هل دا .............مصدر للفخر(ما بعرف العنقريب)

[بنت النيل]

الايام دي في حاجات غريبه قاعده تحصل والاغرب منها انها بقت
مصدر للتباهي والفخر
جد انا عايزه اعرف الحلو شنو في انو الواحد هو سودااااني ويتكلم لهجه ما لهجتو ويلبس توب ما توبو
او انو الواحد يعمل شعرو بالجيل ويعمل فيها تامر حسني ليه تامر احسن منو في شنو
وغير كدا البنات بقن بس بعرفن (انا ما بعرف ، ما "فيني"يعني بالسوداني ما بقدر)
ليه كدا يا جماعه دا ما كلامنا ولا طبعنا ولاتربيتنا واماتنا وحبوباتنا ما علمونا كدا
ليه الواحد يفخر بي انو ما بسمع غنا سوداني ،او انو ما عايش في السودان ودي اول مره يشوفو (بلدكم دا)
وين العنقريب والمنقد والهبابه والشرقرق والجبنه في ضل النيمه المرشوشه
ونحن عندنا احلى تراث وماضي وحاضر وغد بعون الله

[مبارك عمر عباس]

ديل ناس عندهم وهم كبير.المصيبة انو في ناس كبار في السن يجي يغترب سنة واحدة طوالي يغير طريقة كلامو!!!!!!!في حاجات كدة والله تحير.

[esmat]

والله عوجة اللسان دي انا بتزعليني زعلة
وبعتبرهم ناس فقدوا هويتهم لأنها اصلاً
كانت هشة وغرتو الدنيا ونسى وتباهى بغير اهلو
بجيك راجع للموضوع دا عشان في نماذج "الشرقرق دا ما سمعوا بيه"
في المنتدى دا

[أبوحراز]

مثل هؤلاء مرضى نفسيون ويحتاجون الى جلسات علاج مكثفة
وكثيرون لو ربنا منحهم الكثير من المال لقلبوا الدنيا رأساً على عقب
يا أختي هناك افرازات كثيرة ظهرت بالمجتمع
منها تمرد واضح وصريح على العادات والتقاليد النبيلة
ودخلت مفاهيم اخرى لتطرد هذه العادات
الاحظ أن الكثير من الأسر بدات تكثف من الإحتفالات بسبب وبدون سبب
احتفالات ميلاد لاحصر لها
احتفالات ضخمة بعد نهاية السماية
وغيرها من الممارسات الخاوية
ولو انتقدت ذلك لأتهموك بالتخلف والرجعية
فالنفرح كما ينبغي
ولكن لاننسى سودانيتنا

[tigani18]

الاخت بت النيل موضوعك فعلا يستحق وقفة كبيرة جدا,,
لكن بعتمد برضو على شخصية وقيم الانسان والحمد لله الواحد ليهو سنين طويلة بالغربة ماتعوج لسانو ولا بالغلط ,,,
كنا قبل سنين ندرس في أحد المعاهد التابعة لجامعة الملك سعود ,, كان الأمر يتطلب أحيانا أن نجاري الطلاب السعوديين في المحاضرة ليفهموا ولكن كان صديقنا ايهاب يصر دوما بقوله(أنا مابغير كلامي ليه هم مايفهمو كلامنا),,,
وفي نماذج الله لايوريك,,,(الحين ,,,إلا ,,, ليش ,,سم ,,,مادري,,,) مع إنو الواحد بخسر شنو لو قال ( هسة,,, آآآي ,, لي ’’’ أيوه ,,, ماعارف,,, )

شكرا لك مرة اخري ولي عودة,,

[حسام التنين]

اكتر حاجة بتزعلني انو الواحد اجي من اي دولة اجازة

لمن اجي احكي اقول ليك نحن عندنا هناك

كانو جاي السودان مامورية

[ودالبدري]

السلام عليكم
ياجماعة شوية شوية عليهم بعض الاحيان الحاجة دي بتجي عفوية اما المصطنعة فبتكون ظاهرة

مع تحياتي واحترامي

وتعجبني الغيرة فيكم

[محمد حسين (المميز)]

وين العنقريب والمنقد والهبابه والشرقرق والجبنه في ضل النيمه المرشوشه



دحين انت ايش تبغي :p

هسه انت دايره شنو :D


كله كوم والجيم كوم لا هي معروفه شيم ولا ميم ولا نيم :confused:



