مأسي الصالح العام

[عباس الدسيس]

بدأية رحلة تدهور النظام الاداري في السودان كان ذلك في عهد مايو ايضا في بدية الانقاذ تعرضت الخدمة المدنية والعسكريه بحملات الصالح العام مما ادي الي تدهور النظام، وهو النظام الذي ساهم في بناء انظمة الكثير من الدول المجاورة قبل ان تطاله أيدي المخربين من الانظمه المتعاقبه كما ساق البلاد بدون فكرة محددة فوصل بها الى حدود الانهيار واصبحت الوظائف يتم التعيين بها حسب الانتمائات السياسيه وليس بالكفاءات، كما ان المحالين للصالح العام او اي مسمي اخر وحالفهم الحظ للهجرة والاغتراب نجدهم متميزين في وظائفهم الجديده وذلك للكفاءه ... اما الحالات المأساويه لافراد ليس لديهم المقدره للهجرة والاغتراب والعمل خارج الوطن فهؤلاء انتهجوا مهن هامشيه اخري بالوطن لمواصلة الحياه في وطن جار عليهم وعاملهم كالغراباء وكما معرف ان ملف الصالح العام كان بيد الراحل مجذوب الخليفه اذ هو الاخر فارقنا بالصالح العام الإلهي..........
كان معانا المدير المالي للاقليم رجل جبان بصوره غريبه مشينا الدويم ماموريه في بنطون الدويم نزلنا من العربيه كنا بنتونس انا والسواق بعد شويه جانا واحد لابس لبسه سفاري اتكلم معانا ومشي... صادف في البنطون معانا عربية المحافظ المدير المالي شاف الراجل بتاع البدله السفاري اتكلم معانا وهو لديه حاسه بتاعت شم عجيبه لاعضاء الامن وناس النظام علي طول جاء علينا قال للسواق موجه كلاموا ما عايز اصطدم بي انا .... الراجل ده جاء قال ليكم شنو... السواق قال ليهوا الراجل ده سواق المحافظ قال احتمال عربية المحافظ تقطع وقود عايز مننا جالونين عباس رفض ليهوا قال ليهوا انت سواق محافظ ما عارف عربيتك بتقطع ولا ما فيها وقود بعدين الوقود المعانا ده ما ملكنا ما عندنا حرية التصرف فيهو عشان كده ما بنديك.... اول مره اشوف صاحبنا المدير المالي انتفض كده قال ليهو يا سواق العظمه عباس ده خليهوا انت شفته ليك سواق شالوا الصالح العام كان عباس متهور انت تبقي زيو ما تقول لي انا كان عايز البرميل انا بديهوا ليهوا في اللحظه دي البنطون وقف والراجل نزل بي عربية المحافظ قال ليهوا خلاس غطستوا حجرنا......... الصدف الغريبه كان جبت لي واحد كهربجي بشتغل لينا بعض الاعمال الاكهربيه في البنك بالمقطوعيه قلته الراجل نستفيد منوا نعينوا عامل معانا في البنك مره واحده اشتغل لينا الكهرباء يعني نضرب عصفورين بحجر الراجل وافق علي الفكره كان متحمس ليها وفرحان جدا المشكله بتاعتوا بتعاطي الخمر (( يعني بسكر شديد)) قلته ليهو بس اهم شيء تخلي شراب العرقي اعتقد انو