#post313517
ما عايزنوا يزعل مننا ;) ولا يمكن نايم فوق رأي و قاصد يكتبا بالذال

[عباس الدسيس]

ود الصول اتم ليك حكاية الراجل الطفش ومشي الغرب اتزوج هناك بعد كتبوهوا غي برمة الروب شرب الروب بعد ما شرب الروب قالوا المرأة الكتبتوا علقت البرمه في مشلعيب فيهو الكتابه في راس القطيه واخونا بعد داك قعد مع الزوجه الجديده عشرين سنة ولد منها اولاد وبنات ما جايب لي اهلوا خبر يوم اولادوا اشكلوا واحد من الاولاد عايز اضرب اخوهوا بي عصايه جدعا فيهو ضربت البرمه الفوق فيها الكتابه وقعت في الواطه طاخ........ عمك كان نايم قام مخلوع قال ليهم انا وين .... طبعا بعد البرمه اتكسرت ادفق فيها باقي العمل من ديك وجاء راجع لاهلوا..... حسب رواية الولاده

[ود النمير]

صاحبك دا يا ود النمير فات الطيب محمد الطيب و إبراهيم البُزعي و عبد المطلب الفحل
و بي شوية ممكن يعمل ليهو طبقات زي طبقات محمد النور ضيف الله
و بمناسبة الأسماء دي من أكثر الأسماء التي تجد هوا ً و إعجاب في نفسي أسم
( كِتير العوامرة ) و ( تريعة البجا ) و ( اليعقوباب ) و ( طابت الشيخ عبد المحمود )
مشاققة : ياخي زمااااااان دي شكت و بكت من كتابتا ( بالذال ) بدلا ً عن ( الزين ) ;)


بسم الله الرحمن الرحيم

لا لا ده صاحبي ده كائن خرافي!! ، قلت ليك لزول ده مابتلفت للكلام !! وازيدك من الشعر بيت هو زاتو صدق السناريوهات دي!!
هسي في داعي لكشف الحال ده ماكان تصلحها وتتخارج ههههههه
شغلتك دي زي واحد جيعان جاء ليهو لي راعي بتاع ضان قال ليهو "اجزرني " أضبح لي يعني بهيمه فقام قال ليهو امش الزريبه جر ليك اي بهيمه من اضانه قام جر "كلب الحراسه" ومشي بيهو !!
سعدت بمرورك نحله منتديات ود مدني محمد نور

[ود النمير]

بوست متعة ياود النمير
لكن سؤال
زماااااااااااااااااان دي وسيناريو الاسامي
حقيقي ولا خيال
عشان الاختساس وكدا :cool:

بسم الله الرحمن الرحيم

ماقلنا من البدايه الكلام ده كلو خيال يعني دي ماالمناسبات الحقيقيه لهذه القري ، شطحات سااكت من صاحبنا ده

مدنيه تشرفت بمرورك الكريم

[ود النمير]

ياخ مشاققتك دي كتلتني بالضحك:p


كدي صلحها ليهو النبي

بسم الله الرحمن الرحيم

اقعدي انتي قرقري لي كدي لمن تشقك يوم ضحكه!! ههههههههههه"بدل الابتسامات طبعاً" مامفعله لي اعمل شنو!!

[ود النمير]

مشكور ياااولدنا على البوست الجميل ده

طيب ماتسالوا لي عن (دردق و مارنجان و عووضة وبانت وحي الصقور ) السوق وبالعكس


بسم الله الرحمن الرحيم

طوالي ياطائر النورس بس خليني الم لتلفون ليهو وبجيك بالخبر اليقين!!
تسلم علي المرور ياملك

[ود النمير]

حليمة من قبيلة الشايقية ... كان لها ولد واحد و يسمونه في ذاك الزمان و بلغة الودع الويحيد .. تركها زوجها ليطفش في جهه غرب السودان و يمكث هناك طويلا فتنقطع أخباره إلا من خبر غير مؤكد يقول أنه قد تزوج غرباوية بعد أن قامت بكتابتة في برمة روب شربها عن أخرها فتخلف من زميلة و إنقطعت أخباره .. كان إبن حليمه هو آخر ما بقي لها في دنياها و خصوصا أنها تزوجت بزوجها في دار الشايقية دون رضا أهلها فقاطعوها و طردوها فأتي بها زوجها الي بلده و التي كانو لا يعرفون لها إسما ... في بلد و السلام ... كانت حليمة تخاف علي ولدها الوحيد خوفا شديدا لدرجة الجرسه الشديدة إذا تأخر مع أقرانة في لعب الكرة أو الذهاب الي الحواشات ... فكانت حينها تبدي جرسة وأضحة لانها تعتبر نفسها غريبة عن تلك الديار و لا ملجاء لها إلا إبنها ... فكان كل الناس تشير لابنها و تقول (أم دة جرسه) و تناقل الناس الخبر و تنادوا ليروا أم الجرسة فصار علي كل لسان أم دة جرسة ... أم دة جرسة حتي حرفها الناس بعد موتها الي أم ده قرسي فصارت أم دقرسي أسما يطلق علي تلك البقعة التي تسكنها حليمة