والجبنه في ضل النيمه المرشوشه



:eek: :eek:

نيمة العاقب ؟؟ :D :D

[صاحبة السمو]

موضوع بعتبروا هااااااااااااااااااام جدا وانا واحده عانيت من الحاجه دي وخصصوصا السنه الفاتت لما دخلت الجامعه بعتباري نشأت بالسعوديه ودرست هناك الابتدائي والمتوسط والثانوي من مدرسات سعوديات بلهجه سعوديه فاكيد تاثرت بيهم ..(دي 12 سنه ) مع إنو تعامل البيت لهجه سودانيه بس ما كانت كافيه لما عانيت من تعرف على تراث بلدي واهم الاشياء فيه طبعا كرهوني في الجامعه بكتر مازهقتهم ترجمو لي والحمد لله سلكت والى الان اعاني من حرف الجيييييييييييييم وما ادراك ماهي الجيم النطق الصاح فيه ياربي شنو؟؟ .. لما كنت بنزل السودان اجازه طبعا شهرين فقط في نهايتها يدوبك فكت تكون منك الوحشه والخيفه وفهم الناس وطباعها باعتبارك زول جاي بلد حيشان واسعه وناس داخله ومارقه من جو شقق مقفله وناس تجي نهاية الاسبوع فقط ونادر جدا كمان .

اما البيتصنع دا واضح جدا جدا ومنظروا بيكون بايخ ....












بلف وبحي...

[ناصر عمر دبيب]

الايام دي في حاجات غريبه قاعده تحصل والاغرب منها انها بقت
مصدر للتباهي والفخر
جد انا عايزه اعرف الحلو شنو في انو الواحد هو سودااااني ويتكلم لهجه ما لهجتو ويلبس توب ما توبو
او انو الواحد يعمل شعرو بالجيل ويعمل فيها تامر حسني ليه تامر احسن منو في شنو
وغير كدا البنات بقن بس بعرفن (انا ما بعرف ، ما "فيني"يعني بالسوداني ما بقدر)
ليه كدا يا جماعه دا ما كلامنا ولا طبعنا ولاتربيتنا واماتنا وحبوباتنا ما علمونا كدا
ليه الواحد يفخر بي انو ما بسمع غنا سوداني ،او انو ما عايش في السودان ودي اول مره يشوفو (بلدكم دا)
وين العنقريب والمنقد والهبابه والشرقرق والجبنه في ضل النيمه المرشوشه
ونحن عندنا احلى تراث وماضي وحاضر وغد بعون الله


يابنت النيل اسمعي دي قالوا ليك حرمة مشت الحج وبعد الحج جلست مع بنتها شهرين وبعدها جاءت السودان في الحله وبعد يومين من الوصول مشت لي بتاع الخضار وقالت ليو انا بدي بطاطا قام عمك بتاع الخضار عاين ليها كويس وقال ليها شنو انا بدي بطاطا انتي مشيتي حج ولا مشيتي تدرسي لــغة .

[بنت النيل]

مشكورين على المرور المميز وتنين انا وتجاني وعصمت ومبارك وابو حراز ويا ريت نحاول نصلح
اخوانا ديل الا من ابى

[بنت النيل]

اما يا ود البدري فنحنا ما قصدنا العفويه مع انه اللوم عليهم برضو
او على اهلهم الماعلموهم لغتهم ولا عرفوهم هويتهم

[بنت النيل]

اما انت يا صاحبة السمو واصلي معانا في المنتدى دا ولسانك بنعدل بعون الله
حتتعلمي حاجات عمرك ما سمعتي بيها من حبوبتك بنت النيل هههههه
وحنتلاقى كتير

[بنت النيل]

يا ناصر البطاطا هينه ما شفت ليش وهاذا والحين وطفشان
مضحكات مثيرة للبكاء

[esmat]

بلف وبحي...