كان شرط صعب ليهوا لاكن عشان اتعين في البنك وافق عندوا مشكله اخري وهي بسيطه اخونا كان بتمتم (( اقطع في الكلام)) رفعنا ورقوا للتعين .... قال خلي شراب العرقي بالاضافه الراجل كان محبوب بالبنك خلق صداقات مع العاملين وبالاخص المدير المالي الجبان بتاع البنطون الراجل تحت تحت كان برسل الكهربجي للعرقي بشربوا سواء لما جاء كشف الصالح العام المدير المالي شالوا قبلنا من الخدمه بي كم يوم كده ... كان عندنا شغل في المكيف رسلته المراسله للكهربجي مع الصباح جاني في المكتبي بايته معاهو طينه راسوا ملان شاش فيهوا اثار ضرب سألتو:
احمد اخوي ده شنو الفي راسك ده
قال لي : دي شكله امس مع ابو خطيبتي كان عندنا حفله في الحي خطيبتي قالت ماشه قلت ليها كويس.... مشيت انا لي صاحبك المدير المالي الشالوهوا من البنك اكفر ليهوا لقيتوا زهجان قال لي ارح وريني ست العرقي اصلوا بعد ده وقت شالونا نجيبوا برانا مشيت معاها جينا راجعين حلف علي اشرب.
انا: طيب انت ماقلته خليت الشراب
هو: والله امس شربته لانو ملح (( يعني بدون فلوس))
انا: طيب الفلقك شنو
هو: بعد راسي اتملاء عرقي مشيت الحفله لقيت خطيبتي لابسه قصير زعلته شديد مشيت نص البنات قلته ليها تقومي تمشي البيت ما تقعدي بي طريقتك دي كان ما قمتي بجرك من شعيراتك ديل وانا سكران طينه البت خافت طلعت مشت بعد شويه قلتا الحقا حسب السكره الفي راسي اقول ليها غيري الفستان تعالي تاني ناخذ لينا رقصه رقصتين معاها.... مشيت ليهم في البيت لقيت ابوها راقد في العنقريب سلمت عليهو قعدته في عنقريب جنبو قلته اقول ليهواالحكايه بالله الراجل ما شهدني قام علي حيلوا دنقر تحت عندوا عكاز شالوا وقع فيني ضرب في الراس كان ما الجيران كان قتلني.
انا: طيب انت وقتين قام ودنقر شال العكاز انت الوقت ده كلوا منتظروا ما كان تجري
هو: انا كنت قايلوا عايز اشيل العكاز حسب السكره الفي راسي قايلوا عايز اشيل الابريق
انا : طيب بي تفلقك ده وسكرك ده اشغلوك في البنك كيف
هو: ياخوي الحمد لله الذاتو ما شغلتني كان حسي ابقي علي ثلاثة زي ما قال المدير المالي لما انا غشيتوا اليوم الصباح قال لي عباس ده اختا شالني انا بي جالون بنزين في البنطون انت كان قبضوك بي جالون عرقي اقطعوا رقبتك والله كلاموا صاح حسي كان بقوا علي ثلاثة ما اثنين بعد خطيبتي فسخت الخطوبه ... ابوها دقاني .. الثالثه ناس البنك كان شالوني الصالح العام بقيت ابكي بعد اسكر بالليل زي المدير المالي بتاعكم ....... خلينا كده اخوان وينوا مكيفكم الخسران.
ونواصل حكايات الصالح العام..............................