بسم الله الرحمن الرحيم

ود الصول دي شطحه زري شطحات صاحبنا داك ولا قصه حقيقيه !!
علي العموم ابداع في كل الاحوال
وتشرفت بمرورك الكريم

[ود النمير]

النبي عزيز عليه أفضل الصلاة و التسليم
صلحتا العنوان لكن البوست كان صلحتو ود النمير دا بصلتو محروقة ;)
http://www.wadmadani.com/vb/showthread.php?p=313517#post313517
ما عايزنوا يزعل مننا ;) ولا يمكن نايم فوق رأي و قاصد يكتبا بالذال

بسم الله الرحمن الرحيم

الله لا جاب الزعل يامحمد نور ، طيب انت مالك مقومني من رقدتي السمحه دي !!هههههه

[ود النمير]

ود الصول اتم ليك حكاية الراجل الطفش ومشي الغرب اتزوج هناك بعد كتبوهوا غي برمة الروب شرب الروب بعد ما شرب الروب قالوا المرأة الكتبتوا علقت البرمه في مشلعيب فيهو الكتابه في راس القطيه واخونا بعد داك قعد مع الزوجه الجديده عشرين سنة ولد منها اولاد وبنات ما جايب لي اهلوا خبر يوم اولادوا اشكلوا واحد من الاولاد عايز اضرب اخوهوا بي عصايه جدعا فيهو ضربت البرمه الفوق فيها الكتابه وقعت في الواطه طاخ........ عمك كان نايم قام مخلوع قال ليهم انا وين .... طبعا بعد البرمه اتكسرت ادفق فيها باقي العمل من ديك وجاء راجع لاهلوا..... حسب رواية الولاده


بسم الله الرحمن الرحيم
عباس الشريف حقيقه أثريت البوست بأضافاتك المتميزه والمرحه
مانعدمك ياحبيب

[مجتبى ودشوين]

غاب عن الديار الشايقي الذي كانت يتملكها بغير وجه حق ولم يعد حتى الآن فسميت القرية (الشايقاب)

[خالد أحمد الصول]

كان هناك شيخا كبير السن أراد أن يتزوج بأخري بعد زوجاته الثلاثه ... فكان كلما طلب بنت أحدهم للزواج تنصل منه بحجة أنها عايزه تقرأ ..ز أو هي وحيدة أمها و أمها عيانه ... أو هي المسؤله عن رعاية الماشية الاغنام ... و لم يكن حينها يعرف أنهم ما تعللوا من طلبة إلا لسببين أولاهما أنه قليل المال و الثاني أن نظره مطشش أي لا يري جيدا ... فدله صحابة علي قرية بعيده علي يعرفون لها إسما تقع في منطقة جنوب الجزيرة قريبة من قرية الحداد ... فأسرج راحلته و سافر طالبا الزواج من أحدي بنات القريه ... و عند وصوله الي ديوان شيخ الحلة تم إستقباله إستقبالا جيدا و بعد تقديم واجب الضيافة سأله العمدة عم مطلبة ... فأخبره بأنه يريد له زوجة من هذ القرية ... فإنصرف منه الناس لما يبدو عليه من مظهر الفقر ... و ما وجد العمدة مخرجا إلا في بريقع و هو رجل شيطان من سكان القرية فأرسل في طلبه و عندما وصل بريقع سريعا أخبره العمدة بما ينوي هذا الرجل ... فرحب بريقع بالرجل و أخبره بأن طلبك عندي ... و مشي معه ليري عروسته ... فكان كلما أدخله من باب أخرجة من أخر ... فيقول له الرجل هل و صلنا فيقول له بريقع ... عقب باب (أي هناك باب ثاني) و عقب باب عقب باب حتي تعب الشيخ تعبا شديدا و رجع حال سبيله ... فسأله مواطنوه كنت وين قال ليهم كنت في عقب باب ... فصارت إسما لتلك القرية بعد أن تم تحريفها الي يعقوباب فصارت اليعقوباب

[عباس الدسيس]

ود الصول والله دي قلبت فيها هوبا