اسي عليك يا بت النيل البت قالت ليك بلف وبجي
دي عايزة تعلميها شنو تاني - إلا فك حرف الجيم

[العاقب مصباح]

بنت النيل
والله حكاية
مرة كنت قاعد مع طالب سودانى
صدفة يعنى
واتونس معاهو بى مزااااااج
كيف القراية يا ولدنا
وعايز تقرا شنو
ووووو الى اخره
فجأة الولد جاهو تلفون
والله اللسان اتعوج عوجة جبادة
واتكلم بى لغة لا سمعتها لا شفتها ولا اى شئ
اخدت بعضى ومشيت
كتير جدا بنلاقى فئة زى دى
فى ناس اخدوها كمواكبة
يعنى يكون مواكب العالم العربى
وبيتكلم مرة بى لهجة خليجية ورمة لهجة شامية ومرة بى لهجة مصرية
بتغاظ من الحاجة دى وبشاكل فيها كمان
عندى زول بعرفه
ما متربى فى الخارج
يعنى ليهو سنة واحدة ويمكن اقل
والله يا بتنا لحظة يجيهو تلفون من جنسية عربية انا خلاص بطلع من الشبكة
وبشاكله كتير
بيقول لى ما بيفهم لغتنا
ليه يعنى لغتنا مالها
وطيب نحن فهمنا لغته كيف
بصر شديد انو اتكلم بى لغتى لأى شخص
اذا عايز انه يفهم حيفهم
واذا ما عايز مستعد اعيد ليهو الكلام مليون مرة
بس كله ولا اغير لهجتى
لأنه دى الهوية
ودى الثقافة بتاعتنا...
اما حكاية الناس الاتربت فى الخراج دى دى قصة كبييييييررة
ربنا يقدرنى واجى اكب ليك فيها نقة هنا

[سمرقند]

موضوع جميل جدا ومهم لانو في الزمن دا بتحصل حاجات غريبه الناس لوفتحت قناة الال بي سي ساعه حضرت ليها مسلسل لبناني بعدا طوالي تغير لهجتا للبناني وكذلك مصري وسعودي ...و هاي وجاو وياي و واااااو ومره حلو وجوالي ووووو والمشكله ثقافه سودانيه مافي وكلام بنت النيل صحيح ميه الميه الواحده تكون سودانيه ميه الميه وعايشه في السودان تتكلم لغه تانيه دا والله ماشي مقبول ولامعقول

[ابوالنور]

الايام دي في حاجات غريبه قاعده تحصل والاغرب منها انها بقت
مصدر للتباهي والفخر
جد انا عايزه اعرف الحلو شنو في انو الواحد هو سودااااني ويتكلم لهجه ما لهجتو ويلبس توب ما توبو
او انو الواحد يعمل شعرو بالجيل ويعمل فيها تامر حسني ليه تامر احسن منو في شنو
وغير كدا البنات بقن بس بعرفن (انا ما بعرف ، ما "فيني"يعني بالسوداني ما بقدر)
ليه كدا يا جماعه دا ما كلامنا ولا طبعنا ولاتربيتنا واماتنا وحبوباتنا ما علمونا كدا
ليه الواحد يفخر بي انو ما بسمع غنا سوداني ،او انو ما عايش في السودان ودي اول مره يشوفو (بلدكم دا)
وين العنقريب والمنقد والهبابه والشرقرق والجبنه في ضل النيمه المرشوشه
ونحن عندنا احلى تراث وماضي وحاضر وغد بعون الله
عفيت منك يا بت النيل دحين اتي بتجيبي النضمي الحلو ده من وين
قلت لي تامر حسني مالو

[بنت النيل]

والله يا سمرقند ويا العاقب فعلا دا الكلام الحاصل
ويا النور تامر حسني جد ما احسن منك ولا من المتصور معاك دا
الا اذا كنتو من هواة (التلوين)اقصد التقليد
ومشكوريييييييين على مروركم

[tigani18]

اما انت يا صاحبة السمو واصلي معانا في المنتدى دا ولسانك بنعدل بعون الله
حتتعلمي حاجات عمرك ما سمعتي بيها من حبوبتك بنت النيل هههههه
وحنتلاقى كتير

صدقتي يابت النيل قوليهاكل يوم تمشي على النفاج كم دقيقة كده ولسانها يمشي"سيدا"

[صاحبة السمو]

صدقتي يابت النيل قوليهاكل يوم تمشي على النفاج كم دقيقة كده ولسانها يمشي"سيدا"





ياخي انا جايكم جري:D:p

بث براحه براحه :D:D:D

[esmat]