[عبدالله محمد العقاد]

الرائع ود الدسيس

اطيب التحايا واجملها

و الله ضحكتني بسردك الرائع للوقائع و في انتظار المزيد

تحياتي

[عباس الدسيس]

شكرا حبيبنا العقاد علي المرور

[esmat]

سرد جميل ورائع ومرتب
(بي طريقتك دي غايتو يوم بتقتل ليك زول)

(ومديركم دا في البنطون كان عايز اكسر تلج من نوع اصلي لكن ما اديتهوه فرصة)

[أبوريلان]

شكراً يا دسيس
ناس البنك الزراعي طلمبتهم وين ؟

[الجندي المجهول]

غايتو يا عباس حكايتك حكاية لكن سردك مبالغة ولا ازيعك سراً اذا امنى نفسي بجلسة معك ( طبعا من غير كسير تلج) لاستمتع بالقصص الجميلة العندك دي

طيب شوف حكاية جاري مع الصالح العالم في العام 1991م في نصفه الاول تقريبا وانا يادوب خاشي الثاوني العالي برلوم (شوف كيف الفرق بيني وبين مهدي الععجوز ) كان لي جار رجل طيب يعنمل موظف في بنك الخرطوم وكنت ذاهب غليه لفتح حساب وتأجل ذهابي إليه من يوم الاربعاء إلى السبت بسبب زواج ابن عمي بالخرطوم ولما حضرت يوم السبت من السوق الشعبي طوالي مشيت البنك وكنت بعرف بعض من الموظفين الموجودين فسألتهم فين عم فلان ( قالوا لي) شالوه الصالح العام غايتو والله والله والله حقيقي الانقاذ ظلمت الناس دي ظلم الحسن والحسين واليوم وبكرة وبعدو بتمنى زوال هذا النظام الفاسد

تخريمة --------------
سبحان الله ما ملاحظين حاجة يا جماعة كل من له صلة او سلطة في الانقاذ ومات ( الموت لم يكن طبيعي ) كلها عبارة عن حوادث ( اهي دعواتالمظلومين) ام غضب السماء ام مؤمرات داخلية وتاني ازيد ( اللهم اجعل كيدهم في نحرهم ) امين يا رب العالمين

[عباس الدسيس]

حبيبنا عصمت شكرا علي المرور يا رائع.
يا ود الاستاذ حكاية الطلمبه دي حكاية غريبه زي ما وعدتك بجيك راجع ليها بعدين هي وضبح الكديسه ولا نسيت.
الجندي يا رائع شكرا علي الاضافه وفعلا ظلم ومأسي انا بنزل ليك نماذج هنا تاني خليك معاي عشان تشوف ظلم الناس دي كيف اسر اشردت وظواهر اجتماعيه غريبه نتيجة الصالح الخاص وسوف نواصل ............

[عباس الدسيس]

