عباس الدسيس
26-06-2009, 09:26 PM
موضوع الفحوصات الطبية والتشخيص عايز كثير من النقاش اصلوا الشغالين عندنا في السودان بالرغم من احترامنا ليهم ماعندهم اوتوكيت التعامل المهني انا حصل معاي موقف عند اجراء الفحوصات الطبية لزوم اكمال المستندات للسفر الي المملكة العربية السعودية بعد اخذ عينات الدم بمعمل استاك وذلك بعد صفوف تبدأ من الساعه الخامسه صباحا والانتظار الممل كان عايز تطلع من الصف تحجز بي طوبه بعد موافقة من هو امامك وخلفك..... ثم يتم تحديد مواعيد لاستلام النتيجة بمظروف مختوم عليه لتسليمها للسفاره السعودية بالخرطوم وفي يوم استلام النتيجه هذا يوم الامتحان يوم يكرم المرء أو يهان ... بمجمع فتح الرحمن البشير اجيك واحد اطلع في كنبه ماسك نتيجة الفحوصات بيد واليد الاخري بها الكشف ....... اخونا يبدأ في قراءة الاسماء بالدور.......وقتين اقول فلان الفلاني تبتسم .. تفرح ... تنطط.. معناها انت نظيف دي عايزه ليها زغروده ادوك ظرف التحليل .. من هناك جري للسفاره انت سعيد… الكلام الفات داك كلوا - فيش - فحص الحمي الصفراء وخلافه من تلقيط الاوراق كلام فارغ ساكت ... والله لاكن خطر يا الايدز.... اخونا الطالع في الكنبه دا لنهاية الكشف ما قال اسمك واطاتك اصبحت… انا كنت واقف صاحبنا شغال فلان الفلاني – انده في الاسماء انا اقول بعد ده – فلان الفلاني انا اقول يا ولد اصبر انت طوالي شفقان – اعاين للظروف في يد الراجل لما الظروف بقيت شوية ... كرعي ما شالني قعدته في الواطة الظروف انتهت قلته خلاص زولك لحقني امات طه ... اقبل وين امشي وين ياربي امشي بالحدود اسمرا اقول للناس ماشي السعودية اطش مليون سؤال داير في راسي وانا قاعد في الواطه متفرشخ خاتي يدي في راسي.... كان معاي جماعة كده الظاهر برضوا معاي في الفيلم واحد كان قاعد في الكنبة مع جلوسي في الواطه الراجل اقوم وإقعد بعد شوية اتكل في ظهري ماحسيت بيهوا والله حقيقة الراجل قايلني كرسي وانا الهموم الدخلت راسي اكبر من حجم الراجل .....اعاين للزول الكان معاهوا الظروف اقول ياربي ده اعمل فيهو شنو ود ال ...... الما قال اسمنا ده..... بعد شوية اشوف ليك واحد جاء عليهوا شايل ظروف قلت ديل ظروف الناس العندهم الايدز ذاتم انا المقعدني شنو ما ازوغ اصلوا وقت ما بدونا ليهوا الظرف الوسخان ده امشي خلاص حارس شنو بعد ده….كمان الاغتراب انا لي شنو ما اقعد في البلد دي بي وسخا وجكومتا الزفت دي غير الهموم والمشاكل ما جابت لينا حاجه ..... سمعنا اشاعة قالوا ناس الامن بجو اسوقوا الناس معاهم الظروف الوسخانه الشايلا الراجل ده.... بعدين قول ادوني ليهو ناس الامن خلوني أقع بيهو وين..... اشوف ليك زولنا طلع الكنبه تاني بدون أي مقدمات طوالي دخل في الموضوع عباس الشريف قال اسمي قلت ود ال ...... ده عايز ابشع بينا ما خلاص احسن سكيتي سكيتي ...تاني قال اسمي ما قدرته اقوم من الواطة كان معاي واحد مهندس صاحبنا من قري الجزيره جاي معاي.... استلم ظرفوا من بدري كان سعيد والله زولنا بسف ساعوط من الفرحة اشتري ليهوا علبة سجاير برنجي... الصباح كنا متواعدين نتقابل نشيل فحوصاتنا نمشي السفارة من قابلتوا قال لي (( ها زول مالك قميصك زرارة تحت او زرارة فوق زي دراويش النوبه)) كان قاعد معاي متحير في موضوعي راسو ضارب ..... وقتين شاف الراجل بقول في اسمي ثلاثة مرات وأنا ساكت قاعد في الواطه قام هو قال ايوه بصوت عالي بدلا عني عاين لي لقي واحد متكل في ظهري دفروا والله رماهوا انا قلته الزول تاني ما اقوم من الواطة قال ليهوا المتكل فيهو ده طوبه ما بتشوف انت..... رفعني من ضراعي وقفت عاينت ليهوا في وجهوا الراجل مبتسم شايل سجارة البرنجي قلته.... هع هع ناس الجزيرة ديل نجيضين والله غير البول هرسيا ما تجيهم الحبه راح صاحبنا قال لي (( ها زول ها انت تليفة مالك مصنقر كده زي العندك جنازه والعره ده تخلي اتكل في ظهرك ما تقول ليهوا تور قادي وقتين جاء عليك...... كدي قوم الزول ده بقول في اسمك نمشي نشوفوا مالوا يلا ارح) والله مع ارح خلاني زي الشفع الصغار انا الوقت داك ما حاسي بي حاجة زولنا جرجرني نص المسافة في النص ما قدرته اشيل رجلي قعدته الراجل واصل خلاني قاعد في الواطه مشي لي بتاع الكنبه الطالع فوق شايفوا اتكلم معاهو بعد شويه زولنا قعد كورك (( ها عباس ها عباس تعال.. اصل هنا الناس.. ديل قالوا تقاريركم اتاخرت كانت مع مراسلة تاني تعال شيل ظرفك ها زول ها نضيفه انت وقت بتخافوا بتهبشوا مالكم قوم تعال )) الناس كلها تعاين لي.... قلته يا جماعة الزول ده مجنون نهبش شنو ولا شنو..... لاكن بيني او بينكم كان بقول في كلام غريب خلا الناس تتلفت لي انا ما اهتميت بيهو ما كنت مركز في مضمون الكلام لاكن جاني نشاط قوي نطيت من الواطه زي حمل الخريف وقت وقفت لقيت ما عندي جزمة في رجلي حفيان قلته ما مشكلة جريت لي صاحبي المهندس والراجل الشايل الظرف.... اول كلمه قلته ليهوا يا خوي الحاصل شنو بتهذيب وانكساره…. قال لي استلم ظرفك خلينا نشوف شغلنا...... قلته اولا انستلم ظرفي من الزول اللئيم ده كان عايز اجيب لينا جلطه… بعد استلمت ظرفي والله العظيم الراجل ده اديتوا كف بي يدي الشمال لانو اليمين كان فيها الظرف قلبته تاني اديتو ليك بيدي اليمين والله لي حسي اكون لافي في السودان مدور من كفي.