ياخي انا جايكم جري:d:p

بث براحه براحه :d:d:d


براحة ما تقعي الواطة حر

الجري دا ما حقي

[بت الشبارقه]

مره عندنا قريب لينا مشي ليبيا بالبر
اخد في الطريق قريب شهر
وصل اشتغل شهر كشوهم
رجع تاني قريب شهر في الطريق بالحمرا
وصل
وهاك يا لويه لسان
باهي ...كويس يعني
شيكاره...كيس يعني
ضمان ...مركز صحي
دا لو كان قعد سنه كان نسى انو سوداني خالص

[بنت النيل]

يا صاحبة السمو تعالي براحه براحه ما تقعي انا مستنياك وعندي معاك ونسه طويـييييييييييييله

[بنت النيل]

لكن يا بت الشبارقه دا حالتو صعبه لكن شكلو لسانو اتلوا من المشاوير الكتيره ومسيخه دي
وشكرا على المرور والمشاركه العسل دي

[esmat]

دا لو كان قعد سنه كان نسى انو سوداني خالص

بت الشبارقة ربنا احفظك واحفظ بناتك ديل يارب

غايتو زي دا نقول الحمد لله انو ربنا ما كتب ليهو
قسمة برا بلدوا زي ما قلتي كان نسي انو سوداني

[بت الشبارقه]

بت الشبارقة ربنا احفظك واحفظ بناتك ديل يارب

غايتو زي دا نقول الحمد لله انو ربنا ما كتب ليهو
قسمة برا بلدوا زي ما قلتي كان نسي انو سوداني

يديك العافيه ويحفظك كمان تسلم والله
والله الامثله كتيره

[ام عمورى]

نحنا المشينا ليهم في بلادهم....ونحنا الاشتغلنا عندهم.....ونحنا كموظفين في مؤسساتهم واجبنا نخدمهم لما يراجعونا....ونحنا المجبورين نفهمهم.....ونحنا المجبورين نتكلم معاهم بي لغتم لما مايفهمونا....وصعب اصدق البقول لي اتكلمتة مع جنسية تانية بي سوداني مطلق من غير حتى ما يشرح معنى كلمة واحدة... بعض كلامنا السوداني صعب...ولغتنا ما مشهورة ذي المصرية او الشامية....الجماعة ديل فرضو لغتهم بالمسلسلات عشان كدة لما جو الخليج لقو الخليجيين وغيرهم فاهمين وحافظين كلامهم...فما اضطروا يوضحو شي...اما نحنا فمضطرين نشرح بعض الكلمات ونشطب بعضها ونستبدلها بي كلماتهم عشان نعرف ناخد وندي ونتونس ومانقطع الكلام كل شوية ونزهج ونزهجهم معانا...وحتى لما نجي نشرح تراثنا وبعض عاداتنا بنحتاج نشرحا ليهم بي خليط من الكلمات معظمها سوداني واضح ما بحتاج شرح والباقي بي مقتطفات من باقي الدول...لازم نعمل كدة عشان نوصل انو السوداني يقدر يتعامل مع الجميع بكل سهولة ويقدر يختلط مع الكل ونعكس وجه جميل ولو اضطرينا نعوج لسانا شوية مامشكلة...وبنتكلم سوداني مع السودانيين وقدامهم يعني ماداسين لغتنا منهم وكتير جدا هم بسألوا من خلال الونسة عن بعض المصطلحات السودانية السمعوها وحابين يعرفو معناها وبي عوجة اللسان ديك بنشرحا وبتعترف ليهم انها صعبة شوية وتاني لما نستخدما ما بتحتاج شرح..كدة بنقدر نوصل لغتنا ليهم لكن الموضوع داير طولة بال...مش نقول هم لازم يفهمو لغتنا غصبا عنهم...ما اظن حايمشو يفتشو للمعاني...وانتو ادرى بالخليجيين وقلة صبرهم...
وعذرا للاطالة ودي وجهة نظري من خلال احتكاكي المتواضع مع بعض الجنسيات الاخري..والتي احببت ان اشارك بها ولا افرضها عليكم..فلكل وجهة نظره الخاصة..

مشاققة:مع السودانيين ما بنعوج لسانا...والبتصنعوا ديل ما معانا..ولغتنا عاجبانا....بس قصدنا خير...ودمتم لنا رمزا وقدوة بغيرتكم على سودانيتنا....