كما اسلفنا انه لاتوجد معايير فنيه واكاديميه للاحاله للصالح العام او اي مسمي اخر الغالب السياسي هو المعيار دون مراعاة الي النواحي الوطنيه وهي سياسة تمكين لمن يحمل فروض الولاء والطاعه وان كان معاكم معاكم.
كنا اسره تتكون من خمسه بنات وثلاثة اولاد الوالد فضل المعاش الاختياري كان يعمل بالشرطه.... متزوجه بنت واحده بقية البنات في مراحل دراسيه مختلفه الثانوي والجامعات احد الاخوان يدرس بالجامعه والاخر يعمل موظفا بالحكومه ايضا ليس له اي اهتمامات سياسيه الناس البتعرفني كلها متوقعه يشولوني من الوظيفه عامل زمن لاكن دائما تأتي الرياح بما لا تشتهي السفن .... بالرغم من ان اخي مساهماته في الاسره لا تقاس بمساهماتي الماليه الا انه يغطي بعض الحوجه... يوم بعد انتهاء الغذاء بالمنزل وعاده يتم بحضور كل افراد المنزل اخوي قال لي نشرب الشاي بي الصالون انا عايزك في موضوع مشينا الصالون وبدون مقدمات طلع لي ورقه سلمني ليها فتحت الورقه للاطلاع للمفاجأة الورقه كانت خطاب صالح عام لاخوي لم تتملكني الدهشه قلت ليهوا ده شنو يا الحبيب الرد كان منو بتعابير محزنه من خلال الوجه قلته ليهوا انا منتظر خطابي تجيب انت خطاب حكاية عجيبه لاكن اقول ليك الموضوع ده بيني وبينك الحاجه دي عندها سكري وضغط خلي انا بطريقتي بقول ليها الخبر .
في الخليج العربي دائما في لقاء الاخوه اول حاجه بسأل عنها الاخ شقيقه (( عسي الوالده بخير)) ذلك ناتج عن التصاقهم الشديد بالوالده اذ معروف الخليجين لهم عادة تعدد الزواج احنا طابع الحنيه ماخذنا بدون تعدد زواج الوالد .... الحاجه رغم عن شقاوة الاقدار وجور الزمن لاكن هي شخصيه ظريفه تحب الضحك كنت دائم الجلوس معها قلته اوصل ليها بقالب جميل حكاية خطاب اخوي ومرة واحده اقدم تمهيد لموضوعي انا الما تم لسع.... كنت جالس معاها ليلا نتونس سواء والتلفزيون فاتح فيهو ساحات الفداء قلته ليها يا حاجه ناس الحكومه ديل قالوا عندهم حاجه اسمها الصالح العام... قالت لي يعني شنو ... قلته ليها مثلا في مصالح حكوميه الناس الشغالين اكثر من الحوجه بدوهم خطابات انهاء خدمه بعد فترة بشغلوهم في اماكن تانيه ... قالت لي يا ولدي زول اشيلوهوا كيف اشغلوهوا تاني... لاكن يا ولدي زكرتني زمن نميري ابوك كان في الشرطه كل يوم بجي البيت في المواعيد الساعة اثنين ونص يوم اتاخر عن المواعيد البجي فيها البيت انا قلقته والفار قعد انقز في عبي قلته الشريف ده الاخروا شنو انشاء الله خير الله احلنا من حكومة نمير دي كل يومين انقلاب ما خليت زولا في الفريق ما سألتوا ابوك جاء الساعه عشره بالليل زهجان انا من شفقتي من شفتوا قلت الحمد لله سألتوا قبل ما ارتاح من الباب الشريف مالك اتاخرته كدي قال لي عندنا تطهير النميري طهر الجنوبين .... قلته في قلبي النمير ده شكيتوا علي الله حسي مأخر الراجال ديل لي نص الليل عشان اطهر الجنوبين ما كان اخليهم غلف ساكت الحكومه دي خلاس كملت شغلا جابت ليها موس قعدت تطهر في الرجال .... الله اجازي محنك يا عباس يا ولدي وقتين بعد داك فهمت الحكايه الضحك قتلني .... ما تقول يا ولدي تطهير شنو صالح عام ... في اللحظه دي زي ما قلته كان في ساحات الفداء صادف في البرنامج عن عرس شهيد ووالدت الشهيد جابوها ترقص قلته دي فرصه كويسه ... قلته ليها يا حاجه شوفي المرأة دي ترقص كيف ولدي مات في الجنوب ..... طبعا هي مندهشه للحاجه الحاصله قداما في التلفزيون كانت راقده في السرير قعدت لي حيلا ... ام الشهيد في التلفزيون ادوها المكرفون تتكلم بعد اتكلمت عن ولدا المات رفعت يد ولدا الثاني قالت انشاءالله ولدي ده ذاتوا امشي الجنوب... عاينت للوالده عايز اعلق ليها عن الفدائيه دي وقوة المرأة دي واخش في الصالح العام لقيتا رقدت تاني في السرير وكوعت عاينت لي قبل ما اقول كلمه وقالت يا ولدي المرأة دي جنت... ناس التلفزيون ديل ما فيهم راجلا عاقل المرأة حشاها محروق علي ولدا المات وجنت اجيبوها سايقه الثاني من يدوا الله اشفيها.

[صلاح ودالطاهر]

تعرف يا عباس تلميذي عصمت اخوك ومن هنا انا ارسل له اجمل واصدق السلامات وكت كان معنا في مدرسة الشرطه كل يوم يجي المكتب عندو مشكله بتاعت نقاش المهم انا كنت بشجعو اها مدير المدرسه قال لي الولد ده بضيعو ساي وبتمله راسو بامور ما قدرو وانا كنت متكيف منو وخاصه وكت يناقش الجماعه اها كدي الله يديك العافيه وبسبب عصمت قربوا يطهرونا للصالح العام

[عباس الدسيس]

الاستاذ صلاح والمربي الجليل حقا لكم اليد العليا في ما وصل اليه الاخ عصمت حاليا ولقد اتت ذكراك سابقا مع الاخ عصمت وهو يكن لك كل الود والاحترام والتقدير وفي مرات عديده كانت تاتي ذكراكم ونيابه عنه لكم خالص الشكر وسوف اوصل له تحاياكم باستراليا.

[عوض الكريم الخواض]

التحية لكل الشرفاء الذين نالوا شرف الأحالة الى الصالح ( الخاص) وليس العام ...
فقد خبرناهم وعرفنا معرفتهم وكفآءَتهم و اخلاصهم وتفانيهم فى أعمالهم خدمة للوطن والمواطنين ... يكفيهم فخراً أنهم عندما أُحيلوا خرجوا نظيفى الأيدى والقلوب ... فقراء مادة .. أغنياء نفوس ...
أذكر منهم قريبنا الباشمهندس المرحوم السر كلودة ... والذى أضطر الى الأغتراب بعد عمر ناهز الخمسين عاماً , والحمد لله استطاع أن يبنى مسكناً لأسرته فى بضع سنين من الأغتراب ... الأمر الذى شقّ عليه وهو وكيل لوزارة الري .


والآن ترى صغار موظفى الدولة النافذين يتطاولون فى البنيان دون حسيب ولا رقيب ...
وما يأكلون الا سحتاً قاتلهم الله أنى يؤفكون .

أخى الدسيس بارك الله فيك فقد فتحت نافذة فيحها لظى ...
اكتوى منها عآمة الشرفاء ...
لكن عزاؤنا أن للحق قوة باقية ولو طال الزمان .

[عباس الدسيس]

حبيبنا عوض الكريم شكرا علي المرور والاضافه .... والدليل علي ذلك ان غالبية الذين تم احالتهم للصالح العام وهم في وظائف اخري ان كانت خارج الوطن ربنا ارد غربتهم او داخل الوطن نجد انهم من خيرة الموظفين كما نجد ان الذين خارج الوطن قد فتح الله عليهم تحقيق طموحاتهم وذلك نتيجة لكفائتهم واخلاصهم.

[moh_alnour]

حكومات تجي و حكومات تغور تحكم بالحجي الدجل الكجور
مرة العسكري كسار الجبور
و يوم بأسم النبي تحكمك القبور تعرف يا صبي مرة تلف تدور
ولا تقول بري أو تحرق بخور هِم يالفنجري يالجرف الصبور

هههههههه
و الله يا عباس حنكك طلع ما دِسيس مع الحاجة ;)
حكاويك جميلة يا عباس
همسة : الرحمة و المغفرة للباشمهندس السر كلودة المدير السابق لمؤسسة أعمال الري

[عباس الدسيس]

لقد اجتازت المنعطف الخطر...وأصبحت وحيده في آخر الطريق ؟؟؟
كتب عليها ان تصارع القدر والجميع يقيس نجاحها بسرعة اصطياد عريس لقد عانت اعوام كثيره من نظرات الشفقه لعنوستها التي اهدرت احلامها.
قسمات وجهها اصبحت صارمة، تعاملها جاف مع االزملاء في المكتب حتى أنه لا يجرؤ أحد على الاقتراب منها، كنت اختلس اللحظات احيانا لاتحدث معها بعيدا عن المنعطف الذي تجاوزته كانت تبتسم في وجهي وحالها يقول ... والله انت عايز تواسيني ساكت في حالتي دي... قالت لي مره أنا راضية بحياتي، لكن الناس ما بتركونني في حالي، صاح انا ما أتزوج، هي قسمتي في الحياة الدنيا، ولا يهمني عدم الزواج، ولا يسيطر على تفكيري، ولكن اعمل شنو للناس المحيطين بي ديل.
انا كنت صغيرة أتضايق من الأسئلة المتكررة: ماشه وين؟ ليه لابسه كده ؟ حسي عايزه واحد اسألني اتكلم معاي ما لاقيه، اشوف الزملاء مع زوجاتهم من قلبي بتمني ليهم حياة سعيده انت زي ما عارف حصلت مشكلات كثيره في المكتب لم اكن سبب فيها لاكن برضو اقولوا ده مني انا العانس الحاقده وفاتها قطار الزواج... كل يوم انا جايه المكتب اعاين للمرايه اهرب من تقاسيم وجهي ما عارفه ده بعني لي الهروب من الزمن... هذا حال زميلتنا نجوي افنت زهرة شبابها في خدمة الدوله حتي وصل بها الحال الي ما هوا متناسيه مرور الايام السريع كنت بتونس معاها مره قالت لي:
تعرف يا عباس البنات الشغالات في البنوك والتلفزيون نسبة العنوسه عاليه كان قارناها بالمصالح الثانيه لطبيعة العمل ....المشكله الناس القريبين منهم زملائهم في العمل ما بهببوا ليهم ولا بطروا سيرة الزواج ليهم.... صمتت دون ادني تعليق مني او منها... قالت لي وهي بتضحك تعرف صاحبتي عازه في بنك النيلين صلاح البمشي معاها طوالي داك الراسوا ملان شيب عرفتوا .... كان مباريها طوالي اتونس معاها سبعه سنين يوم سألتوا عازه قالت ليهوا صلاح حقو بعد ده نعرس تعرف قال ليها شنو ... يا عازه بعد ده البرضي بينا احنا منوا انا وانتي فات اوانا الزمن اتجاوزنا خلاص .... قعدة تضحك والله عازه مسكينه قايلا القبه تحتا فكي والراجل الشايب ده عايز اعرسي عازه دي كان ما مجنونه مباريه لي الراجل ده ضيعت عمرا كانت تباري ليها واحد من مصلحه ثانيه انشاءالله من ناس وقاية النباتات علي الاقل كان ممكن اعرسي هي صاح ما حلوة لاكن بتكون يوما كلوا في البنك مع الشغل والعمل الاضافي هو ذاتو بكون بعيد منها بتقابلوا بالليل والليل غطي الجبال لاكن قسمتها ضيعت زمنا سااااااكت....
انت يا عباس خطاباتكم دي مالا اتاخرت كل يوم اقولوا جايه بكره حسي تلقي قاعدين علي اعصابك ... اقول ليك انت اصلوا ما هاماك زي ما شايفه انا بس ياقلبي علي البنات كان طلع ليهن خطابات والله الواحده اسلموها خطابا بي هنا تقع تموت بي هنا... لاكن ما افتكر البنات اشيلوهم صالح عام ديل لا عندهم شغله في الحكومه لا في السياسه الفيهم مكفيهم زي انا دي اشيلوها اودوها وين والله الا المقابر.....
- تعرفي يا نجوي انا بفتكر الخطابات دي اوزعي واحد اكون مقبول لي الزملاء كمان لما اكون عايز اسلم الخطاب لي اي واحد اقدم ليهوا مقدمه كده لطيفه تخفف عنوا لانها لحظات صعبه زي الموت في النهايه اقول ليهوا دي ارادت ربنا.
- كانت لحظات صعبة فعلا نجوي اسمها جاء في الكشف بتاع الصالح العام وخطابا وصل والمصيبه انا البسلمي الخطاب دي تتحلا كيف ياربي الله استر ما تضربني بالخرامه ولا الدباسه امكن تقوم تسكلب وتبكي لي في المكتب ... حضرت نجوي في اليوم ده متاخره عن العمل وكان خطابها بيدي... لاحظت هي من دخولا البنك في حركة سكون غير اعتياديه مشت علي المكتب ختت شنطتا قعدت في الكرسي.... اتوكلت ومشيت عليها شايل الخطاب في يدي اول ما شافتني:
عباس هوي انا ما عايزه ظرافه ولا لطافه ولا تقول لي الله اراد اديني خطابي خليني امشي بيتنا ....

[عباس الدسيس]

moh_alnour شكرا يا الحبيب علي المرور .
الرحمة و المغفرة للباشمهندس السر كلودة ربنا اجعلوا من اصحاب الجنة

[mutasim]

والله منتهى الروعة الظاهر عندنا عدد من الادباء فى المنتدى

[moh_alnour]

عباس هوي انا ما عايزه ظرافه ولا لطافه ولا تقول لي الله اراد اديني خطابي خليني امشي بيتنا

هههههههههه
عفيت منها و الله ، كتلت ليك الدُش في يدك يا عباس ;)

[عبدالله محمد العقاد]

[size="5"]


ضيعت عمرا كانت تباري ليها واحد من مصلحه ثانيه انشاءالله من ناس وقاية النباتات علي الاقل كان ممكن اعرسي

size]


الرائع عباس

ابداع مبالغ و سرد اروع و ضرب امثال و لا اروع و زي ما قال عصمت يوم اخونا عباس ح تكتل زول من الضحك
تحياتي

[عبدالله محمد العقاد]

moh_alnour شكرا يا الحبيب علي المرور .
الرحمة و المغفرة للباشمهندس السر كلودة ربنا اجعلوا من اصحاب الجنة


له الرحمة ذلك الشريف الذي ابى الا ان يأكل من عمل يده و ندعوا الله ان يكون شهيدا أثر ذلك الحادث الذي انتقل به إلى رحاب الخالق عز و جل

[عبدالله محمد العقاد]

تعرف يا عباس تلميذي عصمت اخوك ومن هنا انا ارسل له اجمل واصدق السلامات وكت كان معنا في مدرسة الشرطه كل يوم يجي المكتب عندو مشكله بتاعت نقاش المهم انا كنت بشجعو اها مدير المدرسه قال لي الولد ده بضيعو ساي وبتمله راسو بامور ما قدرو وانا كنت متكيف منو وخاصه وكت يناقش الجماعه اها كدي الله يديك العافيه وبسبب عصمت قربوا يطهرونا للصالح العام



الرائع استاذنا ود الطاهر و الرائع ود الدسيس

حقيقة انا تشرفت بمعرفة الاخ طارق الدسيس قبل الاخ عباس و يبدو لي عباس عرفتك في الاخير مرة كنت عايز حاجة في البنك فطارق دلني عليك
و جئت كم مرة بيتكم و اذكر عصمت كان صغير في سنه يبدو لي في المتوسطة أو في بداية الثانوي و كان بيجيب لينا البارد و الشاي
بعدها تقرقنا في الحياة
مرة واحد من اصحابي حزب امة شرس ( أصلي ) ماسك مكتب الطلاب في الحزب فسجلت ليه زيارة في ام درمان
فقال لي الله جابك في شاب من مدني في الاهلية ( منجض الجماعة ديل نجاض صاح )
و كل مرة يمسكوا و يدخلوا السجن و يطلع من السجن اشد قوة و اكثر اصرار في اركان نقاشه
فتعال معالي عرفيني بيه الزول دة نحن عايزينه معانا في حزب الامة و مستعدين نوفر له الغطاء الميداني لو الجماعة ديل تطاولوا عليه
و على ما أذكر قال لي الشاب دة تبع حركة ( حق )
قلت ليه طيب انا ما بعرفه
قال اكيد من مدني لو ما بتعرفوا اخوانه جيرانه يلا معاي
المهم جيئنا الاهلية الوقت كان قريب المغرب
صاحبي فتش عصمت و قال لي دة عصمت
سلمت عليه و قلت ليه انت ود منو في مدني
قال لي انا اسمي عصمت الدسيس
ماشالله تبارك الله عصمت اخو طارق
قال لي اي
سلمت على عصمت مرة تانية و قلت ليه طبعا انت ما بتذكرني انا صاحب طارق
و اتلفت على صاحبي و قلت ليه معليش الزول طلع مننا و فينا
و اتلفت على عصمت
عصمت شوف الزول دة صاحبي و كنا جايين بغرض كيت كيت
و شوف يا عصمت اسمع من الزول عايز يقول شنو
و لو ما اقتنعت و لا تجامل و ربنا يوفقك
و ده كان اخر لقاء لي مع الرائع عصمت و
ندعوا الله ان يحفظه اينما حل و ان بوفقه

[عباس الدسيس]

الاعزاء معتصم - محمد النور - سلام وتحياتي وشكرا مربع علي المرور والطله البهيه.
العقاد سلامات وتحيه خاصه موصول معها سلام وشوق من الاخ عصمت باستراليا كما تحيه من صديقكم الاخ طارق بجدة واتمني التواصل مع فائق شكري وتقديري